صلاح إدريس ظالم أم مظلوم

Posted: الخميس,24 أبريل, 2008 by ودالزبير in إجتماعية

لعل المقالات التي كتبت عن السيد صلاح احمد إدريس تكفي لإنشاء عدد مقدر من الكتب متوسطه الحجم فمنذ بروز الرجل كليله القدر بالنسبه للبعض وقصه نجاح سوداتل وموباتل وإرتباط هذا النجاح بشخصه بإعتباره أكير المساهمين في ذلك الوقت قبل ان يبيع نصيبه بهما مروراً بقصف مصنع الشفاء وهو صاحب المصنع ودخوله في معركه قانونيه مع الإداره الأمريكيه والحديث عن التعويض الضخم الذي قبضه نظير تنازله عن الدعوى كل هذه العواصف الإعلاميه جعلت الرجل تحت دائره الضوء وموضع الإهتمام ومما زاد هذا الإهتمام ولوج الرجل المجال الرياضي بدايه داعماً لمجلس إداره نادي الهلال ثم دخوله في صراع إداري مع رجل الأعمال الأخر طه على بشير من أجل الفوز برئاسه مجلس إدار نادي الهلال هذا الصراع الذي إستخدم فيه ولأول مره في تاريخ الرياضه السودانيه التشهير بالآخر لدرجه وصف طه على بشير ببائع الموت ( كنايه عن عمله في مجموعه حجار والتي تنتج سجائر البرنجي ) أضف إلى ذلك فإن الرجل كاتب يكتب عمود يومي في عدد من الصحف بل هو يملك صحيفه رياضيه وأسعه الإنتشار .. ولوج صلاح إدريس العمل الرياضي أدخله في صراعات لا أول لها ولا آخر فمن رئيس الإتحاد العام كمال شداد إلى صحفي نادي الهلال خالد عزالدين دسوقي وبنظره محايده نرى أن عمله في المجال الرياضي قد إستعمل فيها الأسلحه التي يفهمها هذا الوسط تماماً من شتم وضرب تحت الحزام . لم يكتفي بالرياضه والكتابه الراتبه في الصحف بل أبحر بعيداً في دنيا الفن وأصبح ملحناً وبدأ يلحن بإسم على أحمد إلى أن تم الكشف على شخصيته الحقيقيه وهنا كان يخطئ ويصيب وعلى الرغم من أنني مجرد متزوق للفن ولا أملك أدوات النقد لكنني كمتذوق فقط يمكن أن أقول أن أغنيه ( أعزريني ) والتي صاغ كلماتها المبدع الحلنقي وأداها الرائع سيف الجماعه ولحنها صلاح إدريس قد تكون وأحده من أجمل  الأغاني التي صدرت في العقد الحالي ومطلع الأغنيه يقول أعذريني الدمعة دي حتبقى أخر دمعة لي.
وتاني لو قربت منك يبقى ليك الحق علي

أعذريني محال أعاود تاني ريدتك وأمشي ليها …
ولا أسرح في عيونك والطفوله الضاجه فيها …….

أو الأغنيه االثانيه ( مامشكله ) ولاتي صاغها أيضاً الحلنقي وأداها جمال فرفور تعتبر علامه فارقه في مسيره فرفور الغنائيه . مواصله للجانب الأدبي في شخصيه صلاح إدريس فقد قام بإحاضه نفسه بعدد كبير من الشعراء وعلى رأسهم الحلنقي وأزهري محمد علي وعدد آخر لا يعد ولا يحصى ووفر لكل هؤلاء بيئه صالحه للإنتاج الأدبي .نأتي لصلاح إدريس السياسي وهو عضو المكتب التنفيذي للحزب الإتحادي الديمقراطي وبهذه الصفه كان مهندس إتفاقيه جده بين مولانا الميرغني والسيد على عثمان محمد طه والتي أفضت لإتفاقيه القاهره الشهيره ولكنه مؤخراً إنقلب على الحزب ولزم منزله محتجاً على الأوضاع بل أن زوجته إلتحقت بحزب المؤتمر الوطني ولا نستبعد أن يلتحق هو الآخر بحزب المؤتمر الوطني فالرجل لا يمكن التنبؤ بما يمكن أن يفعله .

ختاماً هذا الموضوع ليس مدحاً ولا قدحاً له لكن عرض لبعض محطات حياه رجل ملأ الدنيا وشغل الناس قد يكون أخطأ هنا وأصاب هناك لكن المؤكد أنه شخص يحرك المياه الراكه أينما حل أو إرتحل . أرجو مساهمه الجميع بما يملكون من معلومات قد تساعد في رسم شخصيه السيد صلاح إدريس حتى نستطيع أن نحكم هل هو ظالم أم مظلوم

About these ads
تعليقات
  1. Stricker قال:

    ود الزبير
    فى تعليق بسيط – فى غفلة من الزمان اصبح هذا الشخص فى هذه البلد ( التى ليس لديها وجيع )فى موضع سيادة واصبح هو الامر الناهى فى ( مجلس الهلال ) مثلا وانضم له مجموعة من الكتاب المرتزقة والشعراء المطبلية له وغيره كثير مما يصيب الشخص بالغثيان – فهو ظاهرة كما قامت سريعا – سوف تتلاشى ايضا سريعا .

  2. aflaiga قال:

    شباب : صلاح ادريس – ظاهره جديره بالتوقف عندها وهو كما يحلو لى تسميته هارون الرشيد السودان – له كما هارون حاشيه من حارقى البخور ومروجى الكرامات والمطبلاتيه – لكن دعونا ننظر للمساله من بابين :
    اولا رزق المجانين على الهبل – فوجود شخصيه مثل صلاح ادريس فى مجال ما تتيح بابا للرزق للكثير كل حسب تخصصه يعنى ممكن واحد مولانا نص كم يجى الصباح لى صلاح يقول ليهو والله امبارح شفتك فى المنام لابس ابيض فى ابيض وجنبك سيدنا ابوبكر وجيتو صحيتونى ومشينا الحج سوا وقوم يا صلاح حجج مولانا !! ولا تجى مره مفتحه تقول ليهو والله امبارح فى المنام جيتنى واديتنى قروش اتم بيها عرس بتى وقوم يا صلاح تم العرس !! ولا يجى واحد ملحن يقول ليهو والله فى راسى لحن قدر ما حاولت اتمو ما قادر لمن جانى هاتف من دار الهاتف قال لى اللحن ده ما حقك ده مفصل لى صلاح وقوم يا صلاح شيل اللحن وادى الراجل خلو رجل لللحن !! وهكذا واهو كلها زى ما بيقول جبرا قرشين حلوين ….
    ثانيا ربنا يا جماعه ما بينزل يدى زول مصاريف اليوم ولا قروش علاج بتو لكن بيسخر زى ناس صلاح ديل يجيهو واحد اعلاماتى مرتزق يقول ليهو والله الفنان فلان عيان وراقد فى حوادث امدرمان وسمعت تحت تحت كده انو جمال الوالى حيتكفل بى علاجو وقوم يا صلاح رسل اسعاف للحوادث ومن الحوادث للمطار ومن المطار للندن او الاردن وقوم يا الراجل اتعالج وقومى يا جرايد الشمارات اكتبى صلاح ادريس لا شفاء الا شفاءه هو الشافى استغفرالله العظيم !!!
    اها يا جماعه فى زمن ركوب الزلط والمشى الغلط ولبس الكط ده خلو الناس تسترزق من المجانين والهبل ووساءل ربنا واسبابو .. الحقد ليكم شنو ؟
    اما من اين اتى صلاح ومن اين له هذا ولماذا ؟ فدى قصه طويله السؤال عنها بدعه فى زمننا هذا يعنى ممكن تسال افليقا باع موبايلو ليه ؟ ولا ود الزبير قايض عربيتو وشال الفرق ليه ولا السعيد شغال بالمساء فى محل اتصالات ليه ؟ دى اسئله ممكن تلقى ليها اجابه !! لكن قروش البتاع بتمشى وين وقروش فلان جات من وين دى الاسئله التعسفيه ذاتا ولا شنو يا هفسه ؟

  3. ودالزبير قال:

    الأعزاء إسترايكر وأفليقا
    بدايه شكراً على المرور … لكن دعوني أتوقف حول نقطه أشرتما لها بشكل وأضح وهو السؤال الذي برز مع بروز السيد صلاح إدريس من أين جاءت هذه الأموال ؟ ولعل العقل الجمعي لأغلب أفراد الشعب يتحدث عن عمليه غسيل لأموال يقوم السيد صلاح بها أو أن هذه الأموال غير شرعيه ولكني أجد نفسي ضد هذه الرأي لسبب بسيط جداً من المعروف أن السيد صلاح من كبار رجالات الحزب الإتحادي على الأقل حتى الآن ومن المعروف أن الحكومه ممثله في المؤتمر الوطني تقوم بمحاربه أي رجل أعمال لا ينتمي لها ووسائل المحاربه كثيره ومتنوعه وكلنا نعلم مصير أغلب الرأسماليه القديمه التي تم رميها بعيداً عن السوق ودونكم إنضمام عدد كبير من التجار مؤخراً إلى حزب المؤتمر الوطني فلو كان هناك مجرد شبهه حول هذه الأموال لكان صلاح إدريس خلف الشمس الآن وللرجل أعداء بعدد النمل في البلاد وكلهم يستعملون أي سلاح للنيل منه وهو أفضل من يصنع الأعداء في السودان حالياً فهل يمكن أن نصدق إن أعداءه الكثر لا يملكون دليل على أن أمواله مصدرها غسيل الأموال ؟ لا أظن ! حدث آخر يعزز هذه الفرضيه وهو صراعه مع الإداره الأمريكيه السابقه حول تعويضات مصنع الشفاء وهؤلاء لا تخفي عليهم خافيه في دنيا غسيل الأموال حيث يسيطرون على إقتصاد العالم أجمع ويعلمون عن أي دولار من أين جاء وفيما أنفق . فلو كان الرجل كما تظنون لخسف به الأمريكان عن وجه الأرض .
    من جديد صلاح إدريس إنني أكتشفت أنه يغني أيضاً أها يا أفليقا دي برضو قول فيها إنه جاب ليهو زول وقعدوا وراءه وهو بيفتح خشمه ويقفلوا ساكت . وقناه هارموني تروج هذه الأيام لسهره ستبث مع الرجل قريباً وفيها يتحدث ويلحن ويغني كمان فانتظرونا ومع هارموني مش حاتقدر تغمض عينيك

  4. خالد مدني قال:

    الاعزاء ود الزبير استرايكر وافليقا صباحك خير …
    صلا ح ادريس اعجوبة هذا الزمان في السودان خرج علينا فجأة كما الجني من قمقمه وبظهوره المفاجئ رفع سقف كل شئ من المنافسة بين الهلال والمريخ الي التباهي بالمال والاعمال الي الصرف البذخي جدا علي اشياء منها ما هو لوجه الله ومنها ما هو للظهور الاعلامي او الدعاية والاعلام فهو في النهاية رجل اعمال .
    وكما اسلفتم يظل السؤال من اين له هذا لا اجابة له الا عنده ونكتفي هنا بالتعجب من حجم ثروة شخص يدين له نادي الهلال بتسعة مليارات بالقديم .
    اخيرا يتمتع السيد صلاح ادريس بمواهب عديدة منها الشعر والتلحين والفهم الاداري المتطور والمقدرة الفائقة على صناعة الاصدقاء / الاعداء .

  5. ودالزبير قال:

    خالد مدني
    صبلح الخير يا جميل
    لحدي هسه يا خالد ما شفنا ليك بوست شنو القصه يعني شغال تعليق بس . أطلق لكيبوردك العنا وأكتب وخلي التعليق علينا نحن . شكراً لمرورك وصلاح إدريس حدوته سودانيه أتوقع أن يكون ختامها دراماتيكي كشخصيه الرجل الذي يعشق الإبهار دوماً وبقى زي قصه المسطول السألوهو الثعلب بيلد ولا بيبيض فقال والله الثعلب ده مكار وممكن تتوقع منه أي حاجه . كذلك صلاح إدريس ممكن تتوقع منه أي حاجه في أي حته . تحياتي

  6. خالد مدني قال:

    يا ود الزبير والله كل ما الواحد يجي يكتب بوست يلقى الكيبورد ما مطاوعه … طبعا الحل انو الواحد يكتب بره وينقح وينزل في الموقع مش كده ؟ طيب اقول ليك قوله اي حاجة كتبتها سواء هنا او في اي مكان اخر ما حصل راجعتها ولو راجعتها ما بقدر اخليها يعني اي حاجة راجعتها ابدتها … الحل شنو ؟
    بعدين البوست هنا ما زي الكتابة في اي حته تانية لانو مفروض يكون فيهو فكرة ومعلومة ودعوة للحوار او العمل لاجل هدف مشترك لذلك لازم يكون مكرب ومتعمد علي معلومات يمكن الرجوع اليها للمناقشة .. ده راي في موضوع البوست عشان كده لما اتكلمت مع افليقا قلت ليهو انها مسئولية كبيرة … الكلمة وما ادراك ما الكلمة … ممكن الواحد يكتب كلام حلو ومعقول ويرضي عدد كبير من الناس لكن في الاول لازم الواحد يكون راضي عما يكتب لذلك التعليق بيكون سهل وميسور لكن البوست !!! ده كلام تاني … شفت يا ود الزبير اخوك خواف كيف ؟

  7. د.ياسين شمباتى قال:

    ود الزبير .. لك التحية على نفض الغبار عن موضوع شغل السودان لفترة طويلة..
    بدأت بالبحث عن مصدر اموال المدعو صلاح ادريس,,من المعروف عنه انه كان موظفا عاديا بقسم الائتمان فى احد المصارف السعودية_ربما كان مصرف الاعتماد الدولى_ويقال انه سرب معلومات عن قرب افلاس البنك لاحدى الاسر القابضة علىالاموال بالمملكة(اسرة بن محفوظ) فكافئوه بمبلغ من المال غير يسير!!!!لو صدقت هذه القصة فهذى خيانة للامانة بصورة لاتقبل الجدل,,ولو صحت ايضا فهل يعقل ان تكون المكافأة بهذا الحجم!!!؟؟؟؟؟؟؟؟
    اما عن قصة مصنع الشفاء للادوية,,فهنا يكمن مربط الفرس,,وتتضح النية الخبيثة المبيتة من قبل امريكا تجاه السودان و حسن اعدادها لعميل سودانى وحبك قصة تذهب عنه الشبهات وتمده بمال شرعى بموجب قوانين التعويضات الامريكية_ولا عجب_
    الم يسأل احدكم نفسه لماذايشترى المدعو صلاح ادريس فقارات الاقتصاد السودانى ويغلقها الواحدة تلو الاخرى؟؟و دونكم مصانع الزيوت بمدنى و مصنع الغزل والنسيج بالحصاحيصا و مصانع الدقيق بالخرطوم و بيطار وما ادراك ما بيطار!!!!!!!!!
    كل هذه الحقائق تؤكد قذارة مصدر امواله بغض النظر عن ماهية المصدر..
    ثم عرجت على مقدراته الفنية التى ظهرت فجأة,,هل الفن عيب فى نظره ام لماذا التحف عباءة (على احمد)!!؟؟؟ وهل الشعر و التلحين يأتيان على الكبر هكذا من غير ما خلفيات او ارهاصات؟؟ ما هكذا تورد الابل يا صلاح!!!!!!!
    اما الرياضة فلا اختصاص لى فيها وانت _يا ود الزبير_ بادرى منى بما احدثه الرجل بمجلس ادارة الهلال وشراءه لذمم الصحافيين الرياضيين ومحاربته لخصومه باردأ الاسلحةواقذرها..هذاما اردت ايضاحه عن رجل حاول اثبات النظرية الدارونية بالنشوء من العدم!!!
    ولربما صارمثالا سيئا لغيره,,فهاهو المدعو اشرف سيداحمد الملقب بالكاردينال وصاحب صفقة السيارات المشبوهة مع حكومة الجنوب قد بزغ نجمه كرجل اعمال وشاعر وملحن ورياضى مخضرم!!!!!!!!
    لك الله يا وطنى الجريح…………..

  8. aflaiga قال:

    خالد مدنى : خوفك اعلاه من اروع انواع الخوف وليت الناس جميعا يخافون مما ينطق السنتهم فما يكب الناس فى النار الاحصائد السنتهم – والله يا خلودى كل يوم بنكتشف فيك جنبه سمحه – ده شنو الزول السمح داير ما يدور ده ؟ نهجك فى الكتابه يذكرنا باخينا صالح – الذى من فرط خوفه لله نخاف ان نتهور فى الحديث معه – المثل المقلوب يقول خاف الله وخاف الما بخاف الله وانا من هنا اقول خاف الله وخاف البخاف الله . حقيقة نحتاج لكوابح بناءه مثل الذى تتبنونه هنا – فرمولنا لو كسحنا وكسحونا لو فتحنا انتو نحنا ونحنا انتو – ولا شنو ؟

  9. ودالزبير قال:

    خالد مدني ياحلو
    لو على المراحعه اصلاً اخوك ماقاعد يراجع حاجه كتبها وزمان كان عندي حكمه مأثوره بنهي بيها تعليقاتي وهي ( الأخطاء المطبعيه على مسئوليه قارئها ) لكن مادام إنت قلت كده خلاص يازول على كده ده راح يكون آخر بوست أكتبه … اها ودعتكم الله

  10. khalidmadani قال:

    يا ود الزبير داير تطلعني من المرجفين والمخذلين لا والله انا ما قصدي كده ولا قصدي اقدح -دي قويه – في كتابات الاخوه البوستنجية لكن بس وريتك المخاوف التي اقعدتني عن الكتابة في هذا المحفل – دي اقوى من ديك – بعدين انا الان بجهز في بوست وفقا للمعايير اعلى اعلاه وكتبت الكلام الفوق ده عشان اعمل لي كوم رمله لو دقيت الدلجة اقع فيهو … وقع ليك ؟

  11. أبو محمد (دبي) قال:

    دائماً في الزمن الردئ وتسلط الانظمه العسكريه والديكتاتوريه والانهيارات الاقتصاديه والاخلاقيه يظهر بعض البرٌوس ويجد من يطبل له ويحرق البخور , ويجد بعضاً من الجهله الذين يعتبرونه مبعوث العنايه الإلهيه(خصوصاً إذا كان قادماً من السعوديه ويحمل جوازها)…

    هذا الصلاح اليس هو موظف بنك النيلين بالدويم حتي نهاية السبعينات , ام شخص آخر ؟؟؟ خرج من السودان بشنطه أعارها له النقيب شرطه محمد نور بدوي الامين حينها (عميد معاش متقاعد حالياً) ولايزال علي قيد الحياه بمدينة جبل الاولياء.
    ولم يٌعيد الشنطة التي إستعارها حتي الآن ولم يسأل عن صاحبها إلا مرة واحده عندما علم بأنه مريض وطلب من أحدهم أن يطلب منه أن يحضر اليه في الخرطوم وبالطبع رفض سعادة العميد”م” أن يحضر وأفاد المٌرسال بأن يبلغ الذى أرسله بأنه لايحضر الي اى أحد ومن يريده عليه أن يحضر اليه..

    ** اما موضوع الثروه وعلي حسب الروايه التي شاعت حينها :- أنه بصفته مدير أعمال بن محفوظ “من اثرى أثرياء السعوديه” وقبل إنهيار بنك الاعتماد والتجاره الدولي وأنه بعلاقاته الشخصيه علم بنبأ إنهيار البنك ومن ثَم قام بسحب كل الودائع والحسابات الخاصه بـبن محفوظ ,, وأودعها بالبنك الاهلي السعودي..

    *** وعند إنهيار البنك وإنهيار بن محفوظ لضياع ثروته , ظهر المارد صلاح أدريس وطمأنه بأن ثروته قد تم تحويلها للبنك الاهلي السعودي ومن ثَم صار شريكاً لبن محفوظ…

    **** هذه رواية الثروه والتي يمكن أن تكون حقيقةً ويمكن أن تكون خيالاً خصيباً لمشروع فيلم قادم وبتمويل منه أو من عديله الوالي…

    ***** وبعد الثروه تبحث النفس البشريه الطماعه عن السلطه وطبعاً الاحسبون والمنظمون الاسلاميون لن يعطوه الفرصه فيما يمتلكونه وينهبونه من الشعب الفضل وكان الضحيه هلال الملايين والذى يشكل أٌمه تجمع كل الوان الطيف السودانى ليمارس سلطته وديكتاتوريته عليه ,, اليس هو من يصرف علي هذا الصرح العظيم ,, وربنا يرحم كل رجال الهلال المخلصين ,,, وقومي عاد ياالمره موتــــــــــــــي…..

  12. khalidmadani قال:

    ود الزبير شتات يا فرده نمشي نستعد لكورة الجماعه ربنا ينصرهم ان شا الله ومن القلب والله .

  13. ودالزبير قال:

    أبو محمد ( جبل علي )
    شكراً ليك على المداخله التاريخيه التي أماطت اللثام عن كثير مما يخفى على الناس وماعدمناك ياغالي.
    خالد مدني
    إنت يامرسي قلبت إنجليزي مالك ولا ده عشان الباسورد… نحن في الإنتظار على قناه أبوظبي

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s