شفت كيف ومش كده وبس !! بروبوسيشن اللهجه العاميه .
مايو 6, 2008 بواسطة aflaiga
صديقى س من الذين لا يتحدثون الا بموسيقى تصويريه ومحسنات لفظيه واضافات بروميديه قاتله احيانا واخرى جميله فى الاحيان . فى احد الايام كان بيتونس مع ابوهو قام سالو اها المناسبه بتاعة ناس عمك حسن الحصل فيها شنو ؟ فما كان من صاحبنا الا ان تقمص دور الحكواتى وخاطب والده : تعرف يا عبد ؟ واستدرك خرمجته سريعا
بعد فوات الاوان ( عبد فى عينك ولد قليل ادب !! ) . لهجتنا العاميه مليئه بالبروبوسيشن الرائع فمن المعيب جدا ان تحكى لاحدهم عن مشوار عملته الا كالاتى : تعرف يا زول بب رب من الصباح كوكو كوو مع الديك قمت من النوم جاك جراك جك لبست هدومى خشيت على الحجه اوك ارروك حنكتها وطلعت جوووتك خشيت للحاج فى الاوضه برضو حق الله بق الله اتخارجت منو بى كنجالات الركابات زيييطك مشيت الموقف جك جرك تلبت لى فى حافله طقطرق الكمسارى كشكش اديتو حقو اها بوبوبو الحافله وصلت السوق تلبت نزلت !!! اها جاى جاى لحقت المحاضره والاستاذ حالف ستين ابدين ما يدخل زول وراهو ——- دعونا نناقش فى هذه المساحه اثر هذه المحسنات اللفظيه فى لهجتنا العاميه وهل هى اضافه بناءه ام هدامه ام هى اصلا ما محسنات !! اها جاك جراك كل واحد يورينا حنكو فى القصه دى .
بس خليني في الأول جييييييييييييت آخد لي شفطة من الشاي
و هي بقت علي الموسيقى التصويرية فقط فهناك اليدين التي دائما ما تستعمل لاعطاء القوة للتعبير بالله وين القوة عندما يؤشر الراكب جنبك في السيارة و يقرب يقد ليك عينك عندما يوصف و يقول ليك ياخ بيت ناس حسن في الشارع داك لأنو الشارع داك كان في اتجاة شباكك
و الا واحدين يصروا كلما يقولوا ليك جملة يربتو على ظهرك و الا يدوسوا في ركبتك و العجب كان جات نكتة لازم الضحكة تديهوا معاها يدك للمصافحة ما مشكلة بس المشكلة انو دائما بكونوا رجال
ياصاحبى …
عدم الاهتمام بقيمة الزمن وعدم احترامه هى سبب كل الابتكارات اللفظيه والحركيه يا اخوى الفراغ يولد هذه الممارسات ودى تربيه ماصله فينا وبى شوية مقارنه مع اولاد جون تعرف الفرق الكلام حسب الطلب وقدر ما يوصل المطلوب اثباته ..
اما موضوع الكلام فى الموبايل وارتفاع الصوت طرديا مع مجريات الموضوع محل النقاش والاشارات فى الهواء ومرات التف والبزاق يملا القريب والمارى صدفه ده شنو؟ الراكب الصينيه والبيتكلم مع واحد عامل منو زغبير بقروش واحد !!!!!!!!
العزيز أفليقا
من الأشياء التي أصابتنا سمعتنا وسط إخوتنا العرب أننا أناس نتكلم كثيراً ونعمل قليلاً فأذكر في مره كنت أشاهد حلقه من المسلسل السعودي ( طاش ماطاش ) وكانت الحلقه عن بروقراطيه رجال المرور في السعوديه والقصه تحكي عن حادث حركه بين مواطن سعودي ومقيم سوداني وأدء الدور بكل إقتدار الممثل السعودي ( عبدالله السدحان ) والسوداني أبو فاطمه عندما يخاطبه ضابط الشرطه المتحري بإسم أبو فاطمه يصر على مقاطعته بإن إسمه أبو فاطنه بالنون وايس بالميم ويشرح له الفرق بين الإسمين وعندما يطلب منه أن يحكي له عن الحادث يبدأ في شرح آداب المرور ويقول للضابط أنه عندما وقع الحادث قام بالإتصال بالنجده عن طريق موبايله النوكيا ثم يعرج لشرح مميزات الموبايل النوكيا والفرق بينه وبين الموبايل السامسونج حتى تكاد مراره الضابط أن تنفقع … لو نظرنا لهذه الصوره بحياد وبدون أن نقول أن السعوديون أساءوا لنا لرأينا أنها حقيقه وأقعه لا مجال لإنكارها … أها أقول ليك حاجه البري الكتير بتاعي ده عينه تانيه .. تحياتي
شباب : حاولا ان تتحدثوا لمدة عشر دقائق دون اى بروبوسيشن لتتاكدوا من ان هل البروبوسيشن صار واقعا لا فكاك منه - اما التعبير الحركى فى الكلام فدا باب تانى وباب واسع فى واحد لمن يتكلم جنبك خمسه دقائق بتحتاج مناديل ورق وفكس للردوخ البيكون ردخك ليها اثناء حديثه - والله قال بى قولك لو كان سافى تمباك . دعونا ايضا نقوم بحصر التعابير :
جااااااك - ووك ارروك - جب جب - تلبت - عوووك - عييك - رب - كف نجف - زيييط - جوووتك - شسيب - بوبو - تاخ تاخ - لب لب - واااا - اهى هى هى - والقائمه تطول
سلام يا أمم : برضو بي هنا !!
القصة في الأول بتبدأ زي ما تقول حركات شباب وكدا (!) , زي الراندوق , أها في ناس بتشبك معاهم طوالي . وهي مش فقط بروبوسيشن انما مؤثرات صوتية هامة لاثارة خيال المستمع عشان يكون معاك في الصورة .
مرة واحد عمك كبير بيحكي : يومداك راقد في العنقريب والملاية تسوي طق طق طق , همبريب تمام , قامت المطرة جك جك جك نزلت , تلب نزلت وتووووش خشيت في الجلابية , سيك جريت الباب مرقت , وان خاشي بيت ( زيت السمسم) جيييييك انزلقت , بردلب دقيت الواطة , ست الزيت! - ( الله يجازي محنك يا بروف ) - كاك كااااااااااااك ضحكت , قمت طاخ اديتها كف .
اها بلاي ما خشيتو في الصورة ؟؟
ركس : واك واك ست الزيت ضربت السكليبا - بب رب اتلموا الزياتيه - لب لب لب طقطقونى - توووشك جا خاشى راجل ست الزييييت - ووك ارروك حنك الجماعه - زييييطك اخوك انسحب بحرفنه - قبل ما انبرم فى اللفه التانيه كف نجف الطاره كبست - جكجرك القانات مرقت - جوتك جوتك الزياته مزمزوا باقى الباقات وتلبت تلبت ركبو الكندوره - ويويوويو الطاره شتتت اخوك جا منبرم براحه ولم الباقات بتاعة الزيت ونزل ليك فيها جوووتك جوووتك شيئ زيت سمسم وشيئ زيت فول وشيئ زيت البركه نجيييط نجيييط كع كرع وقومى يا المرا موتى .. فهمت حاجه ولا اديك بقه ؟
العزيز افليقا..يتخيل لى زى حصل لبس بين الموسيقى التصويرية والعبارات التوضيحية..عموما نحن شعب يعشق التقليد الاعمى و مسكون بما كل هو جديد و غير مفيد..
الموسيقى التصويرية من شاكلة (تووووووووش_فوووو_طق طق طق_نجيييط) ربما تساعد على الفهم وسرعة ايصال المعلومة.شخصيا لى صديق متعب اكتر من صديقك ذاك حتى انى اقترحت عليه الاتصال ب والت ديزنى كى يعينه فى افلامه!!!!