زنقات نص الشهر والايام التاليه الماهيه بتمشى وين ؟
مايو 13, 2008 بواسطة aflaiga
فى الماضى كان الموظفون فى الارض يعانون من زنقة يوم 25 وهى اخر ايام الشهر حيث كان الراتب بالكتير يتاخر ليوم 29 يعنى بالتحديد زنقة 4 يوم ودى كانت زنقات عادية بتتعالج ببتاع الدكان وتصبينة المرا وحصالة الشفع المليانه فكه والعلبه الحديد بتاعة اللبن المدفونه فى المطبخ والجك الفى النمليه والرف الفوقانى الفى ادولاب حيث تمثل هذه الاماكن مخازن الامداد الرئيسيه للاسر التى يتم فيها تجنيب القرش الابيض لليوم الاسود - اما حاليا فالقرش الاسود ما بكفى لا اليوم الابيض ولا الاسود - وصارت الماهيه تنتهى بانتهاء مراسم الصرف !! وليتها تنتهى دون ديون - احيانا تقيف فى الشباك تلقى الصراف يقول ليك : افليقا : جيب عشره الف عاوزين منك خصم الخلاطه تقوم تقرب تقول ليهو ارجع ليك الخلاطه وتدينى العشره الف ؟!!!! دعونا نناقش الماهية بين زمان والان .
و الله سؤال صعب خلاص و أصعب منو
ماهيتك كم ؟؟؟؟
خلل كبير حدث ما بين دخل الموظف و منصرفاته فصار كما الحاوي يسير منزل بمليون بينما لا يتعدى دخله الأربعمائة .. انه الله كريم
صارت القروش كحلاوة قطن و صدقني مهما ارتفعت و زادت ماهية الموظف تكبر احتياجاته فالذي يقبض أربعة مليون كقابض الأربعمائة ألف الاثنين يوم 25 بيتضايقوا
زمان الموظف يسكن في بيت الحكومة و خلال عمله الي أن يتقاعد يكون اشترى الواطة و بنا البيت و لمن يمشي المعاش طوالي على بيته… هسة يخيل لي الى حتفه مباشرة ..
تحياتي أفليقا
بعدين يا استرايكر ثبت لينا صورتنا القديمة … الشكل الأعور أب سنون دا شنو ؟
الصديق أفليقا
فجأه إنتبهت غلى أنني يمكن أن أصنف في خانه الكبار وعشان مخك ما يمشي بعيد المقصود كبار السن البيحكوا عن أيام زمان وزمن جوز الحمام تلاته والسجك بالمتر يعني أول مره قبضت ماهيه كانت ثروه بالنسبه لي في وقتها وقلت في نفسي لو ماهيتي مشت في زياده بمعدل الربع كل سنه ممكن بعد خمسه سته سنوات الزول يشتري وأطه ويبني البيت أمانك الله أنا الواطتي أصبحت رغم إن الماهيه كلما تزيد الربع السوق يزيدالتلاته أرباع وماعندنا غير نقول حاجه آمنه إتصبري عارف الوجع في الجوف شديد وعارفك كمان ما بتقدري إتصبري إتصبري
عزت يا مرطب
الشكل الأعور أب سنون دي كنجالات قروش يا معلم شيء ورق وشئ قروش معدنيه والظاهر إسترايكر قال عزت المرطب ده نخت محل صورته الكنجالات كنايه عن الترطيب