داك الصباح اهو لاح يا جميل . كيف اصبحتو ؟

Posted: الثلاثاء,24 يونيو, 2008 by aflaiga in إجتماعية

هى فقط من تعطى وتهب الضياء كل يوم بلا من او اذى وهى فقط التى تصبح بخير برغم كل شيئ على عكسنا فنحن نصبح على ما امسينا عليه ونقوم نكابس من تصبح فى المعجون والصابون والشاى والمواصلات ومن ثم الفطور والرزق فى الطاحونه المدوره وما عارفيين ليها اول من اخر دى .. يبقى فى الذاكره سؤال هل نصبح كى نعالج ما اخطانا فيه بالامس ام كى نواصل ما اعتدنا الخطا فيه ؟؟وما معنى حياتنا الحاليه التى اصبحت لهثا فى ارباعها

الثلاث وربما عباده فى ربعها الرابع مع اننا خلقنا لنعبد الله ولكن هل فعلا نحن نعمل لنعبد الله حق عبادته ام ان العباده برنامج مصاحب للحياه ؟ وهل لدينا اعذار يوم الحساب للهثنا وراء الدنيا الفانيه واقتناصنا بعض الوقت لتذكر سبب الخلق الذى خلقنا من اجله ؟؟ على كل حال تشرق الشمس يوميا لتخبرنا ان هناك يوم جديد يجب اقتناصه من عمرنا القصير لمرضاة الله .. فهل اصبحنا على ذكره وشكره وحسن عبادته ؟ وهل يترك لنا المعجون والشاى والمواضلات والتوقيع فى دفتر الحضور فرصة للبدايه باذكار الصباح وحمد الله على نعمة الصحيان التى هى بعث جديد وهل نبدا يومنا بفتاح يا عليم رزاق يا كريم ؟؟ صباح الخيرات وورونا اصبحتو كيف بالله انشاء الله طيبين ؟؟

About these ads
تعليقات
  1. ودالزبير قال:

    العزيز أفليقا
    على وزن قصه صاحبنا أقول ليك أصبح أبونا ميت … لا دي صعبه شويه لكن ممكن أهدي ليك ولكل المتجرسين على غياب الدانقا وعلى رأسهم خالد مدني ومخير بيت الشعر التالي :ـــــــ
    suspended
    The web hosting account that hosts this website has been blocked due to server overload!
    If you are the owner of this website, please contact the support team to resolve this issue.
    If you are a visitor to this website, please access this page later.
    This website is hosted by exclusivehosting.net.

  2. عبدوش قال:

    صباح الخير للجميع… وكيف حال عمنا جبرا ؟؟؟؟؟؟؟؟؟؟؟؟؟؟؟؟؟؟؟
    ودالزبير : المره ام لاب طوب دي انحنا عشان الكلام الكتر الكتباه دا بيقينا نتاوق بس دي قطعاه معنا سته صفر … اها انا اترجمو ليك بالعربي رأيك شنو
    ده كالم ام لاب طوب!!!!!!!!!
    تعليق
    فإن حساب استضافة المواقع التي تستضيف هذا الموقع ولقد توقف بسبب خادم الزائد!
    اذا كنت صاحب هذا الموقع الإلكتروني ، يرجى الاتصال بفريق دعم لتسوية هذه المساله.
    إذا كنت زائرا لهذا الموقع ، يرجى الوصول الى هذه الصفحه في وقت لاحق.
    هذا الموقع هو الذي استضافته exclusivehosting.net.

    اها يا جماعة عرفنا البت دي دايره شنو والله كان لقت لها زول عرسها وفكها ليها بورتها دي انا متأكد حتغير كلامها ده يا ود الزبير ما تدبل بيها كما مدبل والله بت جااادعة وعندها قوام اسكت ساكت اها دا غير المغطى ومقلق شطه
    ما قلتا لي الترجمه دي كيف ؟؟ دا الكلام القصداه البنيه دي واللا لا …

  3. محنك قال:

    السلام عليكم
    يسعد صباحكم

    عبدوش
    ذكرتنى آل البونى وآل رايس طيب ود الزبير لو عايزها ما لازم ترسل ليها خطاب كارب كواسطة خير ويا بخت من وفق

    بجى عمك ابشنب من مصر وبقطع وشها ويفتح ليكم الباب الكبير

    هى تجرى لمستقر لها (من اله ياتيكم بضياء )

    لكن يوم جديد فاغتنم

    شكرا للمبع افليقا ابن الشمال خالص ( خالص دى لانه من الشمال القريب )

  4. محنك قال:

    فليقا
    مبدع وعندما نحاول تعليق على ما يكتب الكيبورد يخاف من كيبورد افليقا لانه مسخن رغم الظروف المناخية والاتربه وربما بداية انتشار البعوض

    شكرا للمبدع افليقا

  5. ودالزبير قال:

    عبدوش
    فتح أفليقا هذا البوست على ما أعتقد لإحساسه بأننا أشبعنا تلك المواضيع بحثاً فعليه إليكم هذه النكته في هذا البوست الممكن تسميته اليوم المفتوح لكن بعد النكته راح أفتح لي بوست جديد لتظل الجذوه مشتعله :
    نكته الصباح لبدايه يوم جميل
    شايقي أبوه طرده من البيت بعد خروجه كتب بالبوهيه على الباب ( منزل د /خليل إبراهيم )
    أشوفكم بهناك

  6. aflaiga قال:

    شكرا ود الزبير محنك عبدوش على الطله الصباحيه :
    البت دى انا قلت ليكم بعرسا ليكم وادى اللابتوب لى ود الزبير وادى السماعه الواير لس لى سمسمه عشان ما تزعل على الاقل تكون طلعت ليها بسماعه مش احسن بدل تطلع ساكت ؟؟؟ اها البوست بتاع الليله ده تصبيره لحدى ما ود الزبير يجيب السنقه فى الرنقه الوعدنا بيها وهو موضوع نعمل ليهو دعايه هنا احسن ) موضوع ود الزبير الشغال فيهو مش حتقدر تغمض عينيك ؟؟
    اما الرساله الحزينه بتاعة السيرفر الترجما عبدوش حرفيا جدا :
    تقوليلى شنو تقوليلى منو هو كان اب شنب قاعد كان بتتحاومى بى لابتوبك ذى دا يا هوان انتى ؟؟
    شالت على يدها ما لم تنله يدى .
    الحجبوهو من عينى .. كل ما سالت عليك صدونى هوستاتك .

  7. aflaiga قال:

    ود الزبير : ما دام اليوم مفتوح دعونى احدثكم عن الشايقيه تلك القبيله التى نالت من المح والقدح ما لم تنله قبيلة اخرى فى السودان وباختصار :
    الشايقيه قبيلة مفترى عليها بحكم المثل ما قدرش على الحمار اتشطر على البردعه ؟؟ واوريكم كيف علما باننى لا شايقى لا معرس شايقيى ولا شغال فى البتاعى ولا الهنايى ودى شهادة محايد ارجو تقبلها .
    ان كان للشوق والحنين والوجد من اب فى السودان فهم الشايقيه فان اردت ان تبين مدى ولهك وشوقك وحنينك فاحكى حالك لشايقى شاعر ستجده طبعا بعد ان يشيل حالك قد صور الامر بشكل لو تركت لتعبر عنه بقية عمرك لما استطعت …
    الشايقيه قوم حنان حنان ملتهبى المشاعر ساهمت طبيعة مناطقهم على تكوين بنيتهم المعنويه والجسمانيه .
    الشايقيه والمال :
    برغم كل ما يقال عن الشايقيه من حب للمال وسعى لاكتنازه وربما تاامرا احيانا فى اكتنازه الا ان لى وجهة نظر خاصه فى ذلك فالشايقيه وعلى مر العصور قوم واضحى الحسابات بحكم ظروف مناطقهم البيئيه التى لا تتحمل تلاعبا فى مصادر الرزق وبحكم التربيه الصارمه على الاعتماد على النفس والكد فى طلب الرزق من الطبيعى ان تجد تكافلا لا محدود مبنى على الاتكاليه فى الرزق لدى كثير من القبائل التى تتحمل بيئتها مثل هذا السلوك اما الشايقيه فبيئتهم لا تتحمل اتكالا على بعضهم البعض بقدرما تدفع للعمل والعصاميه كل ذلك مقروءا مع طموحهم اللامحدود فى التمتع بوضع مالى مريح يؤمنهم شر الزمن وهو طموح مشروع ما لم يتحول لضرر للاخر ..
    فى القتره الاخيره تم اسقاط سلوك بعض ابناء القبيله السياسى على القبيله عامة ووجد المتحدث عن الشايقيه فرصة جيده ودوافع لنسب الشره للمال وحب اكتنازه واحتكاره على الشايقيه بحكم احتكار بعض ابنائهم للثروه فى الدوله وللقرار السياسى عامة .
    من غير العدل اسقاط سلوك الافراد على القبيله بشكل عام ولكن هناك اشكال غريب فما يقال عن الشايقيه عموما جعلهم فى محك صعب استفادوا من نفيه بمذيد من التقويه لمواقع نفوذهم فى صنع القرار او احتكار الثروه او السلطه .
    ليس من المصادفه ان يتجمع عدد من ابناء القبيله فى مواقع صنع القرار بيد انه ليس من السيئ اذ اننى بوجه خاص احمد لهذه القبيله انها قويه فى اتخاذ القرار ومجربه للحياه بعكس بقية القبائل التى ينتاب سلوكها بعض العاطفه والرومانسيه وربما النرجسيه فى اتخاذ القرار والتعامل مع المال العام ..
    وفى ادبنا الشعبى يقال انك اذا اردت تكوين حكومه قويه فاجعل على المال شايقى وعلى الامن نوبى وعلى التشريع كردفانى او دارفورى وعلى العمل التنفيذى غرابى او جنوبى ..
    ربما يثير هذا القول بعض العنصريه التى تركناها فى مقالنا السابق لكن طبيعة العيش فى اقاليم السودان المختلفه جعلت من سلوك ابناء هذه القبائل متماثلا مع العرف والتقاليد فى تلك المناطق ففى الشايقيه يشتهر الناس بالعمل الجاد وفق الكالكوليتر بعيدا عن العواطف وفى النوبا الشماليه اشتهر اهلها باحتراف التخيط الاستراتيجى منذ صنعوا الساقيه وفى الغرب كردفان ودارفور اشتهر اهلا بالحكمة والكياسه والاجاويد وفى جبال النوبه والجنوب اشتهر اهلها بالهارد ويركرز والتنفيذ الدقيق للعمل الجيد والامانه والصدق …
    قد لا يكون هذا التوزيع مطلقا على العموم فقد نجد ابناء بعض الاقاليم تسبعوا بثقافة اقليم اخر وعاداته لكنه الادب الشعبى ما يقول وليس نحن .. ولا شنو يا شباب ؟؟

  8. عبدوش قال:

    افليقا : الجماعة الواقفين ورا البنيه ديل شنو ما يكون هم زاتم دايرين يخشو حوش جبرا وقامو رسلو العسل ده عشان يشوف الحاصل وقام شافك وشاف جمالك وعمل نااايم من الجماعة الرسلوه .. عليك الله كدي اديها نظره

  9. عبدوش قال:

    افليقا : هسع انحنا نعلق على البوست واللا على التعليق
    لكن يا عمك والله انكشف المغطيه ستار…. تقول لي ما عندك علاقة مع الشايقية انحنا قبلنا الحيادية في الموضوع لكن قولي مديركم في الشغل قبيلتو شنو؟؟؟؟؟؟؟؟
    والله موضوعك ده مفروض تخصص ليه بوست برااااهو !!!!!!

  10. aflaiga قال:

    عبدوش : البت محرشه ما كاتاله ومحرشينها الجماعه ديل مش شايفم لابسين اسود ونضارت سودا اكيد بيكونو قروا بكاكم الكتير فى المدونه ده قامو رسلو ليكم بنيه ؟؟ تعرف لو رسلو ليكم راجل كان ناس البوكيمون زمان فتحوا الموقع وحسمو القصه دى من بدرى ؟؟ لكن عرفو ليكم لينا ؟؟
    جمال شنو يا عبدوش ده حالتو ما اتلاقينا ؟؟ اوع تجى الرحله كان ده كلامك …

  11. aflaiga قال:

    عبدوش : يا مصعبا طوالى …
    النفاق المهنى لا يجدى مع الشايقيه فهم يعلمون ان من ينافقهم ينتظر فرصة للانقضاض على الكرسى وبعد داك يوريهم … مديرنا نوبى لمن كوبى ..
    اوافقك الراى فى فتح بوست خاص على شاكلة كرهنا للشايقيه بين الامر الواقع والامر الواقع لماذا نكره الشايقيه شديد ؟؟؟ يعنى نكرههم براحه بس ولا شنو ؟؟

  12. عبدوش قال:

    هاك المثل ده يا افليقا …
    لا تاكل البايته ولا تخاوي الشوايقة
    البايتة بتغلط عليك(بكسر اللام) والشايقي بسويها فيك

  13. aflaiga قال:

    عبدوش : اهو ده الحكم العام الذى اقصده من حديثى .. لو طلبت منك ان ترجع للوراء قليلا لاصل هذا المثل من هو قائله وما هى المناسبه وما هى الظروف التى قيل فيها ومن هو الذى قيلت فيه وهل يمثل سلوكه ظاهره عامه ام خاصه ؟؟ الاجابه على هذه الاسئله بمنطقيه وشفافيه تجعلنا نقرر تجاه الامر ومن ثم نستمتع بالمثل او نجهله ..
    ولكى نكون منطقيين متى بدات الحاله العدائية تجاه الشايقيه ؟ وما هى خلفية اغلب الذين حكو عن تجارب سالبه معهم ؟ يقودنا ذلك لتحديد ظروف الفتره التى بدا فيها الحس العدائى تجاه الشايقيه يتكون ومن ثم يصبح همسا فى المجالس ويتحول لصراخ كلما لدغك شايقى .. دى حلوه مش ؟؟ عندك ليها مثل ولا اديك ؟؟ اها خلينا ندرس الظاهره بشكل تخصصى عشان نقدر نصل لحل .. الشايقيه عموما يتعاملون مع ما يقال عنهم بمبدا شرف لاندعيه وتهمة لا ننكرها فمن ذكاءهم وصلوا الى انهم لو نفو ما يقال فقد يفقدون احد حواجز تعدى الناس عليهم واتقاء شرهم الحقيقى او الوهمى يعنى زى قصة الزول الاسمو السفاح وهو لا سفاح لا حاجه لكن بيستفيد من الاسم فى تحقيق حاجاتو …
    تانى جاييك نمشى نبكى مع ود الزبير انت بالمناسبه عثمان ده مش بكيتو فى المدونه لمن دمعك اتدمدم مالك فاتح ليهو بى جاى ولا الحى ابقى من الميت ؟؟؟

  14. ودالزبير قال:

    أفليقا ………….. كتبت
    وفى ادبنا الشعبى يقال انك اذا اردت تكوين حكومه قويه فاجعل على المال شايقى وعلى الامن نوبى وعلى التشريع كردفانى او دارفورى وعلى العمل التنفيذى غرابى او جنوبى ..
    دي أنا ما أدوني ليها المهم شايف نسيت ولاد جعل ولا قصدك الزول البيكون الحكومه زاتو هو الجعلي يا حليلك يا الجعلي الحر وفي روايه الحار
    بعدين يا أفليقا عبدوش يمكن ما جأنا في بيت البكاء لانه إسمه سقط سهواً في كروت الدعوه الوجهت لعزت المرطب وخالد مدني ومن هنا من بوست أفليقا الماعارف كان بدأ كيف وراح ينتهي كيف نوجه الدعوه لعبدوش سيد البكاء للحضور لأن البكاء بيحرروه أهله ولا شنو يا شباب

  15. عبدوش قال:

    ما فاتح ليه عثمان ده حاله خاصه ولكل قاعده شواذ…… كده كويس
    ((من غير العدل اسقاط سلوك الافراد على القبيله بشكل عام )) اها ده كلامك!!!!! فما ممكن نحكم على عثمان حسين وغيره من النشاذ في قبيله الشايقية بما يفعل … وانا اقول ليك حاجه هسع عثمان حسين الملك يكون ندمان لحدي ما مات انو شايقي لكن يعمل شنو الزول ما بختار ابو ولا امو …..وهذا تأكيد لكلامك انو ما نحكم على الجماعة كلهم بخيارهم … ولاشنو يا عمك …
    نقطه سطر جديييييييييد
    انت مالك بتهبش مره يهود العالم ومره يهود السودان !!!؟؟؟؟؟؟؟
    اقول ليك كلام متداول بين الناس حتى الشايقية انفسهم معترفين بيه
    قالة حبوبة الشايقية يهوديه قدمة الى ارض الشايقية الحالية تعرف بالقرير وتزوجها جد الشايقية قسم السيد ود نفيسة …. اها انت عارف الطواقي بتاعت اليهود البلبسوها في اخر الراس اصلاً كانت عبارة عن طباقة رسلوها قرايت الشايقية قامو الشايقية رجعوها ليهم طباقة صغيرة الراس ما بطغطيهو كويس شفت الحفاظ على المال ده كيف

    اها يا عمنا البلد رايقه ولا فيها شوايقه

  16. عبدوش قال:

    ودالزبير:
    قالو البيكا لي حولو بجيب زوووولو ….

  17. مُخير قال:

    الزينين
    سلام وصباحكم فُل
    أفليقا: وهل يترك لنا المعجون والشاى والمواضلات والتوقيع فى دفتر الحضور فرصة للبدايه باذكار الصباح وحمد الله على نعمة الصحيان ….الخ ليس هناك ثمة تعارض بين لهاثنا وراء ضروريات الحياة وأن ندعو الله في نفس الوقت خوفاً وطمعاً في الحصول على تلك الضروريات، منذ البعث الجديد على حد تعبيرك حتى الهجوع آخر الليل، فالحصول على الرزق الحلال عبادة والعمل بإخلاص عبادة وكل المطلوب أن نخت الرحمن في قلوبنا وعقولنا في كل ما نعمل وأن لا ندع ذكره يغيب عنا.
    ود الزبير: الما من المتجرسين على غياب الدانقا يقول أنا أكان بتقدر ؟؟ كلنا في الهواء سواء، لكن القصة وما فيها إنو الجديد شديد ود المجهه خالد مدني ومن معه
    يا خوانا القمردينة دارنا ومأوى أفكارنا وإذا كان في العراقيل فضلاً عما هو فني أي بُعد مادي فالموضوع يخصنا ومن صميم واجبنا ونحن على أتم الاستعداد للمساهمة في منع ما يحول دون وجودها في حياتنا الغبراء بدونها
    في هذا السياق أهيب بالدكتور عزت وبقية أعضاء المجموعة (أ) و(ب) وكبار الدانقا الخروج لنا بمبادرة واضحة الملامح تتيح لنا فرصة سداد قليل من كثير القمردينة علينا

  18. عبدوش قال:

    مُخير : تحياتي يا رايع ..
    (في هذا السياق أهيب بالدكتور عزت وبقية أعضاء المجموعة (أ) و(ب) وكبار الدانقا الخروج لنا بمبادرة واضحة الملامح تتيح لنا فرصة سداد قليل من كثير القمردينة علينا)
    وانا اوافقك الراي … والبنيه البايره دي الما عندها والي انحنا ما بنديها افليقا نخلي ال…… تكتلها

    (اذا كنت صاحب هذا الموقع الإلكتروني ، يرجى الاتصال بفريق دعم لتسوية هذه المساله.)
    وانحنا كلنا اصحاب هذا الموقع ما عم جبرا براهو بس فريق الدعم ده وين ما يكونو الناس الواقفين ورا ديل يا مخير؟؟

  19. aflaiga قال:

    عبدوش : قدر دا ؟؟ والله انت محروق جنس حرقه ؟؟ الخوف تطلع شايقى بعد ده كلو …
    مخير : يا مبادر يا متابع يا شفيف .. القصه ما قصة قروش القصه ادارية فنيه بحته وولدنا ستريكر جارى فى الحل لحين عودة سيد الجلد والراس ابشنب ؟؟ انتو اب شنب دى جات من وين ؟؟ لا يشكر على المبادره من هو سيدها لكن على كل شعورك النبيل تجاه والدتنا القمردينه واصل وياها المحريه …
    عبدوش :
    الاول : ياخى انت مالك مع ابوك ده ؟
    التانى : والله نحنا ما بنتلم اصلا ..
    الاول : ياخى احمد الله ابوك ده زول كويس لا بتاع سكر لابتاع نسوان ياخى قول شايقى عديل كده ما ابوك فى النهايه ياخى …
    اها دى كيفتك قدر كيف ؟؟؟
    تعجبنى تلميحاتك العميقه من يهود العالم ليهود السودان دى قلبت فيها الهوبا .. بالراحه عليهم انت ما عاوز تشتغل فى البترول ولا سد مروى ولا الماليه ولا شنو ؟؟؟ ولا طرفك اصلو نعسان ؟؟؟

  20. ودالزبير قال:

    كتب أفليقا
    انتو اب شنب دى جات من وين ؟؟
    لو إنت نسيت أنا ما نسيتها وأخوانا الإنضموا آخيراً لركب المدونه ( حلوه دي ) يعني قال نحن بقينا قدام وكده المهم يا جماعه في يوم من الأيام صبحنا في القمردينه لقينا زول كاتب لأستاذ الفاتح : أيوه إنت يا أبو شنب الشغال مع الحكومه وهاك يا شغل وتبشيع أها طبعاً أخوانكم ما متلقين حجج !! كيف زوول يجي لحدي بيت الأستاذ ويشتموه كمان وقمنا هاجمناه ما خلينا ليهو صفحه يتقلب عليها وأظن القصه دي كان بعد قصه ( الصفر البارد ) دي طبعاً قصه براها بحكيها ليكم يوم تاني .. شفته كيف ونحن شغالين هجوم في الزوول داك المع الآسف نسيت إسمه هسه قام الأستاذ زات نفسه قال يا جماعه خلونا في موضوعنا قمنا نحن إتذكرنا إنه تعليق الزول الكعب ده ما كان ممكن يظهر لو ما الأستاذ نفسه أشر عليه بالموافقه قمنا إتعلمنا درس مجاني وهو قيمه التسامح التي نحتاج لها بشده هذه الأيام .
    أفليقا قلت لي البوست ده بدأ كيف ؟؟؟؟؟

  21. aflaiga قال:

    ود الزبير : ما دام جابت ليها ذكريات ايه رايكم نفرد باقى البوست ده للذكريات وكلما ذكرت الذكريات ورد اسم ود الزبير ذاكرة المدونه واليكم التقديم للبوست على شاكلة تقديم وكيل عزرائيل فى تلفزيون السودان معد ومقدم جنازات الوطن الاستاذ عمر الجزلى له التحيه ولكن قدره كده نسوى شنو ؟
    فى هذه المدونه اسماء واحداث تركت بصماتها الواضحه على مدونتنا وساهمت فى صياغة وجداننا السياسى والاجتماعى والفكرى منهم فصارو اسماء فى مدونتنا نستضيف فى هذه الحلقه رجلا اسهم بجهده وبذاكرته الفوتوغرافيه الللييييله يا ود الزبير سجمك .. فى صياغة مجتمع المدونه دعونا نستمع اليه كشاهد على العصر .
    استاذ ود الزبير كيف ترى المدونه الان وانت قد عاصرت ربنا يديك طولة العمر جميع مراحلها منذ ان كانت التعليقات 1 و 2 وحتى وصلت الى مستواها الحالى ؟؟ وما هى اهم مراحل تطور المدونه ومن هم بناتها وكبارها الذين لا يستقيم الامر الا بهم حدثنا ومتعنا بتلك الذكريات واهم الشكلات وابرز اصحاب النفس الطويل والقصير وكيف تعرفت على معظم الرواد واهم سؤال بتاع صاحبك السمعك بتخطط لقلب نظام الحكم وما فهم القصه وقال يا الله السلامه الميكرفون معك اخى ود الزبير .

  22. aflaiga قال:

    كعادة المستضيف الذى يقاطع الضيف :
    بس عليك الله لانو انا المذيع والمستضيف حتة افليقا لمن جانا كان كيف دى ما تقيف فيها كتير وحاول جامل مقدم البرنامج شويه عشان الناس الجداد ديل بدون تاريخ ما مريحييننا خلى بتاريخ يعنى خليها مستوره وانا بوريك بينى وبينك منو الاكل قروش طريق المدونه الغربى وقروش البتاع البطلع من تحت ويخش تحت بتمشى وين ؟؟؟ اسى نيام يجى يقول ليك والله جانا معصعص واغباااش وجلابيتو بى زيت البابور بتاعا ولمن سمن وعمللو جضيمات وكليوات بقى يهابش ويقابض زى الكدايس تاكل وتنسى …

  23. عبدوش قال:

    افليقا: يا جااااامد
    (الاول : ياخى احمد الله ابوك ده زول كويس لا بتاع سكر لابتاع نسوان ياخى قول شايقى عديل كده ما ابوك فى النهايه ياخى …) اقول ليك حاجة يا افليقا انا كان ابوي كان شايقي انا كنت ما حاعرس اصلا عشان اكتب في قبري لما اموت ( هذا ما جناه علي ابي ولم اجنيه على احد)
    السكر بتخلا ومبارات التسون برضو مع مرور الزمن الزول بسيبها …… اها شايقي دي تتخلا كيييف
    ابرا واستبرا من الشايقية يا يابا تفها من خشمك يا ود امي

    نقطة سطر جديييييييد
    انت الشوايقه بنادو الزول باسم امو ليه يا افليقا؟؟؟؟؟؟؟ مثلا في بيت المناسبة تلقا واحد بيسأل في بيت العرس……..
    يا جماعه شفتو عثمان ؟
    عثمان نفيسي واللا عثمان سكيني؟؟
    لالي عثمان نفيسي

  24. عبدوش قال:

    انا طبعا كتبت التعليق(23)
    لقيتك سبقتني بتعليقين انت والله زول ما عادي يا افليقا الكلام ده بتجيبو من وين يامعلم ..
    والد الزبير ده صاااااح قديم لكن لسع انحنا دايرنو
    هو لسع في نضارت حسنو في عمر الدوالي … اقوم توديه اسماك في حياتنا يا راجل

  25. سماسم قال:

    السلام عليكم شايفاك يا عبدوش ممغوص شديد هسع لو مافي شوايقة في البلد دي والمدونة دي كنت حا تتفشى كيف من الغبينة دي هسع بي سببم إنت ماخد راحتك
    أفليقا غايتو كانت بدايتك كويسة لكن عرجت مع الجماعة
    (نحن فوق عزنا قبايل ما بتهزنا) دق دق …دق دق
    وبمناسبة هذه الأغنية سمعنا إنو حواء الطقطاقة أختطفوها جماعة العدل والمساواة ما صحة هذه الشائعة

  26. ودالزبير قال:

    سماسم
    عشان ناس عبدوش وأفليقا ما يتفسحوا فيك هاك نكته عن الدناقله
    دنقلاويه سألوها بتعرفي الدهشه
    قالت ليكم كيفن ما بعرفها دي ما بت الحمار
    ها ها ها ها ها ها هاها ههههههههههههههههههههههها

  27. خالد مدني قال:

    الكورة دي اصلا كانت باص من الحارس لافليقا في الباك الشمال شالا جري بيها يمين شمال فتش للمعجون والصابون وبلح للشاي ما لقا قام اتذكر ربو وحمد وشكر وفكاها لي ود الزبير قام فتش لي زميل ما لقاهو لعب لي نفسو باص قصير وقال وين المدونة وكتب ليهو كلام بالانجليزي … حاولت استلم باص ود الزبير خش عبدوش تووووش وترجم الكلام للعربي ورفع الكوره فوق وقلقلنا ليك قلقلة والكوتش يكورك ختها في الواطة ختها في الواطة ما اشتغل بالكوتش ولعب باص طووويل لي ود الزبير وقال ليهو دبل كيك ود الزبير رقد في الواطة وعمل فيها مصاب قام محنك ثبت الكورة وقال ندخل خطاب او ننتظر عمك اب شنب يجي يجضم الكفر ويجضم معاهو البت ديك وبعدها محنك لعب باص بالكعب استلمو ود الزبير ولعب كورة طويلة اشربكت في النخلة نص الميدان قام جاب سيرة الشوايقة والحكم قال دروب بول … جا الشليق افليقا وختف الكورة وجري بيها وحاول يشكر الراكوبة في الخريف ولعب باص خادع وبعوق استلمو عبدوش توووش ودخل دخله عنيفة علي زميلو افليقا ولعبو باكوورد مع كورتو افليقا خاف علي عينو وقال لعبدوش نحنا زملان العب براااحه … عبدوش قال افليقا ماكل بايته عشان كده كورتو ناعمه وده ما بنفع مع اللعب الافريقي … افليقا غير الصايد ولعب لي ود الزبير باص بيني ود الزبير زعلان من الجمهور وقال لازم الكابتن يكون جعلي مع انو الفريق اللاعبين ضدو مدربو وخال مدربو والحارس والكابتن كلهم جعلية وبرضو ما قادرين يدرنوها قام شاتا تجاه المدرجات الكورة وقعت في بيت البكا وكسرت الكبابي … عبدوش قال ده بكا قريبنا ما تشيلو هم مشي شال الفاتحة الختاها اليوم داك وجاب الكورة رماها من التماس واستلام سليم من مخير الله وتغيير لوجهة اللعب لكن الكوره جات مقدودة من بيت البكا قال نعمل كشف ونرجع نفتح الميدان القديم محل الدافوري الصاح بدل ميدان نص الحلة ده ودق سدرو وقال بتبرع بي كفر وطقم فنايل بدون شورتات … عبدوش توووش عمل كشف وقال العجايز الما بدفرو معانا ديل يتبرعو وافليقا دا نعرس ليهو من الكشف قام افليقا تاني قال وين اب شنب يحلنا من البت دي ومن عبدوش واصرارو علي اننا نعرسا وطرف السوط لحق ود الزبير قام رجع بينا للارشيف وقال احكي ليكم مغامرات الشياطين التلتاشر ورقم صفر وطبعا غرضو ينسينا موضوع العرس … افليقا ما حريف استلم الباص من ود الزبير ومشي كم خطوة باتجاه مرمانا ولعب باص لي ود الزبير في خانة القشاش لكن الباص طلع قصير ودلوقت هو جاري ورا الكفر لانو باصو لو استلمو مهاجم حريف بجهجهو ويقوم يرجعنا لايامو الاولى مع الفريق … نخليهو جاري ونشوف ود الزبير حيعمل شنو … هجمة مرتدة وللا حيجيب فينا قون .

  28. سماسم قال:

    والله لكن ضحكتني يا ود الزبير وأنا في ذات الوقت متذكرة القول القائل إذا جاورت في الفردوس بني دنقل فعجل بالرحيل إل سقر ، قومٌ من قال للرحمن أرتي فكفر
    عشان ظرافتك دي أنا بديك نكته عن الشايقية ( وحدة شايقية لأو ل مرة تجي الخرطوم وكانت عاملة فيها هي من العاصمة يعني قالبة حديثا زي ناس الخرطوم ومشت لي فكهاني تشتري قريب قالت ليهو يا عم القريبة بكم قام قال ليها بألف جنية طوالي رجعت لي شايقيتها قالت ليهو القرفتناي الفد وحدي

  29. عبدوش قال:

    خالد مدني:
    لكن اتجدعت فيها… والله خطيرين يا اولاد مدني
    اها ود الزبير حصل الكوره باخر نفس ومرر باص بيني لسماسم لكن ود مدني دخل توووش واستلم الكره واظهر مهارته الفرديه الراغية وهدف في المرمة لكن سماسم تغير مسار الكره ورجعتها مره تانية لود الزبير… يا سلااااااام كوره ولا احلا من كده

  30. عبدوش قال:

    يا ود الزبير موضوع العنصرية دا افليقا فلقو في راسو بالشوايقة وسيل دمو عديل كده بقت فيها شوايقة ودناقلا وعباده والموضوع جاط جوطه شديده ….. وده كلو من الشوايقه ..

    الشي بالشي والحب سمااااااااااوي
    الشايقية ديل حلوين خلاص يا من هنا لي القرير راااس يا
    الدناقلا ديل حلوين خلاص يا من هنا لي دنقلا رااااس يا
    الغرابه ديل حلوين خلاص يا من هنا لي الجنينة راااس يا
    الدينكا ديل حلوين خلاص يا من هنا لي جوبا راااس يا
    ناس ادروب ديل حلوين خلاص يا من هنا لي كسلا راااس يا

    عشرة غرززززززز

  31. عبدوش قال:

    البلد بقت خلا الترحيل جا واللا شنو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

  32. عباس ركس قال:

    سلام يا الحلوين :
    قبيل الصباح خشيت بعد ود الزبير وصبحت على الجميع وسرحت شيء شعر شيء غنا و حادات كتيرة , قوم يا النت عنقد كل ما ارسل يقابلني ب speed touch , جيناكم اسي لقينا الموضوع قلب شوايقة ودناقلة . افتكر نكتة خفيفة ع الماشي كدة ما فيها حاجة لكن الخوض في قبيلة كاملة بالطريقة دي ــــ ما صاح
    ( علينا ان نتذكر ليس عثمان حسين لوحده الشايقي , اسماعيل حسن , حميد ,
    صديق أحمد , وصولا لهشام درماس – اول مرة اسمعو امس في هارموني – من السياسيين والكتاب كثر : الحاج وراق , عبدالله علي ابراهيم – الجرح والغرنوق , السكة حديد قربت المسافات وكثيرا – وغيرهم كثيرين )
    * تقول لي الظاهر عليك يا ركس شايقي ؟
    – لييييه , شايف علي شنو !!
    *انتو الموضوع دا مش كان عن الصباح اهو لاح يا حبيبي والبلبل الصداح . . وجاك يحكي ليكا .. . الصباح كثر ذكره – بالإيجاب – في الاحاديث والامثال والشعر وجميل غنانا : صباح الخير يا امير *** يا الحبك شغل الضمير
    ويدخل علينا المرطب بي : يا صباح يا زاكي العبير *** سلم لي عليهم كتير
    * افتكر انو الصباح يحمل الامل دايما بيوم جديد جميل ولكن ما ان ينتصف النهار وينكشف دور البندورة , حتى يبدأ الزهج والقرف ( ياهو دا القرف يا عبدوش ) , ويخليك تقعد تخرمج متل الخرمجة دي !!!!

  33. عبدوش قال:

    عباس ركس: صباحك قشطة يا معلم
    ولما لضحك يا صباحي تضحك الدنيا و…..

    اااااي دا القرق دا القرف… اااااي دا القرف دا القرف

  34. مشاكل قال:

    فلنرجع لمربع الاحزان
    قالو في فن التعامل مع السودانيين :
    الجعلي غشو
    الشايقي ارشو
    الدنقلاوي اهرشو
    ود الغرب املالو كرشو
    اها في داعي هاهاهاهاها

  35. aflaiga قال:

    خالد مدنى : والله انت يا كنت حاكم الكوره دى يا اصلك كده سمح ده شنو الزول البيوريك كتبت شنو وخليت شنو ومفروض كان تكتب شنو ده ؟؟ والله الواحد من شدة ما عجبو الحكى لمن قرر انو يفتح البوست بعد كه ويكتب :
    * يلا يا خالد اقول شنو ؟
    * بسم الله الرحمن الرحيم
    * السيد / ………………
    * الموضوع / ……………..
    والله يا خالد فيك ريحة استاذنا بتاع العربى الزمان يمسك منك بداية الكلام ويتمو ليك يخليك تقول البيتكلم ده منو ؟
    حقيقة كل يوم تتقازم اقلامنا امام مد فكركم الطاغى تانى يا ود الزبير ادو خالد الباس هو الينزل البتاعات ونحن نعلق بس لو لقينا فرقه .. بالجد والله يا ابو الخلد ما كسير تلج هو فى تلج ؟؟؟
    عبدوش : اها زعلت سماسم الشايقيه الاصيله وخليتا تهبش الدناقله فى مقتل .. يا ستى سماسم انتى فوق كل تلك التصنيفات فمن سودانيتك نستمد الق الانتماء يا اصيله ..

  36. aflaiga قال:

    مشاكل : ما وريتنا ها ها ها تسوى ليهو شنو ؟؟ يا خرماج انت يا شقى .. سمعت بتاعة يا شقى انت اسمك منو ؟؟؟
    شباب : والله عندما فتحت هذا البوست لم اكن اتخيل ان يصل عدد التعليقات الى اكثر من 3 انا وعبدوش وانا تانى ؟؟ لكنكم دوما تحيلون الفسيخ لشربات لله دركم ………

  37. عباس ركس قال:

    ( انا وعبدوش وانا تاني ؟؟ ) ما صاح , ( عبدوش وانا و عبدوش تاني ) ! عيني باردة !

  38. عبدوش قال:

    افليقا: انت سماسم دي عرفنها شايقست
    عمنا ود الزبير ده شايت على وين انظر التعليق (5و26) دا معانا واللا مع الخيانا

  39. aflaiga قال:

    ركس : يعنى فرقت معاكم دى بس ولا انتو بتحبو البرى بالترتيب ؟؟ خلاص يا عبدوش عليك الله نرتب الحاجه دى سوا واحمد الله انو الناس دى اعترضت على الترتيب وجلت البرى فى حد ذاتو ؟؟؟
    تعرف يا ركس غير انك راجل كده البيعجبنى فيك انك كده شفت اصبعى ده عامل كيف فى اللحظه دى ؟

  40. aflaiga قال:

    اخى عبدوش : ود الزبير ده انا من خشيت المدونه دى ما عارفو شايت وين لكن اظنو معاى فى نفس الخط انت الشايت وين ؟؟ يعنى انت مع التانيين ولا شنو ؟ لانو لو انت مع التانيين نحنا التانيين …
    عوده للشوايقه :
    كانت جارتنا فى امبده الباب فى الباب كان ما بينى وبينها مثل ما بين الود الوحيد المدلل وبت الجيران شوية مكاواه على شوية شكل على مشاغله بريئه كاانت تختلف عن كل بنات الحى فهى تعرف ما معنى العشق وما معنى التعبير عنه وكيف تقيس مشاعرك اليوم وتفرقها عن مشاعر الامس فقد كانت شايقيه عسوله مثلها مثل بنات الشوايقه يتدفقن مشاعر جياشه ويقيمن مستوى الحب بكالكوليتر الاحاسيس لا بكالكوليتر الاصفار كما يفعل رجالهم ؟؟ كان ما يميزها عن بنات جيلها انها كانت تعرف متى تغضب ومتى تسوق الدلال بينما كانت ابنة عمتى الدنقلاويه الغشيمه تظن ان لفت نظر المراه للرجل ينحصر فى كنس الحوش بعنايه وتفريش الملايات باناقه والتفنن فى صنع سلطة الاسود ؟؟ واحيانا كانت تشتكينى لشقيقتى قائلة : افليقا ده يقعد يبارى لى الشايقيه دى تمرقو من الدنيا وهى مسكينه لا تعلم ان الدنيا لافليقا كانت تلك الشايقيه العسوله .. حين دخلنا الثانويه سويا فاجاتنى شايقيتى العسوله بكلام لم اتوقع ان اسمعه فى سننا تلك حين قالت بالحرف :
    شوف يا افليقا انت مشروع ارتباط ناجح لو فى زمن للقصه دى وانا حقيقه حبيتك من كل قلبى لكن حقيقة القصه ما حب وبس القصه فيها عقلانيه انت طالب ولسه قدامك كتير انا بكره بكبر اسرع منك .. شفت النظره الاستراتيجيه دى والله انا قلت البتتكلم معاى دى ستيفى ليفنى ولا بتى الزمان ذاتا ؟؟
    المهم كان ذلك الشاكوش الشايقى اول ما طرق راسى من شواكيش ومن بعدها توالت شواكيش الاجناس الاخرى حتى اصبح الراس نموذجا للوحده الوطنيه الجاذبه ؟؟؟؟؟

  41. عبدوش قال:

    بي بيو بي بيو يا افليقا انا قلت ليكي انتي ابعدي من البت دا ما سمعتي الكلام لمن اداكي شاكوش …. فرتك ليكي راسك اصلهم الشوايقة كده !!!!!!!

  42. aflaiga قال:

    عبدوش : ده كلامك انت طيب اسمع كلام امها قالت شنو ؟؟ .
    يا الحسن البنيى دى حايمالى مع الدنيقليوى الكحيان ده لى يوم الليلى بيتصرف من امو شيتا فكه حديد وشيتا بتموهو عمود قراصى بالملوحى العفينى وقالت شنو بتريدو ؟؟ والله جانا زى قطعة الشيطان من وين مانى خابرى الولد اب شعيرات العامل متل غنمايات المناصير ده الله يخربو لف راس البنيى .. لاكين قالولك انا بسكت من بكره بلز جواب لى عتمان ود عمها يبيع نخلاتو الفى ساقية بت حميدان ويجى يشبكا بلا لعب وليدات فالحين لى النهاركلو يشخبتو فى واطات الله دى ما عارفاهم بيكتبو فى شنو ؟؟ الكتابه التبقالم بى فكى انشاء الله … شوف ود الدنقليويه المسخوت ده كمان ………..
    من يومها اخى عبدوش وانا اشخبت فى الواطه وحدى بعد ان حتتت الشعيرات وماتت غنيماية المناصير ولم تذق طعم قش ساقية بت حميدان ……….

  43. aflaiga قال:

    بيبيو مينا ارمود ارقى جابوسكن : الترجمه اسفل النص
    سجمنا سجمنا الرماده فى خشمنا ده …..
    تعرفو يا شباب انا واثق من ان بداخل كل منكم قصه عن حب تم واده برغم ان دعوة التسامح الاولى اوقفت واد الحبكانات بعد ان اوقفت دعوة الاسلام الاولى واد البنات … بالله خلو التعقد واحكو لينا فالبوح فى مقام الاخوان فضيله .. لاقاكم زول دقوهو ببوح ؟؟

  44. عبدوش قال:

    موضوع البوح ده داير ليه قعده ده موضوع بتفتح الصباح والمزاااج راايق اول حاجة يبدو زوي الشواكيش الكبيرة والتي تليها وهكذا الى ان نصل الى شاكوش المسامير (الشيش)
    بمناسبة الشوايقة وغناهم الحنيين وهم ما عندهم غيرو تقوم تفتحو لينا بوست جدييد عنوانو انا بخترح يكون اسمو( كنت بضاريه من الناس وخايفه عليه من العييين، انا حبي ليك كان زادي)
    عشان الناس تفتو لينا ونطلع في النهايه بالتوصيات والحلول المقترحة
    واللا الراي شنو؟؟؟؟؟؟؟

  45. عبدوش قال:

    افليقا:
    نقعت انا وانت نتصاقر كده لمن الناس ديل يقصرو اجلنا واللا يقصرو اجل البيت الصقيروني ده
    اها نشوفكم بكره او بعد بكره

  46. خالد مدني قال:

    قلت لي يا افليقا الحلقة الاخيرة متين … والله انا خايف يكون المسلسل مدبلج ويطلع البطل وصاحب مرتو بصوت شخص واحد

  47. نيام نيام قال:

    بيبيو مينا ارمود ارقى جابوسكن
    ستن كارزيا مو جات تسكن
    فافردت لها المطارف و الحشايا فعافتها و باتت في حناني او يمكن..
    كل منا له قصة مع بت الجيران ،ثم بنات الثانوية في باب المدرسة ثم بنات الجامعة في المكتبة ثم بنات الافكار في الحنان زاتو..يا ما قطّعنا النجيلة و ياما غنينا
    قلت ارحل اسوق خطواتي من زولا نسي الالفة
    ابدل ريد بعد ريد عشان يمكن يكون اوفي
    رحلت و جيت
    في بعدك لقيت كل الارض منفي
    اصلو العمر شوقا كان
    و دربا كان مشيتو كسيح
    وايام الشباب و الحبكان لها وقع خاص في قعر الذاكرة تكاد تتفتق عن مكامن البهجة كلما لمستها يد الزمن..ومن ليس له ليلي في صباه ،ومن لم يعطر الرسالة بعطر one man show او يرمي برسالته علي قارعة الطريق في طريق الحبيبة حتي لا تراها عين العازل..
    وكان زمانا صعب البوح شحيح اللقاء عفيف اليد و اللسان ..ليس كزمان التشحط في اللبس و الابتزال في الكلام..كان زمانا عفيفا راقيا شهما تخاف علي من تحب حتي من مر النسيم علي خصلاتها..وترتفع درجة الحرارة حتي إذا داعبك صديق باسمها..إذا لامست يدك يدها في وسط الناس يغمرك الإحساس بالراحة و الألفة و الاطمئنان و تحس ساعتئذ بأنك الفارس النبيل علي صهوة جواده الأبيض مجرد لمسة فلا تنام ليلتين أو ثلاثة و ربما كتبت كراسة من الشعر..كان البوح نبيلا كذلك الفارس،وكان الفارس ممتشقا سيف العفة علي صهوة الشهامة فلا الهوي الوقاد يحرق صبره و لا بخور الأنس يغيب بصيرته..
    كانت لنا أيام في القلب ذكراها..

  48. يبدو أن المغالاة هي طابع عبدوش

    فقد شعرت بذلك من بوستاته المتلاحقة في بكا عثمان

    فها هو يدفع بالغث من الكلام مداخلة تلو أخرى في حق قبيلة سودانية دونما الاشارة الي أي ملة ينتمى عسى أن نجد له العذر في أنهم يحكمون بغير هذه الحكومة و لا يشاركوا الباقين في الماء و الهواء و الطين و العجين

  49. مُخير قال:

    يا خوانا ما كنتوا كويسين،
    ينصر دينك يا أفليقا هبشت حتة حساسة جداً ويا نيام نيام ينصر دين دينك
    والكلام عندك ويقيف، ويا عبدوش ده البنسي القرف وبصلح المزاج بمزااااج
    موضوع الحنان الأول ده، في غير الزمان، وطعم الغناء والشعر غير،
    والله أنا ألتمس إفراد بوست بحاله لموضوع الخدر اللذيذ الزي النعاس، وصدق نيام نيام لما قال ((وكان زمانا صعب البوح شحيح اللقاء عفيف اليد و اللسان)) والموضوع له أبعاد وتساؤلات عديدة هل إستدعاء تلك الأحاسيس من الذاكرة يؤجج نيران تحت الرماد، أم تظل ذكريات صادقة ونبيلة، وهل إذا حدث اللقاء بعد السنين ممكن يصحي أشواق وما طبيعة تلك الأشواق حنين للذي كان أم إحياء للمستحيل الذي لن يكون ووووووووو
    عليكم ربكم رجعونا للحتة دي وخلونا من ساس يسوس

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s