معيط النجيلة دا لمتين …!!!

بالرغم من جهود مسئولي ولاية الخرطوم  ما زال البعض يصف التشوهات و الشغب المعماري الذي ينتظم مدينة الخرطوم و المباني الجميلة المنتشرة وسط بيئة متسخة بانها مثل الشاب الأنيق الذي يلبس جميل الثياب و لكنه ينتعل حذا رثا و قديم. فالقادم الى مدينة الخرطوم بعد طول غياب قد يلمح جهودهم في نزع أو تلميع ذلك الحذاء ليتسق مع المنظر العام للمدينة و أكاد اجزم بأنهم قد أفلحوا في تحسين صورة الحذاء في بعض المناطق حتي صارت قبلة للمواطنين يملؤون منها صدورهم بهواءها العليل و يمتعون نظرهم بمنظر النيل الساحر و البساط الأخضر الجميل الذي يحف نهر النيل من جهة الخرطوم و عقبال مجهوداتهم ان تتواصل لكي يصير النيل كما وصفه الشاعر العربي الأصيل

 

والماء يفصل بين زهر *** الروض في الشطين فصلا

كبساط وشي جردت *** أيدي القيون عليه نصلا

 

بما معناه أن النيل صار مثل سيف وضع علي بساط أخضر … ونحمد لناس الخرطوم بحري و أمدرمان فقد وصلتهم العدوى و صارت الميادين الخضراء متعددة و يؤمها الكثير من الناس حتى و حسبت أن بأحداهن في منطقة أمدرمان سوقا خيريا فقد ذهلت بالأعداد الكبيرة للسيارات التي تحف الميدان و الناس الكتار القاعدين و واحدين واقفين و واحدين سمار و واحدين سهاد و كلهم قاعدين يمعطوا في النجيلة

 

طبعا يا أحبة ان معيط النجيلة هو غاية التعبير عن الشعور بالحب و البكا و المستحيل و الذي غالبا ما يقوم به المحب تعبيرا عن ذلك؛

 

خد عندك مثلا لمن الولد الحبّيب يزنقوهو: يعني يا عاصم آخرة حبنا دا شنو؟

و يقعد يتمتم لمن يلقى انو لسة باقي ليه زي خمسة سنين عشان يتخرج و ثلاثة و عشرين سنة عشان يكون نفسوا و يجي يتقدم

فلا يجد سوى النجيلة لينفث بها عن غضبه و و يقوم ينتفت ليه منها حتة.

 

و الا فلانة التي ذهبت للكوفير و عملت التسريحة الجديدة و نامت بكريم الأساس الخطير و الذي شعرت بمفعوله الرهيب لمن اضافت اليه العالي و الجامعة تاني يوم و أخدت ليها رشة من البيرفيوم الباريسي الماتركيب و قاعدة مع أبوبكر … يقوم أبوبكر ما يلاحظ و يقول ليها الليلة فيك حاجة غريبة في شكلك كنت صايمة أمبارح … تقوم تاخد ليها نتفة

 

و الا هذا الحوار

-         أمبارح يا عبدو أمي شاكلتني جنس شكل

-         أوع تكوني كلمتيها انو حنأخر العرس شوية

-         لا  لا دا ما كان موضوع شكلة الجمعة الفاتت لمن احتفلنا بالذكرى الرابعة للخطوبة

-         أمال شاكلتك في شنو ؟

-         اصلي قصيت شعري

-         ………………… (يعاين في شعرها)

-         قالت لي هسة يمكن عبدو خطيبك ما يرضى و يقول ليك انا كنت عاوزو طويل

-         (تلف شعرها كدا و توريهوا) هسة بالله مش كدا أجمل من زمان

-         هو بالله كان طويل

-         ثقوم تاخد ليها معطة من النجيلة

 

بالأمس و بعد انتهائهم من القعدة المفضلة في النجيلة و هم يهمون بتوقيف ركشه فاذا بسيارة رهيبة كدا تتوقف بعد أن تعدتهم بأمتار و ينزل منها واحد في العشرين بعد الثلاثين كدا و يسبقه عطره الذي خرج مع التكييف عند فتح الباب و يسلم على عثمان بحرارة و يعرض عليهم فضل الظهر

 

-         انت يا عثمان الوصلنا أمبارح دا منو

-         دا واحد زي عمنا كدا في الحسبة

-         اسمو منو

-         دايرا بيهو شنو؟ و يا خد ليهو معطة من النجيلة

-         لا لا بس اصلوا انا شفتو قبل كدا شكلو ما غريب علي

-         شكلو شنو و فصلو شنو ما شايفة الشيب المالي راسو عليك الله دا بعاينو ليهو

-         لكين ما عربيتو رهيبة و باين عليهو مرطب

-         …………………….. (معطة من النجيلة)

-         هو ساكن جنبكم

-         (معطة كبيرة من النجيلة)… قومامكي أوصلك

 

و تستمر المواقف و الحكايات و يستمر المحبين في ولاية الخرطوم بالتنفيث عن مكنونات صدورهم و تحميل النجيلة المسكينة ما فوق طاقتها و اصرارهم على اشراكها معهم عند الخجل و السرحان و عند الهيام و البكا و عند التسليم بقدرهم …..و كلة دا من الأختلال في منظومة الحياة فالغلاء الطاحن الذي ضرب السودان في قلة استئثار القليل من الملل المختارة للمال و البنات السمحات و المدارس الخاصة ..

 صاروا يمرحون اثنان، ثلاثة و واحدين قربوا يملئوا كل الخانات و لم يبقى للمتخرجين حديثا غير معيط النجيلة

 

(الحا) حرق (قافي) بي (نونو) يا هاجر

كلما يفوت (اللام) أنا في هواك ساهر