هل تؤيد سيادية المراه وتنفيذيتها ولا ما ناقص ؟؟؟

وانا مارى بى جنب المجلس الوطنى فى طريقى لامدرمان شاهدت جموعا غفيره من النساء تصطف بجوار المجلس الوطنى ظننت لاول وهله انهم خارجون من الدور التانى من سينما قصر الشباب لكننى حين نظرت لملصق الفيلم على حائط مبكى القصر تاكدت انهن فى مهمه اخرى فالفيلم لا يناسب الاعمار والوجوه التى شاهدتها وبعد قليل بدأ الهتاف على شاكلة ( 20 فى الميه ما دايرين 20 فى الميه امر مهين ) !!

 بعد ذلك تاكدت بان الموضوع فيهو سياسه لان النسبه الوحيده التى تنقص فى حيازة النسوان هى فى السياسه فهن ما شاء الله 90 % فى اى حته مما جعلنا نحن الرجال كل سته فى حته !! ومن ثم تاكدت ان المظاهره سلميه وهى تطالب برفع التمثيل فى البرلمان والمناصب و فى سرى استغربت جدا لقصة الرفع الطوالى بيطالبو بيها الناس ديل ما اعجبنى فى المظاهره انها سلميه فى الاساس وانها ضمت مجموعه من مسالمى السياسه حيث لم نشهد المتطرفات من الاحزاب الاخرى مما جعلها مظاهره شبه حكوميه تعتبر مرانا للمرحله القادمه وانا فى طريقى اصطحبت معى بالعربه احد الحجاج كفضل ظهر وفى الونسه قال لى : تعرف لو عاوز تفرتق القصه دى ارفع ليك لافته فى نص النسوان ديل اكتب فيها : عاوزين نعرف محل مقابر شفعنا وين ؟؟؟ على بالطلاق واحده ما تفضل !!! على كل حال رجعت للمنزل ووجدت سمسمه برضو رافعه شعارت ليست لها علاقه بالتمثيل فى البرلمان فهى خامه البرلمان كلوة بالاجماع السكوتى القهرى ولكنها مطالب لرفع الدعم المخصص للمعيشه والمستلزمات الاخرى … سرحت فى ذلك اليوم فى قيادية وتنفيذية المراه واستوزارها وحين تذكرت ما يمكن ان تفعله سمسمه لو استلمت امر البيت بس خليك من البلد !! رفعت يدى بالدعاء متمنيا الا يستجيب المجلس ولا اى حته تانيه لمطالبهن وتمنيت لو ان لى لافته مكتوب بها : اين مقابر ابناءنا ؟؟؟؟