انت دا شنو الكان بيعمل طق…طق

تساؤل قذفت به المدام في الصباح و أنا بلبس ماشي على الشغل

-         متين؟

-         امبارح بالليل

-         دا ما السرير القديم دا غايتو يوم الا نلقى نفسنا نايمين في الواطه

-         سرير شنو يا راجل

 

أدركت أن الموضوع خطير و لابد أن جماعة خليل قد عادوا مرة أخرى و قصفوا الحلة الجنبنا .. هو ما قالوا عدموهم نفاخ النار تاني ناس العقيد فكو ليهم الدولارات … و الله الواحد بقى ما يأمن لنفسوا تمرق من البيت ما تعرف نفسك حتلحق الغدا و الا تبقى بايت فى المستشفى و الا الحراسة لتخطيك الاشارة  و هي حمراء .. كمان قالوا ناس الولاية أجازوا السجن و الغرامة لمخالفى الطريق و قالوا المواطن دا اصلوا ما يخلوه ما كفاية الغرامات البيعملوها ليهم في الشارع و التي لا يدفعها معظم المخالفين… بس الواحد يقبضوه الا ويقوم و يكب الجرسة … التلاتين ديل بتاعت الحاج حقين دواء الضغط  و كان شلتوهم الا أبيت برة البيت.

 

-         خليل شنو و بتاع شنو؟ قطعت علي أفكاري بحزم و شعرت ان الموضوع جد جد

-         ……………………. !!!

-         أمبارح انا سمعت في التلفون أصوات ناس بيتكلموا و كل مره طق …. طق …شيش

-         ضرب ليك سيد القهوة ؟

-         ضربت لي انت …. و ما تكلمت قعدت أسمع فيكم ساكت

-         أنا ؟

-         كان ما مصدق شوف تفونك تلقى المكالمه في سجل المكالمات

 

الله يجازيكم يا ناس الضمنه و الا يجازيكم يا ناس نوكيا في داعي للاحراجات دي … أتاريهو و انا مزنوق بالهبابة أمبارح و ناس التربيزة الجنبنا شغالين “جهار”  طق…. “شيش” طق … و نحن بيجاي وواحد نازل 81 و مافي اي طريقة الواحد ينزل خلي يفتح و أكون ميلت و دست على رقم ثلاثة في التلفون أصلو التريس دا ورانا ورانا … اليوم داك قدر ما رجيتوا عشان أجر زولي الجراني اليوم داك … حلف براس أبوهو ما يفكو مع أنو مكرهنا بالترايس و الدوهات عمرو كلو … حارق… حارق.

 

من الليلة و حأقوم ألغى خاصية “الاسبيد دايل” في تلفوني و هو العجلة شنو ما الوكت في السودان دا راقد … الواحد يواعدك الساعة تمانية يجيك ثمانية و نص تاني يوم و الا أستبدل تلفوني بواحد زي البيفتحو و يقفلوا ديل زي كبوت العربية و الكمدة بالرمدة … “خمسين” ما تحرك فيهو أي شعرة….. فعلا بالرجوع لسجل المكالمات عرفت من “اللاست كول ديوريشن” انو زوجتنا استمتعت بثلاثة دقائق من البث المباشر من القهوة … ثلاثة دقائق كاملة … و القون بيجي في ثانية زي ما بقولوا المعلقين الرياضيين … و كويس كانت المباراة ودية و لم تستمع لشتائم المشجعين و اللعيبة … فهناك من الناس من يهوى الشتائم و الكلام المغتغت و فاضي كان سلم عليك يتبعها بنبذة و كان لاعب قصر منو الباص و ما قدر يستلموا تلقى واحد لعن ليك سنسفيل أجدادو و عايروا بأمو الخادم و العجب كان الحكم ما شاف جرة الفنيلة داخل خط التمنتاشر.

 

تحتوى (الهواتف النقالة، الجولات، الموبايلات، السيار … المابعرفوا شنو داك) على خاصيات عدة يكاد مستعمليه التفنن في استعمالها كلها من بلوتوث الى سبيد دايل و غيروا و لكنهم لا يستعملوا “السيلنت مود” كثيرا … و يحرقوا في أعصابك.

 

تخيل القاعة الدولية في قاعة الصداقة و قد انتظم الناس فيها يستمعون في الجلسة الافتتاحية للمؤتمر الذي حشد له من مختلف بقاع المعمورة و قد رعاه ثاني شخصية اعتبارية في البلد و يجلس علي يمينه و على يساره الوزراء المعنيين و رئيس لجنة تسيير المؤتمر و اصطف في المقاعد الأولى رجالات السلك الدوبلماسي و المؤتمر الوطني و ممثلي الأحزاب وتنوعت المقاعد الأخري بشتى صنوف البشر من علماء و مدرسين و غيرهم .. جاؤوا كلهم لكي يستمعوا الى الخطابات الافتتاحية و يتفضلوا الي تناول المرطبات بعد ذلك، فبدلا من سماع الخطابات و الأوراق يسمعون مختلف أنواع الرنين للهواتف النقالة “القرد، السلام الجمهوري،  طولت ما رديت، وليم تل، و أخرى برنين متصل لا ينقطع حتي يجيب حامله و هلم جرا  و تكاد تعرف أن هناك مستجد موبايل عندما تسمع رنة النوكيا فتدرك حينها ان صاحبه لم يطف بجهازه  بعد علي محلات الموبايل المنشرة هذه الأيام  و غير نغمته  و ظهرت هذه الأيام هواتف ترن بحشرجة و أصوات طيور و اجراس و عواء جاءت به الأجيال الجديدة من تلك الهواتف. و تعال شوف و أسمع ما يجيب به أكثرهم “أنا والله في مؤتمر حقوا تضرب لي بعد ساعة، و يتمتم بعدها .. لا  لا أنا ما كلمتوا و قال انوا ماشي يقابل سيد العربية بعد المغرب و حيرجع لي..”  و يظل يحاول يسكت من في الطرف الآخر و حمله علي معاودة الاتصال فيستمر كذلك لمدة تضايق من حوله…  و واحدين يبدوا انهم لا يجيبون الا لمن يعرفون نمرتهم و انهم لا يشكلون تهديدا لهم فيظلوا يبحلقون في الأرقام الصغيرة الي أن يتبينوا الخيط الابيض من الأسود  و يكون ذلك كله علي حساب اعصابك و أعصاب من حولك من المؤتمرين…

 

زمان لمن كانت الهواتف النقالة قليلة و حاملوها فئة مترفة لا تضيع وقتها في المؤتمرات لاختلاف أولوياتهم كنا قل أن نسمع رنينا في تلك القاعات و ان سمعنا كنا نطرب للنغمات فلم يكن بها نشازا و لا تهدد أعصابنا كثيرا… فاليوم صرنا نندهش و نتخلع في اليوم ألف مرة خاصة من أولئك الذين يبدوا انهم يخجلون من المواضيع التي يتبادلونها .. فتكون قاعد في أمان الله و في تربيزة بستة أشخاص و عليها زجاجات الحاجة الباردة فينتفض أحدهم و يدقش التربيزة  و يرمى القزاز و يجري بعيدا لكي يرد علي هاتفه … و آخرين يكونون في عمل رسمي متعاقد عليه و لا يؤدوه باتقان .. فاليوم بينما كان مصور كاميرا الفيديو يوثق في الخطابات الافتتاحية رن هاتفه في جيبه .. تخيل الزول دا جفل و نزل الكاميرا من علي كتفه  و أدخل يده في جيبه و طلع موبايلو و جرى لكي يرد  ما عارف كان قفل الكاميرا و الا قعدت تصور في كرعيه… و أمثلة كثيرة لا حصر لها…  طبيب للأسنان رأيته و في غمرة عمله و فم المريض مفتوح يتحدث في ذلك الجهاز العجيب، موظفة تجري في معاملة لي تركت الأوراق و انصرفت الي الجهاز فنصحتها أن تستعمل سماعة لكي تحرر يديدها فنظرت الي شذرا، مدير الاجتماع اضررت أن انتظر حتى ينتهي من محادثته حتي آخد فرصة في الحديث، طالبة تستلم أو ترسل في  message ، طالب يلعب game  في موبايلو في الفصل، استاذ  يرفع رجله و يتكلها في الحائط ورائه في الفصل و يتحدث في الموبايل … و واحد تخيل  و هو داخل القبر ينزل في جثمان وسط رنين هاتفه في جيبه … هذا كثير !!