بيان من الأستاذ الفاتح جبرا

Posted: الإثنين,20 أكتوبر, 2008 by ودالزبير in اخرى

بعد الإتصال بالأستاذ الفاتح جبرا بخصوص مشكله التعليق في المدونه وبعد مراجعته للأمر إتضح إن ذلك الأمر تم من قبل الشركه المستضيفه للموقع وبما غن الإجراءات تسير على قدم وساق في إنشاء الموقع الجديد ( الفاتح جبرا دوت نت ) فقد قرر أستاذ الفاتح المواصله من خلال هذا الموقع سوداننا إلى حين تدشين الموقع الجديد الذي لن يطول كثيراً والدعوه موجهه للجميع للإستمرار بالكتابه هنا ومتابعه مقالات أستاذ الفاتح دورياً بهذا الموقع .

هذا مالزم توضيحه مع فائق الإحترام

About these ads
تعليقات
  1. salih قال:

    (اعيد ارسال البوست من هنا)

    البروف و الاكارم

    سلام

    نحن البلد الوحيد الذي لا يستطيع اهله التفريق بين ما هو حزبي وما هو من الثوابت الوطنية.

    نحن البلد الوحيد الذي تغلب فيه المصلحة الفرديةعلي المصلحة الوطنية.

    نحن البلد الوحيد الذي حتى المتعلمين والمثقفين ـ مصابون بالتأتأة ـ ويعجزون عن التعبير عن انفسهم بلغة واضحة وبدون استعمال الايدي والوعيد والتهديد .

    نحن البلد الوحيد الذي كل مواطن فيه ينتظر من الاخرين القيام بواجباتهم ومن غير ان يحرك هوـ هى ساكنة.

    نحن البلد الوحيد الذي لا مكان فيه للعلماء عند وضع الخطط التنموية.

    نحن البلد الوحيد الذي يدعي التدين ـ وغالب اهله يأكل بعضهم لحم بعض ـ ويدعي الاطلاع وامتلاك المعرفة ـ وغالب متعلميه لا يقرأون وان قرأوا لا يزدادون معرفة.

    نحن البلد الوحيد الذي يتحدث اهله اكثر من ما يعملون .

    نحن البلد الوحيد الذي يعيش علي تأريخه ـ وبه من المثالب ما به ـ ويفتخر به ويردد اهله ـ انحنا وانحنا ـ والعالم من حولهم يبتسم.

    نحن البلد الوحيد الذي لم يفلح ـ حتى في اللعب ـ في احراز فوز مشرف ـ برغم الضجيج الاعلامي المصاحب .

    نحن البلد الوحيد الذي غالب اهله ـ قاعدين فراجه ـ

    …فراجه ـ من يتفرج بفتح الفاء وتشديد الراء وفتح الجيم .

  2. بشار أحمد بشار (إبن برد) قال:

    أعيد إرسال البوست مرة أخري من البيت الصغير
    19 أكتوبر 2008 في الساعة 9:29 م
    نحن البلد الوحيد الذي لا توجد فيه ضوابط صارمة لمنح الجنسية السودانية ويحصل فيه الوافدون من دول الجوار من غير السودانيين على هذه الجنسية والجواز السوداني بكل سهولة ويسر وبناءً على ذلك صاروا يمتلكون المشاريع الزراعية والقطع السكنية والقصور المنيفة وبعضهم يحصل على أرقي المناصب الدستورية وتسيير دفة الحكم وتم التشطيب على أي خطة اسكانية _يعني أجيالكم القادمة إلا يمشوا يسكنوا في الربع الخراب_ ولاهظوا مأآآآي أن أبناء هؤلاء يشاركون أبناءكم في التعليم والدواء والمواصلات وفرص العمل والمستقبل ومقدرات الوطن والثروة والسلطة وقد جاءنا هؤلاء في السابق كأيدي عاملة في مشاريع لقيط القطن وحصاد المحاصيل أو عابرين سبيل لأداء مناسك الحج ومن( ديك وعييييك) وعشان مافي واحد يفهمني غلط أنا أكرر منح الجنسية لغير السودانيين بدون( فلفسة) وفذلكة ويقوم واحد يقول الحدود متداخلة والما بعرفو شنو داك ومالو يخلوا الحدود تداخل زي ما هي عاوزة لاكين أي حاجة عندها ضوابط لو أراد الناس ذلك هسع ناس الجزية والجبايات ديل عارفين أي زول كسب ليهو (ملين) أحمر مابعرفو السوداني من الأسكتلندي؟؟؟ وكم فصل القضاء السوداني السابق في جرائم ارتكبها غرباء على هذا الوطن بالسجن والإبعاد عندما كانت إمكاناته محدودة للغاية _الا رحم الله مولانا القاضي يحي عمران ومولانا عبدالرحمن العاقب وأجيالهم السابقة واللاحقة.

  3. البشاوى قال:

    البروف واهل الدار
    نحنا برضو البلد الوحيد اللى فيهو الفاتح جبرا بيكتب من جوة الناس وبيكتب ليهم
    زفيهو الكواكب البتقرأ ليهو
    ودمتم كلكم

  4. bakrimusa950 قال:

    الاستاذ
    والسمار الكرام
    الفين سلام

    نحن البلد الوحيد (ناكل مما نزرع ونلبس مما نصنع )

    نحن البلد الوحيد الماشي لى ورا .. ورا .. ورا

  5. علي سنكل قال:

    ونحن البلد الوحيد الممكن تقرأ فيه الجريده اليوميه بالإيجار تقراها وترجعها لبتاع الجرايد.

    ونحن البلد الوحيد الببيعو ليك حاجه معدومه إكتشفها ويستينق هاوس.

    ونحن البلد الوحيد المليان مويه لأبو ديشه فوق الأرض وتحت الأرض وفي السماء وفي كل مكان عدا في المواسير.

    ونحن البلد الوحيد البتمشي لجبرا في جبرا دوت كوم يطلع ليك في سوداننا.

  6. ابكرون قال:

    يا سادة يعني عايزين تقولوا كلكم نحن سجم ونحن بجم ونحن رماد ونحن اي كلاااام
    لا وحاتكم انا مع الحردلو ….القال : (مع الاعتذار للتطويل رغم ضغتها الشدييييد وما اجملها كاملة…هذه القصيدة والنمة…..:
    ————————————————————–

    نحن عُزَازْ (ما عزاز شامي)

    ونحن حَرَازْ

    ونحن هَشَابْ

    ونحن قُمُوحْ

    ونحن تُمُورْ

    ونحن عُيُوشْ

    ونحن النيلْ

    وَكضَاب – يا زويل – منْ قالْ

    إنّك .. تانى لينا متيلْ ،

    ونحن – يمين – جُمَال الشيلْ

    ونحن – يمين –نَضِمنا قليلْ ،

    ونحن شَرَافه فى الدنيا

    ونحن كِتاب عِلمْ مفتوحْ

    على كل البُلودات ..نُورْ ،

    ونحن – يمين – مَداين نورْ ،

    ووشنا نورْ ،

    ونحن الحِنه والجرتقْ

    ونحن الزفه والسيره ،

    ونحن ..أبشرى والشبال ،

    ونحن السَىْ

    ونحن الوَىْ

    ونحن الرقبه .. والتُمْ تُمْ

    ونحن اللَمْ ..

    يكون فى الدنيا ..متلنا ..لمْ

    ونحن العَاجْ

    ونحن الصَاجْ

    ونحن البوشْ (بوش عبدووووش)

    ونحن الحوشْ

    ونحن الناسْ

    وكتين الديارا ..يباس

    وإن درت العديل والزين

    تعال يا زول ،

    وإن كست الكعب والشين

    أرح .. يا زول

    ونحن السورْ

    ونحن الحُورْ ،

    ونحن بناتنا محروساتْ

    ونحن وِلادنا ضُلالاتْ

    ونحن أُماتنا ياهِنْ ..ديلْ ،

    وجِيب ورينى زيىِّ منو ،

    ونحن فَزَعْ

    ونحن وجَعْ

    ونحن اليُمه ..واليَابَا

    ونحن أريتو بالتَابَه ،

    ونحن وِلاد مَلك خِرتيتْ

    وسَابَ الجرْ

    وحجَر السِكه ،

    والتاكا ،

    وسيّدنا الفى الجبل ..دَاكَا

    ونحن – يمين – نضِمنا كُتُرْ

    وشيَتنا كُتُرْ

    وأسعَل ناس كَرن والطُورْ ،

    وأسعَل كَررى .. والعَتْمُورْ

    وأسعل – يا جنَاَ – الخرتُومْ ،

    ونحن الدوكه

    والضُلاله ، والدونكه ،

    ونحن الدانقه ،

    والراكوبه ، والواطه ،

    ونحن الفَكَه

    والشِبكَه

    ونحن الحجزه .. والعكَه ،

    ونحن الجُودْ ،

    ونحن أسودْ ،

    ونحن النَانْ ،

    حديثنا إذا أرِدتو رُطَانْ

    وحين دايرين ..نسوى بَيَانْ ،

    ونحن سبيل غريب الليلْ ،

    ونحن صباح مسافر الليلْ ،

    ونحن فَنَاجرةَ الدّنيا ،

    ونحن حَبَابْ

    حديثنا حَبَابْ

    تعال شَرِف .. وشوفنى منو ،

    أقيف لِسَعْ

    وأقيف وأسمعْ ،

    ونحن صديرى منضوم ويلْ

    ونحن القَرمصيص ..بلحيلْ ،

    ونحن التوبْ

    ونحن الووبْ

    وناس حبوبْ

    وناس حَرّمْ

    ونحن إذا رأينا كبيرْ

    نقيف طولنا ..ونقولْ لُه ..حَبَابْ

    ونديه البُكَان ..ترحابْ

    ونحن. اليَانَا ديل .. يا زولْ

    وتسعلنى .. وتقول لِى منو

    وتقولِى شنو ،

    أقيف لسعْ

    وأقيف .. وأسمعْ

    ونحن التَايَهْ

    والاندايَهْ

    والزِريعهْ

    والعيزومهْ

    واتفضلْ ،

    ونحن الرايَه مرفُوعه

    ونحن الكُلفَه مرفُوعه

    ونحن حلفتَ … مدفوعه

  7. علي سنكل قال:

    السمار ألفين سلام
    الفاتح جبرا تعظيم سلام . .

    أيوه يا ابكرون . .
    الجزء الأول من كلام الحاردلو من الهراشه وتخويف الآخرين الذين لا يخيفهم هذا الكلام موافقين عليهو من جهة التباهي ، بالأم والحبوبه والأصل والجدود ما في عليهو إختلاف.
    الكلام يأتي من الثقافة التي تؤثر على نمو وتطور البلد ، تعال نشوف الأثر نتاع الهراشه شنو؟

    عاين لي ذي الكلام ده ووريني كيف يتم تمويل الآتي :

    وأقيف .. وأسمعْ

    ونحن التَايَهْ

    والاندايَهْ

    والزِريعهْ

    والعيزومهْ

    واتفضلْ ،

    ونحن الرايَه مرفُوعه

    ونحن حلفتَ … مدفوعه

    من أين يتم تمويل هذا الكرم ؟
    ما هي المصادر ؟ غير أكل مال الآخرين وأموال البنوك؟

  8. بشار أحمد بشار (إبن برد) قال:

    أبكرون /سنكل: كان زمآآآآآآآآآآآن

  9. salih قال:

    الاكارم
    العم ابكرون
    سلام

    *((نحن عُزَازْ ))
    لا ارى عزة يا عمنا… ادعينا التدين ونحن ابعد ما نكون من سنة المصطفى صلى الله عليه وسلم … والدين المعاملة.
    حتى تأريخنا (؟) ما حافظنا عليه فأين العزة؟

    *(( ونحن – يمين –نَضِمنا قليلْ ))
    دي فيها مبالغة كبيرة … لا يوجد من -ينضم – اكثر منا كما لا يوجد من يعمل اقل منا !!

    *((وأسعَل ناس كَرن والطُورْ ،
    وأسعَل كَررى .. والعَتْمُورْ
    وأسعل – يا جنَاَ – الخرتُومْ ،))
    ما قلت ليك ناس تاريخ ساكت! واريتو اكان فهمناهو كويس وطلعنا منه بما يعين في المستقبل!!

    *((ونحن الجُودْ ، ))
    اذا كان ذلك صحيحا لما تركنا جيراننا وذوي الحاجة من الجيران يسألوننا ما يسد رمقهم!!

    *((ونحن أسودْ ، ))
    كُنَّا!!

    *((ونحن فَنَاجرةَ الدّنيا ))
    بل اُضحوكة الدنيا

    *((ونحن إذا رأينا كبيرْ
    نقيف طولنا ..ونقولْ لُه ..حَبَابْ
    ونديه البُكَان ..ترحابْ ))
    كُنّا كذلك!

    *((والاندايَهْ ))
    اها كيفن تلم دي مع العزة/عزاز!!

    فتأمل وتبسمل وتحوقل !!!

  10. حاج أحمد السلاوى قال:

    أخوى الكاشف .. ابكرون..وكل القبيلة.
    سلام مربع ومستطيل ومثلث و … كل الأشكال الهندسية .
    قصيدة أخونا الحاردلو الجميلة دى تحكى عن التاريخ .. وتحكى عن حضارة سادت ثم بادت.. ثم إنى عارفك عاوز تخفف وطأة النقمة والإحباط العلى الناس دى كلها..والقصيدة ذكرتنى عن قصة طريفة توازى الفصيدة إياها .. وهى إنو كان فى شيخ عمل محاضرة دينية فى إحدى الجامعات المصرية وبعد المحاضرة بدأت الأسئلة والمداخلات .. قامت طالبة محجبة وسألت الشيخ المحاضر عن صحة الحديث اللى بيقول إنو النساء ناقصات عقل ودين.. فأجابها الشيخ : أيوة يا بنتى دة كان زمان .. بس دلوقت مافيش .. لا عقل .. ولا دين …والشىء بالشىء يذكر …نحن دلوقت فقدنا كل حاجة جميلة مكتوبة فى القصيدة الجميلة وما بقى لينا حاجة غير التهليل والتكبير…وشعارات وتنازع على السُلطة بين جميع أهل السودان شرقه وغربه وشماله وجنوبه.. بينى وبينك الحاصل شىء فعلاً يدعو للإحباط والتشاؤم..وما زلنا منتظرين نشوف آخرته شنو…!!

  11. مرحب بالزعيم بيناتنا هنا و الذي لم يفارقنا البتة فهو معنا في كتابتنا و نحن معه في كتاباتو….

    بهناك يا ود الزبير في الرحلة عصمت قال حيسحقك في تنس الطاولة…تأهيل ماليزي..عيد الضحية قرب استعد

    كسرة:
    غايتو أنا من رأي يا ود الزبير أن تدخل الصور الى داخل البوست ففي ذلك تقليل لمساحة العنوان و مفاجأة للناس في الداخل…ناس الفاتح ما مشكلة لكن عبد الرحيم دا هسة حيكون قاعد لينا بوشو الطويل دا و الا الكديسة السمينة طوالي نعاين فيهم لمتين

    تحياتي

  12. ودالزبير قال:

    شباب
    هسه بدل تقعدوا تعلقوا على موضوع مافي ما كان وأحد يأخد الأجر وينقله هنا لو دخل زول غريب راح يقول الجماعه ديل بيتكلموا عن شنو غايتو عالم متعبها بشكل .
    يا أبكرون
    مين عزاز شامي دي وبالمناسبه أخبار وضاحه شنو ؟؟؟ !!!!!
    عزت المرطب
    بناء على رغبه المشاهدين تم إرسال السيد عبدالرحيم لسله المهملات.
    الكديسه تم الإحتفاظ بها لأنه أخوك معجب بيها بالله شوف الكديسه دي سمينه قدر شنو ………………. قادر الله .

  13. حنين قال:

    ود الزبير والاخوة المدوناتية الكرام والشلو قفافم من بى هناك جابوها بى هنا .
    سلام وصباح الخير .
    أثارتنى الحتة بتاعة ((وأسعَل كَررى .. والعَتْمُورْ )).
    لأنى كررى دى عنى فيها راى كبير وعندى راى فى التعايشة زاتم وفترة حكمهم السوداءوإنشاالله مايكون فيكم حفيد عبد الله التعايشى . نحن كررى دى مامفروض نفتخر بيها ولا مفروض نزكرا فى تاريخنا ومفروض نخجل عليها يعنى زى حرب 67 الابكت عبد الناصر . ياجماعة بالعقل كدة فى خرتمية نفر واعيين برقدو قدام المكن تقول نايمين , غايتو جنس غايتو …

  14. ابوالمنذر قال:

    بيان هام

    من المشتاق لشوفة الغالين حنين مدوبنا
    الى كل مدون ومدونه والقايد الهمام

    لقد حالت ظروف (قاهره) من التعليق مع اقتتطاع لحظيات للمرور . وهو فى ذول يعيش بدون اوكسجين القمردينه!!!!!!!!!
    باسم الحب برسل تحياتى …
    وفى الختام نحمد الوهاب بحلاوة العوده ولقيناكم دهب الخزانه الق وبريق

  15. neiam قال:

    البروف اهلا بك في اوضة الاولاد..
    ولو لا اختلاف السناكلة لبارت السلع ..بعضهم مع الحردلو و بعضهم حار دلوه..عموما نحن البلد الوحيد..
    نحن البلد الوحيد الناسو بقولو ” نحن أولاد بلد نقعد نقوم علي كيفنا”
    طيب ناس البلاد الثانية أولاد شنو..بقعدو و يقومو علي كيف منو..
    نحن البلد الوحيد الكل زول بقوليك انا ود البلد دي و يخش يرقد أي حاجة تحصل يقوليك و “انا مالي”..
    نحن البلد الوحيد الكل زول نضف بيتو و رمي الوسخ في الشارع و لمان يجو الضيوف يقول ليهم بالله شوفو بالله “دي امة دي”..
    نحن البلد الوحيد تمشي تدفع حق الجمرة و تجي عشان تنوم تلقي الاوضة هي الجمرة..

  16. مُخير قال:

    البروف سيد الدور وحبيب الكُل صباح النور
    الأخوات البدور والحبان نوار الدور والحيشان
    سلام
    ود الزبير مشكور على المبادرة بالتوضيح وإخراجنا من غيبوبة التوهان وما أشبهها بالإختناق على حد تعبير أبو المنذر.

    نحن الوحيد بلد وحيد وسايق والقصير والكرامة والضحية والضحيتين
    نحن البلد الوحيد الفيهو الرشاش والرشوة والرشوشة والرشاشات
    نحن البلد الوحيد والشعب الوحيد المتعطش للصدق والمصداقية
    ونحن الفاقدون لما وهبنا ونحن المغبيون ومغيبون وما درينا
    ونحن إذا بلغ الفطام لنا صبياً يضيعه ويضربه ذووه بلا غبينة
    تقول لي شنو وتقول لي منو

    أبكرون: تسلم لمحاولة إفاقتنا من صدمة الخيبة وإيقافنا من جلد الذات سيئين نعم ولكن هناك فرصة وإمكانية لتصحيح أخطائنا وإصلاح ذواتنا يلزمنا فقط قليل من الأمل والتفاؤل وكثير من الإصرار والرغبة في التغيير والله يصلح حالنا آمين.

  17. ودالزبير قال:

    مخير
    نحن البلد الوحيد الفيهو الرشاش والرشوة والرشوشة والرشاشات
    ده كلام شنو يا زول الكلام ده إنت عارفو يعني شنو ومدرك لخطورته وقمت كتبته بكامل إردتك ووعيك وأنت في كامل الأهليه لتحمل العواقب الناجمه عنه .. رد عشان نرد عليك .

  18. aflaiga قال:

    شباب : طبعا انا طاشى شبكه من امبارح ( حتقولو لى امبارح القريبه دى بس ؟؟ ) افليقا اصلا طاشى .!!
    اها جينا لقينا التعليقات رحلت بى جاى والموقع ما بيقبل ابنص وبيقسم بس !! قالو داير طرمبة بنزين !! والطرمبه طلبوها من الوكيل ولسه ما جات !!
    اها نقوم نجى ندى كم ابنص بى جاى :
    انحنا البلد الوحيد دى عاوزه وقفه لانو فى بلاد تانيه كتير متميزه بحاجات تانيه كتير وهم الوحيدين فممكن نقول لسنا الوحيدون لكننا الافضل !!!
    يعنى العالم كلو بيسرق ونحنا الوحيدين اللى لمن نسرق بنقول بسم الله .
    والعالم كلو بيسرق وبيعمل نايم ونحنا الوحيدين البنسرق وبنقول هى لله .
    العالم كلو بيحكم شعبو بالجبروت ويقولو ليهو كده رجاله بس ونحنا الوحيدين البنحكم شعبنا بالجبروت ونقول ليهو باسم الله !!
    العالم كلو بينضف وساختو بره البلد ونحنا الوحيدين البنوسخ نضافتنا وننضف وساختنا جوه البلد !!!

  19. aflaiga قال:

    ود الزبير : اسى الجاب سيرة الرشاشات شنو الزول ده قاصد حاجه تانيه بيرشوها لكن ما بتقول كش وبتبدا بحرف الهلال ..

  20. ودالزبير قال:

    عارف يا أفليقا
    رشاشات دي لو جات من زووووووووول كنا بنعديها لكن مخير ده زول كويس وكنا حاسبنو مع ناس البطل يقوم يطلع مع الخيانه .. شايفه متحاوم في بوست عزت بتاع تاااااني بالله لو لميت فيهو قول ليهو ودالزبير داير على إنفراد بهنا برضو شايف صاحبك زوووووول متحاوم في بوست الرحله . بيكون لسه فرحان بصفقه إستيفن وارغو الكلفت خزينه الدوله مبلغ 3.5 مليون دولار وأوعك تقول لي المبلغ ده يعني كم بالجنيه …. !!!!

  21. زووووووول قال:

    ود الزبير سلااام
    ونشرب* ان وردنا التسجيلات صفوا ويشرب غيرنا* كدرا وطينا
    لنا وارغو مورغنها عليكم ومالئ شعاركم كدرا وطينا
    1/ نشرب فيها ضمير مستتر تقديره نحن المريخاب
    2/ غيرنا يعنى حا يكونوا منو
    3/ كدرا وطينا الاولى هى ما تعلق من الاطيان بشعار الهلال الابيض يوم الرباعيه الوارغونيه
    4/ كدرا وطينا الثانيه تعنى ما لحق بنفوس الهلالاب من دفع الوالى لمبلغ خرافى (حسب تصورهم ) لتمكين نجم انيمبا وهداف دورى الابطال من الجلوس على دكة بدلاء الزعيم فى الموسم المقبل .
    كسره : انت شوفت حاجه يا ود الزبير كمان فى اربعه مليون لابو تريكه لو ما عاجبك امش اتغدى بسمك . وكمان برضو فى مليون دولار ليوسف محمد بتاعكم . وانتوا ساعدوا الارباب فى الاطناشر مليون سودانى بتاعة مدثر كاريكا وبركه عباس مع بعض .
    كسرة ترفع الضغط : استيفن وارغو يساوى اردب كيلتشات ولورى فييرات وبطاح برنسات

  22. ابكرون قال:

    سلام
    يا عالم نحن والله زينين لكن ما وسخونا الا الوسخين وسحابة (دهر) وحتمر في زول كان قايل نميري حيطش ولا شوسسكو ولا انور السادات ….ليل ولا بد لنهار يكنسه …وبعدها كلام الحردلو ما (حتحردو يا د. صالح )
    مخير : جبته ليتا الكلام بالرشاشات دي ….شفته زوووووول هبه كيف ….انت دحين يا زوووووول زولكم ده مش من الجوكية الجدد هو ونسيبه …..ديل برضو حيتكنسوا مع مازدا وشداد واحمد بابكر ويلا بلا طمام وخمة نفس ….
    ود الزبير : فلانه دي من (عندنا) شفتها ترمي في الحسكنيت كيف ….؟ بتسال من منو (مين …روز ) ؟ مالك ياخ ما تجيب لينا الهوا…
    حنين :عندك حق كرري كانت وصمة في تاريخ السودان ….والخليفه لو سمع كلام قادته العسكريين زي دقنه وود الفضل وابوعنجة ولاقى الانجليز في شلالات السبلوقة كان غير تاريخ السودان في الحقبه ديك واسه ….(ويمكن كان تزوج الملكة فكتوريا )

  23. زووووووول قال:

    ابكرون (على طريقة ود الخلا يا ود الزبير )سلااام
    اى حاجه ممكن نقبلا منك الا الكلام فى مازدا لانو دا الراجل الوحيد الوصلنا نهائى كاس افريقيا ودا الزووول الوحيد الخلانا نتعادل مع الكاميرون ونغلب غانا ونجى قدام تونس ونطقطقا هنا .
    واى حاجه ممكن نقبلا منك الا الكلام فى والينا المورغن وقصة انو من الجوكيه دى ما عندها اساس من الصحه وما عندك عليها اى اثبات.

  24. ودالزبير قال:

    أها يا زووووووووول
    عندك إثبات إنو ناس الإنقاذ ديل قتلو 28 ضابط في رمضان ما يمكن الناس ديل إنتحروا
    عندك إثبات إنو الشيخ إختلف بالجد مع حيرانه
    عندك إثبات إنو أسامه بن لادن كان وراء هجمات 11 سبتمبر
    عندك إثبات ولا في زووول قال ليك ولا سمعت في أي حته إنشاء الله جريده حائطيه عن مصدر أموال جمال الوالي .
    في حاجات يا زووووووووووول ماداير إثبات ولا يحزنون ….بتتفهم وتتعرف بس ومن الحاجات دي ثروه السيد جمال الوالي.

  25. زووووووول قال:

    ود الزبير
    اها ورايكم مع ثروة السيد / ستيفن وارغو شنو عندكم اثبات انها من اموال الحكومه ولا دى زعله ساكت

  26. مُخير قال:

    ود الزبير: ياخي مالك ؟؟ جرحتك الرشاشات دي، طيب أنا ذاتي مجروح وكلنا رشاشات بنذرف دماء زرقاء، كلما نعشم في الفرح والتفوق وتحقيق ما لم يستطعه الأوائل يجوا يحبطونا لو تذكر قلت لك في بوست سابق أنني لن أتفائل حتى أرى القبطان سيدا رافعاً كأس الأبطال فوق منصة التتويج أين نحن الآن من التتويج ومن كأس الأبطال، أصبحت إنتصاراتنا في معارك إعلامية ومشاكل وهمية مفتعلة مع اتحاد شداد أبو تفة وصرنا كالمنبتة لا أرضاً قطع ولا ظهراً أبقى ولا بكراً بلغنا ولا كلابا.

    حنين ثرو أبكرون:
    كرري تحدث عن رجال كالأسود الضارية،
    خاضوا اللهيب وشتتوا كتل الغزاة الباغية،
    ليس من العدالة وصف كرري بأنها وصمة في تاريخ السودان، لقد قاتل أجدادنا البواسل بأسلحتهم المتخلفة الجيش الغازي المزود بأحدث من أنتجته المصانع الأوروبية من مدافع، ولم ينكسروا ولم يخنعوا وستبقى أنصع صفحة في تاريخنا الحديث ويكفي ما شهد به أبناء الغزاة في كتبهم ولا حاجة للتعليق على ما خطه يراع ونستون تشرشل في كتابه “حرب النهر” الذي أفاض فيه في الثناء على الحركة الجهادية الإسلامية السودانية, التي قادها الإمام محمد أحمد المهدي، كما نظر نظرة إعجاب شديدة إلى انجازات تلك الحركة, مؤكداً أنها أنجزت كل ما كان بإمكانها أن تنجزه, بل شطح وربما كفر حين بالغ و زعم بأن إنجازات المهدي في حياته, كانت أكثر من انجازات محمد، (عليه أفضل الصلاة والتسليم)، في حياته, وقال إن الخليفة عبدالله عندما انهزم بجيشه في كرري، فإنه انهزم فقط لأنه واجه آلة علمية هائلة, من آلات الحضارة الغربية, وليس لأي سبب آخر. وكان تشرشل حينذاك ضابط وصحفي شاب – ولما له من قدرات ذهنية غير إعتيادية أصبح فيما بعد رئيساً لوزراء بريطانيا إن لم يكن أشهر رئيس وزراء بريطاني على مر العصور. فمن باب أولى أن نفخر بإنجازات جدودنا التي أشاد بها أعداءنا ولكما خالص ودي وتقديري

  27. مُخير قال:

    ود الزبير: حبيبنا الحال من بعضو وكلنا في الهم والغم سواسية، ولا أبالغ إن قلت لك لم تعد تفجعنا الهزائم فلا معنى لإنتصارات رياضية تُنسب للأثرياء الجُدد أبطال الغفلة الذين هم من الثمار المسمومة لشجرة الإنقاذ الخبيثة التي لا تلد إلا نفعيين وأصلها ليس بطيب ولا فرعها في السماء، الذين أتوا في زمن الإنقاذ بحثاً عن جماهير على نياتها أمثال الزووووووول يدافعون لهم عن مصادر ثرواتهم المشبوهة تمسحوا الأندية الكبرى ليحظوا بتعاطف ولربما ولاء وموالاة من جمهورها، ما يهمني هنا الذين تسلقوا على أكتاف الهلال كي يصعدوا فإذ بهم يقعدوه، ولن أبكي على حال الهلال وسودان العز والفخار يغوص في وحل الحروب والضغائن والفساد، والله يرحم القادة الزُرق الذين عشقوا الهلال أمثال العملاق الراحل الطيب عبد الله الذين يقتطعون من مزارعهم كي يغروا الموهوبين بالتسجيل لهلال الملايين ويدفعون من جيوبهم كانوا يعطون ولا ينتظرون جزاءً ولا شكورا .

  28. د.ياسين شمباتى قال:

    العم ابكرون..قصيدة تسوى تأريخ بحالو,,ولنا فى اسلافنا عبرة ..ولا بأس ان حذونا حذوهم وتقفينا اّثارهم..

    مخير ثرو حنين..بدون ما تتهمونا فى وطنيتنا,,بس اكرر كلام احد الاخوة (الاسود الضارية دى ياها الورطتنا وغطست حجرنا),,بالجد دى كانت وصمة فى تاريخنا النضالى وذهبت بكل محاولة اخرى للثورة او الانتفاضة الشعبية ضد الحكم الانجليزى..واظن انو الخليفة عبدالله كان ناوى فعلا عرس فكتوريا دى !!

  29. ابكرون قال:

    يا مخير يا حبيب
    ما قلنا شي في المهدية وفكرتها كثورة ولا في تاريخها الجيد وتصديها للمستعمر ….انا بتكلم ليك عن معركة كرري العسكرية….انا قريت …كرري بعدة طرق تكتيكية واستراتيجية ….المعركة كانت انتحار وهاشمية سااااكت….انت عارف قدرات عدوك كان ممكن يستخدم الدهاء باعتراض البواخر النيلية في (الخانق) الضيق وهو السبلوقة (وما اذكي عثمان دقنه ززالذي اثبت حنكته في معركة خور شمباتززززعندما بهدل تشرشل)…..كان بامكان قوات الخليفة ان ترهق القوات المتقدمة عبر النيل وتستنزفها بعدة طرق …ما عايز ادخل في تفاصيلها…ليس من البسالة في شئ ان (تصطف ) داخل (زريبه )وتواجه المكسيم (رشاش جديد – ما رشاشات ود الزبير) لتحصد جنودك …ليكتب تشرشل : كانوا مجندلين بنفس هيئة الصفوف هم وحصينهم…..كانت غباء فعلي….وليس كفرا ان قلنا الحقيقة العسكرية….فهي ليست محرقة اليهود من انكرها كفر…..
    عزيزي في ام دبيكرات جلس الخليفة في (تبروقته) …ليُقتل ماذا تسميها ؟؟ …ان هب واستل سيفه (واقفا) وقتل جنديا واحدا من الاعداء وقتل لمات شهيدا …..
    رحمهم الله رحمة واسعه ….والتاريخ لا يرحم ويسجل كل شي….

  30. حنين قال:

    أخى مخير .
    لك تحياتى وودى .
    ياأخوى إنت لو ماقريت التاريخ ماعندك أعمامك أو جدودك كلموك عن التاريخ الاسود لفترة التعايشة .؟؟ لو تفحصت تاريخ الخليفة عبد الله بتلقى إنو أحقد زول على الشماليين .هل تعلم أنة أرسل قائدة محمود ود أحمد ليقاتل الجعليين وكل قبايل الشمال فى واقعة النخيلة . هل تعلم أن جنودة كانو ينهبون ممتلكات الاهالى نصة نهار والسوط والسيف لمن يعترض فعلا أو قولا ألم تعلم أنهم كانو يجندون الشباب والشيوخ بطريقة أبشع من دفارات الالزامية فى عهد الإنقاز .
    ولو جينا لى كررى ((خاضوا اللهيب وشتتوا كتل الغزاة الباغية))، ياخى الغزات ديل مافيهم واحد مات بى سيف رجال كررى . تقوللى نلاقيهم الصباح نامن العين تشوف . وبعدين لو داير تاخد بى كلام الغزاة عشان تثبت شجاعة أبطال كررى أى إنسان بفوز فى معركة بكتب عن قوة عدوة وفى ذلك إطراء وثناء على نفسة يعنى قولى لية ماكتبو عن مقتل غردون أودخول المهدى الخرطوم ؟؟إنت ما شاهدت فلم عمر المختار السنمائى فيهو إشارة لقوة الطليان ومكرهم ودهائهم بالرغم من بطولة المختار و أعوانة .
    نرجع ونقول هزيمة الخليفة عبد الله كانت نهاية حقبة سوداء مظلمة لأهل السودان

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s