عائدات القمل

Posted: الأربعاء,4 فبراير, 2009 by الفاتح جبرا in ساخر سبيل

أخيراً جاء الفرج بعد أن لم يفلح (السلام) وتوفير (ميزانية الحرب المكلفة) فى التأثير على حياة المواطن إيجاباً وتحسين (معيشته)كما لم تفلح (عائدات البترول) فى خفض (أسعار الخبز) ! نعم جاء المشروع (اللى هو) والذى سوف يخرج المواطن من حالة الفقر والمسغبة إلى حالة (النعنشة) والترطيب .. ما تستعجلوا ح أشرح ليكم (الفكرة)  فقط أقرأوا معى هذا الخبر الذى ورد  في إحدى الصحف السعودية بتاريخ الجمعة 23-1-2009  والذى يقول :

 (شهدت العديد من منتديات الإنترنت امتهان بعض النسوة في السعودية مهنة بيع (القمل) – أيوه القمل الواحد ده –  بقيمة 50 ريالا للحفنة الصغيرة، وسط إعلانات مكثفة عن فوائد كبيرة للقمل، منها الحماية من الجلطات، وتكثيف الشعر، وأنه علاج لمنع حدوث الجلطات بالرأس، على اعتبار أن القمل، وهو يتحرك بالرأس، يقوم بعملية تدليك لفروة الرأس وتزعم تلك النسوة اللاتي ظهرن في تلك المواقع والمنتديات كمسوقات للطب الشعبي أن القمل يقوم أيضا بامتصاص الدم الفاسد ليتغذى عليه، وأنه بذلك تتجدد الدورة الدموية ولا يحدث جلطات بالرأس، كما زعم البعض قدرته على تكثيف الشعر؛ لأنه يسبب الحك المستمر لفروة الرأس بحيث يعمل مساجا دائما لفروة الرأس، وينشط نمو الشعر ) !!

إنتهى الخبر وبدأت الفكرة  والتى مؤداها – عطفاً عل ما جاء فى الخبر- تبنى الدولة (لمشروع لإستزراع (القمل) وتصديره – وأهو عائداتو ممكن تكون أحسن-  !
كالعادة يبدأ المشروع بصدور القرار رقم (كده ما عارف) لسنة (أيه كده) بإنشاء (المؤسسة الوطنية لإستزراع وتصدير القمل)  وطبعن ( تعيين مجلس الإدارة)  - من النوع المألوف – وبقية (الهيكل الإدارى)  من مدير (عام) و نواب المدير العام (الكتار ومساخ) ، نائب المدير العام  للمشتروات (التعاقد على شراء سلالات القمل المحسن) ونائب المدير العام للمبيعات (لوضع وانفيذ إستراتيجيات البيع) ونائب المدير للتغذية (تغذية القمل طبعن) ! وبقية نواب المدير العام للإدارات الأخرى كالإدارة المالية والقانونية وخلافة !

ينشأ (كالعادة) جدل كثيف حول تبيعية هذه  (المؤسسة) بحسبانها (ذات عائدات ضخمة) فحيث ترى (وزارة الزراعة) بأن المسألة تخصها بحسبانها (إستزراع وكده) ترى وزارة (الثروة الحيوانية) بان (القمل) من صميم (إختصاصاتها)  - مش فيهو روح؟ – إلا أن (وزارة الطاقه) تضعها صريحة وواضحة  (المشروع ده كلو بيعتمد على الطاقة القملية) !!

حيث أن المكان الوحيد الذى يعيش فيه (القمل) هو (الشعر)  لأنه يتتغذى على (الدم) كان لابد من إعلان (النفرة القملية) لإستزراع خمسة وعشرين مليون راس مواطن (مربع) الشئ الذى حدا بمسئولى المؤسسة لفتح باب التقديم لوظائف (مزارع بشرية) – وإنت وشطارتك فى الإنتاج- !! الشئ الذى ساعد فى تقليل نسبة (العطالة) بإستيعاب جيوش العاطلين من الخريجين وبقية المواطنين . ويتبارى المواطنون العاملون فى (المشروع) كمزارع بشرية فى توفير البيئة المثالية للقمل :

-       والله ذى الخلطة بتاعت (زيت الخروع والسمسم) دى مافى .. بتعمل ليها ألف قملة فى الشهر !

-       خروع شنو؟ بس إنت جرب (القطران) بالعسل ! والله تصفى ليك ميتين ألف جنيه فى الأسبوع !

ينجح المشروع أيما نجاح فمن جهه قد قام بخلق فرص وظيفية للمواطنين كما شكل دخلاً إضافياً  لبعضهم ومن جهه أخرى فقد أصبحت (المؤسسة الوطنية لإنتاج وتصدير القمل) المصدر الوحيد لأجود أنواع القمل (العالمى) ، صار (السودان) يصدر خمسمائة مليار (قملة) شهرياً (نصيب الحركة) منها (تلتمية مليار!)

حيث لأنه لابد ان تكون هنالك (حقيقة غائبة) يتم إكتشافها بعد (إنشاء المشاريع) فقد كانت هذه الحقيقة التى تم إكتشافها بعد (مضى عام) من عمل المؤسسة هى أن جميع المواطنين المشاركين فى المشروع قد أصيبوا بالأنيمياء (فقر الدم) ! ، تدهورت حالة (أفراد المزارع البشرية) وكان لابد من تلقيهم للعلاج إلا أن إدارة المؤسسة قد أوضحت لهم بأن (بأن يمشوا يؤاجعو عقد التخديم) والذى لا يحتوى على أى بند لعلاج (إصابات أو أمراض العمل) !

يقوم المتضررون من (أفراد المزارع البشرية) بتكوين لجنة لمقابلة إدارة (المؤسسة) يطالبون فيها المؤسسة بالتكفل بعلاجهم مخاطبين المدير العام للمؤسسة :

-       يا سعادتك نحنا ما عاوزين غير ما تعالجونا من قروش (عائدات) القمل المص دمنا ده !

يبتسم (المدير العام) إبتسامة ماكرة وهو يقول :

     – (عائدات شنو؟) إنتو قايلين (القمل) ده بجيب قروش !

 

 

About these ads
تعليقات
  1. حاج أحمد السلاوى قال:

    الفاتح جبرا ..ابو الأفكار الغير مسبوقة ..
    شايف الجماعة داقسين لسه ..بس ما قبل ما أخلص وأعمل أرسال ألاقى واحد من النشطاء فى مجال القمل واستزراع القمل عمل واحد داون لوود ..ربك يستر ..
    أنا أجيك من الآخر ..وهى إنو أسعار القمل نزلت فى الأسواق العالمية زى البترول فصار ما بيجيب قروش .. بس السؤال لمن كانت الأسعار عالية فى السما ( أسعار القمل طبعن ) قروشو راحت وييييييييييين ؟؟؟

  2. طارق أب أحمد قال:

    البروف والأحباب
    صباح الخيرات

    يا ربى السعوديات من يكونن دايرات ليهم راعى قمل( Liceboy) يفلى القمل و يسعاهو بى شى مرعى ( مثلا زى قجه أدروبيه ) لحدى البنيه السمحه ما تعمل الحمام و الشانبو و الذى منو

    عمنا السلاوى ينوبك ثواب شوف لينا الموضوع دا الcv بتاعتنا خبره فى سعاية القراد (تنفع)

  3. ابكرون قال:

    يا قملتي…….:
    =======
    الفاتح والاحباب :
    وتتنوع شركات وانواع القمل شي قمل الملابس ولونه ابيض ويستزرع في (التكك) والملابس الداخلية…وقمل الحبش وده مكانو معروف….وعايز ليه آليات خاصه لقلعو ونزعه من مزارعه….ويتنافس (القمالون) كل في نوعه ومجاله….وتزداد حالات الانكراش بين الرعيه في الشوارع والحافلات والمكاتب الكل يهرش ….ويكون في دكاتره وتخصصات بامراض التقميل والانكراش…….
    اما (الصواب) وهو بيض القمل ….يعملو ليه اطباق بيض حمولة 5 مليون بيضه(الطبق قدر علبة السجاير )….وتكتر الفقاسات لانتاج كميات لمواجهة الطلب العالمي…..وتظهر الفاظ استحسان جديده …..يعني زوجتك عايزه تقول ليك يا ( سبعي)……تقول ليك يا( قملتي)…….وكلام زي يا (ابو الأقمال) ودي زي يا ابو الدفاع …ويا بت يا قمله….

  4. aflaiga قال:

    البروف : اثنى كلام ركس الزمان بانو تسجل الملكيه الفكريه .. وهو ركس ذاتو وين ؟؟ ما قلنا اعملو شئون العضويه ..
    النوع المالوف ( الحلوف ) ده من مجالس الادارات مواصفاتو شنو با بروف ؟؟
    اعتقد ان الاغنية المفضله لذلك الزمان ستكون :
    حبيبى ازرع لى وانا افلفل فيك
    الحاصل بى خفة يدين
    والحاصل بيك
    قملات بتعين
    ابوى انا ما تقول ليهو لا وافق عليهو انا بفلى ليهو
    عليك الله ما تقول ليهو لالا ..

  5. aflaiga قال:

    ابكرون يا قميييل ( يا زعييم ) :
    بالله فصل لينا اكثر فى فصائل القمل ده لانو فى ناس ما سمعو بيهو ذاتو ..
    حكى لى صديقى س احد العسكريين القدامى :
    منطقة جبل مندرا غرب جبل الاولياء وشمال خور ابو حليف وغرب قرية سماره من المناطق الجيده لاستزراع القمل وانتشار العمى الليلى فمع وصولك لها فى الاسبوع الاول تبدا فى الهرش والكرش والاسبوع الثانى بتبدا فى مكافحة قمل التكك القالو ابكرون بدفن التكك فى الرمال الساخنه للصحراء الغربيه جوار قهاوى صنقعت ووسع سكه وطول بالك وخمسه دقايق فى شارع الاربعين ولكل مقبره تكك علامه مميزه حتى لا تتشابه عليهم التكك فمثلا دى مقبره تكة فلان لانو فوقا حجر اسود شكل مثلث ودى فوقا قشه وخيت بنى !! .. ويمكن اختيار هذه المنطقه لاستخلاص الفاينل ريزلتس يعنى زى الحلابات بتاعة البقر ما عليك الا ان تتمدد فى الرمله الظريفه ديك وتشوف النتائج …

  6. طارق أب أحمد قال:

    أفليقا أنت حسن كابوس نازل عندكم ضيف اليومين ديل

  7. aflaiga قال:

    اب احمد : صباحاتك بيض ..
    بالله لو كنت من القروب الف احكى لينا عن فترة الدراسه فى زمنكم وكيف كان تفتيش النظافه ولماذا كان اللبس الابيض اساسى قبل الكراسى فى التعليم ؟و وهل يرجع ذلك لشفافيته فى اظهار عيوب المستخدم ؟؟

  8. محنك قال:

    البروف نهارك سعيد

    قلت لى تغذية القمل طبعا !
    والله دى شديدة بعدين افيقا دا ما تخليه يولعها

    شوف يا دكتور قمل طويل التيلة او نقاوة او خالى كبريت كلو ما شفنا منه حاجة .. ياربى بمشى هو وبمشى كيف ووين

    يا دكتور قملنا دا كسيح

    لكن السعودية دى بعد كم مليون برملين فى كم يوبيل ذهبى لسة فى قمل … وتيب محتجين ليه هو فى تين

  9. aflaiga قال:

    محنك : اولع شنو ؟؟ هى ناقصه ولا محتاجه !!
    البروف : محنك ده ما تخليهو يطفيها ..

  10. محنك قال:

    تحلية ودعابة لابداعك يا افليقا

    انتو برضو جيران واولاد امدرمان …. احتمال يكون سبب الابداع البجاور السعيد بسعد .

    لك التحية وللبروف ونار ابداعكم ما تطفوها

  11. طارق أب أحمد قال:

    أفليقا
    اب احمد : صباحاتك بيض ..

    بيض ولا صواب تت ررارا تن تن

  12. حاج أحمد السلاوى قال:

    طارق أب أحمد .. الدينمو أفليقا ..محنك ..
    الليلة إنتو عاملين ثلاثى خطير جداً وباصاتكم الملعوبة تكسر الضهر ..ربنا يحفظكم ويسدد تصويباتكم فى المرمى ويبعد عنكم حسن كابوس ..
    ويا حاجة ما تسوى كاروشة ..دة قمل شنو دة ؟

  13. الظاهر حسن كابوس بقى بمشي لحتات كثيرة خلاس من بيت المال لدال و سوداتل مرورا بجدة الى الدوحة و البحرين … لا لا معناتا بقى مليونير لليلي… ناس الولايات ما جاكم لسه؟

  14. نيام قال:

    البروف و الدانقوست
    نهاراتكم قملون..
    تعلن الشركة الوطنية “الكارشة” عن وصول قمل محسن ماركة “اكرشني مرة” وارد وادي بقماليون..الكمية محدودة ..
    - يا قملتي قريتي الاعلان
    - طبعا.. هسي انا ماشة اقدم طلبي بعت الهاتوز و”ابو قميلاتي” باع الركشة حقتو وقررنا نعمل مستودع بقماليون سغنتوتي حنسميهو مليار قملة لاعمار الدار جملة..
    - نحنا حنعمل ورشة للقمل ابوهرشة الهدف منها تحسين المبايض مع الاقتصاد في سحب دم المربي ، ماشفتي مربيننا ما بتجيهم انيميا مزمنة الا بعد سنة..
    - ودي عملتوها كيف؟
    - جونا علماء من جامعة قمبالا عملوها لينا مجانا بس بياخدو 50% من الانتاج..شفتي يا قملتي..
    - شفت يا قملتي و الله اخير من ناس “تقملون” ديل بشيلو 80% مقدما..
    ابكرون:
    لك امنياتي بتقميلة سعيدة .. حقوقك القملية محفوظة..
    عزت ترطيبة:
    رأيك شنو في تقميل ناس العقودات الكتيرة دي .. ماراشحة بالله الفكرة دي .. مرات بجيبو قمل ولائي..

  15. طارق أب أحمد قال:

    التفتيش للملابس وهى ردا كاكى و قميص أبيض أيام السبت و الثلاثاء فى الطابور الصباحى
    القميص لازم يكون محشى يعنى شاكى ما محشى كرنب آآخ
    التفتيش يشمل الملابس الداخليه و الأظافر والشعر و يا ويلك و سواد ليلك لو فى شئ ما تمام
    عدة التفتيش
    مقص لعمل شارع فى نص التفه
    مسطره للضرب على ظهر اليد لو الأظافر طويله
    عصاية نيم أو سوط عنج +أربعه من الصف الورا للطالب الموضوعو بايظ

  16. ود المهدى قال:

    السلام عليكم وعلكم طيبين وعافية
    يا جماعة عايدات البترول بالبراميل الكبار والناقلات ما شفنا منها حاجة
    وعايدات الدهب بالسبايك البتلمع ما شفنا ها شوف عين ساكت
    وعايدات المواشي السنوية للحج والعمره برضة ما ضقنا منها حاجة
    باقي ليكم القمل الصغار الذي لا يري بالعين المحردة عاوزين نلقي منه حاجة – ما اظن غير فقر الدم والكاروشة-
    واذا نحنا فوتنا البراميل والسبايك والخرفان يعني جات علي القملة الصغيرونه دي – مشي حالك زي ما بيقولوا اولاد بمبة -
    ولا شنو يا دفعة.

    والسلام

  17. ود المهدى قال:

    طارق أب أحمد انت قريت في بيت المال ولا الاهلية – لكن ما اظنك دفعة ولا شنو يا جبرا؟

  18. طارق أب أحمد قال:

    أنا قريت فى التجاره الأنجيليه أمدرمان من دفعتنا عبده الشيخ و نجم الدين الفاضل ورفاعه الطهطاوى وزكى جمعه (مين زكى جمعه ده) أيام الثانوى رمادى أو أيام الثانوى العالى عرس طوالى الأيام ديك أيام جيل الرفض و الهيبيز والشعر الخنفس كان زميلنا معاذ شادى بنطلون جينز ليفايز زى شهرين كده لا غسيل لا غيار الأستاذ قال ليهو يا معاذ يا ولدى ما تغسل البنطلون دا , و معاذ الهيبى مفتخر بالبنطلون الوسخان رد عليهو يا أستاذ عارف البنطلون دا فى أمريكا بجيب كم ده بكون بى زى مية دولار
    الأستاذ : واللهى ما كنت عارف سمح يا أبنى ما تبيعو و تشترى ليك كم واحد نضاف

  19. nono قال:

    الاستاذ جبرا /لك التحية

    هسع جيش تابليون دة ماااااراح في حق الله

    توصل باحثون أن الأمراض التي ينقلها القمل لعبت دوراً أساسياً في دحر جيش نابليون عبر الأراضي الروسية في عام 1812 وقد حلل الباحثون مادة مستخرجة من أسنان الجنود الفرنسيون الذين شاركوا في الحملة ، فوجدوا أنواعاً من مرض التيفوس الذي ينقله القمل وكذلك حمى الخنادق وقد نشر البحث الذي أنجز في جامعة البحر المتوسط في مرسيليا في مجلة الأمراض المعدية وكان نابليون قد اجتاح روسيا عام 1812 مع نصف مليون جندي لم ينج منهم سوى بضعة آلاف وقد وصل 25 ألف جندي إلى فيلنيوس في هذا الشتاء ولكن ثلاثة آلاف فقط نجوا وتابعوا الانسحاب ، وقد دفن الموتى في مقابر جماعية وقد عثر نتيجة للحفريات على قبر جماعي عام 2001 يحوي 2000-3000 جثة.

    كسرة/ ممكن نفلي

  20. ود المهدى قال:

    كده طلعت دفعة بالجد لانه انا قريت مع نجم الدين الفاضل في ودنوباوي ب الابتدائية اينام كانت المدرسة بالجلابية والعمة
    بس ما تكلم زول؟ كده تم تصنيفك من قروب ا+

  21. طارق أب أحمد قال:

    ود المهدى
    عليك الله بس لزومو شنو المشاكل تقول نحنا من زمن الجلابيه عايز الشباب ديل يقولو قرينا فى المعهد العلمى ودفعة التجانى يوسف بشير
    شوف الذوق كيف أبكرون مطلع شهادة تسنين للغبشه
    (بما ان امها انجبتها في سن مماثلة تقريبا اذن امها تكون 24+24 =26 سنة)
    بالمناسبه سمعت أنو الشاعر ود المهدى عبد الوهاب نور الدائم فى البلد بجواركم فى العمده تحايانا له

  22. بشار أحمد بشار (إبن برد) قال:

    أبكرون : إنتو أي حاجة (كريهة) رامنها في جيرانا ديل والنوع البتقصدو إنت ده اسمو pubic lice (أو أي) قمل العانة والقمل أوله الصؤاب وهي بيض القمل، الواحدة صؤابة وبعدها اللَّزِقة ثم الفرعة ثم الهِنِعة ثم الحنج ثم الفنضج ثم الحندلس وغنى المحب لقملته : يا قملتي الغالية البيك طال سهري زي سواد شعري أنا جار علي دهري.
    تعرف ياعزت الخدار الكنت بتتكلم عنو أمبارح في مويت النيل الأزرق ما أظنو خدار طحالب إكون خدار القشة الملبوكة.

  23. BakriMusa قال:

    والناس (المصلعين) يستثمروا فين ؟
    الا يستثمروا في (اماكن) تانيه.ايييييع

  24. ماجد قال:

    شر البلية ما يضحك …
    كتبت و أجدت ..
    يعطيك العافية …
    http://majedlife.wordpress.com

  25. طارق أب أحمد قال:

    الأحباب صباحت خير أن شاء الله
    أها عدنا
    بشار قال
    والقمل أوله الصؤاب وهي بيض القمل، الواحدة صؤابة وبعدها اللَّزِقة ثم الفرعة ثم الهِنِعة ثم الحنج ثم الفنضج ثم الحندلس

    عربنا الزمان ديل كانوا ناس بتاعين تفاصيل شديده شكلو الواحد منهم يضرب ليهو عبار بتاع خندريس و يقوم يجيب لينا كلام بره راسو عينة عنج و فنضج و حنلس كان ناقص يقول حيزبون
    المعنى الجماعه الزمان ديل كانو مرندكين و نحنا صدقنا

  26. عباس ركس قال:

    سلام يا احباب :
    افليقا : سلام يا زول يا رايع , نحن قاعدين ومتابعين – قراية – ومرة مرة بندخل , لكن – ليس كسلا – وانما زي ما تقول كدة مراجعة شديدة مع النفس في كل المجالات وطبعن ح اكون لجان وتوصيات ومقترحات و و وقول يا لطيف .
    بكري موسى : ما امكن هناك برضو صلعة !!!!!!
    تحايا للجميع

  27. Stricker قال:

    ركس يا حبيب – حبابك الف
    دى الجلسة السنوية مع النفس ولا شنو ؟؟؟

  28. algbsha قال:

    صباحكم كرش وتفلايه……………..
    القمل هين كلام بكره يبقى الاستثمار فى سوس الاسنان لو لقوا ليه طريقه وطاطكم صبحت وما تقدروا تفرزوا بين قروبAوقروبH وويبقى الشعب كله زى جزلان ومطبقة اخر الشهر زمان((هسى اول الشهر واخره وااااحد))
    والى لقاااااااااااءءءءءءء

  29. ابكرون قال:

    بشار اسماء القمل دي : (الواحدة صؤابة وبعدها اللَّزِقة ثم الفرعة ثم الهِنِعة ثم الحنج ثم الفنضج ثم الحندلس )اسه عليك الله العرب الملاحيس ديل لو اتجهوا لشئ مفيد مش كان اجدى وانفع ……وكانوا تسيدوا العالم بالعلوم ….قال ايه … قال فنضج…..ان شاء الله الفنضجه ال……..
    وواحد يقول ليك جيد كان اصلها جيود وادغمت الطاء في الغين والتمر هندي في الفسيخ وبقت جيد…..عجبي

  30. عباس ركس قال:

    الدينمو استرايكر : مراحب يا غالي .
    مافي ناس عندها جلسة شهرية ولا في زول بقول ليهم تلت التلاتة كم , بقت علي السنوية حقتنا دي ؟؟؟؟

  31. محنك قال:

    بعدين يا بروف
    لا يكون فى ضريبة قيمة مضافة … وغرامة حكة فى السوق … ورسوم فلى …

  32. FATIMA قال:

    شر البلية ما يضحك النسوان في السودان عمرن كله يناضلن من اجل حقوقهم المهضومة اجي ديوان الافتاء يهضم حقوقهن في زواج المسيار ؟؟؟ زمن

  33. طارق أب أحمد قال:

    فطووومه
    حبابك عشره
    هنا قمل مو مسيار
    لكن ما برضو أهو كلو نحل

  34. يسري ابو عبيده قال:

    يقول النبي صلى الله عليه وسلم كفى بالمرئ عيبا ان يصدق كل ما يسمع …. معظم الكلام عن فوائد القمل باطل واضرار القمل معروفة وهو السبب الرئيسي في نقل الامراض للانسان وذكر في القران كبلاء ومرض وعذاب لفرعون وقومه وهو الذي دمر جيش نابليون وقضى عليه وقد رد كثير من الاطباء والعلماء عن هذا الامر بنفي ما يسمى بفوائد القمل فمعظم هذا الكلام باطل وليس له اساس من الصحه ومخالف للعلم فليس للقمل هذه الفوائد المذكورة … فاين اصحاب العقول .

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s