جيب ليكا ملعقة !

دعانى صديقى (م) إلى زواج أخيه الأصغر قبل عدة أيام فلبيت الدعوة (غداء) ، داخل الصيوان الممتد تناثر المدعوون بينما إنطلقت من (مكبرات الصوت) الضخمة أغنية الفنان الكاشف (الحبيب وين قالو لى سافر) والتى لدهشتى سرعان ما إكتشفت أنها (مدحة) وأن كلماتها قد تحورت لتصبح (الحجيج وين قالو لي سافر) ، طفقت أبحث عن مصدر الصوت فى الصيوان فوجدت أن مصدره (خمسة رجال)  سمان و(تخان) يحمدو ربهم  تبدو على ملامحهم آثار (الترطيب) وتناول الأكل (النضيف) ممتليئ الأجسام يرتدون جلاليب بيضاء (زبده) وعمائم (توتال أصلى) و(ساعات) بيضاء ذات (إستيك) يحز فى تلك الأيادى الرطبة ، خمسة رجال (الواحد يضرب الحيطة يرميها) يجلسون فى صف على تلك الكراسى الوثيرة وأمام كل منهم (مايك) يتمايلون طرباً مع تلك (الألحان) ! لوهلة قلت فى نفسى (حقو الواحد يمشى يشيل منهم المايكات دى ويقول ليهم أمشى شوفو ليكم شغلة ) ! لولا أننى إستدركت بأن الناس ح تقول (الزول ده جنا) ! مديح (المصطفى) عليه الصلاة والسلام (ما قلنا فيهو حاجه) لكن أن تصبح (الشغلانة) مهنة و(عدادات) وأن تهدر هذه الأجسام (الضخمة) والعضلات (القوية) فى (مسك الطار) والتمايل يمنة ويسرى فهذا ما لا يقره ديننا الحنيف الذى يدعو إلى أن يأكل الإنسان من عمل (يده)  حتى يشارك فى بناء مجتمعه !

فى الماضى كانت مسالة (المديح) يقوم بها (كبار السن) الذين لا يستطيعون (عملاً) فى أماكن التجمعات (كالمحطة الوسطى) فيقوم الناس بالتجمهر حولهم وأعطائهم (الفيها النصيب) ، يقال أن أحد المداح من هؤلاء شاف ليهو موقع إستراتيجى فى (المحطة الوسطى) وقعد طلع طارو من (المخلاية) وختا عصايتو وفرش ليهو قطعة (دمورية) قدامو عشان الناس تخت ليهو فيها (الفيها النصيب) ، أول زول وقف قدامو طلع ليهو (جنيه) ختاهو ليهو فى القطعة وقال ليهو : – بالله أمدح لينا مدحت (يا شفيع الأمة) ! المداح مسافت ما يرفع الطار جا شماسى طاير وكوووف ختف الجنية وقام جارى … المداح خت الطار فى زعل وقال للزول : – عليك الله دى أمة يشفعو ليها !! وقبل أن تتطور المسألة وتصبح كما هى عليه الآن ، شئ (أشرطة كاسيت) وشئ (قنوات متخصصة ) كان المداح فى ليالى المديح يضعون أمامهم (قدح) يجمعون فيه النقوط (عداد لايف وكده) ويقال أنه فى أحد المرات كان هنالك شخص (سكران مولع) يبدو ان (جيبو مليان) فكان عند كل مدحة ينقط (فى القدح) ويبشر فى (المداحين) ثم يعود إلى مكاه وبعد قليل يأتى ليفعل نفس الشئ وعلى مقربه من المداحين كان يجلس (درويش) يبكى بإستمرار حتى إمتلات ملابسه بالدموع (غرقان وكده) ، فى لحظة قامت (الحلقة)جاطت فحضر (البوليس) لتنظيم (الشغلانه) وأول ما قام به هو الإمساك بالزول (السكران) إلا أن المداحين صاحو جميعا (بصوت واحد) فى رجل البوليس : – عليك الله الزول ده خليهو … طلع لينا بس الزول الببكى ده ! لم يكن المداحون يطمعون فى الزمن الغابر فى أكثر من (صحن فتة) وكان الشئ المتعارف عليه ان توضع لهم (اكبر العضام) ومنذ بداية طبخ الطعام يتم فرز (عضام المداحين) ولا يجرؤ أحد على الإقتراب منها ، يقال أنه فى احدى المرات جلس المداحون حول (صحن الفتة) فجاء (شافع صغير) لمشاركتهم الأكل لكنه أجهز على كل العضام الموجوده وحينما (رن) صوت اخر (عضم) يضعه على حافة الصينيه قام أحد المداحين (بلكزه) فى غضب قائلاً له : – أها بعد ما تمشى تغسل إيدينك ديل ابقى راجل وقوم امدح ! ولما كان (مداحين زمان) ليست لديهم (عدادات دفع مقدم) كما مداحى اليوم فقد كانت غاية مرامهم هى (الفتات) والعضات المجيهة ، يقال أن أحد رقيقى الحال كانت لديه مناسبة فدعى عددا من المداحين والذين بعد أن قامو بتقديم وصلاتهم المدائحية فوجئوا بأن (العشاء) كان عبارة عن ( شعيرية ) لا لحم لا شواءآت لا يحزنون فأصيبو بخيبة أمل وبينما هم كذلك جاء (كلب البيت) يحوم حولهم فإذا بأحدهم ينهره فى حنق : – جرررررررررر حاجة يجدعوها ليك مافي كان عندك ( معلقة) امشي جيبا !