فضيحة كبرى للمفوضية ( القومية ) للإنتخابات

Posted: الأحد,21 مارس, 2010 by mashakel in سياسية

فضيحة كبرى للمفوضية ( القومية ) للإنتخابات

هذه الصورة إلتقطتها من كاميرا المحمول لدعاية من قبل المفوضية و قد نزلت في جميع صحف اليوم الأحد

و يظهر فيها مجموعة من السيدات و هن في صف للدخول لمركز انتخابات

و من خلفهن ( شجرة ) … و هي رمز لأحد المرشحين

و إحدى السيدات تحمل طفل يشير بيده للشجرة .. و تعتبر هذه الدعاية قمة عدم الحياد من قبل المفوضية  …. اها رايكم شنووووووو

About these ads
تعليقات
  1. moshahidah قال:

    احييييييييييينا و رمنا ورمنا بس يا مشكاكل …يعني البلد دي بقت ما صحية ..اسي انا ممكن في اى لحظة يجيني ضغط و سكر و قلب و سرطان (ماشاء الله كلهم وراثيات وكلهم في في العيلة)..و ما يجي زول يقول عين هدي كلمتكم ..دا من الورم الحاصل دا ..الله يشوف البلد دي ..و يرفع غمتنا ..

  2. ابكرون قال:

    مشاهدة : ما تورمي ساكت عايزه مفوضية معينها المؤتمر برئاسة الفاصل ابيل الير والمتنفذ والرئيس الفعلي لها الاصم تعمل شنو غير كده واتوقعي تلقي صورة المشير جوه

  3. زووووووول قال:

    مشاكل سلاااام
    والله ماشاء الله على قوة الملاحظه والذكاء .
    والله الشعب الفضل دا ما فاهم اى حاجه ولا شايف شجره ولا يحزنون .
    ممكن تكون قروش الاعلان دا ففتى ففتى . المانع شنو ؟؟
    بعدين ناس المفوضيه ديل موش موظفين فى حكومة الوحده الوطنيه ولا انا خلطان يا ابو الشباب .
    وكمان فى ملاحظه تانيه غير الشدره والطفل وهى النقاط السوداء تحت الشجره ودى معناتا شدره ظليله ومثمره كمان . تقول ليا مثلث عرمان يا اخى .

  4. moshahidah قال:

    ما بعيد يا ابكرون ..و يقول ليك ..رمز السيادة !!!@@###%%^^&&*& …الصبر بس

  5. مشاكل قال:

    سلامز

    ملاحظات عن الشجرة لو دققنا النظر فيها

    1) أصلها ثابت و فرعها في السماء .. لو شفنا ورا الشجرة ح نلقا السماء و دا دليل على انو اغصانها ما شاء الله تمددت و بقت كالأخطبوط
    2) من إشارة يد الشافع نقدر نقول انها تأتي أكلها كل حين لأنو واضح انو في شايف ليه تفاحايه ولا كمثرايه ولا قطوفها دانية ما معروف
    3) قاعدة من خلف المواطنين تشد أزرهم و تساعدهم و زي ما بقولو .. أرمي قدام ورا مأمن
    4) تكاد الشجرة تضيء .. مع إنو ما ظاهر شكل ( الشمس ) في الصورة و الغريبة انو الجو صباح و كدا
    5) الناس ماشه للتصويت … زمرا .. للتصويت .. زمرا
    6) روح الديمقراطية المشاع في البلد .. لانو لو شفنا صورة السيدة الشايلة الشافع ح نلقاها لابسه بنطلون و فاكه شعرها .. لكن ما معروف تتجلد بعد التصويت ولا قبله

    و مازال العرض ساريا

  6. زووووووول قال:

    مشاكل
    والمصيبه فوق فى الشعار نحو انتخابات حره ونزيهه

  7. بشّار أحمد بشّار (إبن برد) قال:

    قلت الأصم يا أبكرون !!!!!! النية زاملة سيدها ده حيطلع ليكم عدد المسجلين للإنتخابات زي 40 مليون كده وبعبارة أدق بعدد الملايين التي سوف ي ل ه ط ه ا .

  8. نيام قال:

    مشاكلز:
    نفرض ان اسم الطفل محمود
    اذن:
    محمود الدود فوق العود
    ابوك موجود
    نعم موجود
    اقولو مين؟
    قولو عمو
    عمو مين؟
    عمو الشعب الضربو الجوع
    محل ما يقبل سوق مبيوع
    عمو الناس الحالهم وحشة
    ديمة الحال البيهم كشة
    حتي في نومهم ليهم رعشة
    ناس مشتاقة رغيفة في وحشة
    ولما يبوشو داك يوم عيدهم
    تسمع باااع الناس تتدشا

  9. عباس قال:

    مشاكل كيفك انشا الله رايق ومروق

    انت عارف الكيزان ديل جابو ناس وسجلوهم بحيث انو وقت التصويت يصوتو ليهم
    وحشدو كميات كبيره من المواطنين لصالحهم
    بس الشي الوحيد الما كان في حساباتهم ان تكون الدعاية الانتخابية لبقية الاحزاب قوية مؤثرة في قرار المواطن
    فعلا كانت الحملات والدعايات الانتخابية شرسة من قبل بقية الاحزاب المنافسة
    والمشكلة تكمن في ان الكيزان حشدو وجهزو وسجلو مواطنين من المفترض ان يصوتو للمؤتمر الوطني وبعد الحملات والدعايات الانتخابية وضح انه معظم المسجلين قد سمعو ا لبقية الاحزاب وسمعو للمؤتمر الوطني وعرفو او بالاصح عايشو الفرق بينهم
    يعني الكيزان المزوراتية مشو يكحلوها طبزوها

    اللهم نسالك باسمك الاعظم يارحمن يارحيم ياحي ياقيوم ياحنان يامنان ان تسقط حجر الكيزان في الانتخابات

  10. خالد مدني قال:

    اها بعد ما جضمتو المفوضية … عملتو لينا شنو في المودوع ؟؟؟

  11. محنك قال:

    ولو كان فى واحد رمزه الاوضة او الطربيزة والعصاية ( فى حاجة كببيرة مستنده على عصاية ) والتوب السودانى والايشارب والطرحة والحذاء والاسكيرت والبلوزة والمساير والافرو والحلق تكون فعلا متواطية معاه

    الاخ الادمن بالله غير واجهة المدونة دى عشان ما تكون متواطى مع المؤتمر

  12. ودالخلا قال:

    سلام ياقبيلة،،
    مشاكل لا تثير الغبار والعفارة ساكت ، هسع الناس صدقت كلامك، وقعدوا يوصفوا ويزيدوا فيهو كمان، لكن محنك الحكيم جاب ليك أخرها، أها رأيكم شنو في العصي دي، وهي أكثر من عصاية، أين أنت يارجل يا حكيم؟؟ ومن الملاحيظ يا مشاكل، الناس الماشين يصوتوا ديل كووووولهم نسوان، ليييييييييه؟؟؟؟؟؟؟؟ ويا سهيل الرجال مشوا وين؟؟؟
    يا ربي الهضربة الكتيرة دي من شنو، مرة تزوير، ومرة انحياز مفوضية، ومرة تسجيل ناس علشان يصوتوا ليهم!!!!!!!!!!!!!!! طيب مالو، الناس الباقين ديل كانوا قاعدين وين لمن الناس كانت بتسجل في عضويتها الممكن تصوت ليها، ومرة المفوضية عملت شنو؟؟؟؟؟
    محنك يا خوي أهلنا زماااااااااان قالوا الصقر ان وقع كُتر البتابت عيب والمقدور ان وقع ما بينفع الجقليب، وفي رواية أخري ما بيرفعوا الجقليب….
    ويا مشاكل يا خوي أنا شايفك وصلت الرسالة، وكتر خيرك كتير يا خوي والليل هود، وطلعت القمرا….. والخير يا عشانا تودي الناس دي لي أهلها بيسألوك منهم…
    المشكلة أنو ما في اي حزب من الأحزاب الموجودة في الساحة يثق في نفسه او قواعده، وبالطريقة دي الظاهر عليهو انو المؤتمر حا يفوز نتيجة للحالة النفسية للأحزاب….

  13. حاج أحمد السلاوى قال:

    ولدنا الباشمهندس مشاكل ..هى يعنى بقت على الملصق دا بس فى موضوع إنحياز المفوضية للمؤتمر الوطنى ..ما هى كل يوم منحازة ومن يوم ما انشاؤها هى منحازة ..
    أهم حاجة فى رأيى هى التأكد من أنو الناخب ما يكون معاهو بطاقات غبر البيدوها ليهو داخل المركز ..فى جيبو !!! وعلى مناديب الأحزاب الأخرى يفتحوا عيونهم كويس منعاً لأى ممارسات تتعارض مع قانون اإنتخابات .
    أنا عاوز أفهم بس ..ما هو المقصد من هذا البوست وأنت من مؤيدى الشجرة ..؟
    ويا طالع الشجرة جيب لى معاك بقرة .. حلابة العشرة …….
    ابو عصمت وأبكرونا كملوا الباقى !

  14. حكاية قال:

    والله يامشاكل انت مشاكل دققت فى الصورة قدر ده كانك بتبحث عن فضولى
    نديكم اخر الاخبار
    الواردة الينا من حلم ما تمه لسع ::::
    ركوب كل السادة المرشحين الكبار فى طائرة لعمل عمرة لرب العالمين حتى ياتونا بقلوب نظيفه تستعمل فقط التايد والكلوروكس لبياض القلوب السوداء
    وفى الطائرة استخدموا شماعات وضعوا عليها عمايلهم السودا والشماعات خلصت وعلقوا ذنوبهم على بعضهم وهبطت بهم الطائره فى مطار جده بسلام وكانت تظلهم سحابة سوداء داكنه هى دعاء الشعب السودانى الفضل عليهم فكل غيمه بها الله ياخدكم وربنا مايرجعكم ويعذبكم والتسويه كريت تلقاه قرض
    فتطهروا بعد ذهابهم للعمرة لكن هل الشعب غفر لهم
    المهم رجعوا بالطيارة وكانوا يغنون الطياره قامت بينا وفى مكه اتلمينا وفجاة قال الكابتن ياجماعه فى خلل فى محركات الطائرة فجرى فلان يميين يعاين بالشباك وواحد تانى نط فى رقبة الجنبه وقال ليه الموت جانى الحقنى وواحدين جروا على الباب لكن لو انفتح برضو حتموتوا تانى شنو؟؟؟؟ واتلخبطت الطائره والكل يجرى واسودت وجوهم هؤلاء المنتخبين وكل بدا يراجع نفسه وهناك من قال لنفسه بانه حيدى الشعب من جيبه وحيسوق ليه حمار بدل مورانو والتانى قال بصرف للمعاشيين اكتر من ناس الشرطه وواحد قال بوزع البترول بالتساوى وواحد قال ببتر الفقر والظلم واى وزير فاسد بقطع راسه وبعلقه فى ميدان ابوجنزير يكون عبرة والكل بدا يفكر فى ارضاء الشعب السودانى الفضل ::: وسبحان الله ما انتظرتهم الطائرة يكملوا افكارهم وتحدث الكابتن بان المحرك اشتغل مرة اخرى فرجعوا على كراسيهم وكل واحد خاتى للتانى لقطه شينه من الحصل والجرى والالعاب البهلوانيه الحصلت المهم نجوا من المحرك والكل بدا يقول بقلبه حيادب الشعب لعمايله وواحد قال تمشوا على العجين ما تلخبطوه المهم وصلوا مطار الخرطوم الدولى الذى تتحدث عنه الهند والسند فى عظمته بعد ان كان غرفه وبرنديتن خلف خلاف
    المهم نزلت طيارة سودان طير ارض المطار وقومى يا الطيارة اتزحلقى بسبب بالوعه مفتوحه ليها مده ناس المطار الكسلانين خالنها ساى والطيارة المسكينه اتزحلقت وكسرت ليها ركبة والجماعه كلهم وقعوا فى بعض زى طباقه البيض واتشابكت الايادى فى لحظه ضعف واتردموا كلهم جنب الكابينه زى هدوم الغسيل
    وقومى يا الطيارة ؟؟؟؟ مالك اتحرقى والباب حلف مايفتح ليهم قدر ماجابدوه رفض ليهم
    وماتوا كلهم وريحونا وانتخبنا مشاكل الريس الجديد لمملكة امازونيا وارتحنا من المشاجرات البتحصل فى المدونه بسبب الانتخابات اها كلهم راحوا وربنا ريحنا
    والوزير المرشح من هسع يرشح روحه
    كسرة :
    شفتوا الحلم ده ماداير ييتحقق ليه ؟؟؟عشان حلم

  15. طارق أب أحمد قال:

    يا رمزك الشجره

    بقيت لى زى بقره

    و البقره شبعانه

    تاكل فى حق الناس

    و تديهم البعره

    ( واصل يا نيام )

  16. بشّار أحمد بشّار (إبن برد) قال:

    الإبن مشاكل يعني معنات الكلام ده مافي أي مشاكل بس إنت عاوز تعمل لينا مشاكل بالله بطل المشاكل نحن برانا عندنا phase delay

  17. kamoon قال:

    سلام …..
    اولا انت يا مشاكل ماتبالغ امكن جات عفوا ساي طوالي تقول قاصدنها

  18. طارق أب أحمد قال:

    تتمة الحكايه يا خكايه
    يا ست الحسن و الكمال

    وسقط الطائر فى حفرة الأهمال
    وكسرت الركبه و اشتعل الوقود
    سبحانه كيف نسوا انه قابل للإشتعال
    ( النار ولعت أحى ) النار فى الطائره بإهمال
    و صاح صائح أن لو نجونا لنردن ما سرقناه من نفط و ذهب و مال
    و قيض الله لهم النجاة و الأمهال
    و فى صاله كبار الزوار و رجال الأعمال
    صرخ كبيرهم و طرش مقال
    أن هذا إلا عمل شيوعى و بئس مآال
    و لو فاكرين السفر تانى بالجمال
    حنجيكم بى جامبو
    و المطار فى بيت المال

  19. mon amie قال:

    صباح الخير يا جماعه
    اها اخبار نتيجة الطعن في ترشيح سيدنا شنو؟ ولا بقت شماار في مرقت ماجي ؟

  20. هجار قال:

    الجميع .. سلام
    ياجماعة انتو ذكرتو حاجات كتيرة تدل على انحياز المفوضية للمؤتمر بس فاتتكم حاجة مهمة وضرورية وتودي الاحزاب التانية في داهية لو ما اتنبهتو ليها ولي لفظ (القــــــــوي الاميــــــــــــــــــــــــــــــــــــــــــــــــــــــــــــــــــــــــــن) اها الجملة دي حقو زول يقولها تاني مافي الا بعد نتيجة الانتخابات ………… ولا رايكم شنو ……….. ياها الفضلت

  21. حاج أحمد السلاوى قال:

    حكاية ..
    ما أديتونا خبر إنو الجماعة كوووولهم جايين عمرة ( بضم العين وتسكين الميم ) عشان نقوم بالواجب ..معقول الناس دى توصل لحد هنا وما نقابلهم ..على الأقل الواحد كان ضمن ليهو قطعة أرض فى أرقى أراضى العاصمة المثلثة أو وزير دولة فى أى وزارة من الوزارات الهاملة ..( يعنى التانيين كانوا أحسن مننا فى شنو ؟ الولاء والبراء ؟ بنديهم الولاء والبراء ..) ووزراء الدولة صاروا على قفا من يشيل .. اللهم اوعدنا يارب !!
    بس يا حكاية حلمك دا فيهو ظلم شوية لأنو مش كل المرشحين وحشين زى ما ببتصورى ويتخيل إليك ..يعنى مثلاً فى منهم اللى هو الصديق اللدود لولدنا مشاكل ..والدكتور كامل وشيخ الدين وعبدالعزيز خالد ..الناس ديل كووووولهم ما جربناهم قبال دا ..ذنبهم شنو يروحوا شمار فى مرقة ؟هل حصل كضبوا علينا قبل دا ؟
    وخلونا النشوف آخرتا شنو..مع أحلام ظلوط !!!

  22. هجار قال:

    الشجرة …رمز … الرئيس … المشير ….عمر … البشير …. لاحظو حرف الراء ياجماعة اتكرر كم مرة اها الحكاية دي فيها ان … حقو نشوف حل للراء دي عشان الحكاية تزبط تمام وما نديهم اي فرقة … ايوة كلنا سواء وايد علي ايد ترمي قدام.. والله المستعان

  23. محنك قال:

    هجار بيه … اوع يكون جاتك عدوى من ابونا جبرة اصلوا افكارة قوية بس هاك دى

    الشجرة شعار المشير البشير

    رايك شنو فى الشين

    الصادق جربتوه …..
    مبارك الفاضل صحيتوه ….
    عرمان معروف امكن ما فاهم ليه رشحوته الحركة لان صحى يا دوب
    جحا ما بنعرفوا
    كامل ادريس ليس بالعلاقات الخارجية وحدها يحيا الانسان
    البشير جربتوه …..
    حاتم السر … مساعد الياى ما ببقا ياى حفظ حقوق لحدى ما يكبر ولد الشيخ سيدى جعفر الصادق ( شفتو لموليه الاتحادى والامة فى اسمه ) جعفر والصادق ( سيدى جعفر وسيدى محجوب جدود الختمية )
    الولية فى النملية الراجل الله يرحمه مات وقبل كده نزل وفهم انو لازم يندمج فاندمج ولجنة الانتخابات كلها تكنوقراط نميرى ما لاحظتو كده كانو بطبخوها 99.9% .
    عبدالعزيز خالد فشل فى الانقلاب وحلمان بالديمقراطية تجيبه
    منير شاب ذكى لكن حزبه ضعيف وجهوى وغير معروف
    نقد ….. عمرو كم …. دا سمعوا ذاتو بقى ضعيف وما عندو ولد يكورك ليه فى اضانو
    ابودينق … دردقونى الثعالب ( على لغة اكلونى البراغيث ) ما اظن فى زول عمرو اقل من 30 سنة سمع باللغة دى لكن نحن ادونا ليها فى الابتدائى زمان سلم محى الدين صابر.

    البشير بفوز طوالى ام بشتتو الاصوات وبعيدها على اتنين حقو يعيدوها على 4

  24. مشاكل قال:

    سلامز

    حبيب ألبي حاج السلاوي
    و منووووو القال ليك انا مع الشجرة …. عيب لي الشمس .. و زي ما قال شيخ حسن ( الترابي ) : لولا هذه الشمس لما كانت الشجرة

    بعدين حتى لو كنت واقف مع لابشير و ليش المؤتمر الوطني فدا ما بيمنع انو نقول كلمة الحق .. العدل العدل

  25. مشاكل قال:

    تصحيح من الصباح

    بعدين حتى لو كنت واقف مع البشير و ليس المؤتمر الوطني فدا ما بيمنع انو نقول كلمة الحق .. العدل العدل

  26. مشاكل قال:

    حكاية

    دا الكلام … اهو الواحد يبقى رئيس و لو في حكاية حلم

    غايتو جنس غايتو … لكن ما بعيدة على الله

  27. حاج أحمد السلاوى قال:

    ولدنا الباشمهندس مشاكل ..
    طيب إنت وكتين عاوز تقول كلمة الحق يعنى لازم تكون واقف تحت ضل الشجرة ..شجرة ماحى بيك ..ولاّ سوق الشجرة …ولاّ الشجرة الملعونة ..ولاّ …..ولاّ …. شنو ما بعرف داااااك ؟
    نحنا حصل يوم كضبنا عليك ؟

  28. حاج أحمد السلاوى قال:

    ولدنا مشاكل ..( الله لا يجيب المشاكل )..أغرد بيك شوية برة المودوع ..لاكين ليهو صلة بالإنتخابات .
    سمعت فى الأخبار مساء امس ان هنالك مجموعة من المستثمرين السودانيين بالخارج حيجو الخرطوم اليوم أو غداً للقاء المستثمرين المحليين ( داخل أمازونيا ) للعمل سوياً فى مجالات الأستثمار المتعددة والتشاور فيها ..وكنا شغوف جداً لكى أعرف بعضاً من أسماء المستثمرين القادمين ولكن لم يذكر أى إسم فى الخبر ..ويا خبر اليوم بفلوس بكرة ببلاش ..
    وآمل جداً أن ينجح هؤلاء القادمون الجدد للإستثمار فى أمازونيا ..وأدعو لهم بالثبات وربنا يكفيهم شر المتربصين والحاقدين والتماسيح الكبيرة العاوزة تلهط حقها وعمولاتها قبل المشاريع ما تبدا ..وكم سمعنا قصص من مستثمرين أجانب حضروا وفروا بجلودهم من حيث أتو ..
    وخلونا النشوف آخرتا شنو !!!

  29. هجار قال:

    ود الخلا .. سلام
    يا زول انت وين ما ظاهر .. بتعرف الجباره .. تورك ابقرونن مكان دا وقفت ليهو الجباره ساكت .. يعني كان بقي رمز واحد من المرشحين كان كسرنا ليك قرونو المكان ديل وطلعنا ليك بره … لكن عرفتها ودي فوتناها ليك لكن بنلقى فيك لمه ان شاء الله للانتخابات الجاية … آل تور آل

  30. اواصر قال:

    السلام عليكم
    الأخوة الزوار الكرام
    الأخ /مشاكل ماهذه الضبابية التي تسود موقفك (علي رأي شرحبيل فسر عليك الله)
    (فضيحة كبرى للمفوضية ( القومية ) للإنتخابات) ماهذا العنوان اللامع ايها الأخ مشاكل وماهذه الدهشة التي اصابتك من موقف المفوضية ولماذ تسميها فضيحة كان يمكنك ان تقول علي هذه الفضيحة زيادة فى التمكين وكدا العاجبو عاجبو والماعاجبو يمشي يقع في السد ولا من كبري المنشية النازل في تقاطع شوارع دا (كل يوم واقفين فيهو قرابة الـ10 دقايق) اليست هذه دولة الحكم الاسلامي الراشد التي تحدثت عنها سابقاً!!!!!!!!!! وماهذا الوصف الدقيق للشجرة ناقص تقول عليها شجرة الرضوان ، لاأعرف المردود الفقهي للتشبيهات عمومًا لكن ما من المنطق تشبه رمز انتخاب لهؤلاء الظلمة بالشجرة المذكورة في القرآن ، بعدين الديمقراطية عندك مربوطة باللبس؟؟؟؟
    ما البناطلين دي ذاتها بيلبسوها بنات الوزارء واقربائهم ودي مادايرة دليل، قبل فترة لا اذكر التاريخ تحديداً كتبت صحيفة الانتباهة انو الحكومة منعت وضع صور السادة المرشحين فى المؤسسات العامة لكن قبل اسبوع شفت صورة البشير كبييييييييييييييييرة فى معرض الخرطوم الدولي او مؤسسة الاسواق الحرة دي مش برضو اسمها نزاهة ولا انا غلطانة ؟؟؟؟؟؟؟؟؟ امس موظفة معي في نفس المبني قالت انو هي ماشة تدرب الناس فى حيهم علي انو كيف يصوتوا للشجرة بذات اعمامك وعماتك الكبار شوية دي مش اسمها نزاهة برضو ولا انا غلطانة ؟؟؟؟؟؟؟؟؟
    راجعين

  31. مشاكل قال:

    سلامز

    أولا ليس في موقفي أي ضبابية .. نعم أنا مع المشاريع الإسلامية سؤاء كانت من المؤتمر الوطني او الإخوان او غيرهما .. و لكنني أرفض الظلم أيضا
    عندما كتبت دولة الحكم الإسلامي الراشد على أساس أن المؤتمر الوطني هو حامل راية الإسلام و هو الذي يقدم مشروع إسلامي – على الأقل على الورق – و هو يمثل الخيار في ( الإنتخابات ) القادمة لمعظم الإسلاميين الذين يجدون أنفسهم في موقف صعب للغاية
    فإما أن يرشحوا المؤتمر الوطني على علاته .. أو يتوقفوا عن التصويت و حينها و إذا فاز عرمان بالرئاسة سيكون الوزر كبير عليهم … هذا هو الموقف الحالي .. و حتى الآن لم أحدد إي اتجاه لأسلكه

  32. مشاكل قال:

    الأخت اواصر كتبت :

    امس موظفة معي في نفس المبني قالت انو هي ماشة تدرب الناس فى حيهم علي انو كيف يصوتوا للشجرة بذات اعمامك وعماتك الكبار شوية دي مش اسمها نزاهة برضو ولا انا غلطانة ؟؟؟؟؟؟؟؟؟

    سؤال بسيط : هل هي بتمشي تدرب الجماعة ديل في وقت الدوام ؟؟؟ لأنو بعد الدوام ما أظن فيها حاجة .. رأيها السياسي و عايزة تقدمو للناس … ماف اي مشكلة نزاهة في الحكاية دي

  33. حاج أحمد السلاوى قال:

    ولدنا مشاكل .ز
    المؤتمر الوطنى هو حامل راية الإسلام .. حرام عليك يا راجل !!
    أى إسلام وأى راية ؟ ما تخلينا نقعد تااااانى نعيد الكلام القلناهو فى بوست ولدنا شمباتى..عن الدجل والنصب واكل اموال الناس بالباطل ..وارجو ألا يكون قتل الأنفس بغير وجه حق ودون محاكمة.. هى من رايات الإسلام … حاشا وكلا ..نحمد الله لدينا معرفة كافية عن الإسلام ..لاكين إسلام زى دا ما عرفناهو..وليعلم كل من ينادى بالإسلام متاجراً به لتحقيق مصالحه الشخصية ..ليعلم أن عمله مردود عليه بالخسران وله الويل والثبور من اللا نام ولا أكل طعام ..وكل نفس بما كسبت رهينة .
    هل الإسلام هو راية ترفع بدون تطبيق ؟ ياخ الشعارات الكانت مرفوعة زمااااااان فى بداية الإنقاذ زاااااتها راحت وما عاد ليها وجود ..تقول لى حامل راية الإسلام ؟ اين راية التوجه الحضارى ؟ واين ….و…….. و……………..
    غايتو .. لم يعد شىء خافى على الناس ..والناس صارت على وعى كاف لمعرفة الضحك على الدقون وأصحاب الشعارات البراقة لأستدرار العطف .

  34. aflaiga قال:

    مشاكل يابتاع المشاكل يا هباش :
    اسى عليك الله كلامك ده مش زى لو قلبت الكوكاكولا بتلقى لا محمد لا مكه ؟؟!! انت سمعت عادجل امام قال شنو ؟؟ هو محتاج لا سمح الله ده بيركب ببلاش !!! عشان كده اقول ليك هو المؤتمر محتاج لا سمح الله ده بيركب ببلاش !!! ولا ما شايف انتا ؟؟
    وعشان نفقع مرارة ابكرون زياده :
    اخى مشاكل المءتمر الوطنى لا يحتاج لان يدخل صورة هنا او هناك يومئ بها الى الشجرة التى لا تحتاج لحشر فى مكان غير مكانها فكل مكان فى الدنا ظل شجرة وخير جليس فى الزمان انقاذ !! اها شنو ليكم يعنى اقعدوا انتو فى حشرو الشجره هنا ومرقو الشجره هناك لمن شنو اقول ليكم — يعنى خلاااس بقت على الشجرة المباركة الاشر ليها الشافع دى اسى ممكن بكره يطلع زول من علماء السودان يقول ليك : فاشار اليها قالو كيف نكلم من كان فى المهد صبيا …؟؟؟!!!

  35. مشاكل قال:

    سلامز

    بعد حديث الرئيس البشير يوم أمس و ما تناقلته وسائل الإعلام اليوم يتضح تماما أن الإنتخابات تم تأجيلها .. و لكن بشرط أن تبقى الحكومة كما هي عليه حتى قيام الإنتخابات – وقت ما يتفقوا عليها – و يظل الشعب السوداني يحلم بانتخابات حرة نزيهة .. لحدي ما الله يسهلها علينا و عليهم

  36. حاج أحمد السلاوى قال:

    الشىء الملاحظ حتى الآن هى سٍمة التراجع فى كل القرارات التى يتم إتخاذها من خلال المنابر الخطابية والشعبية خصوصاً حيث يتم إستدرا تعاطف الجماهير المسكينة المغلوبة على أمرها من خلال الشعارات النارية التى تلهب الحماسة وتخلى كل زول يشيل سيفه ويطلع لجهاد دول الإستكبار .. ولو حصل أى تاجيل لللإنتخابات القادمة – لا قدر الله – يعنى أنصياعنا التام للضغوط التى تمارس علينا من الخارج..من كارتر أو غيره ..مش مهم !
    ولدنا مشاكل .. من اين لك هذه الإستنتاجات بأمر تاجيل الإنتخابات ؟ أم أنك صرت قريباً من أماكن صنع القرار ؟ ..يا واد يا خطير ..
    أما المودوع التانى فهو ..لماذا هذه الشروط ونحن فى حالة دخول مرحلة ديمقراطية ..لماذا شرط بقاء الحكومة الحالية والتى كان من المفروض أن تغادر قبل الإنتخابات ضماناً للنزاهة والحيدة ..اليست هذه من أولويات الديمقراطية .. أم انكم تؤمنون ببعض الكتاب وتكفرون ببعض ؟
    غايتو جنس دا … يطرشنا … أصلو ما سمعنا بيهو !!
    حصل يوم كضبت عليكم ؟ ولاّ شن الرأى !

  37. نيام قال:

    السلاوي:
    من المفترض لضمان الحيدة ان تقوم حكومة مهمتها الوحيدة قيام انتخابات نظيفة..اذ كيف اضمن نزاهة انتخابات انت فيها الخصم و الحكم بل تستغل فيها كل امكانيات الدولة و اجهزتها الاعلامية و الامنية و القوات المسلحة و الخدمة المدنية و هذه الاجهزة يفترض فيها الحيدة و عدم تابعيتها لاي جهة حزبية كهيكل اداري (طبعا كافراد من حقهم مثلهم مثل اي مواطن)…ثم تريد ان تسكت اي صوت ينادي بهذا الفرز هذا يعني تبييت النية لاستغلال هذا الكادر في شان ليس شانه..هذا الامر نتيجته معروفة سلفا اذ ستقوم الفوضي و الاحتجاجات مثل ما حدث في ايران و عدم قبول الاطراف المتنافسة بالنتيجة المعلنة…

  38. حيرتوني يااخواني السودانين ما عارفة اعمل شنو عشان نبق يد واحدة لو عايزين بجد تريحو المواطنين وقفو الخلافات البيناتكم لان مافي زول حا يدفع ثمن خلافاتكم غيرنا و ياربي توحد شعبي

  39. mon amie قال:

    لقد وصلت دعايه الجماعة الانتخابيه مرحله لاستدرار عواطف الناس لايمانهم بشيوخ الطرق الصوفيه بالظهور معهم ياسبحان الله حتي هؤلاء اصبحوا منافقين يمدحون البشير كما كان يمدح الشعراء في العصر الجاهلي الامراء طلبا للمال عجبي!

  40. محنك قال:

    نرحب بالاخت حفصة اربجى ونقول ليك ما تشوفى الغبار والعلاله دى هنا الناس كلهم اخوة وصافية لبن وممكن ترجعى تشوفى صور الرحلة القامو بيها الشباب فى المدونة دى ونحن مدونى الخارج كان نتمنى ان نكون بينهم رغم اختلاف وجهات نظرنا وفى البيت الواحد فى اختلاف لا يفسد للود قضية … واهلك السودانيين عندهم قيم لا يخشى عليهم الا من كيد الخارج بس هسى يقدل سوار الذهب والمهدى والترابى والبشير وكان الله يرحمه نميرى موجود …. مهما سخنت حديدة السياسة فى النهاية فى تسامح

  41. كتو قال:

    بالمناسبة ..
    انا من صمم هذا البوستر وبوسترات المفوضية للانتخابات ..
    وللفائدة العامة حين صممنا هذا البوستر لم تكن الرموز الانتخابية قد وزعت للمنتخبين
    تم الرسم فى يناير وتم توزيع الرموز للاحزاب فى فبراير …
    وشكرا

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s