صور وصول الموصلي \ بلدنا نعلي شأنا ياناس

Posted: السبت,10 أبريل, 2010 by ودالزبير in Uncategorized

قبل ايام قلائل عاد لأرض الوطن الموسيقار يوسف الموصلي بعد غياب وصل للعقدين من الزمان .. كنا هناك نستقبل هذا الرجل الفنان وقد يستغرب البعض عن علاقتنا بيوسف الموصلي عرفنا الرجل في هذا الفضاء الإسفيري قبل فتره طويله وهو رجل حبوب ويعشق الناس جداً وأتذكر عندما دخل علينا في قريه مجاوره هنا بإسم الموصلي ونحن نتناقش حول الفنانه شروق أبو الناس عندما ظهرت فجأه من العدم وكنا نشن عليها هجوماً لازعاً فجاء ليشرح لنا أمور موسيقيه وبما إن تلك لأيام كانت أيام هكرز فقد قلت له : هسه نعرفك كيف الموصلي ما يمكن زول طاشي ساااكت فقال لي بكل عفويه أغني ليك على قدر الشوق وهو رد ينم عن تمكنه من التعامل مع الناس الإسفيري المهم سألته عن بعض سكان الإشلاق الغربي فطفق يعدد لي الأسماء من رجال ونساء وحتى الذين رحلوا من هذه الدنيا كان يذكر أسمائهم فعرفت إنه الموصلي وليس هكر…..

كان يتحملنا كثيراً ونحن نغالط ونجادل في شئ من صميم تخصصه وهو الموسيقي ويتعامل مع كل المتداخليين بكل ود وحب ووإحترام رغم قامته السامقه في عالم الغناء والموسيقي .. قلنا له إن وجودك خارج البلاد يخصم منك فالكثير من جيل اليوم لا يعرف عنك شيئاً ولو إنقرضنا نحن من سمعنا على قدر الشوق وطفل العالم الثالث وشريط وردي أرحل فلن تجد من يعرفك … التواصل مع الناس يستوجب من المبدع أن يكون بين شعبه ( طبعاً دي فرصه عشان لناس تهاجم الإنقاذ لأنها شردت كثير من المبدعين ) بختكم ..

المهم عاد الرجل وكانت الخرطوم بكل أطيافها في إستقباله … أبو عركي .. البلابل .. عبدالقادر سالم .. النخلي … عثمان محي الدين عازف الكمان الشهير … أسامه بيكلو …. الوزير سيد هارون .. الموسيقار أنس العاقب … محمديه وغيرهم وغيرهم

ا

طبعاً أستاذنا الفاتح جبرا لم يكن هناك لن صورته هنا لنرى وجه الشبه الكبير البينه وبين الشاعر محمد طه القدال البيظهر في الصور ه الفوق التحيه والتجله لأستاذنا وتاج رأسنا كبيرنا أستاذ الفاتح يوسف جبرا

About these ads
تعليقات
  1. علي سنكل قال:

    صباحك خير يا ود الزبير:
    حمد لله على سلامة هذا المبدع ، وربنا يرجع كل من شردته الإنقاذ للبلد ( أهو برررراكم بجيبو السيره ).
    الفي الصوره الأخيره دا د. الفاتح ، عازف الجيتار المبدع؟

  2. ودالزبير قال:

    سنك

    صباحاتك خير

    الفي الصوره الأخيره حبيب الكل جبرا لكن عليك الله عاين للشبه البينو وبين القدال يأخي مبالغه عديل

    باي زي وي الفاتح عازف لا يشق له غبار في العود وأظنو هسه بقي عازف أورغ لأني قبل فتره شايفه جاب ليهو أستاذ موسيقي في البيت وشغال تدريبات ….. إحتمال يكون حسد ناس نجاه غرزه ومحاسن لقيمات وزبيده جكاجك وحواء قوانص في العدادات وكده

  3. ابوالمنذر قال:

    ودالزبير
    ياخطير على قدر الود ما يمد مديت وبين القدال والموصلى جبرا ختيت وكلو يخرج من سراج واحد.. ابداعات ومبدعى بلادى .. مليون سلام

  4. ودالزبير قال:

    حبيبنا أبو المنذر

    أتانينا وأكوبام زاتو … هسه في ناس أكوبام دي يقروا ليك أوكامبو

    يأخي القدال ده حاجه غريبه خلاص زول مازي الزولات .. أخوك قال ليهو عليك الله إنت بني آدم عادي زينا كده يتصحى وتنوم وتزعل وتفرح وكده فقال لي ما أنا إلا رجل يمشي في الأسواق ويأكل البوش فضحكنا حتى كدنا إن نقع من الضحك … لاحظ إن الضحك بصوت عالي ده كان في صاله كبار الزوار والوزير قاعد وناس التلفزيون والإذاعات والصحف المختلفه .. ما إشتغلنا بالناس شغلها وهاك يا قرقريب ..

    جبرا فده نسيج وحده

    ياريت لو شفت جبرا لمن مشينا رحله جبل أوليا الفاتت

  5. حكاية قال:

    صباح الخير التحيه ليك ود الزبيييييييير
    يا ود الزبير ماشاء الله مغطى الاحداث بعينها
    لكن زو لك ده ما عرفته ادينا جزء من اعماله نشوفها ونتعرف عليه اكتر عشان نكون مواكبين ما خارج الشبكة
    بين القدال وجبرا مافى وجه شبه الا كان اللون
    ولا وجه الشبه فى انهم كتاب
    ماتبالغ جبرا يزعل منك
    كسرة
    نشكرك لانك عرفتنا بقامه جديده وياريت تكتب سيرته الذاتيه واعماله تكون ما قصرت اهو لقينا لينا زول نتكلم عنه فى الايام الجايه

  6. عزت قال:

    حمد الله سلامة برجوع المبدعين لبلادنا و تحية كبيرة للمبدعين الذين استقبلوه خاستا المبدع أبو سماعة في جيبو و المبدعة الجنبو….

    و تحية للمبدع أبو جلابية كمان…

    طبعن المصلي من جيل الفنانين القرو موسيقى في زمن لم تكن فنياتها مدونة في النوتة و يقرأها الفنانون لدرجة أن هاجمه البعض و شنو هجوما على معهد المسيقى و المسرح وقتها بأنه (لخبط) غنا الناس…. و لكنه الموصلي صمد و واصل و تبعه الكثيرون من بعده…………و واحدين حضروا في الموسيقى دكتوراه عديل كعازف الجيتار الملحن الفاتح…..

    أها يا ود الزبير ياخ المدونين بيستاهلو دندنة من الموصلي و بيتنا في المقرن جاهز لاستقبال الحبايب….. قلت شنو…!!

  7. ودالزبير قال:

    حكايه

    هاك الأشهر ليوسف الموصلي

  8. ودالزبير قال:

    عزت يا مرطب

    تعرف الزول ده مشغول شغله شديده خلاص لكن في البال نعمل ليهو تكريم أنا والأخوان في القريه المجاوره الكان بيكتب معانا فيها أها الوقت داك راح تكونا حضور بإذن الله

    بمناسبه جيتك دي عندك ليك بوست خاس وخسوسي بس إنت خليك قريب

    حكايه وهاك دي كمان

  9. حكاية قال:

    شكرا على الاغانى
    ماشاء الله الزول ده كان مختفى وين ماظاهر
    لكن العيب على اعلامنا لانه مافاضى

  10. البشاوى قال:

    رد الله غربة كل الطيور المبدعة

  11. ودالخلا قال:

    الانقاذ تطير عيشتها!!

  12. ساتينتود قال:

    سيدي ود الزبير بيه
    والأخوان الحبان في سوداننا المدونة وسوداننا الجايط بي سبب الانتخابات

    سلامات وعلى قدر الشوق الكبير وبكتب ليك رسالة يا أمي وبنقش في جناح الريح كلامي الدايرو يوصل ليك.. حقيقة كانت العشرون عاما خصما علينا نحن بنو بلدي من ابداعات الموسيقار الفذ الموصلي،، وهو رجل يستحق التكريم،، وياريت يبدع ويتحفنا بفنه وألحانه الرائعة ما أمد الله في الأعمار

  13. aflaiga قال:

    سجمى ود الخلا مالو بقى طابور ولا شنو ؟؟؟
    اكيد ما قاصد مش ؟؟ طيب لو هى طارت عيشتا فى ناس عيشتم ترك وين ؟؟؟
    لالا اوع يكون ده جواب نهائى كدى استعين بصديق او احذف عيشتين !!!

  14. aflaiga قال:

    ياجماعه الموصلى ده مش نوبى ؟؟؟ وتيب مستغربين الابداع مالكم ؟؟

  15. ودالزبير قال:

    كده ياشباب أول حاجه خلوني ارحب بالصديق العزيز ساتنتود وهو غني عن التعريف ومن رفاق الدرب من زمن القمردينه او الزمن الجميل كما أسميه أنا يخي لو عارفين الموصلي يجيبك كان كتينا عنه بوست إنشاء الله كذبه إبريل زاتو حبابك يا جميل…..

    البشاوي
    جيت ولا لسه ضارب الخلا

    ودالخلا

    الليله قريت ليك حوار مع الموصلي قال إنو الأوضاع إتغيرت وإنا الإنقاذ ماياها الإنقاذ الهرب منها ( طبعاً الوزير شخصياً كان في إستقباله في صاله كبار الزوار) هسه الجماعه يطلعوا ليك مرتشي وباع القضيه.
    أفليقا

    بالجد الزول نوبي جميل ولو شفت منظر البلابل وهن يزفنه بالأغاني النوبيه وسط دفوف فرقه نادي بوهين لوقفت مشدوهاً …… أوبس سوري إنت ماراح تقيف مشدوهاً لأنك من أهل ذلك الجمال نحن من نقف فاغرين أفواهنا أزاء إبداعكم ذاك

  16. عباس قال:

    الليله قريت ليك حوار مع الموصلي قال إنو الأوضاع إتغيرت وإنا الإنقاذ ماياها الإنقاذ الهرب منها ( طبعاً الوزير شخصياً كان في إستقباله في صاله كبار الزوار) هسه الجماعه يطلعوا ليك مرتشي وباع القضيه.

  17. ودالزبير قال:

    بسم الله الرحمن الرحيم ده شنو يا عبس

    هاك لقاء الموصلي مع ناس النيل الأزرق

  18. ودالخلا قال:

    ودالزبير يا رائع، أنت ماهو شغال كويس ليه الناس بيقولوا عليك كدا؟؟ خسوسا” العوازل ، وأنا كنت فاكرك معايا.. حبيبي فاكرك معايي… لقيتك مع التانين،،،،
    شوف زولك ده مهذب (كتير كتير) كيف وقاعد مضاير كيف وغاض طرفه كيف في حين أن هاتيك العوانس مصوبات أسهمهم بكل قوة عين لمن صاحبك ما قادر يا خد راحتو في الكرسي،،،،
    جنس قهارة غايتو..
    لكن أصدق كلام قالوا عن الفنانين الشباب أنهم (معاول)، وصاحباتك ديل فوتوها ساكت ما عارفهم كان ما فهموها ولا ما سمعوها، ما عارف…
    قلت لي الأنقاذ مرت بي عهد الرشيد وأتخيرت ، علشان كده جا يغني ليها الموصلي، كدي شاور صديقك أو أطرح رياح التغيير دي للجمهور ناس الضفة والقطاع، علهم يفتوك يا سديقي!!

  19. حاج أحمد السلاوى قال:

    الكاشف الصغير ..الما بيقودو زمام ..سلام
    كدى قول لى بصراااااحة كدا إنت كنت مركز مع الموصلى ولاّ مع الصبايا ؟كووولنا شفناهو قاعد يضّاير يمين شمال وما قادر يرفع عينو من الأنوار ( أنوار العوانس … عوانس شنو .. يا ودالخلا ؟ ديل بقولوا عليهن عوانس ؟ دى حسادة منك سااااااكت ) الجاهرة القاعده حوله ..لاكين باقى ليك لامن تكون فى حضرة جنابك زى دى إنت تانى بتقدر تتكلم ؟ ما الكلام كووووولو بيروح من راسك !!
    غايتو لاكين جنس أنوار ..!!!
    رايكم شنو … يا الكواشف الكبار.. الأبرار ؟
    بشبش … لسه طرزان ..ولاّ الشمل إلتام ..؟

  20. ودالزبير قال:

    الكواشف ودالخلا والسلاوي

    غايتو يا جماعه لو قلت ليكم إن صوره التلفزيونما بتعكس شكل الزول الحقيقي يمكن تهيجو وتزعلو لكن عن تجربه ورؤيه العين للعين رشا الرشيد دي مقلب كبير وأنا مابفسر وإنتو ما تقصروا بالنسبه لتسابيح فحقيقه لسه ما عملنا ليها معاينه وما شفناها شوف العين الماكتل ليهو غزال

    قلت لي ياحاج السلاوي ودالخلا حاسد جد جد قال عوانس قال

  21. ودالخلا قال:

    سلام ياقبيلة،،
    عمدة القبيلة وكبيرها حاج أحمد السلاوي وفارسها المغوار ودالزبير،، أنتو ما شايفين العنوسة دي؟؟ ما هي العنوسة لعنوسة تفرق ، يعني ديل عوانس قاردن سيتي يا حبيب، وبالتأكيد همن مازي عوانس حلة هناي ديك !!
    قال حسادة قال..

  22. عزت قال:

    سلام يا أحباب

    شكرا يا ود الزبير “للأبديت” الظاهر الانتخابات و الكورة شغلتنا و ما شوفنا المقابلة لايف…. لكن برغم السهام البنوت ديل عندهم حضور اعلامي كويس و أسئلتهم في الصميم ….بس هو كان يقعد ليهم في النص عشان تتقاطع السهام و تتشتت…و يغيييييز الكواشف ديل..!!

  23. ودالزبير قال:

    عزت المرطب
    الإنتخابات دي شغلت الكل وربك يجنب البلاد والعباد الفتن والمصائب ….. الحياه تستمر ونحن نبحث عن بسمه أو ضحكه أو أغنيه أو لوحه جميله لنشرك الآخرون معنا في تأملها فالدنيا لن تتوقف لأن أحدهم لا يرغب في نظام ما والعمر أقصر بكثير من أن نقضيه في جدل بيزنطي الدجاجه الأول ولا البيضه ( رايك شنو في بيض النيل الأزرق ده )

  24. حاج أحمد السلاوى قال:

    أخونا شكسبير ..وبقية صفوة الأخيار ..
    مقلب كبير ..مقلب صغير .. منورة نور شديد ..لامن أخونا الموصلى كان ما عارف يودى عيونو وين ..يعاين بيجاى ولاّ بيجاى ..محل ما يودى عيونه النور داك يجهرو ..تقول لى مقلب ؟
    إنت يا ابو عصمت اقعد بارى لى الإنتخابات الما منها فايدة دى وخلى الأنوار تفوتك ..إنت اصلو زااااتك ما عندك طريقة تشوف بيها وتتمعن بيها كويس ..الحرس دايماً بيكون قاعد معاك ..موووووووش ؟ نحنا غايتو طرزانات …لا حسيب ..لا رقيب..!!

  25. ودالزبير قال:

    الحاج السلاوي

    العيون النورك بجهرها غير جمالكن مين السهرها يا بدور القلعه وجوهرها

    عالم ….. بطااااااااااااااااااااااااااااااااااااله

  26. ودالخلا قال:

    شوف يا خوي يا ودالسلاوي، الحكاية دي زي ما قال ليك ود الزبير ما بتخارج معانا ، ونحن علي جناح التبريزي وتابعه قفة (لا بنفرز الكاس لا بنعرف البصلة)، ودي يفسرها ليك واحد من الحلاوين أذا كان بالمدونة حلاويين يا صديقي العزيز.
    وفي سؤال صغيروووني كده لماذا كرسي الضيف في مستوي أقل أو منخفض عن كراسي المضيفات؟؟؟؟
    وسؤال تاني أسخر منو لمن وضع الكرسي الفاضي بجانب الضيف مع أنه ضيف واحد وكرسيه شايلو لمن مفضل كمان!!!!!

  27. اواصر قال:

    الزوار الكرام السلام عليكم
    الأخ/ودالزبير توثيق جميل جدا يديك العافية
    انتي ليا
    ومهما عمر السكة طال
    وايامو صبحت ماوفية
    راح نلاقي بعضنا يوم
    صوت في قمة العذوبة كان هرماً رابعاً فى البوم طفل العالم الثالث وعبقرية فذة فى توزيع الالبوم ، عذوبة الحانه متفردة وتوزيع موسيقى جميل لأجمل الأغاني يكفيه توزيع اغنية علامة فى تاريخ الفن السوداني وتاريخ وردي (قلت ارحل) .
    ويارزينة وصي عينيك الحنينة
    ترسم الفرح المهاجر
    في عيون كل المدينة
    لحن عذب آخر بصوت الرائعة حنان النيل ،ولكثيرين غيرها من مبدعين بلادي ، نتمني ان تكون عودته اضافة وتجديد روح الفن السوداني الذي اصبح يرثي له كما قال حميد (زمن المغنين التفل) ، لكن السؤال هو ماذا بعد العوده ؟؟؟؟؟؟؟؟؟؟؟
    سألت هذا السؤال وفي الخاطر ممن عادوا ولم نسمع منهم شيئاً سوي احتفالية عودتهم وبعض ليالي المنتديات وبعدها اصبحوا نسياً منسياً!! عندما رجع محمد الحسن سالم حميد فرح الناس بعودته وظنوا أن صوته مازال حياً واشعاره جذوتها لم تمت بعد !! وماذا حدث عاد تحت عباءاة الراسمالية التي نبذها سابقاً ، واحيا بعض ليالي المنتديات الشعرية التي واجهه فيها كثيراً من النقد ثم اختفى فلم نقرأ له جديد ولم يسمعنا صوته ؟ والشاعر الجميل عبد القادر الكتيابي مثال آخر كنا نراه فى بعض اللقاءات الخارجية فى الاعياد والمناسبات وعندما رجع لا نكاد نراه او نسمعة الابعد فترات طويلة ؟ ماذا يعني هذا هل يصيب مبدعينا الكسل بمجرد عودتهم ؟
    هل الاغتراب هو الدافع للابداع ؟ هل تقتصر ابداعاتهم علي الجلسات المغلقة والاستماع لهم من الصفوة ؟
    لماذ ينضب معينهم بعد عودتهم لبلاداً طالما حملوها بين جوانحهم واحلامهم بالعودة إليها؟ أتمني ان تكون عودة الموصلي إحياء لكل لحن جميل وموسيقى راقية وانتعاش فنياً بعد طول موات .

  28. elturkey قال:

    الأخ ودالزبير والزملاء الكرام …. رجعتونا للزمن العامر زمن ال (جى ام اتش والبستان) وليالى الموصلى وكمال كيلا وشرحبيل أحمد ….. ربنا يجعله خير وترك كل الطيور المهاجرة عشان نعيش أيام أجمل مما كانت … بس باقى ليكم ياجماعة الموصلى دا شاف فى بت عجاج شئ انا ماشايفو ولا شنو ؟

  29. عزت قال:

    و يديك العافية انتي كمان يا أواصر لهذا الهم الذي تحملينه و خوفك من أن ينقطع عطاء المبدعين بعد عودتهم من غربتهم….

    و لكنها الحياة فالعيشة في السودان ليست بأي حال من الأحوال كغيره من الدول فما يذهب مبدعا للخارج الا و تغيرت نظرته الشاعرية و الفنية و المعنوية الى المادية و ينغرس فيها كانشغال الشاعر بازرعة في العمل قرابة الثلاثين عاما موظفا في السعودية فانحرف شعره من المعنوي الى المادي و خلى ناس عثمان حسين و ناس دوليب الذين صمدوا في السودان ليعبروا بالمحبين حتى يومنا هذا….

    يبدو أن الانشغال بلم الريالات و الدراهم ما يغير المبدعين و الجو ذاتو لا يساعد فكيف سيكتب الشاعر شعرا عاطفيا رقيقا يوصف (سال من شعرها الذهب) عندما لا يكون يرى ذهب و لا فضة تحت العبايات السود ديك….

    و عندما يرجع يكون (ندادته) قد تفرقت بهم السبل واحدين بقوا مؤتمر وطني و واحدين تحجبوا و واحدين (اتكلوا) و يعيش وحيدا و لا يستطيع الاندماج في المجتمع من جديد…

    من واجب الباقين أن يحاولوا تقريب من عادوا و ليدرجوهم في برامجهم… شان كدا أن قلت لود الزبير يلمنا في الموصلي امكن نغير ليهو و يغير لينا شوية…

  30. ودالزبير قال:

    أواصر

    ليه الزول حس بي دفعه دفعه كده يأخي أنا الأغنيه دي كاسرها فيني خمسين ضلعه(http://www.youtube.com/watch?v=2sQmaLwiNyc

    والأغرب أغنيه حنان النيل بتاعت يارزينه وصي عيينك الحنينه يأخي مالكي يأخ

    التركي سقى الله تلكم الأيام

    عزت

    تاني جاب سيره البحر يأخي زي ماقال ليك القبيله الإنقاذ عيشتها تطير وتقع البير

    لكن فكره نتلم كلنا في قعده كبيره دي فكره ممتازه وحق نبدا في التجهيز ليها .. إتحخيل قعده فيها الموصلي وجبرا والقدال …. والكلام ده جنب البحر وجنبنا السمك والشامبيون .. مالك يأخي

  31. ودالزبير قال:

    أواصر

    ليه الزول حس بي دفعه دفعه كده يأخي أنا الأغنيه دي كاسرها فيني خمسين ضلعه

    والأغرب أغنيه حنان النيل بتاعت يارزينه وصي عيينك الحنينه يأخي مالكي يأخ

    التركي سقى الله تلكم الأيام

    عزت

    تاني جاب سيره البحر يأخي زي ماقال ليك القبيله الإنقاذ عيشتها تطير وتقع البير

    لكن فكره نتلم كلنا في قعده كبيره دي فكره ممتازه وحق نبدا في التجهيز ليها .. إتحخيل قعده فيها الموصلي وجبرا والقدال …. والكلام ده جنب البحر وجنبنا السمك والشامبيون .. مالك يأخي

  32. حكاية قال:

    ههههههههههههههههه
    والله زولك مع ناس النيل الازرق بعاين للمصورين نسى الانسات المعاه
    انت وصيته يبص للارض ولا شنو
    لو لقى فرقه كان خش الواطه وغير للواطه ما بعاين والله زول مهذب انا بعتبره
    لكن ماوريتنا هو كان وين وليه عشرين سنه كان مختفى وين
    غايتو قناه النيل الازرق هى القناه المتنوعه وبتجيب حاجات كويسه ومتابعه بس كان خلو برنامج افراح افراح لانه ما افراح انما ————-
    كسرة :
    ناس الانتخابات رفعوا ولا لسع العزاء تلاته يوم الرفع متين والنتيجه متين افيدونا

  33. محمد قال:

    ياجماعة شوفو لينا حل لي مشكلت موقع ساخر سبيل دة السخرية بقت في الموقع ذاتو الماقدرين نفتحو نتصفح فيو دة كل ماتفتح صفحة تقول تقراء الموضوع يقول ليك الشبكة واقعة ضعيفة ماواصلة متقطعة اصلا شنو الحكاية ولا نخلي الموقع دة تاني ماندخل نتعذب ساي ونطلع في الاخر موقعكم بقة ذي المراية تشوف الصورة وما تقدر تتحسسة ولا تهبشة تشوف الموضوع وما تقدر تقراء دة شنو دة ياخ

  34. محمد قال:

    بالمناسبة انا كتبتة هنا لاني مالاقي حتي تفتح معاي عشان اوضح مشكلتي دي الا الصفحة دي

  35. حاج أحمد السلاوى قال:

    الأخ محمد ( يا ريت لو تقول لينا محمد ولد منو ..وتعرفنا بنفسك اكتر ) .. سلام .
    يبدو إنو هناك مشكلة فعلاً فى موقع حبيبنا الفاتح جبرا لأنى أعانى من نفس المشكلة منذ يوم الربعاء الماضى ( 7 ابريل 2010 )ولم استطع دخول الموقع حتى هذه اللحظة وفى برنامجى الإتصال بالأخ الفاتح اليوم لأخبره بالمشكلة الحاصلة ..بس أنا لاحظت إنو فى ناس بتدخل وبتكتب وتعلق ..
    ياريت أخونا وولدنا ابو ابراهيم يدينا معلومة عن المشكلة وكيفية حلها ( ودياً ) ..
    ونحن فى الإنتظار ..
    وما أنسى يا اخ محمد لازم اسالك الأسئلة البتسل الروح وهى عن موقعك الجغرافى ..عشان الجماعة يتواصلوا معاك اكتر وأكتر خصوصاً لو كنت موجود داخل دولة أمازونيا العظمى ..
    إنت معاى ..ولاّ معاهم ؟؟يبدو إنك مع التانيين .

  36. محنك قال:

    يا حاج نعرف ليه امازونيا دى فى الاول هى فى الغلاف الجوى الكوكب الرابع والعشرون فى المجموعة الشمسية التى تقابل مليون ميل مربع فى خريطة العالم ( ما عارفين بعدين حتكون كم حسب الظروف ) . ومن ضمنها جبل اوليا

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s