صور من مناطق المحس

Posted: الجمعة,23 أبريل, 2010 by طارق أب أحمد in اخرى

مناطق المحس و تبدأ من كرمه بعد حوض السليم جنوبا عبر دلقو . عبرى ,أرقو و حتى عكاشه شمالا
أشهر مدنها كرمه لما عرف عنها من حضاره karma civilization

مرت حضارة كرمة عبر مرحلتين حضاريتين سمي العلماء الأولى منها بحضارة كرمة الأولى وامتدت ما بين 3000 – 2400 ق.م ، وتميزت هذه الفترة بتأثرها بثقافة المجموعة الأولى التي كانت قد نزحت جنوبا في بدايات الاحتلال المصري للنوبة السفلى ، ولكن يلاحظ عدم وجود اثر للثقافة المصرية مما يدل على عدم وجود اتصال بين النوبة العليا ومصر في تلك الفترة . أما في عصر حضارة كرمة الثانية فقد ازدهرت منطقة النوبة ونمت كمركز تجاري مهم ،وقامت فيها العديد من الصناعات المهمة خاصة صناعة الفخار، لذا كان من الطبيعي نشوء علاقات قوية مع مصر كانت تقوم على التبادل التجاري بينهما ، خاصة وأن مدينة كرمة كانت تقع في وسط الممر التجاري ما بين أفريقيا و مصر .
تميزت حضارة كرمة بمدافنها التي كانت في هيئة أكوام من التراب دائرية الشكل محاطة بالحجارة وفي وسطها مبنى ذو دهليز كان يوضع فيه الموتى . كما اشتهرت كرمة بفخارها المميز والمشهور ب ” خزف كرمة ” وكان من أجود أنواع الفخار المعروف في وادي النيل عبر التاريخ ، وقد عثر على نماذج منه في دلتا النيل في أقصى الشمال .

اهم هذه المعالم الاثرية التي ميزة حضارة كرمة تمثلت في مظهرين اثريين هما ما يعرفا باسم الدفوفة .
وكلمة دفوفة هي كلمة ذات اصل نوبي حيث ان ” دفي ” في اللغة النوبية تشير للمبني المرتفع او العالى من حيث الارتفاع المصنوع من الطين . وقد تميزت هذه الحضارة بمعلمين من انواع هذه ” الدفي ” هما :
1 – الدفوفة الغريية ( السفلى )
2 – الدفوفة الشرقية ( العليا )
3 – اما المعلم الثالث فقد تمثل فيما عرف بالمدافن الشرقية فالى تفصيل كل واحد من هذه المعالم :
1 – الدفوفة الغربية :
كما سبق القول فان الدفوفة هي كتلة طينية ضخمة تتواجد على بعد ميل من الضفة الشرقية لمجري النيل .وقد ادي الشكل العام للدفوفة اراؤهم واقوالهم حول طبيعة هذا الصرح الطيني ومهامه ؟ اول هولاء العلماء الذين حالوا ان يفتوا في حقيقة هذا المبنى و اسلوب البناء الذي اتبع بها والمخلفات الاثرية التي العثور عليها في مبنى الدفوفة . كل هذا جعل من آراء علماء الاثار تتباين فها هو العالم الاثاري الامريكي . جورج اندرو رايزنر . و هو مكتشف المبنى
راى رايزنر ان الدفوفة الغربية هي المقر الرئيسي الذي كان يدير منه حاكم مصر بالسودان اعماله الادارية ( اي ان المبني له وظيفة ادارية ) معتقدا ان المبنى كان بمثابة احد الحصون المصرية التي انتشرت ابان فترة المملكة المصرية الوسطي (في عهد الاسرة 18 ) وقد قارع رايزنر مدافعا عن فرضيته من خلال الادلة الاثرية ذات الاصول المصرية والتي وجدت بهذا المبنى .
لكن رايزنر مع هذا لم يسلم من معارضة العديد من العلماء اللاحقين مثلا هنتزا وهو اثاري ظهر ابان فترة الستينات فقد فند اراء رايزنر نافيا فرضية الاصل المصري للحصن وانما وضع ما هو عكس ذلك تماما حيث راى هنتزا ان مبنى الدفوفة كان يمثل مقرا لاحد الامراء او الحكام النوبيين وقد قدم الاخير دلائل على بينات اثرية ذالت اصل نوبي اخذت من نفس الموقع . وذات السمات المحلية الصنع .
بينما راى جملة من العلماء اللاحقون ان الدفوفة هي مبني يمثل مركز تجاري مصري شيد تحت حماية الملك النوبي وان وجود البضائع والمنتجات المصرية به دليل على وجود جاليات مصرية به تحت الحماية النوبية وبداو ينسجون الكثير من الروايات حول طبيعة العلاقات السياسية والتجارية ما بين مملكة كرمة و مصر في عهد الدولة المصرية الوسيطة ومدي اهمية مملكة كرمة لوقوعها على خط المرور التجاري البري – والنهري ما بين مصر والمجاهل الافريقية التي تقع للجنوب من كرمة والتي كانت تاتي لمصر بالعديد من المنتجات الهامة وسلع الرفاهية مثل العاج – الذهب – ريش النعام – الرقيق – الماشية – الحيوانات البرية – وجلودها – والاخشاب –

كان هنالك راى اخر حول طبيعة المبني جاء من عالم النوبيات الانتربولوجي الامريكي – وليامز ادم – صاحب كتاب النوبة رواق افريقيا – حيث راى ان مبنى الدفوفة يمثل برجا للمراقبة التجارية بحيث يتحكم من خلاله على حركة السفن الصاعدة – الهابطة في النيل من والي مصر تحت قيادة احد الامراء النوبيين .
لكن ما ان بدات اعمال البعثة السوسرية في هذا الموقع تقريبا من العام (943 1 م ) بواسطة الاثاري شارلس بونيه والتي لازالت مستمرة الي يومنا هذا . فانه يمكن القول ان ثمت حقيقة علمية اليوم اصبحت شبه مؤكدة ما بين الباحثين . وذلك من خلال جهودات الاثاري شارلس المقدرة وهذه الحقيقة هي : ان الدفوفة الغربية وملحقاتها الاخرى من المباني . كانت بمثابة كنيسة او او مركز ديني رئيسي للعبادة بينما كانت مركز العبادة في هذا المبنى بالوسط اضيف لها لاحقا عددا من الملحقات من الغرف ذات المهام الطقسية المتعددة . وقد كان بها فناءا مثل باحة يستفاد منها في المناسبات الدينية والاعياد الرسمية ومت هنا يبدوا ان المبني قد كان جزءا من منظومة ساسية ادارية مركزية شديدة السطوة ودقيقة التنظيم . تواجدت على ارض النوبة لما يربو عن الالف عام ( 2500 ق . م – 1480 ق . م )
والتاريخ الاخير هو التاريخ الذي انهارت فية المملكة بواسطة قائد جيوش المملكة الحديثة – احمس
((معلومات مجمعه من الويب))

الصور أدناه للأسف لا تشمل المناطق الأثريه نسبة لأننى لم أتنكن من الوصول إليها

نقوش نوبيه حول باب السنط فى بيت عادى جدا


دلقو كما بدت لى من على بساط الريح


منطقة كدرمه كوكا (الحجر الأسود)


سبيل فى كرمه جوار المعديه


و كرمه من كرمه


زهور تيراب المسمس تدافعت نحو عدسة الكاميرا


بلاد المحس


دلقو


دلقو


دلقو


النيل من مشرع كرمه


يا ولد لا تركو


من النرويج إلى جنوب افريقيا على الدراجه

باى باى
باى باى

About these ads
تعليقات
  1. طارق أب أحمد قال:

    أبكرون

    وينك
    شايفك ما دورت جيرانك من ناحية الجنوب الشرقى

  2. ابكرون قال:

    والله لكن يا ابواحمد الموثقاتي ابداع وانت تسجل لشمال السودان هذه الارض البكر والارض التاريخ وهذا الجبل الاسود الضخم الذي صورته من سفحه دلقو الاهل والجذور وحضارة النوبة القديمة غرب دلقو في منطقة سيسا وقرقود ….يا سلام يا ابواحمد وذكريات الدراسة في دلقو الوسطي…..وجاييك برواقه بس تصبح الواطه عاين الساعة كم …………..ّ!

  3. aflaiga قال:

    اب احمد : انت ياتو واحد فى السايقين العجلات ؟؟؟ توثيق رائع وراقى .
    ابكرون : الليله يومك بالله سوح بينا يا شادى وورينى بلادى واتفقد الوادى فالروعه بى غادى –
    بالله شفتو المزيره دى كيف ؟؟ لمذيد من الصور عن ارض الشمال برضو نحيلكم لموقع قريتنا المتواضعه :

    http://www.nilevalleyherbs.com/my_village_home.html
    الموقع يديره شقيقنا الدكتور عوض بالولايات المتحده وزوجته الدكتوره الباحثه لندا بوكسمبرج . وهم من المهتمين بتراث وتاريخ الشمال ..

  4. ابكرون قال:

    سلام ابواحمد :
    اولا تصحيح بسيط لا يقلل من روعة الموضوع ….منطقة المحس من ابوفاطمة جنوبا حدود المحس مع الدناقلة وشمالا حتي قرية صاي …..اما عبري وحمامات عكاشة فتعتبر منطقة السِكوت وهم يفصلون بين المحس والحلفاويين وعاصمتهم عبري وجميعهم نوبه….الصورة المرفقة تبين جبل دلقو الشهير ومعظم المدينة ولو قربته الصورة بالقوقل تظهر لك اعمدة المنطقة الاثرية غرب دلقو في سيسة
    وتظهر في الصورة اطراف جزير آرت ميري وتعني الجزيرة الجارية وجاييك عن دلقو والجزر الثلاث بحكي ليكم وعن حبيبتي بقلكم يلا ما تطنشوا كلكم….
    ————
    غايتو اليوم الما بكابرنا في بكانا ده بندفن ليه غريق واياك اعني يا جار ويا جارة…..

    C:\Documents and Settings\user\Desktop\دلقو.jpg

  5. وجيناك يا ابكرون – ده بيت البكا الاساسى كيف نخليك براك.

    والله يااخوانا الشمال ده اجما منو مافى – جمال ووهدؤ وحنية ماليها مثيل واهم من ده كلو فيهو ريحة الحبايب.
    مالك علينا يا اب احمد ياخى .

  6. عزت قال:

    سلام يا أب أحمد و زواره

    و شكرا على التوثيق و عكس جزءا مهما من بلادنا

    و كويس انو الموضوع بيبدأ من حوض السليم ….. و الباقي انتو عارفينو

    انت يا أب أحمد المزيرة دي مقفولة داير ما يدور بالطين أها و النقاع (الموية البتنقط من الأزيار) ما بتكون عاملة عمايل اذا كانت الحتة مقفولة….حيث يمكن أن تقتل الشجرة
    عموما فكرة ما بطالة لكن لو كانت مفتوحة أفضل للشجرة و للبيئة ….

  7. طارق أب أحمد قال:

    أبكرون :- شكرا على التصحيح بس الناس دايا يقولوا منطقة المحس و السكوت بدون فرز
    أفليقا :- برضو نحنا بتاعين عجلات
    عزت :- اللبخه دى ضخمه شديد و شايله سوق كامل تحتها حوالى عشرين متر من النيل

  8. aflaiga قال:

    اب احمد : ديل زاتن انت قايلم بتاعين عجلات لكن تقول شنو ركوب العجله ما بتنسى !! يعنى فيها شنو انا قايلك صورت وانت راكب العجله لانو حسب علمى التصوير فى العجله من الشيطان ..
    بعدين يا اب احمد اول مره تلاقيك شجره طولا عشرين متر ؟؟؟ اها كمان انا بعرف شجره طولا عشرين متر وكمان مددو ليها اربعه امتار تانى اها شنو ليك ؟؟

  9. حاج أحمد السلاوى قال:

    عمنا أبكرونا ..
    كدى أول حاجة النسألك سؤال منكر ونكير ..السؤال البيسل الروح.. ( فاكر ؟ )إنت لا زم تحدد لينا موطنك الجغرافى عشان نعرف نتفاهم معاك كويس ..من جماعة أفليقا ولا من جماعة ولدنا ابو ابراهيم ؟ وشكلك كدا رطانى درجة أولى ..وتهاجم فى الشوايقة يمين وشمال ..

  10. ابكرون قال:

    انت يا ابواحمد خفته من ايميل سرج العجلة سااااااكت هههههههههههه
    بعدين يا عزت ما تهم بيئيا علي المزيرة دي اهلنا ديل بكونوا عاملين ليها انفاق موصلة مع الدفوفة والاحواض الغربية وبتصرف الباقي في النيل ……..
    قسما يا شباب منزل الوالد ظاهر في الصورة رقم 2

  11. aflaiga قال:

    عزت : واله انت راجل طيب خايف على المزيره ؟؟ هو البحر البيسقى المزيره ذاتو الله يعينو !! تعرف يا عزت زمان قدمت مشروع للولاية بيتكلم عن عمل مظلات فى المواقف العامه مظله تحتوى على مزيره و ( كيزان ) تعرف نفذو حتة الكيزان وخلو المزيره والمظله !!

  12. طارق أب أحمد قال:

    أبكرون بينى بينى ما بخوف
    بعدين نحنا ناس دركسونات و بساط ريح بس
    مالو ما فى زول سأل الجبل دا إتسلقتوا كيف

    أفلى (نديها ضهارا) ما المزيره بقت مزوره و المظله بقت شدره
    تانى داير شنو أهو مشروعك الحضارى إتنفذ بالكامل

  13. حاج أحمد السلاوى قال:

    هووووى يا أبكرونا ..
    الرابط الخاتيهو فوق دة مضروب وحلف براس أبوهو ما يفتح ..شوف واحد تانى ..
    وما جاوبت على سؤالى البسل الروح ..ولاّ عامل فيها رايح .. يا فردة ؟

  14. ابكرون قال:

    دلقو يا سلولو : الوطن والجذور والجدود واهلي العًمد يسموا (الموسنتشي ) نسبة للعمدة موسي (عمدة جزر موقه وجزيرة آرتمري ونارآرتي) …..ورطاني جزورا وابا (رغم معرفتي الغير متمكنة بغة اهلي ) هذه اللغة الفرعونية القديمة التي كتب بها التاريخ في كل احجار وآثار ممالك النوبة….وافتخر بانتمائي لهذا الارث والتاريخ….ولا علاقة لنا بالعرب ولا المتمسحين بهم الا من ناحية الوالدة الجعلية ان كان الجعليون عربا…….
    المولد امدرمان اهل الام المرحلة الإبتدائة بدلقو والوسطي بالاهلية امدرمان وبدلقو والثانوية بدنقلا……الشوايقه ديل حبايب واصدقاء خاصة بمرحلة دنقلا الثانويه …..
    خلاص كده يا نكير جاوبته علي الانترفيو ولا سقطته……..غايتو فقري فقاره

  15. محنك قال:

    كويس يا ابكرونا يعنى الوالد خالك ( جعلى ) والوالدة خالة شمباتى وناس جرا طيب نحن ما دام فى سودانا دا ملخبتين لدرجة بعيدة وفى قريتنا الصغيرة مناتسبين 60 قبيلة الحجه فى شنو … حقو نعمل لينا موقع بتاع الناس ( الخلاسيين ) يعنى ابوك من قبيلة وامك من قبيلة عشان نعرف انو قبايل السودان دى منسوجة نساجة .

    انا سمعت بجمال بلاد المحس وقلة السكان هناك ايضا لصعوبة المنطقة وصعوبة الوصول اليها سابقا والبمشى ما برجعش . لكن سمعنا بعجو المحس التقيل فدع العراجين يا حبيبنا ابكرون الاستثمار فى العجوة ما وصلكم لسة محتكرين البتاعه تقول بنقو …. نسمع بيه وبعضنا تلقاه يغنى وما ضاقوا فى حياتو كلها وانا منهم .

    بعد الشوارع وصلت والكهرباء لو وصلت ماشة عليكم ما هى تخيلات الفكى لمستقبل المحس وهل نقوم نهاجر شمالا ونتلبط نقول انا ود خال ابكرووون .

  16. aflaiga قال:

    محنك : يا متسامح يا راقى ..
    افليقا مشى ابعد من كده وخاض كل الاهوال والمحن والصعوبات واتزوج سمسمه الشايقيه بت اخت البشاوى وقريبة شمباتى وعزت ويقام البتاع بامبده !!
    اها عليك الله فى تضخية من اجل الوحده اكتر من كده ؟؟؟ اسى حمودى خلاسي شديد خلاسى الله يكتب خلاصى !!!
    الاستثمار فى عجوة المخس صعب جدا لات عجوة المحس كبقر الدينكا وريش دجاج الشلك وقع ليك ؟؟

  17. حاج أحمد السلاوى قال:

    ابكرونا ..
    طبعن سقطته وبرخصة كمان لأنك ما وريتنا العربى دا ( اقصد اللغة العربية ) إتعلمتو وين ..ما دام لسانك اصلاً معووج من جذورك البعيدة … الفصاحة عليك شنو ؟..
    غايتو فقرى فقارة !! ووراك وراك والزمن طويل ..
    وخليك مع الزمن !!

  18. ابكرون قال:

    سلولو : الاسلام دخل من (اندنا) واللغة العربية دي برضو دخلت لينا نحن اولا… ولو لا انها لغة القرآن لما تعلمنا ها شفته كيف….بلادنا جميلة الا الزمان جار عليها وكذلك اهلها تركوها وهاجروا لاهمال الحكومات المتعاقبة ….ولعلمك يا سلولو نسبة التعليم في المحس عالية جدا ….وفيهم رؤوس كبيرة وفهم عالي في جميع بقاع العالم تجد الاساطين من (إندنا) ….والمحسيات زي ما قال ليك افليقا سمحات ماكنتوش ونجف ونتحدي …وحلات الرطانه فيهن…تفصم هههههههه…..
    الصور ادناه جوية لدلقو وتظهر معالم المدينة والمنطقة الاثرية القديمة غرب النيل جنوب جبل سيسة وكذلك تظهر اطراف الجزيرة الاولي جزيرة آرتميري….ما عارف ليه ما نزلت عملتها مرتين يا استرايكر

  19. ابكرون قال:

    بالله شوفوا الجمال ده :

  20. ود الفتيحاب قال:

    أخونا أبكرون
    تحيات مليانة ومروية بى موية الساقية ، الجمال عندكم لكن الزول بالليل يتونس معاكم كيف ، الفنان غايتو مافضلا فيه غير صوابعه إماص من لحم الدنيا

  21. حاج أحمد السلاوى قال:

    ودالفتيحاب ..
    حمدن لله على السلامة ..الجماعة سافروا ..ولاّ شنو ؟
    لاكين سويتها ظااااااااااهرة …يا ودالفتيحاب ..
    غايتو ..جنس ..غايتو .. يا ناس عواطف ..ما بتدو الزول نفس ..
    كتمتوا نفسه ..

  22. ياسين شمباتى قال:

    الاحباب طارق وابكرون..سلامات..
    اها جينا عصرنا فراشكم تب..ارض المحس معروفة بتمرها وبلحها اللى سمعنا انو مرات بشيل مرتين فى السنة!! وما عارف صحة المقولة دى..
    قبل 5 سنوات مشينا قافلة صحية لى منصوركتى وكرمة وزرنا الدفوفة وبعض الجزر والبرقيق,,حقيقى ايام جميلة كانت مع انها كانت فى عز البرد..الشمال بلد المحنة..

    الوالد السلاوى..سلام..
    انت الزول دا مالك مزازيهو كدى!؟ كتمت نفسو الهوا ويييينو؟؟

  23. هدهد قال:

    السلام يا جنة عدن!!
    طبعا” جنة عدن المقصودة هنا هي منطقة المحس وما أدراك ما المحس، اجمل بلاد السودان وأكرم أهالي السودان هم المحس، وهم أبناء ملوك الزمان الذين تغني لهم الفنان الأسطورة وردي، ولعلمكم أجمعين فأن ملوك الشمال والذين جاء ذكرهم في التاريخ في بلاد كوش وتانهسو هم المحس فقبيلة المحس هي قبيلة الملوك وبقية قبائل الشمال يتم تصنيفهم كوزراء وطبقة الحكام وهم الدناقلة، والجنود والمزارعين هم الشوايقة وعامة الشعب وهم الحلفاويين وبقية القبائل المستوردة من خارج تلك المناطق،،،،
    قصيدة عبري للدكتور عبدالله الطيب رسخت في ذهني منذ الطفولة رغم أنني لا أنتمي لتلك المناطق الا ما كان منها في الزمان الأول، ونقل فؤادك حيث شئت من الهوي،،، فما الحب الا للحبيب الأول….
    أيام الهوي والشباب والأمل المنشود تسري وتبعث الشعر حيا، والتي تسوغ الحياة لحنا” شجيا”، ومن تلك القصيدة (أحن أليك يا عبري حنينا” ماج في صدري….)
    فعلا” أن لتلك الديار ديار الشمال وما حوته من ذكريات وبيوت الطين وأشجار النخيل والسيّال والطندب لذكريات صادقة ونبيلة،،،،،
    محنك ودخال ابكرون وأنا أتساءل عن سر المحبة الغامضة فيما بينهما، وبين شخوص آخرين لا أجد لهم ذكري الآن ، فأين هم الآن؟؟
    ولو لم يكن المحس ملوكا” في الشمال ماصاهرهم الجعليون، ولا مش كده يا محنك؟؟؟
    وأنا من زمان كل مرة أقول ياربي ابكرون ده مالو كده؟؟ هو أتاريك مطعم بدم جعلي!!! وبيقولوا في أمثالنا الجنا خال، ولا ما كده يا جماعة؟؟؟؟

  24. اواصر قال:

    السلام عليكم
    الزوار الكرام
    الأخ/هدد اري انك مفتون كثيراً بمناطق المحس برغم عدم انتمائك لها وهي شهادة كبيرة وحقيقة هم ملوك ارثُُ ُ وطباع
    هناك تصحيح صغير صاحب البيت الشعري اعلاه هو الشاعر جيلي عبد الرحمن وليس الدكتور عبدالله الطيب وجيلي هو اصله من منطقة السكوت وهي تبدأ من اواخر المحس الي حلفا تحديدا من قرية( صاي ) علي ضفاف النيل وهو شاعر كبير صاحب ثلاثية الغربة والمرض والوطن كتب العديد من القصائد الجميلة واصدار اول ديوان له مع الشاعر تاج السر الحسن بأسم (قصائد من السودان) وقصيدته التي حن فيها الي موطنه صاي وعبري التي ورد اسمها تعتبر حاضرة القرية والمدينة لما جاورها من قري :
    احن إليك يا عبرى
    حـنينا ماج فى صدرى
    وأذكر عهدك البسام
    عهد الظل.. فى عمرى!
    تطوف بخاطرى الذكرى
    من الأعماق..من غورى
    ****
    انا ظمآن يا عبرى
    إلى الأمواه والطير
    إلى كثبانك الغرقى
    هناك… بحافة النهر
    يذهَبـها سـنـا الشمس
    بأكوام من التبر
    ونخـل رامق النـظرات
    ملء السفح.. والجسر
    يطل على ربى النيل
    ويحمل أطيب الثمر
    غذاء.. دائم.. حلو
    لنا فى البرد..والحر
    ***
    أنـا ظـمآن يـا قـلـبى
    إلى صـاى … إلى عـبرى
    إلى عـنـزاتـى الصغرى
    إلى لـيـلاتى الـغـر
    أقـضـيها بـلا قـيد
    مـع الأطـفـال … والـبدر
    سـذاجـات … وأخـيلـة
    تـظـلـلها يـد الـطـهر
    حنـيـنى جـارف.. عـات
    بـرغم الـمسـلك الـوعـر
    تراثى !! كـيـف أنـساه ؟
    وقـد أودعـتـه عـبرى

  25. ابكرون قال:

    هدهد يا رسول سيدنا سليمان اراك تجوب ارض المحس فماذا رايت ؟هل التقيت بالملكة حتشبسوت وهل شاهدت عرشها؟ وماذا حملتك لاحفادها ؟ احكي لها عن الضيم الذي نعيشه…..وان جنة عدن صابها الوهن
    ونغريها السلام ونشكو لها الايام العدن……!
    السلام ياروح البدن
    يا غصين النقا يا لدن
    يا مهفهف يا أملدن
    ليك غصون البان قلدن
    أشكو ليك أياما عدن
    الأمان يا جنة عدن
    غنى قمرى الليل منشدن
    أسكر العشاق غير دن
    كل من يتعشق شدن
    قل منامة ليترك سدن
    ——————————-
    اواصر تسلمي فانتمائك لهذا الارث التاريخي يكفي

  26. هدهد قال:

    أحبتي وأصدقائي الأعزاء أواصر وأبكرون
    لقد هيجتم في نفسي الكري والأحاسيس النبيلة، وشكرا” أواصر غلي التصحيح وأيراد القصيدة كاملة والتي أعادتني لمربع الطفولة والأحلام أيام المدرسة الأميرية الوسطي، وللشاعر جيلي عبدالرحمن شاعر القصيدة الغنائية الجميلة والرائعة التي يتغني بها الفنان النوبي الأسطورة وردي مرحبا” يا شوق:
    يا شوق مالك ودعني لقد شربت دموعي أما سئمت شرابي؟؟؟
    وكأني به يخاطبني والوطن وأحلامه التي تبددت سرابا”،
    وشكرا” أخي الصديق أبكرون ود عمت محنك الجعلي المطعم بالشوايقة علي أيرادك قصيدة الحقيقة أو الحقيبة وكنت متوقعك أن تكملها يا حبيب فلك مني كل الشكر والتقدير يا ملك ملوك الشمال.

  27. محنك قال:

    قصيدة عبرى
    ذكرتنى ( بلادى يا سنا الفجر وينبوع الشذى العطرى )

    الغريبة فصاحة ابكرون دى ما ساكت مش برضو معظم الشعراء المجيدين من الشمال مثل محى الدين فارس فاظنهم اذا احبوا شيئا اتقنوه اكثر من اهله وقد احبوا لغة القرآن وبدان عندهم الخلاوى والمساجد وخريجى خلاويهم ( تلاميذ جد الركابية ) انتشروا ليعلموا الاخرين ووصل الشناقيط بعلمهم الى ام درمان وديار المسيرية

  28. هدهد قال:

    محنك يا أمير دار جعل من أين أتيت بهذا الرابط العجيب بين بلادي يا سنا الفجر وينبوع الشذي العطري وبين عبري التي احن اليها حنينا” ماج في صدري، وأهديك وصُحبك الكرام أبكرون وأواصر هذه القصيدة كاملة وهي للشاعر حسن التني وانشاد عبدالعزيز محمد داود والذين قلّ الزمان أن يجود بمثلهم:-
    بلادي يا سنا الفجر …… وينبوع الشذى العطر
    وملهمتي أغاريدي …… وآيات من الشعر
    سلام أنت ألحاني وحلمي في الهوى العذري
    رعتني أرضها طفلا…… فكيف أسومها غدري
    وأصبو لذاتها عمري …… وحق لخيرها شكري
    سلام أنت ألحاني وحلمي في الهوى العذري
    وعند الروضة الغنا …… أفياء من الشعر
    وكم أطيارها غنت …… تسابيحا مع الفجر
    سلام أنت ألحاني وحلمي في الهوى العذري
    ولي في أرضها ذخر …… فعز الذخر عن تبر
    وأجدادي بها قبروا …… وقد جاؤوا على قدري
    سلام أنت ألحاني وحلمي في الهوى العذري

  29. اجمل صور التى ارها من جامعة عبرى فى نلوة طبيعة لا مثيل لها ارجوة ان تسحب لى بعض الصور فأن مغترب ليس موجودا فى السودان ولكن ذبت دات مرة واعجبتنى خالص ولكم منى التحية والسلام عليكم

  30. محمد مظلوم قال:

    والله صور جميلة

  31. رفيق صلاح عبد الكريم قال:

    انا رفيق من السكوت جزيرة عبرى ارجو منكم انا ترسلوا لى صور من جزيرة نلوتى فانا مغترب فى ليبيا ولكم منى خالص الشكر محسسسسسسسسسسسسسسسسسسسسسسسسسسسكوة 0928923811

  32. طارق أب أحمد قال:

    رفيق صلاح عبد الكريم
    الأيميل لو سمحت

  33. رفيق صلاح عبد الكريم قال:

    طارق يا برنس مشكور رد اعتبارك دة ايميلى الياهوة mlk_algram@yahoo.com

  34. hafiz gorti قال:

    صور رائعة… حضاره وطبيعه وناس مافي اروع منهم…الله يسامح الزمن اللي خلانا نسيب ارضنا وارض اجدادنا الملوك ..محسي من بيلاروسيا.

  35. والله حاجاتك حلوة بس كنت اتمني انو الصور الصورتوا انت انو المفروض يكون في المناطق الاثارية او المواقع الاثارية مثل جبل سيسة وليس جبل دلقو وشكرا اتمني ليك التوفيق

  36. الله عليك يا أرض المحس أرض الملوك وأرض المحبة والآحنان ماتحياتي عمران عبدالله من ابناء المحس مقيم في المملكة العربية السعودية الرياض وشكرا

  37. esoo dalil قال:

    مشكورييييييين مع تحياتي ايسو محسكو

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s