الافتتاحيــــــة

Posted: الخميس,17 أبريل, 2008 by استرايكر in اخرى

الاخوة القراء :
فى البدء يسعدنا الترحيب بالجميع فى اول جريدة الكترونية سودانية باب العضوية فيها مفتوح للجميع مع امكانية ارسال اى مقال والنشر مباشرة بعد التسجيل- او التعليق على اى مقال اخر تم نشره لاحد الاعضاء ..

نبعت فكرة الجريدة وبعد الملاحظة لكتابات الاخوة الاعضاء بموقع الفاتح جبرا  ان لديهم ملكات فكرية وادبية عالية يستحقو من اجلها ان يكون لها مكان خاص بالكتابة  والنشر المباشر بدون التقييد بمقال معين – ومن ثم كانت الضربة على الرغم من وجود بعض المشككين والمعارضين للفكرة من ان الموقع سوف يشتت الناس بين المدونة والجريدة من ناحية ومن ناحية اخرى صعوبة انشائها – على العموم نقول بان الاعضاء لهم مطلق الخيار فى الكتابة هنا وارسال مقالاتهم وتعليقاتهم على كل شئ بدون تحفظ وهذا الموقع ليس باى حال بديل لموقع الفاتح جبرا وانما هو مكان يستطيع الاعضاء من خلاله الكتابة والنشر فى كل المجالات بدون الخوف من خروجهم من سياق المقال الاساسى – وبالنسبة للبقية – فها هو الموقع قد تم انشائه واصبح حقيقة واضحة .

 شروط الكتابه فى الجريده :
التعليق على موضع منشور فى الجريده يتم عبر الكتابه مباشرة وارسال التعليق .
لتنزيل موضوع جديد يجب التسجيل اولا والموافقه على شروط التسجيل .
يتم تصنيف الموضوعات حسب محتوى الموضوع طبقا للتصنيفات الموجوده بالموقع :
سياسيه – فنيه – رياضيه – اجتماعيه – دينيه – طبيه – علميه .
لمذيد من الاستفسارات وطلب الدعم حول الجريده او تفاصيل العضويه او اى استفسارات اخرى الرجاء الاتصال بالعنوان :

i.in.web@lycos.com

خاتمه : سوداننا – الجريده الالكترونيه الاولى من نوعها – جريدة المدونين بموقع   الفاتح جبرا – نتمنى ان يلبى الموقع طموحات القراء وتطلعاتهم …

 

 

 

 

Advertisements
تعليقات
  1. izattaha كتب:

    سلام

    قالوا عسكري مرور لمن زمان بيكتبوا الأسامي بتاعت المخالفين ضبط واحد و عاوز يحرر ليه مخالفة سألوا من اسمو قال ليه: السموئل… العسكري قال ليه أمشي

    طبعا انا قربت أمشي لحد ما أفليقا و استرايكر وروني خارطة الطريق لكم

    التهنئة بالموقع الجديد يالا جكة عشان يمتلئ بالمفيد

    عزت

  2. المعرفة كتب:

    السلام عليكم

    أحيي جريدتكم الغراء… وهي في بداياتها .. وأتمنى لها الانتشار والازدهار .. وأن تمتاز بالرصانة الأدبية والفكرية والإنسانية .. وتكون حاملة لرسالة سامية … تعز من أصحابها وشعبها

    وتكون لكم حجة … ترفع أعمالكم الصالحة بنواياكم الطيبة الخالصة لوجه الله الكريم

    أختكم… لست من السودان … وإنما … مسلمة عربية

    يسعدني أن أكون من المتابعين لابداعاتكم

    نية طيبة … ورب كريم … وبالله التوفيق

  3. الكناني كتب:

    التحية للقائمين علي هذا الامر
    نسأل الله ان يجعل هذه المدونة منارة للهدي، العلم ، الاصلاح والإخاء . نعلم اننا هنا سوف نكون علي نفس العهود والمواثيق غير المكتوبة في مدونة الاستاذ جبرا، ولكن هلا وضعناها مكتوبة هنا لمن يلحق بالركب القديم.
    ودمتم

  4. salih كتب:

    الافاضل
    سلام
    التحايا والتهاني بالموقع الجديد, ودعاؤنا بالتوفيق والسداد للجميع, واُؤيد اقتراح الفاضل الكناني بالالتزام بميثاق وعهد ادبي واخلاقي يوضع في الصفحة الريئسية للموقع…

  5. mustafazo كتب:

    الإخوه الأعزاء .. السلام عليكم ورحمه الله
    بدايه نهنئكم على صدور الجريده ونسأل الله لها الإستمرار والنجاح ولكن لي ملحوظه على الكلمه الإفتتاحيه حيث أننا في مجال الدعوه بالتي هي أحسن لعمل عام يتطلب ذلك أن نختار ألفاظنا وطريقه مخاطبتنا للآخر الذي بطبيعه الحال غير ملزم بالخضوع والتسليم بكل مانقول فمن غي اللائق أن نبدأ أول خطواتنا بعباره (بعض المشككين والمعارضين للفكرة )فوصف من يخالفك الرأي بالمشكك أمر غير مقبول كما أنا عباره( – وبالنسبة للبقية – فها هو الموقع قد تم انشائه واصبح حقيقة واضحة .)أرى أنها لم تكن عباره حكيمه وليس السياق سياق إنتصار أو هزيمه بل هو عمل عام وفضاء يسع الكل لو خلصت النوايا دون منى أو أذى .. أقترح أن يتم إعاده صياغه الكلمه الإفتتاحيه ولي ملاحظه أخرى لحجم الخط الذي يبدو صغيراً جداً .. وفقنا الله وأياكم إلى مايحب ويرضى .

  6. عباس ركس كتب:

    العزيز استرايكر : الف مبروك علينا الموقع الجديد , يعني زي ما بقولو (البيان بالعمل ) , من زمان شابكننا الجريدة الجريدة , اها ياهدي الجريدة ورونا عندكم شنو ؟ حاضر ومشكور استرايكر ونبدأ انشاء الله قريبا.

  7. زوووول كتب:

    الاخ سترايكر السلام عليكم ورحمة الله وبركاته
    فى البدء اهنئكم على بلوغ بنيانكم تمامه واشكرك اخى على حفظ الحق الادبى لاستاذنا الفاتح يوسف جبرا الذى تعلمنا الف باء تاء الكتابة والتعليق فى مدونته الرائعه ونتمنى ان نشاهد مقالات خاصه منه لهذا الموقع
    وقد كنا نحتاج لهذا الموقع منذ فترة طويله لاتاحة اكبرقدر من الحريه للكتابه والتعليق وعدم التعلق بالموضوع الرئيسى للكاتب .اذكر عندما كنت فى عنفوان النشاط كنت احيانا استحى عندما ارى تعليقاتى الكثيره على الموضوع الواحد وبعدها كنت اخجل لاخونا افليقا لكثرة مشاهده الرائعه التى عرضته لكثير من النقد واتهمه بعضهم بسرقة المدونه من صاحبها وقد كنت ارى ان نكتب كل ما يحلو لنا فمن وجده خيرا فاليقرأ وليعلق ما شاء ومن وجد غير ذلك فاليضرب طناش
    كسره : ارجو عدم نشر مقالات الاستاذ جبرا المنشوره فى مدونته حتى يظل ارتباط الاعضاء بها كما ارجو تحسين الاداء بهذا الموقع حتى نتمكن من جذب اعضاء جدد ومن جميع دول العالم والمحافظه على القدامى اهل الجلد والراس . لا اريد الاطاله ولكم خالص شكرى وعظيم مودتى والسلام

  8. izattaha كتب:

    الأعزاء ناس الأدمن
    سلام

    و الله الدفولت فونت دا حجيب لينا الموية البيضاء و الطشاش ,, رفقا بأعمامكم احنا الواحد عندو ثلاث نضارت واحدة للشوف البعيد و واحدة للقراية و الثالتة نفتش بيها للاتنين

    فيما عدا ذلك عيني عليكم باردة

    سؤال: أو لا يمكن أن تحتوي الصفحة الواحدة علي عشرة مقالات مثلا حسب المقال أن يحتوى علي العنوان و سطر واحد زي مانشيت شاوتنق عشان يدى هنت للموضوع و الباقي لنك لمزيد من القراءة
    تحياتي

  9. aflaiga كتب:

    الافاضل المنورين بى غادى وجاى :
    مقترحاتكم اوامر وجيتكم بالدنيا – بعض الحده فى الافتتاحيه لا تعنى شخصنة للامور بقدر ما احقاق للحق وتوضيح لان العزم يثمر دوما جيد الثمر وانتم من سيزرع البذرة هنا كما زرعتموها هناك – يكفينا فخرا ان الموقع نبع من ينبوع الوالد الاكرم ابو الكل جبرا – وان الاعضاء هم نفس اخوتنا واباءنا بى غادى – نتمنى ان نجتهد فى اثراء الموقع بالجديد والتعليق المفيد – قصدنا من ملئ التصنيفات بمواضيع موجوده ان يتبين الاعضاء نوع التصنيف ومن ثم الكتابه تحته وهى موضوعات مؤقته ستم سحبها بعد انزال موضوعات للاعضاء – يعنى نظام تسخينه وشحذ همم – ايدنا فى ايكم نعمر الموقع بمساهماتكم .

  10. خالد مدني كتب:

    السادة الكرام ،،، السلام عليكم ومرحب بيكم وكتر خيركم وربنا يقدرنا ونكون اهل للمسئولية ، يللا كل واحد منكم يشيل من الحاجات الحلوة دي البناسبو .
    بداية نشكر الاخوة الذين قامو بهذا العمل ونتمنى دوام التطور ونرجو منهم وضع التعليقات اعلاه نصب اعينهم خاصة التي تنتقد بعض الاشياء واوفق ود الزبير في بعض ما ذهب اليه لكن في النهاية اكيد اكيد حسن النية متوفر لدي الجميع وده ديدن اهل بيت جبرا… ولازم نكون زي الاولاد الاتربو كويس محل ما يمشو بكونو حافظين القيم الاتربو عليها ، ويلا نشد الهمة .

  11. سماسم كتب:

    والله فكرة الجريدة فكرة جميلة جداً ونتمنى لها الإستمرار والتطور فإلى الأمام

  12. Stricker كتب:

    التحية لكل اخواننا المدونجية – ومبروك لينا الجريدة والكل مشارك بتعليقات او مقالات – ولكل من يسال او يستفسر من الممكن الاتصال على رقم الهاتف : 0912140358

  13. mustafazo كتب:

    إنت يا سترايكر ياعريس خاتي تلفونك في السهله كده مالك بعدين شنو الصوره البتشبه المسيح مصلوب الفي البروفايل بتاعك لأنو أعمامك زي ماقال عزت المرطب بقوا يشوفوا طشاش طشاش فرجاء تصليح حجم الخط واللون إذا أمكن ومعاهم إتنين فول بالجبنه

  14. Stricker كتب:

    ود الزبير – وينك يا راجل ومستنين المقالات التحليلة للاقتصاد والرياضة التى عودتنا عليها
    بالنسبة للصورة فهى صورة الانسان الافتراضى التى تخيلها ليوناردو دافنتشى وبها تخيل الانسان كاعظم مايكون .
    http://www.bl.uk/learning/images/bodies/large7675.html

  15. ودالزبير كتب:

    يامان
    رسلت لي موضوع مصنف سياسي وماشايفه نزل يكون مشي وين ياربي ؟

  16. aflaiga كتب:

    ولدنا : لو اضفت تصنيف جديد – رياضيه – يكون ميه ميه

  17. izattaha كتب:

    و كمان لو رقدت لينا الكلام يمين يكون تمام التمام
    يبدو أن الدفولت في التعليق و التدوينات English
    و كبرت الخط شوية تبقى و لا في الأحلام

    بقاريتش

  18. الأخوة في الأدمن
    سلام

    أرجو وضع طريقة وسم الموضوع ليظهر جزءا منه و البقية (لمزيد من القراءة) كلنك

    يبدو انني قد صفيتها و حاولت وسم الموضوع لكن ظهر كله فاضررت لحزفة لمان نتعلم الطريقة
    تحياتي

  19. نيام نيام كتب:

    الأعزاء استرايكر افليقا ودالزبير
    تحياتي لكم جميعا و اهنئكم علي الجهد المقدر مزيدا من الابداع و الاستمرارية
    لكم التحية و التجلة هيا يا شباب انتو بالانجليزي و العربي ما هينين!!!

  20. بشار أحمد بشار ( إبن برد ) كتب:

    التحية والتهنئة لجميع من قاموا بهذا المجهود العظيم المقدر وأتمنى للجميع التوفيق وسوف يكون هذا الموقع قبلة الجميع بإذنه تعالى وربنا يقدرنا على المشاركة معاكم عشان نحن نفسنا قصير في الكتابة ودمتم

  21. الأحباء الأعزاء
    كم سعدت بوجود هذا الموقع الذى يضمكم جميعا تتبادلون المواضيع والأفكار وتوطدون من صلاتكم بعضكم البعض نواة لسودان يضم الجميع فى حب وأمن وأمان … لولا وعكتى الصحية الأخيرة لكنت أول المهنئين … وفقكم الله وسوف تجدوننى بإذن الله هنا بينكم بين الفينة والأخرى ما ساعدت الأحوال على ذلك وحبى وتقديرى لكم جميعا

  22. خالد مدني كتب:

    الاخ العزيز سترايكر وادارة الجريدة … صباحكم خير
    نطالع في كل مرة عناصر جديدة تضيف للجريدة القا على الق فسيروا ونحن معكم الحجل بالرجل … بس وآه من بس ما حترتاحو مننا خاصة وانكم قلتو لينا اتمنو وادينا بنتمنى … بس دايرين مع التعليقات يظهر وقت الارسال مع التاريخ دلوقت بيظهر التاريخ فقط ، والتوقيت مهم لينا عشان تقدر تعرف الزول المعلق ده هل بكون لسه في موقع التعليق وللا مرق عشان تقدر توجه طائرات القصف بدقة … لانو ممكن تقصف الموقع تلقى نفسك شايت في الهوا … موسى الزومة بس .

  23. الكناني كتب:

    موسي الزومة ولا هيثم طمبل ( مرضنا مرض ياخ) لكن اقتراح وجيه مع حاجة تانية لو في امكانية انو الزوووووول يعمل Quote عشان يحدد الصاروخ

  24. خالد مدني كتب:

    استرايكر والصحبة الكرام …
    حاجه تانية كمان وين الحته بتاعت التسجيل يعني ارسل مقال اصيل كيف لاني لقيت نفسي محصور في الحتة بتاعت التعليق بس .. كان في لنك بتاع تسجيل وهسه مافي التسجيل قفل وللا شنو .. براحه علينا نحن ناس يادوبك بنعرف نتعامل مع النت وكده .. افتونا ودلونا وللا بعمل ليكم زي افليقا وانزل ليكم مقالاتي محل ما الله يسهل .. او احرد ليكم حردة الجقر : زعل من امو رقد في السهلة جات الحدية ختفتو .

  25. aflaiga كتب:

    خالد مدنى : شايف اى زول تغلبو حاجه يقول ولا اسوى زى افليقا !! بعد شويه تعملوا افليقا مقياس للخرمجه يعنى الواحد لمن يخرمج يقولو ليهو دى 7 درجات بمقياس افليقا !!
    الادمن : خالد مدنى شال حالنا شوف ليهو فرقه سريع يكتب قبال ما يقول انا ما داير معاكم .

  26. خالد مدني كتب:

    يا افليقا ياريت لو الواحد عندو المقدرة انو يخرمج زي خرمجتك .. دي اكتر خرمجة مفيده ومنظمة الزووووووول لاقاها في حياتو … وانا عارف انو الناس جقلبت من المساسقة بين البيتين لانك في الفترة الاخيرة قللت من ظهورك في الحوش الكبير وده اقوي دليل علي شوق الناس لملاقاتك .. يا ولد ناولني كم لوح تلج زياده نكسرهم لافليقا ده قبل ما يخلى حلايب ويجيني جاي .

  27. aflaiga كتب:

    خالد مدنى الواحد يصلى بى جاى ويسبح بى غادى ويصلى النفل بى جاى يجى يلقاكم شربيتو الشاى بى هناك القصه شنو يا جماعه ؟ يا ولدنا ستريكر شوف لينا طريقه الواحد قبل ما يشووت يشوف الحيطه فيها منو والحارس واقف وين عشان نطلع من مصيدة التسلل اسى انا بفتش بى غادى عن التلج المكسر والدنيا حر اتارى التلج مكسر بى جاى – لله درك خالد مدنى تعرف انا زمان اول مره قلت لود الزبير والله خالد مدنى ده فى الحلقه الاخيره حيطلع اصلا هو جبرا ذاتو زهج من الادمنستريتر وقال ينزل للقواعد الجماهيريه لكن الادمن ظاهر مش لواتدسى ولو ما بقيت ادمن حقو تبقى ادمن !! اها شفت التلج الصاح بيكسروهو كيف مش زى تلجكم دا انحنا زمان كان عندنا تلاجه فى المحطه كشك صغيرونى وانا من بدرى شايل بدال العجله وبكسر فى التلج انت قصة بدال العجله دى شنو مش مفروض التلج ده يتكسر بى صوره اكثر حضارية بعدين العجله من الشيطان والتلج ده كسيرو ما داير عجله ولا شنو ؟ ومش التلج بس اى كسير داير رواقه !!!

  28. aflaiga كتب:

    تعرفوا يا شباب الموقعين ديل بقوا زى لعبة واحد اتنين تلته الزمان بتاعة السفنجات البتتكوم ورا الزول وواحد يغمد ويعاين للحيطه والناس تتلبد لحدى ما تصل للسفنجات – اها الواحد يغمض ويكتب واحد اتنين تلته يفتح يلقى الناس فتحت موضوع بى غادى – تعرف ذكرتونى عاده سيئه زمان فى المواصلات زمن الزحمه والتشميع الواحد بينسى ينزل فى محطتو لانو الزحمه بتكون شديده وفى نفس الوقت بتكون بتاوق يجى بص فاضى !!! والناس تنزل مش كده اوعو تكونوا مشيتو بعيد ؟

  29. Stricker كتب:

    خال مدنى عشان تخش وتدى المقال دق على اللنك التالى
    https://sudanona.wordpress.com/wp-admin
    ومن هناك انتا عارف الباقى ولو داير مساعدة كنتك لينا وح نورييك

  30. يا سلام يا استرايكر كل يوم تدي المدونة نقلة فنية جديدة
    التحية لك

  31. معجبه******** كتب:

    يهنى الكل بالجريده الالكترونيه وبتمنى ان تبلغ كل السودانيين فى كافه ارجاء العالم بإذن الله وموفقين

  32. محنك كتب:

    التهنئة للاخوة المدونون
    ولودنا استرايكر

    نحن سنكتفى بالتعليق لانه المواضيع من اصناف ممتازة ونحن صنفنا لا يرتقى ، فى الكتابة مع كثرة المشاغل . وقديما قالوا لينا البحوم فى حوش جامعة الخرطوم 4 سنة ببقى زول كارب حتى لو ما دخل المدرج

    يعنى الموقع
    جميلة ومستحيلة بس ناقص يوم عرسها ( تزيينها وتحليتها ولو ما خايفين على العزاب كنا قلنا حاجات تانى ) يا ودالزبير

  33. […] الثلاثاء,24 مارس, 2009 بواسطة ودالزبير يصادف يوم 17 إبريل القادم العيد الأول لإنطلاق هذه المدونه وبالحساب نجد إن الوقت مبكر جداً للإعداد للإحتفلات لكن بحساب مهلتنا نحن معشر السودانيين رأيت أن نبدأ منذ اليوم في الإعداد لهذا الإحتفال الجامع ولو قدر لي أن أقترح تأجيل كل مشاريع الرحلات المزمع قيامها هذه الأيام لذلك التاريخ لكان أفضل وأبرك لما فيه من توفير الطاقات والجهود ودعونا نسترجع ذكريات تلك الأيام أيام التأسيس الأولى بالرجوع للكلمه الأفتتاحيه وتعليقات الأعضاء عليها وتجدون ذلك على هذا الرابط : https://sudanona.wordpress.com/2008/04/17/%d8%a7%d9%84%d8%a7%d9%81%d8%aa%d8%aa%d8%a7%d8%ad%d9%8a%d9%8… […]

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s