طبق اليوم………..

Posted: الثلاثاء,26 أغسطس, 2008 by ياسين شمباتى in طبية

نشتهر نحن السودانيين باسوأ العادات الغذائية على وجه الارض_باستثناء الشرق اّسيويين البيطبخوا البهارات والضفادع والجراد والكلاب والحشرات,,ربنا يسامحك يا ابكرون_ حيث لا نعرف معنى انتظام الوجبات ولا تنوعها من حيث المحتوى_ والتنويع دا حسب المنتوج المحلى_يعنى الافطار زمنو من (10-1)ظهرا,,والغداء من (3-6) مساءا,, والعشاء من الساعة 10 الى ما شاء الله من امتداد زمنى..ف اذا حسبنا الفرق بين الفطور والغداء نلقاهو من (5-6) ساعات,,والفرق بين الغداء والعشاء لا يتجاوز ال 6 ساعات..اما ما بين العشاء وافطار اليوم التالى ف بينهما ما صنع الحداد,,ما اقل من 14 ساعة!!!!لذا اقترح محاولة تعديل الجدول _اذا امكن الى الازمان التالية :-

افطار 6 صباحا_بعد الصلاة طوالى_ غداء الساعة 2 ظهرا..عشاء الساعة 8 مساءا,,كدة بنكون ظبطنا الفروقات وخليناها معقولة,,كمان الزول بكون متحرك شوية بعد العشاء وما بنوم طوالى و يصحى نص الليل يكورك من النفاخ و عسر الهضم!!!!!

نجى لى مكونات الوجبة البتعمل قلاقل,,ظهر فى الاّونة الاخيرة العدبد من المطاعم و الكافتيريات البتديك ساندويتش سريع وما بياخد من زمنك حاجة,,بس الساندويتش دا بكون المادة الغذائية الفيهو (بيرقر – طعمية- شاورما -بيض – كبدة…الخ)معمولة بى زيت ليهو تلاتة يوم فى الصاج,,مما يزيد نسبة الجذور الحرة free radicals وهى المادة المسببة للسرطان!!!كمان ما معروف درجة تخزين اللحوم واماكن الحفظ وطرق المناولة الداخلية وسط العمال..عشان كدة اعملوا حسابكم من اكل برة_ بس البوش ما عليهو غبار!!_

نجى لى اكل البيوت البيحتوى على (كشنة البصل -قدحة التوم- وش الملاح) وما شابه من مواد ضارة بالجهاز الهضمى(معدة- اثنى عشر)..ف التوابل من كسبرة و شطة(خضراء ام حمراء)مع الثوم تسبب التهابات حادة بالمعدة والمصران وتؤهب لحدوث القرحة وتهيج متلازمة الامعاء القلقة_المصران العصبى irritable bowel syndrome_ والعجب لو اديناها مياه غازية soft drinks(بيبسى – كولا – ستيم..الخ) نكون تمينا الناقصة..وما يفوت علينا انو ازدياد نسبة الحامض المعدى بسبب المواد المذكورة قد يؤدى الى تهييج الربو الشعبى او الازمة!! ايييييييي عديل كدة,, لانو الحامض لما يزيد بيطلع لى فوق على المرئ متنفذا للخارج مسببا نوبة حادة من السعال تهيج الازمة,, وهو ما بعرف بالارتجاع المرئيى المعدى gastro osoephageal reflux..كما ان المواد المتخمرة(الكسرة والعصيدة الخميرة) ايضا تضر بالجهاز الهضمى,,اضافة للقهوة والشاى الاحمر بكثرة او شربهما على معدة خالية من الطعام..

بالنسبة لوجبات السريعة (الساندويتشات) فقد اثبتت دراسة اجراها احد اطباء الاسنان انها من اكثر المسببات لامراض تسوس الاسنان وامراض اللثة,,لما تحويه من مواد حافظة و محدقة..

قال صلى الله عليه وسلم:( ما ملأ ابن اّدم وعاءا شرا من بطنه)او كما قال,,ولقد جاء فى الاثر ان كل المرض ابتلاء من الله الا داء البطن فهو من صاحبه.. وجاء فى نبذنا الدارجى ان فلانا بطينى,,اى ان كل ما يهمه هو ملء كرشه بما تيسر _رمرام_عشان كدة اعملوا حسابكم على بطنكم و ما نشوفوا شر..وبالهنا و الشفا..

                                                                                 ونلتقى………..

Advertisements
تعليقات
  1. الغبشة كتب:

    سلام د.ياسين
    مشكور على النصائح الغالية دى،والروشتة الالكترونيةدى،بس يمكن اكون طماعة شوية،ممكن تتكلم لى شوية عن المصران العصبى،وفى شنو من الادوية غير الكميائية ممكن يعالجه؟

  2. يا سلام يا دكتور دا الكلام
    يكون قدوره زيتكم شويه للترويج له

    و الله فعلا خاصة في رمضان الناس يشيلوا يدقو في اللحمه و يقلوظو في الكفته و يرمو في الطعمية …كلو يرجع الا صحن العصيده و الفول.. فهم خفاف على المعدة و على الجيب كمان

  3. د.ياسين شمباتى كتب:

    العم ود الخلا..النافع فى كتير,,بس ما تتابعو النفس الامارة بالسوء..

    الغبشة..دايرة تزوغى من الكشف ولا شنو؟؟ اهم حاجة فى علاج المصران العصبى: النظام الغذائى الصارم,,ولو خربتيهو يوم بيعذبك ايام_ كمان الهدوء وتجنب الانفعال,,يعنى تكونى сool..وممكن تشربى شاى نعناع او يانسون بانتظام للمساعدة فى الهضم والتخلص من الغازات..

  4. د.ياسين شمباتى كتب:

    د.عزت..الشهادة لله قدورة ما قصر وانحنا ما ……ما بفصح..

    رمضان دا جاييهو براااااهو..

  5. زووووووول كتب:

    شمباتىسلاام
    نحن قوم لا ناكل حتى نجوع واذا اكلنا لا نشبع )
    وصفه سحريه لتنظيم الغذاء لكنها صعبة التنفيذ فمثلا الســ 2 ـــاعه ظهرا نحن بنكون فى المكتب وضاربين فسيخ ولا تركين وشاربين حفاظتين مويه يعنى نتغدا كييييف . بعدين لما ترجع البيت الساعه اربعه وتلقا ضيوف قاعدين فى البيت لازم تجاملهم وتاكل معاهم حتى لو كنت متغدى قبل نص ساعه . دى يحلوها كيف يا دكتور
    الغبشه سلااام
    مرحبا بك من جديد ونسال الله تعالى ان تنالى شهادة ماجستير لا فيها طق ولا فيها شق . عودا حميدا والى لقااااااءءءء

  6. د.ياسين شمباتى كتب:

    زوووووول..المجاملات دى ياها البتغطس حجر الزول,,تلقى واحد عندو سكرى و يحلفوا عليهو الا يشرب الحاجة الباردة وما بتسوى ليهو شئ!!!!! _ولا ما كدة يا افليقا ؟؟_

    الغبشة..الايقونة دى بتاعت الناس العندهم مصران عصبى!!!

  7. ياسين شمباتى كتب:

    سلام يا حبان..رفعنا البوستات دى عشان حبيبنا رمضان وكدة..

  8. نيام كتب:

    والله محمد احمد المزمزوني دا حكيم خلاص عشان كده بطل اكل خالص…

  9. ياسين شمباتى كتب:

    الحبيب نيام..اها الناس (البتاكل) دى ح يحصل ليها شنو؟؟ انا برة منهم…

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s