جاءني الآتي من نيام . . نيام

Posted: الثلاثاء,4 نوفمبر, 2008 by alisankal in ادبية

آل حسكنيت
خلاس حد البلد و قـّـــف
علي سيفا سنين بنزف
رويحت الوالد المسكين ومما قام مستوظف
جنس نوعكم حرام ما شاف و لا بعرف
كفاك يا عنكبوت بس فوت
خلاس آل حسكنيت التوووت
وخلينا النواجه الموت
حباب الموت وكت مكتوب علي الشاهد
بدل عايشين و نشاهد
موت اولادنا متقاصد
و نتمني علي عزريل
يزور في الليل
حليلو شليل
شليلنا الطول الواسوق
و نحن نسوق
حبال صبرا طويل بالحيل
لا رحنا مع الراحو و لا فجرا نشوفو عديل
سعلتك بالذي خلقك تعجل بالرحيل آفلان
ضرعك جاف و دربك حاف
وكلو نشاف
خلاس آ فلان
بدل ما نسفر الحبان
شيل الشايلو و اتوكل
سفر البن دق و حرق علي وقـــــّايتو يتعدّل
خلاس ارحل
رحيلك حلحل المشكل
وكان خايف علينا و هام
وحاتك نطلب استرحام
طصاريح السفر قوام
و قاطرة خسوسي برمنقهام
فيها منامة بالسنتور
ونضبح تور
عشان يوم رحيلك هام
وماترجع
ولو ناس البلد رجعوا
ماترجع
ضوق الغربة و اتوجع
شوية النفهم الحاصل مع الامم القبيل فزعو
ونشبع نوم مع النايمين
و نشبع قوم مع القايمين
ونشبع في العديل و الزين
من يوم مجيك الشوم
ولا فد يوم
ضقنا النوم
ولا راحة
سويتا حياتنا طوطاحة
بس نهجس تقول قومو
و ان جعنا تقول صومو
نان لا متين
شكيتك للذي خلقك
ولا عافين
ودار شيتنا
وقفل بيتنا
وبلد بطولو شحادين
وحات الحق
تقوم تلحق
قطر باكر
وشيل الشايلو بس غادر
يا حسكه ..ابواللصيق
فوت هسه ..تفوت للضيق
ولا بنأسف علي فوتك ..ولا بننسا
شوية رحمة ياعليق
تفك الضيق
سعلت المولي ياانسان تنوم ما تفيق
تضيق ما تفيق
تفج للضيق
فشان الوِرْدي ما تنقاس
فشان ما بيلمسها القيّاس
فشان ما تردلك انفاس
فشان الناس
خلاص حد البلد و قـّـــف
علي سيفا سنين بنزف
رويحت الوالد المسكين ومما قام مستوظف
جنس يومكم حرام ما شاف و لا بعرف 
  
  

 

Advertisements
تعليقات
  1. ودالزبير كتب:

    بدون تعليق
    إنتباه بدون صفا إلى ابد الدهر؟؟!!

  2. Stricker كتب:

    عمنا سنكل
    حمد لله على سلامة الوصول والانضمام الى قائمة الكتاب الرائعين

  3. aflaiga كتب:

    قبل ان تمتد يداى الى هذه القصيدة الناهده احيى فى البدء الناقل والكاتب :
    سمح ات وسمح مرسالك الجاب الكلام الزين
    سمح قولك وسمح النقلو من وين وين ولى وين وين !!
    اها بندا نهبش القصيده : طبعا اخوكم ذواق شعر وليحيييظ للكلام النى والسمح :
    * آل سنكل خلاص سمح الكلام وقّف
    على قول عم نيام الزين

    رويحت الوالد المسكين ومما قام مستوظف
    جنس نوعكم حرام ما شاف و لا بعرف
    * وكيف يعرف متل ديل كان بشوفم وين
    كما هملت الدنيا وبقت اثرا بعد داك عين ..
    كفاك يا عنكبوت بس فوت
    * يفوت بى وين وغار سوداننا رضى بالنسجه من يوم عيك
    يفوت بى وين حمام الجن رقد بيض تقول بيض ديك ..

    وجاييكم تانى يا حلوين ..

  4. عباس ركس كتب:

    * واحد – بعد جلسة استماع لمصطفى سيد أحمد – كان يصيح :
    وانا عندي ليك كان الفرح رغم ( احتمالي اسافر ) !!
    وعندما سألته بأن يشرح لي هذا البيت , رد علي :
    دا كلام تقيل انت ما قدرو !!!!
    شاعرنا الخطير : نيام , بعد السلام : دا كلام تقيل نحن ما قدرو

  5. عباس ركس كتب:

    المتواجدون حاليا 2
    التاني دا وينو ؟

  6. يكون أنا يا ركس………….لكن المتواجدون صفر الآن …..أحلى كلام لأجدع ناس

    عموما عشمان من الجدعان شرح سغنتوت للمثل “سفر البن دق و حرق”

    و دمتم

  7. البشاوى كتب:

    نيام الصاحى والصاح
    السمار الكرام
    كما قال العزيز ود الزبير انتباه

    واقول سلام تعظيم سلام
    الزول السمح حلو الكلام
    نور وشوشنا على الضلام
    بى ضى حديثك يانيام
    صمت الدجل والانهزام
    سفر الجفا بلاسلام
    ديل الوجع
    شاربين حرام من دمنا
    ديل الوجع
    ماكلين حرام من لحمنا
    ديل الوجع
    شايلين اسانا وحزننا
    ديل الوجع
    شايلين اذانا وظلمنا
    ديل من وين ؟؟؟؟؟؟

  8. عبدوش كتب:

    العم سنكل والممتع نيام لكم التحية ولكل ناس المدونة ….
    طبعا درجة التذوق للشعر مش ولا بد يعني ما بتلحق ناس افليقا والفطاحلة اصحاب الشي ذاتها لكن بنقلد .. وابيات مميزة في في هذه الدرة الفريدة
    ننقلها كما وردت في القصيدة ….
    وحقيقة مافي تعليق على القصيدة الا بالقصيده نفسها … لكم الود
    …………………………..
    و نحن نسوق
    حبال صبرا طويل بالحيل
    لا رحنا مع الراحو و لا فجرا نشوفو عديل
    سعلتك بالذي خلقك تعجل بالرحيل آفلان
    ضرعك جاف و دربك حاف
    وكلو نشاف
    خلاس آ فلان
    بدل ما نسفر الحبان
    شيل الشايلو و اتوكل

  9. علي سنكل كتب:

    وخلينا النواجه الموت
    حباب الموت وكت مكتوب علي الشاهد
    بدل عايشين و نشاهد
    موت اولادنا متقاصد
    و نتمني علي عزريل
    يزور في الليل

    بالله الذي خلق الكون هذا هو الجزء من القصيدة الذي دفعني لنشرها هنا دون إذن صاحبها ، حيث هنالك من يفهمها ويستمتع بها.

  10. خالد مدني كتب:

    اعمامنا سنكل ونيام … اقول معاكم :
    فوت وارحمنا يا مخلوق
    فوت ما الجوع صبح مطلوق
    ياكل في وليداتنا
    وياكل في بنياتنا
    كبيداتنا
    وياكل الكنا داخرنو
    وصبح ما بحوق .

  11. حاج أحمد السلاوى كتب:

    السادة آل سنكل ..سنكلونى
    وكل الحاشية الجبرية
    لكم منى الف تحية..
    وياها الفيكم المحرية..
    أسعدتونا وأبهجتونا
    بقصائدكم الحلوة وفنجرية..
    بحروفه وكلماتكم السحرية..

    أنا شايف بعد شوية كل المدونيين حتكون تعليقاتهم باللغة الشعرية الفصحى .. لله درك يا اخا العرب نيام .. نيام ونطالبك بتوثيق كل هذه الأشعار عند مستشار التوثيق الدولى الأخ ابو عصمت لكى تحفظ كافة حقوقك الأدبية والمعنوية.. وشكراً للأخ عباس ( على سنكل ) .
    البشاوى .. شوية شوية وتظهر المواهب المخفية.. ونشوف المجادعة الشعرية .. إنتو عائلة.. إنتو قبيلة ذات توجهات حضارية … أقصد شعرية .. ودمتم .

  12. aflaiga كتب:

    آل سنكل جيتكم تانى :
    فى قراءه تحليليه لما انتجه شيطان نيام :
    آل حسكنيت
    * والمعنى هنا يقفز ليصرح جهارا نهارا بان الخراب الذى اتانا من هؤلاء لهو حال السجم والرماد ….
    خلاس حد البلد و قـّـــف
    علي سيفا سنين بنزف
    * والاشاره هنا تمتطى البلاغه لتشبه حال البلد كمن يقف على حد سيف لا سبيل للتراجع من مضاء نصله فى كبد البلد المجروح …
    رويحت الوالد المسكين ومما قام مستوظف
    جنس نوعكم حرام ما شاف و لا بعرف
    * وهنا يتفوق الشاعر على نفسه ليبين ان شعبنا المسكين الذى لم يعرف دروب غسيل الاموال ولا الشركات الوهميه وافنى زهرة شبابه فى خدمة الوطن تجردا لهو فى حالة اندهاش واستنكار وصدمه لما يشاهده من هذه الوجوه النيرة زيفا وبهتنانا تلك الوجوه التى لم تمر على تاريخ احلام شعبنا ولو فى المنام …
    وجاييكم …

  13. aflaiga كتب:

    واستعير بعض التحليل شعرا :
    كاتب نيام يا شعب حى على القيام رصو الصفوف
    سدو الفرج والبنسرق بيناتنا راجياهو الكفوف
    ما تسجدو قبل الركوع الانهزام قبليهو خوف
    سنكل نقل لمن نقل انو البطل الما حصل بطّل بطوله وانشغل
    بى بطله زايفه جمال كريم دينا جديد ما ليهو رب غير الكضب
    يا زول اقيف تاريهو يوم يكتب نيام كل الحصل
    سنكل بكون راجى البطل راجى الامل
    ياربى يمكن ينتصر او احتمال او يحتمل
    يا عمنا ويا عمنا انا ما اظن
    والظن اثم لو مره يوم قول بس حصل
    وينو البطل ؟؟؟؟

  14. علي سنكل كتب:

    الله عليكم يا أفليقا وبشاوي وخالد يا مواهب متعدده.

    إنت يا السلاوي ما تشرح للبقاريتش معنى ” سفر البن دق وحرق ” منو غيرك بكون حاضر الكلام ده يا شاب؟

  15. نيام نيام كتب:

    اول شئ يا افليقا انت خطير خطير و قريت مع نيام في خلوة الشيخ ابراهيم عديل كده وبالتالي بتكون قعدت علي نفس البروش و شربت من ذات الازيار و كتبت علي نفس الالواح..اما خالد مدني كل ما اقول الزوول دا كبير القاها ما بتحوق و القاه اكبر الظاهر “اندو تجارب ” كافية من مدرسة الغربة الجبرية (ليس آل جبرا و لكن آل مجبور ) اما وليدنا البشاوي فدا طبعا فردتي (ما دفعتي ) يعني مشي علي نفس الدرب ..
    انت يا د. ترطيبة كنت احسب انك “خلي بالك من احسبو بس اوع تحسّب” ستقوم بدق البن عمليا و ارساله لمن يرجو ذلك او لست من اهل السقائف الاماجد؟..اما اذا استعصي عليك الامر فابوالشباب (سلولو السلمونتي ) ادري بالمقالي و الشرقرق و الوقاية و اللداية..اشرح ما تحته خط..
    اما العزيز ابو الزبير فقد سمعها بالتلفون بناء علي طلبه وهو في صفاه منتبه ..الاحبة استرايكر و عبدوش انتم ابناء جيل الصبر و العطاء ويا ابدوش انتو اللي بنيتو الخزان في كمالك .. ورفعت البوش بخيالك .. كيف لا اعشق جمالك..يا استرايكر مزيد من الابداع و ارمي قدام..

  16. نيام نيام كتب:

    ابكرون:
    اهلا بك في بلاد السند..اجازة سعيدة

  17. عبدوش كتب:

    العم نيام(Uncle Neiam ) يا ممتع:
    او بين قوسين (UN)المدونة
    انت ذى زهر الخميلة تزدهر فى روح جميلة
    و عاليه اخلاقك نبيلة و يخجل البدرين هلالك

  18. aflaiga كتب:

    نيام سنكل :
    بباب الفرعون الامازونى ، وقف نيام واصطحب اخاه سنكل ليفقه فرعون قوله ، فالقى سحرة الفرعون عصيهم فاذا هى حيات تسعى متخمة بدم الشعب فارتجف نيام وجاء صوت الشعب مطمئنا بان الق شعر وعيك تلقف عصيهم المتخمه بدمنا فالقى نيام عصاه شعرا فانسابت الكلمات تلقف كل غث وزبد ، وارتجف الفرعون الامازونى ، لا لقوة فى جسد نيام او لاستنصاره باخيه سنكل بل لان من يخرج هذا القول لهو عالم بان الشعب يوما اذا ارد الحياه فلا بد لليل ان ينجلى ولا بد لعصى السحرة ان يتلقفها وعى شعبنا الصامد … من يومها اصدر الفرعون امرا بتفتيش العقول ومصادرة الوعى ولكن هيهات فلم يصل الطب حتى اليوم الى رنين مغنطيسى او اشعة مقطعيه تقوم بتقييم الوعى الوطنى … ومن يومها صار الفرعون كلما ذكرت الثقافه يتحسس مسدسه … اى اخى نيام كلما تحسس الفرعون مسدسه تحسس وعيك وثقافتك وخلى الدماغ صاحى …

  19. aflaiga كتب:

    كسره : يمكنك ان تعمل جنبا سلاح او ارضا سلاح الى حين ولكن لا تعمل ابدا جنبا دماغ فان خبرا العلوم العسكريه قد اقروا بان الحركه بتاعة ارضا سلاح ممكن عادى جدا تعمل منها جنبا ومنها ميلان ومنها تنشن لهدفك !! اما خبراء العلوم الانسانيه فقد اثبتو ان جنبا دماغ لا يمكن ان يتم بعدها الا الحركه بتاعة ارضا دماغ ….. اسى لاقاكم ارضا دماغ قام تانى ؟؟؟؟!!!!!

  20. حاج أحمد السلاوى كتب:

    الدينمو .. أفليقا ..
    قصة أرضاً وجنباً وشمالاً وحنوباً دماغ دى ذكرتنى نكتة الصعيدى مخيمر اللى جاهو ابن عمو وقال ليهو :
    عوضين : ما سمعتش يا مخيمر إنو حسنين جالتلو جلطة فى الدماغ؟
    مخيمر :هو أصلاً جاب الدماغ منين عشان تجيلو فيهو جلطة ؟
    فنحنا دلوقت ما عادش وما فضل فينا دماغ عشان يبقى أرضاً أو جواً دماغ.. ويا حليل الناس الكان عندها دماغ!!!

  21. مُخير كتب:

    شكراً يا علي سنكل
    والشكر والتحية والتقدير للمبدع صناجتنا نيام نيام
    ولله درك وأنت تقول عنا :

    ضوق الغربة و اتوجع
    شوية النفهم الحاصل مع الامم القبيل فزعو
    ونشبع نوم مع النايمين
    و نشبع قوم مع القايمين
    ونشبع في العديل و الزين
    من يوم مجيك الشوم
    ولا فد يوم
    ضقنا النوم
    ولا راحة
    سويتا حياتنا طوطاحة
    بس نهجس تقول قومو
    و ان جعنا تقول صومو
    نان لا متين
    شكيتك للذي خلقك
    ولا عافين

  22. قرن شطة كتب:

    السيد/ نيام نيام /كيفك ياود الخالة / ح اكتب ليك بس أروق وانا مابروق ويالصلاح تقيفوا لى روق

  23. البشاوى كتب:

    باسمكم ياقبيلة ويااهل
    ارحب بالقادم الجديد الحار جدا قرن شطة فمرحبا به معلقا ومدونا بارعا له باع
    طويل له روايات مطبوعة واخرى تحت الطبع باللغتين العربية والاسبانية وله مقالات
    ولقاءات منشورة بالصحف المحلية فاهلا وسهلا به نرجو ان يطيب له المقام بيننا
    ويطيب هو لنا
    سنكل
    اظنك عرفتو

  24. علي سنكل كتب:

    كيف يا بشاوي ما عرفتو ده ما ود زينب التلب.
    دحين مش نال الدكتوراه قريب ده؟
    والله كسب كبير للمدوناتيه ، حياته كلها سخريه. ولمان ما يلقى حاجه يسخر منها يسخر من نفسه.
    إنسان .
    أرحب به بين الجبراويه المدوناتيه الدانقاويه.
    أهلاً بك يا قرن شطه هؤلاء أهلك ، والبيت بيتك.

  25. البشاوى كتب:

    والله حرفنتك دى يوم تكتل ليها زول

  26. علي سنكل كتب:

    يديك العافيه يا بشاوي
    وتجيب لينا دائماً من النوع ده.

  27. aflaiga كتب:

    قرن شطه :
    كان افليقا يرشح احدهم فيثنيه ود الزبير وترفع اوراق اعتماده لثلاثى التقييم الذى ما خاب تقييمه يوما ( سنكل – بشار – ابكرون ) ويدخل لجنة الفحص بنظرات البروف الفاحصه فى شكل مقابلة قائد وانت وحظك يا اداك يا وجدت منه ريحا طيبة !! لكن ان يبدا احدهم من حيث ترفع اوراق الاعتماد – فحرى بافليقا ان يتنحى جانبا ليصعد البروف لمنصة المدونة معلنا الترحيب بمن اتى ترشيحه من لجنة المعاينات ذاتا !!
    مرحب حباب قرن شطه والاسم ينبئ بالكثير …
    ننتظر البوست القادم ( …… ) كتب بواسطة قرن شطه …

  28. نيام نيام كتب:

    العزيز قرن شطة لو جئت قرن شطة و لا هيبوتا ..والله حبابك لو بقيت قبانيت .. ولو بقيت هريسة ..او حتي تمليخ .. ان هذه الدانقا كانت في انتظارك منذ زمن و ان هؤلاء النفر الذين بين يديك هم اعز اهل هذه الامزونة و اكرمهم و اعتقهم و الطفهم ولا اريد ان اقول اكثر من ذلك فحواء الامزونة قد افرخت و ملاءت الساحات رجالا كثيرا و نساء يسدون عين (الشمش)..وكل يوم يأتينا الجديد المفيد كثير الخطر..فارجو ان تجد ضالتك بيننا و ان نجدك كما عهدناك..وكفي بما قال افليقا و البشاوي و ابوالسناكل..

  29. نيام نيام كتب:

    قد سألت النيل مرة
    أتري تعرف جبرة
    قال و النيل ضحوكا ايها اليافع بذرة
    منذ كم انت هنا
    وبتلات السنا
    و اباريق المني
    كلها تعرف جبرة
    واكتسي الامزون خضرة
    وضجيجا و مسرة
    كلما اورق غصن كان فيه ريح جبرة

    وانا هنا لا اريد ان ازكي قرن شطة بقدر ما اريد ان اشكر هذا العملاق الذي كان سببا في لمّ مثل هذه اليسامين في باقة واحدة..

  30. قرن شطة كتب:

    الاخ الاكرم/ نيام نيام/ التحايا/ اسع ماقادر اكتب معاكم ، شوف لى الحاصل شنو ؟

  31. aflaiga كتب:

    شباب : والله وانا بقرا فى الارشيف شدنى مره اخرى ختام هذا البوست الرائع :
    كلما اورق غصن كان فيه ريح جبرا ..
    اعتقد انه من اجمل بوستات المدونه ولا شنو ؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s