الرش بالطائرات لا وألف لا

Posted: الخميس,27 نوفمبر, 2008 by عزت in اخرى

كتب الأستاذ عثمان ميرغني يوم (25/11/2008) في عمود حديث المدينة بصحيفة السوداني ما يقلق في شأن الملاريا والبعوض .. ولا لوم عليه ان طالب بالرش الجوي للمبيدات .. ولكن لكل تخصصه .. والتخصص أمانة . نسأل الله أن يعيننا على أدائها .. إذ لا خير في علم لا ينفع

 

فقد أرسل الي الدكتور عيسي رئيس الجمعية السودانية في فترة التسعينات رسالة عاجلة للتنبيه بشأن الرش بالطائرات لمكافحة البعوض و التي وصفها الكاتب بأنها (هارية الناس) و تستوجب حلا سريع ليس ما بينه على ما أعتقد و يعتقد الكثير من البيئيين الرش بالطائرات و أورد الدكتور عيسى واقعة أضطلعت بها حكومة التسعينات تجاه البعوض عندما قرر وزير الشئون الهندسية حينها، بالتنسيق مع وزير الصحة الولائي، الرش الجوي للقضاء على البعوض. فبعثت الجمعية السودانية لحماية البيئة برسالة إلى وزير الشئون الهندسية مفادها أن الرش بالطائرات حسب المراجع العلمية يضر أكثر مما ينفع وأن الدراسات أثبتت أن ما يصل من المبيدات إلى الهدف المنشود (البعوضة) لا يتعدى ال15% والباقي لا يذهب هدراً فحسب بل يسبب أضراراً بالغة للإنسان والحيوان (خاصة أصحاب الحساسيات والأزمة) وللنظام البيئي عامة عبر تلوث الهواء والماء والتربة. وأن الرش الجوي لا يؤدي الغرض المنشود بمكافحة الآفات بصورة إقتصادية إلا في حالة المساحات الزراعية الشاسعة وفقط عندما يكون الهواء ساكناً بعض الشئ وليست هناك رياح تحمله بعيدا.

 

كان رد السيد الوزير منطقياً وهو أن القرار قد صدر ولا يستطيع إيقافه .. ولكنه يمكن أن يطبق نصيحة الجمعية في المرات القادمة بشرط أن تقوم الجمعية بدراسة ميدانية قبل وبعد الرش لتثبت ما تقول .. وقد قبلت الجمعية التحدي وقامت بتوفير ميزانية للدراسة وشكلت فريق قام بأخذ عينات من البعوض الطائر ويرقات البعوض في المياه الراكدة…. ووزع استمارات على المواطنين في مواقع مختارة وتم رصد البهائم والدواجن وحالتها الصحية. بعد ذلك قام الفريق بمتابعة طائرة الرش وجمع المعلومات على فترات لمعرفة ما تم من تغييرات بالنسبة للبعوض وصحة البشر والحيوانات والدواجن وتلوث الماء والتربة بعد الرش. وبناء عليه أعدت الجمعية تقريراً علمياً من حوالي 45 صفحة يؤكد ما ذكرته الجمعية من قبل أن الضرر أضعاف النفع، بل يكاد يكون كله أضرار صحية وبيئية وإقتصادية، إذ كان الأثر السلبي على أصحاب الحساسيات والدواجن وبعض البهائم كبيراً دون تغيير يذكر في أعداد البعوض. وقد تم تغليف التقرير وتسليم نسخ منه للسيد الوزير .. وحمدنا الله أن وفقنا إلى إقناع السلطات “بيان بالعمل” .. إلا أننا فوجئنا السنة التي تليها بالسلطات الصحية تقرر الرش بالطائرات .. وكأنا يا بدر لا رحنا ولا جئنا.. وكان تبرير وزير الشئون الهندسية أن وزارة الصحة الولائية هي التي قررت الرش وليس هو .. وكأنما كل وزارة من كوكب آخر ..

 

وقد تسألني ما الحل إذن ؟ أقول لك الحل في الإعتناء بصحة البيئة على المستوى المحلي بالنظافة وتجفيف المياه الراكدة .. وإن تعذر التجفيف يجب تغطيتها بالزيوت الراجعة .. وآخر العلاج الكي وهو رش المبيدات موضعياً وفي أماكن تواجد يرقات البعوض مباشرة. أما البعوض الطائر فهو لا يعيش كثيراً ولو منعناه من التوالد لانتهت المشكلة في وقت وجيز.

 

أعزائي .. لا يستفيد من الرش بالطائرات إلا أصحاب الطائرات التي تؤجر بالشئ الفلاني وصانعوا وبايعوا المبيدات ومن لف لفهم ..! وعليه نقلنا ما لدينا من معلومات علمية وما يترتب عليها من مسؤولية و الشعب الأمزوني كفاهو ما يتعرض له من عصر كمان جابت ليها مبيدات و بالطائرات كمان……

هناك طبعا جهودا مكثفة للباحثين في القضاء على بعوض الملاريا و لمعلوميتكم (عواطف) بتاعت البعوض هي ما تسبب ذلك الخراب و  تخلى الرحيق الشهي بتاع الزهور و الورد، و الحاجات الطيبة و ما تتكيف الا لي دم البني آدمين و البركة غايتو في (سعيد) بتاع البعوض الذي لا يقرب البني آدمين و لو بازعاج و الغريبة لمن بتاعين المكافحة البيولوجية حبو يكافحوا البعوض عن طريق تعقيمه لم يجدو الا ذكر البعوض المسكين يجرون عليه بحثهم و يجردوه من تفاحة آدم و يقطعوا دابره و يمنعوه من الخلف و يخلو البعوضة حايمة ساكت..حتى اعترض نائب رئيس البرلمان الأستاذ أتيم قرنق عندما عرض المشروع عليهم … فلم تجد البت القائمة بالموضوع سوى الضحك (ما أنثى) و لم تجد غير (سعيد) لتنتقم منه. شئ آخر يستعمل اليوم و هو الثوب و الناموسية المشبعة بالمبيد لطرد البعوض كما (الريبلانتس) أي الأدوية و المراهم الطاردة للبعوض ما يجعلكم تنوموا هانئين لكن ناس الحساسية يمتنعوا أخير ليكم تنوموا جوه الأوض بعد رشها من النوم داخل الحاجات المشبعة و النواميس… افرض جاء حرامي تشوفوا كيف من داخل الناموسية………….. و تحياتي و نوموا عافيه

Advertisements
تعليقات
  1. ابوالمنذر كتب:

    الدوك عزت…
    انت فى بورتسودان وله شنو؟
    باخى والله جيتنا فى محك صعب ونحن فرحانين بالطياره القلعت اضنينا لكن والله نضفت البلد من الضبانه والبعوضايه ومو خيرا فينا اصلو اجتماع مجلس الوزاراء اليوم عندا والحيكومه جت بى ضيوفها بى هنا عشان كدى جابو الطياره يقضو يومين بلا ضبان وبعوضة وتبقى الاثار البيئية لينا والله لينا….

  2. حاج أحمد السلاوى كتب:

    الأخ العزيز جداً ابو عصمت .. سلام
    غايتو عاوز أقول حاجة واحدة بس .. إنت بتنفخ فى قربة مقدودة .. وربنا يجازيك على قدر مجهوداتك الما لاقية زول يفهمها فى المقام الأول ناهيك عن إنهم يساعدوك فى تنفيذ ما تنادى بيهو فى هذا المجال ..وما بعيد ابداً يكون وزير الشئون الهندسية أو جماعة الصحة الولائية شركاء فى هذه الطائرات والمبيدات .. وإلا فكيف تفسر عودتهم فى السنة التالية القيام بعملية الرش وتنصل كل واحد عن المسئولية ؟.. مسكين هذا الزول السودانى المطحون فى كل شىء …تطير عيشتو .. لا لاقى ياكل .. لا لاقى يشرب .. وحتى هواء الله عاوزين يلوثوه ليهو بالمبيدات .. ويا المنذر أخوى .. يلا خُمّوا وصروا من تبعات الرش الجاكم بمناسبة الزيارة الميمونة .. وحال المسئولين فى ولايتكم يقول كما قال جحا …….. بعد الزيارة تخلص إن شاء الله الناس تنقرض ( طبعا عارفين جحا قال شنو ؟ ) .
    أبو عصمت المرطب .. كان الله فى عونك وعون من معكم ممن يعملون فى مجال الحفاظ على البيئة وهم قِلة طبعا …وحقو تكوّنوا ليكم حزب بإسم الخضر ( زى حزب الخضر الألمانى ) لكن الإسم السودانى حيكون حزب الخُدُر ( بضم الخاء والدال )..ومستعدين ننضم ليكم وندعمكم ..
    والى لقااااااااااء … سلامز ….. يا قبيلة .

  3. aflaiga كتب:

    د عزت : المبيد جابوهو بالخساره ورشوهو بالطياره !! يعنى معقول يا عزت يقفلو باب بتاع ماكله زى ده عشان راى بيئى ؟؟؟ تعرف كده يادوب حينط واحد بيئى من ناسم ويقول ليك اى مبيد عشان يترش لازم يمر بالمعمل بتاعى وياخد الشهاده بتاعة الجوده !! يقومو بعد فتره يكتفو برسوم المعمل بدون فحص !! يقومو بعد فتره يقسمو الرسوم بينم !! يقومو بعد فتره يعملو شركه تختم وترش !! يقومو بعد فتره يعملو شركه ترش ثم تختم !! يقومو بعد فتره يعملو شركه ترش وما تختم !! يقومو بعد فتره يعملو شركه تختم وما ترش !!!
    هو يعنى بقت على رشة اليعوض ؟؟ هو لمن رشونا نحنا ذاتنا قلنا حاجه ؟؟؟؟

  4. حنين كتب:

    د.عزت المرطب وسمارة .
    طابت جميع أوقاتكم .
    (( القرش بجيب القرش )) مقولة صحيحة يعنى أنت صاحب طيارة عندك قرش يعنى أكيد حاتصاحب وزير الصحة ووزير الزراعة ومدير الدفاع المدنى ومدراء شركات الدعاية والاعلام عشان يأجرو منك طيارتك إما للرش وإما لأخماد الحرايق وإما لتشتيت المنشورات للدعاية . ويعادى أى جهة تحاول أن تقف ضد مصالحة حتى ولو كانت مصلحة وسلامة المواطن .
    إنتو يناس البيئة خليتو الجاى والجاى وقبلتو على طياراتى دى إنتو ماشفتو مصفى الجيلى دة بيعمل تلوث للبيئة قدر شنو ولا ماشفتو مصانع الاسمنت ولا بحرى الحرارية ولا المصانع الكتيرة دى ونحن حالتنا قلنا نعمل خير فى المواطن المسكين ونرش ليهو الباعوضة والضبان دى آخرتا معانا .
    لكن البسكت ليكم منو أنا والله بى سلك أقدر ألغى أى رسالة دكتوراة فى مجال البيئة وأى مؤتمر يحاول يهبش مصالحنا هو نحن الطيارات دى إشتريناها بالساهل …

  5. محنك كتب:

    هوىىى يا شباب
    سوداننا دا البرشو بالموية بنرشه بالنار

    لكن البرشوه بالمبيدات دا لسة بنفكر نعمل ليهو شنو حقو نغتسو فى برميل مبيد

    طيب طالما بيئة الدولة نفسها قالت المفروض الراى الصحي والبيئي قبل كل تصديق ومالوا لو عملولوا رسوم برضو قرشين حلوين يا دكتور انت اقتراحك ما كان معاه بنود ايرادات من عدم الرش او اى تصديق بيئى . كان على طول شالوكم بره وجابوا جماعة خسر البئة وكتر الايراد .
    يعنى الشي دا ضد البيئة لكن لو ……………….. بنخليك تسويه لمدة سنة واحدة
    وبعدين كل سنة وانت طيب هههههههههههههه

  6. سهيل كتب:

    سلامات ..

    يا أخواننا خلوهم في طياراتهم دي… تضايقوهم بكره بيقوموا يرشونا أرضي .. يعني بالقطارات و النقل النهري و العربات.. طبعآ دي كلها أرخص من الطيارات و أي واحد منهم ممكن يمتلكها.. و تبقى خربانه أم بنايآ قش..
    بس ياها ذاتا .. نكورك ليكم ما تجوا نجيكم تكوركوا.. واحدين دايرين (رش) وواحدين رقدوا (قش)

  7. البشاوى كتب:

    العزيز عزت
    نفعك الله بعلمك ونفعنا بك
    ناس حيكومتنا ديل ماكانو عارفين الاضرار البيئية الممكن تحصل من الرش الجوى
    بس بعد نصيحتكم دى حيكونو عملوا لجان عشان تدرس الاضرار البتحدث للبشر
    ومنها الوفاة طبعا لى ناس الازمة والحساسية وعمل بحوث لزيادة جرعات الرش
    عشان يكملو باقى الشعب الفضل دة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s