ادب الاستقالات

Posted: الإثنين,1 ديسمبر, 2008 by aflaiga in سياسية

تواترت الانباء فى الهند بان هنالك جملة من الاستقالات قد تقدمت من مسؤلين كبار فى الحكومة ينسبون المسؤلية الادبية لما حدث لهم. ( يا سلام بس ماتكون استراحة محارب وكده).

بعد هذه الاستقالات – هل سنسمع فى السودان بان وزير الداخلية ِ/ الدفاع سوف يقدمو استقالتهم ويتحملو المسؤلية لما حدث فى ام درمان ؟؟؟؟ لو حدث هذا فى الهند – والتى استقال فيها الوزير ومستشار الامن فقط لحدوث هجوم صغير راح ضحيته مائة وشوية نفر واحتلو فيهو فندق فندقين وليس مدينة كاملة فى بضعة ساعات – هل سيطالب المواطنين براس الرئيس ام ماذا ؟؟؟؟

اترككم مع الخبر وهو منقول من ال بى بى سى

 

أبلغ متحدث باسم حزب المؤتمر الوطنى الحاكم في الهند البى بى سى أن وزير الداخلية شيفراج باتيل قد بعث رسالة استقالته إلى رئيس الوزراء مانموهان سينج معلنا تحمله المسئولية الإخلاقية عن هجمات مومباي.

يشار إلى أن باتيل لم يكن يتمتع بشعبية كبيرة خلال ممارسته مهام منصبه الذي يشرف من خلاله على معظم اجهزة الأمن الداخلية الهندية.

كما استقال مستشار مجلس الأمن القومي الهندي إم كيه نارايانان من منصبه بسبب الهجمات أيضا.

وقد أعلنت الحكومة الهندية أن وزير المالية بالانيبان شيدابرام سيتولى منصب وزير الداخلية خلفا لباتيل على ان يقوم رئيس الوزراء بأعمال وزير المالية.

جاءت ذلك بعد تزايد الضغوط الداخلية على حكومة حزب المؤتمر لتفسير أسباب الفشل في منع وقوع الهجمات خاصة وأن مومباي كانت هدفا في السابق لاعتداءات.

وتتعرض الحكومة لضغوط متنامية من المعارضة ووسائل الإعلام والمعلقين السياسيين والمواطنين الذين يتهمونها بعدم الكفاءة والانشغال بالصراعات وبالتساهل حيال الإرهاب وربما يسفر ذلك الضغط عن المزيد من الاستقالات.

وركزت الانتقادات على تحميل الحكومة مسؤولية الثغرات الأمنية التي أدت إلى تسلل المسلحين عبر البحر إلى المدينة وتنفيذ هجماتهم.

 

Advertisements
تعليقات
  1. بالله زمان كنا لمن نحب نشتغل زول نقول ليه (ياخ قوم انت هندي) و لمن ما نلقا لينا فيلم كابوي و الا جاسوس و الا روائي مظبط نمشى نخش فيلم هندي و نقضي وقتا جميلا فيه اذ لا يغلطوا عليك الهنود في أفلامهم فقطعا سوف تخرج راضيا مغامرات و مفارقات و غنا و رقيص و ينتصر الخير على الشر دائما في الآخر…

    لا عجب انها التجربة الهندية التي هي ديمقراطية حقة نضجت على نار هادئة و تمارس على أحسن ما يكون…فالتحية للمستقيلين بالرغم من عدم مسئوليتهم شديد الا أنهم برهنوا أنهم قدر تلك الديمقراطية فهم يشعرون بأن هناك تقصيرا جرى و ان كان من ضباط صغار و الا عساكر لأغفالهم لبعض المحازير و تركهم لبعض الثغرات التى نفذ من خلالها المعتدون.

    متى نأخذ منهم تلك العبر و نخلى التشبث بالكراسي حتى و ان أشارت التحقيقات لمسئوليتنا…

  2. حنين كتب:

    أفليقا آآآخوى .
    كيف حالك .
    الهنود ديل ناس عندهم إحساس وعلى دة كلو حابين يكونو ناس ديموقراطيين وبحبو يحترموا شعبهم ومايخموة بأعزار واهية وإنهم عارفين الناس المهاجمين وخلوهم مخصوص عشان يورطو باكستان فى الهجمات .
    ((أن وزير الداخلية شيفراج باتيل قد بعث رسالة استقالته إلى رئيس الوزراء مانموهان سينج معلنا تحمله المسئولية الإخلاقية عن هجمات مومباي. ))
    أسى عليك الله يأفليقا آآخوى فى أرجل من كدة

  3. حنين كتب:

    د.عزت .
    صباحك فل .
    كل ما الواحد يقول يخش يكسب أول تعليق يلقاك قدامو بى جاى وبى غادى ,تورت نفسنا بى محاورتك دى . لك كل التحايا والود …

  4. عبدوش كتب:

    افليقا وعمنا د.عزت المرطب
    والله ديل كان قدموا ( اعتذار) ساكت عن الاغفالات والاستهتارات والسبهللية البعملوا فيها كل يوم دي براها تبقى حسنة .. قال يستقيلوا قال…
    كسرة:
    انت دايرنهم يستقيلوا عشان تقولوا عليهم هنود … !!؟

  5. زووووووول كتب:

    افليقا سلااام
    اخوى مسعول من الخير انت الهنود ديل ما عندهم تلاته وزراء دوله بالداخليه وسبعطاشر وزير دوله للماليه فشان واحد منهم يتولى المسعوليه بعد الاستقاله .
    كسره : داير جماعتنا ديل يستقيلوا لا بالله انت قايلهم هنود ولا شنو .

  6. aflaiga كتب:

    شباب : المقال طبعا لاخونا ستريكر وتم نشره باسمى نظام تسليف وكده لانو انا طولت ما نزلت موضوع ( شفتو الاخوان بيتشايلو كيف ؟؟ ) .
    اها نعلق ليكم على مقالى المشدود من فردتى :
    ما دام راينا صواب يحتمل الخطا وراى غيرنا خطا يحتمل الصواب فتوقعو ايضا ان يكون بقاءنا فى السلطه خير من خروجنا منها لانو ( شوكة الاسلام تقوى !! ) بوجودنا وتضعف بخروجنا !!!! ——- ( راى امازونى حكومى ) !!!
    ربنا سبحانه وتعالى لمن ادم عصاهو زمااااااااااااان وسفسف من الشجره الممنوعه كان بامكان ربنا تعالى وهو اعظم القادرين ان ينقل ادم الى جنة اقل مستوى يعنى درجه تانيه وما ناصيه على وزن استراحة نبى !!! لكنه العدل القادر نزلو ليك مصر طوالى !! تعرفو ليه ؟؟؟ ليحق الحق بكلمته ويعلن للناس ان لا كبير على الحق لا نبى لا وزير !!!! شفتو كيف بالله ده ربنا ذاتو الذى يتعالى عن كل شيئ وليس فوقه شيئ وليس مثله شيئ ….
    اما امراء المؤمنين فهم ربما احن على بطانتهم من الله !!!!
    الهندى الاستقال ده اشك انه سمع يوما بعمر بن الخطاب او بن عبد العزيز او حتى اخر خليفه قبل اتاتورك ذاتو !!!!
    لكن حقننا ديل سمعو بعمر وحافظين سيرتو صم لكنه حفظ كحفظ مدائح ( شعر النبى وريح النبى ويد النبى ومشى النبى ونوم النبى ) اما ( عدل النبى و لطف النبى ودين النبى الما بنابى ) فدى سيره فتحها بيقوم الضغط على ناسنا ديل …
    وجاييكم تانى ..
    كسره : ولدنا شكرا على الشده وانشاء الله فى السمح ….

  7. أصلو يا عزيزي (حنين) الواحد اتعود يجي بدري (مجبرا لا بطل) ابتدأت بتوصيل الشفع و تجي المكتب عدل … أقوم أفتح الكمبيوتر و اشوف تعليقات سوداننا البايته و رسائل الميل جزاهم الله خير ناس السلاوي و مخير و سهيل و شوية من ناس تانين و في الوكت دا بكون واحد مدون نزل ليهو (بوست) يقوم أخوك يشوت طوالي…

    جرب انها وصفة مجربة…

    الغريبة ناس الهلال ما جابو سيرة الليلة………..مبرووووك

    كسرة: اريتا شدة السرور …هندي كمان

  8. حاج أحمد السلاوى كتب:

    الدينمو .. أفليقا..وكل القبيلة .. سلام..وكل إستقالة وأنتم بخير .
    دة الظاهر عليهو فيلم هندى جديد .. نازل يادوبك عشان أبو عصمت يمشى يشوفو..ويستمتع بالأغانى والرقصات والهنديات الجميلات ذوات الشعر الأسود الطويل ( مايكون فى زول قاعد جنبك .. يا ابوعصمت )..
    المهم والشاهد فى الأمر أن هؤلاء الهنود الذين كنا نضحك عليهم صاروا دولة لها شأنها… فهم يمتلكون قنابل نووية.. ونحن عندنا كلمات نووية.. هم عندهم ديمقراطية حقيقية بجد.. ونحن عندنا ديمقراطية مزيفة ( ورغم العددية الهائلة للسكان وتعدد المِلل لديهم لم نسمع يوماً بإنقلاب عسكرى فى الهند .. مقارنة بجارتهم باكستان ) …لدينا حاجة أسمها إستراحة محارب ودى الشىء الوحيد القدرنا نفوتهم فيهو ..لديم إستراحة أبدية ..
    يقولون جاهد يا (خليل ) بغارة ****.. وأى جهاد غيرهن أريد..
    لكل غزوة بينهن بشاشة **** ..وكل وزير بينهن شهيد
    ( مع الإعتذار للشاعر جميل بثينة …. مش بثينة عواطف نميرى )
    وهاهم الهنود اليوم يضربون مثلاً أعلى لدول العالم الثالث فى الشفافية واحترام المناصب التى وصلوا إليها عن طريق الديمقراطية لا من فوق الدبابات … والمدافع … ونحنا متين .. يا مولاى ؟؟؟؟..وحتى كل المناصب ليها زمن معين …محدودة بمدة معينة ..مش مفتوحة حتى يأتيك اليقين… القذافى العام القادم ( سبتمبر 2009) سوف يكمل الأربعين سنة … حاكم طبعاً .
    تحية للوزير الهندى ومستشار الأمن الداخلى المستقيلين..وخلونا نشوف آخرته شنو !!!!

  9. البشاوى كتب:

    افليقا
    موضوع زى دة مايسلفك ليهو الا اخو اخوان
    استقيل ياثقيل الناس نبحت بيها لامن ريقا نشف مافى زول هببو ليها
    بعدين نحنا فى السودان نهوى اوطانا وان رحلنا بعيد نطرى خلانا وحكمها اللذيذ
    يجرى فى دمانا
    معقولة واحد يلقى ليهو شعب حلو زى دة يفوت يخليهو يااخونا لما واحد مسؤول
    يمشى اى حتة فى البلد يلقى الميدان مرشوش والمسرح جاهز والصفيقة متلمين
    والساوند ماشاء الله موزع بطريقة علمية تخلى اى زول يسمع بوضوح كلمتين تلاتة
    والموسيقى الما خمج تدق وهاك ياعرضة ويطلع يرجع قدامو الزمامير تفتح فى الشوارع —– وامورو كلها مقضية يستقيل عشان يبقى زينا لافى مروحة
    كمان ماتبالغ ياعبدو اخوى
    خليها حلوة وقول واحد يزعل من تقصير الحكام ويقوم يعمل انقلاب دى مبلوعة
    حسب الثقافة السائدة فى البلد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s