أطوار الحب 12

Posted: الأربعاء,3 ديسمبر, 2008 by الفاتح جبرا in اخرى

 

تمتلئ المكتبة العربية بقصص العشق والهيام التى خلدها التاريخ (العربى طبعن) فهنالك قيس و ليلى .. عنتر و عبلة .. جميل و بثينة وغيرها من (الثنائيات) التى  نسجت حولها القصص والحكايات ، وكنت أظن (وليس كا الظن إثم) وإلى عهد قريب أن هذه النماذج من قصص الحب الملتهبة التى قرأناها لا تعدو أن تكون (حاجات فردية) ممكن تحصل لدى أى أمة من الأمم وإنها بأى شكل من الأشكال لا تدمغ (العرب) بأنهم أمة (تموت فى الحب) و(النساء) إلى أن وقع كتاب فى يدى يوضح إسماء أطوار ومراحل (الحب) وإسمائها !! ومواصفات كل (مرحلة) وطور من هذه الأطوار والتى بلغت (إثنا عشر) طوراً  بالتمام والكمال ! فأنظر عزيزى القارئ إن كنت ممن يعيشون (قصة حب) فى أى مرحلة من المراحل إنت حتى إذا ما سألتك حبيبتك :

–          بتحبنى قدر شنو يا عوض؟

أستطعت أن تجيبها بإسم (المرحلة) التى وضعها لك (أجدادك العرب) حسب التصنيف العالمى (للفيفا) بدلاً عن تلك الإجابة التقليدية التى يحفظها (الحبيبين) عن ظهر قلب والتى تقول

–          قدر الكون ده كوووولو

وهذه الأطوار هى :

(1) الهوى :

وهو أول درجات الحب يعنى أول ما ضربات قلبك تتزايد وتقعد (تتراجف) ويغلبك الكلام وتبدأ تبلع فى (ريقك) !

 

(2) العلاقة :

والمقصود بيها بداية المشوار أى المرحلة التى تأتى بعد القبول وكده

 

(3) الكلف :

فإذا ما اشتدت لوعة العلاقة اصبحت كلفاً ! وهو شدة الحب

 

(4) العشق :

اذا زاد الكلف عن ذلك اصبح عشق وهو والعشق يأتى إذا ما زاد الكلف عن كونه كلفا (ومافى زول يسألنى كيف عشان أنا ذاتى ما عارف!)

 

(5) الشعف :

وهو الحب مع الشعور بلذة ( يبقى يا سيدى إنت  ح تكون فى مرحلة الشعف عندما تحس بمتعة وأنت تقوم بدفع فاتورة الموبايل الباهظة نتيجة لمحادثاتها)

 

(6) اللوعة :

  وهى عندما يستولى (الحبيب) على قلبك دون أو تستطيع منه إبتعاداً أو فكاكاً (يعنى  خلاص الموضوع بتاعك منتهى)

(7) الشغف :

وهى المرحلة التى يتربع فيها (الحبيب) داخل شغاف القلب (يعنى ذى ما بيقول فناننا وردى  فى أغنية أول غرام لما قال – وفى قلبى إحتويتو – )

 

(8) الجوى :

وهى المرحلة التى لو نظرت فيها لأى شئ لوجدت صورة حبيبك عليها (والتى جسدها شاعرنا عندما قال – أنا يا طير محل ما تطير بشوفك

(9) التيم :

أى  استعباد الحب (وديل ناس لولا ربى وجهنم لعبدتك وسجدت بين إيديك) وهو الاستعباد

 

(10) التبل :

متبول اى مقبل على فقدان عقلك !!!! (حاول أن تحجز ليك صينية أربعه شوارع رئيسية)

 

(11) التدليه :

هى ذهاب العقل من شدة الهوى (وعلى الصينية عدل) !

 

(12) الهيام :

وهى أن تصبح شخصاً  هائماً  او هيماناً من غلبة الهوى (يعنى تنزل من الصينية وتبدأ تلف فى البرندات والشوارع)

 

أهو برضو (أجدادنا العرب) خلو لينا حاجه مفيده وتانى لو واحد (حبيبتو) سألتو (بتحبنى قدر شنو) يقدر يجاوب إجابه (دقيقة) ويقول ليها :

– والله أنا هسه فى مرحلة (اللوعة) وكلها يومين تلاته  وح أكون فى مرحلة (الشغف)  !!

 

 

 

Advertisements
تعليقات
  1. التلب كتب:

    سلام للكل
    إذا الحكاية كده يبقى شعبنا الأمازوني ده في مرحلة (هيام) تقيل لكن بمنو الله أعلم!!

  2. خالد مدني كتب:

    البروف جبرا والسادة الكرام … صباح الخير
    اصبحنا بي الله والحمد لله صباحنا حب في حب … وحقيقة الواحد متشعف بيكم شديد … وربنا يديم الكلف .

  3. ودالزبير كتب:

    الأستاذ
    والشباب
    والله يا خالد أخوك وصل مرحله الهيام معاكم …..
    وبريدك يا حبيبي بريدك
    بريدك زي ما بتريدني بريدك
    ده ريدك أحلى من الروح
    وما برضى البيجيب زعلك
    وما برضى القلوب بتنوح

    موضوع العيد ميه ميه ….
    العزابه يمتنعون …..

  4. علي سنكل كتب:

    الشاعر ود العيلفون كان من أكبر شعراء الحب العذري في التاريخ العربي ، وكنا لمان نلاقيه في الشارع لازم نطلب منه آخر إنتاجه من الشعر وإلا بيزعل منك.
    كان قبل ما يقول ليك حاجه من شعره يأخذ منك تعهداَ يشهد عليه الحضور بعدم مسئوليته إذا حصلت ليك حاجه و لا قدر الله ضربت الواطه من فرط دقة يعبيره ووصفه لحكاياته مع محبوبته.
    وكانت له دواوين يطبعها على الرونيو على حساب وزارة الري ( الهامل ) آنذاك ، ويبيعها لنا ولازم تشتري غصباَ عنك.

    من أشعاره :

    حبيبي سافر لماذا
    خلاني مكنكش جنازه
    حبيبي لاقاني عند البراميل
    أشر لي بالمنديل
    وكش كشح الوسخ

  5. ألفاتح جبرا كتب:

    أهو طلعنا بيكم من قصت (الكم سوط) وكده !!!

  6. مُخير كتب:

    البروف والحلوين
    سلام بمحبة
    أبو ناجي في حالة لوعة !!؟؟
    فعلاً حلوة كتاباتك فيهم روعة … وفيهم حُب وفيهم لوعة “أبو عركي”
    ما براك ياخي الشعب الفضل كلو ملتاع والله يجازي اللي كان السبب

    للإمام علي إبن حزم الأندلسي يرحمه الله صاحب المُحلى والإحكام في أصول الأحكام ومراتب الإجماع في العبادات والمعاملات والاعتقادات وغيرها من نفائس الأسفار في الفقه كتاب مشهور عنوانه “طوق الحمامة” يشمل الكتاب نصائح و فوائد كبيرة يوزعها في ابواب، وعدد مراتب الحب على النحو الذي تناوله أستاذنا جبرا وأنواعه فمثلا في باب من أحب من نظرة واحدة يحذر من الوقوع في الحب في الوهلة الاولى و يسرد قصة أحد اصحابه: ” كثيراً ما يكون لصوق الحب بالقلب من نظرة واحدة. وهو ينقسم قسمين، فالقسم الواحد مخالف للذي قبل هذا، وهو أن يعشق المرء صورة لا يعلم من هي ولا يدري لها اسما ولا مستقراً، وقد عرض هذا لغير واحد” وأنموذج لما جاء في الكتاب: ” حدثني صاحبنا أبا بكر (…) أن يوسف بن هارون الشاعر المعروف بالرمادي كان مجتازاً عند باب العطارين بقرطبة، وهذا الموضع كان مجتمع النساء، فرأى جارية أخذت بمجامع قلبه وتخلل حبها جميع أعضائه، فانصرف عن طريق الجامع وجعل يتبعها وهي ناهضة نحو القنطرة(…)، نظرت منه منفرداً عن الناس لا همة له غيرها فانصرفت إليه فقالت له: مالك تمشي ورائي؟ فأخبرها بعظيم بليته بها. فقالت له: دع عنك هذا ولا تطلب فضيحتي فلا مطمع لك في النية ولا إلى ما ترغبه سبيل فقال: إني أقنع بالنظر. فقالت: ذلك مباح لك، فقال لها: يا سيدتي: أحرة أم مملوكة؟ قالت: مملوكة. فقال لها: ما اسمك؟ قالت: خلوة. قال: ولمن أنت؟ فقالت له: علمك والله بما في السماء السابعة أقرب إليك مما سألت عنه، فدع المحال. فقال لها: يا سيدتي، وأين أراك بعد هذا؟ قالت: حيث رأيتني اليوم في مثل تلك الساعة من كل جمعة. فقالت له: إما أن تنهض أنت وإما أنا، فنهضت نحو القنطرة ولم يمكنه أتباعها، يقول: فوالله لقد لازمت باب العطارين والربض من ذلك الوقت إلى الآن فما وقعت لها على خبر ولا أدري أسماء لحستها أم أرض بلعتها، وإن في قلبي منها لأحر من الجمر. و هي خلوة التي يتغزل بها في أشعاره، ثم وقع بعد ذلك على خبرها بعد رحيله في سببها إلى سرقسطة”

  7. شكر جبرا أحاديث الهوى و الهيام دي باقي بتعجبنا و بتعجب واحدين كتار ربنا ينقلهم من مرحلة (الجوى) الى مرحلة (العوى) فقد سكن متزوجين حديثا بالقرب من جيران كانوا مستغربين جدا ما أسمائهم …
    فقد كانت تقول له يا حبيبي
    و يرد عليه يا حبيتي

    فقال الزوج… أديهم يومين ثلاثة

  8. ألفاتح جبرا كتب:

    لكن عليكم الله (أجدادنا العرب) ديل ما ببالغو (أطوار الحب 12) و (أسماء الجمل 16) وأسماء مشيت (الشنو ما بعرف داك) كم وكمين واسماء (صوت الما عارف أيه) مش عارف كم كده … وأنا أقول الفياقه وعدم الموضوع ده جانا من وين !!؟…

  9. مُخير كتب:

    أبو ناجي يديك العافية إنت كبيرنا ورئيس هيئة أركان ضُباط الإيقاع بالمدونة وما في أحلى من الحب وسيرة الحب فلك الحُب والتجلة.

    وبمناسبة الحُب شايف الشباب فكّوا آخرهم وغرقانين لشوشتهم في المدونة على حد تعبير أخواتنا في الرضاعة أولاد بُمبا وبالتالي وحيث لا لبس في مفهوم الحُب الأخوي الخالص لوجه الله جلا وعلا والذي يتضمن الاحترام والثقة وحًُسن النية فأرى أن الحل الجذري لكافة مشاكل وجميع أزمات بلادنا هو في هذا “الحُب” يعني عندكم مثلاً مشكلة الوحدة الوطنية، لو في إمكانية للتعامل بهذا الحُب بين أبناء الجنوب والشمال والوسط والغرب والشرق (شايفين الترتيب هاكم الحُب ده) حتتحل المشكلة ويحدث التزاوج والتداخل وتبادل الزيارات الخ وتختفي النزعات العنصرية والعقد النفسية وتتلاشى أزمة الثقة، وهكذا الأمر بالنسبة لما بيننا كمحكومين مع أخوتنا الحُكام، يُمكن أن نحبهم ولكي يحدث ذلك لابد لهم من أن يعدلوا ويبطلوا الكنكشة ويسمحوا بتداول السلطة والتوزيع العادل للثروة. وهكذا عزيزنا جبرا وضعت يدك على المفتاح وهو الحُب في أدنى درجاته فلنتمسك بأهدابه ونعض عليه بالنواجذ.
    ونترك للجميع الصعود كلاً حسب هواه

    كسرة أخيرة:
    أخي الزووووووول:
    أحبك في الله، فليحببني الله الذي أحببتك فيه وأنا لم أراه جل في علاه ولم أراك، أحبك رغم أنك مريخابي وأنا هلالابي عاشق للأزرق لدرجة الهوس، أحبك رغم إختلافي معك في بعض المسائل وحبي موصول للجميع رواداً وزواراً والله أسأل أن يجمعنا بكم وأن يبقي على محبتنا خالصة لوجهه الكريم.

  10. neiam كتب:

    البروف الظريف و العقد اللطيف
    اهو كده مرقت بينا من 12 سوط ل 12 شاكوش ..بس في مرحلة اهلنا العرب نسوها و يمكن ما مروا بيها اما نحن الشعب الامزوني السباق فها نحن نعيشها بالطول و العرض وهي مرحلة العلف..

  11. aflaiga كتب:

    البروف : يعنى اسى كده طلعت من الموضوع ؟؟ !!!!
    القصه ياجماعه انو اى شيئ تكتر اساميهو يا تعظيم يا تحطيم !! يعنى عندك مثلا جبرا ذاتو :
    جبرا – استاذ الفاتح – البروف – عمك – سيد البيت – سيد الحيشان – ابونا – سيدا – وووو
    وعندك المدونه ذاتا :
    القمردينه – الدانقا – الموقع – المدونه – وووو
    وعندك نحنا ذاتنا :
    المدونجيه – القبيله – شباب – الاكارم – الدانقوست – وووو
    ودى بالتاكيد اسماء تفخيم وتعظيم يتغنى كل منا على هواه ويمكن يكون فى واحد مسميها سلمى عديل كده !!!
    وفى نوع تانى نخليهو لتقييمكم انتو :
    جبهة الميثاق – الاخوان المسلمون – الجبهه الاسلاميه – الانقاذ الوطنى – المؤتمر الوطنى – الوعاء الجامع – الحركه الاسلاميه – حكومة الوحده الوطنيه – مؤسسة الرئاسه .
    اما العرب فمنذ ان تحولت العقيده القتاليه من ( والله لولا الله ما اهتدينا ) to ( ورونى العدو واقعدو فراجه والنار ولعت ) فلم تقم لهم قائمه فما العقيده المعنويه الا وقود العقيده القتاليه ..
    يعنى انتو قايلين الخلافه ما واصلت لحدى زمننا ليه ؟؟
    لانو استبدلو مجالس تصحيح الحديث بمجالس ( الفرذق يهجو فلانا ويمدح فلانه ) وسكتت شهريار عن الكلام المباح ….

  12. ودالزبير كتب:

    أفليقا

    إنت شارب حاجه
    قول كح

  13. ابوالمنذر كتب:

    احب الحب الجاب المحبوبين… الحب الحاتى مطر وجارى قطر من الحلوين ..حب العرب وقف فى محطة 12 وحب الدانقوست (اوكماقال) بدا من14 وياقمر دورين انا شفتك وين(يكون فى حارة الخلاطين على وزن العطارين)
    12سوط حتو شهد حتى العشراقة بتاعت حوار الامس ما اصلو العسل الاصلى يسوى العشراقة….
    دمتم ودام الحب بينا.. وحلاة بلدى وحلاة ناسا وحلاة الطيبه والطيبين..

  14. nono كتب:

    التحية جبرا
    الاخوة اصحاب المدونة
    يا حبيبي أقبل الليل علينا
    وضفاف النيل قد أصغت علينا
    وحباب الكأس ذابت في يدينا
    وارتشفناها تباعا فارتوينا
    يا حبيبي قلت لي
    في اللقاء الأول
    بين همس السنبل
    وخرير الجدول
    في المساء المقبل
    سوف تلقاني ولكن ما ألتقينا
    أقبل الليل وصمت الليل طالا
    وضياء البدر في الأفق تلألأ
    والربى أصغت حوالينا الظلالا
    ثم ذاب الموج في الشط وسالا
    قلت والكأس لديكا
    ويدي في خصلتيكا
    هاتها من وجنتيكا
    وأسقني من كفتيكا
    خمرة منها أرتوينا
    يوم عدنا وألتقينا
    كسرة/يعنييا استاذ جبرا بعد الكم سوووووووووط كدة
    قلتة اخير تروووووووق المنقة

  15. neiam كتب:

    افليقا ثرو ودالزبير:
    يكون من ضواقة الشربوت ياربي..

  16. nono كتب:

    انت ليّا نور عينيّا في الليالي تضوي ليّا
    امنياتى ذكرياتي في خيالي لسه حيّه
    لو نسيت اشواقى ليكا
    لو شبابي هان عليكا
    قلبي لسه املو فيكا
    راجي لو تعطف عليه

    هنا العاشق شبة المحبوبة بي سد مرووووووووووووووووووووووي
    كسرة/عمكم هسع ماااااااااااااااسك ليه صيااااااااااااانية كبيرة ومعاهااااااااااااااااااااااا صفارة عامل ضيق ليه سيد الحركة رغم الاشار شغال

  17. زووووووول كتب:

    الزووووووووول يحيكم يا اهل المدونه ويهديكم الابيات ادناه لشاعر الصحوه عائض القرنى :ــ

    بنتم وبنا فما ابتلت جوانحنا شوقاً إليكم ولا جفت مآقينا

    نكاد حين تناجيكم ضمائرنا يقضي علينا الأسى لولا تأسينا

    حالت لفقدكم أيامنا فغدت سوداً وكانت بكم بيضاً ليالينا

    إذ جانب العيش طلق من تألفنا ومريع اللهو صاف من تصافينا

    وإذ هصرنا فنون الوصل دانية قطافها، فجنينا منه ما شينا

    ليسق عهدكم عهد السرور فما كنتم لأرواحنا إلا رياحينا
    الاخ مخير سلاااام
    اخى احبك الله الذى احببتنى فيه واساله ان يحشرنا فى ظله يوم لا ظل الا ظله وكمان معانا بقية الشباب والشيوخ بتوعين المدونه .
    اخى ليس بالضرورة ان نتفق فى تفاصيل التفاصيلل ولولا خوفى من مقالة ود الزبير وسترايكر لكنت هلالبيا ازرق فشان خاطر مخير لكننى على دين الاباء والاجداد احمر حتى الثماله ورغما عن ذلك ويشهد الله على ذلك احبك واحب تعليقاتك الرصينه واتمنى لقائك قريبا يا عزيزى . فالمهم ليس ان نتفق على كل الاشياء لكن كما قيل فلنعمل سويا فى ما اتفقنا فيه وليعذر بعضنا بعضا فيما اختلفنا فيه .
    لكم جميعا خالص حبى وعظيم مودتى

  18. مشاكل كتب:

    سلامز
    يا اهلا و الله بها الطله
    اشتقنا لضحكك و الله
    عزبنا فراقك يا الغالي
    خاف الله فينا خاف الله

    بعد قدة الكم سوط و نشاف ريقنا بيناتكم
    و غنانا تجي ولا نجي يا جبرا يا شقي
    رجعت لينا بي الحبوميتر مقياس الحب
    طيييييب
    حبيبي تعال تعال نتلم
    ما دام الريد اختلط بالدم
    ما دام الريد اختلط بالدم
    و انا ذنبي ايه شيلوني الهم
    يا حبيبي

    دا تبع ياتو تصنيف على مقياس الحبوميتر

  19. مشاكل كتب:

    افليقا
    خليك من الجبهة و العرضة و التش تش
    تبتل في محراب الحب
    ولا انت خلاص انجكست ( = انتقلت الى رحمة مولاك الحكومة )

  20. حاج أحمد السلاوى كتب:

    الأخ الفاتح..وكل القبيلة..سكان الحيشات التلاته .
    كانت نقلة رائعة … اخرجتنا من السيطان والجلد إلى عالم الحب والمحبة…وربنا يديم المحبة بين رواد الدانقا…
    سؤال سغيرونى كدة .. تتذكروا أخونا سعيد زوج عواطف .. ست الحِنة .. تفتكروا دة تختوه فلى ياتو مرحلة ؟؟؟ أنا غايتو بديهو رقم ( 9 ) …

    ولدنا إسترايكر… مسعول من الخير … أخبار البيت الكبير شنو ؟؟ ما قربنا نسقف ونسوى الكرامة ؟

  21. nono كتب:

    بين جناين الشاطىء وبين قصور الروم

    حي زهرة روما وأبكي يا مغروم

    دره سالبه عقولنا لبسوها طقوم

    ملكة باسطة قلوبنا تبين عليها تقوم

    في الطريق ان مرت بالخلوق مزحوم

    كالهلال الهل الناس عليها تحوم

    شوف عناقد ديسها تقول عنب في كروم

    شوف وريدا الماثل زي زجاجة روم

    القوام اللادن والحشا المبروم

    والصدير الطامح زي خليج الروم

    خلي جات متبوعة الصافية كالدينار

    في القوام مربوعة شوفا عالية منار

    موضة آخر موضة هيفا غير زنار

    روضة داخل روضة غني فيها كنار

    شوف جبينا الهل ضو فوقه فنار

    منه هل الشارع منه بق ونار

    طالعة ما بتقابل زي لهيب النار

    تحرق البتهابل والبعيد في نار

    تصنيف الاغنية/الجوى :

    وهى المرحلة التى لو نظرت فيها لأى شئ لوجدت صورة حبيبك عليها
    كسرة/الشعرة ديل عندة مشكلة كهربة شنو مابعرف داااااااااااااك

  22. bakrimusa950 كتب:

    الجميع الفين سلام

    عند الصداقة:ـ

    ” أنت ليه مش بتمسك إيدي وإحنا ماشيين في الشارع؟ ”
    “لأ بلاش…افرضي حد من قرايبك شافنا؟ والا حد من أصحاب أخوكي في الكليه؟
    “إن شاء الله يا حبيبتي بكره نتخطب وامسك إيديكي ادام الدنيا كلها “.
    ………………………… …
    في الخطوبة :ـ
    “أنت ليه مش بتمسك إيدي وإحنا ماشيين في الشارع؟”
    “علشان مش عاوز حد يفتكر إننا علشان اتخطبنا هنصيع بقى ونعيش حياتنا…وبعدين
    بصراحة كده أنا مستحرم…إن شاء الله بكره نتجوز وامسك إيدك وإنتي مراتي
    حبيبتي في الحلال”.
    ………………………… …
    في الزواج :ـ

    “أنت ليه مش بتمسك إيدي وإحنا ماشيين في الشارع؟”
    “يا حبيبتي إحنا مش مراهقين بقى هنمسك إيد بعض في الشارع وكده…إحنا اتنين
    متجوزين ومحترمين وعندنا بيت نعمل فيه اللي عاوزين نعمله”.
    ………………………… …
    بعد انجاب الاطفال :ـ

    “أنت ليه مش بتمسك إيدي وإحنا ماشيين في الشارع؟”
    “يعني امسك إيدك والا امسك إيد البنت والا اشيل الأكياس دي كلها؟!”
    ………………………… …
    بعد زواج اكثر من 25 عام :ـ

    “أنت ليه مش بتمسك إيدي وإحنا ماشيين في الشارع؟”
    “إيدك إيه بس اللي هامسكها دلوقتي! إنتي عاوزه جوز بنتك يقول علينا كبرنا
    وخرفنا؟!”

    كسرة:ـ
    واحد حلفاوي (بدون زعل) قالوا ليه بكرة (عيد الحب) Valantine Day
    قال ليهم والعيد ده فيه كم ركعه ..

  23. nono كتب:

    ياجماعة الخير البلد دة زمان كان فيها مطافي الشغلة ولعة عديييييييييييييييييل
    لانة هسع لو الحريقة قامة عربية المطافي مافيها موية

  24. neiam كتب:

    bakrimusa950
    يا بكري 950 بوسة من ايدك دي لايدك دي .. بس نحن موش ما بنمسك الليد نحن تلقا الراجل في بحري و المرة لسه في كبري المسلمية و جاكين كل واحد من الثاني تقول لاعبين سك سك ولمان تحصلو يقول ليها يامرا بتتقدلي كدي مالك و تقول ليه ياراجل مالك انت ساكنك..

  25. محنك كتب:

    ما عارف اقول شنو للسيد د جبرا او الرواد لانه افليقا ذاتو حيرنا

    فى لغة العرب اسماء تحسب مترادفة لكنها مختلفة ولو اتقنها الفرد فلا تعنى شيئا عند سواد الناس لانهم تعودوا على لفظ واحد . وكلما عظم شان الشئ فى اللغة كثرت اساميه . ولذلك صارت اللغة الفرنسية هى لغة العقود لوضوحها وعدم وجود المترادف من الكلمات الذى يدخل المحامين والمستشارين فى شمطة.
    وقد عانى العرب والمسلمون من عدم الفهم الناتج من ترجمة حديثهم او ترجمة حديث الاخرين لهم فى المحافل الدولية وخاصة خطابات الرؤساء لانها تطون بغالب لغة اهل البلد حتى لا يزعل اصحاب الهجات واللغات غير المتداولة . اذ ان المترجم يترجم ليدخل مفهومه وغرضه وليس لينقل عبارة بدقة قصدا فى كثير من الاحيان

    وقد ضعفت الضادية فى بلاد اهلها
    وشكرا لكم لقراءة هذه الكعابير

  26. محنك كتب:

    الفلوس / القروش / الشراتيت / المهلقات / العمله / الضحّاكات / الملالين

    كلها بتعرفوها حتى انواع العملات
    من دولار ريال شيك سياحى الى الين والباهت والكرونة

    حتى فى بلدنا دى كان جنيه قرش مليم ومشتقات ( ديفريرتز ) تعريفة ريال شلن طرادة وهلم جرا )
    دينار درهم وانت ماشى
    وعملتين مع بعض

    القروش دى والمصطلحات دى كلكم عارفنها يعنى غالبكم 12 نوع من الحب ما الصيدلية والسوبرماركت مليانين من ابوقرش لابو الملايين ليه ما اسغربتو
    لما نشوفكم لازم من جملة التعارف الواحد يبين الحالة الحبية بتاعتو وبعد كده يضمنها السيرة الذاتية

  27. nono كتب:

    انا شغلتي دة دايرة ليها شيك ضماااااااااااااااااااااااااان

    يشغل قلبي حبك على مر الزمان
    سلطانه استقر
    وفي جوره استمر
    وكيف القى الضمان

    كسرة/ يااااااااااحبزاااااااا لو كان من بنك ام درمان الوطني

  28. الأحباب الحبُاب
    مساء الخير والحب و الروقان
    تعرف لغاية قبل ما أقرا الكلام دا . أنا كنت متخيل أنو الحب نظره فأبتسامه فموعد فلقاء ف سن حنك ف سد مال ثم سد عيال وسد حنك

    شيخ الكله البنى عامراوى فى بورسودان قال لى أن ماشى الخرتوم أشكس سافر ورجع قال لى ولاى مشيت الخرتوم وشكست طلع عند أملاح و رطوبه بس
    للزوار من خارج سوداننا أشكس يعنى أشخص

    راجعين المودوع زريف الليله الله يكفيكم شر أب سوط

  29. bakrimusa950 كتب:

    الادمن : استرايكر الفين سلام وعيد سعيد مقدما وخروفا مخضرما مدبلغا

    يااخي (النونو) القاعد متحكر في البروفايل حقي تعب ورقبتوا اتكسرت وعايز اغيرو اشان يرتاح وممكن اتنازل ليه لاختنا nono اذا ما عندها مانع .

    حاولت اكتر من مرة بعمل uploading و updating للبروفايل الجديد لكن دون جدوي .. شوفوا لي حلل يا ناس ..

  30. Ahmad . M . G كتب:

    المشكلة أنني ضائع ولا أعرف في أي مرحلة أنـــا

  31. Gapriel Garcia Markquez
    Thirteen 13 Reasons for Living

    1-I Love you not for whom you are but for who I am when I’m by your side
    2-No person deserves your tears , and who deserve them won’t make you cry
    3/A true friend is the one who holds your hand and tuches your heart
    4/ The worst way to miss someone is to be seated by his/ her side and you know you will never have him/ her
    5/ You may be a person in this world , but for some one, you are the world
    6/ Don’t spend some time with some one who doesn’t care spending iit with you
    7/ Don’t cry because it came to an end . Smile because it happened
    7out of 13

  32. bakrimusa950 كتب:

    هنالك مراحل اخري للحب :ـ
    ________________________________________
    يبلغ الحب القمة: متى تنازلت المرأة عن عنادها .. والرجل عن كبريائه.

    – عندما تكره المرأة رجلا الى درجة الموت,, فاعلموا انها كانت تحبه الى درجة الموت..

    – ما دمت ايها الرجل , لا تستطيع ان تخفي عنها شيئا فانت تحبها,,

    – وراء كل امرأة ناجحة حب فاشل..

    – الحب الذي هو فصل واحد وحسب في حياة الرجل,, هو تاريخ المرأة بكامله..

    – عندما يتهم الرجل المرأة بانها بلا قلب , فمن المؤكد انها خطفت قلبه..

    – حب الرجال كالكتابة على الماء , واخلاصهم كالكتابة على الرمال..

    – قلب المرأة العاشقة محراب من ذهب غالبا ما يحتضن تمثالا من طين.

    – اعطاء المرأة صورتها لمن تحب , وعد بانها ستعطي الاصل..

    – للمرأة ثلاث مراحل مع الحب . في الاولى تحب ,, وفي الثانية تعانيه , وفي الثالثة تأسف عليه..

    – من الرجال كثيرون يقتلون انفسهم لاجل الحب , ومن النساء اكثر من يمتن من الحب..

    – الحب عند المرأة قصة عاطفية هي بطلتها , وعند الرجل قصة هو مؤلفها..

    – هناك لحظات في حياة كل امرأة تحس فيها بالحاجة الى رجل كي تحبه بكل جوارحها..

    – الحب: امرأة ورجل , وحرمان..

    -مهما تكن المرأة ثرثارة فان الحب يعلمها السكوت..

    – الرجل في حبه يحب دائما ان يعرف كل ما تفعله المرأة..

    – اذا احبت المرأة الرجل , لم تذل رجولته ابدا ..

    – في الحب: الرجل مهاجم , والمرأة مدافعة..

    – عندما يحب الرجل امرأة فانه يفعل اي شيء من اجلها , الا شيئا واحدا هو ان يستمر في حبها ..

    – منطق المرأة يجري على سنة من تحبه وتهواه..

    – الرجل ابرع من المرأة في الصداقة .. ولكنها ابرع منه في الحب..

    – الرجل اذا احب فهو كالثعلب مراوغ , حذر , اما المرأة اذا احبت اخلصت , وضحت..

    – إن حباً أمكن يوماً أن ينتهي , لم يكن في يوم من الأيام حباً حقيقياً..

    – لا ينزع الحب من قلب المرأة إلا حب جديد..

    – لا تستطيع المرأة أن تعيش بدون حبيب..

    – قلة الاكثراث هو أخوف ما تخافه المرأة..

    – الحب يهبط على المرأة في لحظة مملوءة بالسكون والإعجاب..

    – المرأة تحب الرجل لأجل نفسه , والرجل يحب المرأة لأجل نفسه أيضاً..

    – حب الرجل سطر , وحب المرأة صفحات..

    – سعادة المرأة في أن تحب الرجل وتخضع له..

    – حالما تحب المرأة , تبدأ تمزق قلبها بالمخاوف والظنون..

    – الإحساس والحب والإخلاص , كل ذلك سيبقى مكتوباً على المرأة أن تقوم به

  33. boahmed كتب:

    وعند الفراق نقول ياريت الله خلق حب من غير فراق

  34. البشاوى كتب:

    الروف
    بركة انك مرقت من اشارة الكم سوط البادية من 99 دى
    اضف لانواع الحبكانة واحدة تانى ودى اظنها مرحلة مفصلية فى حياة المحبين :-
    واحد طلق مرتو البتحبو موت لانو زهج من عكلتتا وقال ليها لمى عفشك وعلى بيت ابوك عديل وهى بتلم فى العفش وقلبها ينفطر حزنا واسى على قصة الريدة
    اللى ضاعت وهو ولا عليهو يقرأ فى جريدة منتظر متين تتخارج من وشو رفعت الزير من الارض عشان تشيلو لقت عقرب رقطاء تخرج من تحت الزير فنادت يافلان الحق لقيت عقرب قال ليها شيلى زيرك وخلى لى عقربى فى محلها

  35. neiam كتب:

    البشاوي:
    وهي يعني خلاص مخلصة ما براحة تشيل العقرب تختها ليه في جيبو عشان جيبو يكون فيه عقرب والجديدة تطلقوا و تقول ليه انت ياحبيبي جيبك فيه عقرب..
    طارق اب احمد:
    اختيارك لماركيز مركز
    ودالخلا:
    سلام ياقبيلة ..لا تقبل شيكات ابان ايام عيدالاضحي المبارك .. ويمكن استخدام خراف كضمان دفع معتمد..

  36. يا bakrimusa950 عملنا كوبى بيست لى كلامك الدرر دا مشكور
    لكن كمان كان لازم أعمل كوبى بيست تانى لى أسمك الصعب دا
    أفتراح لطيف و كده بدل ما تغير النونو ما تقصر الأسم

    neiam شكرا لكن الليله الخميس وكلمة مركز دى بتجيب هوا

    عاين لى ناس الخيال الواسع ديل مركز دى انا قاصد بيها كورة الليله

    أب أحمد

  37. مشاكل كتب:

    الليلة ويييين ود الزبير ما ظهر

    يا ود الزبير
    اقل حاجة تلاتة

    و التلاتة محمدة مازدا

  38. ابو محمد - دبي كتب:

    البروف ابو ناجي

    وفي التعديل الاخير لسنة 2008 وبناءاً علي مُعاناة الشعب السوداني الفضل ولسوء حظه ان الطور الذى يحمل الرقم المشؤوم (13) :- هو مرحلة الشلهته الجماعيه في الدوله السنيه.

  39. د.ياسين شمباتى كتب:

    سلامات ولدنا مشاكل..اها نقيت فيها لما نحستها !!! اشوفك..

  40. البشاوى كتب:

    شمباتى
    يعنى الواحد الا يلبد ليك مع الاجازات ولا شنو ؟
    بركة بالطلة وكيف الصحة والاخبار وانشاء الله لميت فى السلاوى

  41. د.ياسين شمباتى كتب:

    العم البشاوى..هو اريتو الاجازات كان نافعة..الحمدلله الوالد السلاوى طوالى معاى بالتلفون وباذن الله ح امشى عليهو بعد العيد..ربنا يجمعنا فى ساعات الخير..وتحياتى لى قرن شطة..

  42. nono كتب:

    الفي دلاله ماأعظم جلاله
    إستحل هلاكي ولي حرم هِلاله
    الهلال الشغل الناس هِلاله
    الظلام حين شاف محيه أنجلالهُ
    نضرة خدوده وبالأنوار يلالو
    راح أنفسنا وريحانة لخِلاله
    المنعم توب العز كِِساله
    مثال النعمة وماأعظم مِثاله
    جداول ديسه في وردانه سالو
    طيبه يعبق كل ما الليل أمساله
    شالو فاله الناس يتمنوا حاله
    مثاله الباسم وحتى الغيم سِحاله
    ومن ضميري حب الغير محاه
    نائم وخِلى الكان نائم صِحاله
    المدلل ما أكرم خصاله
    حسنه وافي ومافي لسان حصاله
    عالي سماه بي بعيد وصاله
    المحاسن في مراية جماله
    رطب قوامه وخمر التيه أماله
    يتلو قلبك عند قلت شماله
    وتدعيله عليه يدوم كماله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s