ما مشكلة طالما زّبل الأولاد

Posted: الأربعاء,3 ديسمبر, 2008 by عزت in اخرى

تعال شوف دي كاتبه شنو… قالت لي (عواطف) صباح اليوم… وقفت و اتجهت نحوها…فقد كانت تطالع في جريدة الراى العام و أتمت لي باقي الخبر.. و الذي مفاده أن فلانة تهني زوجها بزواجه الميمون و تتمنى له حياة زوجية هانئة… يا زوله انت متأكده و بالكلمات دي… يكون ما كلمها و عرفتو عرس و دايرة تعمل ليه فرقعة اعلامية… قلت لها. فقالت طيب هسة ما كان تعمل التهنئة دي كبيرة شوية…

 

 image007

 

فعلا فركت عيوني و قرأت الخبر الذي كتب في ذيل الصفحة الأخيرة من جريدة الأمس و الذي بجانب وجوده تحت باب مناسبات سعيدة احتوى على اسم المدعو رباعي و كأنما تود استخراج جنسية له و وصفته بزوجها الوجيه الجراح المشهور البروف و تمنت له حياة زوجية مستقرة هانئة مما يؤكد أن الغرض هو مجرد تشهير به لأنه أخفى موضوعه و تريد له أن يعم القرى و الحضر… لكن يا أخوانا هسة كان كلموها تقوم تعمل ليه زي واحدة راجلها عامل عادل و شنو ما بعرفو و قام كلمها فلم تبد كثير اعتراض و الذي شجع فضوله بانها طالما ارتضت أن يطلب منها الذهاب معه لخطبتها… و لدهشته وافقت فصار يلملم في الهدوم و الدهب و لم يقصر فقد اشترى لها أيضا لارضائها و مشى الموضوع كويس بدون أي اعتراضات لحد ما وصّلا و معها شوية حريم لدار البت الصغيرة القدر بتو للتعرف و خطبتها… و جلس متعجبا ذلك اليوم حتى عادوا من بيت الخطيبة و قالت ليهو مبروك… لكن مناسبة بشكل لولدنا (ياسر) و أردفت غايتو قلت ليهم هو لسة في خامسة جامعة لكن شغلو مضمون في شركة أبوهو… و حددنا المواعيد!!!. طبعا بعد داك تخلى عن خططه مرغما لا بطل و تظل (عواطف) مهندسة للمواقف و حتى طبيبة نفسية كمان فانظر لتلك التي أشارت لزوجها عندما كلمها زوجها بانه خلاص ماشي يتقدم لي فلانة و انو ربنا شرع لينا الطبيق و شنو ما بعرفو فنظرت له في (ملاينو) و قالت ليهو (هسة انت ماشي ليها بالبعرفوا دا و الا واحد تاني….أنا ساكت ساتراك) بالطبع لم يتقدم مشروع (سعيد) قيد أنملة للشك الذي زرعته فيه بأنه ليس أهلا لهذا المشروع و البت صغيرة…

 

و العجب لمن ما يكلموهم طبعا المشاكل بتكون أكبر و العواقب أكبر اقلها أن تمشي للبت في مكتبها و تلعن سنسفيل أهلها و توصفها بخطافة الرجالة وسط دهشة الموظفين و ربما تجدعا بالخرامة في وشها… و الا تمشي ليهم في بيت الزوجية و تعمل الفوق دا كلو وسط دهشة (سعيد) و خجله من الموضوع الذي انكشف… و تظل المواقف تتنوع باختلاف الزوجين و علاقتهم… (فالحابسة و كانت قاعدة في الأرض) بعد موت زوجها تتلقى في التعازي لم تتورع من فريش السراير و فك الحداد بعد رؤيتها لضرتها التي جاءت الى البكا و معاها كوم شفع و تكورك الليلة (يا أبو الوليدات) … و الا يكون حظ الزوج مثل حظ الباحث العاثرالكان معانا و هو من الولايات الجنوبية و الذين يبدو أنهم لا يعرفوا (الهظار) عندما طعنته زوجته لمجرد الدعابة التى أطلقها عندما سألته القروش الكثيرة دي شنو في الكيس دا (بالرطانة طبعن) .. فأجابها بأن القروش دي أدونا ليها في الشغل قالوا تعرسو بيها… فراح مبكيا على شبابه و لم يهنأ بقروش بدل الاجازة و التذاكر… و لكن تظل الطرفة التي تروى عن امرأة كانت قاعدة (بتعوس) و جابو ليها الخبر هي الأطرف و التي تعبر عن اللامبالاه المصطنعة و خيبة الأمل التي شعرت بها….

 

فقالت مش زّبل لي الأولاد و طهّر البيت…أصلو ما مشكله بس مسكينة بس المشكلة وقعت في الكديسة الخمشوها و مسحت بها الصاج …

Advertisements
تعليقات
  1. عباس ركس كتب:

    صباحكم ورد :
    الله يجازي محنك يا المرطب !!!!
    انا قلت ياربي ميلانو دي الجابها هنا شنو ؟ أكان القى ليك الحروف متبدلة .

  2. ابوالمنذر كتب:

    سلام ياحبايب…
    ياترطيبه والله حاجه عجيبه اطمنا بداية الخبر وقلنا ده مشروع صحوه وتاصيل ومتبناه هنايه حرم هناى لحل مشكلة العنوسه نلقاهو فى النهايه صاج مسحو بالكديسه… معناهو مشروع الدعاء والتضرع ما يجيب خبر الحريم فى الحته دى!!!!!!

  3. neiam كتب:

    انت يا مرطب وليد حسن كابوس بقا يجيك .. شفت القالو ليها راجلك عرس قالت ليهم و مالو مايعرس انا يهمني شنو وليداتي في الزريبة و بهيماتي في المدرسة..

  4. حاج أحمد السلاوى كتب:

    أبو عصمت .. سلام
    غايتو فى فقرة كدة… بااااالغت فيها عديييييييييل …زشايف نيام نيام الما بتفوت عليهو حاجة عدّ عليها.. دون تعليق …أكيد ما شافها .
    الله يجازيك ويجازى مِحنك …وقلت دة كلو يطلع منك .. يا أبو عصمت ؟؟ وأكيد عواطفكم لم تقرا مقالك دة .
    فى زول عاوز يدّبِل يا جماعة ؟

  5. زووووووول كتب:

    ابو عصمت ثرو حاج السلاوى سلاااام
    اولا بالتبادى اى زووول منكم عواطفه هارشاه يقيف هنوك ويطلع برا الموضوع دا .
    تانى حاجه :
    حقيقه قصة غريبه جدا وربما لم تحصل فى التاريخ مع انو
    ما غريبه قصة واحد يدبل لكن بصراحه قصة مرتو تهنيهو دى حلم حلم لكن احتمال يكون عندها مكره فى القصه دى لانو بنات حواء ديل ما عندهن اى ضمان .

  6. neiam كتب:

    حاج السلاوي:
    ياخي انا برضي ساترووووووووووو!!!!
    زووووووول:
    مكرi ساكت ؟تلقاه فلم طويل نحن ما جابو لينا الا المناظر!!

  7. محنك كتب:

    سلام يا د عزت

    شوف تاكد لى بما لا يدع مجالا للشك انو ام الاولاد ما عارفه موقعنا دا طيب لما نشوفكم حا نفتح ليها عيونها

    ما يكون وصلت مرحلت السكرتيرات بس

  8. صباحاتكم خير يا الزينين الباقي لي ما دايرين يدبلو
    اصلو العمر ما بعزقة زي ما بقولوا ناس شمال الوادي

    أنا ما عارف أهلي ناس شندي ديل ما بيحبوا يدبلو ليه هل يا ترى لقناعتهم بأن عواطف يا ها عواطف كان بقت صغيرة و الا كبيرة و الا ما بيحبوا يبعزقوا القروش…

    أكيد دي لأنو معظمهم يمتلكون من البيوت اثنين و ثلاثة و يسكنوا في واحد و يقوموا يأجروا الباقيات و مضيعين ليهم خانات كان ممكن يسجلوا فيه لعيبة جدد…

    خسارة

    قالوا واحد جنوا ياخد سلفيات من مديروا يوم عيان، يوم داير يقلع ضرس، عاوز يركب طقم، يوم مرتو والده و مرات مسافرين البلد…يوم ما لقى ليهو سبب كلو كلو و دخل للمدير و قال حاجة واهية كدا لم يوافق عليها و خرج ملوما محسورا بس لقى ليهو واحد في وشو سنونو مهردمه كدا فقال ليهو

    ياخ خشمك دا فيهو حلاة سلفية!!!!

  9. د.ياسين شمباتى كتب:

    والله يا د.عزت انتو لا بعجبكم العجب ولا الصيام فى رجب !!! اسه دى ما زوجة واعية وفاهمة ورضت بى قسمتها ونصيبها,,وعارفة حقوق زوجها شنو..فى داعى تشيلوا حالها كدة؟؟؟ اريتها كان خمشتو ومسحت بيهو الصاج !!

    تحياتى..

  10. ودالزبير كتب:

    عزت المرطب ثرو السلاوي ثرو نيام نيام
    ( فانظر لتلك التي أشارت لزوجها عندما كلمها زوجها بانه خلاص ماشي يتقدم لي فلانة و انو ربنا شرع لينا الطبيق و شنو ما بعرفو فنظرت له في (ملاينو) و قالت ليهو (هسة انت ماشي ليها بالبعرفوا دا و الا واحد تاني….أنا ساكت ساتراك) بالطبع لم يتقدم مشروع (سعيد) قيد أنملة للشك الذي زرعته فيه بأنه ليس أهلا لهذا المشروع و البت صغيرة…)
    دي مش ذكرتكم النكته ديك بتاعت الزوله البتعاير الزول بالشنو مابعرفوا داك ؟؟؟؟
    قالنا ساترينا عزت قال

  11. سهيل كتب:

    الله يا مرطب انا يادوب قريت البوست دا و من قبيل غالبني اكتب من شده الضحك .. الله عليك يا معلم.. بس ود الزبير دا مالوا داقي جرس .. الما عاجبو شنو ؟

  12. حنين كتب:

    د.عزت المرطب والمدوناتية الكرام .
    سلام
    والله موضوع الدبيل دة موضوع نحن قدام عواطفنا إلا نهاظر بيهو ساكت لكن لحدى أسى مالاقتنا مرة بتوافق يعرسو فيها حتى لو كانت عاقر …
    ياود الزبير إنت خاتى صورة البرنس عشان هو اللاعب الوحيد الماضيع ضربة الجزاء الخامسة ولا شنو ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s