علي بالطلاق قدرك

Posted: الإثنين,8 ديسمبر, 2008 by عزت in اخرى

اذا قادتك الصدف الى بتاعين المراكيب و شرعت في قياس كم مركوب و لا مؤاخذة بغرض الشراء فقد لا تجد ضالتك عند سيد مراكيب واحد و لأن المراكيب بحكم صناعتها التقليدية قد يختلف جوز المراكيب و تكون الفردة الشمال اصغر من اليمين، فسوف تظل في بحث الى أن يشير اليك سيد المراكيب بان المركوب بعد ما تدخلوا الرجل سوف يتمدد و يصير مريحا و تظل أنت في تردد الى أن ينط واحد قاعد كان بعاين ليك من قبيل و بعد ما تكون حرقت روحوا قائلا “علي بالطلاق قدرك” فيكون بذلك قد حسم ترددك فتشترى و تفاجأ بعد كم يوم ان المركوب لا قدرك و لا حاجة.

 

و تظل الحليفة بالطلاق هي الفيصل و الحاسمة لكل تردد و لكل جدال و يستعملها السودانين كثيرا في جميع المواقف؛ فسيد البضاعة لا يحس بأن الناس تصدقه اذا حلف بأغلظ الايمان و السمسار لا يحلو له نصب شباكه حول المشترى الا على صهوة حليفة كاربة لا يهم ان كان صادقا أم لا و لكن المشترى المسكين ربما يظن بأنه صادقا فكيف يحلف بالحرام اذا لم يكن صادقا و يظل خائفا أن لا تتم البيعة و يطلق السمسار “مرته” في تلك البيعة… عليه ينصاع المشترى الى صاحب تلك الحليفة الغليظة و يتم البيعة و لو كانت بالزيادة.

 

يحذر العلماء و شيوخ الدين كثيرا من الحلف بالطلاق و دائما ما يشيرون في وعظهم الى أن “من حلف فليحلف بالله أو ليصمت” لكن البسمع كلامهم منو فقد تعود التجار و المستهبلين بالحلف بالطلاق في اليوم مائة مرة دون أن يهتز لهم جفن لذا يسمون طلاق من يحلف كثيرا بالطلاق “بطلاق السفيه” الذي لا يستوجب تمامه و وقوع الطلاق على زوجته. و لكنهم أيضا يشيرون الى الحالف بالطلاق أن كان و لا بد حالف بالطلاق فليحلف فيما يملك حتى لا يحرج أن لم ينصاع المحلوف عليه كمن يحلف على شخص (على بالطلاق تشيل المائة جنيه دي) فقد لا ينصاع من حلّفته و تكون وقعت في المحظور و لكنك تستطيع أن تحلف (بعلي الطلاق ما أديك المائة جنيه) فهي في جيبك و لا يستطيع كائن من كان (يقلعها) منك.

 

لكن تظل المواقف و المشاهد في حياتنا في السودان و حتى على مستوى أرفع قيادينا و الذي حلف بالطلاق أن لا تدخل القوات الأممية لبلادنا فلم ندر كيف حلل طلاقه ذلك بعد أن دخلت تلك القوات فوقع في الحلف على ما لا يملك، و تظل بعض القبائل لا يحسم شئ فيها الا بالطلاق فأنظر للموظف و زوجته الذين استقبلوا أناسا من البلد في منزلهم كانوا قادمين للعلاج و مقابلة دكتورا في مساء اليوم التالي فما كان من الرجل و زوجته الا و ان أحسنوا استقبالهم و قدموا لهم الطعام و فرشوا لهم السراير و لكن عندما مغربت لملم الضيوف هدومهم و شالوا عصيهم و توجهوا نحو الباب اشعارا بأنهم مغادرين.

 

فحلف عليهم المضيف بأغلظ الايمان أن يبيتوا معه لليوم التالي فموعد الدكتور غدا و لكنهم أصروا على الذهاب و كانت زوجته وراءه ترقب في المشهد و (خسّمتهم بالرسول أن يبيتوا) و لكن لا حياة لمن تنادي…. و هم ماشين على الباب أشار كبيرهم بعصاته نحو زوجة المضيف قائلا:

 

(دي … دي مستخسرا علينا)

علي بالطلاق ما نبيت………………!!!!!

Advertisements
تعليقات
  1. دكتور و الشباب عيدكم مبارك بس يا ريت ما تكون أستعملت الفيتو بتاعك دا عشان المدام ما ترمى الكمونيه
    على الطلاق , على الطلاق بالتلاته , طلًق . حرررًم و على الحلف
    أنواع من القسم صناعه سودانيه خالصه إذ لم نسمع بمثل هذا الحلف عند أى من شعوب الدنيا
    وحتى فى داخل السودان لاحظ أن الحلف بالطلاق أو الحرام تختص به مناطق الجعليين وما جاورها و من تأثر بهم حتى الوسط . و لكنها غير معروفه عند القبائل فى شرق وغرب و جنوب البلإد

    بالنسبه لقباداتنا أعتقد بل و (أحسب ) أن المسأله لها علاقه بفقه الضروره و / أو على الفعل المادى مثل أن يحلف بأنه لم يسلم أى شخص لأمريكا وهو فعلإ لم يمسك بشخص من أضانه و يسافر بيهو أمريكا

    ودامت أيامكم أعياد
    أب أحمد

  2. د.ياسين شمباتى كتب:

    د.عزت المرطب..عيدكم مبارك..

    موضوعك دا وموضوع ود الخلا مكملات لى بعض,,فالواحد من هؤلاء صار لا يتورع عن الحلف الكاذب باغلظ الايمان وبالطلاق والحرام,,فالى اين نحن سائرون امة الاسلام!!!؟؟؟؟

    وللاسف فى ايامنا هذى صارت حليفة الطلاق هى المصدوقة الواقعة والتى يجب ان تعز و تنفذ..

    غايتو انا كان زول حلف على بالطلاق معناهو انو دقس,,لانى ما بعز حليفتو دى نهائى!!! ويوم كان ح اروح فيها بسبب رفضى لطلاق واحد معرفة فى الجزيرة..

    ولنا عودة…

  3. ابوالمنذر كتب:

    عزت بقاريتش…
    كل سنه وانتو طيبين وعلى بالطلاق مشتاقين وحرم خرمانين لمواضيعكم وتعليقلتكم… قلت لى هناى قال على الطلاق الامميه ما تخش وخشت!!!!
    ياخى ماحدد ياتو مرا ولا حدد ما تخش متين على العموم اخير من بتاع المراكيب البلد مابتبقى ضيقه للامميه.. وناس فقه الضروره مع الريح يضروا ومافى عوجة والسلام جاى والخيرات الكتيره انشاء الله ..

  4. شكرا يا المتداخلين كل يوم بخش المدونه جنس تعليق ما بلقى الظاهر الناس ماخدة اجازة بالجملة لحمة و شربوت و نوم … أها الخميس الليلة قضى و راجعين الشغل بعد يومين ان شاء يعود الانتظام كما كان و أشد …

    و علي الطلاق نحن مشتاقين بالأكتر لكن باقي لي بعد دا الماببكاينا ما نباكيهو

    تحية كبيرة للكل بريحة الشواء… على فكرة و نحن عندنا شيه زيادة أصلو (عصمت) جا من ماليزيا و غيرنا ليهو من الرز و الجداد…

  5. neiam كتب:

    حمدا لله بسلامة عصمت و كل سنة و انتو طيبين و تامين ولامين و ان شاء الله يا عصمت نفرح بيك بالشهادة الكبيرة يارب ويفرحوا بيك كل آل بقاريتش..

  6. البشاوى كتب:

    عزت ترطيبة والمدونون الكرام
    كل سنة والجميع بخير
    على بالطلاق موضوعك بدايتو كوم ونهايتو كوم احلى (دى مستخسرا علينا)

  7. حاج أحمد السلاوى كتب:

    أبو عصمت .. حمداً له سلامة وصول المحروس بإذن الله عصمت …
    لم يمنعنا من المواجبة معاكم إلا الشديد القوى …وهو حدوث عطل فى جهاز الحاسوب … طبعاً نحنا لا عندنا لحمة ولا لخمة .. الجماعة .. ناس عواطف ضبحوها هناك بيغادى وأكلوها .. بس من غير شربوت..
    من أسوأ العادات السودانية فعلاً هى قضية الحلف بالطلاق بمناسبة وبدون مناسبة..وهو أمر منهى عنه قطعياً .. لكن تقول شنو ؟؟ والناس على دين ملوكهم .. أقصد رؤسائهم ..
    نتمنى ليكم رحلة جميلة مع كل الشباب بقيادة حارس القبيلة أخونا الفاتح وكل الضيوف الموجودين من خارج السودان ..دى غايتو فاتتنا بالجد ..لكن منتظرين التوثيق من سعادتكم .وتحياتى للجميع
    خالد مدنى .. أبو ملاذ .. طولت الغيبة بالحيل … !!!

  8. مُخير كتب:

    د. عزت والجميع القابلة على عرفات
    وأهة يا أبو عصمت ما طالبني حليفة لكن مقالاتك فاكهة الدانقا
    وإنت نوارتها ويديك العافية وكل سنة والجميع بألف خير

  9. د.ياسين شمباتى كتب:

    مخير..كل سنة وانت وعيالك فى احسن حال..

    ناس السودان..ازيكم..ويا بختكم باللمة واللحمة والشية..انتظرونا وما تنسونا..

  10. د.ياسين شمباتى كتب:

    د.عزت..معليش اتغولنا على مقالك,,بس حبينا نكلم الناس المتابعين من على البعد انو اللحمة والشية رااااقدة زى ما هى وما اتهبشت!!! يعنى الجماعة مقهومين..

    ود الزبير..الخرطوم نورت,,بس افتقدناك فى النقل الحى المباشر.

  11. ابو محمد - دبي كتب:

    ابو عصمت
    كل سنه أنت والاسره طيبون ,, وحمداً له علي سلامة عصمت
    وعلي بالطلاق موضوعك دا يستحق الحليفه عليهو ,, ياخي الراجل الحلف انو المركوب قدرك برضو بفتكر أنو جاملك وكان مُمكن يقول ليك علي بالطلاق حاضر البيعه وعودى راكب , اها شفت اللولوه دى كيف في جمهورية الكيزان سازونيا . تربيزة حريق كل روول

    ** الراجل حلف طلاق علي الاولي واهي فُرصه وجاتو يتخارج منها يضيعا ولا شنو رأيكم !؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s