مغبشه ساااكت

Posted: الأحد,14 ديسمبر, 2008 by الفاتح جبرا in ساخر سبيل

 

فى المدرسة الأوليه (عندما كانت هنالك مدرسة أولية) درسنا أن الماء هو أساس الحياة وقد قمنا بحفظ (تعريف الماء) الذى قاله لنا (مدرس الطبيعه) آنذاك وهو تعريف يقول بأن الماء سائل لا لون ولا طعم ولا رائحة له ، ثم عندما تقدمنا فى (العلام) كما يقول أخواننا فى شمال الوادى عرفنا فى حصة الكيمياء أن (ذرة الماء) تتكون من جزيئين من (الهيدروجين) وجزئ من (الأكسجين) ولكن الآن عندما تقدم بنا العمر وصارت الحياة أكثر تطوراً عرفنا تعريفاً آخر للماء فهو شيء لزج و(شبه سائل)  يتكون من جزيئين من (التراب) وجزئ واحد من (الكلور) ينزل من المواسير  فى أشكال عده ليست بينها (السيولة)  وذلك بسبب تشبعه بكميات من الجراثيم والفطريات والطحالب التى ترى بالعين المجرده مما يكسبه طعماً متميزاً على عكس ما كان يعرف به قديماً من أنه لا طعم له ، كما أن لماء الشرب (عندنا) لون أختلف (الكيمائيون) فى تحديده فمنهم من يقول أنه مائل إلى (الإخضرار) ومنهم من يقول بأنه مائل إلى (الإحمرار) وآخرون يؤكدون أنه (خاتف لونين) غير أن خبير فى المواصفات قد أكد بأن لون (ماء الشرب)  يتحدد حسب موقع (الصهاريج) التى يخزن فيها فإن كانت تلك الصهاريج قريبة من (المنطقة الصناعية) فالماء لونو ح يكون (زيتى) أما إذا كانت قريبة من (المدبغة الحكومية) فإن لون الماء بلا شك سوف يكون (جلدى) !

وعلى عكس مياة الشرب فى (العالم) فإن ماءنا يتميز بأن له رائحة يقول المختصون بأنها رائحة (الكلور) الذى أصبحت نسبته تفوق نسبة الماء (شخصيا) الشئ الذى ينبئ بأننا قريباً سوف نشرب كلور صافى (بيور) مية المية ! وأهو برضو نعمة من نعم (الحكومة) التى لا تحصى ولا تعد حيث يستطيع (المواطن) أن يشرب (مويه)  وكمان (يبيض) هدومو !

أحد المسئولين (الذى أشك فى مسئوليته) أكد فى وقت مضى بأن هذا (الطين) الذى نشربه لا يؤثر على (صحة الإنسان) وقال فيما معناهو (إنتو ما تتأثرو بالشكل) وما عارف المسئول ده عاوزنا يعنى نتأثر بى شنو؟ بعد أن أصبح الماء لدينا ذو طعم ورايحة وألواااان !!

طيب أيه جاب سيرة (الموية) والناس طالعه من (عيد) ؟ أقول ليكم ،  (حاج قسم الله) (مأذون الحى) الجديد كان ضيفا ًعلينا ضمن عدد من الأصدقاء والجيران على صينية (الفطور) أول أيام العيد ، جاءت (صحانت الشية) والمرارة مع عدد من (سراويس) الشطة (الخدرا) و(الحمراء) وبدأ الكل (يهدف) ثم (يرطب) بالبارد الذى وضع فى (جكوك) زجاجية شفافة تستطيع من خلالها رؤية مكعبات الثلج (المغبشة) ، شرب الجميع ما عدا (حاج قسم الله) الذى كان ينظر (للجكوك) شذراً على الرغم من إنو الشطة كانت (حارقاهو)  ثم بعد أن إنتهى من (الأكل) خاطبنى بصوت هامس :

– يا أستاذ معليش لكن إنت مش عارف إنو ما أسكر كثيره فقليلة حرام ؟

      – (فى إندهاش)  أيوه يا حاج طبعن عارف

 طيب فى داعى للشربوت ده ؟   

– لكن يا حاج ده لا شربوت ولا حاجة؟

  – طيب ده شنو؟ عسلية؟

– يا حاج (عسليت شنو) ؟ دى مويت الله الواحده دى بس ( مغبشة) ساااكت !!

 

كسره :

 حاج قسم الله شكلو كده ما كان قاعد فى الواطة !

 

Advertisements
تعليقات
  1. همسه شوق كتب:

    استاذي الفاضل
    كل سنه وانتو طيبين اهلي الكرام
    انا الليله مبسوطه لاني اول زول يخش يعلق علي موضوع جميل جدا كما عودتنا دايما
    اهلي الكرام
    كل سنه وانتو طيبين وربنا يحقق ليكم كل امانيكم يارب ويديكم قدر ما يرضيكم والسنه الجايه كلكم في عرفات والما عرس ربنا يتم ليهو علي خير ويتم نص الدين
    المويه بالجد بقت مشكله صعبه شديد وكمان بقت معدومه والمؤلم انها بتقطع في ايام الناس تكون محتاجه ليها شديد زي يوم الوقفه والناس بتنضف في البيوت تقوم المويه تقطع
    حاج قسم الله ما غلطان لمن افتكر المويه شربوت لانو علي زمنو لمن الدنيا كانت بي خيرا المويه كانت سائل ابيض شفاف لا لون له ولا طعم
    هسع بقت بي كل الالوان والحمد لله

  2. ابوالمنذر كتب:

    البروف..الاعزاء..
    كل سنه وانتو طيبين..
    حاج قسم الله يشرب موية الصحه باقى لى ويطلع المنبر ويحرم البيره خصوصا السااااااااقطه….
    يا بروف ما اصلو الحكاية بقت مقلوبه كل شى يفقد لونو وطعمو والمويه يجيها الطعم واللون حاجه عجيبه!!!!!
    انت يابروف وريتنا موية الماسوره ونسيت موية الكارو ابوبراميل ودى لونهاتركوازى وريحتها حميريه وجزيئياته لكد لكد لكده طحلبيه من جركانة البلاستيك ولكده لستكيه من لستك العجله الموصل من البرميل…
    وكلو يصب فى خانة قرشين حلوين من مراكز الكلى والتى تزداد يوما بعديوم …
    او كسب سياسى بمجانية الغسيل للمرضى الفقراء والمساكين…

  3. Stricker كتب:

    همسة شوق – ود الخلا
    ماشاءالله عليكم منورين – ودايمن الاوائل
    ود الخلا – ما وجه الشبه بين كرستالة عم قسم الله وود الزبير ؟؟؟

  4. الأستاذ و الأعزاء سلامات

    يعني حاج قسم الله اليوم ديك كان فطر معانا الا كان جرى شرب من الماسورة…

    (ص) طبعا يا ود الخلا الناس التفتيحة البنومو في الفصل لا بد و ان يكونوا قد نجحوا مع ناس حسن طحنية و لا بد ان يكون لهم شأن كبير الان أقلاهو في مجلس علماء السلطان

    عارف يا الأستاذ تكون مويتكم اليوم داك كانت فرز أخير أي ماء عكر و الذي شبهه العرب بقطع الليل

    ماء كقطع الليل في لونه @@ تنزحه دلاؤنا من قليب

    و الا الرنق الذي خاف الشاعر أن يشربنه بناته الضعاف من بعده فقال:

    لقد زاد الحياة اليّ حبا @@ بناتي انهن من الضعاف
    مخافة أن يذقن الفقر بعدي @@ و أن يشربن رنقا بعد صافي

    و طبعن الصافي دا ما يشربه الآن ناس (ص) و نحن نشرب كدرا و طينا

  5. aflaiga كتب:

    البروف : اعذرنا على التاخير طبعا عارف ناس الامجاد وجريهم ؟؟!!
    فى بلدى لافرق بين ماء الزير وماء الصنابير وماء الحفير !!
    فالغبش فى بلدى يداوى بزيت الجلسرين وباقى كيس زيت سمسم العشاء !!
    بالنسبه للشربوت .. بقول بالنسبه للشربوت الكاميرا معاى لو سمحتو !!! ( دعاية بوتجاز فى روتانا سينما !! ) .. فهو النسخه المخففه التى يجوز حملها يوم الجمعه والتمتع بها فيه اقوال كثيره …
    حاولنا بقدر الامكان تحرى الحلال فى شربوت الرحله وتمت اجازته عند باب الاستقبال عند الخروج بواسطة شيخ حمودى والشيخه سرويه برغم اعتارض مولانا عبودى الذى منذ زيارة شيخ صالح لنا بالمنزل وهو مربى دقنو !!!
    كما تمت اجازته بواسطة الشيخ خالد مدنى القادم من ارض الحرمين الشريفين ( مع انو طول مما جا !! ) لكن برضو فيهو ريحة البركه …
    وجاييكم تانى …

  6. neiam كتب:

    الموية في هراري لحقت الناس امات طه .. وموغابي لسه مصر انو الجماعة قاصدنو .. والموية عندنا شربوت حاج قسم الله عديل و الجماعة بقولو انو قاصدنهم لانو الموية دي اصلها كده..
    واحد في الاثنين يا نحن أدونا ليها غلط يا الموية غلط ..لانو عادي تفتح الماسورة تقول ليك غاغ .. والقعونجة تقول ليك مصحيني ليه..

  7. ابكرون كتب:

    يا بروف انت ما ناقش سااااكت حاج قسم الله يكون ضارب شربووووووت معتق بتاااع المولانات وفي رواية اخري ( دكااااي)…
    ممكن الغبشه تورينا ليه المويه غبشه….يمكن ضاربها (الصقت) وغبشت…ونمسح المويه بشوية نيفيا ولا كريم22 (ما 21 ) يروح غبش المويه…
    بعدين يا بروف انت من زمن لا لون له ولا طعم ولا رائحة …..اسه السودان ده له لون او طعم او رائحة …..ما بقي زي اول اوكيد الكربون…..وبخنق ويفطس كمان ….بالله خلونا…الناس ذاتها فارغه ما يشربو ببسي ويستحموا بالميرندا ويغسلو الهدوم بالدموع ……..

  8. حاج أحمد السلاوى كتب:

    الأخ الرائع دوما.. الفاتح ..
    مش كويس إنو لسه فى موية عكرانة ومغبشة بتجى.. بعد مرات..وزيادة الكلور طبعن ما جات سااااكت كدة ..الزيادة دى عشان تنضفوا بيها الهدوم البتكون اتوسخت بالموية العكرانة ..وبعدين حكاية الطين الفى الموية برضو مقصودة …عشان محمد أحمد الأغبش (والمفردة ..الغبشة ) المسكين/ المسكينة ديل يشربوا ويشبعوا فى وقت واحد ..
    العاوز أعرفو هل حاج قسم الله أكل المرارة ..ولاّ كان عندو فيها رأى ؟..حاج قسم الله دة كان جايى معزوم فطور بس ..ولاّ فى مهمة أخرى ؟
    – همسة شوق ..حمداً لله على السلامة .. إنتى كنتى قاعدة ورا الباب ولاذ شنو.. أنا حرست البوست الأحد لحد الساعة تسعة ولمن مافى حاجة ظهرت قفلت الدكان وتوكلت على الله .
    – أفليقا … خالد مدنى دة جاى من منطقة يغلب عليها الشيعة..وممكن يجيزوا أى حاجة .. خليك مع شمباتى القاعد قريب من مكة .

  9. aflaiga كتب:

    قبل ايام تلقيت اتصالا هاتفيا دافئا دفئ ابناء الوطن الاصيلين من الاخ الاكرم التلب معرفا بنفسه ومادا لحبال الوصل التى نسال الله الا تنقطع ابدا وبدورى قمت بتعميم تحياته فى رساله اس ام اس للشباب . لكنى احسست بان البعض لم تصله التحايا والوصل فرايت ان انشر هنا تحياته وتمنياته للجميع بعيد سعيد ..
    شكرا التلب .. اسمك ذاتو رسمك ..
    شكرا جبرا …

  10. neiam كتب:

    البروف:
    “حاج قسم الله شكلو كده ما كان قاعد فى الواطة” .. والله يا بروف النوع دا بكون ختري خلاس لانو بكون ناقش ايتها حاجة..علا بعمل ما ناقش الا هو ناااااااااقش بالحيل..
    التلب:
    والله انت راجل تلب تب .. حرم كيفنك وكل سنة و انت طيب و عقبال امانيك ..عيد سعيد و عمر مديد في طاعة الكريم..

  11. التلب كتب:

    شكرا أفليقا شكرا نيام و كل عام و الجميع بخير

  12. د.ياسين شمباتى كتب:

    البروف..الكلور دا عشان تبيضو بيهو نيتكم مع المسئولين يا جماعة!!!!

    بعدين حاج قسم الله دا هو براهو الماكان قاعد فى الواطة!!؟؟

    استرايكر..نفس السؤال اوجهو لى افليقا و خالد مدنى..

  13. د.ياسين شمباتى كتب:

    التلب..سلامات..مع انو ما عرفنا موقعك الجغرافى على قول ابوى السلاوى,,بس مرحبابك..وربنا يديم التواصل..

    ابوى السلاوى..سلامات..ينصر دينك,,اصلو افليقا دا ما بقتنع بى فتواى..

  14. البروف و الأحباب السمار سلام
    فى مطلع العام الحالى قامت فرق من هيئة المواصفات مع وزارة الصحه بتفيش و تحليل المياه الصحيه المعبأه فى الأسواق و نتج عن هذه الحمله أغلاق عدد 26 مصنع من أصل 28 جملة المصانع المنتجه للمياه المعبأه حينئذ ( حوالى 36 الأن)
    كل هذه المصانع أو فالنقل جلها كانت تفتقر للتجهيزات الكيميائيه و المعمليه لقياس الجوده وكمية الأملاح وتحاليل الباكتريولوجى بالأضافه لعدم وجود الأرضيات و الحوائط من المواد العازله ( يعنى فلتر مويه مربوط فى نهايتو ماكينة نفخ قوارير )
    فى فتره تقل عن الشهر عادت هذه المصانع للعمل بضغوط من وزارات و مصالح لها ريع من عائدات هذه المصانع رغم أن الماء الملوث و معبأ أخطر بكثير من الماء الجارى من الماسوره
    عليه لا بد من تكاتف الجهود ما بين و المواصفات و الصحه و جمعية حماية المستهلك للإرتقاء بهذه الصناعه
    نهتم نحن السودانيون بنظافة نظام الصرف من أحواض و منهولات و سابتك تانك ألا أننا لا نهتم بتغيير الماسوره الحديد التى تم مدها سنة 6 للتدليل على هذا نظف فلتر الماء داخل العداد إذا كان ليك عداد وحتشوف بلاوى
    أفضل الحلول هو ما قامت به حكومة الجنوب Two in One فقد حلت مشاكل ماء الشرب و مناقيع البلح و العيش بإنشاء مصنع بيره بتكلقه 37 مليون دولار……..تقول لى موقابى قال
    أب أحمد

  15. ملاحظه برجاء الأفاده من ذوى الأختصاص
    كثيرا ما نرى آليات حفر الأبار الأرتوازيه وهى تحفر الآبار الأرتوازيه فى الأحياء الجديده اى أنها ستستغل لتفريغ مياه السايفون لتصب فى نفس النهر الجوفى الذى يشرب منه الأنسان من محطات التقوبه فى الأحياء أو تسقى منه المزارع وسكانها من الأنسان و الحيوان
    هل هذه العمليه مرخصه ومسموح بها
    أب أحمد

  16. شكرا يا أب أحمد على المعلومة بتاعت الموية المعبأة و هي فعلا أشد فتكا من الموية الجارية اذ تجد الملوثات فرصتها في الباغة المقفولة خاصة في ظل التخزين السئ فيشتد عودها …لينا الله مع ناس المصالح المتقاطعة

    و كان جيت لحفر الآبار بتاعت السايفون برضوا تلعب المصالح المتقاطعة في الالتفاف على القانون,,,فآبار السايفون يفترض أن تكون باعماق سطحية..يعني العيون الأولى عند الحفر و التي لا تصل للحوض الجوفي (الارتوازي) اذ أن هناك كميات من الاحواض داخل الأرض توصل الآبار الارتوازية بأعمقها بعد النفاذ عبر طبقة صخرية سميكة و يجروا منها موية صافية…

    لكن كان لحق أخونا (حسن طحنية) و شد ماكينات واحد من الأحسبون عشان يحفروا ليهو بير سايفون سريع في بيتو يحصل بيهو المولد …ربما تنفذ الحفارات لتلك الأعماق السحيقة (أصلو بيقوم على أمرها ناس ما مدربين كويس) و تجي في المعطوبة و يختلط الحابل بالنابل و ربما يشرب جيرانو كدرا و طينا بعد ذلك…

    لكن الكويس انو ناس الموية غايتو لسة قاعدين ياخدوا عينات يومية من الآبار الارتوازية التي تغذي شبكة المياه في الأحياء للبحث عن E coli و هى المؤشر للتلوث بفضلات الانسان و ما عندهم يا أمي أرحميني ففي حالة وجود أو الاشتباه بتلك البكتريا تقفل بئر الشرب طوالي فلتطمئن يا أب أحمد … و عموما لا يصدق بحفر آبار ارتوازية الا على بعد مسافات محسوبة من الأحياء…

  17. العزيز عزت
    مشكور شديد على التوضيح الوافى
    وحمدا لله على سلإمة عصمت متأخره

  18. ألفاتح جبرا كتب:

    الأحباء الأعزاء

    التحايا والود ومرحباً بالتلب أضافة حقيقية للمدونة …

  19. مُخير كتب:

    العزيز أبو ناجي
    الحبان في كل مكان
    صباح الماء البارد القُُراح في ظهرية صيفية
    أتسائل كيف ننتظر من الحكومة تطوير أو تحسين البنية الأساسية من طُرق وكباري وخدمات وهي عاجزة عن توفير مياه صالحة للشُرب. لم أكن أتصور أننا في السودان عامة وفي العاصمة المثلثة على وجه الخصوص سنحتاج يوماً ما لشراء مياه معدنية ولدينا نيلنا الخالد سليل الفراديس، أو لم يحن الوقت للحُكام أن يشرعوا في توفير ضروريات العيش للشعب الفضل حتى ولو ليس لوجه الله بل لكسب ودهم للإنتخابات المرتقبة، لو كنت ساكن في الجخيس وتفضل مسئول الحزب الحاكم بالمحلية بتوفير خطوط إمداد لمياه نظيفة وكهرباء فحتماً سوف أفكر جدياً في أمر المشاركة في الانتخابات والتصويت لصالحه. يا ربي الناس دي قنعانة من خيراً فيها ولا شنو ؟؟؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s