النص المليان ! (لم ينشر) !

Posted: الأربعاء,17 ديسمبر, 2008 by الفاتح جبرا in ساخر سبيل

ذهبت لأبارك لجارى الجديد فى الحى حجتة رقم (40) ، وبينما كان عدد من الخدم والحشم يقومون بتحضير (اللقيمات) الما خمج (والرز باللبن) المغطى (بنشارة) جوز الهند البيضاء التى تناثرت عليها حبات (البناتى) ، كعادة السودانيين بدأ أحدهم الحديث عن (حال البلد) وإنعدام وتدنى الخدمات فى مرافقها المختلفة إلا أن ذلك لم يعجب (جارنا الحاج) والذى كان فيما يبدو مفتونا بمقولة (المتشائم هو الشخص الذى ينظر للنصف الفارغ من الكوب) إذ وجه الحديث لنا جميعا قائلاً :

–       يا جماعه إنتو مشكلتكم كووولها إنكم بتعاينو للنص (الفارغ) من (الكوب) وما قاعدين تعاينو للنص المليان !

–       مليان بتاع شنو يا حاج هسه الكهرباء دى ما الدنيا (شتا) وقاعده تقطع؟

  –   يا جماعه أنا قلت ليكم عاينو للنص المليان من (الكوب)  ..الحمدلله  انتاجنا من الكهرباء عشرمية مليون (واط) وعندنا (بحرى الحرارية) و(برى المدارية) وعندنا (خزان خشم القربة) وخزان (الروصيرص) وجايينا كمان (سد مروى) وسد (أبوحمد) يعنى كووولها كم شهر وح نصدر مما (نولد) !

   – طيب والشوارع المليانه كلها حفر ومطبات دى ؟
  يا جماعه أنا قلت ليكم عاينو للنص المليان من (الكوب) .. أهو شايفين إنتو برااكم بتعترفوا إنو نحنا عندنا (شوارع) ودى براها نعمة من نعم الله سبحانه وتعالى علينا مش كان ممكن ما (يكونش) من اساسو عندنا شوارع ، بعدين الحفر دى عندها سبع فوائد هسه لو ما الحفر دى (دكاترة العظام) كان إشتغلو؟ وإلا (الناس) البتقع ليهم العطاءآت بتاعتا ديل كانو لقو ليهم قرشين (حلوين)  وإلا (غسالين العربات) المساكين القاعدين ساكت ديل كانو فى الخريف إشتغلو ؟

– طيب والنفايات الماليه الأسواق والأحياء دى؟

  يا جماعه أنا قلت ليكم عاينو للنص المليان من (الكوب)..  بالعكس يا جماعة كثرة (النفايات) دى دليل صحة وعافية لأنو معناها إنو فى إستهلاك .. والاستهلاك دليل على إنو الناس قاعدة تشترى يعني الناس معاها (فلوس) وكون أنو الناس معاها (فلوس) معناها الناس يا شغالين يا قاعدين (يسرقو) يعني ممشين حالهم كويس. –  يا حاج كدى خلينا من ده كوولو .. أها رأئك شنو فى (المستشفيات) المكتظة بالمرضى وما لاقين علاج ديل  ..
  يا جماعه أنا قلت ليكم عاينو للنص المليان من (الكوب)..  بالله يسألكم الله  هسه أكتر عدد الناس الجوة (المستشفيات) وإلا (البرة) المستشفيا ت؟  أكيد الناس البره المستشفيات هم الأكتر يعنى ببساطه كده الناس الاصحاء أكتر من (العيانين) ,, يعني (الصحة) عندنا مية المية وإلا الكلام ده ما صاح ؟
 سيبك من ده كووولو يا حاج إنت ما شايف الإختناقات المرورية اليومين ديل ؟
  يا جماعه أنا قلت ليكم عاينو للنص المليان من (الكوب)..  كترت العربات الملت الشوارع دى بتوافقونى إنو معناها (الناس) بقت (اثرياء) والمواطنين آخر (فريون وترطيب)؟  وبعدين لما الحركة تزيد معناتو إنو السوق (متحرك) ولمن السوق يكون (متحرك) معناتو إنو الإقتصاد منتعش ولمن الإقتصاد يكون منتعش معناتو إنو معدل النمو فى تزايد وطبعن ده معناتو إنو قربنا نبقى (دولة عظمى) !

 

 

– طيب والحوادث الكل يوم دى ؟
– يا جماعه أنا قلت ليكم عاينو للنص المليان من (الكوب)..  الحوادث دى مش بيموتو فيها ناس ؟ يبقى بتساعد فى خفض نسبة النمو السكانى ؟ وبالتالى بتساعد فى خفض ميزان (المنصرفات) وده بدورو بيساعد فى إرتفاع دخل الفرد وخروجو من (خط الفقر) ! إنتو قايلين يعنى الحوادث دى ما عندها إيجابيات؟

 – أها خلى ده كلو أسعار الحاجات الزائده كل يوم دى كيف؟
– يا جماعه أنا قلت ليكم عاينو للنص المليان من (الكوب)..  إنتو ما عارفين يعنى  نظرية العرض والطلب بتقول إنو كلما زاد الطلب على السلع كلما إرتفعت أسعارها ؟ يعنى إرتفاع الأسعار ده سببو إنو المواطنين قاعدين يشترو (بشراهة) وطالما قاعدين بشترو بشراهة معناتو إنو (جيوبهم مليانه) وإلا ما كده ؟

لم يقطع حوار (النص المليان) من الكوب سوى (الساوند) الذى إنتصب فى (حديقة المنزل) وصوت يردد .. تيست .. تيست .. تيست … واحد إتنين تلاته … ون تو ثرى … !!

 

كسرة :

الراجل لازم يشوف (النص المليان) من الكوب ما دام حاجى ليهو 40 حجة !!

 

 

 

 

Advertisements
تعليقات
  1. ابكرون كتب:

    سلام جبرا والسمار
    تعرف الحاج جارك ده رفع ضغطنا….وده طبعا منطق الجماعة الحقيقي والبنسمعه كل يوم …بس المحيرني انتو الشعب السوداني ده كلو حفيان …؟؟؟؟؟ما بلبسوا جزم….أبكى يا بلدي الحبيب….!!!!

  2. aflaiga كتب:

    البروف : لم ينشر !! لا اخير ينشر !!! انت عاوز تبوظ ليهم فرحتم بحج السنه دى ولا شنو ؟؟ يا ربى يكون الحج الكماوى ؟؟ وهل يدخل الحج ضمن كترة الطله بتمسخ بيت الله ؟؟؟؟
    نحتاج فتوى من شيوخنا الاجلاء هنا :
    هل يجوز ضرب الحاج للمره الاربعين بالحذاء مقاس 40 ؟؟؟؟؟؟
    يعنى اسى لو الحاج ده بعد كل تلاته حجات ساق معاهو 3 حجاج وحججم على حسابو فى زول كان قال تلت الاربعين كم ؟؟؟؟
    بعدين يا جماعه انا حقيقة مستغرب لى قصة انو زول يمشى بيت الله ويقيف قدامو وبدل يجى راجع مولاى كما خلقتنى من الذنوب والمعاصى تلقاهو رجع زى الاول ومغسل سيئاتو عشان يبدا من جديد ( سيئه جديده سيره قديمه ) !!!!
    بالله مش القصه دى تحير اى زول اسى افليقا المسكين ده خايف مما بقى واجب عليهو الحج انو يمشى بيت الله بسهوله كده !!! اسى عليكم الله لو فى زول انت مديون ليهو قروش بتمشى بيتم عادى كده ؟؟؟؟ خلى ربنا تعالى الانحنا كلنا مديونين ليهو بديون تبقينا فى جهنم لحين السداد !!! والله انا شخصيا اقول ان الذهاب لبيت الله يحتاج عزيمه قويه ووصول لمستوى معين من الثبات للوقوف امام الله يا جماعه انتو قايلين وقفة بيت الله دى ساهله ؟؟؟؟ والله من وقف امام الكعبه ولم ترتعد فرائضه وعاد كما ولدته امه فليراجع حجه !!!!
    سبحان الله اسى الوقوف قدام الاستاذ فى المدرسه او الاب فى البيت بتخليك تطلع كل الحاجات السيئه العملتها وتتبرا منها وما ترجع ليها تانى !! خلى تقيف قدام ربنا …..
    كدى يا جماعه راجعو معانا الحته دى بشفافيه ونرجو من الذين حجو ان يورونا اللحظات دى كيف وهل احسو بخشية وتصدع حينها ولا القصه عدت ساكت زى زيارة الاسكندريه ولا شرم الشيخ ؟؟؟؟؟؟

  3. aflaiga كتب:

    وعشان ما يجى زول ناطى لينا يقول ( انتو كده بتشوهو فريضة الحج !!! ) انا كلامى واضح الحج اعظم من ان تذهب اليه وانت ماكل حرام وبمال حرام وتعود منه شايل حرام وترجع تانى تاكل حرام وتظلم !!!! من يشوه فريضة الحج هو من يجعل زيارة الله فى بيته كزيارة شرم الشيخ او شارع الهرم !!!!
    انا موقن بان الحج دعوة من الله لبيته لتعيش فى اجواء ربانيته وحين شرع الله الحج وضع له حكم مشروعيه منها الرهق والتعب فى التذلل لملاقاته ومنها المساواه بين عبيد الله فى الحج ومنها الصوم عن المفاتن حتى العوده ومنها الانقطاع للتبتل والعباده والعوده مغفورا مشكور . فاذا اسقطنا هذه الحكم على ما نراه الان من حج لوجدنا اننا نهدى لعدونا وسيلة انتقاص من عظمة الحج فدونكم من يرجع من الحج ليغش ويسرق ويظلم ومن يذهب للحج ليعاكس ويحتال ويسرق ودونكم من يتخذه وسيلة للتباهى ….
    اللهم اجعل يوم دعوتنا لبيتك يوم صدق بمال حلال طيب وسهل امر وقوفنا بين يديك فهو ويم عصيب يحاكى يوم الوقوف الاعظم واعدنا من حجنا اذا يسرته تائبين عابدين حامدين شاكرين من ذنوبنا واثامنا وشرور انفسنا متعافين ومتحللين …
    كنت قد ناقشت مع الاخ صالح ويما ان من افضل العمل عند العبد المقتدر بدلا ان يرسل شنطه عرس او هدوم عيد او مساعدة مصاريف لاهله ان يجمع كل كم سنه ما يحجج به احد اقربيه الاولى بالمعروف ووافقنى على ذلك واثنى على الطرح وحضنى على ان يكون الامر مشروع للدراسه اخترت له عنوان من ادبنا الشعبى ( وديه عشان يااامن ) وكنت قد بررت ذلك بان عددا من شبابنا البعيد عن الله الذى وصل لمرحلة لا يفيق منها من غيه وتيهه فى الدنيا الا بصدمه قويه مثل الوقوف امام بيت الله وفى جو عظة ربانيته وكان المشروع ان نقوم كل عام باختيار شاب مؤثر فى وسطه الاجتماعى وابتعاثه للحج على نفقة الخيرين ومن ثم بدلا من ان يحكى لنا زوار سوريا ومصر عن بنات شارع الهرم ويتبادل سىديهات البتاعات مش احسن الود الشاب يجى من الحج يحكى لينا قصص على شاكلة :
    تعرفو يا فرد والله لمن وقفت قدام بيت الله حسيت بانى سغير كيف وطار لى التحشيش والسفاهه كلها …
    تعرفو يا فرد لمن بيتت بمنى حسيت بانو الدنيا دى اتفه من انو الواحد يولع فيها سيجاره ولا يخت ليهو سفه ولا شيشه ولا يحنك ليهو حنك بيش مع دامه …
    تعرفو يا فرد لمن طفت طواف الوداع كرهت اى كريسماس وراس سنه سهرنا فيهو للصباح بنودع السنه وحسي بانو وداع بيت الله ده شيئ رهيب ….
    ولا شنو يا فرد ؟؟؟؟؟؟؟

  4. حاج أحمد السلاوى كتب:

    الأخ الفاتح جبرا..وكل القبيلة .. سلام
    تعرف يا الفاتح أخوى أهو الزى الجماعة الأحسبون ديل الكل سنة ماشين وجايين من الحج ( من عشرين إلى تلاتين حجة )هم العاملين الزحمة الشديدة الحاصلة فى الحج كل سنة …اول حاجة هم بيعتبروها رحلة سياحة دينية ( والدليل الحج السياحى الطلعوا لينا بيهو .. ابو كام مليون .. مابعرف ) ويمشو يضايقوا الناس الجاية تحج لأول مرة..والمسألة كلها فشخرة فى فشخرة..ومظاهر فارغة.. وزى ما قال الدينمو يمشى الحج ويرجع وهو زى ما هو ياكل حق الناس ويظلم يمين وشمال..ويروح السنة البعدها يستغفر ويرجع … ونحن القاعدين قريبين من بيت الله ما قاعدين نحج كل سنة عشان ندى فرصة للناس الجاية من بعيد ومتكلفة وعاوزة تحج حجة واحدة بس …
    كنا عاوزين نعرف المداحين غنوا ليهو .. افصد مدحوا ليهو وسكسكوا ليهو وقالو شنو ؟
    غايتو ربنا يتولانا برحمته .. ويديكم كلكم حجة واحدة .. أن شاء الله .

  5. مُخير كتب:

    حبيبنا جبرا
    الحبان في كل مكان
    دخلت البيت الصغير وتسكعت في عرصاته وإعدت قراءة مقال “مغبشة ساكت” وعّن في بالي تساؤل برئ طرحته هناك فإذ بأبو ناجي يجيب عليه في مقال اليوم. ومؤداه:
    – ألا يرغب الحُكام في مواصلة الكنكشة والتمتع بإمتيازاتها بما فيها الحج للمرة الحادية والأربعين؟،
    لما لا يسعوا في تلبية الحد الأدنى من متطلبات الشعب الفضل بغية الحصول على أصواته في الانتخابات المقبلة؟،
    ولاّ النية على التأجيل أو صرف النظر عن الإنتخابات بالمرة.
    فإذ بأبو ناجي حلال المشبوك يجيب اليوم، فالطبقة الحاكمة تتشاطر عقلية النظر إلى النصف المليان المزعوم، ويرون أنهم خلال عقدين من عمر الزمان حققوا المعجزات، علماً بأن وبمنتهى البساطة الإنجاز الحقيقي لأي حاكم هو أن يوفر فرص الحصول على مأكل مناسب ومشرب صحي ومسكن لائق وحد أدنى من الخدمات لجموع شعبه، ولا أعتقد أن هذه عصية على نظام الخرطوم، لكن العقلية التي تمنع نشر مثل هذا المقال تعكس بلادة مستفحلة وغباء مستحكم وتقتل أي أمل في حدوث إنفراج في ظل هذا النظام .
    يا رب البأس أذهب البأس والبؤس إلى غير رجعة أنت وحدك الشافي ولا شفاء إلا شفائك يا أرحم الراحمين.

  6. aflaiga كتب:

    حاج السلاوى : هو فى زول جاى من الحج بيجيب غنايين …
    فى ادبنا الشعبى زمان قبل ما يظهر الدين الجديد !! كان كبارنا بيقولو ليك والله انت الحج ما ينضفك !! باعتبار ان الحج طهاره بالجد جد وكانو يقولون لمن ينوى الحج شابا مالك من اسى يا زول انت شفت للدنيا دى شنو ؟؟؟ من باب ان الذهاب للحج يوقف اى مفسده فاحسن تسويهو بعد تكمل حركاتك كلها وفى لطائفهم يقولون الواحد بعد ده باقى ليهو يحج ويعمل البروستاتا ويموت !!! فبالله شوفو التغيير الجديد فى الحياه السودانيه التى كانت تهتم بالاصول بلا قشور وملامح دين واضحه اسى بقت تهتم بالقشور بلا اصول …
    ما زلت اناشد اعمامنا اللى حجو واخرهم ولدنا شمباتى بان يدينا حركه حركتين كده عن الحج بعيون شافت من قريب …

  7. neiam كتب:

    يابروف جارك دا ابقا عليه عشرة هو ظااااتو من النص الملياااااااااان!!

  8. د.ياسين شمباتى كتب:

    البروف..انتو مالكم ما بتعاينوا للنص المليان!!؟؟؟ كان تقولوا ليهو انحنا ممكن نعاين للنص المليان اذا انت وبقية جماعتك عاينتوا للنص الفارغ,,وكدة تكونوا فى الجانب السليم..

    قبل يومين حضرت كلام المسئول الاعلامى للبعثة السودانية للحج,,الراجل جاى من بيت الله وما بخاف من ربنا ويحكى عن انجازات البعثة والامراء..والله والله انا كنت مع اهلى فى البعثة وشفت البهدلة والجهجهة بتاعن السودانيين,,خليك من المرضى والعجزة وكبار السن,,وبى عيونى واضنينى شفت و شاهدت مشاكل وجدالات الامراء الما بيخجلوا من الحجيج او الاغراب!!! فى النهاية يجى واحد زى دا يكذب والناس تصدق,,حتى الحجاج البيستطلعوهم لازم يكونوا منهم..

    اسمعوا دى : يوم المبيت بى ودوهم بيتوهم فى مزدلفة بحجة انو منى ممتدة لغاية عرفات!!! وبعد الوقوف بعرفة رجعوهم مزدلفة وباتوا فى نفس مكانهم الاول!! عليكم الله دى ما ملعوبية!!؟؟؟

  9. د.ياسين شمباتى كتب:

    افليقا..ربنا يزورك بيتو ويجعلك من عمارو..الحمدلله دى ما المرة الاولى النمشى فيها بيت الله_ما تحسبنى مع الجماعة_ جيت عمرة كم مرة,,بس الحج غير..والوقوف بعرفة ومشقة المشى بالارجل ما ساهلة..والله الجو الروحانى عجيب وما بتوصف,,لو ساكت قعدت تعاين فى اختلاف السحنات واللهجات واللغات بتعرف عظمة الحج والحكمة من مشروعيتو..الكلام دا يا ولدى ما بتكتب,,ربنا يزوركم وتحسوهو براكم..

    بعدين حق الناس ما بيتمسح بالحج,,خصوصا المال العام وحق الشعب و ظلم الناس,,لانو دا داخل فى حق العبد,,يعنى لو الانسان ما عفا ليك حقك راح,,برضو قتل النفس..الفتوى دى ما من عندى,بل معروفة وممكن تراجعوا فيها العلماء..عشان كدة زمان اهلنا الكبار كانوا لما ينووا الحج بمشوا يعافوا كل البعرفوهم ويطلبوا منهم الصفح والسماح..

    بقولوا حق الناس والرقبة_يعنى القتل_ لما تطلع عرفات بستنوك تحت,,اول ما تنزل يجروا يتعلقوا ليك فى رقبتك تانى!!! شفتوا جنس الشقاوة دى!!

  10. حنين كتب:

    البروووف الرائع والمدوناتية الكرام .
    سلام من الله عليكم والحجاج ربنا يتقبل منهم .
    عرف عن الحجاج بن يوسف البطش والتنكيل والطغيان ويقال أنة عندما حضرة الموت قال :((اللهم أغفر لى فأنهم يظنون أنك لن تفعل )) فقال أمير المؤمنين الخامس عمر بن عبد العزيز (( والله لقد أعجبنى حسن ظنة بالله )). هذة المقدمة السغيرونية سقتها على كلام أخونا أفليقا وهو يشير إلى أن الحاج يجب أن يتنظف من الارجاس والمعاصى عندما يريد الذهاب للحج . وفى ما معنى الحديث أن الله لا ييأس من العبد إذا يأس من رحمة الله ومغفرتة مهما عمل من سؤ وإن الله ليفرح بعودة عبدة اليه فرحا شديدا ويقول :(( يابن آدم إذا أتيتنى بغراب الارض خطايا وأتيتنى لا تشرك بى شيئا غفرت لك ولا أبالى )).

  11. aflaiga كتب:

    حاج شمباتى : تقبل الله يا راجل يا حاسى بالوجعه .
    عليك الله احكى للشباب الاجواء الروحانيه بصفتك اول حاج شبابى مننا !! وورينا من اللحظه الالى بتاعة النيه وحتى طواف الوداع فشوقنا لتلك الديار يغالبه فقط خوفنا من الوقوف بين يدى الله ولم نستعد بعد ..
    بالله قلت لى ودوهم وين وقالو ليهم شنو ؟؟؟ انا خايف السنه الجايه يقولو ليهم بيتو فى جده وارمو الجمرات فى الرياض وطوفو بدوار الامير بندر …..

  12. ابكرون كتب:

    تعرف يا افليقا : زي ده لو حجه 4 مليون مره برضوا واردها ومخلدا فيها ابدا ما دام بياكل حق الناس وعايش وبحج بالسحت…..ياخ يلغبوا علينا نحن عايزين يلعبوا علي ربنا …..؟؟؟
    قرات اليوم في الدار عن الاخ الذي ضحي بالقرد وجايبين صورة القرد في بداية مرحلة السلخ بباب منزل الشخص المضحي…..ما عايز اناقش انه الموضوع ده حلال ولا حرام …..او صح ولا غلط……فهل يعقل في دولة الرسالة وهي لله ان تصل الحاله بمواطن ان يضحي بقرد لانه لا يملك شئ……
    بالله يا جبرا اسال لينا الحاج (هنا الكوب فارغ كلو لا نص مليان لا شي) رأيه شنو في رجل ضحي بقرد ….؟

  13. neiam كتب:

    يتسابق العديد من عباقرة الاحسبون حاملين أقلامهم وريشهم ولسان كاذب لرسم لوحات خادعة من الانجاز في عهد الانقاذ بعضهم يعلم ان ذلك هراء و يعلم انه يستخف بعقولنا و يمعن في ذلك اذلالا لنا و بعضهم مصدق لما قيل له من سدنة و منتفعين فيزيد الكوز كوزين و يقسم حتي تغشي قلبه اكنة فيموت و هو مقسم علي باطل ..وقديما قال عنترة..

    لا تسقني ماء الحياة بذِلة بل فاسقني بالعز كأس الحنظل
    مـاء الحيــاة بذِلة كجهنم وجــهنم بالــعز أطيب منــزل
    والغريب انهم يحجون الي البيت كانما يذهبون الي الاردن او ماليزيا و كله بغرض المنجهة و الفشخرة و لا يميزون بين الحج و النزهة..فاساس الحج ان يكون المال مالك و ان تكون خالي من الديون و التبعات و ان تكون طيب الرزق من مطعم و ملبس .. عن أبي هريرة رضي الله عنه قال : قال الرسول صلى الله عليه وسلم : ( أن الله تعالى طيب لا يقبل إلا طيبا وإن الله أمر المؤمنين بما أمر به المرسلين فقال تعالى : ( يأيها الرسل كلوا من الطيبات واعملوا صالحاً ) المؤمنون 51وقال تعالى : ( يأيها الذين أمنوا كلوا من طيبات ما رزقناكم ) ثم ذكر الرجل يطيل السفر أشعث أغبر يمد يده إلى السماء:” يا رب , يارب ” ومطعمه حرام ومشربه حرام وملبسه حرام وغذي بالحرام فأنى يستجاب له )..اما من اراد ان يقنع احسبوني بان يكف عن اكل مال الناس او ان يترك المنطق المقلوب و الكوب المثقوب فكأنما اراد ان يقنع الثعلب بترك اكل دجاج الناس..

  14. nono كتب:

    التحية جبرا /
    الاخوة اصحاب المدونة لكم التحية
    النص الفارغ من الكوب اصبح تفشي الجريمه في البلد بصورة مريبة يعني الدار كل يوم جايبة ليها كم جريمة هاك ياطعين باسكاكين حاجات تخوف يعني ناس ال الثلاثة تسعات 999 ديل بين شغالين معا ناس الشنوا مابعرف ديك .

    ناس ال40 حجة ديل حايكفر كيف لما مشوا الحج كل سنة

    كسرة/ الناس تمشي 40 مرة انتو سوي في القيد الشنواااااااا مابعرف داك
    قالوا الحجيج قطع طالب نور البقع قلبي ذاد وجع حماني القيد منع

  15. حاج أحمد السلاوى كتب:

    الفاتح جبرا . وكل القبيلة ..
    يعنى الحاج مِذكِّر دة ( الحاج أبو 40 حجة) أخدكم فى ضربة خاطفة وقعد يعدد ليكم مزايا الكوب المليان..لحد ما حيركم إنتو زااااتكم..هو أصلو كان بيحج ولاّ كان قاعد يذاكر ؟غايتو الناس ديل عليهم جِنس حنك …!!!
    والحاج دة بعد ما يوصل عدد الحجات إلى 44 حيسموه ابو 44 ..نفس مقاس الحذاء الذهبى… يا موسى عبدالله !!!
    الدينمو ..أفليقا.. يعجبنى فيك نيتك للحج بنية صادقة “فشوقنا لتلك الديار يغالبه فقط خوفنا من الوقوف بين يدى الله ولم نستعد بعد ..” لكن شايف الأخ الحنين حنين عمل ليك شوية مقدمات .. يعنى حِج وتعال …. وامشى حج تانى واستغفر .. إن الله غفور رحيم .

    كسرة صغيرة .. يا جماعة الخير تفقدوا أخوانا ..واخواتنا.. وأولادنا ..وبناتنا .وأسألوا عليهم..إن شاء الله ما فى عوجة ..؟
    ربنا يجمعنا جميعا فى حجة واحدة ..بقدرة وكريم ..مطوفنا حيكون د. شمباتى بحكم موقعه الجغرافى .

  16. neiam كتب:

    البروف:
    جارك الجديد دا مامعقول يكون حجا 40 حجة و ماعندو بيت و بما انو لا يمكن يكون ماعندو بيت اذن عندو بيوت تانية و بما انو عندو بيوت تانية اذن عندو حريم تانية و بما انو عندو حريم تانية معناها المرة الجابا جنبكم دي تكون رقم 4 ..هو جارك دا مالو كلو اربعات يكون شغال في شركة بيجو ..ولا يكون فعلا ابواربعة و اربعين زي ماقال السلاوي..
    افليقا:
    آآآآآآآآآآآآآمين يا رب ..

  17. الأحباب السمار

    النص المليان نــــــــًص مـــــــــلان

    قبل السلام كنا لامن نعلق زى التعليقات دى كانوا بيقولوا لينا نحن فى الجنوب كيت و كيت

    المويه قاطعه
    : ياخى ما تحمد ربك نحن فى الجنوب بنضاير الطحالب من المستنقع و نشرب المويه
    الكهربا قاطعه
    :أحمد ربك نحن فى الجنوب……. بنشوف بى ضو اليراعه
    عيش مافى
    : ياخى ما تحمد ربك نحن فى الجنوب بتاكل البسوندا (مافى واحد يسألنى الباسوندا دى شنو )
    الملاريا كترت و ما فى وقايه
    : نحن فى الجنوب بنتمسح بى بعر البهايم من الباعوضه

    الأن حنحمد ربنا أنهم رطبوا وشايفين النص المليان

    to Admin
    Congratulations Number of Comments exeeded 5000 Coments today

  18. Stricker كتب:

    شكرا اخونا طارق اب احمد
    واضيفك ان عدد البوستات اصبح 304 بوست مقسمة على 13 قسم .
    لكن الشكر يوجه لكل الاعضاء ولكل المتداخلين من كتاب وقارئين فى هذه المدونة.

  19. مشاكل كتب:

    سلامز

    و الله و الله و الله مشتشعلقين و مشتاقين
    و شوقنا بحر
    دموعنا مطر

    كدي في البداية قولو لي مبروووووووووووك
    و داير اسمع زغرودة زغرودتين لو معانا جكس على السريع كدا
    الحمد لله و الحمد لله كتييير اشتغلت في شركة دال العقارية
    و يا سهيل تاني الفطور معاك في محل واااحد

    افليقا بطل جرس قال خايف قال … بعدين انت الحج عليك واجب ولا شنو
    يعني انت من اصحاب الملايين ولا بتذاكر من ورانا زي ما قال سعيد صالح

  20. لو ما تست ون تو أتوقع السؤال التالى أها وكيف خليت باقى الحجاج بى هناك , سمعنا أنهم ممرمطين فى المينا والليلتم كملت وعايشين على صدقات المحسنين
    : أها جيت لى ياخى خليك متفائل وعاين لى النص المليان من الكبايه أها الناس الرجعوا تلتاشر الف و الفضلو أتناشر ونحنا طبعن شعب كريم و معطاء فقمنا قلنا أفضل شئ إنو ندى السعوديين فرصه يلموا ليهم شوية حسنات على شية دعوات صادقه من أهلنا الطير أقصد الغبش ديل بعدين برضو ما تنسى أنو نحنا بعنا طياراتنا لى بتاع رغيف كويتى خليهو كمان يعمل ليهو قرشين حلوين من المولد دا

  21. مشاكل
    ألف مبروك وعقبال ما نشوفك حاج
    وما تركز على الفطور البره ناس دال فى الشغل حامضـــــيــــــــن شديــــــد

  22. مُخير كتب:

    الحبان
    صباح التفاؤل والأمل
    صباح بطعم الزمن الجميل الله يرحم ليلى المغربي كانت تغمدها الله بغفرانه تصّبح على السودان كلو من إذاعة أم درمان وتقول لصديق الصباح طريح الفراش بالمستشفى خُذ الدواء في مواعيده، وتجدع ليك كذا بيت شعر لإدريس جماع أو إسماعيل حسن أو التجاني يوسف بشير أو القدال ويعقبها مقطع للكاشف أو الكابلي أو أبوعركي أو أو… كانت صباحات ندية ….
    أفليقا: شنو يا أبو حمودي في غمرة الروحانيات وسمو شعيرة الحج “وعشان ما يجى زول ناطى لينا يقول …” يا فردة تفائل الوعي مرتفع والنظام محفوظ والأمن مستتب ونسأل الله أن ييسر لنا جميعاً أداء الفريضة وأهديك وكل الحبان رائعة كوكب الشرق “القلب يعشق كل جميل” كلمات بيرم التونسي التي يصور فيها الحج:

    القلب يعشق كل جميل وياما شفت جمال يا عين
    واللي صدق في الحب قليل وان دام يدوم يوم ولا يومين
    واللي هويته اليوم دايم وصاله دوم
    لا يعاتب اللي يتوب ولا في طبعه اللوم
    واحد مافيش غيره ملا الوجود نوره
    دعاني لبيته لحد باب بيته واما تجلى لي بالدمع ناجيته

    *****
    كنت ابتعد عنه وكان يناديني
    ويقول مصيرك يوم تخضع لي وتجيني
    طاوعني يا عبدي طاوعني انا وحدي
    انا اللي اعطيتك من غير ما تتكلم
    وانا اللي علمتك من غير ماتتعلم
    واللي هديته اليك لو تحسبه بايديك
    تشوف جمايلي عليك من كل شيء اعظم
    سلم لنا تسلم
    *****

  23. مُخير كتب:

    مكه وفيها جبال النور طلة على البيت المعمور
    دخلنا باب السلامغمر قلوبنا السلام بعفو رب غفور

    فوقنا حمام الحما عدد نجوم السما
    طاير علينا يطوف الوف تتابع الوف
    طاير يهني ضيوف بالعفو والمرحمه
    واللي نظم سيره واحد ما فيش غيره
    دعاني لبيته لحد باب بيته واما تجلى لي بالدمع ناجيته
    *****
    جينا على روضه هلا من الجنة
    فيها الاحبه تنول كل اللي تتمنى
    فيها طرب وسرور وفيها نور على نور
    وكاس محبه يدور واللي شرب غنى
    وملائكة الرحمان كانت لنا ندمان
    بالصفح والغفران جاية تبشرن
    ا يا ريت حبايبنا ينولوا ما نلنا
    يا رب توعدهم يا رب و اقبلنا
    دعاني لبيته لحد باب بيته واما تجلى لي بالدمع ناجيته

  24. مُخير كتب:

    وإهداء خاص للأحباب الشيخ محمد صالح والزووووووول
    وكل من يرغب في سماع القصيدة أعلاه بدون موسيقى لكن بذات اللحن الرائع وبصوت المُنشد أبو محمود وفرقة أبي أيوب الأنصاري (الأخوة أبو شعر) من سوريا:

  25. شكرا يا مخير على هذه الروحانيات و في هذا الصباح الجميل و التي نحن في أشد الحوجة اليها في زمن الماديات و التباهي هذا…

    أربعين حجة و ما بعيد ينشد له المداحين بتاعين الزمن دا (حج البيت حلو حلا)
    حليل ناس البرعي و حاج الماحي و حليل ناس ليلي المغربي التي سمعتها تقول مرة:

    (ايها الصياد فكر مرتين قبل أن تطلق سهامك نحو ذلك الطائر)

    و قطعا يكون غنى بعد الكلام دا محمد وردي (بالله يا طير قبل ما تشرب تمر على بيت صغير … تلقى الحبيبة بتشتغل منديل حرير …. لحبيب بعيد)

  26. neiam كتب:

    الدانقوست صباحكم نور زي البلور
    ياناس النص المليان نصكم فاضي وينن:
    ودالزبير:
    سيدي بيه و لا سي دي كي
    انت ما مجبور علينا نحن مجبورين علي
    زووووووول:
    مبروووووووك يازول اما زلت في سقط اللواء ثم الدحول فحومل
    بشار:
    بشار يا ملك الكنار و يا امير البلبل
    ابكرون:
    ومشينا بعيييييييد بعيييييد شايلين العيد
    علي سنكل:
    كيف انك؟
    مشتهنك!!
    بالله جزمة بوش دي موش جقلو وووووووب!!!

  27. البشاوى كتب:

    البروف والسمار
    عليكم الله الكوب كلو فاضى والبيلقى نص مليان يلبد بيهو

  28. neiam كتب:

    البشاوي:
    ياخي ما تبقا (متشاعم) .. شيل ليك نص فاضي واديهو لفلان يملاه ليك .. هسع الخرفان القمت بيها في اتبرا دي ما مليانة ..اها صحانة خالد مدني الفضيتوها يوم الجمعة دي ما ملانة ولا شربوت افليقا داك يااخوانا ما تحمدو الله..

  29. nono كتب:

    اصحاب المدونة لكم التحية/
    ربنا يجعل النص الفارغ من اكوبكم مليان 100%
    وخليكم متفائلين ذي الحاااااااااااااااااااااااااج الحاجي دشليون حجة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s