أيامكم يا المريخاب

Posted: الخميس,18 ديسمبر, 2008 by عزت in اخرى

استغربت عندما حيا  الدكتور (الكرسني) البروفسير (ودوارد) الباحث البريطاني في شئون السودان و صديق السودان منذ الاستقلال عقب انتهاء محاضرته بالأمس في قاعة الصداقة بفوز المريخ بالممتاز، اذ قال له: “كويس جيتنا هذه المرة و لقيت اصحابك المريخاب يحتفلون في الشوارع بفوزهم بالممتاز بعد خمس سنوات و كمان أردفوا عليه بكأس السودان….

 

زال استغراشي عندما علمت أن البروفسير (بيتر ودوارد) مريخابي بالتجنس يهوى الكرة السودانية بقدر شغفه بالتاريخ و للتراث و لتاريخ و حاضر السودان بحكم معايشته للحقب المختلفة من تاريخ السودان الحديث و التي كتب عنها الكثير و تقف شاهدا على تلك المعارف كتاباته عن السودان في شابتراته  Chapters  المختلفة في  عشرين مطبوعة عن الشأن السوداني، مجلة دراسات أفريقيا الحديثة، المجلة البريطانية لدراسات الشرق الأوسط، العالم الثالث الربع سنوية، سودان نوتس أند ريكوردز، دراسات النزاعات، و الوفاق فضلا عن كتبه التي زينت المكتبة السودانية عن السودان مثل الشقة الخاصة و القومية السودانية Condominium and Sudanese Nationalism  أنا ما عارف بترجموها كدا و الا لا …لكن يبقى معرفته العميقة بالسودان التي اكتسبها منذ الستينات عندما قدم الى السودان و عمل متطوعا في مرافق عدة اذ عمل مدرسا للغة الانجليزية في المدارس و الجامعات و عندما عاد كبيرا عمل بالتدريس في جامعة الخرطوم و لم يفارقه حبه لفريق المريخ….

 

قطعا شاف أهداف (عبد الحميد السعودي) بالأمس عندما قاد المريخ الى الفوز الكبير المستحق على الوحدات الأردني بثلاثة اهداف مقابل هدف في المباراة التي جرت بينهما مساء الأربعاء ضمن مباريات الذهاب لدور الـ16 لبطولة دوري أبطال العرب السادسة.


saodiee

مبروك للمريخ لكن كان في داعي للهدف بتاع الجماعة ديل و في الدقيقة الأخيرة لعمر المباراة…غايتو ربنا يكضب الشينة لأن المريخ ربما يندم للتهاون الذي لازمه في آخر الدقائق و خلى ناس الوحدات يقلصوا الفارق من الأهداف……

 

مبروك للمريخ و ربنا يوفق الهلال اليوم مع وفاق سطيف حامل اللقب في أستاده بأمدرمان

 

 

Advertisements
تعليقات
  1. معليش يا حاج السلاوي حصدنا السمسم بتاع أمبارح و اتحصد معه بكل أسف تعليقك…

    (السمسم ما كفاهم … جلبنالم سعية)

  2. حنين كتب:

    د.عزت المرطب وسمارة النايمين لسة .
    سلام وصباحكم خير .
    إنت برضو بتعكس وبتجى تدافر تجيب قون مع الجماعة ماشاءالله عليك لياقة فل.
    زكرتنى بى حكاية شابترات دى عندنا زميلنا أيام المرحلة المتوسطة جاءبعد الاسبوع الثالث من العام الدراسى وسألعن مافاتة فى مادة الادب الانجليزى قام زميلو قاليهو ((لحدى أسى أدونا سبعة شباتررر …)).
    مبروووك للأحمر الوهاج والعقبال للازرق الجريح وقالو إفيانى خاتنو راس حربة الليلة بنشبع ضحك…

  3. ابوالمنذر كتب:

    عزت ياموثقاتى….
    المريخ والحمام الميت….
    مبروك غلب الوحدات يامريخاب الا اكان ده مستوى المريخ هناك مشكله كبيره فى المواصلة فى هذه المنافسه..
    حقيقة ماذدا الحاقد يسعى لتدمير الفنان السعودى وهو امبز مهاجم سودانى ونحن نقول كده بعنى طمبج رزق رزق وطيلة المباراه بخلى فريقو لاعب عشره الا لحظة رزقو فى احراز اهداف الملح!!!!
    الزعيم اسمو هيبه وفى ميدانو اسد وما نيل الوصيف للممتاز الا فرصة التعادل الرزقيه الجاتو من اتحاد مدنى وكان يكون يلعب لا هسع ومابشيل الممتاز اذا كانت الفرص متساويه ومباراة نهائى الممتاز كانت رقم116 للزعيم فى ميدانو دون تلقى هزيمه يعنى ما صدفه تعادل المريخ وشيل الكاس لانو فرصة يغلب معدومه بقانون مقبرة الزعيم للفرحانين….

  4. مشاكل كتب:

    سلامز

    و كيييييييييف ما يكون مريخابي و هو شايف النجمة فوووووق الهلال
    اكيد هو صهيوني
    هياااع هااااع هااااع
    ولا ما كدا يا ود الزبير

  5. neiam كتب:

    مشاكل:
    سلامززززززز..مبروووووووك ليك انت دا (الوظيفة)..احتفظ بحق الرد (الانتصار)حتي حضور الزووووووول..

  6. ابكرون كتب:

    آليت علي نفسي يا دوك عزت :::اغتبارا من اليوم ان لا اشاهد او اشجع اي فريق سوداني لا هلال لا مريخ لا الفريق القومي ما لم يختفي من شاشة الرياضه (نوهائيا ) ببلادنا كل من كمال شداد ومازدا (والبنت الحمريطية )البتقدم رياضه ديك…..وبما ان ده ما حيحصل ويستحيل وسيظل هؤلاء 20 سنه تاني فسلام ووداعا لتشجيع كرة القدم
    الحرطوم صدر تحت توقيعي وختمي…ابكرون
    خلال كتابة هذا البيان علمت بفضيحة الهلال في ملعبه وبين جماهيره الان

  7. ابكرون كتب:

    سقط سهوا اسم احمد بابكر وفوزي المرض

  8. مُخير كتب:

    الحبان المريخاب
    عجبنا وسر بالنا النصر المؤزر وهو نصر للكرة السودانية
    نأمل وندعو أن يتحقق الإنجاز الكبير وهو الفوز بالكأس فالانتصارات مهمة لبلوغ النهائي غير أن الأهم والأبقى هو الحصول على الكأس هو الذي يبقى في ذاكرة التاريخ وهو التتويج الحقيقي للجهود وهو المعيار الأساسي للتقدم، وبالتالي فإن هذا الفوز هو خطوة في التجاه نحو الكأس ونتمنى التوفيق للهلال أيضاً غير أننا لن نفرح كما يجب إلا عندما نحصل على الكؤوس فهي التي توجد لنا مكانة في ساحة كرة القدم العالمية وترفع ترتيب دولتنا في قائمة الاتحاد الدولي لكرة القدم.

  9. مُخير كتب:

    عودة إضطرارية
    علمت بنتيجة مباراة الهلال ووفاق سطيف الجزائري وأحزنني جداً تحطم الرقم القياسي لعرين حبيب الملايين بعد 119 مباراة دون هزيمة، لكن أضم صوتي للحبيب أبكرون، ورُب ضارة نافعة حتى تعلم القبيلة الزرقاء أن الرياضة ليست بخير وأن التغيير مطلوب مطلوب مطلوب

  10. د.ياسين شمباتى كتب:

    المريخاب..مبروك وربنا يعمر بيتكم كمان وكمان..ومبروك عليكم كلتشى..

    صديقى مشاكل..مبروكز وربنا يوفقك فى كل خطوة..لكن خيانتك ريحتها فايحة!!!!!

  11. مُخير كتب:

    الحلوين سلام
    قرأت اليون تصنيف الفيفا ومصر حققت أعلى مرتبة في تاريخها (16) عالمياً وتأتي بعدها من الدول العربية تونس (46) والسعودية (48) والجزائر (64) حى العراف المحتل (72) والبحرين التي لا يقل عدد سُكانها عن سُكان أمبدة تحتل المرتبة (80) وما هي مرتبة سودان العزة والفخار مؤسس الاتحاد الأفريقي وووو تصوروا (93) لهذا نؤكد أن الفوز بالبطولات هو الأهم والإنجاز الأقيم ونتمنى أن ينصلح الحال ونتقدم على الأقل رياضياً.

  12. مُخير كتب:

    الحلوين سلام
    قرأت اليوم تصنيف الفيفا ومصر حققت أعلى مرتبة في تاريخها (16) عالمياً وتأتي بعدها من الدول العربية تونس (46) والسعودية (48) والجزائر (64) حى العراف المحتل (72) والبحرين التي لا يقل عدد سُكانها عن سُكان أمبدة تحتل المرتبة (80) وما هي مرتبة سودان العزة والفخار مؤسس الاتحاد الأفريقي وووو تصوروا (93) لهذا نؤكد أن الفوز بالبطولات هو الأهم والإنجاز الأقيم ونتمنى أن ينصلح الحال ونتقدم على الأقل رياضياً.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s