شايفه شغلها !

Posted: الأربعاء,24 ديسمبر, 2008 by الفاتح جبرا in ساخر سبيل

(س) يعمل فى وظيفة مرموقه تحتم عليه السفر إلى خارج البلاد بين الفينة والأخرى ، عند عودته من أحدى (السفريات) التى كانت لأحدى دول (شرق آسيا)  توقفت العربة التى كانت تقله من المطار أمام (الفيلا) الأنيقة  التى يسكنها ، ضغط على زر (الجرس) حيث هرعت إليه (أم الأولاد) لتكون فى إستقباله كالعادة إلا أنها فوجئت به وقد أحضر معه (فتاة) فارعة الطول ممشوقة (القوام)  خضراء العينين مستديرة الوجه (كاعب) – كاعب دى معناتا شنو؟ – (تسمرت) أم الأولاد فى مكانها مندهشة إلا ان الإندهاش قد زال عنها جزئياً بعد أن إستراح (س) من (وعثاء) السفر  وأخبرها أن (جاكى) هى (خادمة) قد إستقدمها معه لتدير شئون البيت مؤكداً لها أنه قد قام (شخصياً) بعمل (المعايتة) لها بمكتب تسفير الخادمات بتلك الدولة .

إستلمت (جاكى) الشغل وقد برعت فى (تنظيف) المنزل وترتيب (محتوياته) كما برعت فى وضع (الماكياج) على وجهها وإرتداء (الجينز) والبلوزات (البودى) مما جعل (أم الأولاد) – بعد أن أحست بالخطر الداهم- تخاطب (س) قائلة :

–          ما ملاجظ يا (س) للبس البتلبسو البت دى و(الحاجات البتجلطا) فى وشها دى؟

–          (متصنعاً البراءة) : مالا ؟ فى شنو؟

–          شنو المالا ؟ ما شايف (الأناقة) الفايته حدها دى؟

–          الناس ديل أصلهم بيلبسو كده ! بعدين إنتى مالك تلبس التلبسو بس المهم  (شايفه شغلها كويس) !

 

لم تكن المسألة عاوزه ليها (درس عصر) لمعرفة أن (المدام) قد أصابتها نيران الغيرة من (جاكى) وأن أجهزة (الإنذار المبكر) لديها قد بدأت فى العمل غير أن (س) كلما فتحت ليهو (السيرة) كان (يفرملا) بعبارته تلك (المهم شايفا شغلها كويس) ! حتى جاءت الطامة الكبرى يوم أن أخبرها إبنها الصغير (حماده) بانه قد شاهد (بابا) وهو يقوم بحضنة (خطافية) تؤكد (تلاحم قوى الشعب العاملة) عندا كان يهم  بمغادرة  (البيت) ذاهباً نحو المطار فى سفرية أخرى مما جعلها تقول لنفسها :

–    أيواااا .. أتاريها شايفه شغلها كويس وأنا ما  عارفه  !

فى اليوم التالى لسفر (س) قامت (المدام) بإنهاء خدمات (جاكى) – وسط دهشة الأخيرة- بعد إكمال كافة الإجراءآت وتسفيرها إلى موطنها ، عند وصوله إلى المنزل عائدا من السفرية حاول (س) أن يكون طبيعياً وهو يلاحظ عدم وجود (جاكى) ، ساعة … ساعتين … تلاته … وعندما لم تظهر (جاكى) :

–          (فى نبره حاول أن تكون عاديه) : البت (الشغالة) دى مشت وين؟

–          أنا ما كلمتك؟

–          كلمتينى بى شنو؟

–          مش سفرتك كده قومى يا البت أطرشى و(أغمرى) وطلعى دم بى (مناخيرك) !

–          أها وبعدين ؟

–          لا بعدين لا قبلين نادينا (الإسعاف) طوااالى ومشينا وديناها (المستشفى) !

–          أها وبعدين؟

–          لا بعدين لا قبلين .. قالو لينا أعملو فحصوصات

–          أها ولقيتوها نضيفه !

–          لقيناها كوووولها نضيفه بس قالو الدم فيهو  (شوية أيدز) !

–          (إندهاش فى الركب وإستغراب فى المفاصل مع  عدم قدرة على الكلام)

–          مالك ذى الصبت فيك مطرة !

–          لا لا مافى حاجه … بس حقو نمشى تشوفا !

–           تشوفا وين ؟ شفت الطول والقوام الممشوق داك ؟  البت دى (وحاتك إنت)  بس  تلاته يوم (حست) حست … حست … وضعفت …ضعفت .. ضعفت …لحدت ما بقت قدر (الموبايل) !

–          وشحنتيها ؟

–          بالحيل ,, شحنتها لى أهلها ولى هسه بتكون  ماتت وكمان (رصيدا)  إنتهى  !!

 

هرع (س) إلى غرفته قام بفتح جهاز الكمبيوتر الموصل بالإنترنت وعلى ماكينة البحث قوقل Google

قام بكتابة (كيفية إنتقال مرض الأيدز وأعراضه) :

–          إنت جاى من سفر ما ترتاح … مقابل الكمبيوتر بتسوى فى شنو؟

–          لا بس فى (موقع) بتاع إستقدام (خادمات) قلت نشوف لينا واحده

–          كلمهم يجيبوا لينا واحده .. بس تكون شايفه شغلها كويس  !!

 

Advertisements
تعليقات
  1. محنك كتب:

    الاستاذ د. جبرا
    والاخوه الكرام
    نهنئكم بعودة التدوين والابداع

    قلت لى شايفه شغلها مالو فى السودان مافى كتيرين بشوفو شغلهم ما يعينوهم

  2. البروف والسمار صباح الخير و عوده دائمه يا رب

    أم الأولاد طلعت زوله واعيه حافظت على البيت وأدت الراجل درس عمرو ما ينسا
    لكن الغريب فى الموضوع أنو القصه دى شكلها حقيقيه خاصة مع إستعمالكم للحرف الأول من الأسم initial ودى ما حصلت قبل كده

    أنا الأول موووش

  3. البشاوى كتب:

    البروف الرائع والسمار
    الله يجازى شيطان الخدم المستوردات — واحد معرفة عندو شغالة من النوع
    المستورد دة تحلف تقول جاية من روتانا حسة عليها قيافة ونضافة ماتتلقى
    فى اميرة خليك من خدامة صاحبنا اتكسر فيها جنس تكسر لامن غلبتو البسويها
    وزوجتو تراقب الموقف بحذر وترقب ما مدياهو اى فرصة للانفراد كانت لاعبة دفاع منطقة والمناطق المجاورة فجاتن الخادم اختفت بدون اى مقدمات والراجل زعلان
    ويبرطم بان الخادم لصة لقد سرقت منه مبلغ كبير بالعملة الصعبة وهربت وسألته
    المدام وين جواز سفرا شيلو وبلغ الشرطة عشان يقبضوها فكان يتعلل بان له واحد معرفة فى جهة امنية عليا نصحه بعدم اثارة الامر فى دوائر الشرطة وهو
    حيتصرف بهدوء وذكاء للايقاع بالخادم اللصة ومرت شهور ولم يظهر للرجل مال
    بل ظهر له بنون من النوع المستورد
    كسرة
    اول مرة اجى الاول سجِل ياعزت

  4. البشاوى كتب:

    عادل اب أحمد
    صباح الخير هو ناس محنك ديل بايتين مع البروف ولا شنو ؟ والله بالطريقة دى
    مانجى الاول ابدا

  5. حنين كتب:

    البروووف وسمارة الكرام بمن فيهم الاول والماالاول .
    صباح الخير وكل عطل فى الكيبول وإنتو طيبين .
    يالبشاوى إنت بتسأئل عن المرطب وهو بى هناك عاملليهو حادث مرورى بسيط وماعارفين تفاصيلو لكن يامرطب ربنا يكتب السلامة وإنشاالله الجاياك وقعت فى العربية .
    فىنفس الجريدة من عدد اليوم شايف الكاتبة منى أبو زيد كاتبة موضوع مشابة لموضوع البروووف وهو عن الغيرة لدى النساء وطيارة العين عند الرجال لكن المشكلة سببا حمادة دة الوداهو يعاين للخصوصيات شنو …

  6. علي سنكل كتب:

    البروف والمدوناتيه الكرام
    تحية وسلام . . .
    مالكم كنتو صانين كده وفي ناس غياب غريب كده وين ناس أفليقا وباقي الناس؟ ود الزبير يا داب أمس عرفنا سببه ، ونتمنى له النجاح الباهر في مشروعه الحضاري.

    زمان لمان جيت هنا جديد لاحظت ظاهرة ” الشايفات شغلن ” ديل في معظم بيوت الأخوان الذين زرتهم.
    عدا واحد من الأخوان زرته في البيت وما عنده خدامه ، وكانت مرته موجوده تتونس معانا فقلت أحرش عليه المره. فسألته ليه يا فلان ما عندكم خادمه شايف الناس دي كلها عندها خدامات؟
    فبدأ يعدد سلبيات الخدامات فقال :
    الخدامات الأجنبيات ديل بيخربو لغة الأطفال ويؤثرو في تربيتهم وما نضيفات وبيسرقو من البيوت حاجات يرسلوها لأهلهم . . .
    وأكملت زوجته الكلام : وممكن يسرقو منك راجلك زاتو .
    فعرفت ليه ما عنده واحده ” شايفه شغلها “.

  7. مُخير كتب:

    البروف والحبان سلام
    صباح الخير
    نحن ما لنا بقينا زي ناس جوة !!، غايتو جنس دوشة … كنت لايص في “سليم يعالج سقيم” ولقيت أبو عصمت وقال لي حرروا الدانقا لحدي الشبكة ترجع وبتاع فجأتن لقيت القصة هايصة بي هنا وفيها كذا أول ….

    البروف: كان في زي إنزعاج كدة من إمكانية إستفادة النظام من أفكارك المجانية حول أنواع وأصناف ضرائبية ممكنة، لكن شايف الخطورة ممتدة إلى داخل الداخل… عشان كدة بنقول ليك ناس عواطف شاربات موية ناس سعيد وما حتنطلي عليهم قصة المستورد ده والله يقدر شجر الدوم على التموين المحلي.

    سنكل: بساساق ليك في الجي الجاي بحداك وأقول يمكن أصادف مرة ألاقاك …لكن شكلك طفشت فرد مرة.

  8. الأستغراش) حالة كونك
    (إندهاش فى الركب وإستغراب فى المفاصل مع عدم قدرة على الكلام)
    فى مختار الصحاح كانت حالة إستغراب مصحوبه بى إندهاش

    (عصر الأتصالات هو)
    … حست … وضعفت …ضعفت .. ضعفت …لحدت ما بقت قدر (الموبايل) !
    – وشحنتيها ؟
    – بالحيل ,, شحنتها لى أهلها ولى هسه بتكون ماتت وكمان (رصيدا) إنتهى !!
    ويعًرف الشحن بأنه يتم إما بالكهرباء أو باأسكراتش أو بتحويل الرصيد وأحيانا بالطياره كما أن هناك أنواع أخرى من الشحن الناتج عن الأتصالات

    وال Google
    محرك بحث يعمل ليك من الحبه قبه أياك أن تقترب منو لتبحث عن أعراض مرضيه تشعر بها وأياك أن تبحث عن Asian Servantsبالقرب من حكوماتكم المحليه

  9. nono كتب:

    التحية جبرا الاخوة اصحاب المدونة لكم التحية جميعا /

    حقيقة انقطاع خدمة dsl تسبب في ايقاف عجلة الحياة
    وكنار موبتل خدمتم ضعيفة شديد ربنا يسهل
    العطل والعطلة جاية ربنا يعين الجميع…..

    الاستاذ جبرا (س) دة مالوا مال القراءة ام دق
    دة شعر ماعندة لية رقبة شنوااا مابعرف داااااا ك

    ستعرفونها حبيبتى
    اذا كنتم لاتعرفونها فلابد
    لانها حبيبتى ممشوقة القوام
    ترمينى بالسهام
    ستعرفونها من شعاع
    عينيها والخفر
    من ترنيمة الوتر
    من السحر
    عندما يقبل الندى
    فم الزهر
    ستعرفونها

    قالوااااااااا العرجة لية مراحها.
    ليه يا كروان خليت عشك باريت الغربة البتغشك
    فارقت البلد البتريدك بالصندل كانت بترشك
    ليه يا كروان سبت ديارك ومشيت خليتهم سمارك
    دي الغربة الحتت نوارك ما تسيبها تقلل مقدارك
    دا البعد الحاصل كان منك ليه نرمي اللوم على اقدارك

    ليه يا كروان خليت ناسك ومشيت للناس الماناسك
    انت المعروف بين جلاسك معروف بي رقة احساسك
    ليه تنسى عيون النيل والليل والريد الحابس انفاسك
    ليه يا كروان بعدك طول وما عاد تغريدك زي أول
    انا عارفو حنينك ما تحول عشق الأوطان ما بتأول
    اصلو الانسان ما بكون انسان لو بنسى قديم زمنو الاول

  10. حاج أحمد السلاوى كتب:

    الرائع دوماً جبرا ..وكل القبيلة .. سلام
    أول حاجة حمداً لله على السلامة الرجعتو كلكلم سالمين بعد الغياب الإجبارى ..
    وبعد داك نجى على الكواعب الأتراب ديل .. أصلو الرجال عيونهم طائرة وزائغة …غايتو جِنس كبكبة.. الواحد أول ما يشوف ليهو كاعب ماشى ساكت فى الشارع .. يبقى هو زاااااتو كعب وتجيلو ضربة قلب وخمة نفس وشحتافة روح ومحل يمشى ما يعرف .. فما بالك فى الزول البيمشى لحد أهل الكواعب هناك ويجيب ليهو واحد كاعب يقعدوا معاهو فى البيت .. لكن بصراحة عواطف دى لعبتها صاح …وطلعت واعية تمام ..وهى زاااااتها شايفة شغلة أحسن من الكاعب الشرق اسيوية …الجايبنها عشان تخدمه… وياريت كل العواطفات يبقن زيها ويحافظن عبى بيوتن ..أها يا جماعة الخير حسة فى زول فيكم تانى بيمشى يشوف ليهو كاعب من شرق آسيا … لكن أنا شايف فى السودان فى شغالات بس كلهم كواعب منتهية الصلاحية…حقو عواطفه تجيب ليها واحدة منهم عشان صاحبنا (س ) يبطل الحركات القرعة ( الأرعة .. بالمصرى ) بتاعته ويرجع لصوابه وعواطفه .
    _ ابو عصمت .. حمداًً له على السلامة والجاتك فى عربيتك سامحتك ..وإن شاء الله ما نشوف .. كاعب .. أقصد .. شر !!! إن شاء الله بس ما يكون سبب الحادث كاعب كان ماشى فى الشارع …

  11. nono كتب:

    حاج أحمد السلاوى
    أصلو الرجال عيونهم طائرة وزائغة …غايتو جِنس كبكبة.. الواحد أول ما يشوف ليهو كاعب ماشى ساكت فى الشارع .. يبقى هو زاااااتو كعب وتجيلو ضربة قلب وخمة نفس وشحتافة روح ومحل يمشى ما يعرف ..
    كسرا/الحالة دة عامة ولة خاااااااااااااااااااااااااااصة ولة شنوا مابعرف داااااااااااااااك

  12. حاج أحمد السلاوى كتب:

    nono
    أنا غايتو فى البعرفو داااااااااااااااااك… الحالة دى عامة وما خااااااااااااااااااصة …
    وما شايف فيها فرق لو بقت خاصة ولاّ عامة … الكبكبة ياها الكبكبة … وفى ناس بتظهر عليهم طوالى .. وناس تانين .. بيقدروا يداروا عليها ..وبسووها تِحت تِحت .
    أها الراى شنو ؟

  13. nono كتب:

    أها الراى شنو ؟الراي رايك
    مااااااانحنا معشر النساء دايرين نعرف السبب الحماني العيد هنااااااااااااااك احضروا

  14. نيام كتب:

    الدانقوست انتو بجيبو النت دا من وين ..
    وانت يا بروف ما ادوكم كاعب ..اصلو شنو يعني ما ادوكم ناس كعب بن زهير و كعب بن الاشرف و كعب بن مالك ..طيب دي ما اختهم الكانت في كوالالامبووووور..
    عندنا برضو جماعة جيرانا كده شايفهم شايفين شغلهم في البلد دي ، ربك يجيب العواقب سليمة..الغريب ست البيت تعمل ضيفة تتحنن و تتمدد مع الموبايل و هاك ياحكي عن الخدامة الجابوها ليها بتعمل أي حاجة ..تغسل و تطبخ و تمسح و تلفح و تكسح و مرات بتلفح حاجات صعبة خلاص و لمن فجأتن تجي سيرة الايدز ويقولوا عندها تلقي الابو اخد ليهو تره و الصبيان كل واحد نطط عيونو..

  15. مشاكل كتب:

    سلامز
    مساء الخيرات
    غايتو ما عارف النسوان ديل بفكرو كيف
    لكن في البداية المفروض عواطف دي تدي عمنا عدد واحد كعب عالي في نص راسو تخليهو ينسى الكواعب و الكواكب
    قال شغالة آسيوية قال
    و الله البيوت ما اتخربت الا لمن جابت ليها سكرتيرات و خدامات و مصايب من وين ما معروف
    الله يستر الحال
    و دكتور عزت الف حمد لله على السلامة و الجاتك في حديدك عذبتك

  16. علي سنكل كتب:

    د. بقا ريتش كفاره وحمداً لله على السلامة ، وخلي بالك في الطريق وما تعاين للكواعب.

    نكته قديمه لكن لجيل ناس مشاكل حتكون جديده:

    قال ليك يا أفليقا واحد رطاني من عنديكم كل يوم يجي من الشغل ياخد ليه نومه ، ومن ما متغرب يجيب حليب التمر ويبدأ في النقه مع مرتو.
    ولعتي النار ؟ ختيتي الحله؟ الكوارع نجضت؟ الطعميه دي مالها مسيخه ما سويتي ليها ملح!
    المره تعبت منو تعب شديد. جنبهم جيران عزابه ، قالت ليهو إنت يا شيخ الدين ما تشيل قزازتك وتمشي تقعد مع العزابه ديل.
    راقت الفكره له وبقى كل يوم قاعد مع العزابه والمسأله سلكت ، فيها كنكان وفيها طاوله ومرات فنانين.
    المره شافت الراجل حريص على المشي للعزابه كل يوم ، الجن ركبها ، فقالت ليهو:
    – يا راجل إنت كل يوم بقيت مساهر مع العزابه ديل ، ما يكونو بجيبو النسوان الكعبات.
    رد الرطاني:
    – يا مره إتلهي ، هو في مره أكعب منك إنتي؟

  17. حاج أحمد السلاوى كتب:

    nono
    الأسباب الحماكم العيد هناك تحضروه دى أنا يمكن ما أقدر اعرفه .. لكن اعتقد أننا اليوم وصلنا مرحلة مهمة لا بأس بها ونقطة يمكننا ننطلق منها ( إنتو معاى .. يا ..ودالخلا …ويا ابكرون ؟؟ ) لتحديد الأسباب البتخلى الرجال تبقى عيونهم طايرة وزايغة.. فعندما تقوم عواطف وتهمل بعلها ( زوجها ) وما تشوف شغلها كويس .. يقوم هذا البعل العزيز ويجيب واحد كاعب كارب.. إن شاء الله من نيجيريا… بحجة مساعدة عواطف فى شغل البيت وتكون هنالك فى أجندة خفية لا يعلمها إلا هو ..فوجود الكاعب فى البيت يمكن يحرك غريزة الغيرة عند عواطف زى ما حصل مع أخينا المدعو ( س) ويخلى كل أسلحة الدمار الشامل والغير شامل تشتغل وتحرك المسائل ..خصوصا لما يكون الكاعب انيق وبيعرف يلبس كويس… جينز وبلايز ..والذى منو …وبكدة يكون ضرب عصفورين بحجر ( مش حجر شيشة ) واحد..وأطرف ما فى الموضوع إنو فى ناس ( زى الأحسبون ) بيفتكروا إنو هؤلاء الكواعب ممكن يدخلوا فى خانة ما ملكت أيمانهم ..قيقوموا يتصرفوا تصرفات تجانب التوجه الحضارى..وتقوم أسلحة الحذاء الشامل .. اقصد الدمار الشامل تشتغل ويحصل ما لاتحمد عقباه… وقدتصل الأمور إلى الفصل بين القوات..المتحاربة وخراب البيوت … عشان ننصح كل عواطف تشوف شغلها وتخلى بالها من زوجها… أها عرفتى السبب …ولاّ لسه ؟.

  18. زووووووول كتب:

    استاذ الاجيال البروف الفاتح جبرا سلام
    اخوتى الاكارم حيران جبرا سلام
    اخونا الدكتور عزت بقا ريتش كفاره ليكا وسلامتك والحمد لله طلعت فى الحديده
    اخوتنا الاكارم الجوه والبرا سوداننا
    اولا عدنا باذنه والعود احمد . لم نغب بامرنا لكنها المقادير التى لا مفر منها وفى هذا المقام يحضرنى عذر عمنا (كوشات ) عندما ساله خاله : مالك ما بتجينا فرد عليهو والله يا خال لا جفاوه ولا شيتين بس انا بالنهار فى حاحاى الطير (اشرح يا نيام )وبالليل فى شراب المريسه . المهم لقيتكم منورين كالعاده واخر يا كواعب واخر يا (شغل ) .
    طيب نرجع لموضوعنا بتاع (العماله ) الاجنبيه فالسيده جاكى ستجد مرتعا خصبا خاصة اذا كانت زوجة صاحبنا من ناس غتى قدحك وناس هاك الويها وقطعا لو كانت (شايفه شغلها) صاح ما كان عمك فكر فى الفكره دى .
    كسره : اقول ليكم حاجه وما تزعلوا ؟ المفروض اى واحد فيكم يفكر فى الدبل عشان تزيدوا امة محمد دى
    كسره : بالمناسبه وين افليقا ما فى مشاهد ولا ايه
    تحيه خاصه لاخواننا المغتربين شمباتى ومخير والسلاوى ومن لف لفهم
    ود الخلا
    يا زوووووول انت ما بتنوم ولا شنو .

  19. نيام كتب:

    كدي النصبح علي الجماعة ديل قبل عقاب النت دا يحسا..
    زووووووول:
    الداير يوروه الحاحاي دا منو .. كدي اليمرق من الساساقي دي..
    علي سنكل:
    انت قاعد تمشي وين اصلك..مشيت و جيت و رجعت البيت آ آ آ آ ..ياتو..
    عزت المرطب:
    صحي عاملين الكرامة حقتكم انت و عصمت في سيدي بيه..والله ياخي مشوار لكن انتو ما هينين علينا ..
    ودالخلا:
    وينك ياقبيلة ..يجيب شنو حي الكاعب و لا المكعب..حرم الجعليه علا تصبحك في ام طرقا عراض..

  20. ودالفتيحاب كتب:

    قمبله وراجنها ناس المدونه سسسسسسسسسسسسسلام البنيه شايفة شغله انتو مالكم حارقاكم اظهرو على حقيقتكم وبطلو الكبكبه .س مابراه الجماعه كتار الله يعافينا .الشمباتى وينك برضو الشبكة؟

  21. الأعزاء سلام و صباحكم خير و نور

    و الحمد لله انقشعت غمامة النت و عاد التواصل…

    و الحمد لله الذي أخر بتاعت الدبل كابن ثواني و الا كان لحقنا أمات طه فجات في ركن العربية اليمين الورا و طوطح لينا العربية نصف دورة نعتذر كان الكتابة مميلا شمال شوية و اطمئن يا السلاوي و سنكل الدنيا كانت صباح شديد و لسة الكواعب ما انتشروا … لكين باقي لي حتى المنتشرين بقوا ما بقلبوا العربات…

    شكرا لكل من اتصل و كل من سأل و تحية خاصة لأمير الشرق… باقي لي يا نيام الليلة قطع شك بكون ضابح الليلة…

    بنمشي الليلة و ننقل ليكم بالصورة الافتتاح بكواعبه و اترابه انشاء الله

  22. BakriMusa كتب:

    المشكله انو مع (الكاعب ) الشرق اسيوي (س) ده يجيب ليه سواق شرق اسيوي (كعب ) يقوم هو كمان (يشوف شغلوا) كما خاصل في بعض الدول ..
    حمي الله مجتمعاتنا شر هذه الظواهر السالبه .. قولوا معاي آآآآآمين ..

    د. عزت الف حمدالله على السلامه ..

    علي سنكل:ـ يا اخي قطعت مصاريني

    كسره:ـ لكل عابس الوجه جَهْمُ

    واحده بتقول لزوجها جارنا كل يوم يبوس زوجته انت ليه ما تسوي زيو
    قال ليها يمكن ما ترضي

  23. salih كتب:

    الاكارم
    سلام
    احد الاصدقاء وكان زميل دراسة في الثانوي ولكنه آثر الاعمال الحرة منذ وقت مبكر وما شاء الله (رَشَّتْ معاهو) سألته زوجته ان يحضر لها خادمة (و الرجل منذ صغره رجل متدين) فاستشار صديقنا(ع) -فقيهنا منذ الثانوي- والذي اشار اليه بان يتزوج الخادمة من اول يوم وان يخبر زوجته قبل ذلك وطبعا لا زال بيت ذلك الصديق من غير خادمة. فقيهنا (ع) بنى فتواه علي استحالة منع ان تقع عينك علي امرأة (خادمة)تعيش معك في بيت واحد.

    لو تعود الرجال علي فضيلة غض البصر (وهذا وعد من الصادق المصدوق عليه ازكى الصلاة السلام) لذاقوا حلاوة الايمان وقبل ذلك لرأوا في زوجاتهم ما يحببهن اليهم ..لا اقول جربوا ولكن اقول افعلوا وستجدون ما يسركم.

    لو اننا كلنا تعودنا والتزمنا بهديه عليه ازكى الصلاة السلام وبنواهي ربنا عز وجل (آيات الاحكام في سورة النور: قل للمؤمنين يغضوا من ابصارهم ….. / قل للمؤمنات يغضضن من ابصارهن …. الى آخر الايات لنعمنا بحياة ملؤها الحب والوئام والمودة والسكينة والرحمة.

    الذي لا يجد في نفسه الدافع القوي لطاعة ربه فلينظر للموضوع من زاوية اخرى: الرجل السوي لا يرضى ان ينظر ضعاف النفوس لاهله ومحارمه فليعف هو من النظر لمحارم الاخرين حتى لا ينظروا لمحارمه.

    كيف برجل/ امرأة يحترم ذاته/ا ان ينظر لما عند الاخرين وبنفس الوجه يقابل ربه واهله , الا يستحون؟ ولو من انفسهم؟ فاذا مات فيهم الحياء عُدُّوا من الاموات!

    الى كل متزوج(ة): لم يرغمكم احد للزواج بمن تعيشون معهم بل كان خياركم الذي قاتلتم من اجله … فقط لو اتقيتم الله حق تقاته لرأيتم شريك حياتكم اجمل وافضل مما ترون الان فالقلوب بين اصبعين من اصابع الرحمن فاسالوه ان يثبت قلوبكم علي طاعته ومحبته ومحبة اهل طاعته وان يديم الود بينكم وشركاء حيواتكم …

    وهناك من الاساليب الكثير لتجديد و لادامة الوُد والمحبة منها التهادي ولو باليسير والكلمة الطيبة ( سُئل عليه ازكى الصلاة السلام مرةً عن من احب الناس اليه فاجاب:عائشة) و نحن كسودانيين من ابخل الشعوب في ابداء الكلمة الطيبة – بين الازواج – لماذا؟!!

    الدعوة الى التعدد تعوزها بعض الاشياء: اولا ارتفاع نسبة العوانس نسبة لان جيل او جيلين من الرجال لم يتزوجوا لاسباب اقتصادية- او هكذا يرونها – فلو ركزنا علي توفير وظائف لهذين الجيلين وساهمنا في تخفيف اعباء المعيشة ودعم التعليم العام والصحة حتى يكونا في متناول الجميع لاسهمنا في حل هذه المشكلة وتجنبنا عواقبها الاجتماعية وغيرها… التعدد يحل المشكلة جُزئيا لان اعداد المعدِّدين قليلة جدا( بعض الرجال الغير مسئولين لو كان الامر بيدي لما سمحتُ لهم الزواج ولو بواحدة وهؤلاء ما اكثرهم!)

    تذكير: لمن يكثر النظر من الجنسين ( ومن غير ايراد النصوص: والله – هذا هدى السُنّة – لن يهدأ بالكم ولن ينشرح وجدكم ولن تسكن نفوسكم .. والضيق والسأم رفيقكم وابأس بها من رفقة) …
    عندكم روشتة السعادة والهناء وقعها طبيب الامة عليه ازكى الصلاة السلام وهى في اتباع هديه وتوجيهاته
    سؤال: اين منبع ومستودع الحب والمودة عند الانسان؟
    اجابة: في القلب
    سؤال: من يتحكم في احوال القلب؟
    اجابة: قلب العبد بين اصبعين من اصابع الرحمن يقلبه كيف يشاء, يصبح الرجل مؤمنا ويمسي كافرا ويمسي مؤمنا ويصبح كافرا … الحديث)

    خاتمة:
    * حاول/ي اهداء كتاب او قراءته مع نصفك الاخر
    *اختاروا الكلمات الطيبات في مناداة بعضكم البعض
    * وصية BakriMusa ضعوها في الحسبان
    *وخير ختام وصيته عليه ازكى الصلاة السلام ان استوصوا بالنساء خيرا .. الحديث/ وخيركم خيركم لاهله وانا خيركم لاهلي … الحديث.

  24. مشاكل كتب:

    سلامز
    ينصر دينك يا دكتور صالح

  25. علي سنكل كتب:

    aflaiga:
    How I wonder where you are
    and I wonder what you do
    Are you somewhere feeling lonely
    or is someone loving you

  26. علي سنكل كتب:

    د.صالح
    رعاك الرحمن ما أقمت وما رحلت وحياك الغمام.

  27. ودالفتيحاب كتب:

    د صالح
    السلام عليكم ورحمة الله وبركاته.جزاك الله عنا كل خير والكلمة الطيبة صدقة نسأل الله ان يجعل لك بكل كلمة صدقة.
    هذا الموضوع اليوم شغل الكثير كل بمشربه وموضوع قريب منه تحت عنوان عين طايره تتهم فيه كاتبتنا الاستاذة مني بجريدة الرآي العام الرجال بأنهم عيونهم طايرة .فهل علمنا بناتنا وهم مقدمات على الزواج معنا التضحية ونكران الزات وتحمل الرجل وهداءه اجمل الكلمات هذه ايضا ثقافة تنقصنا كثيرا المرأه السودانيه لديها موروث ان الرجل عندما تقبلي عليه كثيرا سوف يتزوج عليك لذلك تجد المرأة تنتظرا طول عمرها متي سوف يتجوز عليها لتقول اها ماقلت ليكم .بالله ده منطق بدل ماتعطى وتنشر السعادة مع زوجها تجدها تمسك كل حبال الحب والمشاعر الطيبة حتي لايضحكن عليها أخواتها بعد زواج زوجها .لذلطك الكلمات الحلوة نادرة وعبارات الحب معدومة وكله رجالة في رجالة والله يعين الرجال.

  28. حاج أحمد السلاوى كتب:

    الأخ د. صالح .. وكل القبيلة .. سلام .
    جزاك الله خير الجزاء على المداخلة الجميلة التى..وياها المحرية فيك دائماً .. تأتينا بالقول الفصل فى الوقت المناسب..نسأل الله العلى القدير أن يجعل هذه الكلمات الجميلات فى ميزان حسناتك وزادكم الله من علمه وفضله..ولا فُض فوك..ونحنا قبيل شِن قلنا ؟؟؟
    يا خوانا إنتو مش ملاحظين إنو فى مواضيع يبداها الرائع أبو ناجى بأسلوبه السهل الممتنع والقفشات الملعوبة.. زى دى مثلاً ” بالحيل ,, شحنتها لى أهلها ولى هسه بتكون ماتت وكمان (رصيدا) إنتهى !! ” وتنتهى بمداخلة من د. صالح مدعومة بكل الأسانيد العلمية والفقهية.. يا للروعة… فى روعة أكتر من كدة .. يا ود الخلا ؟.
    أدام الله مودتكم وإخاءكم دوماً.. ما دامت الحياة .
    -أفليقا. الغائب الحاضر …إنت قلت لى الفكى ..إسمو منو ؟
    -أخونا بشار .. ردّ الله غربتك ..طوّلت الغيبة .. يا رجل!!
    -ولدنا خالد مدنى .. جابوه ليك .. ولاّ سمعتو ..ولاّ ……. ؟

  29. salih كتب:

    الاكارم
    سلام
    الاخ الفاضل مشاكل: اقسم لك يمينا انني ما واجهت معضلة (حتى في زمن الامتحانات في المدارس) الا وجدت لها الحل الناجع في سُنّته علية ازكى الصلاة واتم التسليم … اسأل الله ان يجعلني واياك من السالكين طريقه العاملين بسنته الناجحين دنيا واُخرى .. امين.

    عمنا الفاضل سنكل :تحية طيبة من عند الله مباركة والمثل بقول اكان ما شُفتَ سنكل شفت نيام! التحية لك وللاسرة الكريمة.

    الكريم بن الكرام ودالفتيحاب: كَدي قول لاصدقائك جرِّبوا وابدأوا … لا بدّ للرجل من ان يبدأ بالكلام الطيب .. هكذا علمنا المصطفى عليه الصلاة واتم التسليم … وبعد داك يا ود الفتيحاب شوف العسل يدفِّق كيف! اعلم ان الكثيرين منا يتحججون ب ؟ الكبرياء ؟ لا بُدّ ان تكون هناك مسافة بينه وبين زوجته؟ ولعمري ما اكبرها من مخالفة ( هُنّ لباسٌ لكم وانتم لباس لهن … الاية, وما اقرب اللباس للجسم!) كما انه لا كبرياء(الكبرياء السودانية) بين الرجل وزوجه…

    اعلم اننا جميعا قد درسنا وتدارسنا سيرة الحبيب المصطفى علية ازكى الصلاة واتم التسليم ولكن لا باس من اعادة دراستها بين كل حين واخر وان نعيشها في حياتنا فهو قدوتنا ومعلمنا.

    شيخ الكرام ابناء الكرام حاج أحمد السلاوى : تحية لك ولمن معك : الحل بين ايدينا (بس) قول لمن تعرف من الاخوة لامن يعيدوا اكتشاف العسل ما يحاولوا يشربوهوا كله … لان التمتع بالنظر للعسل احلى من لعق العسل وكمان المسألة فيها زيادة حسنات بنص الحديث.

  30. البشاوى كتب:

    صالح الصالح
    حياك الله وحفظك
    على سنكل
    افليقا وعواطفه يغردون مع البلابل (رجعنا لك)
    السلاوى
    طيارة العين دى مابايتة ومقيلة
    الزووووووول
    حمدا لله على ظهورك وبرمى حبة لوم عليك
    ود الخلا
    هع حسة عندى مشروع افتتاح مكتب استقدام مديرات منازل مش خادمات هل
    ترغب فى الاستثمار معى بس اهم شرط مدير المكتب يكون مأذون
    من يأتى بحثا عن كاعب نعمل ليهو عقدين ( من مودة ومن منى) هلم يالسلاوى
    ويانيام ويأفليقا خدماتنا تصلكم اين ماكنتم وكما قال ود الزبير لنا التميز ولكم الاختيار
    شمباتى
    حلوة دى (زووووووول) لاحظ السبعة واوات دى مش بتشبه السبعة وحدات ديلك
    ارسلوها الى 7 اشخاص تكونو من الفائزين

  31. د.ياسين شمباتى كتب:

    سلامات وجمعة مباركة..اخير كل زول يشوف شغلو…

    ود الفتيحاب..ياها الشبكة..

    البشاوى..خلاص ,,ليبيا فتحت,,لكن الزوووووول قافل موبايلو مالو!!!؟؟؟؟

  32. neiam كتب:

    البشاوي:
    تعرف يا بشاوي قالو كان في شركة المدير بتاعها عايز يختار رئيس قسم موظفين قام جمع كل المستوظفين العندو و قال ليهم في وظيفة جديدة عايز واحد يحفظ السر و يكتموا حتي علي مرتو..الوظيفة دي انا عايز اختار ليها واحد يكون عندو شخصية قيادية و يكون ما بسمع كلام مرتو ..طيب البسمع كلام المره يجي بجاي..قامو الجماعة كلهم مشو بجاي الا واحد..
    -ياسلام انت الرجل الانا عايزو عندك شخصية و محترم و …
    -في الحقيقة يا …
    -وكمان متواضع و مؤثر
    -في الحقيقة….
    -وكمان خشمك عندك يعني سرك في بير
    -في الحقيقة ياسيادتكم…
    -في الحقيقة انت الشخص المطلوب
    -لا لا لا … في الحقيقة هي قالت لي اذا حصل الناس مشت أي اتجاه انت ما تمشي معاهم..فاهم..
    رائك شنو يا بشاوي في الكلام دا!!!ناس سنكل و السلاوي ديل بمشو و لا بقعدوا..
    افليقا:
    رسائلك ما بتفيدك العملتو كان بايدك نحن نستاهل ادمناك اكثر من القهوة ..لحدي السنة الجاية اذا ما ظهرت حنبعت لك الفرقة A3 ..
    د.صالح:
    العسل دا عليه ماركة الاسد..موش يمكن دا العسل الانجليزي بتاع العلب ..عموما عندنا عسل قصب ينفع..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s