أدونى عيشة !

Posted: الجمعة,26 ديسمبر, 2008 by الفاتح جبرا in سيناريوهات

 

البداية :

 

كانت كل الأشياء تسير بصورة طبيعية فى تلك القرية الصغيرة الوادعة التى لا تبعد كثيرا عن المدينة ، (صابر) الذى يعمل موظفاً بسيطاً بإحدى المصالح الحكومية يعيش حالة من الفرحة بعد أن إستقبل مولوده الأول والذى أسماه (مسعود) على الرغم من (الديون) الهائلة التى تراكمت على ظهرة من جراء (الكشف الدورى) على المدام أثناء فترة الحمل ومصروفات عملية الولادة ثم (خروف الكرامة) وتوابعه

 إلا أن شيئاً واحداً غير طبيعى قد حدث بعد أن حضرت إليها جارتها (سعاد) حتى (تتحمدل) لها السلامة :

–         إنتى يا (عيشة) مالا أوضتك دى ريحتا بنزين بنزين !

–         بنزين شنو يا (سعاد) شنو كمان البجيب لينا البنزين هنا ؟

–         وحات الله (نخرينى) ديل أصلهن ما بكضبو .. كدى شوفى تحت (السرير) ده أكان ما تلقى (صابر) خاتى ليهو جالون !

–         صابر لا عندو (موتر) لا (بوكسى)يعمل بالبنزين شنو؟

 

ياهو بترول :

 

ما أن خرجت (سعاد) حتى بدات (عيشة) فى جر (نفس طويل) للتأكد مما قالته (سعاد) وقد فوجئت بان تلك الرائحة (البتروليه) تزداد كلما إقتربت من سرير (وليدها) الجديد حتى إذا ما وصلت إليه قامت برفعه وشم القطعة التى وضعت من تحته لتفاجأ بأنها مبتلة بسائل زيتى قد رسم (دوائر) كما الخرائط عليها !

 

ما أن حضر (صابر) من العمل حتى أخبرته (عيشة) بما حدث حيث قام بمعاينة (القطعة المبتلة)

و(شمها) لأكثر من مرة :

–         الولد ده (بولو) ما طبيعى ريحتو بنزين بنزين !

–         من خشمك لى الله !

–         يا وليه إنتى جنيتى .. أقول ليكى ما طبيعى تقولى ليا من خشمك لى الله

–         الله بيدى من الأيد للأيد؟ ما إحتمال ربنا عاوز (يفك) لينا زنقتنا دى !

–         يفكها ليكى بى (بول) أقصد (بيربترول) !؟ كدى خلينا نمشى نفحص للولد ده فى أى معمل نشوف الحاصل شنو؟

 

فى المعمل :

–         إنت متأكد يا استاذ إنو العينة الأديتنا ليها دى (بول) الولد ده ؟

–         كيفن يعنى ما متأكد أسأل المساعد بتاعك ده الأخدها !

–         يا أستاذ التحليل بتاع العينة دى بيقول إنو ده ما (بول) ده (بتروووول) ! ولو مغالطنى هسه (أولع) ليك فيهو عشان تشوف بى عينك !

–         والله كلامك يا دكتور صاح لأنو مما يجى يتبول قاعد (يصرخ) !

–         أكيد لأنو دى مواد حارقه

–         وبعدين يا دكتور ؟

–         لا بعدين لا حاجه دى حالة غريبة جداً وما حصلت قبال كده !

–         ونعمل شنو؟

–         تمشوا طوالى تشيلو الولد ده وتعملو ليهو فحوصات وأشعه ضوئية عند (أخصائى) عشان بشوف الحالة دى من شنو؟ والكلى بتاعتو سليمة ولا إتأثرت بالموضوع ده !

 

كانت مشكلة (صابر) بعد أن خرج من معمل الفحص هى  كيفية توفير مبلغ من المال من أجل عمل المزيد من الفحوصات الطبية على إبنه مسعود للتأكد من سلامة بقية أعضائه :

– وبعدين يا عيشه هسه نجيب لينا ميتين تلتمية ألف عشان نمشى نفحص ونعمل الصور القالوها للود ده من وين؟

–         والله مافى حل غير تشوف ليك (زول) تستلف ليك منو قريشات

 

لم يكن لدى (صابر) حل غير ان يتصل بشقيقه (عوض) والذى يعمل محرراً باحدى الصحف والذى اخبر صابر بانه سوف يقوم بزيارته فور إنتهائه من العمل ويقوم بمرافقته للمستشفى .

 

بالصورة والقلم :

 

ما أن عاد صابر من (الفحص) حتى دق باب الشارع ليفاجأ ولدهشتة بشقيقه عوض ومعه (مصور) الصحيفة التى يعمل بها وهو يحمل كاميراته حيث وجدها فرصة للقيام بسبق صحفى يتناول فيه هذه الحالة الفريده من نوعها جحيث قام بعمل ريبورتاج صحفى مكتمل عن الحالة مدعمة بصورة من تقرير معمل التحاليل الذى أشرف على فحص العينة ! لتخرج الصحيفة فى اليوم التالى وعلى المانشيت الرئيس لها العناوين التالية :

طفل يتبول (نفطاً) ..الطب يؤكد غرابة الحالة … حيث جاء فى تفاصيل الخبر :

فى حالة تعد من أغرب الحالات على الإطلاق شهدت قرية (الرهيفة التنقدا) إخراج الطفل مسعود صابر مسعود لكميات من (النفط) عند التبول وقد تمت متابعه حالته للتأكد من ذلك حيث تم إجراء التحاليل اللازمة والتى أثبتت أن ما يتبوله الطقل مسعود هو (نفط) خالص ! مما حير الأطباء والإختصاصيون . وقد رافق الخبر صورة لوالد الطفل (مسعود) وهو يحمل (جالون نفط) من إنتاج فلذة كبده الوحيد !

 

إنتشار الخبر :

 

تدافعت وكالات الأنباء وكاميرات الفضائيات على قرية (الرهيفة التنقدا) متجهين صوب منزل (مسعود) لتوثيق الحالة وبثها للمشاهدين فى أنحاء العالم المتفرقه وأصبح منزل مسعود قبلة للزوار من مختلف الأرجاء ..

ذاع الخبر بسرعة فى قرية (الرهيفة التنقدا) والقرى المجاورة لها مع إنطلاق شائعة تقول أن فى ذلك السائل البترولى الذى يتبوله الطفل مسعود قدرة على شفاء جميع الأمراض بعد أن أكد حاج (عمران) الذى يسكن قريباً من منزل (صابر) والذى أصيب بالعمى نتيجة الرمد الذى أصيب به فى طفولته بأنه قد أصبح يرى بوضوح بعد أن (قطر) منه قليلا على عينية كما أكدت فى الوكت نفسه (حاجة الرضية) ان نوبات (الأزمة المزمنة) قد تركتها  بمجرد أن قامت (بشم) تلك الماده الزيتية ، احتشدت النسوه امام منزل (صابر) يحملن (مواعين) و(كرستالات) من مختلفة الاحجام للحصول على ذلك السائل الزيتى أملا فى معالجنهم من العقم والرطوبه وهشاشة العظام  كما تواجد بعض الرجال أملاً فى أن يقضى لهم ذلك السائل على علات أخر ، غير أن كمية الإنتاج قد كانت ضئيلة لا تكفى كل تلك الكمية من المنتظرين مما جعل إنتظارهم يطول .

 

وإنهالت العروض :

 

لم يمر يومان من نشر الصحيفة لخبر حتى توقفت فى عصر ذلك اليوم عربة فارهة سوداء يتبعها عددا من العربات ترجل منها أشخاص ذوى سحنات غريبة يرتدون (البدل الكاملة) وربطات العنق والأحذية اللامعة :

 

–         فى الحقيقة نحنا شركة تنقيب (ما وراء البحار) وعاوزين نستثمر (حقول) مثانة (مسعود) لمدة خمسين سنة

–         (فى دهاء) : معليش لكن بس هسه طلعو من هنا شركة تنقيب (ما وراء الأنهار) وإتفقنا معاهم وكده !

–         ناس (ما وراء الأنهار) ديل نحنا بنعرفهم كويس (الأوفرز) بتاعتهم تعبانه – يصمت ثم – هم أدوكم كم وشروط العقد شنو؟

–         (كمن يفكر) : والله هم قالو خمسة مليون دولار

–         فى السنة؟

–         (يفاجأ) : أيوااا أيوااا فى السنة ! بس نحنا قلنا ليهم شوية !

–         طيب أنحنا بنديكم ستة !

–         خلاص أدونا فرصة نفكر !

 

إجتماع عائلى :

ما أن نما إلى علمها تلك العروض المليونية التى إنهالت على صابر حتى عقدت عائلة ( صابر) بقيادة الحاج (أبوصابر) إجتماعا مطولاً لمناقشة تقسيم عائدات (البترول) بحسبان أنه لولا (أبوصابر) لما كان (صابر) وبالتالى لما كان (مسعود)

 

–         شوف يا صابر يابنى حكايت (التعاقدات) الغمتى غمتى دى ما بتنفع معانا لازم تكون فى شفافية فى الموضوع ونحنا أسياد الشئ نعرف الحاصل شنو؟

–         والله يا حاج أنا بتعامل بمنتهى الشفافية وآخر شركة دى قالت إنو يكون عندها أحقية (حقول) المثانة دى لمده خمسين سنة ويدونا مقابل كده (ستة ألف دولار) !

–         لكن نحنا سمعنا حاجه غير كده

–         يابوى الناس كلها بقت (مغرضة) وطابور خامس

–         أها واخوانك وأخواتك ديل ح تديهم كم فى المية ؟

–         خمسة فى المية كويسه يا حاج؟

–         خمسة فى المية بس؟ دى تعمل ليهم شنو؟

–         هم يا حاج أصلو ولدوهو معانا ؟ ما نحنا الطلعناهو !

 

عيشة ما رضيانه :

ما أن إنفض إجتماع الأسرة لتقسيم عائدات البترول حتى وجدتها عيشة فرصة (للنقة) معترضة على نسبة الخمسة فى المية :

–         هم قايلين (إتوحمو بيهو) وإلا (حملو بيهو) تسعه شهور؟ قال شنو؟ خمسة فى المية دى تعمل ليهم شنو؟ والله (دولار) واحد كتير عليهم !

–         كمان يا عيشة خليكى شوية (حنينة) الناس ديل تعبانين وما صدقو إنو تطلع ليهم (ثروة) زى دى !

–         والثروة دى طلعت برااااها كده !

–         أفرضى ما طلعت برااها  كده وإنتى تعبتى فيها كمان ده ما معناتو غنو (نلغفا) برااانا !

–         والله والله يا صابر كان كان قلت ليهم (العرض) الصحيح القدمتو لينا الشركة كان أنا مت من الزعل

–         هو أنا عوير أقول ليهم العقد الصحيح بى كم ؟

–         لكن أها لو بعدين قالو ليكا ورينا ليهو !

–         دى عاوزة ليها درس عصر ؟ (عقودات البترول) دى كوووولها فيها (عقد) يشوفو الناس ( وعقد) بالحبر السرى !

 

الحكومة :

–         إنت صابر أيوب

–         أيوة

–         مش برضو إنت أبو الولد بتاع البترول ده !؟

–         أيواا

–         طيب إتفضل لو سمحت معانا

–         إتفضل وين؟

–         ح تعرف بعدين – فى لهجة آمرة- جيب كمان معاك الولد و(أمو) !

–         لكن ..

–         مفيش حاجه إسمها لكن … نفذ الكلام البنقولو ليك ده

 

لم تمض دقائق قليلة حتى كان صابر ووليده مسعود وزوجته عيشة داخل السبارة الفارهه التى تنهب بهم الأرض نهباً صوب المدينة لتصل بهم إلى أحد المبانى حيث تم أخذ صابر إلى أحد المكاتب بينما تم إحتجاز (عيشة وإبنها) فى الهول المفضى إلى المكتب :

 

–         كمان بتتخابر مع جهات أجنبية؟

–         (فى إندهاش) : ياتو جهات سعادتك !

–         عاوز كمان تبيع لينا بترول البلد دى بدون ما تكلمنا ! وكمان عاوز تعمل فيها عصاية قائمة وعصاية مدفونة ! وتعمل عقد (سرى) وعقد ما بعرفو شنو داك ؟

–         لكن يا سعادتك …

–         لكن شنو؟ كمان قاعد توزع فى (النسب) سااااكت بى مزاجك؟

–         والله بس أنا دقست ساكت لكن نسبتكم محفوظة ؟

–         نسبتنا ؟ نحنا كمان بتاعين نسب؟

–         كيفن يعنى سعادتك؟

–         شوف نحنا لا بندى زول (نسبة) لا بنشيل من زول (نسبة) !

–         ما بتدو زول نسبة دى أنا عرفتها سعادتك لكن ما بتشيلو من زول نسبة دى كيف !

–         ح تعرفا هسه !

 

يلتفت إلى شخص يجلس بجانبه يمسك بقلم وورقه  ثم يخاطبه فى لهجة آمرة :

 

–         أكتب عندك :

–         تمت مصادرة حقل (مثانة) الطفل (مسعود صابر أيوب) لصالح الدولة

–         (فى خنوع) : خلاص طيب وكت شلتو (البترول) أدونى (عيشة) !!!

 

Advertisements
تعليقات
  1. البشاوى كتب:

    البروف والسمار سلام
    والله تطير عيشة صابر وعيشة مرة صابر وحم وحمل وتعب اخرتا الحكومة تصادر المثانة وصابر يقالع فى عيشة من الحكومة املا فى انتاج مثانة بترولية اخرى

  2. حاج أحمد السلاوى كتب:

    الرائع .. الفاتح بن جبرا ..
    أنا غايتو ما بعرف.. لكن حاسس كدة إنو حسن كابوس وصلتو شوية بضاعة قوية من الجنوب..وبدا يعمل زيارات ميدانية ..
    وأخونا صابر دة يحمد الله إنو ما وصل حبل المشنقة بتهمة التخابر مع جهات خارجية..ويكون محظوظ جداً لو رجّعوا ليهو عواطف بتاعتو ( عيشة )تانى لأنها هى المصدر زااااااتو .
    ” شوف نحنا لا بندى زول (نسبة) لا بنشيل من زول (نسبة) !

    – ما بتدو زول نسبة دى أنا عرفتها سعادتك لكن ما بتشيلو من زول نسبة دى كيف !”… السطرين ديل براهم يساووا بوست كامل..ولاّ أنا غلطان ؟؟

  3. سؤال مهم لو سمحت يا أخي الفاتح
    1- هل الطفل تم إنجابه بعملية تزاوج طبيعية ام كان نتاج عملية تخصيب أنابيب … يفرق يا سيدي لو كان نتاج عملية تزاوج طبيعية نقوم بفحص الجينات الوراثية البترولية في بويضات إلام ولو اتضح إنها مصدر التركيبة البترولية تطلق ام الطفل وتصدر ها من زوجها وتزوج لأحد منسوبي الحكومة والذي نثق فيه بانه سوف يحافظ على الثروة القومية
    وبسيطة نتخلص من الزوج الحالي بعملية استشهادية ونزفه للحور العين
    أما لو كان الرجل هو مصدر الجينات البترولية وهذا ما لانتمى فما علينا إلا أن نضعه في حجر طبي ونسحب منه السائل التهجين بواسطة عملية بيطرية كما يسحب من البقر الفر يزين ونزرعه حيث نريد ونقوم بتوزيع الثروة مرة يزرع في رحم شمالي ومرة جنوبي ومرة غربي ومرة شرقي حتى ننهي مشكلة توزيع الثروة ولا نجد متمردين يطالبون ببويضة الشهر الفلاني ولن نسمح لها بدورة شهرية حيث أننا لن نهدر أي بويضة بصورة هكذا تخرج مع طمث . . . ويصبح لنا أهدر في الثروة القومية

    واعتقد علينا مصدرة مقالتك أيضا لأنها تسلط الضوء على مخزون استراتجي قومي وهذا ضد قانون الأمن القومي للدولة وسوف نرفع أوراقك الي فضيلة المفتي عوض الله صالح للنظر في امر اتهامك بالخيانة العظمى بنشر معلومات بترولية سرية وهي معلومات ممنوعة حسب قانون حقوق الحيوان المعمول بها حاليا

    اسمع قلت لي ام الشافع اسمها منو
    ما عندها اخت للزواج اكان نلاقي في العائلة دي عقاب بترول

    الصفر البارد – جلال الدين

  4. ألفاتح جبرا كتب:

    الأحباب الأعزاء

    ودالخلا – البشاوى – السلاوى

    جمعتكم مباركة ،، برجع ليكم إن شاء الله

  5. ابكرون كتب:

    جمعتكم مباركه
    اعزائي (ما دايره ليها درس عصر) هذه الحالة تمثل الشئ الحاصل وما رمي اليه جبرا واضح ومسكين الشعب السوداني (اقصد اسرة صابر/شعب صابر)…..والقلع سمة العصر الممارسة غصبا عن خياشيم اي زول …..والعقودات والنسب في غياهب جب (اقصد جيب الحكومة)…..وشعبنا (عمنا) صابر لو فقد حقل مثانه -1……عمنا صابر طالب بعيشه حبيبته وحينتجوا مثانه-2 و300 وصااااابر يا كريم

  6. مشاكل كتب:

    سلامز
    جمعة مباركة و طيبة و ظريفة و لطيفة و اردنية برضو

    انا لو محل الحكومة ما بصادر الطفل لكن بعمل تشفير ليهو و ابوهو و امو يمكن المواليد الباقين يطلعو على نفس النظام..و كمان ارتاح من هم الحركة الشعبية جبهة الشرق و ناس الغرب و لو ناس الشمال نقنقو نديهم المولود بتاع السنة ما هم الشيء و اهل الشيء . و اي واحد يفتح حنكو نجدع ليهو شافع فيهو .. دا غير الاستثمار في مجال الطب البديل و الزيارات الميدانية لاعضاء الحزب و الوفود الخارجية و الما خارجية و هاااااااااااك يا سد مروي .

    الود دا لازم نستنسخ منو 7777777 مولود
    و يكون عندنا 7777777 بير بترول متحركة
    و نعمل لينا 7777777 عيادات للطب البديل
    و نشغل لينا 7777777 عاطل
    و نعتمد عليهو في الميزانية لمدة 7777777 سنة ضوئية
    و اي زووووووول يفتح حنكو نسفر الأردن ياخد ليهو 7777777 مسمار حاااااااااااار

  7. مشاكل كتب:

    سلامز
    جمعة مباركة و طيبة و ظريفة و لطيفة و اردنية برضو

    انا لو محل الحكومة ما بصادر الطفل لكن بعمل تشفير ليهو و ابوهو و امو يمكن المواليد الباقين يطلعو على نفس النظام..و كمان ارتاح من هم الحركة الشعبية جبهة الشرق و ناس الغرب و لو ناس الشمال نقنقو نديهم المولود بتاع السنة ما هم الشيء و اهل الشيء . و اي واحد يفتح حنكو نجدع ليهو شافع فيهو .. دا غير الاستثمار في مجال الطب البديل و الزيارات الميدانية لاعضاء الحزب و الوفود الخارجية و الما خارجية و هاااااااااااك يا سد مروي .

    الود دا لازم نستنسخ منو 7777777 مولود
    و يكون عندنا 7777777 بير بترول متحركة
    و نعمل لينا 7777777 عيادات للطب البديل
    و نشغل لينا 7777777 عاطل
    و نعتمد عليهو في الميزانية لمدة 7777777 سنة ضوئية
    و اي زووووووول يفتح حنكو نسفرو الأردن ياخد ليهو 7777777 مسمار حاااااااااااار

  8. مشاكل كتب:

    المفروض التعليق بتاعي ينزل 7 مرات لكن لحكمة نزل مرتين ليه ما عارف ..

  9. حاج أحمد السلاوى كتب:

    الإبن مشاكل …
    كنت عاوز التعليق بتاعك ينزل سبع مرات عشان شنو؟ أوع تكون إنت كمان صادرت الموقع دة لصالحك زى ما الجماعة صادروا ولد أخونا صابر المغلوب على أمره.. غايتو إذا صادرت الموقع .. عندنا طلب صغير .. كدة … أدينا الفاتح جبرا ( على وزن أدونى .. عيشة ) .

  10. حقك و لا بجيك ,,,,,,, حقك تلاوى و تقلعو

    صباحكم خير و ميرى كريسماس و كل عام و أنتم بخير بمناسة العام الهجرى الذى ألغيت أجازته

  11. الصفر البارد كتب:

    والله يا الفاتح يا اخوي الجنى اب رويس الماسك ليك لوحة التحكم دا
    تب ما نازلي من زور . . .
    نكتب ستين تعليق ما يتنشر وناس ينزل ليها تلاتة تعاليق
    الزول دا جبهجي يا الفاتح ولا شنو

  12. مُخير كتب:

    بروفنا عملاق الرمزية
    الحبان في كل مكان
    سلام عليكم وجمعة مباركة
    الحبكة في تهمة التخابر مع الجهات الأجنبية، وما يمكن أن يصدر من مثانة الولد حق البلد، والبلد حقت ناس حمد، والشعب لبد، ويديك العافية يا أبو ناجي ويمتعك أضعاف أضعاف إمتاعك لنا…

  13. مشاكل كتب:

    يا اخوانا دايرين لينا بوست يشيل لينا 7777777 تعليقات

    اتصرف يا باشمهندس

  14. النقر البطحاني كتب:

    كل سنة وانتم طيبين
    والله بختنا يا القاتح خلاص مشاكلنا اتخلت
    كل واحد يجي يشيل ليهو ملية ملعقة بول
    دي سخرية تضرب في نعش ميت
    فمن يسمع ولمن تقرع الاجراس يا الفاتح
    سلمت ودمت لنا يا رائغ

  15. علي سنكل كتب:

    الفاتح جبرا والعقد الفريد . .
    جمعتكم مباركه وكل كريسماس ورأس هجريه ورأس ميلاديه وكلكم طيبين . . .
    صابر ما كلم رئيس محليه الرهيفه تنقد وقام رئيس المحليه اتصل بالجهات العليا ، صابر غلطان والله ، وما ليهو حق دي ثروه قوميه ، وخاصه قبل كده في سابقه بتاعت عمك الكان بحفر في السايفون وطلع ليه بترول ، تتذكروها؟
    ما قصه طلعت في الجرايد والحكومه كلمت الناس كلها إنو أي زول يطلع ليه بترول ” من أي محل ” يكلم بيه الحكومه.
    والله رحموهو إنو ما ختو ليهو تهمة التعاون مع المحاكم الدوليه.

  16. يا مشاكل بما أنك أثبت أنك بتاع مشاكل ، أنا أثنى أقتراحك وكمان عشان ما نفتل البوست الجميل بتاع البروف

  17. جمعتكم مباركة و كل سنة و انتم طيبون

    قبل شوية بشتري في الجرائد و لقيت اثنين متشابكين و معاهم سيد الكشك بالله شوف ديل و صار يقرأ من صحيفة رياضية

    (في بادرة سيئة سيرت جماهير الهلال مسيرة احتفاء بهزيمة المريخ)

    دا اسمو كلام يا (مشاكل) دا ما السبب البخلي ناس الحكومة يحقروا بينا و يقلعوا مننا أي شئ، مثانة، جباية، فرح و هلم جرا … فلو اتحدت الرماح لأبين تكسرا…

    الحكاية قومية لمن تبقى مع الغريب…

  18. شوف نحنا لا بندى زول (نسبة) لا بنشيل من زول (نسبة) !
    تانى بقول
    حقك و لا بجيك ,,,,,,, حقك تلاوى و تقلعو

    يا صابرهذا الشخص الجالس أمامك أضعف من أن يهرش ذبابه .تمسك بحقك فى كل الثروه وحيديك 50% منها كما سيرشيك أنت و عيوشه بما يضمن له أن تسكت عن عمايلو
    بس أنت أبدأ

  19. Stricker كتب:

    كل الاخوان جمعة مباركة ومقبوله انشاء الله

    نرحب فى سوداننا بالعزيز الصفر البارد وهو صديق قديم للاستاذ الفاتح جبرا – ويمكن للجميع المرور على موقعه بالضغط كالعادة على الاسم فى تعليقه او بالدخول على الرابط التالى http://www.sudaneseoutline.com .
    نتمنى ان تطيب الاقامة له بيننا انشاء الله – ويانيام – صاحبك وصل ورحب بيه.

  20. ألفاتح جبرا كتب:

    الأحباء الأعزاء

    تتذكرو (الصفر البارد) ؟ أكيد ! أنا غايتو نسيت الكان حاصل شنو … لكن المهم (الصفر) ده طلع زول (حبوب) جداً وراجل آخر أدب وتهذيب وعلم ومعرفة .. ويظهر ديك كانت حركات (إسفيرية) منو ساكت !
    أخونا (جلال الدين) هو صاحب موقع (sudaneseoutline.com) وهو موقع رائع ويضم كوكبة من المثقفين والمبدعين ويطرح قضايا جاده وفى غاية الأهمية أرجو منكم زيارته كما أرجو منكم الترحيب الحار بأخونا جلال (الصفر البارد) فى البوست الذى سوف تخصصه الإدارة لذلك ….

    كسرة :

    اها يا الصفر قصرتا !!

  21. محنك كتب:

    عندو بترول
    ما لاقى عيشة !

    ومهدد كمان

    ومديون
    واهله بعاينو ليه يدفع لهم

    والعالم الخارجى مطاردو
    وسماسرة مواردو واقفين

    والتغيير الاقتصادى ذاتو جاب ليه مشاكل جوه الحوش الاب والاخوة والزوجه

    يا استاذ جبرا مصنع النسيج بتاعك دا رهيب

  22. د.ياسين شمباتى كتب:

    البروف..جمعة طيبة..

    عمك صابر ذاتو ما هين,,يفتش لى عيشة راس المال!!!

    لكن الشئ العاجبنى فى الجماعة ديل هو وضوحهم فى الباطل واكل اموال الناس,,واصدق حاجة على عدم قبولهم بالقسمة والنسبة دى هو منعهم لوكالة استخدام خارجى_وهى الجابتنا السعودية_ من مزاولة نشاطها فى الجانب الطبى واحتكار الوزارة للموضوع دا..اتصور شكل وزارة بتسفر منسوبيها للخارج عشان ال 2 مليون جنيه!!!

    وعاش السودان حرا ابيا..

  23. علي سنكل كتب:

    الأستاذ الفاضل الفاتح جبر
    أرجو أن تسمح لي بالاختلاف معك هذه المره . .

    نحن نتذكر الصفر البارد جداً ونتذكر ( وصفه لرأسك ) ، والذي هو رأس جميع المدوناتيه وغيرهم من قراء وعشاق كتابات الفاتح جبرا داخل وخارج المدونه.
    شعرنا كلنا باستفزاز مباشر آنذاك (كل هبش رأسه ليرى إن كان فارغاً ) .
    فأنا إذا كان يضحكني أهبل إذاً أنا أهبل، وإذا كنت أعتقد أن الفاتح جبرا يضحكني ويبكيني في آن معاً ، ويحكي لي ما أراه أمام عيوني يومياً ولا أستطيع التعبير عنه. ويعتقد آخر أن هذه الرأس التي تضحكني وتيكيني فارغة! إذاً هو يعتقد أن رأسي أنا أيضاً فارغة.ما يجمع أهل المدونة هو رأس جبرا التي أساء إليها هذا الصفر ، وبالتالي فقد سب هذا الصفر رؤوسهم جميعاً.

    لا أدري ما هي الحيثيات التي أعادت إلينا هذا الرجل ( الغير مستقر نفسياً ) ، وأنا قد بحثت في حينها عن هذه الشخصية على الويب ووجدته مطرود من معظم الأمكنة ويبدو على معظم المواقع كثير المشاكل والشتائم وقلة الأدب مع الآخرين.

    وحتى في أسلوب عودته عجرفة وقلة أدب !
    أنظر إلى وصفه لأبننا الخلوق سترايكر بأنه لا ينزل له من زور ! !

    كون أن له موقع يشارك فيه ناس كويسين ومثقفين لا ينفي عنه ما ذهبت إليه أعلاه ، وهل كانت بيوت القتلة والسفاحين ومقتصبي الشعوب تخلو يوماً من الولائم التي يجتمع حولها الشعراء والأدباء والفنانين؟
    خلونا من الطيبه السودانيه دي ( يا أخي باركوها ، والراجل ما قاصد حاجه ، وحرم يدخل وما تقول شئ ).

    لا بد من أن يخاطب هذا الصفر هذه الرؤوس التي أساء إليها ، ويعتذر لنا واحداً . . واحداً ويورينا عمل كده زمان ليه؟ وجسه جاي يعتذر لينا ليه؟
    عايزين حيثيات كامله يا صفر يا بارد.

  24. مشاكل كتب:

    سلامز

    عمنا سنكل
    لو كانت معاني العفر هنا حتكون وين تاني
    لو ما كانت طيبة الأهل و الاحباب هنا حتكون وين تاني
    لو ما عفيتو عن الصفر البارد انتو ح يعفي عنو منو غيركم
    باركوها
    باركوها
    باركوها

  25. مشاكل كتب:

    سلامز

    عمنا سنكل
    لو كانت معاني العفر هنا …..حتكون وين تاني
    لو ما كانت طيبة الأهل و الاحباب هنا….. حتكون وين تاني
    لو ما عفيتو عن الصفر البارد انتو …..ح يعفي عنو منو غيركم
    باركوها
    باركوها
    باركوها

  26. بنباركا يا مشاكل

    بس ما ظنيت مداخلاتو الواحدة و نص ديل بيستحقوا فتح بوست منفصل لنرحب به كفاية الترحيب من الفاتح و استرايكر هنا و ليتداخل متى ما طاب له

    فيشان كدا نرجو من الأدمنستريتر أن يحزف بوست الترحيب المنفصل بالصفر البارد و ليعلم الصفر البارد أنو الأدمنستريتر الما نازل ليهو من زورو دا ما ماسك للفاتح وحدوا لوحة التحكم فسوداننا جريدة الكترونية يكتب بها الكثير من المدونين بجانب أستاذ الفاتح

  27. sakouta كتب:

    يا أهل الدانقا سلام والله انا قرئت كتابات الصفر البارد ده فى الموقع المزكور حرم ده الصفر زاتو مالامى فيه ده سالب كبيييير وخساره فيه كلمه واحده من اصغر مدوناتى هنا وماعارف كيف الزعيم زاتو بيرحب بيه والناس شغاله عفا الله عن ماسلف أمشو اقرو الانحطاط الخلقى والاخلاقى لانى ماداير اعمل كوبى لكتاباتو وأدنس الموقع الطاهر ده

  28. nono كتب:

    التحية جبرا
    الاخوة اصحاب المدونة/
    ياجماعة الخير ادوا الراجل دة حنانوووووووووووووووووووا اقصد عيسة!

  29. آا ناس هوى aflaiga وينو
    يا أفليقا ما تقول لى فى كيبل مقطوع فى جزيرة سيربنتشيا
    يا زول أنا دايرك نتطالع
    آى نتطالع و ما أسفيريا أن شاء الله جنبكم فى الغابه

    يا باشمهندس بس كيف تشبهنى بهذا المدعو الصفر البارد

    أبو السناكل
    تحياتى
    صاحب النيران الصديقه

  30. كسره متأخره جدا
    ياترى جيل ناس أفلايقا بيعرفوا نتطالع يعنى شنو
    عموما هى هيا بنا ألى المعترك بعد نهاية الحصص

  31. د.ياسين شمباتى كتب:

    طارق اب احمد..سلامات..افليقا وابناء جيله يعرفون معنى المطالعة والتطالع جيدا,,بس افليقا دا عندو صولات وجولات فى التطالع!!! وخليهو يحكى ليك عن سابق طلعاتو وماذا حدث لمن طالعهم..

    الصفر البارد..اظنك ما اتعظت من الحصل ليك زمان..ارجو انك تشرح ما حدث لوحدك وتحاول ترأب الصدع براك…

  32. ألفاتح جبرا كتب:

    الأخ الحبيب الدكتور سنكل
    التحايا الخالصات .. ما قلته من تعليق حول موضوع (الصفر البارد) هو رد فعل طبيعى لحجم الإساءة (حينها) التى جعلت الدماء تغلى فى عروق أعضاء الموقع الشئ الذى جعلهم يتذكرون حيثياتها حتى الآن على الرغم من مرور سنوات على ذلك … أتفق معك على ضرورة الإعتذار أما (العفو) فمن طبعنا !!

    كسرة :
    الكورة الآن فى ملعب (الصفر البارد) !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s