تأملات كونية في المسائل السودانية (3)

Posted: السبت,3 يناير, 2009 by قرن شطة in اخرى

الألوان عند أهل السودان

بالتأكيد اللون له علاقة حميمة بشخصية الإنسان وبيئته، وهو من جانب آخر يعطي الحياة تموجات شاعرية ويكسبها إحساسات جميلة ومتباينة وأحياناً غريبة وهذا الإحساس الخاص بالحياة والموجودات وانعكاسه على النفس البشرية في أحيان كثيرة ليس له علاقة كبيرة أو على الأقل مؤكدة باللون في ذات نفسه كشيء مرئي وعلى مرمى البصر، وإنما تتكون نقطة اتصال خفية بينهما شيء يشبه الكبري السيكولوجي بين اللون والمتلقي، بين الأثر والمتأثر ، والشعب السوداني له احساس خاص جداً بالألوان وتفاسيرها..

اللون الأخضر – عند كثير من أهالي جمهورية السودان (الخمجانة) يعني في الغالب أسود يقولون مثلاً (وليد إخيضر) أي صبي أسود عليه غبرة والملاحظ هنا اقتران الغلط بالتصغير كأنما تصغيره يجعله مبلوعاً إضافة إلى هذا لا يوجد في الدنيا شخص أخضر اللون اللهم إلا أن يكون قادماً من كوكب آخر. كلمة السودان نفسها تعني عند العرب أرض السود وعند قدماء الإغريق تعني الشخص المحروق البشرة والوجه من شدة الشمس (والظروف التافهة) نحن في الغالب شعب أسود البشرة محروقي الحشا هذا والجدير بالذكر أن بعضهم يصّرون على مناداتنا بالسمر!؟ لا علينا هذا تشابه في جنس البقر! والحقيقة نحن شعب أكثر من أنه أسود البشرة – وهذا شيء أهميته نسبية- مسودة عليه الحياة.. اللهم أنعم علينا ببياض الضمير وحسن الخاتمة.

أما اللون الأصفر فهو في عمومياته دال على الشحوب والكآبة والدبرسة وفيه إشارات باثولوجية لشيء كامن وربما رحيل وشيك من هذه الفانية ولو أنو (إحنا) كما يقول بعضهم (والإحنة من أخوات المحنة والعياذ بالله) أصبح الرحيل مقيم في أعماقنا كالمرض المزمن نتجارى خلفه خاطبين ودّه ونوسّط له في السفارات من أجل (الفيازي) والتآشيير) أعود فأقول هذا اللون له وقع خاطئ عندنا وفيه كثير من الخلط والتشويش عند أهل السودان الطيبين… الصفار يعني الراحة وإنعدال الحال (شفت كيف) الاستجمام الذي وقد صاحبه (تجدع تحت همبريب التكييف المركزي) يقولون أن فلاناً أصفر وسمين يحمد ربوا والصفرة تلازمها السمنة على نظرية الحتمية الشايقية للبروفسيور النعام آدم (إن بقت طابت وجات عديل فيتحتم أن تمشي زى ما كانت قبيل) أي في الأول… الصفار المريب (عندنا) دليل حاسم ولا يقبل الجدل على التنعم وراحة البال رأيت أنا شخصياً أقوام كانوا في الزمان الأول كالحين وسود كالغربان الناقعة والآن آلو إلى صفار ونضار فسبحان مغير الأحوال ومصفر الرجال!!

اللون الأزرق لون أصيل هو لون السماء والصفاء… وبالمناسبة نحن قوم قليلي النظر إلى السماء دايماً (مكبسين) في الأرض وبصراحة هذا اللون عندنا يعني أسود… فلان أزرق يعني أسود وفي رحم الغلط أو قل (الدقسان) هذا اللون وبطريقة أخرى يعني البساطة الأحمدية نقول (موية زرقاء) وهذا ليس مرض يخص المآقي والمدامع وإنما ماء زلال خالي من المحسنات البديعية (لتبسطنا في المطالب ذات السقف المتدني).

اللون الأبيض لا يستعمل بكثافة في الديار السودانية ربما (الكتاحة) والمنخفض الترابي اللذان لا يتركون شيء يبيض ولا حال يستقر ومن أعجب التعابير التي سمعتها مؤخراً أن أحد الاخوة ذكر لي بأنه قد زار فلان وكان يظن به شيء من العلم فاكتشف أنه (أبيض) حافي وحالق وقد فهمت بأن كلمة أبيض في هذا المقام تعني جاهل وخالي الوفاض اللهم جنبنا هذا الصنف وأقصد الاثنان معاً فأحدهم جاهل والثاني لئيم. ومما يعجب له وبلادنا قارة مترامية الأطراف وتذخر بالطبيعة الخلابة في جبالنا الشامخة والغابات المذهلة أن تكون هناك ألوان لا تكاد نحتفي بها أو نذكرها إطلاقاً بل أن بعضها يعطينا إحساس غريب مليء بالأوهام فلو ذكرت في جملة مسبكة لأحد السوادنة اللون القرمزي مثلاً فجايز جداً أن يعمل معاك (عكة) وأقله أن ينظر إليك شذراً أو يرتاب في نواياك (يا راجل نحنا قادرين ناكل ونعيش وأنت تقول لي قرمذي قرمذك الله في جهنم) وعلى شاكلته العسجدي والبنفسجي والبمبي والقمحي وربما لون (زينب) كل هذه الباقة المريبة ذات الأجندة الخفية المرتبطة ببعض الدوائر الثقافية المتبرجزة (نحسبها) حنك ما منو فائدة غير تربي ليك دقن تحتو وترجا الله في الكريبة والكريبة للفائدة العامة كانت كرنتينة في زمن المهدية الأولى…

 

Advertisements
تعليقات
  1. البشاوى كتب:

    قرن الشطة والسمار
    ومن المفارقات ان تسمع بان فلان او قبيلة بى حالا انهم عينهم حمرا اى انهم سحرة يعنى يدوك عين يخلو ريحتك طير طير وايضا تسمع بان زيد من الناس بيدى
    العين الحمرا وهذا معنى مختلف بانه رجل جاد وله مواقف جادة وبيهرش ثم ننتقل
    الى وصف الاذن (الاضان)الزرقا ووصف اليد الخضرا وهذه اليد معطاءة وكريمة
    والكراع الخضرا كناية عن قدم الخير
    بالعكس جيراننا ابناء النيل شمالا لهم دقة فى استعمال الالوان فيعبرون عن اليوم
    المليئ بالمشاكل بانه يوم اسود ويطلقون عبارة ناموسيتك كحلى على من ينوم
    ملء جفونه مرتاح البال
    والالوان ذاتا ياشطة بقت تتلخبط علينا الحالة لابسين نظارة هسة بتعرف خاتف لونين دة ياتو لون

  2. neiam كتب:

    الأخ قرن شطة:
    والله حكاية تعرف انا فعلا قصة الألوان دي كانت عاملة لي زقربة..يقول ليك فلان داك ياخ لونو قمحي كده .. بالمناسبة لمان سالت واحد اخونا من نوع ناس دكتور عزت دا عامل دكتوراة في القمح قال لي هو القمح دا ظاتو فيهو سنكليون لون و نوع فيبقي لمان يقولو ليك لونو قمحي كده طوالي تقول ليه ياتو في القموح..
    بعدين بالمناسبة انت اخوك الاخدراني داك وين..

  3. شنو يا قرن شطة تركز لينا على ألوان الغلب و الفاقة… و تنسى لينا اللون الخمري و الخد الزهري…

    بالمناسبة أبيض أيضا تعني مفلس أباطو و النجم و أزرق تعني الهلال و الأحمر الوهاج دا بيعني المريخ و أحمر بيعني شيوعي الا أن طبيخ أسود لا يعني مسجم و حالوا مايل بل يعني باذنجان بالمفرومة و هي أكلة لذيذة أحيانا يطلق عليها مصقعة ….لكن الذ وصف سمعته ليعبر عن جزمة و لا مؤاخدة حفيت و تتربت و فترت من المشي بصاحبها فصارت كحبة البازنجان القديمة…

    و تعزيزا للوصف بلون الخضروات و المحاصيل كما قال نيام في وصف البشر و الأشياء فصار بجانب القمحي، البصلي و الخوخي و البن المحروق… لكن التريكو واظ (القالوا عادل امام) دا الماعرفتو

  4. حاج أحمد السلاوى كتب:

    الأخ قرن شطة ..وكل الصعايدة الأعزاء .ز
    أولاً بالتبادى شايف قروب ( أ) مسيطرين غاية السيطرة على البوست من بدايتو ..ودى بشارة كويسة خلت الواحد طوالى يمسك الكيبورد ..وبعد داك عاوز أسأل أخونا فى الله قرن شطة … نحنا بنعرف إنو الشطة زاااااتها فيها عدة ألوان منها الخدرة ( الخضراء ) والحمرة ..فإنت أى اللونين من الشطة ؟؟؟..ونهنئك على البوست الرائع دة …وما قصرت وأوفيت بالعهد .. أن العهد كان مسئولا (بدون أى علاقة مع مسئولى دولة أمازونيا العظمى ).. أما أخونا أبو عصمت ( المرطب ) الما كنت أتوقع إنو ما يعرف اللون التريكواظ ( لون عادل إمام ) فهو دة الخاتف لونين بين الأخضر واللبنى ( أوعك تقول لى اللبنى دة هو زاااااتو ياتو لون !! )…وإنت نسيت نفسك يا ابو عصمت .. ما إنت زااااااتك ما بعرف شنو داااااااااك خاتف لونين … الأولانى لونك الطبيعى والتانى لون أسمك( عِزت )…
    وفى لون إنتو نسيتوهو ودة بيستعملوا بس ناس عواطف دايما فى وصفهم للأشياء وهو اللون الإسمو ” موف ” ودة يا نيام نيام (يا ودمدنى ) واحد من درجات الكحلى … بس ما بيستعمل فى الناموسيات .. يا البشاوى ..
    لكين يا جماعة الخير أنا اللون اللى لحد حسة ما عرفتو هو لون زينب .. زينب تطير عيشته ..كان لونه كيف .. ممكن توصفو لى عشان يمكن تكون عواطفنا تكون لون زينب ..وأنا ما عارف .. رينا يستر ..
    واختم ليكم بنكتة .. إتنين سودانيين مشوا القاهرة .. إفترقوا من بعض وضاعوا فى الزحمة … وبقوا يفتشوا على بعض ..واحد سال مصرى فى الشارع : ما قابلك واحد سودانى أخضر ..كدة ؟ ( يقصد أسود أو أزرق ) ..قام المصرى سالوا بتقول لونه إيه ؟ السودانى ردّ عليهو : لونه أخضر .. المصرى قال ليهو : مادام لونه أخضر .. إن شاء الله حتلاقيه حالاً . ..
    وكل لون وأنتم بخير .

  5. aflaiga كتب:

    الرائع الاخدر : قرن شطه
    غبنا وعدنا ووجدناك ما زلت تمارس الابداع مع سبق الاصرار والترصد اما من قاض رشيد يصدر حكمه عليك باعتقالك فى اضابير المدونه لتكتب لنا مع كل صباح ما يدعو الى رتق السلام الاجتماعى وترويج سمح الكلام ؟؟؟
    اها انا شخصيا مشكلتى فى اللون الاخدر والخدار اينما حل – مش الخدار بتاع عزت البيئ ؟؟ لالا الخدار بتاع نوبا الجبال وسهول الكرادفه ووديان الغرابه وابنوس الجنوب ؟؟ فما حكمك فى من اتخذ من هذ الخدار لونا مفضلا ؟؟؟؟

  6. مُخير كتب:

    الأستاذ قرن شطة
    الحبان في كل مكان
    سلام
    شايف الفاطحلة صحوا لموضوع اللون، وما أدراك ما الألوان ودلالاتها
    حاج السلاوي: الله يجازيك (خير طبعاً) الموف ده (الفاء رويانه ومنتصرة بثلاث نقاط) أنا ظنيته درجة كدة ما بين بمبي غامق عليه حبة بنفسجي أو ماروني، لكن أتاريهو طلع ود ناس اللبني ومن عائلة ألأزرق الله يخلي الدروس الخسوسية.
    أفليقا: الأخدراني عليك الله قوم أكتب تاني، وخداري البي حالي ما هو داري ودي ما مشكلتك يا فردة دي مشكلة الأكثرية في وطني، غير أن ما لا يعجبني هو البودرة فلا يعقل أن تكون خُدرة وعليها بودرة، وكثير من بنات رابحة أو حفيدات مهيرة طقاهم شيطان في يافوخهم، منو القال ليهم في حاجة أحلى من السُمرة والخُدرة عشان يبشتنوا خلقهم بالمساحيق الغريبة التي قبحتهن فصرن مسخاً شائهاً وضيعوا اللونين.
    أبو عصمت: عالي درجة ولونو أسمر وروحو عاجبها وما قال بيجي مالو ماجاء؟

  7. حاج أحمد السلاوى كتب:

    أخونا .. قرن شطة .. وكل القبيلة .. سلام .
    وتانى رجعنا ليكم عشان الألوان دى عندنا معاها ذكريات لا تنسى أبداً.. طبعن نحنا وأخوانى الكواشف ( حسة واحد ينط ويقول .. تانى قام جاب سيرة البحر ) الكُتار عشنا مرحلة جميلة من مراحل التعليم فى السودان عندما كا بخيرو وأذكر فى مدرسة الخرطوم غرب الأولية ( الأولية دى طبعن ما اظنها تكون معروفة للجماعة الرايحين..وهى تعنى مرحلة الأساس حالياً .. مع إنو ما شايف أى أساس ولا جدران ) كان لدينا حصة تسمى حصة الفنون ولدينا مخزن به كل ما يخطر على بالك من مواد الفنون .. أوراق ملونة .. الوان زيتية ومائية.. ألوان خشبية …طين صاصال ملون ..وهلمجرا ( حسب قول إمامنا الصادق المهدى ) فكنا نلعب بهذه المواد فى حصة الفنون ..ما المخزن لسه مليان..لذا ظلت مسألة الألوان دى راسخة فى ذهنى لأنى كلما أرى الألوات الجميلة أتذكر تلك الأيام وألوانه الجميلة…الزاهية ..وسبحان مغير الأحوال من حال إلى حال ..
    وبما أننا بلد اصابه التصحر بفعل فاعل أو بفعل الطبيعة نجد الناس تحن إلى الألوان حتى أغانينا تصبغت بكثير من الألوان فارجو من السادة الموثقاتية ( فى داعى أذكرهم بالإسم ..ولاّ خلاس حيقوموا بالمهمة ؟؟ ) الذين يحفظون كلمات الأغانى أن يتحفونا بالمقاطع التى تحتوى على الألوان ( أنا طبعن ابيض فى المجال دة …مع إنى اسمر اللون ) فى اغانينا الجميلة..
    أخونا .. مخير .. معك حق ..الفاء رويانة لمن دفقت ومعاها تلات نقاط .. أنا غايتو شايفو من درجات البنفسجى والكحلى .. وبالمناسبة عواطفنا دايماً تتهمنى بأنو أنا عندى عمى ألوان ..يمكن عشان لحد حسه ما عرفت لون زينب دة شكلوا كيف .
    أخونا ابو عصمت ..أولاد الخرطوم المرطبين ..التريكواظ وقع ليك ..ولاّ لسه ؟
    واخيراً … يا قرن شطة.. ما هو لونك المفضل .. الأحمر ..ولاّ الأخضر ؟؟؟

  8. neiam كتب:

    افليقا:
    يا افليقا قرن شطة ما اخدر .. قرن شطة دا قمحاوي علي سماوي شتاء اما صيفا فهو اخدر علي بيجي ممكن تقول عليه موف .. وهو في الخريف تركوازي علي احمر قاني حسب نسبة الرطوبة لانو مرطب ..اما لون زينب فهو لونه في سائر ايام الفلس .. وان كنت مازلت انتظر السلاوي ليعرف ماهو لون زينب عشان اشف منو ..فارجو منك تسمية الاشياء باسمائها ثم ثانيا انت كنت وين لمن ادونا الالون ..الواحد يغيب و يتسيب و يجي اخر الشهر داير يصرف معانا كلام..

  9. الغبشة كتب:

    سلام مخصوص وممزوج باجمل الالوان لاخونا قرن شطة……..
    ليك لون جميل خالص فى الكتابة واختيار الجمل وتركيبها ونتظر المزيد الوانك الابداعية.
    وين الالوان فى الطعام يا قرن شطة,سلطة (خضره) بالرغم من مشاركة الطماطم الاحمر الوهاج والدزر صاحب اللون البرتقالى المشرق, والبنجر الكبدى الدافئ,والبصل الابيض الناصع,وبرغم هذة المشاركة الفعالة الا ان اللون الاخضر يطغى على شكل صحن السلطة وان غاب او قل وجوده(عجور,جرجير, خس……..)ولكن السيطرة لون دكتور عزت وله التحية.
    وهناك سلطة بيضاء وحمراء وكل منهم مكونه الاساسى الاسود الباذنجان (مش اللون) وتاتى التسمية ما اذا كانت بالزبادى او بالصلصة,لكن ممكن نسال خبير المطاعم فى ذلك ود الزبير(بالمناسبة هو مختفى مالو)
    حاج السلاوى: سلاااااااااام عليك الله ما تجهجه الناس ساكت هسى خليت مخير يغالط فى نفسه ,كلامك صاح يا مخير(الموف) هو البنفسج فى درجة اقرب للبمبى.اما لون زينب والتركوازى هما نتاج لخاتف لونين الاخضر واللبنى لون زينب اقرب الى الاخضر وماهو بذلك والتركواز اقرب الى اللبنى وماهو بذللك وضح؟شكلو ما وضح……
    والى لقاااااااااءءءءءء

  10. قرن شطة كتب:

    الاخوان الاعزاء كلكم وبدون فرز أو الوان/ التحايا / الليلة دخلت الموقع أو المدونة والحقيقة لقيت موضوع الالوان لاقى رواج بحسب كمية التعليقات ، وانا أصلاً قصدى كان كدة إنو الاخوة يطلعوا ويزيدو الموضوع الوان وبهجة وكلام حلو لانى بصراحة عارف إنو الموضوع ناقص والمقال دة انا كتبتو برة السودان فى ظروف غربة إمتدت الى ازمان طويلة ويبدو انو نسيت كثير من الالوان والافكار وبالتاكيد ماكان عندى ادنى فكرة عن المستجدات فى الساحة السودانية فالمعزرة ولكنكم انتم ايها المدوناتية الاشراف قد قمتم بالواجب والتصحيح والزيادة (فجزاكم الله خيراً) بعدين ياحاج السلاوى انا مسالة الالوان دى ماعندى فيها افضليات وإنحيازات واضحة ذى ماتقول كدة (بحب اللعبة الحلوة) اخونا افليقا ليك التحايا والكلام القلتو هو من ظرفك ولطفك فلك الشكر والتجلة ، بعدين مسالتك مع الالوان واضحة.. غالباً مابتكون بتحب وكدة بس انتظر شوية وح تشوف لون مذهل وعجيب..لون النجوم بالنهار !! ما تتعقد بهظر معاك ياسيد / نيام ليك التحية ياقريبى وبالمناسبة وين سنكل لا اثر لاخبر ليهو زمن؟ تحياتى للجميع لمن نتلاقى. ..الاخوة المدوناتية ليكم التحايا وان شائ الله نتواصل (كان ربنا مدا فى الاجال)

  11. nono كتب:

    اللون الخمري ليله
    والخدر الزهري ليله
    زور يا غرامي لو في منامي
    شوف اللامي ومعي الهامي ليله
    الشوق فاض بيه
    والليل طال بيه
    ما تردي عليه يا نور عينيه
    في الليل الهادي
    يا ناسي ودادي
    الجوه فوادي
    ببكي واغني ليله
    يا خمر الجنه
    هواك هالكني مالك هاجرني
    ليله
    بكيت بدموعي وطفيت لشموعي
    كتمت هوائي انا جوه ضلوعي
    يا طير الجنه الغرد وغنا
    اطربنا بلنحنك وميل واتنى
    كتير حبينا حليل ماضينا
    رمال النيل الشاهده علينا
    صدفه جميله
    مافي مثيله
    سلبتني جناني خلتني عليلا..

  12. نيام كتب:

    قرن شطة:
    مشتاقين و الله منتظرين طلتك .. ياقريبي ماقلت جاي قريب .. جيب معاك البشاوي
    ودالخلا:
    دحين ما توشكت (هلا زرت توشكي ) .. دنقلا فولها كيف .. وتركينها كيف .. والكلام دا جبتو معاك و لا لقيتو في الدرب ..هيع .. تلقاك تركنت تركنة..خليني انا ادي معاك افليقا..

  13. قرن شطة كتب:

    سلام ياغبسة وخاصة الغبشة / كيفك انكم / (الاخو) نونو كتب قصيدة عديل كدة فى كلام الالوان …يازول مبروك وليك التحية / اخونا نيام نيام ..قال ليهو ماقلت بتجينا ياحليل مجيك…وهو ذاتوو القال ما بنختلف …شوفت كبف.. مزنزق فى امور عديدة بس خلينى اروق شوية واجيب ليك البشاوى من اضانو معاى…/ ود الخلا القصيدة دى اغنية لحسن عطية ولا أنا مزازى ساكت؟؟ والله انت عجوز عوجز السنين..تحياتى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s