إفتتاح الموقع الجديد

Posted: الثلاثاء,20 يناير, 2009 by الفاتح جبرا in اخرى

الأحباء الأعزاء

التحايا والود

بعون الله سبحانه وتعالى وتوفيقه فقد شارف العمل فى الموقع الجديد على الإنتهاء وسوف يتم إفتتاحه فى (أو حوالى) اليوم الأول من فبرائر فى إحتفال يقام بمبانى صحيفة (الرأى العام) أو بمبانى الشركة المنفذة (لم يتم الإتفاق بعد) وسوف يحتوى بالإضافة إلى (الموقع)  نفسه  على  (منتديات ساخر سبيل) وهنا أرجو مشورتكم وإقتراحاتكم حول الأقسام التى يحتويها المنتدى إضافة للمنبر العام منتدى (منتدى للغتاء والموسيقى؟) منتدى (للرياضة) .. إلخ

سوف يكون هنالك إجتماع قبيل الإفتتاح مع (مدونجية الداخل) لتعيين (المشرفين) – الشغلانه وسعت – !!

كسرة :

دى مناسبة بتاعت (خروف) ورحلة وكده !! وإلا شنو ؟؟؟

Advertisements
تعليقات
  1. بشار أحمد بشار (إبن برد) كتب:

    البروف : صباحاتك غرٌ بيضٌ . الخروف السغير ده المسألة محتاجة لإحتفال كبير بأعظم حشد وأنا متأكد من براعة الطاقم الذي سوف يقف الى جانبك لإدارة الموقع والسير بركبها قدماً.

  2. bakriMusa كتب:

    البروف: صباحاتك نديه
    بشار :ـ صباحاتك غرٌ بيضٌ

    والزول اللي حيجي بعد او قبل (السنتنه) صباحك (أشطه )

    والله هذا خبر جميل طال انتظاره كليلة (السبت ) مبارك مبارك مقدما ..

    معنى كده ليلة الاول من فبراير ما ننوم ونكون اون لاين عشان ناخد (البرنجي ) ..

    ودمتم سالمين

  3. حاج أحمد السلاوى كتب:

    الأخ أبو ناجى … صباحات الورود والرياحين لك ولكل الحبان داخل وخارج السودان ..
    بالتبادى نبارك لكم مقدماً قرب إفتتاح الموقع القديم الجديد ونحن فى أشد الشوق ( دة لا يعنى عدم شوقنا ومحبتنا للبيت السودانى الذى آوانا بعد إنقطاع البيت الكبير ) لرؤية القمردينة من جديد … والكلام دة معناهو المحافظة على اللون القمردينى .. يا باشمهندس استرايكر ..وبرضو وبما أننا ديمقراطيون حتى النخاع نترك الأمر لرأى الأغلبية المتحدثة والصامتة ..وما أعتقد أنهم حيخذلونا .. خصوصاً كواشف الداخل والخارج..
    على أية الحالات نأمل أن يقوم الموقع الجديد بلم شمل الإخوة شيبا وشبابا .. إناثاً وذكوراً ( مش ملاحظين إنى قدمت الإناث على الذكور .. عشان ما يزعلوا ويتهمونا العنصرية المجندرة ) الذين عرفناهم من خلاله واختفوا ( وهم كُثر ) فى متاهات الحياة العريضة التى لا ترحم ولو قعدنا نسجل اسماءهم لم نترك مجالاً لغيرنا للكتابة ..ونسأل الله العلى القدير أن يجمعنا بهم مرة أخرى فى أسعد الأوقات وابرك الساعات ..
    لكم التحية ..وأدينا آعدين ..ومنتظرين..وخليتكم بعافية .

  4. Stricker كتب:

    الف مبروك يابروف على الموقع – وياريت كما قال عمنا السلاوى يحافظ على اللون المميز له – وانشاء الله تجدنا من الحاضرين !!

  5. مُخير كتب:

    البروف أبو ناجي
    الحبان المدوناب
    سلام وصباحكم أبلج
    نبارك للبروف ولأنفسنا إنجاز المهمة ونتحرق شوقاً للإطلاع على الموقع في ثوبه الجديد، ونؤكد على أهمية ومكانة البيت الصغير وضرورة إستمراريته، ونقول لعلامة شجرة الدوم كُلنا حنسد وردية لختف وش الحلة، ونُثني رأي أبو وضاح “حاج السلاوي” في الإبقاء على لون القمردين.

  6. ألفاتح جبرا كتب:

    الأحباء الأعزاء

    صباحكم خير

    الله يبارك فيكم ويديكم لعافية وياهو بيتكم وموقعكم بس ما قلتو ليا أى إقتراحات بخصوص (المنتديات) تكون شنو ؟ بالمناسبة الموقع محافظ على لونو القمردينى (المريخى) والمنتديات اللون بتاعا أزرق (هلالى) عشان نأكد للناس إنو نحنا بيمثل كل (السودانيين) – أيه رأئك يا ودالزبير؟! – أنا راجى مقترحاتكم بخصوص تصنيف المنتديات

    لكم حبى …

  7. Stricker كتب:

    بعد المنتدى الثقافى – لابد من وجود المنتدى الطبى والحمد لله الموقع به كثير من الاطباء الذين سوف نستفيد بهم فى الموقع الجديد

  8. طارق أب أحمد كتب:

    البروف والأحباب

    صباحاتكم قمردين و فالوذج

    على بركة الله وسوداننا و (سوداننا) معانا

  9. طارق أب أحمد كتب:

    منتدى السلام لدعم قضايا السلام والوحده والتعايش السلمى بين كل الأعراق و الأديان و التفاكر حول مستقبل البلاد

  10. طارق أب أحمد كتب:

    المنتدى الأخضر وده بتاع عزت حصريا

  11. bakriMusa كتب:

    البروف ابوناجي متعك الله بالصحة والعافيه

    اقترح :ـ

    1/منتدى التواصل الاجتماعي.

    2/منتدى برامج الكمبيوتر والانترنت

    ودمتم سالمين

  12. Stricker كتب:

    بكرى موسى

    2/منتدى برامج الكمبيوتر والانترنت = المنتدى التقنى ليكون شاملا على كل مجالات المعلومات والتقنية

  13. ابكرون كتب:

    الف مبروك وللامام……..وعايزين منتدي المغتربين بس عزت وافليقا ونيام ما يجوا بجنبو…..العواتك ممكن….

  14. ود المهدى كتب:

    الف مليون مبروك يا دفعة ومبروك لكل المدونين بدون فرز
    المنتدي الاجتماعي لازم يكون فية جزء خاص بالعادات الضارة والتقليعات الدخيلة علي السودان علي سبيل المثال لا الحصر
    اللبس : رجال ونساء واولاد وبنات
    الزواج : غلاء المهور الاسراف البوبار ……..الخ
    المأتم : الاسراف والبدع
    الدجل والشعوذة :
    .
    .
    وان يقوم المنتدي بتناول هذه المواضيع وتحليلها ومناقشتها وايجاد الحلول والتحذير من عواقبها – ممكن تكون تحت عنوان جانبي نسمية مثلا (انا سوداني) وعندنا من المدونين الكثير من التجارب والعلم ما يكفي للاجابة علي كل الاسئلة في هذا المنتدي ويمكن الاستعانة بذوي الاختصاص اذا لزم الامر.
    والسلام

  15. aflaiga كتب:

    ابوى الفاتح ( الرايع ديما ) :
    مبروك البيت وانشاء الله بالعافية والصحه والتقدم والاذدهار وربنا يقدرك تستقبل زوارو بنفس كرم وطيبة واريحية البيت القديم . ويجعله عامر بوجودك انشاء الله .

  16. علي سنكل كتب:

    ألسلام عليكم ويا سلام عليك يا أبو ناجي
    مبروووك عليك ونهنئ أنفسنا بعودة الدانقا وكمان في تفس حلتها القمردينيه ، والله عز الطلب.
    منتدى للكوره ويكون في صفحه بعييييده وتخت جنبو كلاب سعرانه عشان البمشي هناك الكلاب تقطعو حته . . حته. والباب الجنب الكوره يكون للسياسه وبرضه كلاب سعرانه تكون جنب الباب.
    والأوضه الجنب المنتدى العام طوالي تخلي بت هيفاء فارعة الطول شقراء واسعة العينين مبتسمه ليّ وماسكه ليها زهور عند الباب ، وده يكون منتدى في رحاب الآداب والفنون.
    جنبو طوالي إجتماعيات العضويه ( سافر فتش تاه تعب رجع ، تزوج ، طلق المره ، جابو ليه ولد ، ونيام يتزوج من مليونيره يونانيه ، و عصمت عزت بقا ريتش تخرج في ماليزيا وواصل في الماجستير . . ).

    وحنكون في الانتظار على نار.

  17. حاج أحمد السلاوى كتب:

    الأخ الفاتح .. أبو ناجى..وكل القبيلة ..سلام
    أها نرجع ليكم تانى ..وأقترح الأبواب أو المنتديات التالية علها تجد القبول عند أخواننا المدونجية :
    * منتدى الأخبار ..وتكون خاصة بأخبار المدونجية داخلياً وخارجياً … سفر ..دعوات خطوبة (زى خطوبة سهير .. مثلاً ) .. دعوات زواج ( زواج أول أو زواج تانى ..مش مهم ) …تخرج أبناء..دعوات إجتماعات أو حفلات ……وأشياء من هذا القبيل .
    * منتدى المعايدة والتهانى ..بالمناسبات المختلفة .. أعياد ..وغيره .
    * منتدى النكات والمواقف الطريفة ..( بشرط بدون مساطيل أو محششين ) .
    * الصفحة الطبية…وماشاء الله الإخوة مقدمون على خطوة هامة فى تاريخ المدونجية …مع أمنياتنا لهم جميعا بالتوفيق .
    أفتكر لحد هنا كفاية ودى أربعة إقتراحات نامل أن تنال موافقة الحبان أجمعين ….
    كسرة سغيرونة .. شاكرين تفضلكم بالإبقاء على اللون القمردينى ..

  18. salih كتب:

    سلام
    مبارك وان شاء الله يكون دَفعه في نشر الوعى والحرية والديمقراطية .. وصلي اللهم علي حبيبك وسلم.

  19. مشاكل كتب:

    سلامز

    في البداية ابارك لي نفسي و لي المعلم الكبير جبرا و لي كل مدوني الداخل و الخارج افتتاح المطعم قصدي الموقع الجديد … ما اهو بقى عندنا مطعم و موقع .. ناقصنا صالة افراح اشان نريح ناس شمباتي ديل من تكاليف الصالة و العشى و كدا هاهاهاها .
    من اهم المنتديات المنتدى السياسي و الرياضي و الاجتماعي و الأدبي و الثقافي و الكميوتر و الانترنت ..
    عايزين عالم جميل في الموقع

    بس زحو من عالم زين

  20. مبروك و في الانتظار و موفقين باذن الله

    و كما قال حاج السلاوي دايرين الصفحة الطبية…وماشاء الله الإخوة مقدمون على خطوة هامة فى تاريخ المدونجية …

    و ذلك لأن برنامج المتطوعين الدكاتره و حسب الفكرة التي سننفذه به باذن الله قد يحتاج الى نافذة مستديمة في الموقع و بها استمارة يعمل ليها العضو داونلود و بها بعض الحقول لتعكس معلومات المريض و الحالة المرضية يملئها العضو اذ حسب علمي أن أستاذ الفاتح سيمنح بعض المدونين عضوية و يعمل ليها ارسال يستقبلها مندوب اللجنة ليقوم بتوجيه المريض الى الدكتور المختص… بعدين عضو اللجنة دا يعمل ليها (فايلينق)…

    نرجو أن تكلل جهود الجميع بالنجاح و لي قدام ممكن كمان نشوف طريقة لي مرض حامد…..

    مع أمنياتي لكم جميعا بالتوفيق .

  21. علي سنكل كتب:

    عليك الله يا عزت كان لقيتو طريقه للقلتو ده رسل لي معاك أربعه خمسه فورمات ، عندي جماعه بي جاي عيانين شديد خلاس.

  22. nono كتب:

    لك التحية الاستاذ/جبرا اهنئكم باكتمال الموقع الجديد

    وفقكم الله . انشاالله نكون في عونكم…

  23. الغبشة كتب:

    سلام ابونا جبرا………..
    سلام لكل القمردينيين ومبروك علينا ,,,,,,,,,,,,,,وان شاء الله دائماً عامر
    بالتاكيد مع الكل فى اللون القمردينى.
    ((المنتدى الأخضر وده بتاع عزت حصريا))اثنى على اقتراح طارق اب احمد
    وربنا يوفقك.
    والى لقااااااءءءءءءءءء

  24. حاج أحمد السلاوى كتب:

    المرطب أبو عصمت ..إنت لسه مرض حامد دة معاك ..؟ يبدو إنك منتظر قومسيون الدكتور صالح ورفاقه الكرام ..

  25. نيام كتب:

    الف مبروك ..قلوبنا معكم سيوفنا معكم اقلامنا معنا و دمتم .. لازم يكون فيهو منتدي للشعر و الادب و اخر للفقه و التفسير (القران و الحديث ) و اخر للاجتماعيات بالذات ماذون المدونة دا (المرطب) دا براه داير ليه كل يوم عقد..

  26. حنين كتب:

    البروووف الرائع والسمار الكرام .
    سلامات وكيف عاملين .
    ألف مبرووووك للموقع الجديد وإنشاءالله يتربى فى كنفكم وتشيلوة فى عيونكم وتحرسوة على مدار الساعة (تعملو ليهو ورادى).
    أنا بقترح يكون فيهو قسم نسميهو (وطنيات )ويكون مختص بألقاء الضوء على الشخصيات الوطنية التى تعمل بأخلاص خلف الكواليس وهمها الاول والاخير هو الوطن يعنى زى رئيس محلية يتفقد مستشفى المنطقة ويقوم بمساعدة المرضى أو موظف زو مكانة عالية يوزع دواء رش الباعوضة للقرية ويرش معهم بيوتهم أو وكيل وزارة رفض العربة الفارهة لصالح الدولة وقرر ركوب الترحيل أو رئيس نادى قمة يحمل مكنة الطوب لبنا الطابق التانى فى النادى .والامثلة كتيرة .
    التحية لكل المدوناتية وهم يضعون الاقتراحات لتجميل مدونتهم الحبيبة .
    د.عزت .مرض حامد دة بصيب العزابة لكن ناس عمنا…..ديل يكون عندهم مرض منو …؟

  27. محنك كتب:

    اولا مبروك موقع البروف …. وبيتنا الجديد بعد كده يا بروف اوع من التطبيق التانى بتاع الاحسبون …

    على حسب ما اتخيل

    ابكرون .. قال المغتربون
    د عزت … منتدى العيون
    نونو … منتدى الغناء وخاصة الحقيبة
    كمال اب احمد … منتدى الديمقراطية
    ود الخلا … منتدى الوطن

    انا بقراليكم لثقتى فيكم

  28. طارق أب أحمد كتب:

    محنك
    منتدى الديمقراطيه أو السلام لى وجهة نظر فى الأسمين لو تفضلتم لى بعرضها
    الديمقراطيه : كأسم أفرغ من معناه بسبب هشاشة و إنتهازية سياسيونا
    السلام :كلمه جميله أساء الأحسبون إستعمالها فأفرغوها من محتواها

    أقترح أن يسمى المنتدى الخاص بقضايا السلام و الدفاع عن الديمقراطيه , منبر الحق , الخير والجمال

  29. nono كتب:

    شكر ………مضبوق

    ربنا يارك للاستاذ جبرا ……………………………. ولك وأخواننا المدونجية :

    سيروا الى العلياء واقتادوا المنى **** وامضوا الى الإبداعِ دون توقفِ

    واُهنىء نفسي لأني قد حظـــــيت **** بجمع أخوانٍ كظــــــــــلٍ وارفِ

    شكرا لكم يرعاكم رب السمــــاء **** كونوا كجسمٍ واحدٍ متكـــــــاتفِ

  30. حاج أحمد السلاوى كتب:

    أخونا أبو ناجى ..وكل الحبان ..
    ما شاء الله المدونجية كووووولهم همة ونشاط وإقتراحات المنتديات واقعة هبطرش .. عينى باااااااااردة ..ويا نيام لست وحدك فى ملعب الشعر والشعراء والأدب ..والساحة عامرة تبارك الله ..حسه شوف جنس الكلمات الجميلة دى :

    سيروا الى العلياء واقتادوا المنى **** وامضوا الى الإبداعِ دون توقفِ

    واُهنىء نفسي لأني قد حظـــــيت **** بجمع أخوانٍ كظــــــــــلٍ وارفِ

    شكرا لكم يرعاكم رب السمــــاء **** كونوا كجسمٍ واحدٍ متكـــــــاتفِ

    نحنا زمااااان شن قلنا.. يا أفليقا ؟

    وعشان الإقتراحات اجميلة وكتيييرة للمنتديات .. إيه رايكم كل واحد نعمل ليهو منتدى خاص بيهو ؟ ودى ذكرتنى طرفة رياضية ..فى واحد من أهل العوض ما فاهم وما ناقش أى حاجة فى اموضوع كرة القدم ..يوم شاف مباراة ولقى اللاعبين كووووولهم يجروا ورا الكورة ..قال العوارة دى شنو يا ناس ؟ ناس كبار كدة جارين ورا تيوة واااااااحدة ..ليه ما يدوا كل واحد كورة يلعب بيها بدل العوارة دى ..ويريحوا رقبتم .
    إقتراحات المنتديات جميلة وهادفة .. بس حقو ما تكون كتييرة عشان ما نشتت مجهود المتابعة ..نحنا قلنا العندنا ..وخلوما نتفق …. إتفقنا ؟؟ ( خالد مدنى .. إنت معاى ؟)

  31. bakriMusa كتب:

    انتو يا جماعه خلاص ستفتو العفش وبقيتوا ناس رحول ولا شنو ؟ جبتو اللواري والدفارات ما باقي الا تقلعوا الابواب والشبابيك .

    الكلام الفوق ده(مع الفارق طبعا) زكرني اهلنا الحلفاويين لما هجروهم من وادي حلفا الى حلفا الجديدة (وطنهم البديل) في شرق السودان .. اتذكر وانا طفل صغير امهاتنا وحبوباتنا كانن يبكن بالدمع السخين وهن يلمن في العفش البسيط .. بساطة اهلنا النوبيين ..والرجال يستفوا العفش في اللواري المتجه الى محطة السكه الحديد وقد تحجرت دموعهم في المآقي .حيث صور شاعرهم سليمان عبدالجليل تلك اللحظات باغنيه الرحيل التي تغني بها فناننا المبدع حمد الريح.

    اها يا استرايكر .. يا عزت .. يا ود الزبير .. يا افليقا …آفيلاقوا .. هيروقوا … ويبييييو … ويبييييو ..مع السلامه تقعدوا بعافيه .. ومصير الحي يلاقيكم في بيت ابونا الكبير (في المقام) وانشاء الله هناك نسكن قريب مع اصحابنا وحبابينا ونستعيد زكريات البيت الصغير الكبير الذي ضمنا وآوانا ..وانشاء الله صلتنا ما ح تنقطع بيهو .أهي .. أهي .. أهي … استغفرالله ..

    ومعليش لو خرمجت شويه ,, اصلوااا ود موسى ولوووف

    ودمتم سالمين

  32. نيام كتب:

    اقترح أن تكون هنالك أعمدة ثابتة لكل كاتب عمود 5-10 اسطر فيه آخر ما كان في السياسة أو المجتمع أو الأحداث أو ما شابه ذلك..حاجة خفيفة لكنها مهمة..او تلخيص بريفلي..لانك احيانا لا تملك الزمن لقرأة الموضوع ككل و تريد ان تحيط به في ايجاز..

  33. بشار أحمد بشار (إبن برد) كتب:

    الكواشف : يعني عاملين نفسكم ناسين أشعار الحقيبة….. وبمناسبة كواشف دي يا السلاوي هو جمع المؤنث السالم منها شنو؟؟

  34. Stricker كتب:

    بكرى موسى العزيز جدا والبكاى
    الله لايجيب وداع ولا قشيش دموع يا حبيب – مدونة سوداننا سوف تكون مستمرة بالتوازى مع الموقع الجديد للبروف جبرا .
    وكما قلنا من قبل ( سوداننا ليست باى حال بديل عن موقع الاستاذ الفاتح جبرا ).
    ومرحب بكل كاتب جديد يريد الكتابة بها او مناقشة موضوع ما – وسيظل اليوزر لكل الكتاب القدامى كما هو .

  35. عباس ركس كتب:

    سلام يا أمم :
    تحياتنا للجميع والف مبروك عودة القمردينة . ونرجع للمساسقة بين البيتين .
    * كاشفات يا ابن برد – نيابة عن السلاوي .!!!!!!!
    نتواصل انشاء الله

  36. ودالفتيحاب كتب:

    التحيه للجميع
    ومساكم الله بالخير
    الف مبروك وماشاءالله الاخوة ماقصروا في القتراحات ونسأل الله التوفيق وللبروف بتمام الصحة وتبرأ من الالم عمنا السلاوى مابريح الله يديه العافيه.
    ود المهدى مقترحاتك صميمه وفعلا محتاجين لمناقشة مثل هذه المواضيع لأهميتها .

  37. حاج أحمد السلاوى كتب:

    أخونا عباس ركس .. أول حاجة أين أنت يا رجل ؟؟ غيب وتعال تلقانا يانا نحنا..بقيت زى هلال رمضان .
    الحاجة التانية شكر الله سعيك لأنك سبقتنى وأديت الإجابة الصحيحة لإبن البرد..وكنت عاوز أزيد عليها شوية وهى إنو مفردة كواشف يمكن أستخدامها للمذكر والمؤنث ( رجال كواشف ..ونساء كواشف …) ما أصلو لمن الزول لمن يبقى كاشف مش حتفرق إذا كان أنثى أو ذكر ..ولاّ أنا غلطان يا بشار ؟

  38. سماسم كتب:

    صباح الخير للبروف وللجميع
    تهانينا الحارة بإكتمال الموقع وإن شاء الله نجد فيه الكثير المفيد كما عودنا من قبل بس ما تنسو منتدي أخوات نسيبة ودا يناقش فيه كل ما يتعلق بالمرأة

  39. bakriMusa كتب:

    العزيز .. استرايكر .. الكوووولك زووووق

    من الطبيعي ان يستمر تواصلنا مع سوداننا..

    قد نعمنا ها هنا وجعلنا الحب عهدا بيننا .. قل معي لاعاش من يفصلنا

    ودمتم سالمين

  40. البشاوى كتب:

    البروف الفاتح
    السمار سلام
    لكم التهنئة والتحية بانجاز الموقع القديم الجديد
    بالنسبة للمنتديات ياعزت نسيت منتدى الاسرة ودة بيهتم بوضع الخطط
    ورسم السيناريوهات للعلاقة الاسرية وحلحلة الشبك التى تحدث بين
    عواطف وسعيد
    لكم الود

  41. مُخير كتب:

    أبو ناجي
    الحلوين سلام
    أضم صوتي للبشاوي في منتدى الأسرة وعاوز فيهو ركن للأطفال عشان ما يكون في إحتجاج أو تغيير للصفحة لمن تحدي الشحارير شدة في البي سي وكما لو أمكن ركن أو مساحة أخرى للشأن الخاص بعواطف زي وصفات للوجبات السودانية وغيرها، عشان ناس كدا ما تلاوز من فك آخرها، وشايف القصة ماشة كويس لقدام يعني نتفائل كدة ونقول بعد سنة سنتين شوية ويكون في قناة القمردينة الفضائية … والسماء هي السقف لطموحاتنا

  42. د.ياسين شمباتى كتب:

    الروف والسمار الكرام…سلامات..

    ربنا يعيدو علينا اجمل من اول,,بس بركز على المنتدى الاجتماعى وركن خاص باخبار المدونين..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s