كبى ليهو هو غير الشاى ده ابوكى بقدر يدبل شيئ ؟

Posted: السبت,24 يناير, 2009 by aflaiga in اخرى

فى فيلم معالى الوزير لاحمد زكى دار حوار صريح وجاد بينه وبين الرائعه يسرا : كان ملخصه ان المراه حين تبحث عن رجل اخر فهى بالتاكيد تبحث عن رجل افضل !! واعتقد كذلك ان الرجل حين يبحث عن مراه اخرى فهو بالتاكيد يبحث عن امراه افضل من الاولى بيد انه فى بعض الاحيان يكتشف الرجل الذى بحث عن اخرى ووجدها ان الاولى كانت ارحم فمثلا واحد بيشتكى من انو مرتو دى بتوديهو الجنه لكن يتوديهو ليها مبشتن  !! فهو بقصد انها تحفظه فى بيته فيحفظها وتجبله على الطاعات والتزام العبادات لكنها لا تهتم بمظهره ولا غذاءه فهو بذلك من رواد الجنه لكنه يدخلها بجلابية الخدره !!! عموما التفكير فى امراه اخرى يحتاج لوقفه قوية مع النفس يتم فيها جرد حسابات الماضى ومن ثم اغلاق كل منافذ المشاكل التى قد تظهر والتى قد تجى ناطه بعد التانيه ما تبقى ثابته وست بيت !! عموما الكثيرون يعتقدون ان اى تانيه هو نتاج لنقص فى الاولى !! ما لم يكن الرجل من الذين لديهم فى العائله تاريخ تعدد سابق ( مرضى ) !! اما الاحسبون فالكثير من الناس يعتقد ان جنوحهم للتعدد نابع من الشرع فقط متناسين بذلك ان القادر بسوى !! وبسوى اكتر من كده كمان !! نعود للاصل فى الموضوع وهو الثقه واليقين التى تصل اليها الزوجه من ان الزوج لا يستطيع ان يدبل وهذا الحديث يذكرنى بمنهج  بدورة القناصه لدى العسكريين التى يتم فيها تصنيف الضرب الخطا على انه اما ( اخطاء رامى ) او (  اخطاء سلاح  ) او ( اخطاء بيئة رماية ) يعنى يا اما الزوج خلاص بقى اخو اخوان مع زوجته وما عندو قدره لى مجازفات تانى والله يقدرو على العندو !!! او ان الحياة لم تعد تسمح له بفتح بيت تانى وهو الاول قادر عليهو ماديا ؟؟ اما اخطاء السلاح نفسه دى فما ممكن تتفسر هنا !! اها يا جماعه الناس العازفين عن التانيه ديل يا ربى المشكله فى الرامى ولا السلاح ولا البيئه ولا مرمى الله ما بترفع ؟؟؟

 

Advertisements
تعليقات
  1. aflaiga كتب:

    توضيح بسيط قبل ما سمسمه تخش :
    انا شخصيا قدوتى فى التوحيد أل ياسر الذين صبروا فكان موعدهم الجنه وساظل اردد ( وحده وحده ) وقد اذكر احيانا من فرط التعذيب بعض الهترشات ولكن عزائى ان سمسمه ستقول ( ان عادوا فعد ) .. ما دام توحيدك فى قلبك !!!!

  2. ابكرون كتب:

    افليقا : ما قايلك (جبل رجاف) ومره واحده 9 درجات علي مقياس ريختر…..واظن توضيحك ما حيفيدك اليوم …..واحسن تشيل (فرش المتاع) بتاعك وتشوف ليك حته تبيت فيها……بس انت ما وريتنا انت (عازف…. كمان)..ولا (راغب…علامه)..وبعدين ..التانيه جانه…والتالته واقعه ….والرابعه …صاقعه

  3. salih كتب:

    الاكارم
    افليقا
    سلام
    مالك مستعجل! كدي وترد علي نفسك!

    يعني يا افليقا مُوحِّد قِبلة وقلب ما شاء الله عليك…بعدين الحاجات دي اربعة ماهن ثلاثة: تُنكح المرأة لاربع .. الحديث .. والجنّة مالها بجلابية الخدرة او بغيرها ما اخير من الجلابية المكوية والبيوت الفارهة والرصيد الكبير وبعدين النار؟

    ما قلنا الكتاب اخير من الفلم …

  4. البشاوى كتب:

    افليقا
    لوسمحت
    (موحد دى قاصد بيها شنو؟؟؟)
    انا بصواحة كدة بحب الزول الواضح الشفيف الزيك كدة — مرة تمنى لى احد الزملاء وهو راجل مرتين ان اعمل التانية فكان ردى (ان كان السبب للزوجة التانيةلسوء فيها فما ادرانى ان تكون رفيقتا زيها وان كانت الاولى مافيها سوء فليه افكر فى التانية ) وانا مع شعار امراة واحدة تكفى وتزيد

  5. طارق أب أحمد كتب:

    أول مره أشوف لى حلفاوى ماخد شايقيه

  6. حنين كتب:

    أخونا أفليقا والحبان .
    سلامات .
    غايتو العنوان دة بشبة عنوان عزت المرطب بتاع (ديل مهندسين ساهى ).
    زكرتنى عما لينا بعد العرس بى أربعة يوم جا شايل قزازة الزيت وماشى على الدكان الجماعة بقررقو عليهو قالوليهو :(أها خلاس رسلوك؟ ) قام قالليهم :(والله مارسلونى لكن بس مروة ساهى .والمروة الله لا قطعا)

  7. aflaiga كتب:

    ابكرون : تعرف القصه دى زى حرب غزه تقعدو تحرشو كده وبعد الحرب تنتهى لا فى زول بيقدم دعم للاعمار ولا فى زول حيرجع الشهداء !! يعنى انتو حتقرو البوست وتنبسطو وتعلقو اها وبكره كيف ؟؟ بكره شنو الليله كيف ؟؟ انا راغب كمان !!ومرات عازف علامه !! بس اليد قصيره ..
    صالح : الجنه لاصحاب جلابية الخدره وايضا لاصحاب الجلابيه مكويه للانه على ما اعتقد سيدخلها عمر بن الخطاب ذو الجلباب الواحد وعثمان ذو الديباج والترطيب .. رضى الله عنهما ..
    اب احمد : انت ما مشيت القاعه ولا شنو .. قالو فى وردى والكورال وسنهورى وهوى يا ليلا .. اليوم يعود للخرطوم بعض الالق .. الحلفاويين من سابو حلفا بقو بقو ما فارق معاهم اى شي حتى الشوايقه !!
    البشاوى : انت كمان موهد ؟؟!! الحمد لله الذى جعلنا موحدين ؟؟ صديقى س يقول ان المره الاولى زى تدخين السجائر والتانيه زى لمن تخلى السجاير بالتمباك !! والتالته زى لمن تبطل كلو وتضرب سوائل وخدار والرابعه زى لمن تقلب شيشه !!! اها مش السجاير ارحم ؟؟
    حنين : هو عزت كان فى كان ده كلو حصل ؟؟
    مشاكل : مرمى الله وقعت ليك ؟؟

  8. bakriMusa كتب:

    طارق أب أحمد ثروا .. افليقا

    (أول مره أشوف لى حلفاوى ماخد شايقيه) تقصد شنو ؟ الزول ده قاصد شنو يا افليقا..؟

  9. بشار أحمد بشار (إبن برد) كتب:

    أفليقا يا أبو الشفتنة : في الحتة دي أفتكر خطأ الرامي والسلاح حاجة واحدة ويجوز أن يكون تم تصفير السلاح لاكن الرامي يكون عندو هيومان إرور وبيوطي التنشين عشان كده بيحصل داون شوتنغ.

  10. bakriMusa
    كلكك نظر ,,,,من كسير التلج الشديد دا شكلو الحكومه بنى شايق ومسيطره على الوضع تماما

  11. bakriMusa كتب:

    طارق اب احمد

    _____

    بنحب من بلدنا ما برا البلد
    سودانية تهوى عاشق ود بلد
    بعيون المفاتن شي ما ليهو حد

    التوب المهبهب فوق أم الضفاير
    والخد المعطر زي أحلى الأزاهر
    والخطوة الأنيقة ترنيمة مشاعر
    أنا بي كلو عمري بمشيلا وبسافر

    مين في الدنيا دية أجمل من بناتنا
    الليهن قلوبنا والفيهن صفاتنا
    الكامنات في روحنا والعايشات في زاتنا

    في حلفا البداية أحلامي وهنايا
    أنا عايش لحبي المخضر برايا
    النافرة الأليفة بجروحي وهنايا

    أنا لي في كريمة شايقية بشلوخا
    نعتز بصفاتا ما نجهل تاريخا
    ماها المابية ريدتي ومو ياها المسيخة

    في شندي العظيمة تلقى بنات جعل
    وحدات في المتمة زي لون العسل
    النايرات خدودن زي فجرا أطل

    في سنكات بنعشق بت سمرة وأبية
    ترتاح في الضريرة خصلاتا الغنية
    عاشت في شعوري أحلى هدندوية

    الواردات جدودن في الجود والشجاعة
    البظهر جمالن من زمن الرضاعة
    سودانية مية المية في زوقا وطباعة
    يا ناس أرحموني أنا قلبي في رفاعه

    لوزة القطن اليانعة السمحة ونضيرة
    تستنى الحليوة في مشية أميرة
    أجمل حب عندي في قلب الجزيرة

    لي في الغرب أغيد في دار حمر والبقارة
    نحميها بسيوفنا تفاحنا ونضارة
    تسكرنا الليالي وتطربنا النقارة

    لي في جوبا الساحر تسلم لي خدودو
    يمرح في غاباتو يسرح في ورودو
    حبي الغالي ليهو ما بعرف حدودو

  12. مشاكل كتب:

    سلامز

    مرمي الله بتاعتك دي و الله قررررررربت توقعني من الكرسي
    الضحك شرطني في نص المكتب لمن خجلت من الناس

    يعطيك العافيي

  13. افليقا سلااام

    قال ال ياسر قال
    كدى دبل فى الشاى لحدت ما القاك بكره

  14. الغبشة كتب:

    افليقيا : اذا كان السبب اخطاء الرامى فما ذنبها؟وبعدين مافى ثقة منها بعدم زواجهمرة تانية الا اذا كانت تدرى انه لا يستطيع مادياً واحياناً ما بتكون مشكلة لانو ممكن يلقى وحده تصرف عليه,ما سمعت المثل المأمنه للرجال ذى الموية فى الغربال
    وفى اعتقادى مجرد ان فكر فى اخرى حتى دون تنفيذ فلا اسفاً عليه.
    والى لقاااااااءءءءءءءء

  15. ودالفتيحاب كتب:

    الله يستر عليك باأفليقا
    دى من هنا بدت قبال البيت..الغبشة قالت ليك مجرد التفكير فلا أسفا علية..
    أها يااخوانا نبقي لي جنس ده..

  16. حاج أحمد السلاوى كتب:

    السمار الكرام .. سلام
    مالكم دايرين تفتحوا لينا جبهة جديدة هلال – مريخ ..؟ ما كنا كويسين وقاعدين فى أمان الله ..أما موضوع التعدد دة عاوز ليهو بوست براااااااهو عشان نديهو حفو بالأدلة من كل الجوانب الشرعية والفقهية والإجتماعية .. ودة ما موضوع قعدات سريعة عابرة… من شان الموحدين يدلو بدلوهم والتانيين كمان يقولوا رايهم وبعد داك نحكّم الشرع ….أها ما رايكم دام فضلكم ؟
    ولحد ما يحصل الكلام دة كل واحد بيقى عشرة ويخلى بالو من عواطفو ..
    وإلى لقاااااااااءءءءءء.

  17. aflaiga كتب:

    بنى شايق ومسيطره ؟؟!! ما عادى اسى لاقاك بنى شايق ما مسيطره ؟؟؟
    بشار الزعيم : التصفير ده لو بيدونا ليهو زمن بنصفر علا الضرب لو بقى بى زمن كيف ؟؟؟
    السلاوى : نسيت ان اقول انك بصفة مراب فقط فى هذا البوست لاسباب سخسيه !!
    ود الفتيحاب : لا اسفا لا اسفا هو التفكير كمان جريمه ؟؟

  18. البشاوى كتب:

    افليقا
    جنبا سلاح
    ارى نيران انطلقت من القاعدة الغبشاوية
    اخشى نيران فسفورية من القاعدة الحمساوية( اقصد الشايقية)
    مافيش داعى وانت راجل عاقل حافظ على الابرياءالعزل
    مافيش زمن للاجاويد الناس مشغولة

  19. أفليقا
    أم أحمد شدت واحد سلك والرساله أمانه أها بتقول ليك نحن بنسيطر بى حنيه و ذكاء و دهاء حاجه زى بى (تكتيك)

    الله يكون فى عوننا يا صديق
    عوده للقيامه القايمه عندك بى هناك

  20. غايتو نحن أهلنا يا (أفليقيا) على قول الغبشه التدبيل دا ما عندنا ليهو ورق على قول بتاعين “الوست” فأهلنا موحدين الله و بيفتكروا أن خلاص الجاتك من عرسك سامحتك و ما في طريقة لواحدة تانية الا لما قد سلف… و دي ذاتا واحدين بحمدلو فيها السلامه …

    فهم يحبون الأطيان حبا جما فلو الواحد رطب بختها في قطعة واطة و الا بيت ناصية

    و بعدين سؤال انت ليه دائما عناوين بوستاتك طويله كدا ليه غايتو دا لو أنا كان عنوان البوست دا يكون
    (كب يا ولد بكبابي الشب) و الا رأيك شنو

  21. حنين كتب:

    د.عزت ثرو أفليقا .
    كيف عامل .
    زكرتنى بى حكاية ماقد سلف دى عندنا عما لينا لمن مرتو ماتت ودايرين يشيلو الجنازة مسك فى كراع العنقريب وقالليهم ((لو ماجبتولى أختا من هنا ما بتمرق))…

  22. bakriMusa كتب:

    حنين.. ثروا افليقا .. سلام

    ((لو ماجبتولى أختا من هنا ما بتمرق))… .. بدل فاقد؟؟؟؟

    الغبشه: شوفي الاخلاص ده كيف ..

  23. aflaiga كتب:

    بكرى موسى : كيف ما يخلص بعد اكتشف انو الاسره الكريمه دى بيموتو !!! عليك امان الله فى اسر يجب اضافتها للاسره الفرعونيه الرابعه .. انتو النسوان البموتو ديل بتلقوهم وين ؟؟؟

  24. حاج أحمد السلاوى كتب:

    الدينمو .. أفليقا …

    تانى رجعنا … قومى يالمرة موتى ؟؟؟؟
    انتو النسوان البموتو ديل بتلقوهم وين ؟؟؟ ..دار بيهم شنو .. مالك بيهم ؟ عواطف أكان سمعتك ما بتريحك .. ارعى بيقيدك !!!

    الحنين .. حنين
    ” ذكرتنى بى حكاية ماقد سلف دى عندنا عما لينا لمن مرتو ماتت ودايرين يشيلو الجنازة مسك فى كراع العنقريب وقالليهم ((لو ماجبتولى أختا من هنا ما بتمرق)) “…أها أكان بقا ما عندها أخت حيسوى شنو ؟؟ ولاّ هو قاصد أى عواطف تانية … ما فارقة معاهو !!

  25. محنك كتب:

    يا اخوانا الموضوع دا حقو ناجلوا بعد نتيجة التعداد زى ما قلنا للدككتور عزت … لما قال الخمسنات … وطمن نفسه وبعض شباب الخمسين … لكن يا جماعة الرجل ما مضمون زى ما قالت غبشة لكن النسوان برضو بخطفه … وهو الراجل بتزوج كديسه ما مراة برضو وعرس وعقد وفرح كدا اووب وكده اووب الماسكة راجل تقول لالا ..ز والبايركس او الفتيات الماملات فى ابوخمسين ديل يودوهن وين … هوى العندو بنات يربيهم على الربع بعد دا وخلن الكبرياء يا نسوان . عشان ما يكون فى شوارع ختف

  26. الغبشة كتب:

    سلام…………….
    افليقيا: لا يعتبر الفعل جريمة الا بنص ولا عقاب من غير نص. والنص ده بتختو عواطف ما بكتبوا ليها سعيد,التفكير جريمة متفق عليه عند كل العواطفات والعقاب كل على حسب نصها,

    بكرى موسى:اخلاص التابانى واليابانى والصينى يا ود امى بعد اموت ان شاء الله يربعوهن ليه ده اخلاص((جنى سكسكانية)).

    محنك : ما كبرياء ده محافظه على حق, وبعدين من حق سعيد يعرس اربعه ما فرض عليه, والحق قابل للتنازل والفرض لا يقبل,اتنازل عن حقك مقابل تصلح ما اخطأه الرامى,هو الرامى ده يخطأ ويمشى؟

    كلام فى راى:بكل صراحة ممكن اقبل يعرس فينى لكن ما بقبل يعرسونى فوق وحده ما مثالية ,ولكن اى راجل بعرس عاوز يصلح مشكلة معينة((عاوز اولاد, هروب من نقة, هروب من بشتنه,هروب من عصر مادى شديييييييييد, من من من من………..))اكون حل مشكلة؟ لا لا لا لا لا,اخدها زى ماهى واصبر على اخفاقاتها بعد ما تحاول تصلحها وما قدرت وادخل الجنة مالك مابى يا سعيد, ما انت ذاتك ممكن تكون((بخيل,مهمل,عصبى,متسلط,,,,,,,……..)) اها عواطف مسكينة تشيل وتخت ((قرض الصبر فى الوجعة))
    الى لقاااااااءءءءءءءءءء

  27. علي سنكل كتب:

    الناس في شنو والحسانيه في شنو؟

  28. محنك كتب:

    يا حبيبى سنكل حتزعل الرجّالة

  29. ودالفتيحاب كتب:

    الكلام ساكت فى العرس جاب ليه قومة نفس…
    كدى شوفو الغبشة دى والبسوى فيه جنس ده ..فعلا فى كثير من الاوقات تحاول تصلحها تخربها ,لانه الصبر على عواطفك بدخلك الجنة وكثير من التجارب التى رايناها كانت تجارب غير ناجحة فالاولى ثم الاولى الاوله..

  30. يبدو قد عز عليه أن يتداول الناس فيما يحسبه فارغا بدلا من الانضمام في العوه القوما “قرن” و هو و لا هنا

  31. حنين كتب:

    سنكل .
    نحن مرقنا من هناك عشان مداخلاتك . كمان جيت بى جاى تمسخ على الناس موضوعم الماسكنو يعنى مهاتراتك مهمة وباقى المواضيع غوغاء .
    نحن عندنا الونسة لمن تكون بصفاء نية بتكون سمحة حتى لو فى موضوع فارغ

  32. bakriMusa كتب:

    حنين.. ثروا.. افليقا الفين سلام

    شوفوا عواطف وسعيد …. جيرانا من الشمال عاملين كيف :ـ

    *مرة واحدة ست بتقول لجارتها الحقيني يا أم محمد بعت جوزي يجيبلي ملوخية راح مخبوط بأتوبيس … يالهوي وعملتي إية .. عملت بامية وامري لله

    *واحده (صعيديه ) قالت لجوزها قولى كلمه حلوه ، قال لها بسبوسه
    قالت له يا اخى قولى كلمه تهزنى ، قال لها مرجيحه
    قالت له يا راجل قولى كلمه احس فيها انى مراتك
    قال لها انتى طالق

    ودمتم سالمين

  33. ابكرون كتب:

    عزيزي عزت ترطيبه :
    عاين كلامك 😦 فأهلنا موحدين الله و بيفتكروا أن خلاص الجاتك من عرسك سامحتك و ما في طريقة لواحدة تانية الا لما قد سلف )…..ما تخلينا نضمك لي (حمى ليلة الرجف) بتاعة افليفا….انتو الحريم ديل سوات ليكم شنو……؟اخير افليقا صرح وقال :هو (راغب علامه) في الموضوع….لكن حكومته الوطنية مسيطرة علي الموضوع…..ولو الى حين…….(اسه هو في القلاية)
    فانت يا دوك (عازف) لنفس الاسباب …(ولا القطار المره …فيه مر حبيبي والفتيل ما بشيل؟؟)………يخسي عالم رجافات……

  34. سهيل كتب:

    هوي يا أفليقا.. كلامك دا بعدين المغربيه بتاباهو .. و شكلك كدا حيجيبوك في جريدة الدار بالصوره و القلم..

    بالله ركزو مع عمنا ود الشايقي لمن قال في قصيدة ود بادي العكودابي :
    (لمن قرأ في القرآن الكريم -آيات الزواج…. “مثنى و ثلاث و رباع” )وكان له ثلاث زوجات فقط :

    (وقف الشيخ طويلآ مثلما فحل الضباع ثم قال .. إنني قصرت في حق الكتاب… سأعاني ما أعاني من عذاب)

    وقد كان له ما أراد و تزوج بالرابعه و قيل عنه.. أنه كاد أن يأتي بالزوجه الخامسه لولا إن حالت الشريعه بينه و بين ما يشتهي

  35. aflaiga كتب:

    سهيل : مغربيه مجهجهه ولا ناشفه ديما !! انت سوى ليك مغربيه اول شيئ بعدين ناقش فى سبل الجهجهه ..
    ابكرون : بالله جاوب لى سمسمه على موضوع راغب علامه وعازف كمان لانو انا اقوالى بتحتاج لى شاهد حسب كلام المتحرى حمودى ..

  36. ابكرون كتب:

    حاضر يا افليقا :(يا ابكرون ابقالي شاهد على نار….هاديه)
    قول للست الاجابة بسيطه : راغب من يرغب في تدبيل علامة التنوين في تاء التأنيث ….علامه مضاف (اليها) شوية (شداعة) وتوم وشمار…عازف بمعني غير (راغب)..كمان بمعنى ايضا ….والراغب والمعزوف في محل خوف تقديره …هو اجو ان اكون ابنت ….والله اعلم……

  37. سهيل كتب:

    علي بالطلاق أنا ما فهمت حاجه… يا فكي ابكرون شنو وديت الراجل الثوره بالصالحه..

  38. semsema كتب:

    ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    ؟؟؟؟؟؟؟؟؟؟؟؟؟؟؟؟؟؟؟؟؟؟؟
    ؟؟؟؟؟؟؟؟؟؟؟؟؟؟؟؟؟
    ؟؟؟؟؟؟؟؟؟؟؟؟؟؟

  39. حاج أحمد السلاوى كتب:

    الدينمو .. أفليقا .. سلام .
    سجمك يا أفليقا .. شفت علامات الإستفهام الكتييييييرة دى ؟ غايتو أنا فهمت منها إنو اليلة شوف ليك حتة تانية بيّت فيها ..أو معناها التانى الأخف شوية ..يعنى إنك إتعديت اخطوط الحمرا المرسومة ليك وفتح عينك زى الريال أب عشرة.. وشيل شيلتك …. ما أظن حمودى زااااااتو يحلك .

  40. nono كتب:

    التحية لكم
    يكثر الحديث بين الحين والأخر عن الزواج الثانى، فالبعض يراه قنبلة موقوتة تهدد مؤسسة الزواج، ويراه البعض الآخر حلا سحريا لأزمة العنوسة التي ألقت بظلالها على المجتمعات العربية بشكل عام الى حد المطالبة بتبني فكرة الترويج للزواج الثاني كحل لتلك الظاهرة،
    ***وهل قلب الرجل يقبل القسمة على اثنين ؟
    *يمكن أن يتزوج الرجل بأكثر من زوجة وينجح معهم(
    ولنا في( رسول الله أسوة حسنة)
    والصحابة كان البعض منهم متزوج بأكثر من امرأة وكانت الحياة تسير .. وأعتقد أن هناك حالات عديدة في المجتمع العربي لأزواج يجمعون بين أكثر من زوجة والحياة مستقرة وهو عادل في أمور الدنيا بين الزوجتين
    وتعالى {فانكحوا ماطاب لكم من النساء مثنى وثلاث ورباع فإن خفتم أن لاتعدلوا فواحدة…..} الآية
    كسرة/
    بعد دة الخوف الا من عووووووووووووووووووواطف

  41. aflaiga كتب:

    علامات الاستفهام دى وحد من تلاته :
    * يا سمسمه ما متخيله ابدا مهما يكون انو افليقا يبدر منو ولو مجرد التفكير فى الدخول فى بوست زى ده !!!
    * او انو سمسمه رسلت موجز الانباء فى البوست والتفاصيل فى الميل والتحليل المفصل فى البيت !!
    * او كمان ولا اقول ليكم او دى خلوها بكره بعد نرجع البيت الليله وعلى كل حال :
    ستريكر : جهز الفرشه والمعجون والمرتبه . والعاقبه لكم فى الملمات .

  42. semsema كتب:

    السلام عليكم
    اولاً :الاستفهامات لفريق المشجعين لابو حمودي شنو هو حتى لو كشكر ساي نلقاكم كلكم مشجعين مع انو مفروض ما تبيعوا العشرة وانا عضو فعال معكم حتى وان كنت غالب الاحيان قارئة فقط ولو كان مجرد تفكير تخلوهو يعدل عن الفكرة موش الكل مشجع لكن علي الاقل التصريحات من ابو حمودي مقروءة الدور والباقي علي التصريحات غير المعلنة.
    ثانياً: الدين دا بس مثنى وثلاث ورباع ما هسة مدورين التعنت والتشدد وطلعت مسميات اخرى
    ثالثاً : ابو حمودي موش لو فكر لو نفذ ذاتووو ما في جريمة ولاغيرو يا هو ابوحمودي وابو العيال سيد بيتنا وفرحة عيدنا وان عدتم عدنا.
    ما هي المحرية فيكم يا ناس البيت الصغير يا الاجاويد لينا ولي غيرنا !!!!

  43. aflaiga كتب:

    شباب : يحكى ان الشيخ الاحسبونى الكبير كان برفقة سائقه فى رحلة عمل وكان السائق مونون !! فترجل الشيخ لقضاء حاجه ولما عاد وجد السائق قد غادر وسرعان ما طلب النجده ( انشاء الله دايما ) فجاءته على الفور ( انشاء الله ما دايما ) وبعد بحث مضن عن السائق تم العثور عليه مونون فى توكيره من التوكيرات واتو به للشيخ الذى ساله :
    الشيخ : يا زول انت مجنون تخلينى انا انا وتمشى انت ما عارف ممكن نسوى فيك شنو ؟؟
    السائق : يا شيخ اتكلم ولا مافى داعى ؟؟
    الشيخ : كمان بتتفاصح اتكلم ااى ..
    السائق : يا شيخنا انت قايلنى ما شفت يعنى ؟؟
    الشيخ : شفت شنو اتكلم يا زول انت مجنون ؟؟
    السائق : والله ياجماعه انا نزلت الشيخ وواقف بعاين جو اتنين ( من فوق ) لابسين ابيض فى ابيض وشالوهو وطلعو بيهو فوق وبعد داك …
    الشيخ مقاطعا : اسكت اسكت خلاص انا مش قلت ليك الكرامات دى ما تحكيها قدامك الناس ( وعفا عنه فورا ) …..
    سمسمه : انا مش قلت ليكى القصص دى ما تحكيها قدام الناس انا تانى ما بفوت بخليكى كويس ؟؟؟
    كسره : يا جماعه اى زول يبقى عشره على سمسمتو عشان العيد الجاى يجينا وكلنا مسمسمين !!

  44. محنك كتب:

    السيدة / ام حمودى
    حمد الله على السلامه

    وافليقا ما قصر قال من انصار الواحدة وممكن بفتكر راغب علامه لانو ما متزوج اتنين وخايف من بتاع الكمنجة لانو فيها اوتار كتيرة بتعزف حنين وعالى ووسط

    وصحيح البكاء بحرروا اهلوا

    نحن بنتكلم بصورة عامة ما لينا دخل باشخاص او شخصى

    وانا مع التعدد وآخرين مع الواحدة وكلنا على حق . فالمرتاح مع واحدة او غير قادر على الثانية لاى سبب معه حق مع الزوجة الحالية . والباحث عن التجديد لا غبار عليه . والزوجة هى الزوجة لها مكانها مهما كان ترتيبها

    طرفة :
    يحكى ان اعرابى طلع البر ( يعنى الصحراء وعادة يخرج اليها الاعراب للنزهه ويقضون بها اياما بالخيام ) ومعه زوجاته وكن ثلاثة فبعد الانس بالليل قال كل واحدة تقول كلام والبتقول كلام اجمل اليوم يومها

    قالت الكبيرة مثل خليجى ( قديمك نديمك ولو جديد اغناك ) ( اى القديم احسن ولو اتخذت جديد يغنيك عنه )
    الثانية قالت ( خير الامور اوسطها )
    قالت الثالثة : قال تعالى : بسم الله الرحمن الرحيم ( وللاخرة خير لك من الاولى)

    الشيخ قال انا مع القرآن وذهب مع الصغيرة

    كسرة
    ( هو اصلوا ناوى يمشى للصغيرة ولو قالت اى كلام لحسّنه )

  45. ابكرون كتب:

    سهيل : لومك علي افليقا فاهم الكلام ده كلوووو….
    قالو يا سهيل الراعي قال للذئب احرس لي الغنم ديل….الذئب قال ليه لا ما بحرسن بخاف منهم …عيونن حمر…..وما دام صاحبك دموعو شتت وغلب اللقاط خلاص….واتجرس (رقد سلطه)
    وكنا قايلنو بدافع عن قروب الراغبين (علامات)…..اخير عزت قال شي اراضي وشي شقق والترطيب ما بطلعو من (الرن ويي)

  46. محنك كتب:

    يا ابكرون يا صديقى

    ما تحرش الجماعة على الحبيب هو قاصد يورط باقى العقد وكل واحد عواطفوا ما بتخش هنا فلّت ورغّب … وكل واحد عواطفوا عارفة ومتابعة حركات كى بورده عصا نايمه وعصا قايمة او كب الجرسة وقال ووووب كفاية واحدة .. بس كويس ما قال كتيره ذاتو

    لكن بتصريحات ابوحمودى دى بالرغم من معرفة انو اهله سيقرؤن كلامه بعتبروا راجل تب

  47. محنك كتب:

    شكرا ليك يا ودالخلا ولو فى طريقة تسحب من التعليق اوافق المهندس استرايكر بسحبها

  48. حاج أحمد السلاوى كتب:

    أخونا العزيز جداً ..محنك .. سلام
    تااااااااتى قمنا وجبنا سيرة البحر ؟؟؟؟؟؟؟؟؟؟

  49. nono كتب:

    منقول
    . تعدد الزوجات يطيل العمر
    قد يكون سر الحياة السعيدة والطويلة يكمن في الاقتران بزوجة ثانية.هذا ما توصل إليه باحثون في جامعة شفيلد البريطانية بعد اكتشافهم “فوائد” الزواج من امرأتين في الوقت نفسه، والاطلاع على إحصاءات أعدتها منظمة الصحة العالمية حول البلدان التي تسمح بتعدد الزوجات والنتائج الايجابية لذلك ومنها أن عمر الزوج الذي يقترن بأخرى يزداد أكثر من غيره بنسبة 12%.وذكرت صحيفة (الدايلي مايل) أن الدراسة التي نشرت في العدد الاخير من مجلة (نيو ساينتيست) أشارت إلى أن الرجل الذي يتزوج من أكثر من امرأة وتكون لديه عائلة كبيرة يحظى برعاية أفضل خلال مرحلة الكهولة ويعيش لفترة أطول.
    وقال الاختصاصي في تطور علم النفس لانس ووركمان من جامعة باث سبا البريطانية “إذا كان لديك أكثر من زوجة فقد يعتنين بك وتعيش لفترة أطول”، مشيراً إلى فوائد الزواج “لأننا نعرف أنه حتى الرجل الذي يقترن بامرأة واحدة يعيش لفترة أطول من العازب”.

  50. سهيل كتب:

    والله يا سمسمه أمبارح كتبت رد غير تشجيعي و كان كلو في صفك .. لكن باين عليهو ابو حمودي كلم صاحبو قام عمل ليهو “بح”..

    شنو يا فرده خليك ديموقراطي..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s