أبحث مع الشرطة !

Posted: الأحد,25 يناير, 2009 by الفاتح جبرا in ساخر سبيل

سوف ينصرف ذهنك أيها القارئ الكريم إلى أؤلئك الأشخاص الذين تجد (صورتهم) الفوتوغرافية  أعلى الخبر الذى عنوانه فى الغالب (خرج ولم يعد) لكن معليش ده بحث (شكلو تانى) ! إذ أن هذا (الكائن) المختفى والذى نطالبك (أن تبحث مع الشرطة) عنه هو (شركات) ! …  أيوه (شركاااات)  يعنى  مجالس إدارات ومدراء و(مبانى) و(عربات) ومخصصات وموظفين وموظفات وموبايلات وعطاءآت وقروش وحسابات وبنوك ،   أقر (البرلمان) والمراجع العام و(المسجل التجارى) أن هذه الشركات لم تخضع للمراجعة ولا يعرف لها مكان !!

بعد أن قرأت الخبر (المدهش) قلت لنفسى (معقول يا ود يا جبرا) تقيف مكتوف الايدى  وشركات (حكومتك) (راحت فى السكة) وهى (شايلا حساباتا) ماشة ديوان  (المراجع العام) عشان (يراجعا) ليها؟  إنت لازم من منطلق إنك (مواطن صالح) لازم تبحث مع الشرطة وتقدم (العون) اللازم للعثور على هذه الشركات (الرايحة) قبل ان يحدث لها حادث لا قدر الله أو (يلاقوها رباطين) يقلعو (القروش الشايلاها) دى ولو إنو الإحتمال ده بعيد عشان الناس المسئولين من الشركات دى  (أقوياء أمناء) ولا يمكن يفرطوا فى (فرطاقه) من  القروش دى بتااااتن .

أثناء تفكيرى بصوت مسموع خاطبتنى المدام قائلة :

–          إنت الرايح ليك شنو ؟

–          ما أنا دى (الحكومة) !

–          كمان (الحكومة) بتروح ليها حاجه ؟ دى ما شديده و(لضيضة) !

–          والله من ناحيت ما بتروح ليها حاجه فما بتروح  لكن أهو غايتو الحصل إنو رايحه ليها حاجات !

–          كمان حاجات ما حاجه وااحده ! – مواصلة – حاجات صغيرونة كده يعنى ما (بتتشاف) ؟

–          لا شوية (شركات) كده !

–     معقوله هسه الحكومة دى (شركات الناس) تشيف  وشركاتا ما (تشيف)؟

طلبت من حرمنا المصون أن تبطل الكلام (اللا بودى ولا بجيب) وأن تتركنى أركز واعمل فكرى (كوماطن صالح) فى كيفية العثور غلى هذه (الشركات الرايحة) إلا أنها قالت لى بطريقة الشخص الواثق من كلامو :

      –    والله زول غيرى ح يلقى ليكم (شركات) الحكومة (الرايحة) دى مافى !

إندهشت من حديثها الواثق وقلت فى نفسى (الله ! المرا دى شغالا فى الأمن الإقتصادى وأنا ما عارف !؟) ثم خاطبتها فى تهكم  وسخرية مشيراً إليها بسبابتى :

 

–          والله ياهو كمان الفضل (إنتى) تلقى (للحكومة) شركاتا !

–           أنا ما ح ألقاها ليها لكن عندى الزول البلقاها ليها !

–          وده يطلع منو؟

–          مالا (التومة الوداعية) ؟ والله شديدة جنس شده تعرف ليك مكان (الرايحة) كان فى (السماء الأحمر)!

من منطلق إنو الرايحة ليهو (شركة) يفتح خشم (البقرة) طلبت من (المدام) الإتصال بالتومة وإستدعائها على وجه السرعة لهذه المهمة (الوطنية) العاجلة ، لم تلبث (التومة) أن حضرت وبعد أن جلست وإرتشفت (فتجان قهوة) مدنكل أخرجت و(دعاتها) من شنظة يدها وخاطبتنى :

–          ( البياض) وينو؟

تحسست جيبى فوجدت بعض (الجنيهات) وضعتهم أمامها على التربيزة فى ذات الوقت التى (كشحت فيها) (ودعاتها) مرة أخرى :

–          خت  (النية) بتاعت الحاجه العاوزنى أشوفا ليك !

هنا قمت بوضع طرف (سبابتى)  ضاغطاً على حافة التربيزة وأنا أقول فى سرى (شركات الحكومة الرايحة .. شركات الحكومة الرايحة … شركات الحكومة الرايحة) !

–          الحاجات الرايحة دى بتاعتك !

–          والله يا التومة هى ما بتاعتى بالضبط كده لكن بيكون عندى فيها نصيب !

–          (وهى تكشح مرة اخرى) : الناس (السماااان) ووشهم (ناير) وراكبين العربات (السمحة) ديل منو؟ الحرامية؟

–          عليكى الله يا التومة ما تودينا فى داهية كدى شوفى لينا الحاجات الرايحة دى مكانا وين !

–          (تلم الودع مرة أخرى وتكشح) : والله يا استاذ الحاجات دى تانى ( الله يعلم) تتلقى !

–          كيف الكلام ده يا (التومة) ؟

–          أنا يا أستاذ (ودعى ده أصلو ما بكضب) ! الناس السمان ونايرين ديل (ختو الحاجات دى فى جيبوهم ) وكبو (الزوغة) !

–          يعنى هسه يا التومة ما نبحث مع الشرطة !

–          شرطة شنو يا أستاذ  ؟ ديل تانى بى (قوقل أيرث) GOOGLE EARTH  ما بتلقو !!

 

كسرة :

 

من يتعرف على إحدى هذه الشركات عليه الإتصال بأقرب قسم شرطة او بالسيد المراجع العام او بالسيد المسجل التجارى أو بأحد (نوام) البرلمان  أو بالهاتف (خمسة أصفار زيرو) !  

Advertisements
تعليقات
  1. ودالفتيحاب كتب:

    البروف صبحك الله بالخير
    وربنا يجمع..
    بس ده الشى الوحيد الصدق فيه ودع التومة لانوفعلا دى وين تتلقى…بس كان مشيت جاوبتها كان ودتك فى ستين داهيه لانها هي زاته منهم ..ماقالت ليك تكبير

  2. ألفاتح جبرا كتب:

    قبيلة سلااام

    يعنى ما فى (كراسو ؟) !

  3. ابكرون كتب:

    سلام :
    اليكم جزء من تقرير بالجزيرة نت ولا تعليق …وراجع تاني….
    ===================
    أما العضو البرلماني أحمد عيسى الذي رغم وصفه تقرير المراجع العام بالضعف فإنه اعتبر أن الاعتداء على المال العام سيكون بصورة غير معهودة إذا ما تمكن المراجع العام من إخضاع كافة المؤسسات المتأخرة -التي بلغ عددها نحو 96 مؤسسة حكومية- للمراجعة، مشيرا إلى أن استثناء عدد من المؤسسات يدل على وجود مشاكل كبيرة فيها.

    وذكر عيسى أن التقرير كشف عن وجود مؤسسات لا يستطيع المراجع العام مراجعتها، وهي ما سماها البرلماني بـ”الإمبراطوريات الكبيرة داخل الدولة”.

    عائشة عبد السلام (الجزيرة نت)
    وأكد أن عدم إخضاع كافة المؤسسات للمراجعة يخالف كافة القوانين ما يشير إلى أن هناك مؤسسات فوق القانون، مقترحا في الوقت ذاته إنشاء لجنة برلمانية لمحاربة الفساد.

    تهرب
    أما العضوة عائشة عبد السلام فاتهمت الجهاز التنفيذي للدولة بعدم الرغبة في الرقابة على المال العام “بل إنه لا يقبل أي شفافية في الدولة”.

    وقالت إن البرلمان سيتابع متابعة وملاحقة كافة الشركات الرافضة للمراجعة لإجبارها على تنفيذ ذلك دون النظر إلى من يتولى أمرها أو يديرها.

    وأكدت عائشة أن هناك مؤسسات كبرى لم تخضع للمراجعة “وهذا يعني أننا بحاجة إلى مجهود كبير لكشف ما تخبئه هذه الشركات”.

  4. طارق أب أحمد كتب:

    00000زيرو
    تررن ترررن
    ألو البروف والسمار صباح الخير
    أنا فاعل خير و متصل من (ما لزيزه يا) عشان أنصحكم من اللعب بى النار
    أنتو بتحلموا ولا أيه ,,هو مين بيراجع مين

    آآل على رأى المثل فتح ملبن تاكل مخك

  5. حاج أحمد السلاوى كتب:

    الفاتح ..وكل القبيلة … سلامين تلاتة..وصبحكم الله بالخير .
    نعتذر عن الإنقطاع القهرى لظروف طارئة …
    إنتو قايلين اللاندكروزرات الحايمة فى الشوارع دى شنو .. ما هى دى الشركات زااااااته القاعدة حاجة التومة تكشكش ليها بالودع بتاعه … بس الودع ما قادر يكشف الحكاية لأن الشركات متحركة وما ثابتة فى حتة واحدة… الجماعة شايلين كل حاجة فى العربات الفارهة وزايغين من ناس الضرائب والعوائد وكافة أنواع الجبايات المعروفة والغير معروفة…أحد اصدقائنا ومعارفنا لديه مؤسسة مقاولات سغيرونة وعنده مكتب فيهو أوضة واااااحدة وصالة دخلوا عليهو جماعة النفايات وقالوا ليهو تدفع 250 ( بالقديم ) قال ليهم ياجماعة الخير أصلو انا عندى نفايات نووية عشان ادفع مبلغ قدر دة ؟ …
    والجماعة طبعن بيفتشوا على الشركات الغير حكومية …وتذكر زماااان البوست بتاعك الكتبتو يا الفاتح عن وزارة التربية والتعليم العملت شركة نقل ووزارة االداخلية العملت مؤسسة للتعليم العالى والمهنى ووزارة المالية العملت شركة امنية ..وأهو برضو قرشين حلوين ينفعوا لليوم الأسود ..
    وخليتكم بعافية .وأكان لقيتو واااااحدة من الشركات أدونا خبر !!!

  6. الأستاذ الفاتح و المودونين الأعزاء

    سلام… فعلا مشكلة هسة لكين كان لقيت ليكم واحدة من الشركات دي و قمت مشيت “النقطة” عليك أمان الله الا يضحكوا علي…

    لأنو لم يعد هناك “تيرم أوف ريفرنس” لجميع مؤسساتنا كان أمنية و الا عدليه و لا كان خدمية و الا سيادية فاختلط الحابل بالنابل فلم تعد هناك مسئوليات محددة لذا لم نعد نستعجب اذا كان هم “الداخلية”لم القروش و صلاحيات “الخارجية” تمتد للاستيراد…

    عشان كدا ما حنتعب نفسنا ونفتش ساكت و أكان لي “النوام” ديل برضو مافي فايده لأنهم قاعدين بيفتشوا في “مراكيبهم” من زمن ناس “بوثديو” عندما ُسئل ذات مرة في البرلمان ان كان “مركوب” احدى الأعضاء قد وقع في عينو….

  7. aflaiga كتب:

    اعلان بالنشر :
    بهذا ووفق السلطات الما شفت منها شيئ انا الشعب الفضل وبما انه قد ثبت لدينا ان هناك شريكات قد اخفت نفسها للحيلوله دون العثور على تصبيناتها المصبنه وخميراتها المدكنه فانا اعلن لكافة المواطنين ان يرفعوا ايديهم لله الشايف اى شيئ وعارف اى شيئ ان يجعل كيد هذه الشريكات فى نحرها وبما اننا شعب مسكين ما عارف اى شيئ وما بيسال عن اى شيئ فاننا نتوجه ببدعوات قلبيه صادقه الى هذه الشركات بان ( انشاء الله ينفعا ) ومطرح ما يسرى يمرى !! بس بالله عليكم الله نحنا ما عندنا مانع تاكلو بس تورونا اكلتو كم عشان الواحد لمن يرفع يدو لى ربنا يضمن الرقم فى المطالبه !! وطبعا ما حنقول ليكم سلمو نفسكم لاقرب نقطة شرطه لانو نحنا ناس واقعيين والشرطه ربنا يعينا على الحراميه الصغار هى فاضيه ؟؟

  8. حنين كتب:

    البروووف جبرا والسادة المدوناتية الاكارم .
    سلامات وصباح الخير عليكم .
    أنا داير أسأل سؤال (مازى سؤال البشاوى لى أفليقا ) إنو المسجل التجارى ويييين هو مازاتو السجل الشركات دى وعارف فجتا ومحل إقامتا وعارفا بتمشى وين وبتطلع وين وبتنزل وين ياربى يكون هو زاتو ماجايب خبر .
    هى لمن الوداعية بقت تعرف قوقل إيرث الجماعة ديل بكونو عرفو يدسو شركاتم دى فى حتة تانية …

  9. الشعب السودانى الفضل
    ما زالت جبهتكم الشيطانيه تمسك بجمر القضيه
    ولكن القضيه محتاجه مصاريف لذا قررنا ما هو أت

    بيع كل المصانع والشركات والبنوك والمشاريع الزراعيه
    يتم البيع للأحسبون فقط و بقيمة أسميه حتى نشجع القطاع الخاص على الإستثمار دفعو ولا لا مامشكله المهم العموله
    بعد ما نخصخص كل القطاع العام حنعمل تانى شركات زيها شراكه بين الحكومه والأحسبون نحن بفلوسكم وهم باللغف و الأداره
    حنشيد شوارع و كبارى ونضرب فلوسا
    حنفقركم حنفقركم لو ما شفنا الشيخ سرق والحره تأكل من ثديها ما حنقيف

    من الارشيف

  10. نيام كتب:

    اخونا محمد احمد قال لي زعلان :
    – اول ما عملت لي دكان للمعايش جوني ناس المحلية اخدو مني حق الرخصة مرقوا جوني ناس المحلية قسم العوائد شالووووو حق العوائد مرقووو جوني ناس المحلية قسم اليافطات شالو مرقوا جوني ناس الضرائب شالو حقهم مرقو جوني ناس النفايات شالووووها مرقو جوني ناس الزكاة شالوووووها مرقوا جوني الشحادين شالو حقهم مرقو جاني سيد الايجار داير حقو قفلت الكنتين و جردت البضاعة لاسيادها ومرقتا كيت…انتو الحيكومة دي بلي ودالهرام تشوف شاسي ما تشوف..

  11. البشاوى كتب:

    البروف والسمار
    وحاتكم انا لو لقيت لى شركة من ديل الا اديكم حقكم معاى بس انتو ادعو لى
    القاها
    العام السابق تم نقل احد مراجعى ديوان المراجع العام من رئاسة الولاية التى
    كان يقوم بمراجعتها لانه عكلت فى موضوع شيك صدر من الحسابات واتصرف
    نقدا ولم تقابله فواتير ومستندات تفيد اوجه الصرف فكانت التفاصيل عبارة عن
    كشف مكتوب باليد كم مابعرف قيمة عربات وكم مابعرف قيمة تبرع لشنو كدة
    وكم مابعرف دعم لى وين ماعارف كل المبلغ طلع كسور وزلنطحية
    على فكرة تم نقل المراجع لى قسم البحوث والتدريب

  12. مشاكل كتب:

    سلامز

    برزت شركة يوما
    في ثياب المختفين
    و مشت في الارض تهذي
    و تسب الارزقينا
    و تقول

    توسي تان تلدا

  13. محنك كتب:

    العتب على النظر يا بروف ويا سمار

    يعنى ما شايفين العربات الفارهه
    ماشايفين العمارات
    ما بتحضروا عقود الزواج فى مسجد الشهيد والحاجة النية وسيدة السنهورى
    ما سمعتوا باساطين الشيكات الطايرة والديون المتعثرة بالترليونات
    ما سمعتوا بالحج السياحى
    ما سمعتوا بالاستثمارات على الكورنيش

    ما شفتوا الكبارى والطرق والمطارات والخزانات والمشاريع والمعتمدين والكبار والصغار والوزارء ووزاراء الدولة والمستشارين والمحاسيب وابان مراكيب

    كل واحد عندو كذا شركة وشربك كذا شربكة ومدربك الاقتصاد كذا دربكة وممنوع المراجعات لان لا سمح الله بتشكوا فينا نحنا شغالين لله

    كل دا عايز شركات والشركات عايزات مدراء والمدراء عايزين سيارات وبيوت وعمارات ومزارع وشوارع

    تراجعوا شركات السد انتو حلمانيين
    المثل بقول البعرة تدل على البعير
    كل عمارة تقيف قدامها بدرى الصباح ستطلع منها سيارة ( عربية ) منفوخة وزول منفوخ ابراه شوف حدو وين بعد داك بتصل لشركة اخت شركة بنت عم شركة … وكان ما وصلت للشركة حتصل لمكتب حابه عندو منصب ابو الشركات

  14. محنك كتب:

    مكتب صاحبه عندو منصب ابو الشركات كات كات كات بقول باااع آآاى بقول باااع بضبحوا فى الضحية لا فى السلخانة

  15. nono كتب:

    التحية جبرا الاخوة اصحاب المدونة /

    ست الودع ارمى الودع ليه كشكشى شوفيه ليه كان فيه شى قوليه ليه ما تختشى ??????????

    الفساد اتخذ اشكالا تشمل نهب المال العام اشياء اخري

    زمان الحاجات دة لاتراة بالعين المجردة واصبحت الان تري بام العين

    انا عارفة لية كم شركة في كم شركة لكين وين القي الضمان لو بلغتة؟

    كسرة/ الجماعة ديل عاملين تنوير في الاحياء حااااااااااااااااااااااااااا نعمل ليكم

    وحااااااااااااااانعمل ليكم هم دايرين مننا شنووووووووا بعد دة

    1/صوت

    2/ صوت عنج

    * قالوا الاختشوووووووا ماتواااااااااااااااااااااا

  16. قرار خصخصة الموانى اصبح واقع بورتسودان

    كشف المدير العام لهيئة الموانيء البحرية المهندس ابراهيم الامين عن أول اجتماع بين الهيئة وادارة موانيء دبي الإماراتية في شهر مارس المقبل، بغرض التفاكر حول طلب الاخيرة بإيجار الموانيء لمدة 5 سنوات .
    وقال الامين لـ«الصحافة» ، ان هنالك اتفاقاً مبدئياً مع موانيء دبي في هذا الخصوص،مشيراً الى استمرار الاتصالات بين الطرفين لتبادل المعلومات، مؤكداً ان موانئ دبي هي الشركة الوحيدة التي تقدمت بطلب حتى الآن للإيجار .
    وشدد مدير الهيئة على ان الشرط الاساسي الذي«ابلغناهم به،هو تمسكنا باستيعاب العمالة الحالية خلال فترة الايجار» ،مشيراً الى انه سيجدد الطلب خلال اجتماع مارس.
    ورجح الامين ان يبدأ العمل رسمياً مطلع العام القادم «اذا ما تم الاتفاق».
    واكد ان الخطوة لا تعني « خصخصة، وانما هي ايجار للموانئ من اجل تطويرها وتحديثها كباقي موانيء العالم الاخرى»

    نقلا عن سودانيزاونلاين

    بعد سودان لاين وسودانير عفوا بعد كل السودان الأن إتجهت العصابه للميناء مما يعنى فقدان أهل الشرق آخر مورد رزق لهم ودايما تحت مسمى التطوير

    يا ناس بس ورونا مكان واحد إتطور . حسبنا الله و نعم الوكيل

  17. ابكرون كتب:

    سلام ….نداء….ثم نداء
    اخوتي جميعا بالجد انه لشئ مؤسف ان يصل بنا الحال الي هذا الدرك من عدم احترام بعضنا البعض ومن عدم تقديرنا لفكر كل منا وقد جمعتنا الكلمة وحب بعضنا البعض في مدونة جبرا الاولي وموقعنا هذا من بعده …..وعندما نفقد احترامنا لبعضنا ولقرائنا فقد فقدنا كل شي ……
    لا اود ان اشير لاحداو لآخر بالاتهام بانه المتسبب في كل ذلك ….ولكني اشير لعدم احرامنا للموقع وللرأي والرأي الآخر…..
    اخي الباشمهندس ود الخلا ……لم نصدق بالامس القريب ان الموضوع قد انتهي وتصافت الانفس وآخر كلماتك والاخ الفاتح ان (نسقف علي كدا)……بكل الصدق لم يك هناك اي داعي لإثارة الموضوع مرة أخري ببوست الاستهزاء……ولم نلعق بعد جراح بوست الاخ قرن ……والآن ما حصل قد حصل ….ارجو ان يتوقف كل ذلك في هذا البوست وبوست الرتب لقرن شطه ……وساقوم بنشر هذا النداء الصادق في البوستين وكذلك في بوست الاخ جبرا…..توقفوا رحمة بقراءكم اولا ثم رحمة بالصداقة والاخاء الذي يجمعنا ….
    وارجو ان نتقبل جميعا ان يقوم الاخ استرايكر برفع هذا البوست وكذلك بوست الاخ قرن شطه نهائيا من الموقع …..وان تصفوا النفوس كان لم يك شيئا بالله عليكم وان لا نعود لمثل هذه الحالة الشاذة …..ولكم معزتي وحبي واملي في عاجل الوئام….

  18. محنك كتب:

    اقتراحات الاخ ابكرون بناءة خاصة سحب البوستين اثنى ذلك والامر راجع لادارة المدونة وللرجلين

  19. الغبشة كتب:

    سلام يابرفو:(((نوام) البرلمان ,,,,,,,))دى اكيد شيطان الكتابة قال ليك تسمح لى اكيب الجملة دى.والتومة شنو البتجيب الشركات دى والرايحات ما تشوف ابكرونا كان جابة ليك فى لمح البصر ولا شنو يا ابكرونا؟

  20. نيام كتب:

    طارق اب احمد:
    (ما لزيزه يا) دي ( لذيذة يا) .. بس لكين هي وين ؟
    جنب (ماليزيا) ، (مالطا) ، (ملكال) ، (ملكن ) ام (مالكم)؟
    اما سؤالك عن شنو الاتطور انت ماتشيف تفلزيون دي و لا شنو يا – تنمية علي الهواء ما تشيف؟برنامج اوفففف بوفففف واحد اتنين تلاته بوووووف ما تشيف؟برنامج نحن الطيور اصدقاء المزارع ما تشيف؟برنامج اوف اوف مية ما تشيف؟برنامج هالو هالو معاي منو ما تشيف؟انتو كان كدي شركات دا ولا تشيف!!
    اما الفرق بين سودان لاين و سودانيز اون لاين الاول فشي لاين فشي مراكب والثاني اندوش لاين ما اندوش مراكب..
    او كما قال الشاعر
    فتح ملبن تاكل مخك
    او الفي لمخك و اقعد اضحك
    تلقي شركتك عامرة بكدحك
    والشغلانة و الدنانة ديمة تحسبن فينا بردحك
    والعداد بالمرصاد تك تك تك تك

  21. مُخير كتب:

    الأستاذ جبرا سلام
    الحلوين سلامات
    وصباح اللوز ….
    هودنا يا هودنا
    هودنا يا هودنا
    يابا سافر مكة (في حاج سياحي)
    جاب لي معاه حتة كعكة (كعكة مستوردة)
    والكعكعة جوه المخزن (مخازن الشركات)
    والمخزن عاوز مفتاح ( باس ورد)
    والمفتاح عند النجار (القيادة التنفيذية)
    والنجار عاوز فلوس (الضحاكات)
    والفلوس عند التجار (الأحسبون)
    والتجار عاوزين عروس (الثانية ولا الثالثة)
    والعروس عند الجُهال (الشعب الداقس)
    والُجهال عاوزين لبن (رمز للسلع الضرورية)
    واللبن عند البقر (السُُمان أعوان النظام)
    والبقر عاوز حشيش (المزيد من الإمتيازات والعطاءات)
    والحشيش تحت الجبل (التحالف الحاكم)
    والجبل عاوز مطر (أصوات وتأييد)
    والمطر عند ربنا (يعطيه لمن يشاء)
    ربنا يا ربنا يا ربنا (رافعين أكف الضراع)
    نحن صُغار شن ذنبنا (ده لسان حال الشعب الفضل)
    يا صُغار ويا كُبار
    صلوا على النبي المختار
    وقومي يا الشافعة نومي وما كفاك نومي

  22. محنك كتب:

    مخير الحبيب

    انت كان من نيالا اتربيت هناك … ام جاورت اهلها

    لو بتتكتب بالعربى كان كتبتها

  23. ابو محمد - دبي كتب:

    البروف ابو ناجى
    ** قلت الوداعيه ماعرفت الشركات طشت وين بقروشنا – أنت عارف الحراميه المسجلين الشركات بأسمائهم كلو واحد عامل للتانى أنو هو شريفه فاضل – وزارة الداخليه شغاله مقاولات والامن شغال إستشارات هندسيه – وناس البترول شغالين في الادويه _ ودا علي حسب توجهنا اللاحضارى يُسمى الخصخصه في اللاتخصص وفتح باب الذرائع لإنعاش الوشائح – وهو نوع من ادب النهب الجديد وأن هذه النظريه في النهب المُصلح للمال العام هى “نظريه إنقاذيه” لن يفهمها الشعب الفضل إلا بعد عشرين عاماً قادماً أو الي أن يتم تسليم السلطه الي عيسي..

  24. مُخير كتب:

    البروف والحبان في كل مكان
    صباح الخير والسلام
    أبو محمد – دبي: فال الله ولا فالك نحن تاني عشرين شهر ما عندنا ليها صبر، والضرع ده كان ما جف، جف ونشف والشعب الفضل وصل الحد وقاب قوسين أو أدنى من الإنفجار الكبير، خلي الجماعة يقرضوا الصامولة وتقول قلنا.

    محنك: نجالا بعرّفها، وبالنسبة للسبيلنغ العربي المُعدل راجع أخونا خالد مدني، وبآكل قدالة أم شعيقات، وأبشالايا مك الشجر، وجلنبق وليد ألمي، وباقي الدعافيس الأخريات بعرفّهن إلا ما باكلّهن …

    ود الزبير ثرو د. عزت: يا دوبك شفت الـ12 حلقة بتاعت سيزون فور للبريسون بريك لكن ما عوارة ومُبالغة عدييييل كدة، وكالعادة شحتفونا وشنقونا في النهاية،

  25. نيام كتب:

    ابومحمد -دبي:
    انت “فتح باب الذرائع لإنعاش الوشائح” دا الجزء الثاني من “فتح باب الذرائع لشفط الودائع”..
    مخير:
    والله لكن نجالا بتعرفها!!

  26. زووووووول كتب:

    مخير سلاااام
    والله ربنا يا ربنا دى قلبتا فيها الهوبا عديييل كدا
    بعدين شنو العملتها لينا عبرى ((محنك: نجالا بعرّفها، وبالنسبة للسبيلنغ العربي المُعدل راجع أخونا خالد مدني، وبآكل قدالة أم شعيقات، وأبشالايا مك الشجر، وجلنبق وليد ألمي، وباقي الدعافيس الأخريات بعرفّهن إلا ما باكلّهن …
    ))
    والله اخوك الكول ما بعرفو خلى الدعافيس القلتها دى

  27. مُخير كتب:

    حباب الزوووووول: دي طرفة لأحد أهلنا الغرّابة جاء دار ريح أي جهة الشمال الأوسط (شمالي شرق كردفان المتاخم للنيل) وسُئل ماذا يأكلون في الغرب فتحدث بأنه يأكل قدالة أم شعيقات ودي ” النجوغايا ” ما أظنك جمعت ؟ طيب الحربوية أو الحرباء، أم أب شالايا مك الشجر فهو ضب كبير الحجم أصغر من الورل وأكبر من الضب العادي ولونه رمادي غامق على مسحة من شال باللون البيجي على رأسه وأيضاً في ذيله الطويل، ويؤكل في جبال النوبة ووسط كردفان، أما الجلبنق وليد ألمي فهو القعونجاي أو الضفدع العادي…وقع ليك كلامي آآآآآآآآ زووووووووووووول، هييييع عيال جعل أقعدوا وقوموا على كيفكم

    شاعرنا نيام ثرو : صدر الجزء الثالث من السفر الرائع فتح باب الذرائع وعنوانه “الدليل الساطع لسفسفة المصانع”، وتلقينا رسالة من مراسلنا في الخرتوم تفيد بإقتراب صدور الجزء الرابع والأخير من السلسلة بعنوان “تعزيز المانع الرادع لإستدامة المراعي والمراتع” ويخيل لي تم الإستعانة في صياغته بخبرات حاجة التومة الوداعية ونُخبة من الفُكياء (إن صحت كجمع لفكي).

  28. مُخير كتب:

    بعد ثرو وددت كتابة “أبو محمد- دُبي” سامحنا يا إسترايكر الشفقة تطير

  29. نيام كتب:

    مخير:
    يا صديقي .. كنت اعتقد انك مرجع في القعو و الدعافيس والنجوع و النجوغايات فاذا بي افاجاء بانك مرجع في “تسهيل البلع للسمع و الماسمع”..لو سمحت سؤال في الضببة ماهو الضب المهندس؟

  30. مُخير كتب:

    شاعرنا المرهف نيام:
    دعك عن الُضببة أو الضبان كما يجمعها أخوتنا أهل نجد والحجاز ودعني أذكرك بذات الطريقة التي سبق وأن أجبت بنفسك على أسئلة طرحتها بنفسك يوماً
    أين يذهب المساء و الأفكار أين؟
    و الظل و الكلام أين أين؟
    والصمت و الظلام أين أين؟
    أين يذهب الشتاء ؟
    وزهرتي التي الفتها و من أحب؟
    أين يذهب التعب؟
    في غير ما هتاف
    و يختبئ الضجيج دون أن نخاف
    وينطلي النعاس في المدينة
    يسربل النفوس كالرهينة
    كأنه المنية
    لا تسأل النعاس كيف جاء
    لا تسأل الشتاء
    لا تستهن بالقطرة
    القطرة ثم يبدأ المطر
    لا تستخف بالفكرة
    الفكرة ثم يبدأ السفر
    لا تزدري المجري فهي فكرة النهر

  31. محنك كتب:

    يا شباب المهندسين ما تابت

    شى ديكة
    كمان فى ضببة لكن ضب كردفان دا هو شقيق ضب العروبة فى صحرائهم حتى الربع الخالى ولها موسم صيد مثل الغزلان عندنا فى السودان

    لو عندنا عالم بيطرة او ناقش بيطرة .زز يدينا شوية

  32. نيام
    سؤال في الضببة ماهو الضب المهندس
    تلقاه من مدنى ولى ورا , ضب جميل وعندو كبرياء وأنفه تشوفوا طالع فى الشجره ورافع راسو لى فوق ومعاها لفته لاحد الاتجاهات يمين تقول دا القذافى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s