بين اليقظة والأحلام ….

Posted: الثلاثاء,27 يناير, 2009 by قرن شطة in ادبية

ذات ليلة تضافرت فيها كل مقومات النكد والزهج  وقعت عيني على الكتاب المرجع للبروفسير ليبتون بالخدمات والمسمى – الشرح الهام فى مواضيع الوهم والأوهام – طبعة منقحة ومزادة كمان – انفرجت اساريرى وتأهبت للغوص فى حكم البروف العميقة ومراميه البعيدة والتي تبعدني ولو لحظياً من دواهي هذا الزمان المنحرف الذي يعج بالتوافه التي تمور والإحن ساكنة العقول والصدور، والبروف كما تعرفون رجل امتلأ بل تشّبع بالمعرفة والحكمة ومع ذلك يحسبه الجاهل (مواطن غبيان ساكت)

أول ما وقعت عليه عيني فى زاوية قصية من الصفحة الأولى حكمة تقول أو لعلها فلسفة أو قد تكون (فلفسة) الله أعلم تقول – أن أكبر عدو للمعرفة ليس الجهل وإنما توهم المعرفة – قلت كفاني هذه الجرعة الليلة، أقفلت الكتاب وتمددت مسترخياً ثم كان أن سرحت أناظر السماء ذات الأنجم… وقد رأيت فيما يرى النائم أحد أقاربي له اسم سخيف ورسم أسخف.. بخيل هزيل و (لايوق) وكنت منذ صغرى كلما أراه ينتابني امتعاض كوني ومغص شمولي ثم (أتلبش) شراً ذلك أن الرجل يحمل عن نفسه فكرة مضخمة، فهو يظن أنه ظريف جداً (ودون خوان لا يشق له غبار) ومنكتاتى قرد  وذلك يرجع الى أن بعض الناس ولأسباب خفية (يستسهلون) التنكيت ورواية الطرف ظناً منهم أنه أمر بسيط وفى متناول اليد وأن اى فرد يمكنه النبوغ فيه وإجادته، وهم لا يعلمون أن هذا الأمر عصى ويقوم على فهم عميق لسيكولوجية المواقف واستشفاف التناقض الذي بينها وهو علم عويص لا ينبغ فيه كل الناس…القصة مش تحكى نكتة والسلام على المهدي الإمام ، الأمر أعقد من ذلك ويحتاج لمجموعة معارف أضف إلى ذلك أشياء غير قابلة للإكتساب مثل الموهبة الطبيعية ثم القبول لدى الآخرين (والقبول شي رباني ولا ما كده!!)….. نعود الى قريبي (سايق العظمة) – يبدأ فى حكاية نكتة (بعد المداهمة السريعة) وما إن يبدأ حتى يستغرق فى ضحك هستيري مسيل للدموع و تهتز كتفاه وترتج أحشاءه وتدمع عيناه ويقبض على يدك بين الحين والآخر شاداً لها ويردد فى حالته التشنجية هذه عبارات لا تفهم جيداً مثل تخيل قال ليهو الجزمة دى دايرة… ويزداد انغماساً فى حالته المجهولة ويمسك بطنه (ويكابس) فى يدك… تصور هي الجزمة ذاتها وها ها ها ها يا أخى المكوجى ذاتو ما فهم حاجة..ها ها ها ها والمكوة طبعا سخنه..ها ها ها  وأنت واقف منتظر تتأمل فى طلعتو  وبودك تفهم حاجة وتسعى جاهداً لان تلتقط شيئاً وتجمع الخيوط بسرعة الضوء عسى ولعل فلا تزداد الا حيرة وذهول!.. ولو نظرت الى نفسك فى مراية فى اللحظة ديك لما عرفتها!!

بعد لأي وجهد يتوقف الرجل – القرد عن الضحك والمراوغة ويكفكف دمعاتو (ويجر نفسو) ويحكى ليك النكتة بصورة شبه طبيعية فتجدها عادية جداً حتى أنها لا تنفع أن تكون نكتة أصلاً فتنتابك حالة غيظ شديدة ويداهمك إحساس بأن هذا الرجل الكارثة قد غرر بك وأضاع وقتك سدى.

– يا أخي اتقى الله وخلى عنك دم هسع إنتا..

– لا إنتا ما فهمت النكتة الظاهر عليك ها ها ها ها. بس قول ونحنا مستعدين للشرح ها ها ها

– لا ما فهمتها كيف؟ إنتا قايلنى مغفل ولا شنو يعنى؟  

– لا لا ما قصة مغفل  لكين هو الراجل أصلو لمن لقى الجزمة فى يدو – وهنا يبدأ فى الدخول الى عالمه السري والحصرى ويقهقه بصورة أكثر جنونية ..

– يا أخي أنا ما لى ومال الزول بتاعك الموهوم ده وجزمتو؟ وهى دى ذاتها نكتة شنو دى يا أخى!! – وتبدأ فى التحرك (لزوم المخارجة).

– لا لا ما تمشى أنا ح أفهمك النكتة بالكمال والتمام ..لا حول ولا قوة الا بالله صبرا يبل الابري ما  فى!

وقريبي هذا يحترم كلمته ويفهمك النكتة خطوة خطوة (تاتى..تاتى عديل كده) ..اصلو فى واحد مسطول ماشى حفلة لقى بنطلونو مكرفس قال يوديهو المكوجى يطرحو ليهو– خلى بالك كويس – قام شال الجزمة – إنت معاى – شال الجزمة للمكوجى بدل البنطلون – عرفت اللعبة كيف؟ ها ها ..

اللهم إنا لا نسألك رد القضاء ولكنا نسألك اللطف فيه.. وفى اللحظة التي إمتدت يدى الى وجه قريبى فى (شكل) بوكس يسارى ونهائي إستيقظت لاجد كتاب البروف المذكور آنفاً (الشرح الهام فى مواضيع الوهم والأوهام) قد وقع على الأرض .. التقطه وأنا أردد اللهم أجعله خير هو ذاتو ده حلم شنو الملفت ده ياربى؟ جاءني صوت مبحوح  من مكان مجهول يقول :

– يا أخى ده ذاتو ما حلم دى رؤية وأظنك ما فهمتها كوبس لكين أنا ح أشرحها ليك بالكمال والتمام – شوفت كيف – وكمان بالتفصيل … آمنت بالله رب العرش العظيم …تمنيت أن أموت واكون ترابا.    

Advertisements
تعليقات
  1. aflaiga كتب:

    البشاوى : انا مش قلت ليك : سجمى هو ما كان دكتور يعنى ؟؟؟ اها شفت يعنى البوست بتاع قبل الدكتوراه وبعد الدكتوراه بيورو انو الراجل ده دكتور .. فهمت كلامى ؟؟ والله شكلك ما فهمت طيب صبر يبلو بيهو الابرى مافى اصبر اشرح ليك :
    يعنى واحد ما دكتور كتب بوست بتاع دكاتره ولمن اتدكتر كت بوست بتاع دكاتره برضو !! والمكوجى قايل البنطلون جزمه اتخيل ؟؟
    قرن شطه : مبروك البتاعه ولو انها زى الوكيل عريف شرف ( بدون مهيه ) يعنى من نفس العقليه المتخمه ابداعا .. لا تتوقف عن مدنا بما يمتعنا . بس الصوت المبحوح الجا من ورا ده هو ذاتو صوت صحبك القبيل بيقلبض الايادى ولا صوت لبتون ؟؟؟

  2. aflaiga كتب:

    قرن : يومتا سالناك انت لبتون بالخدمات دى مالا زى العاقبه فى المسرات ؟؟ بعدين لبتون ده منو ؟؟
    شباب : يغنى المغنى وكل يرقص على ليلاه ..
    كدى بالله خلونا ضمن هذا البوست نناقش مبدا سوء التفاهم او تحميل الامور غير ما تحتمل ونظرية انت ماشى السوق ؟؟ علنا نجد خارطة طريق تحكم فهمنا لبعضنا ذلك الفهم الذى ينبغى ان يكون منطلقا من مبدا ( كلك حلو ) …

  3. نيام كتب:

    قرن شطة:
    تعرف يا قريبي النكتة حقت الجزمة و المكوجي دي يتخيل لي حكيتها ليك انا .. لكن طبعا كان فيها الجزمجي الودينا ليه الهدوم سوا..وقال لينا جزمتكم وصلت و الهدوم حنوصلها ..
    كسرة زي لفة:
    عليك الله شفت ودالخلا دا راقي كيف؟الزول يقول ماود خلا!!
    أنا ما عارف كان جعلي كان سوا شنو ؟ قبييييييلة ياخي!!

  4. nono كتب:

    الاخوة اصحاب المدونة/ لكم التحية

    في حياتنا اشخاص كثيرون ربما تكون صداقات او زمالة او محبة او عدوة او

    عدم ارتياح ___ولكن عندما نتعلق بهم تصبح علاقتنا اقوي من المجاملة او تضيع وقت ….

    ربما بمرور الزمن تصبح علاقة مبنية علي الثقة والراحة والمحبة التفاهم__ربما

    يكونون اناس مثاليون يفهموننا ويعرفوننا يعرفون كيف يتاقلمون معنا في

    جميع الحالات لانة الانسان بطبعة مزاجي سواء اظهر مزاجيتة او اخفاها ؟؟؟؟؟

    يجب ان نفهم ان الانسان ليس ملاك، فهو مركب ومعقد وخليط من عدة

    اشياء_______هى انفعال متكرر نحو شخص أو شئ أو قيمة… ومن كثرة

    ويصير عاطفة. فمثلاً يتعرف الإنسان بشخص ما لأول مرة… فيشعر نحوه

    تكراره يتثبت بالقبول والارتياح… ويتكرر هذا الانفعال عدة مرات كلما ألتقى مع

    هذا الشخص… الانفعال عاطفة حب لهذا الشخص. ويمكن أن يحدث العكس…

    فيصير هذا الإنسان بانقباض حينما يشعر أو عدم ارتياح نحو شخص آخر…

    ويتكرر هذا الانفعال فيتحول إلى عاطفة سلبية هى الكراهية ؟؟؟

    ___العاطفة جزء من الجهاز النفسى للإنسان، وهى لا تصلح – وحدها –

    لقيادة الإنسان، فكيف للانسان ان يتحكم في عواطفه ماذا نفعل لو اختفي

    ذلك الشخص الصديق /او الاخ / الزوج /او الزوجة

    اختفي من حياتنا للابد

    سواء اكان بسببببب الموت او سوووووووووووووء التفاهم ام عدم

    الارتياححححححححححححح؟؟؟؟؟؟؟؟؟؟

  5. سهيل كتب:

    حبيبنا قرن .. باركنا ليك الدكتوراه غيابيآ و قلنا نبارك حضوريآ إلي حين اللقاء…

    كنت عايز أسألك موضوع الدكتوراه كان عن شنو .. لكن خفت يقوم واحد ينط يقول لي (قصدك شنو).. ما تشيلو هم كلو بقى تمام و المنقه راقت .. و بعد كدا البيعكرها.. بنوديهو غزه…

    نرجع للموضوع الأساسي.. تعرف يا د.قرن .. زي قريبك دا كتار.. وفي ناس لديها المقدره على تفاديهم و في ناس بتتوكح و ما بتعرف كيف تتخارج منهم..
    لنا عوده

  6. زووووووول كتب:

    قرن يا قرن شعورك كيف قريبك القلتو دا شغلوا نضيف
    بالمناسبه يا قرن انا متابع (جيد ) لما تكتب لكننى قليلا ما اتداخل .
    بعدين مبروك الدكتوراه وشكلها فى الاداب وعقبال نوبل للاداب وبصراحه ما كتيره عليك .
    اوافقك ان النكته فن لايجيده الا القليل من الناس .
    بعضهم يتور نفسك عندما يلم فيكا ويحكى ليكا تفاصيل التفاصيل .
    بالمناسبه جمعنى العمل مع احد المديرين وفى اجتماع رسمى كان موضوعه مناقشة حاجه كدا ربع سنويه . اتخيل يا شطه الراجل دا قاعد يشرح ليا فى قصة ربع سنويه دى اكتر من نصف ساعه !
    طبعا يا زووووووول السنه فيها اطناشر شهر
    ــ كويس
    بعدين بقسموها على اربعه ارباع
    ــ عديله
    والربع فيهو تلاته شهور
    ــ تمام
    كسره : ما هى وصية شطه للتعامل مع مثل هؤلاء المسعولين

  7. البشاوى كتب:

    قرن شطة الحراق
    والله بعد البروف قال 100% احترنا تانى نقول ايه
    قريبك دة ماقريب كل الامازونيين وبالاخس الحكومة المتعبة دى هى فى النهاية عاوزة قروش الناس كلهم بدل ماتشيلا وتتولى امور معايش الناس
    بقت تدفع الخلق قطاعى وبى مسميات قريبة لى بعض ويكملو قروش الناس

    حسة كلامى دة مالو بقى زى كلام قريب قرن شطة ؟احسن امشى

  8. مُخير كتب:

    الأخ الدكتور قرن شطة
    السلام عليكم
    الموج علا والإبداع طالع، حمداً لله على السلامة وألف مبروك الدكتوراه وعقبال ما بعد الدكتوارة ؟؟ (Post Doctorate) بوصفي أحد المعجبين بكتاباتك أغدو شاكراً لكم تفضلكم بالرد على إستفسار الأخ قلب المُحب في الخفقان “سهيل” بشأن موضوع البحث/الرسالة ؟؟ في أي مجال ؟؟ أدبي … علمي ؟؟ وطبعاً لكم مُطلق الحرية في عدم الرد والإحتفاظ بمساحة خاصة لنفسكم إن رأيتم ذلك أحوط حسبما ورد في آخر مداخلة في الُرتب والمراتب، غير أننا نلتمس منكم بحًكم أنكم أصبحتم شخصية عامة وكاتب راتب ذو مرتبة كبيرة في سوداننا “الموقع ” ولكم مُعجبين كُثر، فحبيبنا جبرا لا يجد منه قراء الرأي العام سوى عموده بينما هنا نستمتع بمداخلاته القيمة بل وحظي كثيرون بالتواصل معه على الصعيد الإجتماعي والشخصي، لكن طبعاً أخونا جبرا ده راجل غير، يعني براه، ودي زي جدة غير يا حاج السلاوي، عموماً نسأل الله لك التوفيق في حياتك المهنية يا دكتور وننتظر منك المزيد من التألق على ساحتنا القمردينية والسلام

  9. ماجد كتب:

    أضافه مميزة و أرث يترك بصمته علينا ..
    ماجد
    http://majedlife.wordpress.com

  10. حاج أحمد السلاوى كتب:

    أخونا قرن شطة ..سلام
    لكم كل التحايا العطرات مقرونات بأحر التهانى للدرجة العلمية التى تشرفت هى بحصولكم عليها فانت أهل لها ..ونسال الله العلى القدير أن يزيدكم رفعة وعلما ويقينا..إنه سميع مجيب .. مبارك .. مبارك ..مبارك .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s