الجمعه عشاء عمل بوش فى شارع النيل

Posted: الأحد,1 فبراير, 2009 by aflaiga in اخرى

الاخوه المدونين الافاضل نسبة لتسارع عجلة الاحداث التى لم نستطع مع مشغولياتنا اللحاق بها ونسبة لحدوث العديد من المناسبات التى لم نتمكن من حضورها جميعا او معظمنا ونسبة لوجود اخوه افاضل بين ظهرانينا هذه الايام من المدونين بالخارج وكذلك بعض الذين التحقوا مؤخرا بالمدونه من الداخل وعلى شرف الاخ قرن شطه والاخ طارق اب احمد وهمتك وود الفتيحاب الذى لم نقابله حتى الان يتوجه الاخ عبدوش انابة عن اسرة الموقع بالدعوه للجميع لتناول العشاء على ضفاف النيل الخالد وذلك مساء الجمعه 6 فبراير .تكتمل الافراح بحضوركم . انشاء الله دايما ملمومين فى الخير يا ناس يا خير .

 

Advertisements
تعليقات
  1. nono كتب:

    ياجمال النيل الخرطوم باليل

    الاخ عبدوش/طبعا المسائل دة بتكون مرتبة

    لكين اختراح انوا الدعوات دة تكون خلال الدوام ( الخميس) او اي يوم تاني

    لانةالجمعةدةصعب الخروج *فيهااا نحن معشر النساء

    وادعو اللّه ان يجمعُنا في الفردوس الأعلى

    وجزاكم الله خيراً……………

  2. حاج أحمد السلاوى كتب:

    الدينمو افليقا …وكل الحبان داخل وخارج السودان ..
    يا ليل ..ويا نيل ..ويا الخرتوم بالليل..
    وحقو تراعو إقتراح الأخت نونو .. (لانةالجمعة ( دة ) صعب الخروج *فيهااا نحن معشر النساء ) وتحققوا ليهم مطلبهم ..وما أظنو صعب ..
    وتحياتنا لكل مدوناتية الداخل بدون فرز …وإن شاء الله داااااايمن لامييييين وتااااااامين وحول بوش عبدوووووووووش متحلقين … ويااااااااا بخخخخخخخخخختكم ..ونصيبنا من البوش المنتظر رسلوه لينا صور يا ابو عصمت . أما نحنا وأخوانى الكواشف حنقعد وننتظركم لحد ما تخلصوا البوش ..وبعد داك بنتصل بيكم ..بس ما حددتو لينا الساعة كام…معليش ما اصلها حتكون مواعيد سودانية …مية المية ..
    عبدوووووش … حمداً لله على السلامة ..وبركة الجمعت مع أخوانك بعد الغيبة الطويلة …

  3. ودالزبير كتب:

    أجيب معايا شنو يا أفليقا

  4. الغبشة كتب:

    معقول ياود الزبير بدل تقول ليهم تعالوا بهنا تقول اجيب شنو؟جيب( (جيب شروكى))

  5. aflaiga كتب:

    الغبشه : باااااالغتى عديييييييييييييييل كده انتى فى الدلاله ولا ريحة الابرى دى شنو ؟؟ ود الزبير من مشى بى هناك بقى يجى بس وما بيجوهو ..
    ود الزبير : تجيب شنو ؟؟ انت تعال بس وجيب المنيو بتاعكم ممكن ناخدك رهينه ونطلب الفديه من المنيو !!!

  6. مشاكل كتب:

    سلامز

    ازيكم
    كيفنكم
    انا لي ايام
    ما شفتكم

    بوش عبودوش
    و ما أدراك ما بوش عبدوش

    أنا اسمي مكتوب ؟؟؟؟؟

  7. bakriMusa كتب:

    (بوش عبدوش الحبيب)

    الاهبي ببوشك شبعينا ——-وجودي بالطعام لجائعنا
    نريد لدفس البطن بوشا——نكون باكله كالمجاهدينا
    ولن نرشي سواه و لو بلحم—فلسنا في اللحوم بطامعينا
    اذاما لاح طيف اللحم يوما—نبحلق فوقه لااكلينا
    (ننونو)كالكدايس عند لحم—–وننبح كاكلاب مشاكلينا
    فيا لحما يقد الجيب قدا——كفاية مغصتك السويتا فينا
    فان بطوننا يا لحم ابت——علي الافوال بعدك ان تلينا
    تمطقت الخشوم لاكل بوش—تدنكل بالشطوط و الطحينا
    وزغردة البطون لاكل فول—تصوت تارة و تحوط حينا
    اذا ما البوش جهز فوق صحن—تخر له الاصابع ساجدينا
    وتركع في نواحية الايادي —–يصوم عن الكلام (البوز) فينا
    سلي عنا المطاعم في البراري —سلي الفوال يخبرك اليقينا
    بانا نورد المعدات جوعي ——-و نصدرهن تخما قد كفينا
    ونشرب اذا شربنا الشلي طاعما—ويشرب غيرنا كدرا و طينا
    وان سوف تذكرنا السفاسف ——-مدنكلة لنا و مسفسفينا
    وان غدا وان اليوم اكل————وبعد غدا نكون الاكلينا
    فما شر السفاسف ام ليلي ———اذا كانت مدنكلة تجينا
    يزين صحنها بصل و توم ——-وماء الجبن لاح لناظرينا
    مدنكلة كان الزيت فيها———-اذا ما الماء خالطها سخينا
    فاني قد خبرت الاكل دهرا——وخضت غمارة طورا و حينا
    بفتيان يرون الاكل مجدا ——-و شيب في الطعام مجربينا
    نسفسف ما ترضي الناس عنا —ونهجم كالاسود اذا دعينا
    فبوش قد اكلت بسوق بري —–وفول قد اكلت بطور سينا
    هبشت الجيب بعدها –بكيت—-يرن امام صاحبة رنينا
    فما حظ المفلس غير شوم —-يعيش العمر مكتئبا حزينا
    اذا ما كان بالامكان يوما—–اعبي الجيب اجعله متينا
    لكنت ملات هذا البطن لحما—وهامبيرقر و تفاحا و تينا
    لصرت مفتل العضلات ماكن—-و منتفخ الجضوم فتي سميتا
    و كنت و ليس بالامكان هذا —–وكنت حسبت هذا الفول طينا
    اراني قد فطمت بماء فول —– ولسنا لبيرقر بمناسبينا
    فهل عربية الجازولين تمشي ؟ اذا كبولا يوما موية

    وبالهناء والشفاء

  8. ابكرون كتب:

    افليقا/عبدوش via بكري موسي :
    الا هبوا بصحن بوشكم و ما تحندكونا
    وحرام عليكم كده تبهدلونا وتجننونا
    يعني في داعي من اسه تمطقونا
    ——————————————
    جيب شروكي (شدييييييده) دي…….
    النونو قالت 😦 لكين اختراح انوا الدعوات دة تكون خلال الدوام ( الخميس) او اي يوم تاني )
    نقطة نظام …انا موافق….حد يثني….برضو انا اثني……
    خلاص الموضوع اجيز بالاجماع الابكروني

  9. bakriMusa كتب:

    ابكرون .. صبحك الله بالخير

    نقطة نظام .. لانو النصاب القانوني لنون النسوة غير مكتمل في ا لمدونه
    وبعدين نون النسوة ما اظن يزاحمن ا لرجال في جنس الكلام ده :ـ

    اذا ما البوش جهز فوق صحن—تخر له الاصابع ساجدينا
    وتركع في نواحية الايادي —–يصوم عن الكلام (البوز) فينا

    صورة مع التحيه:
    الغبشه
    نونو
    والاغلبيه الغائبه

    كسرة:ـ

    بالجد داير لي وصفه (بوش) كاربه ..العيال لما كانوا في اجازة في السودان استمتعوا باكل البوش وكان (حديث المدينه) بعد عودتهم ..ام العيال حاولت تعمل ليهم (بوش) لكن ما فيش فايدة ..الحقنا يا عبدووووش .

  10. حنين كتب:

    أفليقا والحبان المدوناتية .
    كيف أصبحتو .
    بعد ماقريت الموضوع كنت بحاول أفتش لى فى عزر أقولو لى أفليقا بعدم إستطاعتى للمجئ ولكن بعد القصيدة العصماء لأخونا بكرى قررت الحضور لكن ياأفليقا لو إستقرت على شارع النيل فى البرد دة أنا حاجز اللبسة بتاعة البرد وخصوصا عمنا الشاب السلاوى فى السعودية …

  11. aflaiga كتب:

    بكرى موسى : نون النسوه ديل غير سماسم الاصيله مافيهن زول متابع معانا حاجاتنا بالدرب .. وزمان كان البنوت الله يطراهن بالخير ( معجبه – فنجان – ساره ) مشاركات معانا – نقدر ظروفهن التى تمنع العوده .. همسة شوق بتتمنى دايما تكون حاضره وبنفس الدرجه بتاعة التمنى بتعتذر ! الغبشه نشيطه جدا فى التفاعل الالكترونى ولسه ما شفنا منها ميدانيا شيئ ! سمسمه متفرغه عشان انا اتفرغ !! اها فضل منوووو ؟؟ والله ما فضل زول يا بكرى ياخوى الحوش ده كان عمران بى نوناتو الفى وجناتو علا ما عارف مالو سحروهو ولا الحصل شنو ؟؟ كنت فى زمن الاحلام الورديه قد حلمت يوما :
    بروضة تدّرس فيها فنجان وسمسمه وتخرج جيل متربى واعى حر ديمقراطى ..
    ومعهد حاسوب يدّرس فيه ستريكر والسعيد وساتنتود وافليقا .
    ومعهد تربيه وطنيه يدّرس فيه الكبار الصغار كيف يكونو كبار ؟
    ومعهد تدبير منزلى تدرس فيه سماسم الاصيله كيف انو الجنه تحت اقدام الامهات وجنب كرعين الاباء !
    علا النوم جافانى قسمتو لى جيرانى الله يجازى الناس الحمونى النوم …
    اما بالنسبه لسؤالك عن البوش وحتى يعود عبدوش اليك هذه الخلطه السحريه :
    * من عيوب تزبيط البوش الكتيره :
    عدم وصول الترويه لاسفل الصحن .
    نقصان الزيت عن التمام لاخر لقمه .
    عدم توازن الملح فى الخلطه .
    سوء تقدير الكميه مقارنة مع الموجودين .
    سوء توزيع الفول مقارنة بمويته .
    * والحل :
    قطع العيش فى الصحن .
    جهز المويه بره بكل مستلزماتا تمليح تزييت اولى تسليط .
    قسم العيش لوثبات يتم رشها تباعا .
    قسم كيس الزيت على وثبات خلال الوجبه .
    لا يحبذ اكثار الفول .
    اعرف مقاسات وعدد الموجودين لتفادى المفاجاه والشحتفه .
    من المحسنات التذوقيه ( الدكوه – المش – المخلل – الطحينه – سلطة الروب – الطعميه ) .
    زيت السمسم يتم صبه بدرجات .
    الشطه يستحسن ان تكون خارج البوش او قسم الفته فى صحنين للاكلين بها وغير الاكلين .
    دى مهارات بسيطه لحدى ما سيدا يجى يديك الخلاصه ..

  12. aflaiga كتب:

    حنين : اها بطانيه عديل كده يا لاحاااظ . بس انت تعال . بعدين ريفى دنقلا اهندا قريب وانت سايق الفيات ..
    شباب : نقدر ونثمن الدعوه الكريمه لابو الكرم ود الخلا بنقل الفعاليات لبيتنا الفى بحرى ! وبما انكم اصحاب الدعوه الاساسيين الامر متروك لكم .
    وياقبيله :
    انت ذاتك بى صفاتك كل حته هى بيتك
    وكل بيتا بى حلاتك انت سيدو وهو بيتك
    انت قايل انو فاتك اى شرفا لو قعدنا بره بيتك
    بل بزيد تشريفنا بيك لمن تحضر بره بيتك
    انت ما سيد القبيله وكل بيتا هو بيتك .

  13. bakriMusa كتب:

    افليقا يا رااائع

    ما شاء الله عليك .. الله يديك الصحة والعافية .. يا اخي ود الخلا ده جننتو جن .. الله يديم المحبة بين الناس..

    يوم الجمعة وبالتزامن مع حلستكم النيليه الرائعه سوف نقوم بتجربة (الخلطة الافليقية ) .. جيب اضانك جاي (قول لام حمودي ام احمد بتقول ليك رسلي ليها شوية دكوة وشوية شطة وانشاء الله دائما عامرين ) ..

  14. حاج أحمد السلاوى كتب:

    الدينمو أفليقا …
    والله البروف ما خاتى أبدا وكتين جاب إسمك بالنص فى مداخلته بتاعة أمس ..غايتو ما عايز أقضم ضهرك بالمديح … لكين بالجد إنت رائع وكتاباتك رائعة ..وسبقنى أخوى بكرى ( أبو أحمد …. صاح ولاَ أنا غلطان ؟ ) الى قبل شوية كنت بتكلم معاهو هاتفياً …بالكتابة عنك وعن شخصكم العظيم … ربنا يديك العافية ويحفظك لحد ما حمودى يبقى قدرك وياخد الطريقة …هذا الشبل من ذاك الأسد.. ورسل الدكوة والشطة لبكرى موسى عن طريق الإيميل …وتحياتى لك ولأسرتك الكريمة..ولكل الحبان .
    أخونا ضى القبيلة ود الخلا .. ما بتقصر أبداً …. يقصر الملح .
    أخونا ..وولدنا حنين الحنين ..ماشاء الله عليك وما نسحرك ..وذاكرتك كويسة ( كيف كنت فى المدرسة ؟؟ )…تقوم من محلك دة وتمشى لعواطفك عشان تبخرك ببخور تيمان وتسوى ليك يا عين يا عنية .. تكفيك شر الأعادى ..البيجاى والبيغادى….متذكر بدلة الدينمو أفليقا ليلة أكلنا بوش عبدوش فى أكتوبر من العام الماضى..أفليقا قال جهز ليك بطانية عديييييل كدة

  15. nono كتب:

    للرجال فقط؟؟؟؟؟؟؟؟؟؟؟؟؟؟؟؟؟؟؟

    نون النسوة هو اسم مكون من حرف هجائي واحد هو النون المفتوحة المخففة

    دالة على جماعة الإناث (غائبات أو مخاطبات)

    *نون النسوه ديل غير سماسم الاصيله مافيهن زول متابع معانا حاجاتنا*

    *وزمان كان البنوت الله يطراهن بالخير ( معجبه – فنجان – ساره ) مشاركات

    معانا (همسة شوق)( الغبشه)*

    تتغيّر وتيرة الحياة، ويتعدَّل نمط النشاط بالنسبة لكثير من الناس،

    الحياة تتغير والناس أيضا تتغير , الحياة تتقلب ومخطىء اللي يحسبها تمشي

    على وتيرة واحدة حتى في ابسط مثال امامنا وحوالينا شوف كم من تغيرات

    موجودة في الحياة , اليوم فيه ليل ونهار يعني تغير مستمر , الفصول تتغير

    وتتبدل , أوجه القمر تتبدل وتتحور , حتى الطقس حينا بارد وحينا حار ,

    الكواكب تغير مواقعها , الكون باكمله في حركة وتغير مستمر فكيف نفترض ان

    الحياة التي نعيشها ستظل كما هي تسير بايقاع ثابت ووتيرة رتيبة

    الناس ايضا تتغير , تحكمها الحياة وتغيراتها وتقلباتها لكن هذا لايشمل

    القناعات والمبادىء ……

    لقد تم التعرف بكم من خلال موقع الفاتح جبرا متعه الله بالصحة العافية……..

    كم مرة كان الواحد بقدم اقتراح بالنسبة للرحلات …….لانها طوالي بتكون يوم

    الجمعة……….. اقتراحي لهذة الدعوة ………ماااااااا الزامي … مجرد وجهة

    نظر لا اكثر لا اقل؟؟؟؟؟؟؟؟؟؟؟؟

    . علي رغم ان احتكاكي بكم إحتكاك معنوي فقط من خلال الكتابة والافكار

    كان الواحد بتمني يلتفي بهذة الكوكبة ………..

    لكين مااااااااااااامشكل حانكون معاكم في الاسوااااااار االداخلية معلقبن

    ذي( (الرشيد بدوي عبيد )

    كسرة/وادعو اللّه ان يجمعُنا بكم في الفردوس الأعلى

  16. طارق أب أحمد كتب:

    افليقا وود الخلا

    يا جماعه الرميه دى سمع بس , نسمع

    انت ذاتك بى صفاتك كل حته هى بيتك
    وكل بيتا بى حلاتك انت سيدو وهو بيتك
    انت قايل انو فاتك اى شرفا لو قعدنا بره بيتك
    بل بزيد تشريفنا بيك لمن تحضر بره بيتك
    انت ما سيد القبيله وكل بيتا هو بيتك .

    على القسم مبااااالغه

    يا حليلو مصطفى سيد أحمد كان نجر ليها لحن ودخلك اليو تيوب

    ود الخلا يا قبيله تبروز وتتعلق فى الديوان وينفح الشاعر مائة من البعير الحمريه و الف الف درهم

  17. aflaiga كتب:

    اب احمد :
    يطيب ربى خاطرك يا الجابر الخواطر ..
    حالتو الشوفه لسه واصبح ليك خاطر ..
    شيل البعير واعمل اكسجينج للدراهم اخصم دمغة الجريح والشهيد والاسير والنفايات والعتب ورسوم المحليه وافليقا فاعل خير ..

  18. ودالزبير كتب:

    الغبشه
    معقول ياود الزبير بدل تقول ليهم تعالوا بهنا تقول اجيب شنو؟جيب( (جيب شروكى))

    المطعم أكله صدقيني ما راح يكون زي البوش وده ما كلام ساااكت ده كلام مجرب وعلى كلاً يا ستي بنجي وبنجيب الربنا قاسمه……….

    مع كامل التقدير لشيخ القبيله ود الخلا وكرمه إلا أنني أرى أن تكون اللمه في الهواء الطلق وعلى شارع النيل ولو قلبناها لمحل ( كوارع بالإضافه للبوش ) يكون ميه ميه

  19. aflaiga كتب:

    شباب : اتصل عدد من الاخوه المدونين طالبا تقديم العشاء لمساء غد الخميس بدلا عن الجمعه نسبة لارتباطات اجتماعية يوم الجمعه .. وهانذا انقل لكم الطلب للتشاور والراى ..

  20. ودالزبير كتب:

    أفليقا

    والله لو وديتوهو السبت يكون ميه ميه

  21. حاج أحمد السلاوى كتب:

    الدينمو ..أفليقا …

    موافقون ..موافقون ..موافقون ..أنا والكواشف البرة كووووووولهم ..فى زول فيكم عندو إعترض … ؟ تمام يا فندم .

  22. السبت موافقون… أصلو يوم الجمعة دا ما بكون فرقة في البطن خلى المناسبات الاجتماعية…………… ما سمعتوا بفطور الجمعة العجيب

  23. ودالزبير كتب:

    السبت الأخضر ولا ليله السبت ما عارف

  24. nono كتب:

    قالوا كلام القصير ماااااابتسمع

    قعدتوا___________ تقولوا_____ نون النسوة شنوا مابعرف داك

    لمن تتفقوا ادونا خبرا الزمن ____والمكان _________________ ولة برضوا

    مصرين انه( بوششش عزابة)

  25. aflaiga كتب:

    مدونجية الخرطوم :
    جبرا – عزت – مهدى – ود الخلا – بشاوى – قرن شطه – ود الفتيحاب – همتك – اب احمد – خالد مدنى – زول – ود الزبير – سهيل – ستريكر – عبدوش – السعيد – مشاكل – بروسيسر – حنين – د الفاتح – د بين – البنوت – البيقدر يحى من الولايات القريبه .. ومن نسينا ذكرهم هنا لهم العتبى ..
    تقرر ان يكون العشاء اليوم الخميس بشارع النيل التجمع تحت كوبرى النيل الازرق ( كوبرى القطر ) . مع صلاة العشاء …
    نسبة لظروف البعض المسافر للخارج والمرتبط بالتزامات اجتماعيه الجمعه ..

  26. طارق أب أحمد كتب:

    أفليقا
    تمام يا (أفندم)

  27. aflaiga كتب:

    اب احمد : التمام عرفنا الفندمه شنى ؟؟
    جايين مشتاقين للشوفه
    والرهبه عديل عملت خوفا
    والناس بى شوقا الفى جوفا

  28. د.ياسين شمباتى كتب:

    سلامات..

    والله يا افليقا بقيت تعمل خيانات,,بس ما عوايدك..وتحت الكوبرى دا بوش شنو؟؟؟ ما يكون د.عزت جايب نسكافيه؟؟؟؟؟؟؟

    لاقانى اسم ود الفتيحاب فوق,,هو جا السودان وانحنا ما عارفين ولا شنو الحكاية؟؟؟

    انتظرونا على الهواتف النقالة…

  29. حاج أحمد السلاوى كتب:

    الدينمو .. أفليقا ..وكل الحبان داخل وخارج السودان ..سلام
    التجمع المع صلاة العشاء دة ما قدرت افهمو …رغم إنى ما مقصود بالتجمع زااااااتو …غايتو البعرفو إنو يكون يا قبل الصلاة ولاّ بعد الصلاة..ولاّ يمكن عشان تصلوا العشاء تحت الكوبرى…تحت الكوبرى .. يا وهيبة ..
    الحاجة التنانية زى ما قال ليك ولدنا الحاج يسن شمباتى ..ودالفتيحاب دة سافر متين السودان …الزول دة قاعد معانا بيجاى..جايز يكون زول تانى يا شمباتى يحمل نفس الأسم ..ويمكن نفس الملامح والشبه ..
    وما تنسوا كل واحد يجيب معاهو بطانية ..وخاصة ولدنا الحنين جدا حنين ..
    وكل بوش وأنتم عامرين ..وزى ما قلنا لأبو عصمت نصيبنا حيكون صور لصحون البوش والمتحلقين حولها..وبالهنا والشفا إن شاء الله..وما تنسى يا أفليقا .. لقمة ليك ولقمة لى .. إتفقنا ؟؟؟؟
    يا خوانا ولدنا خالد مدنى اخباره منقطعة النظير .. الحاصل شنو !!! يا ربى يكون غاتس فى السمسم الكبار ؟
    أبكرون .. إنت بس الليلة اقعد إتلفت وعاين سااااكت مع خميسك المطرشق دة والناس بيغادى متلمين وتامين وفى البوش غاتسين !!!
    الحاج يسن شمباتى .. الليلة وين .. جدة ولاّ مكة ؟

  30. د.ياسين شمباتى كتب:

    سلامات يا المجتمعين..ورونا النتايج الاتمخض عنها محضر الاجتماع..

    الوالد السلاوى..موعدنا بوشنا بكرة..ود الفتيحاب دا تلفونو ما بجمع معاى,,اظنو سافر بالجد!!!

  31. ودالفتيحاب كتب:

    الاخوة الأكارم
    الرجل المبروك أفليقا
    لك منى كل الشكر والتقدير للدعوة الكريمة وريقنا جرا .
    كان بودى الحضور معكم هذه الليله الكبريه البوشية,خاصة أنو الاخوان الشمباتى وعمنا السلاوى حكولى عن بوشكم العجيب…
    المهم ياسيدى مقبوله الدعوه وإنشاالله طلعت جميلة.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s