النيل الأخضر

Posted: الإثنين,2 فبراير, 2009 by عزت in بيئية

يبدو أن التدهور قد تعدى عندنا الأشياء التقليدية مثل الخدمة المدنية و الكورة و وصل الى أشياء لم نكن نتخيل أن تقتسم معنا كيكة الاخفاقات و مرارة الحاضر و قتامة المستقبل و لكن منو الما أخد نصيبه لكي ينجو نهر النيل الأزرق و الذي سوف نخطر العشاق و الشعراء أن يغيروا عباراتهم ليواكبوا ما آل اليه من تطورات… فقد وصف من قبل شاعر عجيب نهر النيل الذي يمر وسط الخضرة من الجانبين كالسيف الذي يرقد مرتاحا على بساط أخضر…


والماء يفصل بين زهر *** الروض في الشطين فصلا

كبساط وشي جردت *** أيدي القيون عليه نصلا


ياخي دا كتلو كتله… فتخيل عزيزي أن الماء من صفائها و نقاءها باتت كالسيف الفضي اللون اللامع و الذي ارتاح على ذلك البساط الأخضر الجميل و لكن لو بحثنا عن ذلك الشاعر و (سقناهو) للنيل الأزرق اليوم 1 فبراير 09 لاحتار في لون النيل الذي صار كلون البساط الأخضر الزاهي و لن تستطيع أن (تفرزو) من البساط و سوف تحتار هل يوجد في الدنيا سيف أخضر… نعم و بكل أسف تحققت اليوم من نهر النيل الأزرق فوجدت أننا يجب أن نحضر خروفا و نعيد تسميته الى النيل الأخضر و أخوه الى النيل الأغبش فقد كابرانا و تدهوروا زينا…. (الله يجازي الكان السبب)..

copy-of-dsc001092

copy-of-dsc001102

لم أهدأ اليوم بعد أن زرته و التقطت له بعض الصور عاليه ثم هاتفت كل من أعرف للتحقق من هذه الظاهرة التي حولت نيلنا سليل الفراديس ليتوشح بهذا اللون العجيب الذي يشبه البوهية التي أمر بها (اب عاج) أسياد الدكاكين أن يطلوا بها دكاكينهم و يسمونها ناس المغالق (66) (ما عارف الجاب الستات ديل هنا شنو)…. فطمأنني زميلي عالم دراسة المياه (الدكتور كريستال) قائلا أن هذا اللون المائل الى الخضرة ليس هو لون المياه و لكنه لون المجرى كله تعبيرا عن الكرم و الجود الذي يتصف به النيل، أو لم تسمع نسائكم العجائز عندما يفرحون منك و يريدوا أن يكافئونك على ما بذلته نحوهن قائلين (الله يخدّر ضراعك يا ولدي) ليس قصدا منهم أن تتخدر ضراعك و لا تستطيع أن تحس بها و انما هذا تعبيرا مجازيا يشير الى الرجل الكريم الذي يلمس كل شئ فيصير خيرا و يدخل ضراعه في كل بيعة فينال منها شهدا. لم أستمر كثيرا مع (مستر كريستال) و الذي فيما يبدو أن الكريستال قد طلع في رأسه و صار يهذي… فتركته و توجهت الى آخر و الذي أعطاني المفيد…


قائلا أن هذا الاخضرار هو من فعل الطحالب algae و يظهر اللون كذلك عندما تنعكس أشعة الشمس عليه و لا تسبب أي ضررا صحيا على الانسان فالمياه و خلال رحلة معالجتها عبر (الساند فلتر) الذي تعمل عليه محطة تنقية المياه كفيل بأن يزيل تلك الطحالب و تصير آمنة أكثر عندما تطّهر بواسطة الكلور فلا تحمل أي هم فاشرب و دع السودانين يشربوا و لكن كان خايفين شديد كل واحد يسعى ليهو فلتر في البيت و يغير شمعته كل شهر و كما قالوا أهلنا المصريين (داري شمعتك تقيد).


يظهر هذا اللون كل فترة و أخرى و آخر مرة اتشح به النيل قبل أربعة سنوات و مافي  داعي أن نغير اسمه و لكنه تحذيرا أخير فلنكف عن القاء الملوثات في النيل فكفاية غسيل عربات في الموردة و سريان مياه مجاري في اللاماب و ملفوظات السكر في الجنيد و بقايا محروقات توليد الكهرباء و ما نتكل كثيرا على أن نيلنا العظيم لديه القدرة الذاتية لتنظيف نفسه… بقوم بيجي يوم و يفتر من ذلك و نكون قد جنينا عليه…..


ايا نهرا عشنا فيه سنينا ………………. ايا نهر من مائه ارتوينا
ايا نهرا مزارا للمحبينا ………………. ايا نهرا من رزقه اكتفينا
ايا نهرا سحرت العالم اجمعينا ……………… ايا نهرا جليس العاشقينا
كنت ومازلت فخرا للمدينه ……………… ايا نهرا شهد علي امانينا
كيف ننساك ولم تنسينا ………………. ايا نهرا وهبه الله الينا
ايا نهرا يروي اراضينا …………….. ايا نهرا نحن ابنائك وانت ابينا
ايا نهرا في احضانه ارتمينا ……………….. شاب الشباب وانت متينا
ايا نهرا شق القاره كالسفينه …………………. تعطي ولا تأخذ يالك من عظيما

حبيبي

ساحر القلوب ………… احلي الدروب
مغرما بيك ساعة الغروب
كيف اصفه ياربي ………….. ولو كنت نزارا وشوقي
كيف استطيع فعلها وحدي ……….. سامحني يا نهري
لن استطيع رد جميلك بقلمي …….. عجزت عنها حتي بفعلي
ستكن دائما حبي الوردي ……….. وعشقي الابدي
ستكن دائما خالدا في بلدي ……… ستكن دائما مرأتي وبصري
ستكن دائما صديقي وصحبي ……….. ستكن مائك حبر قلمي

(من المحرر أوع من اللون الأخضر)


سامحني يانهري سامحني يانهري لن اعطيك حقك ولو مر عمري


ملحوظة: القصيدة ملطوشة من (الفرعون المصري) و الاستايل ملطوش من قرن شطة

Advertisements
تعليقات
  1. aflaiga كتب:

    عزت المسكون بيئه : يعنى البحر ده ما من حقو كمان انو يتاثر بى الناس الجنبو .. شعبنا طلحب وصدا وبقى يجيب زيت بالعادم من زمان ..
    حقيقة ( البيئه والانسان ) معادله صعبة التقييم ما لم نعود للاصل وهو ضرورة التوازن بينهما لان البئيه اذا عاشت بكرا دون انسان ينظم الاشياء فيها ليبدو جمالها فسوف تتحول الى ماض مطمور وكذلك الانسان اذا بدا استخدام البيئه بشكل غير متوازن سيجد نفسه بعد سنين يعيش فى كوشه مترامية الاطراف .
    اها يا عزت ورينا احترام المسطحات المائيه بيكون كيف ؟؟ والتعدى عليها بيكون كيف ؟؟ وما هو الحد الذى يمكن من خلاله تمييز بدايات التدهور المائى لمسطحاتنا ؟؟

  2. طارق أب أحمد كتب:

    دكتور صباحاتك خضراء (ما مطحلبه)
    واللهى يا دكتور اليوم أول حاجه عملتها بعد وصلت المكتب أن طلبت من الناس تفتش فى الجرايد عن واحد يكون كاتب حول الطعم النتن لمياه الماسوره فى بحرى والتى ظللنا نعانى منها لأربع أيام السابقه و حتى الأن

    لم أكن أتوقع أن تكون المشكله من (الأميه زاتا)
    زى ما قال أفليقا ما يا هو دا حالنا وحال البلد كان المويه ’ السياسه , الكوره ولا الفن كلو ضارب
    لو تحدثنا عن بعض المسببات , نعلم أن المويه االجاريه لا تتطحلب مما يعنى أن الأزرق الثائر فتر أو خمد أو أن الأبيض أتقاوى عليه ( هل للسدود أية تأثير )
    أخيرا نعيب التحاجات التانيه و العيب فينا مالأشياء عيب سوانا
    ياخى الأنسان خرم الأوزون خلى لوث مياه انهار و البحار

  3. مُخير كتب:

    العزيز د. عزت
    الحبان في كل مكان سلام
    المقال أكثر من رائع ويديك ألف عافية .
    كتبت ((بقوم بيجي يوم و يفتر من ذلك و نكون قد جنينا عليه….)) أنا خوفي يا أبو عصمت يقوم يوم يفتر من عدم إحترامنا له وعدم إحترامنا لعدم إحترام حقوقنا ويغير مجراه، مش يمشي عبر إحدى دول الجوار لأن الحال زي بعضو، بل يقوم يدقش عبر الخلاء، مش قالوا الخلا ولا الرفيق الفسل !!!

  4. حاج أحمد السلاوى كتب:

    دكتور عزت ..سلام لك ولكل الحبان الحنان ..
    نشكر ليك إهتماماتك بالبيئة ونسأل الله أن يعينك فى مسعاك الجميل لخلق بيئة نظيفة معافاة من كل الشوائب..لكن قالوا اليد الواحدة ما بتصفق..وياريت نتعاون كلنا..كل الشعب السودانى الغلبان ويكابس مكابسة فى سبيل لقمة العيش ..لكن برضو شوية إهتمام بأمور النظافة بتساعد على خلق مناخ صحى ..
    ونرجو أن تكون عملية الفلترة اللى بتحصل داخل محطات تنقية المياه بتتعمل بطريقة سليمة وما تكون سلق بيض زى ما بيحصل فى كافة المرافق الأخرى ..غايتو زماااان ( قبل كان سنة كدة ) أيام الدراسة كنت عملت فترة تدريبية فى محطة مياه الخرطوم بالمقرن …وكان الشغل بحق ما فيهو لعب ولا لف ولا دوران لأن المدير كان راجل شايف شغلو ( بس مش زى شغالة …عواطف إياها )تمام وكان شغل صاح ..
    ومادام الموضوع جاب الموضوع عاوزك تقول لى رايك فى موضوع الأبار ( السيفونات ) بتاعة الصرف الصحى ومدى تأثيرها على المياه الجوفية ..الموضوع دة بصراحة شاغل بالى شديد وما مريحنى ( زى النسكافية الما كانت مريحة د. الحاج يسن شمباتى )..خصوصا على المدى البعيد ومع إزدياد حفر هذه الآبار مع التطور العمرانى الحاصل فى البلد وعدم وجود شبكة صرف صحى متكاملة !!
    وما زلنا منتظرين نشوف آخرته شنو … يا نيام نيام !!!

  5. حنين كتب:

    د.عزت المرطب والسمار الكرام
    سلام .
    البحر دة لونو أحمر ولا أنا آآآآآبشوف…
    دكتور كريستال دة زى دكتور ليبتون.
    يادكتور نحن لمن نكون شغالين فى التحتانية والجدول واقف بتكون فى باقى موية فى الترعة ليها يومين ومخدرة الواحد بخت فيها طرف (عراقيهو) وبشرب لحدى ما يروى والحافظ الله تقول لى الكلور .
    عموما نشكرك على الموضوع ونحيى فيك روح المحافظة على البيئة لكن شايفك كاتب عن نهر النيل الازرق إنت قاصد ياتو فيهن …

  6. نيام كتب:

    عزت بقاريتش:
    لو بمرادي اقوم الصباح القي الامزونه زي تلفزيونها..
    حنين:
    والله شهيتني شراب اللور..انت جنابيتكم بتشربوا فيها بجلابيتكم و الترعة بالعراقي طيب ما تكلم دكتور عزت دا قول ليه غباش الكريستاله دي ما فوقو حاجة..دوس ساكت..

  7. سهيل كتب:

    زمان كان يقولوا ليك … إنت بس لو في منك إتنين كان البلد إتصلحت… علي بالحرام إنت بس لو بقيت يا كا د.عزت و لا كان نقصت النص .. بس بوجودك البلد مطمءنه إنو عندها وجيع

  8. بشار أحمد بشار (إبن برد) كتب:

    يا دوك عزت يعني إنت قاصد تقول موية النيل الأزرق بقت خدرا زي موية القرنتية في حديقة الحيوانات البائدة قبل أن تطالها يد المنون ويحولها ناس الحجاج بن يوسف بن عبدالفتاح إلى برج الفاتح بن أبو القاسم بن مقبوض التمن؟؟؟ مافي واحد يقول حضارة وما حضارة لأنو قرود الحديقة كانت أحسن لينا من حضارة غابات الإسمنت الماعندنا فيها لا ناقة ولا جمل ولا غنماية.

  9. قرمبوزى كتب:

    يا ى يا عزت خوفتنا من النيل الازرق ونهر النيل .بعد كدا نشرب سوبا ونتوضى باوزون

  10. nono كتب:

    لك التحية د/عزت بقا ريتش

    الاخوة اصحاب المدونة

    خداري بحالي ماهوا داري جااااااااااااافناي
    ************************
    متين يزورني حبي محياهو يضوي داري
    ****************************
    اقول جلست مرة
    ********************
    مع الطير الخداري

    د/عزت حقيقة انتي فتحته فرصة استثمار كبيرة مشروع لاستيراد( الشب)

    لترويق مياة النيل الازرق

  11. aflaiga كتب:

    قرمبوزى : انا خايف فى النهايه يطلع سوبا واوزون هم البطل .ز
    مرحب بيك انابة عن الشباب .

  12. bakriMusa كتب:

    قرمبوزي

    مرحبتين حبابك اليوم السعيد الليله جابك

    ونشرب إن ظمئنا الماء(سوبا ) — ويشرب غيرنا كدرا وطينا

  13. طبعا ما كتب هذا الموضوع الا لدق جرس انذار خفيف للتعامل مع نيلنا و الطحالب يا جماعة الخير مجموعة من النباتات اللازهريه الثالوسيه والنباتات اللازهريه التي تعيش في المياه العذبة والمالحة وبعضها يعيش في التربة الرطبة, وقد يتكون جسم الطحلب من خلية واحدة وغالبا ما تتجمع الخلايا لتكون مستعمرات مختلفة الأشكال…

    الطحالب مفيدة جدا في بيئتنا و لديها عمل مش زي السياسيين اذ نستفيد منها في تنقية المياه عندما تنمو في الفلاتر البيولوجية و تكسر لينا الملوثات و البكتريا الممرضة عندما تمر المياه من خلالها وزي ما قال حنين أصلو الطحالب ما منها خوف بس زحها شوية و بالهناء و الشفاء تشرب تروى…. بس لو ما منظرا الشين دا كان استفدنا منها أكتر ففيها بروتين و ناس هولندا بدخلوها في (جبنتهم) و تباع الجبنة أم طحالب بقروش زيادة…

    لكين ياحاج أطمئن فهناك جنود ساهرون على صحتكم و ما عندهم في المويه دي يمه أرحميني اذ تقوم أتيام ادارة تنقية المياه باخذ عينات دورية من الآبار التي تغذي الشبكة القومية للمياه للتحقق من خواصها و كان لحقوا لقوا أي أثر لتلوث بكتيري من عائلة (الاشريشيا كولى) الدالة على التلوث بفضلات تقفل البئر فورا…. و دائما يتوخى حافري الآبار بتاعت السايفونات أن لا ينفذوا الي الآرتيزين و عادة لا يستطيعون بالحفر اليدوي عشان كدا ناس الأبار الجوفية لهم طرق لحفر المياه الحلوة و لا يشتركوا مع ناس حفر السايفونات…كما أن هناك أبعاد من الأحياء السكنية واجب اتباعها عند حفر أي بئر لمياع حلوه… حتى لا يتركوا أي فرصة لتلوث…. نوم عافية

  14. ابكرون كتب:

    سلام وم. الخير:
    لدي تعليق نزل ظهرا واختفي يا آدمن…تحياتي

  15. الغبشة كتب:

    مشكور دكتور عزت على التوضيح

  16. حاج أحمد السلاوى كتب:

    د. أبو عصمت المرطب..وكل الحبان .. مسكم الله بالخير .
    رجعنا نتاوق ونشوف الحاصل شنو فى الساعات القلائل الماضية..لقيناها صانّة ..
    شكراً ليك ابو عصمت مرة أخرى على البوست الرائع ونأمل فى تعاون الجميع فى هذا المجال الهام حفاظاً على الصحة العامة..وشكراً على تطمينك لنا جميعا فيما يختص بآبار( سيفونات) الصرف الصحى وأنها لا تصل إلى أعماق مياه الشرب الآدمى ..ربنا يحفظكم ويحفظنا من كل سؤ ..

  17. قرمبوزى كتب:

    شكرا يا افلااايجا و bakriMusa
    جاو

  18. aflaiga كتب:

    قرمبوزى : حبابك الف .. بس الناس ديل قصة جاو وياى واتخيل دى قاعده تعمل ليهم شوك فى الحجاب الحاجر بتاع النخره من زمن ( سام 2 ) فركز معانا بالعربى شويه …برضو حبابك ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s