قطر بجيب ولا قطر عجيب ؟؟

Posted: الإثنين,9 فبراير, 2009 by aflaiga in اخرى

وانا ارتشف كوبا من الشاى بجوار حجه حوا دار الحوار التالى بين اثنين من ابناء الغرب الحبيب :

الاول : انت اسى قطر دا بجيب سلام ؟؟

التانى : قطر كان بجيب حبابو وكان ما بجيب قطر عجيب  يودى ما يجيب ..

لم استغرب الحكمه  البسيطه فى حديثهما فابناء الغرب مشهورون بالحكمه اوليس هم من قال :

حكيم وحكيم بنحلو غادى – حكيم وغشيم بمشو القاضى – غشيم وغشيم ينحلو بالايادى !!!

لا ادرى لماذا وصلت الامور فى دارفور الى هذا الدرك السحيق برغم ان اهلها اهل حل وعقد كان بامكانهم ان يبعدوا الحيكومه والمجتمع الدولى من نزاعهم ويحلوها غادى لاننا نحسب ان جميعهم حكيم وحكيم الا من ابى !!

والانظار تتوجه الى قطر حيث من المفترض ان تتم صفقه او حوار او وهمه فى شكل قلبه المهم يتم اى شيئ ينهى النزاع فى دارفور نتمنى ان تنخفض سقوف المطالبات وتتوحد فى السعى لطلب الامن والسلم والرفاهية لانسان دارفور الذى هو اساس مطالب الحكومه والحركات كما يدعى كليهما !!   والا فاننا سنشهد فيما بعد قطر وبجلاء ما قاله ابن الغرب الصادق بجوار ست الشاى ( قطر  عجيب يودى ما يجيب ) مع اننى لا اعرف من هو عجيب ولا قطرو ده كان يودى وين لكنى استطيع التنبؤ بعجيب ما بعد الدوحه والى اين سيذهب قطرها . دعونا هنا نناقش مفاوضات قطر وما ستتمخض عنه وهل تحمل الحل لاهل دارفور ام انها ستكون ابوجا اخرى كل رصيدها اضافة احد المتمردين الى مستشارى الرئيس وتعود حليمه لقديما ؟؟؟؟

Advertisements
تعليقات
  1. التلب كتب:

    سلام للكل
    أصدقكم القول لست متفائلا على الاطلاق. الحيكومة ماشة المفاوضات بغرض المخارجة من موضوع المحكمة الدولية (يعني موقفها ضعيف جدا) و الحركات (بتاعة الحركات) داخلة بغرض تحقيق مكاسب عريضة مستغلة ضعف الموقف الحكومي و مستندة بقوة على الأرضية الخلقها ليها أوكامبو.
    و فى النهاية لا الحكومة و لا الحركات يهمهم أمر مواطن دارفور المسكين الذى اوقعه حظه العاثر بين مطرقة الحكومة و سندان الحركات

  2. aflaiga كتب:

    اها بندا ليكم التعليق :
    فى قراءه سريعه للموافقين على الحوار والرافضين والرعاه :
    موافقون :
    المؤتمر الوطنى .
    حركة العدل والمساواه .
    مقاطعون :
    حركة تحرير السودان جناح مناوى .
    حركة تحرير السودان جناح الوحدة .
    حركة تحرير السودان جناح عبد الواحد محمد نور .
    الراعى :
    الجامعة العربية
    الاتحاد الأفريقي
    قطر
    المجتمع الدولي
    الدول الإقليمية
    اها كدى من الحيثيات الفوق دى ورونا رايكم شنو فى احتمالات النجاح او انضمام الرافضين او رفض الموافقين او انسحاب الرعاه !!!

  3. aflaiga كتب:

    التلب : شكرا على المرور الراقى والعوده النشيطه ..
    مع انك غير متفائل دعونا نتفاءل بانضمام الرافضين وانا شخصيا اتمنى ان يحدث نموذج مشابه لنيفاشا يتم فيه عصر الجميع لوقف الحرب وبعد داك ما مشكله لو انتقلت للخرطوم شويه وبعدين وقفت !!! بس امريكا موقفا شنو ؟؟

  4. طارق أب أحمد كتب:

    مقاطعون :
    حركة تحرير السودان جناح مناوى .
    حركة تحرير السودان جناح الوحدة .
    حركة تحرير السودان جناح عبد الواحد محمد نور .
    حركة تحرير السودان جناح الشعب الفضل

  5. طارق أب أحمد كتب:

    مقاطعون :
    حركة تحرير السودان جناح مناوى .
    حركة تحرير السودان جناح الوحدة .
    حركة تحرير السودان جناح عبد الواحد محمد نور .
    حركة تحرير السودان جناح الشعب الفضل

    موافقون :
    ((المؤتمر الوطنى )).
    ((حركة العدل والمساواه))

    هذا ليس إتفاق سلام بقدر ما هو أتفاق على تقاسم غنائم و الشعب السودانى ليس طرفا فى هذه النصبه

  6. نيام كتب:

    افليقا:
    اصلا كان فريق الوطني بضقل بالكورة في خط ستة بتاع الشعبي بعدين قام باك الشعبي ضفر الكورة فطارت برة الحوش وقاموا الناس البرة الحوش ديل كل واحد يضفرها في حوش و من حوش لحوش لحدي ماطارت في القطر..وبعدين بأه..لما يقيف القطر نشوف اخرتها..

  7. aflaiga كتب:

    والله يا نيام انا خايف فريق الوطن والشعب يكونو بيضقلو بينا نحنا ويركبونا القطر !!!
    اب احمد : مقاطعون من اجل شنو ؟؟ وموافقون من اجل شنو ؟؟
    انا شخصيا مقاطع اى شيئ ما بيجيب امن وسلام وتنميه للبلد عامة .. طبعا الان حسن طحنيه بيكون بيجهز فى بيت المستشار الجديد وعرباتو ونوناتو الفى وجناتو ..

  8. طارق أب أحمد كتب:

    أفليقا
    الحل لازم يكون عبر تمثيل جامع لأصحاب الوجعه من كل فئات الشعب السودانى عبر مؤتمر جامع بشكل حقيقى وليس مسرحى , ممثلى قبائل, أحزاب, حكومه معارضه, مسلمين, مسيحيين, لا دينييين ألخ نقابات شخصيات وطنيه كما نقول أهل عقد

    اما ما يتم الأن فهو عباره عن رشوه لبعض الساسه من الطرفين طرف يعطى ويخنصر و طرف يقبض و ينسى
    أنتو نسيتو شنطة على الحاج ولا شنو
    وبمجرد الخروج من الأجتماع ستكون حركات جديده مضاده للأتفاق أراهن على أن من مسمياها سيكون
    حركة المساواه والعدل
    حركة العدل والمساواه جناح أب أحمد
    حركة العدل وتحرير فرتكان
    وهلم جرجره

  9. بشار أحمد بشار (إبن برد) كتب:

    الإبن أفليقا : هسع المشكلة أن الغشيمين ذهبا للقاضي بعد أن إنهدوا وما إنحلوأ بالآيادي. من أبسط الأشياء لدخول أي معركة أي كان نوعها حتى معارك المفاوضات هي وضع خطة متكاملة ووضع هدف ومجموعة أعمال ممكنة وطرق حل والتحسب لأكثر أعمال الند المناوي خطورةً وأسوأها نتائجاً ووضع خطط طواريء لدرء المفاجآت مع أقل خسائر وأقل تنازلات والأهم من ده كله إسكات الحناكة والخشامة و(الموبوظاتية وديوك العدة) أثناء انعقاد جلسات المفاوضات وليتحسب أهل العقد والربط وهم ذاهبون لأي موتمرحل ووساطةلإجراءات أكثر من اعتقال الريس بل فليتحسبوا لإعتقال ل 3/4 من أجهزة الحكومة. وإن لم يكن كذلك هل معنى ذلك نفرط في مقدرات الوطن ونجلس بلا حراك كالخشُب المسندة ونقعد نلطم؟؟ ما هكذا تورد الإبل سيما وقد توعدنا دول الصلف والإستكبار أن نذيقهم عذاب الهدهد. كابيش؟؟؟

  10. عباس ركس كتب:

    سلام يا أمم :
    فلايقو والنبي صاينو , كيفك ؟
    نبدأ بي الحكومة ماشة بي ياتو نية ؟
    * انها تجيب سلام لكل دارفور وينتهي هذا النزيف ؟
    * انها توضح للعالم أجمع !! انها حكومة سلام وتسعى اليه ؟
    * تتخارج من موضوع اوكامبو – البقى قانونيا امرا واقعا ؟
    * توقع اتفاقية مع من حضر والبقية فيما بعد
    * الكلام قاله طارق اب أحمد . ما في حل لأزمة دارفور او البجا او الرهيفة التنقد الا بمؤتمر جامع لكل اهل السودان ممثلين في كل الاحزاب السياسية وكل القوميات وكل الاثنيات العرقية واهل الصحافة والرياضة والفن ومنظمات المجتمع المدني ومرة واحدة نطلع بحل واحد ونهائي ــــــ كيف يسعنا هذا الوطن الحدادي مدادي كلنا في محبة ووئام ونتمتع جميعنا ( جميعنا ) بخيراته , وهو بالمناسبة يسع سودان تاني !!!!!!!!!!

  11. حاج أحمد السلاوى كتب:

    الدينمو ..أفليقا ..وكل الحبان الكرام .
    كدى حسة خلينا من قطر يجيب وقطر عجيب ..وقطر كريمة ..وقطر ما بعرفو داااااااااك شنو …إنت الودّاك تقعد جنب حوا ست الشاى شنو ؟؟؟ يعنى ما عارف تبعات المسألة دى ؟ ولاّ الثقة متوفرة من جانب عواطف عشان كدة عاملين طناش وكمان عامل ليها بوست ” وانا ارتشف كوبا من الشاى بجوار حجه حوا …”
    لكن بينى وبينك شاى النسوان ديل أطعم مليون مرة من الشاى البنشربو عند ناس عواطف ( حد سمع حاجة .. يا قِدعان … ؟ ) والما جرب يجرب ..وأنا ليوم الليلة ما عرفت السبب شنو .. الموية يها الموية والشاى ياهو الشاى .. الزايد شنو ..ما بعرفو ..
    معليش با أبو الشباب عملنا تخريمة برة البوست لكن الكلام جاب الكلام….و قضية دارفور وراها أجندة خفية كتييييرة شىء داخلى وشىء خارجى ..وجماعتنا ما قصروا ودقسوا فيها وما حسبوها صاح لحد ما الفاس وقع فى الراس .. المشكلة حسة يحلوها كيف مع العشرين فصيل الشايلين السلاح ديل؟ وكل واحد منهم مدعوم بجهة معينة .. غايتو عاوزة ليها ساحر عشان يحلحله..مع إنو أهلنا الدارفوريين معروف عنهم الطيبة والسماحة والحكمة البسيطة عند الكبير والصغير ..وفوق دة كوووووولو ناس حافظين القرآن ..أها فى أحسن من كدة ؟ غايتو ربنا يهدى النفوس ويجيب العواقب سليمة ..ومنتظرين نشوف آخرته .. يا نيام نيام …وقول يا لطيف !!

  12. ابوالمنذر كتب:

    سلام يااحباب…
    اكيد ازمة امريكا الماليه واحتمال تغير ساسة بلدينا اوبومه اللا هسع مهجومه مع انتصار غزه وهرشة اسرائيل وفضيحة دول الاعتدال وزيادة دول الممانعه بدخول القاسم الاعظم تركيا والملحقات قطرنا الراجنو يرحل يودينا نشوف بلدا حنان اهله وترسى دارفور وترسينا… مورتانيا ما قصرت واليمانى شادى قدرتو وراجى الرغيف الحار محل ينجض يفتحها…
    اوكامبو وقاضيهو جابولو الصهاينه كالعاده خامشين وثابته عليهم فكروا يحلو المحكمه خصوصا انو امريكا ذايقه من حمايتن وقالتلهم تاكلو ناركم اهه الحل فرتيق المحكمه ومجلس الامن فيهو الفيتو الصينى ماشايفين كسير التلج اليومين ديل كيف الاحتفال باليوبيل الفضى للعلاقات الصينيه السودانيه
    فهمنو حاجه اهه دى ظلال المفاوضات القطريه …

  13. طارق أب أحمد كتب:

    كلكم
    سيد جنقور فى الفاشر و لا إندا راى

    ((صاحب الثياب الرثه لا يسمع له رأى فى مجلس الأعيان ))

  14. العزيز شارب الشاي و صحبه السلاوي الخرمان لي جنس شاي أفليقا دا و المدونين الأعزاء…
    سلام

    قاليها حسابك كم
    قالت ليهو خمسه تالاف
    ليه هو شاي شنو
    قالت ليهو: ما شاي و فرجة

    دارفور و ما أدراك ما دارفور فقد وجدت هذا التعليق في حتة ما لواحد أطلق على نفسه ابن دارفور قائلا اتركوا دارفور في حالا فمع احترامه الشديد الى قطر لكنه يرى أن قضية دارفور هي اكبر من حجم قطر…..

    عليكم الله شوفوا جنس الكلام ما زي (المحافير) نعم مظلومون ناس دارفور و انصاف الحلول لا تجدى لكن باقي ليكم أوليست أي تحركات لصالح لم الشمل تستحق بعض التشجيع…. غايتو الحل في يد أبنائها و قناعتهم بأنه ما في حاجة ما عندها حل…..

    مالم ناس قطر ما تخلوهم يشوفوا ليهم (حلل)

  15. طارق أب أحمد كتب:

    أفلايقا ((والله يا نيام انا خايف فريق الوطن والشعب يكونو بيضقلو بينا نحنا ويركبونا القطر !!))

    يسمع منك ربنا و من فمك لباب السما

    أنا خايف يدخلونا الماسوره

  16. حاج السلاوي هو ما جاهز للتخرت ما شايفو قال (حجة حوا)…

  17. انت بس خلي بالك يا أب أحمد… القطر هين

  18. نيام كتب:

    طارق اب احمد:
    ليه هو انتو لسه ما دخلتوش؟
    عزت المرطب:
    يعني زي قطرين كده كفاية؟

  19. ابكرون كتب:

    سلام :
    اولا : يا سادة يا كرام ما يجري في قطر هو رجوع الابن الضال الي ابيه فحركه الاسلاميين الدارفوريين (خليل ابراهيم) وهم جزء لا يتجزأ من اسلاميي الحكومه ستعود الي الحظيرة….ولعبة المصالح تجعل خليل يخرج لسانه ويقول للترابي ..طز
    ثانيا: كل الحركات الاربعة الرافضه لا تشكل تهديدا للحكومه كحركة خليل (العدل والشنو ما عارف) لذا الحكومة من مصلحتها (ديدن المؤتمر الوطني) هو تحييد هذه الحركه وتجنب قوتها فهي الوحيدة التي وصلت الي ام درمان والوحيدة التي تقلق مضجع ونوم الحكومه ….فاجتماعات الدوحة ستدجنها كمناوي….
    ثالثا : (هذا الاخير) مناوي مرعوب من زوال مركزه كمساعد اول لرئيس الجمهورية وحصول (بلية) جديده اكيد الزبده والريادة فيها لخليل (الحركة الاقوي والاكبر )….

  20. بشار أحمد بشار (إبن برد) كتب:

    عزت يا ريتش : تقصد المثل البيقول جو يساعدوه في دفن أبوه دسَّ المحافير؟؟؟
    طارق أب أحمد ثرو عباس ركس: المؤتمر الجامع الذي يشمل كل ألوان الطيف السياسي الناس بتنادي بيهو لامن الكلام ذاتو ( إنحلج) لاكين قديماً قيل: “ميمان لا يتعلمان مستحي ومتكبر” ونضيف ليها أربعة ميمات تانيات متغطرس ومتعجرف ومستجد نعمة ومأجور.

  21. bakriMusa كتب:

    حاج أحمد السلاوى:
    لكن بينى وبينك شاى النسوان ديل أطعم مليون مرة من الشاى البنشربو عند ناس عواطف ( حد سمع حاجة .. يا قِدعان … ؟ ) والما جرب يجرب ..وأنا ليوم الليلة ما عرفت السبب شنو .. الموية يها الموية والشاى ياهو الشاى .. الزايد شنو ..ما بعرفو ؟

    عزت بقارييش:ـ ما شاي و فرجة.

    غايتو يا حاج بتجيب لنفسك الهوا سااااااي

  22. ابكرون كتب:

    بكري يا موسى : هو الشاي بس الطاعم ما حتي الحشاشاي… والنشا شاي والسناشاي!ده ناااااا غلبااااان ……

  23. aflaiga كتب:

    السلاوى : مشهد سغنتوتى ردا على تساؤلك :
    هو : كدى تلفونك ده اضرب لى ناس امى .
    هى : هاك اهندا .
    هو : عليكى الله ده تلفون اسى شايله ليكى تلاتين حشره وعامله فيها عندك تلفون والله زينب ست الشاى شايله قنبله بلوتوث بكاميرا !!!
    هى : احيييييا !! كيفن ما تشيل قنبله وانت اليوم كلو مصاقرا اهى اهى وكبى تانى اهى اهى وهاك خلى الباقى ما بيننا !!!؟؟؟
    شباب : يعنى اسى لو امريكا دى شالت العصايه ورسلت البت الجامده فريزر مش الفصائل كلها حتجى توقع ؟؟؟
    انتو فريز دى معرسه ولا كم قدم ؟؟

  24. مُخير كتب:

    الشباب والشفوت
    صباح بنكهة النعناع وعرق المحبة !!؟؟
    قطر لا تُملك سوى النية الحسنة، وهي لا تكفي طالما أن القوى المُحركة للُعب والحركات من خلف الكواليس لا تُريد التوصل إلى أي إتفاق، بل لن تدخر جهداً في ضمان إستمرار الحال على ما هو عليه إن لم يزد سوءاً،،،
    الحيكومة سوتو بإيديها وغلب أجاويدها،،، وهي أيضاً ركابة سرجين ومساكة دربين وصاحبة ثلاثة بالات، وقلبي عليك يا دارفور.

  25. حاج أحمد السلاوى كتب:

    الدينمو ..أفليقا ..
    غايتو الليلة دبّر ليك حتة للمبيت ..شوف سترايكر ولآ واحد من أصحابك..يعنى ما خلصنا من حاجة حوا ..كمان بتعرف حاجة زينب الشايلة قنبلة بلوتوث بكاميرا ؟.

    فريزر دى أظنها يا 23 يا 25 قدم…إنت مفكر تعرسها إيثارى ولاّ شنو ؟

  26. مُخير كتب:

    أبو الأفلاق
    أوع تخلي حاج السلاوي دة يجرجرك لمواقف هزيلة،،،
    والله بعدين لا قطر ولا أوكامبو ولا أمم متحدة ما تحلك، وحتضطر تكتب بوست إعتذار وتبلع هترشتك دي، خليك مركز حول الشأن الدارفوري والدافوري ده نهايتو المبيت في الواطة… ونُعلن عن تضامننا اللامحدود مع أم سروية ونُدين وبشدة أية محاولات للتلاعب بمكتسباتها ولا نامت أعين الجبناء

  27. مُخير كتب:

    مدام إسترايكر في الغالب تكون من رواد سوداننا وستعرف نوعية التجاوزات وحتماً لن تسمح بأي دعم لقوى التمرد

  28. مُخير كتب:

    وبعدين راعي للفروق الجغرافية والظروف الزمانية والمكانية، أي أن أبو الحجاج في جدة وإنت في أمبدة، يعني لمن يجي العيد الجاي يكون الموضوع قدم وحاجة عواطفو قلبها كبير ومتسامحة، وسلك كدة وعمك يكب الجرسلين والحنان والموضوع يتنسي وإنت يا صاحبي تآكل تبن على قول الخلايجة، ولا وألف لا للإصطياد في الماء العكر هاك الصواطة دي

  29. د.ياسين شمباتى كتب:

    افليقا والسمار..سلامات..

    للاسف يا جماعة الموقف واضح ومعروف نتائجه شنو,,اسه الحكومة فى داعى تخلى وفدها يتكون من المتشددين والمكروهين على المستوى السياسى والامنى؟؟د.نافع_د.امين حسن عمر_الفريق صلاح قوش!!! ولا مطالب حركة العدل والمساواة البتدى احساس بالتعجيز والعجز فى نفس الوقت..ولا مناوى الما عاجبو الكلام دا,,وعبد الواحد الزايغ من الحوار وما معروف هو داير شنو كمان!!!

    امس المذيعة فى قناة الجزيرة زنقتو وقالت ليهو : عدم مشاركتك ما مجدى,,انت ليه ما بتقعد فى طاولة الحوار وتقول مطالبك,,شبكها ليك كلام فارغ يطمم البطن لما المذيعة قاطعتو وختمت الحوار لانها عرفت انو زول ما عندو موضوع..

  30. د.ياسين شمباتى كتب:

    كمان شروطهم عجيبة!!! عايزين حكم الاقليم,,ودا شئ طبيعى,,كمان عايزين مشاركة فاعلة فى حكم اقليم الخرطوم ومؤسسة الرئاسة!!! دا اسمو كلام دا؟؟
    بس العجبنى فيهم انهم لما اتكلموا عن التعويضات ما طالبوا بيها فى شكل فردى,,زى ما عبدالواحد عاصر بيها الحكومة..

    ربنا يكضب الشينة..كمان ناس الحكومة مدورين ضرب فى الغرب,,والمفاوضين قالوا انهم ما مسئولين عن حاجة فى ارض القتال,,هم ليسوا بقادة عسكريين!!! يا جماعة بطلوا اللعب والمسخرة..

  31. bb كتب:

    عجيب الذي تتسال عنة هو من اوائل سائقي قطار البخار بمدينة عطبرة واسمه عجيب دفع الله ومن دقة القطار في ذلك الزمان معروف بنضباط مواعيد الحضور للمحطات وكان يقول له قطر عجيب يؤدي مايجيب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s