ابشروا بالخير

Posted: الثلاثاء,10 فبراير, 2009 by زووووووول in إجتماعية

تم بالامس عقد الاجتماع التاسيسى لمنظمة سوداننا الطوعيه بمنزل ضو القبيله ود الخلا  وقد كان من تمام نعمة الله علينا ان يتم تكليفنا بكتابة محضر الاجتماع الذى ننشره عبر مجلة سوداننا اليوم وكذلك ارساله لجميع الاعضاء عبر ايميلاتهم وفشان ما امسخ عليكم القصه انقلكم الى وقائع الاجتماع وتوصياته .

1/ تم تكليف إسترايكر  باعداد فورمات لحصر العضويه وتوزيعها على الاعضاء لاخذ موافقتهم بالاشتراك فى العمل الانسانى .خلال يومين فقط من تاريخه .

2/ تقرر ترشيح الاتيه اسمائهم للجنه التنفيذيه لادارة الجمعيه :ــ

أ/ د. عزت بقاريتش                رئيسا

ب/ ودالخلا                           نائبا للرئيس

ج/ خالد  مدنى                      مديرا ماليا واداريا

د/عبدوش                            منسقا للاتصال التنظيمى

3/ تم تكليف السيد / طارق اب احمد  باعداد لائحة لعمل المنظمه لعرضها على الاجتماع القادم .

4/ تم تحديد اشتراكات الاعضاء بمبلغ 30 جنيه شهريا ابتداء من شهر فبراير الجارى على ان يتم سداد اشتراك الثلاث شهور الاولى مقدما .

5/ سيتم عقد اجتماع خلال الاسبوع القادم وتقدم الدعوه لعدد من الاطباء لحضوره وغالبا ما يكون يوم الخميس 19/2/2009 .

6/ قرر الاجتماع تخصيص الرقم 0919991880 ليكون الهاتف المعتمد للمنظمه وعلى جميع الاخوه الراغبين فى الاشتراك الاتصال عليه لتسجيل اسمائهم لدى الاخ خالد مدنى المدير المالى والادارى .

7/ قرر الاجتماع البحث عن موقع بمدينة الخرطوم لتخصيصه كمقر للمنظمه وتم تكليف الاخوه البشاوى وافليقا واسترايكر بالبحث عنه .

 

 

 

 

sudanona-form1
Advertisements
تعليقات
  1. Stricker كتب:

    بعد كتابة كل البيانات اعلاه برجاء ارسالها الى العنوان الاليكترونى التالى

    hamaada@aol.com

  2. salih كتب:

    الاكارم
    سلام

    مشوار الالف ميل يبدأ بخطوة واحدة , بارك الله فيكم وثبت اجركم ونفع بكم ووقاكم من عذاب يوم القيامة

  3. مُخير كتب:

    ما شاء الله وتبارك الله وهللا هللا على الجد
    ألف ترليون مبروك وربنا يجزيكم كل الخير على هذه المبادرة الإنسانية العظيمة ونسأله جلت قدرته أن يبراك في جهودكم الخيرة وأن تكبر هذه الشجرة الصالحة ويبلغ فرعها عنان السماء. وسبحان أصدق من قائل ((وَمَا تُقَدِّمُواْ لأَنفُسِكُم مِّنْ خَيْرٍ تَجِدُوهُ عِندَ اللّهِ إِنَّ اللّهَ بِمَا تَعْمَلُونَ بَصِيرٌ))

  4. nono كتب:

    الاخ زووووووول سعدة بلقاءك/

    ربنا يوفقكم

  5. aflaiga كتب:

    الاخ الزول اسمح لى بان انقل المايكرفون لشخصى الضعيف للحديث :
    كنا قد بدانا هذا المشوار باعلان من ود الزبير عن مقابلة الاخ د صالح لحالات مرضيه تخص افراد المدونه ولان على قدر اهل العزم تاتى العزائم توسعت الفكره لتكون تيم طبى متميز من زملاء صالح ومن ثم توسعت لتكون تيم طبى متكامل فى كل التخصصات .
    الخطوات العمليه :
    * الرقم المخصص للحالات المكتوب اعلاه مفتوح لاستقبال اتصالات كل الحالات التى ترد الى المدونه 0 المنظمه . عبر التالى :
    الاتصال بالرقم – شرح الحاله – الاتصال بالطبيب المناوب لاستقبال الحالات – تحديد التخصص المعين – توفير الاتصال المباشر بين المختص والحاله – تحديد موعد للمقابله ومتابعة العلاج ..
    * سيبدا العمل فورا من تاريخ الاعلان فيما يخص الحالات المرضيه .
    * ستبدا اجراءات تسجيل المنظمه فى العمل الطوعى فور اكتمال الاشتراكات واستيفاء الشروط وملئ الفورمات .
    زى ما قلنا زمان :
    باب الخير فتح وايدينا للبلد ويد الله فوق ايدينا ..
    من لا يشكر الناس لا يشكر الله .
    * شكرا جبرا الذى جعل هذا الجمع ممكنا ولو كنت فظا غليظ القلب لانفضو من حولك ..
    شكرا صالح الذى جعل هذا العطاء ممكنا .
    شكرا المدونين الذين اعطونا الثقه ليتحقق هذا .
    شكرا شعبى الذى سيمنحنا الفرصه لرد دينه علينا ..
    شكرا زووول للبوست الراقى ..

  6. زووووووول كتب:

    الاخوه اعضاء سوداننا سلاااااااااام
    رجعنالكم رجوع الشنو ما بعرف داك
    بالامس كانت ليله ولا كل الليالى امتدت حتى السـ12 ــاعه منتصف الليل التقينا فيها باخوتنا القدامى وكانت المفاجأه حضور اخونا طارق اب احمد الذى القيناه لاول مره لكنه كان يشبههكم فى كل شئ ومن نفس الطينه .
    بالنسبه للمنظمه نريدها واقعا يمشى على الارض فقط نرجو مساهماتكم الماديه والعينيه بما تستطيعون وللمعلوميه الحد الادنى للاشتراك هو 30 جنيه كما هو موضح ولكن لا يوجد حد اقصى . يعنى لو فى واحد عندو عربيه داير يساهم بيها ممكن يرسل اوراقها للسيد المدير المالى والادارى ويجى بعد شهرين يشوفها باللوحه (منظمات طوعيه ) . برضو لو فى واحد عندوا اتصال مع مستشفيات (خارجيه بس ) لانو ناسنا ديل ما عندهم اسكراب نافع واى حاجه بطلعوا زيتا . اقول لو واحد عندوا علاقه مع مستشفى ولا منظمه برا ولقا ليهو جهاز بتاع رنين مغنطيسى ولا جهاز بتاع اشعه ولا اجهزة معمل وكدا يستلمها ويرسلها السودان طوالى وناس عزت وود الخلا ما بقصروا فى قصة الاعفاءات الجمركيه .واقول ليكم حاجه لو اى زول بعرف مريض ما عندو حق العلاج يتصل على عبدووش ومدنى وينسق معاهم لعرضه على الاطباء والكلام دا من يوم الليله على العموم من حقنا ان نحلم بمنظمه تكون حديث وطننا المكلوم بجراحات الفقر والمرض والحروب . ولا تنسوا ان جميع المشروعات الناجحه فى العالم بدأت بخطوه وبحلم جميل ويلا يا ناس برا ايدكم معانا ادونا دفره .وبعدين لو بتعرف اى زول وريهو الفكره وادعوه للمساهمه ولو بجنيه والله لا يضيع اجر من احسن عملا .
    كسرات قبل النهايه :ــ
    اخونا صالح وصديقنا مخير
    سلاام وكتر خيركم كتييير ونسأله ان يتقبل منا ومنكم صالح الاعمال ولو لم نجد من المدونه سوى معرفتكما وامثالكما من الاخوه لكفانا . بس دايرنكم تساعدونا بموضوع الاسكراب والدعم اللوجستى وكدا ودمتم ذخرا .
    الاخت نونو سلااام
    شكرا واتشرف بمعرفتك ويلا ايدك معانا وما تنسى انو الرسول صلى الله عليه وسلم دعى نساء الصحابه للصدقه فتبرعن بحليهن للفقراء وتجهيز الجيوش ونرجو ان تتابعى التنسيق مع (اخوات الغبشه ) وحثهن على هذا العمل عسى ان تكونى يوم القيامه مع نساء المهاجرين والانصار
    والسلااام عليكم

  7. aflaiga كتب:

    شباب : لا يفوت على فطنتكم ان الاستعجال فى الاجتماع وعدم الاعلان عنه كان لاسباب اهمها
    * حساسية الظرف وارتباطه باطباء يستعجلون الخير ومتفاعلون باكبر من تفاعلنا فلم نشا ان نكون ابطا منهم فى رد الفعل .
    * انشغال الكثيرين بمشاغلهم الخاصه كما اشرنا فى بوست ( مشغولين ااى مجبورين بالاكتر ) ..
    * احيانا كثرة المشاورات تقتل الموضوع وخاصة فى الخطوات الميدانيه المرتبطه بالتاسيس .
    * الاضطرار للعمل فى محورين ( طويل المدى – المنظمه باحلامها الكبيره ) و ( قصير المدى العمل الطبى المستعجل الطارئ ) ..
    اما الان وقد استبان الامر ووضحت الرؤيه اؤكد لكم ان اهم ما نعول عليه هو رايكم فى بناء المنظمه ومسيرتها ..
    نؤكد كامل احترامنا لكبارنا وكامل تقديرنا لكل من لم يشارك فى الاجتماع التاسيسى .
    ونعتبر استعجالنا نابعا من عشمنا فى ثقتكم فينا التى عبرتم عنها كتابة فى البوستات المتعلقه بالموضوع ( د . صالح ومعاينة حالات مرضيه بالمدونه – باب الخير فتح وايدينا للبلد – مشغولين ااى مجبورين بالاكتر ) …

  8. زووووووول كتب:

    افليقا سلاااام
    الله يعينكم .
    بالله كلم سترايكر دا يلحقنا غيرنا الايميل وعندنا تعليق عالق فى الحدود ودا التانى بالله الحقونا

  9. aflaiga كتب:

    الساده حضور امسية امس كلمه فى حقكم :
    ود الخلا :
    كنت قد ذكرت ان الرجل ياسرك بتشابه باب بيته وباب قلبه فكلاهما مفتوحان بنفس الاريحيه فالقادم اليه يلج بيسر عبر البابين ..حياك الله وفتح ابوابك دوما ..
    اب احمد : تخيلتك راقيا شفيف النفس عفيف اللسان لكنى تفاجات بان ما توقعته لا يرقى لمستوى ما رايته من طيب نفس ورقى وفهم ..
    زووول :
    اوهكذا انت دوما معتز بالخير وفعله مبادر اليه ؟؟
    ستريكر :
    خشيت بالامس ان يطلب الشباب منك برنامجا الكترونيا للرنين المغنطيسى فتجيبهم بان ( اى نعم جاهز ) خضر الله سوفت ويرك ..
    سهيل :
    الله يعرس ليك بس ..
    البشاوى :
    وانت تفترش مفرش ارض ود الخلا احسست بان تلاته منك كان حلو مشكلة البلد دى لو قعدو فى اى مفرش ..
    ود الزبير :
    كنت استغرب كيف يكون الغائب حتضرا حتى غبت انت بعض لقاءاتنا حضرك الله فى السمح انشاء الله .
    خالد مدنى :
    حين اختارك القوم للمال لم احس يوما باننا سنسالك قروش المنظمه يتودوها وين ؟؟ لانك لن تجيب على بانو انتو اسى قروش البترول عرفتو بتمشى وين عشان تعرفو قروش المنظمه .
    د . عزت :
    لم نبحث بالامس عن رئيس للمنظمه بل كاد القلم يكتبك بنفسه تشرفنا بالمنصب وتشرف بك ..

  10. حاج أحمد السلاوى كتب:

    السادة الكرام أبناء الكرام كوووووولكم لجنة العمل الخيرى وأطباءنا الكرام الأفاضل ..
    ليس لدى ما أقوله سوى جعل الله كل أعمالكم هذه فى ميزان حسناتكم إن شاء الله ..وتشوفوا الخير البتسووا فيهو فى عواطفكم وفى أولادكم بإذن واحد أحد ..وكان بودنا أن نكون معكم لمشاركتكم ولكن …إنتو عارفين كل حاجة ..ومع ذلك نؤكد لكم ( وما طالبننا حليفة ) نحن تحت أمركم فى أى لحظة ومنتظرين تعليماتكم..فى أى أمر كان ونضع أنفسنا ( أنا طبعن بتكلم نيابة عن إخوانى الكواشف البرة ..ومن دون إذنهم لأنى عارف رايهم..شنو ) تحت تصرفكم..
    وفقكم الله .وإلى الأمام.. يا شباب .

  11. نيام كتب:

    السادة الدانقوست..
    فعلا علي قدر اهل العزم تاتي العزائم
    وطبعا مشوار الالف ميل يبدأ بخطوة .. قلوبنا معكم و فقنا الله و اياكم لما فيه خير البلاد و العباد..
    دكتور صالح و كل الاطباء .. لا ننسي ان هنالك من سهر الليالي ليس طلبا للعلا و لكن طلبا للعلاج..و ارقه المرض و اعياه السهر دعونا نبدأ و العون من الله سبحانه و تعالي ..

  12. خالد مدني كتب:

    سلاااااااااااام وحب شديد
    بالامس الكواكب احتفلو بالقمر … والقمر الشاب – يا السلاوي – طارق ابو احمد … حلا وحمار بفتح الحاء وما دايرين شبك …ونتمني نلاقيك كمان وكمان .
    الاجتماع كان جاد ومثمر ونتمني ان نري المنظمة تمشي علي قدمين وايدينا للبلد وخطوة خطوة يا حبيبي نسير .
    يا استرايكر كنت اتوقع منك استمارة متفاعلة او تفاعلية … يعني علي طول املاها وارسلها او رسلها لينا في الايميل او شيء زي كده … حاولت اعمل ليها كوبي بيست وانزلها مكان التعليق واملاها لكن ابت ما تلين … يا الاهيف .

  13. ساتينتود كتب:

    السادة الأفاضل

    السلام عليكم ورحمة الله

    وفقنا الله وإياكم بما فيه الخير والصلاح

  14. ودالفتيحاب كتب:

    الاخوة الكرام
    الجمع الذى أجتمعا
    جزاكم الله عنا خير الجزاء .ونسأله للتوفيق وعين الحسود لاتسود نحن تحت إمرتكم كما قال شاعرنا الهمام السلاوى
    ومن إيدكم دى لى ايدكم دى …
    جعل الله كل ذلك فى موازين حسناتكم .

  15. ودالفتيحاب كتب:

    خالد مدنى
    فاقدنك لينا فتره حمدا لله على السلامه

  16. ودالزبير كتب:

    شباب

    وفقكم الله وسدد خطاكم

    إن حق لي أن أقول رأي سيكون في شكل الإستماره وخصوصاً المقطع الجامد الذي أسبه بالأقرارات الماليه أقر أنا الموقع أدناه بكامل رغبتي .. هذا المقطع منفر وبه نوع من الجبريه أو هكذا خيل لي وبما أنه عمل طوعي يمكن للشخص الإنسحاب منه في أي مرحله أرى أن نكتفي بإستماره عضويه عاديه .

    والأمر شورى بيننا .

  17. ودالفتيحاب كتب:

    نرفع يدنا بالتزكيه للاخ ود الزبير
    لانريد قيود تضيع المجهود ,الاقرارت والتفويض كلمات منفره طالما العمل طوعى يرجى منه وجه الله.

  18. Stricker كتب:

    خالد مدنى ثرو ود الزبير

    ده ما الشكل النهائى للاستمارة – وانما تصميم اولى – ان تمت الموافقه عليه – فيتم مل البيانات وارسالها عبر الايميل – يعنى الزوول بكتب ايميل للعنوان اعلاه وبداخله البيانات المطلوبة .
    ود الزبير من اسمها فهى تطوعية ويمكن طبعا ان ينسحب فى اى وقت – لكن هى استمارة عضوية – اذن العضو يطلب الانضمام وهذا ماقصد بالعبارة اعلاه.

  19. التلب كتب:

    سلام للكل
    ربنا يوفقكم و يسدد خطاكم

  20. نيام كتب:

    ودالزبير ثرو استرايكر و الاحبة:
    كلو في محلو بس تحذف عبارة – وهذا مني للاقرار بذلك..

  21. ودالزبير كتب:

    نيام نيام

    أوجزت وأوضحت بس يحذفوا حكايه الإقرار دي ؟؟

  22. Stricker كتب:

    حسب طلب عمنا نيام – تم عمل اللازم…

  23. الغبشة كتب:

    ربنا يعنيكم ويوفقكم ويجعل ليكم فى كل خطوة نجاح……………….
    ((اخوات الغبشة))والغبشة اكيد حيكونن معاكم وربنا يهون………..

  24. بشار أحمد بشار (إبن برد) كتب:

    بسم الله الرحمن الرحيم ((وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ وَسَتُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُمْ بِمَا كُنْتُمْ تَعْمَلُونَ) (التوبة:105)
    مبروك وفقنا الله واياكم وإنتو تأمرون من هالخشم.

  25. محنك كتب:

    مبروك
    من ها الخشم مثل كلام بشار

    وبنجييك قريب عديل كده

  26. ابكرون كتب:

    اهل البيت :
    مبروك يا شباب والميل ببدا بخطوه
    وبورك في الشباب الطامحينا وللامام ونحن عضدكم ان شاء الله …والله المستعان من قبل ومن بعد…
    الريس عزت /استرايكر ….حقو الإستماره تكون مصممه بحيث تتيح للاعضاء حرية كتابه معلوماتهم الشخصيه كما يودون يعني بالاسم الكامل اذا اراد او (بالنك نيم) اذا راي العضو في ذلك خصوصية له وحتي البيانات الاخري ….والموضوع في النهاية عمل خير…..

  27. ياسر طه كتب:

    السلام عليكم ايها الاحباء
    وفقكم الله وانا زول جديد عليكم طبيب امقيم بالمملكة العربية السعودية من زمن كنت من المداومين علي متابعة القمردينة وفقدتها منذ اكتوبر الماضى وبالصدفة دخلت اليوم عليكم ياشبابنا فلكم التحية على ما تقومون به وايدي وايادي كل زملائي معكم ياريت حد يوضح لينا مشروعكم العظيم دا على الايميل وارقام الهواتف للاتصال تحياتي

  28. bakriMusa كتب:

    الاخوة الكرام

    نبارك لكم هذه الخطوة .. ونحن معكم قلبا وقالبا ..جعلها الله في ميزان حسناتكم

    مَثَلُ الَّذِينَ يُنْفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنْبَتَتْ سَبْعَ سَنَابِلَ فِي كُلِّ سُنْبُلَةٍ مِائَةُ حَبَّةٍ وَاللَّهُ يُضَاعِفُ لِمَنْ يَشَاءُ وَاللَّهُ وَاسِعٌ عَلِيمٌ (البقرة: 261).

  29. سهيل كتب:

    سلام عام…

    د.عزت : يلا ياريس ورينا المريسه…

    ناس خالد مدني و عبدوش .. اعملوا حسابكم من البيشاوي ( الحكم الرابع)..

    ضو القبيله : اركز .. افليقا ما حيخليك … و نحن كمان

    طارق أب احمد .. عملت شنو يا معلم .. لحلحتها(اللائحه) و لا لسه ..

    أدام الله جمعكم و سهل لكم عمل الخير..

  30. شكرا دكتور ياسر لمبادرتك الكريمه فهناك رقم هاتف في صدر التدوينة و سيكون هناك ايميل أدرس خاص بالجمعية …حسبك ارسال سلام من ايميلك أو اس أم أس و سيقوم شبابنا بالاتصال عليك …

  31. بعدين في حاجة صغيرة أرجو أن نلتفت اليها اعزائي بحسبي عضو معتق في جمعيات تطوعية

    ان اسم (منظمة) لا يعبر عن تجمعنا و انشاء منظمة له من التعقيدات التي نحن لسنا بقدرها في الوقت الحالي اذ تتطلب اسم عمل و مانديت و أصول و هلم جرا فالأفضل أن يكون (جمعية) و قانون الجمعيات التطوعية مرن تستطيع أي مجموعة قوامها (ثلاثون) عضوا على الأقل من تكوين جمعية بعد ابرازها خطاب استضافة من جمعية معترف بها لديهم أمقر ثابت ففي هذه الحالة يمكن لجمعيتنا. (جمعية البيئيين) … منحها ذلك الخطاب … بل استضافة اجتماعاتها أيضا…

    متى ما اكتمل الثلاثون عضوا و حضر ثلثيهم للاجتماع العمومي في حضور ممثل لناس العون الانساني و مقترح دستور اكتمل تأسيسها و كونت اللجنة التنفيذية ….

    بموجب خطاب التسجيل يمكننا فتح حساب مصرفي و بوك كيبينق …

  32. حاج أحمد السلاوى كتب:

    الأخ المرطب ..أبو عصمت ..أهو دة الشغل ..وفقكم الله يا شباب .

  33. زووووووول كتب:

    شباب سلاااام
    ماشاء الله منورين كالعاده كما يقول جبرا
    عزت بقا ريتش سلااام يا مدير
    رايك فى تنك التك واهو كدا الاداره ولا يفتى ومالك فى المدينه المهم ضربة البدايه وحضورك للاجتماع القادم مهم جدا وهاك دى :
    واحد رئيس قسم الجناينيه فى احدى الشركات طلب منه المدير حضور احد الاجتماعات لمعرفة احتياجاتهم فتحدث قائلا :
    سعادة المدير مشكور على دعوتنا للاجتماع وباختسار نحن محتاجين للاشياء الاتيه :
    دايرين مناجل وطوارى وكواريق وبالله يا سعادة المدير الكواريق دى محتاجين ليها حوجه ضاره جدا جدا
    كسره : نحن محتاجين لحضورك الاجتماع حوجه ضاره جدا جدا (يعنى ماسه خالس خالس يا دكتور

  34. حاج أحمد السلاوى كتب:

    الأخ الدكتور ياسر طه .. السلام عليكم ورحمة الله .
    مرحباً بك يا أخى الكريم مع هذه الكوكبة من الشباب ( طبعن أنا لست واحداً من هؤلاء الشباب..) وحيعجبوك إن شاء الله قبل ما تقابلهم وحيعجبوك أكتر بعد ما تقابلهم …بس كنت عاوز أعرف موقعك الجغرافى بالضبط لأنى من مداخلتك أعلاه وضح أننا فى منطقة واحدة فى الوقت الحالى ..فأنا مقيم منذ فترة فى مدينة جدة ..آمل أن تترك رقم هاتفك مع الأخ الآدمنستريتر / سترايكر حتى يتم التواصل بيننا ( إذا رغبت فى ذلك بالطبع )..والى اللقاء .

  35. نيام كتب:

    صباح النور علي البلور
    اول مرة اشعر باننا نقدم شئ ايجابي لمحمد احمد طحنية..وفقنا الله لما فيه الخير و اشكر كل الاطباء اولاد الامزونة المربييين الحاسين بوجع الناس و شظف الناس و ارق الناس الذين لا يملكون ليس فقط حق الطبيب و حق الدواء بل حتي قوت يومهم..امانة يا امزون مافيك رجال..

  36. طارق أب أحمد كتب:

    فبيله سلام
    أولا أسجل شكرى وعرفانى لشموس القبيله الذين وصلونى للمشاركه فى الأجتماع التأسيسى وهم حسب أسبقية اللقيا
    الزوووول (هى كم واو) البشاوى, ود الخلا ، خالد مدنى .\,أفليقا ،و أسترايكر و دز صالح عبر الأثير
    شايفين أهو أول الغيث سيل ألف مرحب و حبابك د.ياسر طه ويدك معانا
    د عزت أتفق معك على أن التسجيل يتم لجمعيه طوعيه لأن المنظمه تحتاج لعدد أكبر من العضويه و تعدد الفروع فى العاصمه و الأقاليم
    سهيل : المسوده و الصلات المختصه فى الشئون الأنسانيه و الرعايه الأجتماعيه جاهزين
    ((جاهزين))
    يللا تكبير تهليل
    خالد المدنى : أبشر
    الزوووول : ياخى وقعت قلب أم أحمد قالت راجلى دا مطير شيكات ولا شنو
    االبشاوى تواضع العالم وحكمة شيخ العرب
    أفلايقاو أسترايكر تيمان عطبره ما أروعكم
    عزت: رئيس المنقه زاتا هسى نكسر ليك ثلج كيف
    أبو ناجى : بعد أن جعلت كل هذا ممكننن فاقدنك
    ود الخلا شكرا للضيافه الأنيقه ووالله ما أقدر أقول أى كلام عنك غير أنك بتذكرنى العطبراوى

    انا سودانى انا….انا سودانى انا

    كل أجزائه لنا وطن إذ نباهي به نفتتن
    نتغنى بحسنه أبدا دونه لا يروقنا حسن
    حيث كنا حدت بنا ذكر ملؤها الشوق كلنا فداه
    نتملى جماله لنرى هل لترفيه عيشه ثمن خير
    هذي الدماء نبذلها كالفدائي حين يمتحن
    بسخاء بجرأة بقوى لا يني جهدها ولا تهن
    تستهين الخطوب عن جلد تلك تنهال وهي تتزن
    أيها الناس نحن من نفر عمروا الأرض حيث ما قطنوا
    يذكر المجد كلما ذكروا وهو يعتز حين يقترن
    حكموا العدل في الورى زمنا أترى هل يعود ذا الزمن
    ردد الدهر حسن سيرتهم ما بها حطة ولا درن
    نزحوا لا ليظلموا أحدا لا ولا لاضطهاد من امنوا
    وكثيرون في صدورهم تتنزى الأحقاد والإحن
    دوحة العرب أصلها كرم والى العرب تنسب الفطن
    أيقظ الدهر بينهم فتنا ولكم أفنت الورى الفتن
    يا بلادا حوت مآثرنا كالفراديس فيضها منن
    فجر النيل في اباطحها يكفل العيش وهي تحتضن
    رقصت تلكم الرياض له وتثنت غصونها اللدن
    وتغنى هزارها فرحا كعشوق حدا به الشجن
    حفل الشيب والشباب معا وبتقديسه القمين
    عنوا نحن بالروح للسودان فدا فلتدم أنت أيها الوطن

  37. زووووووول كتب:

    اب احمد سلااااام
    والله يا طارق انا لو ما لقيت ناس ام احمدلاعبين معاك مان تو مان كان طبقتا فيكا نظريه نجار فى خشبه ما عملا لكن ربنا مرقك.
    ماشاء الله عليك عملتا اللائحه بالسرعه المطلوبه بس اقترح انك تقايل (الريس ) عزت قبل الاجتماع يديك راى فيها . شفت كسير التلج كيف يا اب احمد .
    كسره : الاتصال على بقاريتش ولقائه قبل الاجتماع ضرورى جدا ولو ما عندك تلفونو اتصل على العبد لله يرسلو ليكا

  38. حنين كتب:

    السادة الكرام بدوووووون فرز .(الواوات دى نعللها ما ناقصة ).
    كيف حالكم .
    والله إنى أشعر بالفخر والاعزاز إذا حسبونى من ضمنكم .نحيى العمل الطوعى الذى يكون بتلك القامة الشامخة والتى تسمو بأهلها الى مصافى الانسانية (أنا الليلة الكلام دة جبتو من وين ياربى …)
    هنيئا لكم الاستمتاع بالعمل لخدمة الناس وجعلكم زخرا للوطن وتقبل الله منكم الاعمال وجعلها فى موازين حسناتكم جبالا … آآآآميييين …

  39. خالد مدني كتب:

    السادة الكرام … بعد ما استضافونا ناس البيئية تاني ما عندنا عزر – مقصودة يا بشار – اعتقد اننا مفروض نشرع في اجراءات عقد الاجتماع التأسيسي الرسمي ونبدأ في العمل .
    كسسسسسسره :
    صباح اليوم وفي محاولة للبحث عن مكتب للجمعية في العمارة الوصفها البشاوي اليوم داك دخلت بالصدفة لمكتب المهندس سامي ع وبعد السؤال عن المكاتب وايجاراتها دار بيننا حوار حول من نحن ومادا نفعل فوجدت من قبله تجاوبا جعل الدمع يطفر من عيني وكسبنا عضوا للجمعية واخ جديد … وجهت له الدعوة لزيارتنا هنا واتمني ان نراه معنا عما قريب

  40. مُخير كتب:

    السيد الريس والسادة القادة
    السُمار الأخيار الأبرار
    السلام عليكم
    متفائل إلى أبعد الحدود بنجاح هذا المشروع الخير، وذلك لأسباب ليست عاطفية على الإطلاق، فالمجموعة الخيرة المُتطوعة للإشراف على مرحلة التأسيس لم يؤلف بين قلوبها إلا الخير العام وليس بينهم من يبحث عن وجاهة إجتماعية أو مصلحة حزبية أو مطامع دنيوية ولا نزكيهم على الله.

    ثانياً الشغلانة عطاء على طول الخط وليس فيها أخذ اللهم إلا الثواب الأخروي لقاء الإخلاص والجهد، وبالتالي يستحقون منا كل التقدير والإحترام.

    ثالثاً: الخطوات الأولية في غاية المعقولية وبالتالي لا نتخوف من حدوث أية إنتكاسة والمقصود أن تفتر الهمة ، بل على العكس نأمل أن تكبر وتتسع أهدافها ووسائلها بحيث تلبي أكبر مساحة ممكنة من العمل الطوعي الخيري.

    رابعاً: البدايات هي الإمتحان الحقيقي لمدى الجدية والقدرة على التضحية وأي تراخي في هذه الفترة من شأنه أن ينسف الخير المرتقب.

    خامساً وأخيراً: المال عصب الشغلانة وعمودها الفقري والنوايا الطيبة والدعاء والكلام لا تكفي لذا يؤمل أن يجتهد جميع الأعضاء الحادبين على تسديد إشتراك العام الأول دفعة واحدة فضلاً عن أية تبرعات أو مساهمات أخرى.

    والله نسأل أن تنمو هذه النبتة الطيبة وأن تكون أنموذجاً يحتذى في العمل الطوعي وأن تحقق الأهداف النبيلة والغايات السامية المرجوة منها.

  41. سهيل كتب:

    هوي يا خالد مدني.. تلفون الحكومه دا مقفول مالو؟ لو ما فتحتو هسي أنا بشتكيك للمدير..

    يا بيشاوي : يكون صاحبك طلع الشريحه و بستثمر في الجهاز و نحن ما جايبن خبر.. أنا يومداك قلت ليكم اوزنوهو….

  42. خالد مدني كتب:

    يا سهيل هوي هدا الجهاز مفتوح يللا ورينا همتك … بعدين هو وينو الجهاز اليستثمروهو والله طوبة بس – طوبة وجات في المعطوبة .

  43. سهيل كتب:

    همتك ياتو .. بتاع الصين و لا حاجه تانيه

  44. حاج أحمد السلاوى كتب:

    إنت يا سهيل بتاع مشاكل .. مشاكل ياتو .. ولدنا ولاّ حاجة تانية .
    حسه فى ظمتك خالد مدنى هابشو مالك ..؟ ولاّ عشان صاحبك يعنى قاعد تعاكس فيهو مما أصبحت والراجل لافى يفتش ليكم فى مقر للجمعية الوطنية … أوبس.. اقصد الجمعية الخيرية … وخالد دة لو وزنوه زى ما طلبت إنت إلا يبيعوا شركة دال كووووولها عشان يغطوا سعره ..إنت فاكره ساهل ولاّ ساهل .. دة بيحب السمسم الكباااااار … كدى أسألو شوفوا حيقول ليك شنو .
    عشان كدة انا بحذرك يا سهيل الزول دة ( بواو واحدة بس ) أختاهو ..ولاّ حسه أحرش عليك ودالزبير .

  45. ودالزبير كتب:

    المحرش ما بكاتل يا السلاوي

    عارف سهيل وخالد ديل زي سهي وسحويل بتاعين المسلسل الكويتي القديم داك يا قديم إنت .

    الأجتماع الجاي متين ووين؟؟

  46. سمراء كتب:

    والله ياجماعه اولتن بالتبادى الف مرحب بى بدياركم العامره بكم ، وتانيتا بالتبادى والله الحق فرحته لمن لقيت العمل السمح ده بصورة كده الله اعلم اقدر اوصف معالمه …..بس غايتو النيه واصله المهم ….
    عموما والله معكم قلباً وقالب (حتى كان قالب طوب ) مالو بضر بشى ؟؟؟ المهم ورونى الدرب واقعدو فراجه بس …..اختكم جاهزة قهوة وشاى

  47. ابوالمنذر كتب:

    بسم الله مجريها ومرسيها وعينى بارده وربنا يخدر ضراعكم ويتمم مرادكم ويديكم الفى خاطركم ويوفقنا ان نكون قدر التحدى والصبر على اكمال المسيره وان لا تنطفى شعلة الحماس خروجا على مالوف شعبنا الحماس الابتدائى واستعجال النتائج الذى يولد الاحباط لاسمح الله… وطالما ريسنا متميز فى الاهتمام بالبيئه العامه نحسب انه نعم القائد لبيئة العمل الجديد مع منظومة العقد الفريد اعضاء المكتب التنفيذى
    وفقكم الله وانشاء الله فى ميزان حسناتكم……….

  48. mugahid كتب:

    والله عمل رائع
    نحن معكم وسنحضر اخرين
    وبلد هيلى انا

  49. د.ياسين شمباتى كتب:

    سلامات حبايبنا و قرايبنا..

    ربنا يسهل القاسية ويهون الصعب..

    بس يا استرايكر انت عارف اخوك تعبان فى التكنولوجيا,,اعمل شنو بالضبط كدة؟؟رسل لى فى الايميل براحة براحة عشان اعرف كيف املأ الاستمارة..كمان بعد اذن اخونا ياسر طه رسل لى رقمو وايميلو عشان التواصل يكون اقوى..

    سهيل..المريسة!!!؟؟؟ لازم تشكلها..

    الاخ ياسر طه..مرحب مرحب..انتظر اتصال منى قريب..

  50. د.ياسين شمباتى كتب:

    سئل على ابن ابى طالب كرم الله وجهه عن الخير؟ فقال : ليس الخير بكثرة مالك,ولكن الخير ان يكثر عملك ويعظم حلمك,,وان تباهى الناس بعبادة ربك..فان احسنت حمدت الله وان اسأت استغفرت الله..ولا خير فى الدنيا الا لرجلين : رجل اذنب ذنوبا فهو يتداركها بالتوبة , ورجل يسارع فى الخيرات..

    جعلنى الله واياكم من الذين يسارعون فى الخيرات ولا يظلمون انفسهم..

  51. سهيل كتب:

    سلام سلام عليكم يدوم .. خذونا إليكم فنعم القدوم… ( أوعى تقولوا الراجل دا بقى بتاع .. ياني سهيل القدييييم إلا بس ……

    عمنا السلاوي : شنو يا عمك داخل بين البصله و ما بعرفوا شنو داك .. كان شاطر ورينا البصله منو و القشره منو .. دا إحنا دافنينو سوا .. أولاد دفغه و كده .. و كفايه كده ماتوديناش في داهيه.

  52. ودالزبير كتب:

    مجاهد

    الصديق

    مرحب بيك في بيتك وبين أهلك وناسك والترحيب يمتد ليشمل الدكتور ياسر وفعلاً بلداً هيلي أنا

  53. د.ياسين شمباتى كتب:

    سهيل..اوريك القشرة منو و البصلة منو؟؟؟ ادينا الاذن وخلينى اجوطها ليك اسه دا..اها فى نتيجة ولا لسه؟؟

  54. الصادق ود البركة كتب:

    السادة الأكارم السلام عليكم وصباحكم بالخير ممزوج
    قال الرسول صلى الله عليه وسلم ( خير الناس أنفعهم للناس ) وأنا معاكم وبكم ودمتم

  55. ودالفتيحاب كتب:

    بسم الله الرحمن الرحيم
    الاخوة الاكارم السلام عليكم
    الحمد لله الناس ماشاء الله فيها الخير الى يوم الدين كدى شوفو الطلات الكترت دى مانسحرهم وعينى عليهم بارده,
    نحن من حزب الشمباتى ياسترايكر بالله شويه شويه ,دايرين
    الاستماره .
    أقتراااااااااح
    —————-
    الى ناس المملكه العربيه السعوديه :
    أيه رايكم فى إجتماع للتعارف والتشاور فى الكيفيه التى ندعم بها هذا المشروع .
    فى إنتظار ردودكم ونحن جاهزين

  56. ودالفتيحاب كتب:

    شمباتى اليوم وين جده ولامكه
    بقيت ذى راجل المرتين كر عليك منتظر منك تلفون
    0566602951 هل ده ياهو العندك؟

  57. ودالفتيحاب كتب:

    الصادق ود البركه
    أهلا ومرحب بيك قبال أهل البيت مايصحوا كلهم علشان يرحبو بيك المهم كلنا أهل بيت وإنت سيد البيت حباااااااااااااابك.

  58. د.ياسين شمباتى كتب:

    ود الفتيحاب..صباحك احلى واسعد..اوافق على اقتراحك..

    انا فى مكة ومنتظر الوالد السلاوى يجى علينا ونصلى الجمعة سوا,,ياريت لو تكون معاهو..ياداب عرفنا التلفون الجديد..

    بعدين الصادق ود البركة دا عضو قديم بس زيك كدة,,يظهر ويغيب..

  59. حاج أحمد السلاوى كتب:

    أخونا / ولدنا الكريم الصادق ود بركة ..
    مرحب بيك ألف وحبابك عشرة فى دارك…وودالفتيحاب ما قصّر تب .. يقصر الملح وقام بواجب الترحيب نيابة عن الأدمنستريتر .. معليش يمكن مشغول شويه مع عواطفو .. اليوم جمعة ..
    مرة تانية مرحب بيك .. بس عندنا سؤال تقليدى بنوجهه دايما لأخوانا الجُدد وبنطلب منهم يحددوا لينا موقعهم الجغرافى ( من غير خطوط الطول والعرض ) عشان نعرف نتواصل معاهم وبعد داك ناس أفليقا ( الدينمو ) يشوفوا ليك القروب المناسب بتاعك.. يا معانا .. يا معاهم ..لكين غالباً حتكون معاهم ..
    أها خليك قريب ..وما تقطع الجوابات ..

  60. حاج أحمد السلاوى كتب:

    كل الحبان الكرام …
    بجوار الحرم المكى قابلنا ظهر أمس وعقب صلاة الجمعة الدكتور الحاج يسن شمباتى ومعه كوكبة من الشباب الأطباء بمنطقة مكة المكرمة ..وعرفت منهم إنو بيدخلوا المدونة ومتابعين .. بعاين بس بعيونى ..يعنى قراية ساكت وطلبنا منهم كسر حاجز الصمت الرهيب والدخول مع الداخلين وما بتجيهم عوجة إن شاء الله وادينا منتظرين نشوف آخرتهم شنو … شدوا حيلكم يا شباب ..
    الحاج يسن شمباتى بقى عمدة فى مكة وضواحيها ..من القفيف .. الفوارة وما بينهما …لابس الجلابية والطاقية ودارع الشال ..

  61. بت ابوها كتب:

    عرفت بالمشروع وهو فاتحة خير لكثير من السودانيين ارجوا السداد ولن نبخل عليكم بمجهودا من الداخل وما نستطيع ارجوا لكم حسن الجزاء وفي ميزان حسنات الجميع

  62. زووووووول كتب:

    يانااااااااااس سلام
    بالمناسبه كنت قبل قليل مع الاخ عبدوووش وهو بخير ويسلم عليكم فردا فردا لكنه يشكو من قلة الفئران فى بيته .
    وجدته (محتسبا ) وتناولت معه قليلا من البوش . لكن الحكايه ما عجبتنى بالجد كدا فهو حتى الان لا يمتلك جهاز كمبيوتر وعلمت منه ان الاشكاليه فى الترحيل فقط . كما علمت بان كثير من الاعضاء لم يسددوا ما عليهم من اشتراكات حتى الان . والجمعيه لم تسجل حتى الان ودستورها ولائحتها لم تعد وعضويتها لم تحصر بعد .
    ليس هذا تشاؤما لكن يجب الا نكون فى محطة واحد لاكثر من شهرين . يلا ايدكم معانا فشان نصل اخر محطه .
    كسره : يااااااااااااااااا ناس برا رسلوا اشتراكاتكم باعجل ما تيسر سررررررررررريعا
    كسره :يجب الا نكون كحشاش بدقينتو

  63. زووووووول كتب:

    بت ابوها سلاااام
    مرحبا بك بين ظهرانينا اخت كريمه وعضو ا فاعلا بجمعية سوداننا الخيريه وكاتبة شكرا على مرورك

  64. Stricker كتب:

    الزوووووووول

    من المفترض ان يكون هناك رقم حساب لتحويل قيمة الاشتراكات وبخاصة للاخوة خارج السودان !!!!

  65. زووووووول كتب:

    سترايكر سلااام
    انت حسابك بتاع الخرطوم اتملأ ولا شنو
    اقترح ان تتنازل عنه وتسحب ملايينك منو وتدى رقموا لناس عبدوش من دوب ما القصه تنتهى ونسجل الجمعيه ويفتحوا ليها حساب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s