بديع المهارات فى تفاسير الشمارات

Posted: الثلاثاء,10 فبراير, 2009 by قرن شطة in إجتماعية

  

هناك أمم وشعوب لا تعتبر مسالة تقصى الحقائق البعيدة والإطلاع على أسرار الناس الخفية  أمراً هاماً وحيوياً ، ربما يعزى ذلك لرغبة فى عدم التدخل فى شئون الآخرين الخاصة… ربما مظنة أن هذا الأمر غير مفيد ولا يعود باى نفع… ربما هو نوع من الأدب والسلوكيات نابع من ثقافاتهم… ربما وربما وهناك فى المقابل شعوب وأمم وملل ونحل – ونحن منها – تهتم اهتماما بالغاً (بالشمار) ومفرداته وإعرابه وتفرد له حيزاً فى ترتيب أولوياتها ! هذا التقصي العقيم فيه تشتيت للجهد وإهدار للوقت فى محاولة معرفة أخبار (العباد والبلاد) … يبدؤن بالتحري الدقيق فى مظنة ما ، وكأجهزة المخابرات تجى مرحلة فحص وتمحيص المعلومات الواردة ( الشمار فى شكل Raw Material – ( شمار خام) مرحلة قد تتم فى شكل مجموعات أو أفراد ويخضع الأمر لمختلف أوجه التحاليل الممكنة والمختلفة مع الأخذ بكافة الاحتمالات وربما التشاور مع المتخصصين (الثقاة) أمر يسمى فى بعض المذاهب (بشهادة خبير) تحت بند لا خاب من استشار… وقد يكون الشمار المتحرى عنه عديم المخبر غث رث ، ومع ذلك (الشمرجية) المدمنين يجعلون له (توماً وشماراً) ويرسمون له أبعاداً وفرضيات وحيثيات وانعكاسات على واقع متوهم وإفتراضى بل جنوني أحياناً!

وهنا عزيزي القارئ نحاول أن نفكك أوصال (الشمار) بصورة (نحسبها) علمية لمعرفة أوجهه وحالاته .. للشمار عوامل داخلية منها الفراغ والحسد وعدم الموضوع  والأخير من أخطر العوامل ذلك أنه يجعل (الشمرجية) يتعاطون بسهولة أموراً محرمة قانوناً وشرعاً وأخلاقاً والعياذ بالله ، ويتموضعون فى متاهات ومعمعات قد تقود الى جهنم مباشرة!!  والعوامل الخارجية مثل مقدار كمية الجذب والإثارة المتوقعة من أمر ما..وطبيعة مواقع الأحداث ونوعية الأشخاص المتورطين فى حادث ما…

والشمار مثله مثل  أمور الدنيا الأخرى يبرز فيه أناس موهوبون وأصحاب عقليات جبارة وخيال واسع جداً ولو إستغلوا هذه المواهب المدفونة الكامنة  فى أعمال أدبية مثلاً لأبدعوا أو (بدعوا)  ومن الملاحظ فى دراسة قام بها العلامة الفذ والباحث البحر (د. عبد السميع السريع) إن نسبة النساء الى الرجال من حيث تعاطي الشمار تكون بنسبة 1/9 .. وشمارات النساء تكون أجود من حيث السوء!

وتبقى أشياء أخرى  لابد من مراعاتها والأخذ بها عند التطرق لموضوع الشمار وهنا نذكرها فى إجمالها ودون تفصيلات مثل نوعية الشمار Quality فهناك الشمار التقيل والخفيف ..الخ على شاكلة نوعيات البترول…العربي الخفيف وبرنت وبحر الشمال….والكمية Quantity وهناك الشمار المحلى والمركزي والعالمي كشمارات الرئيس كلنتون ومونكا لوينسكى وقصة الجنس للجنس رحمة!!..وهناك شمار يسمى (الشمار المهوج) بمعنى أنه زيد شوية موية فقلت درجة فعاليته .

والشمار يمارس جماعياً فى بعض مناطق الاستهلاك المرموقة فى  أماكن مغلقة ويسمى (ديوان الشمار) شاكلة دواوين محترمة جداً موجودة فى البلد.

حملق البروفسير ليبتون – بالخدمات –  بعين الى العلالى وأخرى بنظرة جانبية وناصية وقال كمن جاءه خبر.

–   إن من الشمار ما أفاد البلاد والعباد فمثلاً أنا رويت شماراً لغابريل قارسيا ماركيز (شمار الجنرال فى متاهته) وقد تحول الى رواية ناجحة ونال جائزة كمان رأيك شنو؟

–         انت يا بروف بتعرف غابريل ماركيز وجنرالو كمان؟

–   ايوه بعرفه من كان (رقيب أول) فى النقل النهري.. ده كان صاحبى وساكن جنبنا فى برى الشريف… لكين تعرف الزول الممكن يفيدك كتير فى  قصص الشمارات دى هو أخونا هباش ابن سماع الحشرى وحالياً هو فى جولة استطلاعية فى الإستيت State تحديداً فى ولاية ألاباما.

–   لا حول ولاقوه إلا بالله (همهمت مندهشاً)  هو انت صاحبك ده مركب ليهو جهاز تتبع جى بى أس عديل كده!!

–   أمال إيه ونحن أصلوا شغالين شنو؟ ترزية قايلنا ..أمشى من جنبي عامل راسك المدردم ده زى ضراب الكوريا

 

 

 

Advertisements
تعليقات
  1. التلب كتب:

    تحية صباحية للجميع
    و تحية خاصة للأخ قرن شطة و ما شاء الله إبداع شديييييييد، لكن أجود من حيث السوء دى بالغت فيها عدييييييل كده

  2. مُخير كتب:

    صباح الشمار والبهار يا دكتور
    صباح الأنوار للسمار الأخيار
    كلو كوم و(شمار الجنرال فى متاهته) كوم تاني، لبتون ده حائز على جائزة نوبل في الدُراب، والله يا دوك ماشي كويس … حافز لينا على المستوى ده،

  3. aflaiga كتب:

    الرائع قبل الشوفه وبعدها الشاب قرن شطه :
    من اين تبنع الحوجه للشمار اساسا ؟؟ الا تعتقد ان غياب المعلومه الحقيقيه وعدم توصيف درجات سرية المعلومات من اسباب انتشار ظاهرة الشمارات اى ان الشمار رد فعل وليس فعل فى الاساس فانا مثلا ابحث عن شمار قرن شطه عندما يصعب على الوصول الى معلوماته المتاحه او عندما يضرب هو سياجا من السريه حول موضوعاته فحينها تبدا رحلة البحث عن المعلومه التى لديها خطوط حمراء يتم تجاوزها تبعا لدرجة الفضول لدى المتشمر ودرجة الغموض لدى المتشمر عليه !! فابدا مثلا فى البحث عما يهمنى عن قرن شطه قد لا اتوقف فى محطة المعلومات العامه فاسال مثلا يا البشاوى انت قرن شطه ده معرس ؟؟ وهنا يجب ان انطلق من قاعدة اما انو عندى عروس ليهو او داير اقارن بين روقتو بالرغم عن عرسو وما يبدو عليه من علامات عرس !!! وهكذا فيتم تجاوز الحدود ..
    عموما اعتقد ان التمييز بين الخاص والعام وطرح المعلومات بدرجه لا تخل بامن الفرد الشخصى هو ما يمنع الشمار اما عدا ذلك فاعتقد انها حلات مرضيه ..
    ولا شنو يا دكتور ؟؟؟

  4. نيام كتب:

    صباح النور علي البلور
    تعرف يا قرن اخر شمار شنو؟ لو ما عارف تكون بشمرقة ، لكن لو عارف تكون شو ما أخر؟صحي ناس الصين جابو ليك (…..) و لا اقول ليك خليك لمان اجيكم!!

  5. nono كتب:

    قرن شطة لك التحية/
    الاخوة اصحاب المدونة/
    الشمار له مدلولات كثيرة تاني مراقبة الناس من________
    قال أحدُهم :
    مَنْ راقب الناسَ ماتَ همّاً وفاز باللذةِ الجسورُ
    وقال بشَّار :
    من راقب الناس لم يظفرْ بحاجتهِ وفاز بالطيباتِ الفاتِكُ اللَّهِج
    انتقل رجل مع زوجته الى منزل جديد وفي صبيحة اليوم الاول وبينما يتناولان وجبة الافطار قالت الزوجة مشيرةمن خلف زجاج النافذة المطلة على الحديقة المشتركة بينهما وبين جيرانهما : انظر يا عزيزي . ان غسيل جارتنا ليس نظيفا .. لابد انها تشتري مسحوقا رخيصا….
    ودأبت الزوجة على القاء نفس التعليق في كل مرة ترى جارتها تنشر الغسيل وبعد شهر اندهشت الزوجة عندما رأت الغسيل نظيفا على حبال جارتها .. وقالت لزوجها : انظر .. لقد تعلمت اخيرا كيف تغسل ..
    فأجاب الزوج : عزيزتي لقد نهضت مبكرا هذا الصباح ونظفت زجاج النافذة التي تنظرين منها .. !!!

    للحديث بقية؟

  6. هناك مفردة يا قرن شطة يمكن أن تكون قد سقطت سهوا من خواجة لبتون لأنها تقترن بتفسير الشمار و لا يكون الشمار شمارا الا بعد انتشاره و بصراحة هي ممعنة في المحلية و لا يعرفها الكثيرون اذ يقولون أن بعد فلان سمع الشمار و قام بتفسيره قام (فت الشمار) فهنا يكون فلان قد سمع، هضم و فت الشمار؛

    فت فلان الشمار أي كلم الحاضر و الغايب و عم الشمار القرى و الحضر و يكون بذلك قد استخدم مهارة منقطعة النظير في انتشاره

    حسب علمي ان الشمار نوعين؛ أخضر و يستخدم في المحشي و البامية المفروكة و جاف و يستخدم في (الفول) غالبا… و يكون الفول شمارو كثير اذا ما كب فلان (شمار) كثير في الفول فمن يا ترى صاحب (استلاف) هذه الكلمة لتعني ما أشار اليه (قرن)… غايتو في كلام يحير قد نحتاج مستقبلا لحواشي كثيرة لتفسير (الشمار) ذاتو

  7. نيام كتب:

    ويقولون: طار الشمار هلا .. فاتني الليلة يا بلة
    هذا ان تعذر شمشمة الشمار ولملمته او اذا ما كان صوت المتشمر خفيضا بحيث انك لا تستطيع سرقة الشمار المشفر..
    ويقولون شمر عن اذنيه هذا اذا ما ارخي اليك صدغه امعانا في الشمأرة..
    اما المتشامرات العالمي منها و الاقليمي فهن :
    سانا‏ – وام – أش- بترا‏- واج-واس – اسوشيتد برس- انتربرس سرفس-CNN
    وناقلات الشمار ذات سرعات متفاوتة فبعضا يسمي رويتر و بعضا يسمي تاس و ابطا الشمائر نقلا هي سونا حيث تنقل عن نواقل – يعني شمارها كلو بايت..

  8. nono كتب:

    منقول/ من انواع الشمار
    الشمشرة( الثرثرة )… فالشمشرة هي الغوص في تلابيب أشياء قد لا تخصك … أي التلذذ بتتبع أخبار الناس أو التلصص علي مشاكلهم الخاصة ( متلازمة البحث عن الإخبار وحمل سيرتهم على اللسان) ومن ثم نقلها الى الآخرين بعد الزيادة أو النقصان في وهذا ما يعرف بالشمار ( رمي الطعمية ) أما الملاسنة فهي في اللغة شدة الاحتدام في الكلام أو البلاغة في الحديث لكن تبقى الثرثرة هي جزء من متطلبات الشمار … وهناك أنواع من الشمارات منها الضار …. ( شالو الكلام …. زادوا حبة ….وجابوه ليك ….) وهو شمار مميت وننصح بالابتعاد عنه قدر الإمكان….ومنها ما لا يبارح ساكنا (كلام شالو الهواء) يتخذه الشمشارون للتسلية .. وقديما عرف الشمار بالقطعية أو القوالة أو النميمة لغويا…. وبرغم ضرر الشمار والعيوبية الظاهرة في باطنه فحق لنا أن نعترف بان من يمارسون هذه الهواية بإدمان يملكون شبكة علاقات اجتماعية كبيرة وشيء من اللطف والتأنق في نسج الحكايات وتميز في سرد القصص والروعة في الإخراج والسبك والبلاغة في تنقية الألفاظ حتى يخرج السيناريو متكاملا للتصديق لتعقبه قرقرة في الحلقوم و ضحك بالكوم أو دهشة واستغراب واستنكار.

  9. bakriMusa كتب:

    قرن شطه … شمار حار ..عفوا سلام حار

    اول حاجه (ضراب الكوريا )دي شني ؟

    وبعدين دكتور لبتون ده ما وراك مراجع واصدارت الشمار ذي:

    * التوصيل المجانى للشمار الوصلني الان 0

    * كشف الشمار المستور فى قعده الودع والبخور0

    * خراب البيوت باستعمال الشمار والنبوت0

    *شمشره الاحباب فى وقفه خشم الباب0

    *شمار نسوان الحاره فى ونسه الجزاره0

    * تفادى الاخطار فى سرعه نقل الشمار 0

    * خراب الديار والميته فى شمار الحاجه بخيته 0

    * شمار الجيران ولخبتت الاهل والحبان0

    * الاساليب البديعه فى نقل الشمار والوقيعه0

    مراجع اخرى :

    * توزيع الشمار اليومى للمستر تيتو 0

    * شمار اليابانى والتابانى لقمر الليالي0

  10. nono كتب:

    من أنواع الشمارات

    شمار حار : وهو أفضل أنواع الشمار التي يفضل الجميع تناوله بسرعة.

    شمار غريب : وهو الشمار الذي تصاب بالدهشة بمجرد سماعه.

    راح شمار في مرقة يعني خلاص … مافى حاجة … راح

    الشمار القتل الحمار : وهذا الشمار لكي تحصل عليه يجب أن تكون لديك مؤهلات

    ( يعني نشيط و أضانك نضيفه) ، و أن تكون لديك روح المثابرة و ( الغاية تبرر الوسيله ) .

    ياتي السؤال يفرض نفسة ماهو الشمار الزي جعل هذا الحمار يفقد روحة

  11. بشار أحمد بشار (إبن برد) كتب:

    فذلكة تاريخية:
    طالما كان الشمار من المحسنات البديعية منذ اكتشاف الفول الذي يرجع الى عهد سنوسرت الثالث حيث جاء به جنود حملته مع المش وهم متوغلون جنوباً لإصطياد التماسيح وقهر ملوك النوبة الذين كانوا يغيرون على الممالك الفرعونية كما جاء في مذكرات المؤرخ هيرودتس ومنذ ذلك الحين صار السودانيون يضيفون الشمار لكل شيء بدءً من المرقة حتى البسبوسة وفي عصر التفكك والتشرذم والإنحطاط الحضاري سُميّ الشمار بالعونكوليب حتى بلغ ببعضهم السوء من حيث الجودة (هنا معكوسة باك وورد يا قرن شطة) حين قالوا : “القطيعة عونكوليب المجالس” كما سميَّ أيضاً في ذات العهد بتنزيل الفايلات كقولهم : “أمبارح الجماعة الليل كلو في القعدة منزلين فايل فلان ما خلوا ليهو صفحة يرقد عليها” وفلان مشكلتو كلها بس كان غائب من القعدة. وفي عهد الجاهلية الجهلاء والغي الموفي بأهله الى أطلق إسم الشمار على” الكاموتة الملبوكة” فيقال استشمر فلانٌ فهو مستشمرٌ أو إستشٌ متى ما اختلت عنده القدرة على قياس الزمن والأبعاد والمسافات وخادعه النظر .
    سؤال للإخوة العلماء : أين يقع تصنيف جماعة “الفولة في خشمم ما بتتبله”؟؟ وشيالين الكلام “صرة في خيط أو خيت أو هيتwave carriers “الى الطرف المناويء مع تكنيك وتكتيك المديدة حرقتني أو بالدارجي كده “من أجل بذر بذور الشقاق”؟؟
    بكري موسى : الضراب الكوريا لا يعلمه إلا الموغلون في القدم والراسخون في العلم ولا يمكن شرحه إلا بعد استئذان سنكل أو نيام ، أبكرون، البروف ، السلاوي وإمكن ود المهدي ود/عزت.

  12. بشار أحمد بشار (إبن برد) كتب:

    تتمة: الغي الموفي بأهله الى النار

  13. Ezz Abdo كتب:

    بارك الله فيكم
    اليوم عرفت انا بحب اهل السودان ليه

    جزاكم الله كل الخير
    نحبكم فى الله
    رائعة جدا بارك الله فيكم
    ودائما للأمام

  14. حاج أحمد السلاوى كتب:

    الأخ عز عبده …سلام
    أول شىء أخى الكريم… احبك الله الذى أحببت فيه أهل السودان ولك أن تتأكد إنو أهل السودان ممثلين فى هؤلاء الشباب الذين قرأت لهم يبادلونك حبا بحب قبل أن يعرفوا من أنت وأين موقعك الجغرافى ( دة أصطلاح متعارف عليه عند دخول أخ جديد فى المدونة ) ..
    ثانيا أرحب بك نيابة عن إدارة الموقع وبقية الإخوة المدونجية الذين ستجد منهم كل ترحيب أيضاً حسب معرفتى بهم …ونأمل أن نراك دائماً معنا وبيننا فى تعليقات ومداخلات فيما ينشر من مواصيع فى شتى المجالات .
    ولك التحية من الجميع .

  15. nono كتب:

    نورة
    ___
    وكتين يضيع عرق الجباه الشُّم
    ______________________
    شمار فى مرقة .. آه .. يا نورة آه
    ______________________
    من دربك التوّر نفس خيل الصبر
    _______________________

    فتـّر خطاوى الشوق وراه .. يانورة .. آه

  16. ابكرون كتب:

    سلام مسائي :
    عزت : اضف (لشماراتك) الاخضر والناشف نوع آخر يعرفه سكان تلك المدينة التي (يضاجعها البحر) هكذا قال عنها احد مذيعي تلفزيونها المحلي- جملة معترضة خارج الموضوع- …عشنا فيها عشرات السنين (يعمينا) ما شفنا البحر سوى كده بل كان غاية التهذيب ….ما علينا جزء كبير من سكان الثغر يطلقون على تلك العشبة الخضراء التي تلعب بالرؤوس يسمونها (الشمار) والشخص الذي يصل قمة (جبل السطلة) وهو احد اعلى جبال البحر الاحمر يسمون هذا الشخص (بالإستش)…وطقوس هذه القعدة بالإستشمار….
    بكري موسي : والله (بولغته)شديييد ما تقول لي ما لعبته (بلي)…ومن جيل الأتاري لكن ناس (الهتاري)…بعرفوا انه في لعبة البلي من ملك ضراب الكوريا (وهو بلية كبيره striker ) فايته أخواتها بخمسه سنين على الاقل …ومن ملك (الجلة) وهي بلية من الحديد …فقد ملك ملعب البلي (وخرت) الباقين …..خرت دي بقى اترك المايكرفون لزميلي (ابارو) للتفسير

  17. بشار أحمد بشار (إبن برد) كتب:

    أبكرون :ياخي حرام عليك ده أجود تعبير إذ شبه مذيعنا الفحل حركة الموج في غدوه ورواحه بالوطء مستشهداً بفحولة أمروء القيس كما أستاذنا العلامة كرف – طيب الله ثراه – :
    ويوم دخلت الخدر خدر عنيزة** قالت لك الويلات إنك مرجلِ
    تقول وقد مال القبيط بنا معاً** عقرت بعيري يامرأ القيس فانزل
    ومثلك حبلى قد طرقت ومرضعٍ** فالهيتهما عن ذي تمائم
    إذا ما بكى من خلفها انصرفت له** بشقٍ وتحتي شقها لم يحولِ
    بكري موسي : ما تخلي ناس أبكرون ديل يطشوا بيك
    خرت يخرت خرتاً فهو خارت (بالتاء) وصيغة المبالغة منها خرات (ليس يالياء) أي إنه كسب جميع ما يملك منافسيه من بلي و (ضراريب) وخرت فلان بلي الناس كلهم على وزن قام بالطربيزة أو كما قال سالم جدادة.

  18. نيام كتب:

    ابكرون:
    تكّس ما ينسل ، بالله يا ابكرون ارمي لي عليهو..

  19. ابكرون كتب:

    نيام : خليني اعمل لضرابك نظر بجلتي دخليك جوه اللين…

  20. قرن شطة كتب:

    الاخوة المدونجية بدون تحفظ سلام شديد/ الاخ أفليقا اكتر حاجة عجبتنى حكاية الشباب دى..ربنا يخليك ياسيد…أما موضوع الشمارات دى قصة طويلة وفيها (العرض) كمان …وأظرف حاجة أنو الاخوان تمو الموضوع واخونا بكرى موسى بالغ وبقى بكرى عديل..يعنى عديل كده بقى بكرى ولاشنو!!! نيام كيفك ياقريبى والله انت شمارك اخضر اصفر واحمر ذى شفق المغارب..نونو ظريفة حكاية الشمار الكتل الحمار .. دة حمار وادى ولاحمار مدن ولاحمار أفندى؟ بعدين ضراب الكوريا ده يجى من زمن (البلى) ..الظاهر فى جماعة ما لعبو بلى ..بعدين يا افليقا انت كان حارقك شمار قرن شطة معرس ومنو؟ انا ح أقول ليك..وليه أقول لك ..سيبك أحسن تقرأ فى الجريدة عسى ولعل. الاخ عز العرب شكراً ومرحب بيك ..ونحنا ماشين لقدام بس المشكلة ماعارفين وين بالظبط..على كل السايقه واصلة أو كما قال…. الاخ بشار (الاسد) الفذلكة دى انا ح اشوفها واديها لجماعة فى محاضرة فى (دراسات سودانية)..حاج السلاوى سلام ياحبيب وربنا يرد الغربة ان شاء الله/ التلب سلام حاشاك مابتقصر يقصر الملح…عزت سلام يادكتور /مخير قصة ليبتون دى ح احكيها ليكم فى يوماً ما ، هو بالمناسبة قاعد يقرا المدونة أظن بانتظام وحابينى حب الافيال فى الادعال، أخر مرة لاقانى – فى الخدمات – قال لى (أمشى عامل شنبك ده ذى طيارة الرش) وين البشاوى؟ مايكون (راح شمار فى مرقة!) التحايا لكم ايها الاحبة فرداً فرداً وضباطاً اشاوس …وانا مبسوط الشوفتكم اليوم داك جنب النيل وكده..وتحياتى المنمقة لسيد (السخرية) البروف جبرا (واستبرا)..ما السخرية بتاعت الباشمهندس (ودالخلا) تحياتى ليك ياباشمهندس وين إنتا؟ من ديك..يديك العافية..ونحن اى زول دايرن سعادتو بتشهد الايام عليمة..وقع لك (خلى بالك)الاخوة المدونجية بدون تحفظ سلام شديد/ الاخ أفليقا اكتر حاجة عجبتنى حكاية الشباب دى..ربنا يخليك ياسيد…أما موضوع الشمارات دى قصة طويلة وفيها (العرض) كمان …وأظرف حاجة أنو الاخوان تمو الموضوع واخونا بكرى موسى بالغ وبقى بكرى عديل..يعنى عديل كده بقى بكرى ولاشنو!!! نيام كيفك ياقريبى والله انت شمارك اخضر اصفر واحمر ذى شفق المغارب..نونو ظريفة حكاية الشمار الكتل الحمار .. دة حمار وادى ولاحمار مدن ولاحمار أفندى؟ بعدين ضراب الكوريا ده يجى من زمن (البلى) ..الظاهر فى جماعة ما لعبو بلى ..بعدين يا افليقا انت كان حارقك شمار قرن شطة معرس ومنو؟ انا ح أقول ليك..وليه أقول لك ..سيبك أحسن تقرأ فى الجريدة عسى ولعل. الاخ عز العرب شكراً ومرحب بيك ..ونحنا ماشين لقدام بس المشكلة ماعارفين وين بالظبط..على كل السايقه واصلة أو كما قال…. الاخ بشار (الاسد) الفذلكة دى انا ح اشوفها واديها لجماعة فى محاضرة فى (دراسات سودانية)..حاج السلاوى سلام ياحبيب وربنا يرد الغربة ان شاء الله/ التلب سلام حاشاك مابتقصر يقصر الملح…عزت سلام يادكتور /مخير قصة ليبتون دى ح احكيها ليكم فى يوماً ما ، هو بالمناسبة قاعد يقرا المدونة أظن بانتظام وحابينى حب الافيال فى الادعال، أخر مرة لاقانى – فى الخدمات – قال لى (أمشى عامل شنبك ده ذى طيارة الرش) وين البشاوى؟ مايكون (راح شمار فى مرقة!) التحايا لكم ايها الاحبة فرداً فرداً وضباطاً اشاوس …وانا مبسوط الشوفتكم اليوم داك جنب النيل وكده..وتحياتى المنمقة لسيد (السخرية) البروف جبرا (واستبرا)..ما السخرية بتاعت الباشمهندس (ودالخلا) تحياتى ليك ياباشمهندس وين إنتا؟ من ديك..يديك العافية..ونحن اى زول دايرن سعادتو بتشهد الايام عليمة..وقع لك (خلى بالك)

  21. قرن شطة كتب:

    الاخ الاكرم /ود الخلا / سلام شديد / تعرف نحنا ماشين نتعلم تحمل الطرف الاخر وده ضرورى (وحضارى) كمان …بس أوضاعنا نحنا السودانين ساءت موخراً وكل زول عندو شكاً كبيراً وعظيماً فى التانى !! وربنا يجازى الكانو السبب فى الدمار والإنهيار ده…على كل ربنا يسهل القواسى والبيناتنا عامرة إن شاء الله ودمت أخى ولنا لقاء (وجه لوجه) ذى ماقال (اب عاج) ….

  22. بشار أحمد بشار (إبن برد) كتب:

    قرن شطة: من “ازنك”
    هيييع أب عاج أخوي دراج المحن ياحليلك في زمنك ما كان في وزير ود مقنعة بيتخذ ليهو قرار ما لم يتم التداول فيه معك وكنت بتعرف الكبيرة والصغيرة ومافي (……….) بتقول كاك بعد إتخاذك للقرار لأنها بتكون مدركة تماماً لمصيرها الراجيها هاك بسمتيار ده.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s