الفنون في كربنة الزوجة المصون

Posted: السبت,14 فبراير, 2009 by basharibnburd in إجتماعية

بينما كنت أسبر أغوار الشبكة العنكبوتية عثرت على هذه الطرفة التي غالباً ما يكون مصدرها بلاد الشام ( الزُلُم أو الزلمات كما يحلولللآخرين أن ينادونهم في بلاد الخليج العربي ) وتتضمن الطرفة وصايا عشر تبيِّن التكنيكات والتكتيكات في إغضاب الزوجة وتتوير نفسها وقد آثرت اقتباسها لإطلاعكم عليها عشان تشوفوا الفرق بين الزلم ديل ومعشر السودانيين أولاد (نجاما) وأولاد الزرقا الحُنان أخوان فاطنة جمال الشيل وإكرامهم لعزة حتى كادوا يقدسونها :

1″  انتقد طبخ زوجتك دائما ، أو طريقة تنظيفها للمنزل ، وقل لها ‘آن الاوان لأتعلم كيف اطبخ ،
2 انتظرها حتى تنتهي من تنظيف المطبخ ، وتكون تعبانة ، وانت جالس في الصالون ، وأول ما تجلس تعبانة ، قل لها : ياحبيبتى ممكن كأس ماء ، أنا ظهري وجعني من شدة التعب!!
3 وانت تتفرج على التلفزيون ، تظاهر بأنك نعسان وتعبان ، وأول ماتمسكالريموت’ لتغيير القناة ، تظاهر بالضيق والتبرم ، وانك منذ ساعة في انتظار هذا ا لبرنامج ، ويمكنك أن تتهمها أيضا بالأنانية!!
4  قبل أن تضع ثوبك في الغسالة تأكد انك قد وضعت كمية لا بأس بها من المحارم في الجيوب !!
5  حينما تكون الزوجة خاضعة لبرنامج ‘رجيم’ املأ الثلاجة بكل مالذ وطاب وبصورة خاصة الآيس كريم والبسكويت // نوع من أنواع المكايدة !!
6  حينما تحس أن جهازا ما يوشك على العطل اطلب منها استخدامه ، ولا تنسَ أن تتهمها بعد ذلك بأنها سبب العطل !!
7  في ذكرى ميلادها ، قل لها ‘ والله وكبرتِ يامرتي ‘!!
8  وانت تنظف أسنانك ، لا تنسَ أن تبلل فرشاية أسنان زوجتك بالماء لتظن انك قد استخدمتها// لزوم النكد !!
9  من دون مناسبة قدم لها هدية كريم تجاعيد الوجه !!
10  وبدون مناسبة احضر لها صبغات الشعر السوداء !!  ” مقتبس ومنقووووووول

Advertisements
تعليقات
  1. ابكرون كتب:

    بشار : اضيف ..ولمن تشوف الاجراءات تجري علي قدم وكراع يوم الخميس ومتوره نفسها باشياء حتميه..(من باب سيك سيك معلق فيك) خت حبوب الملاريا في التربيزه جنب راسك وإدمدم وهاااااك يا شخير……. ولمن تصحي الصباح قول ليها (آآآآمني سخليلي مويه حااااارى….)..هههههه

  2. سهيل كتب:

    سلامات يا حلوين و سلام خاص لعمنا بشار و حمدلله سلامةالكي بورد…

    لنا عوده

  3. حاج أحمد السلاوى كتب:

    الإخوة الكواشف .. بشار ..ابكرون ..
    غايتو يا أبكرون عليك جنس لآمة أصلها ما منظورة ..بقيت تتهرب ولاَ شنو ؟

  4. bakriMusa كتب:

    بشار
    ابكرون
    سهيل
    صباحكم فل وياسمين

    وأنا ح أعمل رباطابي ولما (عواطف ) تقول لي عايزه اشتري قميص نوم
    اقول ليها :ـ اللابسا ده مساهر بيك؟هههههه.

  5. حنين كتب:

    عزيزنا بشار وباقى السمار .
    سلامات وصباح الخير .
    يعنى يابشار مالقيت توصينا إلا يوم الفالنتاين (عيد الحب *) بالوصاية دى ماكان تخليها يوم تانى .
    كنت بناقش فى أخونا سهيل فى نفس الموضوع قبل يومين وقلت ليهو إنو نحن فى عرفنا مابنعرف نقول كلام الحب مع عواطفنا وبنشير لى كدة بى (الليلة ملاحك سمح , الليلة ريحة البيت دى حلوة كدة مالا ؟. التوب السمح دة لقيتى وين , وما شابة ) يعنى الليلة يوم الكضب وهو يوم واحد فى السنة مالكم دايرين تعكننو علينا وتبيتونا القوى …

  6. سهيل كتب:

    إنت يا حنين دحين صليت صلاة العيد دا و لا جليتها.. و بعدين بمناسبة إنو السودانيين ما بيعرفوا يقولوا كلام سمح.. نقول ليهم ( على قدر اهل العزم تأتي العزائم )..

    ولا شنو يا جدو

  7. سهيل كتب:

    تعرفوا يا حلوين.. ربنا بحب السودانيين حب ما إعتيادي..قول لي كيف.. طيب ركز معاي يا فرده.. ربنا مش قال غضوا البصر… ياخي نحن ربنا خلانا عايشين في نعمه و خلانا مفتحين طوالي و ما محتاجين نسترق النظر أصلآ.. يعني يا حبيبي لو عاينت حتشوف منو ؟؟؟ نانسي عجرم؟؟؟

    بس إنشاءالله يجن مارقات

  8. سانتو علي سانتو كتب:

    طيب ولو عندو إثنين ؟؟؟؟ يعمل إيه ؟؟؟؟؟؟؟( على طريقة عادل إمام )
    وبعدين احنا بنحترم الزوجات؟؟؟ وفي عدم احترام أكثر من الواحد في الزمن دة يزوج اتنين وتلاتة زي جماعتنا اللى ……… وعلى رأسهم صاحب أوكامبو . عمركم سمعتو زلمي إتزوج اتنين ؟؟؟

  9. مُخير كتب:

    الحبان في كل مكان
    العلامة إبن بُرد
    سلام
    تعرف يا فردة واحد من إحتمالين يا أم العيال ما عندها شريعة مع النت أو لا وقت لديها لها بوجه عام أو ما عارفة درب البيت الصغير بوين “سوداننا” وهذا الأرجح.
    الثاني أن يكون شجرة الدوم باع القضية وكايس عكننة.
    وفي كلتا الحالتين ما خصانا، وندعو الشباب لعدم الإنسياق إلى أية مشاكل ما أمكر المخلوقات، لأنها إن ختتك في حنانها فالله رب العزة قال عن كيد الشيطان أنه ضعيفا وكيدهن عظيم صواحب يوسف.
    لذا يا رفقاء السلاح أدعوكم ونفسي إلى ترديد مووايل على شاكلة الله يعلم أنك كلو سنة زايدة حلا، الله يخليك لينا وما يحرمنا منك، والله ما عارف الحياة قبلك كان شكلها كيف، وأحلى بامية آكلها من زمن، وأطعم محشي تسلم يديك وكسير تلج على هذه الشاكلة، وإياكم إياكم وفتح جبهات داخلية وإلا فلن ينفع الندم.
    قالت لي زوجة صديقي عندما زرتهم بعد غيبة ولم أكن أعلم أنه تزوج عليها ولم أجده في المنزل فقالت لي والغُبن في عينيها والله لولا مخافة الله ومسئولية عيالو نصف الدستة كان وصلت لصاحبك ده سلك 420 فولت لمن ينشف، ولا سقيته ليك رزنيخ مع الجردقة والعطرون وديتو الآخر ولا أقلوا أنهزوا جقدي في قلبو (علماً بأنها بنت جزار يعني تستطيع فعلها)، الشاهد في الموضوع إستعرضت خيارات مرعبة، فما كان عندما لقيت صديقي إلا وأن نصحته بأن يُفرط في العدل ويسعى لإرضاء بنت عمه جهد إيمانه. هوي يا بشار الزلميات فتحوا ولقوا دي الثقافة السائدة والكل بيآكل في حنانو لكن أخوات الغبشة ديل نيرانهم حية، والله يدينا خيرهن ويكفينا شرهم.
    كسرة:
    أمك سعيد… إنبرش … خاف … كبّ الجرسلين… آيييي الخاف سلم.

  10. نيام كتب:

    كنت مع واحد من حبايبنا في داره و وجدت معه عديله واخت مرتو في نفس الوكت ..و صاحبنا مولع نار في مرتو و دايس ابنص للليفة و عديلو يكسر في التلج للليفة وكلما صاحبنا يدوس ابنص عديلو يرمي تلجة ..ولمان انتهي الجاز قلت لعديلو انت مالك بتاع كسير كده ما تخليك زي صاحبي دا ..ضحك في خبث وقال لي ما تشوف صاحبك دا كده هسع بعد شوية لوري التلج حقو بجي و كمان دا تلجو اسكيمو..
    يا بشار ما تهيجنا هسع نكب الجاز و نفتش تلجنا وين..
    كسرة:
    (تأبريني بشار عم بمزح معنا )..

  11. حاج أحمد السلاوى كتب:

    أخونا مخير …
    سؤال سغيروووووونى كدة …الجملة أدناه دى معناها شنو ؟
    ” …..ولا أقلوا أنهزوا جقدي في قلبو … ”
    نحنا أصطلاحات سهيل وأخوانه ما خلصنا منها وما عرفناها … ولاّ شنو … يا جدو ؟

  12. حاج أحمد السلاوى كتب:

    الفردة .. الكاشف بشار بن البرد وبقية الكواشف الحاضرين والغايبين ..
    ماتسمع لى كلام الراجل الزلمى دة .زالشوام ديل بتوع كسير تلج أصلو ما معقول وكلامهم كلو دلع لعواطفهم ( وغير عواطفهم ) …وهم زى النحنا بنقول عليهم .. حلو لسان وقليل إحسان .. وبس ما ننسا إنو عواطفاتهم زااااتهم ما ساهلين وعندهم جنس لسان ..أجارك الله منو .. تابرنى بشار .. نيام عم بمزح معك .زأنا من زمان شو عم بالك ؟ دير بالك من نفسك خيو وبطل هالحكى .. هيك ما بصير..لا كان ..لا كان شو ؟ وأخيرا أل إيه بيسال صاحبو ..شو فى مافى ؟
    وخلونا نشوف آخرته شنو .. مع كسارين التلج ..

  13. ابكرون كتب:

    انتو سيد البوست ده اتبنوه اكيد بت الشيخ ودته في 60 داهيه….سنكل ادينا الخبر…
    سهيل : بختلف معااااك شديد ونحن (ما كسير حطب) بنفتخر ونعز بناتنا وحواياتنا …ووسامة وقيافة الشعوب نسبة وتناسب ونحن (كنصفهم الآخر)ما افضل منهن …..وهن ممكن يقولن عنك او عنا.. بنفس القدر ….(يعني يا حبيبي لو عاينت حتشوف منو ….مهند…ما سهيل….!)….الظاهر سهيلة ما بتديك العين الجمرة……تحياتي
    مخير : الحاج بتاع الحرمين الشريفين داك عرفناه (9 على مقياس ريختر) انت مااااالك كمان….خليك غضنفر ….هزبر….قسورة…ليث

  14. مُخير كتب:

    جاز شو عم نيام
    نحن بنتلج موية مودتنا في قوالب تلجك أووبس قصدت شعرك
    والمطر والبنفسج والياسمين والجرح القديم والذي منو…

    حبيبنا إبن بُرد
    الجميع يعلم بأن القصة ليست تكسير ولا جاز على طول الخط مرة كدة ومرة كدة يعني إذا اقتضت الضرورة فلا بأس بأبنص على خفيف وبعيد من عيون الناس مع رجحان كفة التكسير والإستعانة بالهائمين الذين يتبعهم الغاوون فأعذب ثلجهم أكذبه، ديل حتى في الزعل “عيناك أغرقتها قلبي بلونهما فمن لقلبي إن لم تهفو عيناك”

    لكن من جهة أخرى ألا توافقونني الرأي في أن الشوام حكيهم طاعم وقصدت تقبرني، وتكرم عينك، وعلى رأسي، ومن عيني دي قبل دي، وصحتين وعافية، وتسلم دياتك …الخ الدندرمة،
    يُخيل إلى في المجتمعات التي يسود فيها العُنف يكون التوبيخ والكربنة نوع من تسخين للحنان وكدة ؟؟ يعني التعرف على الشق الآخر من قبح الشر البشري بغية إستحسان الشق الخير !!

  15. مُخير كتب:

    العزيز أبكرون

    حبيبنا حاج أحمد… كبيرنا الذي علمنا كسير التلج المكتوب ((ولا أقلوا أنهزوا جقدي في قلبو …)) والمقصود (( أو على الأقل أغرس خنجراً في قلبه))،،، كدة أظن وقع ليك الكلام يا أبو الحجاج.

    يا دكتور أبكرون… زي ما إنت عارف.. البر شيء هين وجه طلق وكلام لين، والأقربون أولى بالمعروف …وخيركم خيركم لأهله ..الخ
    القصة ما إنبراش ولا حاجة قدم السبت تلقى من الأحد للسبت الجاي ذاتو … بعدين الزيّك وزيّنا في دار الغربة النيرانها ما بترحم، ما ممكن يجي يفش شلاليت الدُنيا في المتكوكوة بسببو، وما في أفضل من الثلج لإطفاء نيران الغربة. هاك الحكمة دي، وبعدين هزبر على منو ؟؟ إنت نسيت صورة الهزبر الرسلتها لي دي والله أبوشعر كان فيها عاصر ضلو على الحيطة زي الفار هيييع.

  16. مُخير كتب:

    سهيل وجه الحبيب
    ده كلام شنو يا وليدي ((لو عاينت حتشوف منو ؟؟؟ نانسي عجرم؟؟؟))، والله لالوبنا وعرديبنا وقنقوليسنا أحلى وألذ وأطعم من بلح اليمن وعنب الشام وبطيخ الخليج وشوكلاطة الخووايج، دي حال إستلاب ثقافي مستفحلى، وأحيلك فوراً إلى عيادة الدكتور عزت لحاجتك الماسة إلى جلسات علاج في (جلسن شوف حلاتن) ومذاكرة تقيلة لأشعار ود الرضي وود البنا وود الريح وعتيق وهسة فوراً أمشي أسمع لعاصم البنا ((طابق البوخة قام نداه يهتّف نام من الدوخة و ايدو عاقباهو جدلة مملوخة و فى معالق الجوف موسو مجلوخة يا الله )). يا ولدي أنا شفت المذكورة على الطبيعة والله يلعن أبو الميكاب على الفوتوشب، أوع تبوروا لينا بناتنا …فاهم!!!

  17. حنين كتب:

    أخوانا .
    رجعنالك .
    نحن السودانيين بنعرف نعكنن على نسوانا كيف ومامحتاجين للوصايا دى يعنى الواحد لو شاف مرتو فرحانة بى توبا الجديد يقول ليها يشبة توب التومة الدلالية ولا يقول ليها والله كنت قايلك حاجة نفيسة ست الرووب .أو لولقيتا عاجباها عدتا الجديدة تقولليها والله فى سوق كرور العدة زى دى بى سبعة الف وهن كذلك بيعرفن يعكننن علينا .
    فعلا مطلوب منك لمن تدوس أبنص ما يكون صاجة (لليفة ياعم نيام ) يكون حاجة معقولة وعليك إختيار الزمان والمكان المناسب .ونحييك يامخير ياتفتيحة …
    عمنا السلاوى إنت لى بتين يورو فيك ؟ أسى عليك الله الجقدى ما بتعرفو ؟؟؟

  18. سهيل كتب:

    يا مخير يا أخوي – ناس جلسن شوف يا حلاتن كانن ناس (كجره) و كلو طبيعي ” الحقو السلاوي يا فرد بالترجمه.. أما هسي ناس الف صنف و روز و كير و لفلي وديانا و قدر ظروك بالمعلقه.. الواحده كان دقتها مطره تبقى زي الجير( الحقصه) في الجالوص(معليش يا جدو) .. زمان كانن من سماحتن الواحده إلا يشلخوها عشان تتشوه و تكف العين(مهارات فرديه في التفسير)..

    و جاييكم

  19. سهيل كتب:

    باين عليها حتكون ورديه كاربه . ما عندكم مشكله ..أحرس ليكم الحوش لغايه ما تجو .. و أهو كلو عمل خير..

  20. سهيل كتب:

    خلي بالك العواطفات أمسكن بزمام أموركم و قفشنكم تتلاعبون بالكيبورد و زجرنكم..

    ياخواننا – عمك سيد البوست قاطع الخبر مالو؟ تاني يا عمك إلا تمشي تخش net cafe عشان الرقابه و كده..

    ما أجمل الحريه (ابكرون) عارف الحاصل .. خليك فرده اصلي و اعمل نايم

  21. سهيل كتب:

    طيب أنا أعمل شنوووووووووووووووو … ايواااااا اسمع لي نفسي جدول تلاته

  22. بشار أحمد بشار (إبن برد) كتب:

    معذرة يا حبايب أشكركم على المرور الظريف خاسةً مخير/نيام/أبكرون/سهيل/ح.السلاوي/بكري/حنين/سانتو. أنا مشيت السوق واشتريت للإطفال كمية مهولة من التسالي ولب القرع والترمس والفول السوداني أبو قشر و5 ربط قصب سكر وعصائر وأيسكريمات ذات الألوان القوية (التي لا تنفع معها منظفات عندما تنسكب على السجاجيد وكراسي الجلوس) وألوان شمع للرسم بدون كراريس رسم للأطفال من سن 3 سنوات فما دون شريطة أن يتم توزيع هذه الأشياء يومياً على مدار الإسبوع. وعندما دخلت البيت وأنا أحمل هذا ال chunk food قابلتني عواطفي بإبتسامة دافئة عريضة وهي تدعو لي دون أن تتذمر : هي يايابا إنت تتبارك وما تتشارك وربنا يخدر ضراعك ويعدل ختوتك شقيش ما تقبل . وباءت كل محاولاتي في الكربنة بالفشل و أخيرًا….. أخيراً اكتشفت أنه لا مجال من كربنة الحرم المصون لأنها ماخدة حقوقها بالكامل وزيادة. هيها هيها هيها هيها هيها .

  23. سهيل كتب:

    أسد علي و في الحروب نعامة **** فجخاء تجفل من صفير الصافر

    يا عمك قلت لي الصفاره بتاعت طابور قلق و لا جمعون عادي

  24. ابكرون كتب:

    بشار والعيال رسمو في الحيط (شخبط شخابيط)…وبرضو ما اتكربنت…..؟؟؟؟؟ طيب جيب (ودنك) من بكره شغل ليك (حبوشتيه) تكون بتشبه سمارهيت ولا شنو ما عارف ….بتاعة د.كوباني ….وكان ما شالت شنطتها وقالت ليك يا انا يا هي في البيت ما ابقي شيخ ابكرون….!

  25. سهيل كتب:

    يا شيخ ابكرون الكلام دا أعوج.. الكلام دا تقولو لي أنا .. لي افليقا او استرايكر لكن عمك دا عاوز تخليهو يركب الصينيه من هسي ولا شنو..

    بعدين اوعك من الرأسماليه و اللعب بالقوى الكادحه زي ما قال ضو القبيله اخونا ودالخلا في مقاله الفساد السياسي

  26. ابكرون كتب:

    سهيل : والله قهقهته بي شدييييد …قلته لي امهاتنا كانن بشخبتوهم عشان يشنوهن ويكفوا العين (بولغته )….وتيب ابهاتنا لزوم الشخبته ليهم شنو؟؟..إيشي مطارق وإيشي سلم بعتبه وعتبتين…وايشي سنجكوني 3 خطوط متوازية عرضية وشي درب ديك ……..عندنا خالنا مشي عمل ليهم ( إريس )…في مصر

  27. سهيل كتب:

    الرحال يا عمك شلخوهم عشان ما تكون شينه .. المره إتشلخت عاد كيفن نحن ما نتشلخ ( نظام رجاله و كده)..

    و بعدين عشان ما يجي درب الديك يلم في ام طرقآ عراض و حتى لا يختلط الحابل بالنابل في مسألة تحديد القبائل … والله اعلم

  28. حاج أحمد السلاوى كتب:

    أولادنا العُزاز… جداً سهيل وحنين ..
    يطرشنى ما سمعت بالجقدى البتقولوا دة ..إنتو قاعدين تتكلموا عربى صحى صحى؟ نحنا العربى زااااتو نسيناهو فى بلاد الغربة دى ..وإن شاء الله حنطلع من هنا لا بنعرف عربى ولا إنقليزى .. وقولوا يا لطيف ..
    أخونا الكاشف بشار .. تانى قمنا على كسير التلج ؟

  29. د.ياسين شمباتى كتب:

    العم بشار..عودة قوية وخليت المستخبى يبان !!!

    دخل عمرو بن العاص على معاوية ابن ابى سفيان وبين يديه ابنته عائشة,,فقال : من هذه يا امير المؤمنين؟؟ قال : هذه تفاحة القلب,,فقال عمرو : انبذها عنك يا امير المؤمنين,فوالله انهن ليلدن الاعداء ويقربن البغضاء و يورثن الضغائن!!! فرد عليه معاوية الحكيم : لا تقل ذاك يا عمرو,,فوالله ما مرض المرضى ولا ندب الموتى ولا اعان على الاحزان مثلهن..و رب ابن اخت نفع خاله..

    والله سيدنا معاوية ما قصر تب!!!ووضع النقط فوق الحروف,, وسيدنا عمرو كان قال كلامو دا اسه الا يحفر ليهو خندق وينضارى فيهو..

    حاشاهن من العكننة…………..

  30. ودالفتيحاب كتب:

    الاخوة مساكم الله بالخير
    المتألق بشار ابن برد
    ياسين داير يكبرك ساكت وعطلك بى ياعم دى
    اولا العمل هو الذى أخرنا عليكم لكن ماشاالله وعينى عليهم بارده حضور مشرف..تكبير..هيا لله هى لله
    ابكرون اداها نقطتين عسل والناس رمت ورقه والله يستر

  31. ودالزبير كتب:

    شباب

    غايتو البوست ده عندي فيهو كلمتين

    الأول يا مخير الفكي أبكرون ده ما دكتور زمان قلنا ليك الكلام ده …….

    هو النقول تاني نعيده

    الشي التاني يا أبكرون بالله ما عندك عنوان ولا تلفون لسمهاريت بتاعت الكوباني قالوا قاعده معاكم بهناك

    ما تفهمني غلط عندي إستشاره حول كيفيه تجهيز القهوه الحبشيه عشان شغل المطكعم وكده

  32. ابكرون كتب:

    ود الزبير:يبدو د.عمار لسه عنده تاثير…..
    عارف انت سيدي بيه ده خربك (واجد)…..مره (الكديس) فالانتين…ومره ورووود حمرااا وتوزيع ابتسامات…..واسه كمان سمهاريت…..ياربي قهوتا طااااعمه زي غناها……(شوف حتودينا في ستين…اسه د.صالح والملا ود الخلا (قلته لي طالباني) يقولوا ابكرون ده ختييييير)…..غايتو اعمل حسابك عندنا عصفوره…بتطير فرررررررررررررررر في صالة الطعام الرئيسيه في سيدي بيه وتدينا الاخبار …..وتسجل الكبكبات علي مقياس الجاتوهات….

  33. سهيل كتب:

    دي مكنتك يا ود الزبير .. و ابكرون الأصلي لابس نضارات شمش

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s