كونفوشيوس سودانى !

Posted: الأحد,15 فبراير, 2009 by الفاتح جبرا in ساخر سبيل

قبل أكثر من 2500 عام استدعى الفيلسوف الصيني العظيم (كونفوشيوس) أحد تلامذته الذى قضى معه سنين طويلة ينهل من علمة ليعرف ما إذا كان هذا التلميذ قد إستفاد من حكمته أم لا ولما وقف التلميذ بين يديه قام بسؤاله :

– قل لي ماذا تفعل إن ضربك أحدهم أشكره

– لماذا؟

 – لأنه لم يضربني بعصا

– وإن ضربك بعصا ؟

 – أشكره … لأنه لم يضربني بالسيف

 – و إن ضربك بالسيف؟

– أشكره لأنه لم يقتلني

 و هنا أدرك الحكيم أن الشاب قد تعلم ..

 لا أعتقد أننا كشعب نعرف كونفوشيوس جيدا (هو أنحنا فاضين) ، لكن يبدو أننا لحكمة يعلمها الله نسير على ذات النهج (الكونفوشيوسى) لدرجه أننى بدأت اشك فى أن لهذا (الكونفوشيوس) جذور (سودانية) فكل الاشياء عندنا (جميلة) وعال العال لأنو من الممكن أن يحدث أسوأ منها !! وفى رأيئ المتواضع أن هذه (الثقافة السلوكية) لها (القدح المعلى) فى تسجيلنا كأمة لأدنى معدلات النهضة والرقى وذلك لتعامينا عن قصد عما يحدث لنا واضعين (حيزاً معتبراً) لفعل (أسوأ) – لم يحدث- واهمين أنفسنا بأنه كان من الممكن أن يحدث!! ومن هنا جاءت تلك الأمثال والأقوال (المهببه) التى قامت بتأطير هذه المسألة (الجاتك فى مالك سامحتك) و (قدر اخف من قدر) والحاجات (الزى دى) !!

 (1)

– بالله بس معقول (البنزين ) ده يكون غالى كده ونحنا بنصدرو؟

 – ياخى أحمد الله إنو هو متوفر وموجود !!

 (2)

 – عليك الله دى طريقه ؟ الماهية تخلص من يوم خمسة فى الشهر؟

– مش كويس الما بتقطع من يوم 2 فى الشهر !!

(3)

– معقولة بس تتغلبوا 2/صفر ؟ – مش كويس ما أدونا (دستة) !!

(4)

 – ما مشيت لى (عباس) قالوا وقع كسر إيدو وراسو (إتظلط) !

– جات سليمة الحمدلله الما كسر (حوضو) وإلا (مخروقتو) !

 (5)

– أها والحرامى سرق منكم شنو يا عيشة؟

– والله ما خلى لينا حاجه .. لقط الملايات والمفارش والتياب وهدوم الأولاد والرسيفر والتلفزيون !

– والدهب نعل ما شالو؟

– بس فضلت ليا الغويشه اللالساها فى إيدى دى !

– أحمدى الله الما شالا كمان !

 (6)

– والحفلات عندكم بتنتهى الساعه كم؟

– والله محددنها لينا تنتهى الساعه (حداشر) !

– جميل والله كان ممكن يقولو ليكم الساعه (تسعة) !

(7)

– والورم الفى بطنو ده طلع من شنو؟

– تتخيل اتضح إنو الدكتور نسى ليهو (شاش) فى بطنو !

 – ياخى جات سليمة كان ممكن ينسى الموبايل بتاعو !

 (8)

– وإن شاء الله تكون يا (عمران) عرستا ؟

 – والله لسه يا حمزة

 – يا زول أحسن ليكا هسه تجيب ليكا مرا (تسل) روحك !!

(9)

 – تتصور إنو فى شركات حكومية رايحة وما لاقينها وما عارفين ليها عنوان؟

– يا خى مش برضو كويس إنو فى شركات لقوها وعارفين العناوين بتاعتا !

(10)

– الوالد إن شاء الله خرجتوهو من المستشفى؟

– تعيش إنتا الوالد إتوفى أول أمبارح !

 – والله أحسن ليهو من الحياة (النكد) دى !!

 كسرة : وأنا أكتب هذا المقال على (اللابتوب) نسبة لإنقطاع الكهرباء من (الصباح) إذا بالكهرباء (تجى) فتهتف حرمنا المصون :

– الحمدلله الكهرباء جات والله كان ممكن لحدت بكرة ما يجيبوها !!

 

Advertisements
تعليقات
  1. ودالفتيحاب كتب:

    البروف صبحك الله بالخير
    الحمد لله الكتبت لينا علشان نقرأ ومعلق ,مش كان ممكن اليوم مانلقى حاجه برضو اخير..
    نحن الشعب المتسامح الزاهد علشان كده ناس تأمين السيارات مرتاحين وفلوسهم عندهم !
    مجرد الحادث يقع اتلمو فيك بسيطه الولدالحمدلله سليم.
    وديل نحن..

  2. ابكرون كتب:

    البروف صباحاتكم قشطه :
    ده يا دوك اسمه اليأس والهلع والتوجس من المخبي (والمخفي) وده التغييير الاحدثوه ناس (الثورة) …قال انقاذ قال…..
    عارف قصة الكهرباء دي انه ال 1250 ميقاوات الجايه دي من كمية الاسمنت الإتردم في مجري النيل وكمية المليارات الدولارية الصرفت …..تحير ولسانا بقول يا سلام اهي اضافه مش كانت بتقطع ……
    بقول الكلام ده لان محطة (صغيره) بالدوحة لا يتعدي حجمها حجم المنطقه التي تشغللها مساحة مول عفرا ….تنتج 6000 ميقاوات من ماء البحر بجانب ملايين المياه العذبه …عند افتتاحها حضر وزير الطاقه فقط وشوية ناس وما شفنا رحلات تنظم لزيارتها تكلف الدوله ما تكلف…..عجبي

  3. ودالفتيحاب كتب:

    أبكرون صباحاتك بيض
    معليش الليله اخذتك نومه ولا شنو ؟ لكن برضك مبكر ..
    تحياتى لكم..

  4. التلب كتب:

    سلام للكل
    {نفى مدير وحدة السدود الوزير اسامة عبدالله ان اسعار الكهرباء ستزيد بعد دخول كهرباء سد مروي، وقال ان هذا الكلام غير موضوعي، فالكهرباء المائية ارخص انواع الكهرباء وليس ارخص منها إلا الكهرباء النووية}
    و الله نعمة كبيرة إنو أسعار الكهرباء ما حتزيد بعد دخول كهرباء سد مروي. مش كان ممكن تزيد!!!!
    بعدين يا أستاذ الفاتح الحاجة المحيراني إنو الراجل ده وظيفته مدير وحدة السدود يعنى مسوؤل من إنشاء السدود و إدارتها، طيب علاقتو شنو بزيادة أو نقصان أسعار الكهرباء!!! طبعا ده فهمى و فهم أي طبال أو حائك!! ولا نحنا ما مفروض نتكلم عن حكاية الوصف الوظيفي للسادة المسوؤلين و الذي يحدد المهام الخاصة بكل واحد منهم.
    معليش يا أخوانا شكلي طلعت من الموضوع

  5. ألفاتح جبرا كتب:

    الحبيب أبكرون

    قبل فترة كده لقيت ليك باصين سياحيات (كبااار) واقفات جنبنا فى (بيت المال) وزول قاعد يكورك يقول (سد مروى … سد مروى) أنا فى الاول قلت يا ربى (الإستاد جابوهو هنا) تانى عرفت إنو الباصات دى للعاوز يمشى يزور (سد مروى) !
    مع الغداء والفطور الكارب !

    تأمل !!

  6. ألفاتح جبرا كتب:

    التلب

    قلت ليا غهم أى طبال أو (ترزى) !! هو أنحنا بقينا فاهمين حاجة ؟

  7. ألفاتح جبرا كتب:

    التلب

    قلت ليا فهم أى طبال أو (ترزى) !! هو أنحنا بقينا فاهمين حاجة ؟

  8. ألفاتح جبرا كتب:

    ود الفتيحاب

    أبكرون ده طوااالى (البرنجى) يمكن عشان إختلاف التوقيت !!

  9. حاج أحمد السلاوى كتب:

    البروف الفاتح …وكل الحبان داخل وخارج السودان..
    حتى فى الغنا حقنا الفنان يقول ليك .. غيب وتعال تلقانا نحنا يانا نحنا … لا غيرتنا ظروف ولا هزتنا محنة ..
    ويا هو دة السودان..والشعب الطيب الغنماية تاكل عشاهو ..وبصراحة كدة نحنا لو ما طبقنا سياسة الثواب والعقاب حنظل هيك وما حينصلح حالنا ( بلهجة أخواننا الشوام .. يا بشار ) إلى يوم القيامة ..لأن المثل بيقول من أمن العقوبة أساء الأدب ( وإساءة الأدب تشمل أى حاجة خارجة عن حدود القانون ) … نحن لا ننكر إنو عندنا حاجات إيجابية وكويسة لكن الحاجات السالبة بقت أكتر وزادت عن حدها وكووووولكم عارفنها … والناس على دين ملوكهم وكيفما تكونون يولّ عليكم… لكن أرجع وأردد برضو زى الجماعة ما بيقولوا…مش أحسن من ما يجى يحكمنا ………..وتموها براااااااكم .
    والعارف آخرته شنو يقول لينا ..ومنكم نستفيد !!
    أخونا ودالفتيحاب .. ماشاء الله عليك شياب ونشاط .. عينى باااااردة..وما تنسانا من صالح الدعاء بعد صلاة الفجر .

  10. ابكرون كتب:

    (طبعن) يا بروف الباص ده بتملي ما دام فيها فطور وغدا والمحطه التانيه وقفه في المهداوي وشقلبان والقصه دي عندها بند مفتوح ملايين ودعاية انتخابية للمؤتمر……وناااس عايشه من وراء البند الماسوره الكابه دي…
    محطة الكهرباء القلته ليك عنها ام 6000 ميقاوات دي ما سمعنا بيها الا يوم الافتتاح وخبر عاااادي في مربع عاااادي وفي الصفحة الاقتصادية……

  11. حنين كتب:

    البرووف والسادة السمار .
    صباحاتكم خير وسرور .
    (طبعن ) دى قاعدة المساكين إنو ينتظرو البيتعمل فيهم شنو ويقولو الحمد لله الماحصل لينا أكتر من كدة .
    ياأخ التلب ممكن يطلع لينا وزير الطاقة ولا المالية ويعلن عن زيادة سعر الكهرباء وهو ما ملزم بى كلام مدير السدود والذى غير مختص بسعر الكهرباء وبعد الافتتاح يجى الرئيس ليعلن عن خفض قيمة الكهرباء ب 250 وبعد الافتتاح نلقاها نقصت 250 قرش بالقديم زى حكاية البنزين بعد إفتتاح مصفى الجيلى وبعد شهرين يزيدولينا القيمة المضافة والتى تظهر فى زيادة الكيلوواط ساعة 50% وبرضو الحمد لله الماكانت الزيادة 100%.
    اللهم لا نسألك رد القضاء ولكن نسألك اللطف فية .

  12. ودالزبير كتب:

    الأستاذ الفاتح والرهط الكريم

    غايتو كلام بره الموضوع واليحصل يحصل ……………………… إتضح أن الفريق الرواندي الراح يلعب الليله مع المريخ من منطقه ذات كثافه سكانيه للمسلمين ومن هذا المنطلق نعلن وقوفنا معه نصره للوحده الإسلاميه وكيه كده في جمال الوالي الدفع دم قلبنا في التسجيلات ………

    يأخي قال ليك الحمد لله السجلوا ,ارغو بخمس مليون دولار مش كان ممكن يسجلوا كاكا بخمسين مليون دولار

  13. aflaiga كتب:

    البروف : الحمد لله الكتبت زى ما قالو ليك مش اخير مما ما تكتب !!
    حكى لى صديقى س ان الانقاذ قبل ان تستلم السلطه جابت خبراء علم النفس العارفين نفسيتنا كويس وقامو ختو ليهم خطه ما تخرش الميه واهو نحنا على درب الخطه سايرين ..
    لكن صديقى س قد اكد لى ان الحل لمشكلة السودان تكمن فى البحث عن الدكاتره ديل واستخلاص الدراسه الاولى بتاعة نفسيتنا والدراسه التانيه بتاعة ( نفسيتم هم ) !!!

  14. nono كتب:

    معقول ياجبرا انتي مافاااااهم حاجة !!!!!!

    وانا ماعايزة افهم حاااااااجة؟؟؟؟؟؟؟

  15. زووووووول كتب:

    دى ثقافة قدر اخف من قدر وما لا يدرك كله لا يترك جله ولا ايه كدا ما عارف
    – والحفلات عندكم بتنتهى الساعه كم؟

    – والله محددنها لينا تنتهى الساعه (حداشر) !
    ((جميل والله كان ممكن يقولوا ليكم تشتغل للصباح ))
    ود الزبير :
    انت الجماعه ديل اسلموا الليله ولا شنو
    كسره لود الزبير :
    واقوان المريخ جابا منو والله واحد جابو وارغو والتانى جابو السعودى .
    الحمد لله ال ما جابو كلتشى وطمبل

  16. مُخير كتب:

    البروف جبرا
    الحبان في كل مكان سلام
    قال لي س صديق صديقنا أفليقا أن الشغلانة حلها بسيط يا بني السودان، أقلبوا الشغلانة أو الأصح إستعدلوها، يعني بدل كان ممكن يكون أسوأ، كدي النجرب منطق ممكن يكون أفضل، وبدل المفروض والمحتمل نفكرية بعقلية يجب أن نفعل كذا والمسئول واجبو يسوي كدا، وما يقول لا لا ما بقدر .. لو بقدر يقوم يشتت المتسوعل ليها شنو ؟.
    أبكرون: قلت ليه المحطة البتنتج 6000 ميقاوات من ماء البحر دي في البلد الذي يحتل المرتبة الثالثة عالمياًُ في إنتاج الغاز الطبيعي والكم كدا ما عارف من النفط، أهة ده الفرق وعشان كدة طالعين لا فوق، ونحن غاطسين لا تحت، الله يغطس حجر الغطس حجرنا.

  17. البشاوى كتب:

    البروف
    تمام التمام لى سعادتك
    التلب
    موضوع اخونا مدير السدود دة معقد شوية تعرف انو حارن وواقف الف احمر انو
    ناس الادارة العامة للكهرباء الا يشترو منو كهرباء السد ويدفعوا مقدم كمان
    (شوف تداخل الاختصاصات دة زى شنو؟ ) والغرض من كلام مدير السدود انو
    محتاج للقروش دى عشان عندو كمين سد تانى عاوز يقلب سريع وينتهى
    منهم والحجة ضاربة لمن وصلت للناس الكبار والحصل شنو ماعارف
    هو نحنا مانفول الحمد لله انو بنبنى سدود مش كان ممكن مانبنى ؟

  18. عباس ركس كتب:

    سلامات يا أمم :
    للكاتب الكبير حنة مينة – على ما أظن – قصة قصيرة بنفس المعنى , بطلها اسمه ابي سعيد المتشائل ( المتشائم + المتفائل ) . . . . . يعني بشوية سودنة يصبح محمد أحمد المتشائل :
    * شفت بلاي الاسرائيليين المعفنين ديل ضربو غزة دي كيف ؟؟
    = يا زول الحمد لله الما ضربو الضفة !!!
    * شفت بلاي اوكامبو المعفن دا . . . . . .
    = الحمد لله الما . . . .
    بلاي دا اسمو كلام دا !!

  19. د.ياسين شمباتى كتب:

    زوووووول..مبارك التأهل,,لكن حلوة حكاية الجماعة الاسلمو الليلة ديل..موعدنا يوم 27 كان ربنا احيانا للزمن داك..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s