لذوى القلوب الرحيمة

Posted: الأربعاء,18 فبراير, 2009 by الفاتح جبرا in اخرى

لى قناعة تامة بأن حالنا لن ينصلح البتة إلا إذا أصبح كل شخص او جهه مسئولة مسئولية كاملة وتامة عن نتيجه أخطائها وتتم محاسبتها (قانونا) على هذه الأخطاء .. فنحن حتى هذه اللحظة لا يمكننا – كمثال- أن (نشكو) مؤسسة الكهرباء ونتحصل على (تعويض) لو أن الكهرباء (العيار بتاعا) زاد شوية وقام بحرق (التلاجة) ، كما أننا لا نستطيع شكوى (شركة التلفونات ) أو (المياه) والمطالبة بتعويض مجز لو أن أحدنا

وقع فى إحدى هذه الحفر المظلمة التى قامت بحفرها وكسر (حوضو) أو (شق مخروقتو) !!

صديقى (س) قام بعد طلوع الروح بشراء عربه يذهب بها إلى (المكتب) كيما يستريح من مسألة البشتنة وركوب (الحافلات) وليذهب بها لأداء المناسبات الإجتماعية التى لا تنتهى وقد أولى صديقى (س) عربته الجديدة كل الإهتمام اللازم حتى لا تظل بحالة جيدة ولا (تتطرقع) أو يصيبها أي مكروه غير أن الاشياء ذهبت إلى غير ما يريد ويتمنى فبينما كان يسير صديقى (س) يقود عربته في إحد الشوارع الرئيسه إذا بحفرة عميقة تظهر له (فجأتن) دون أي لافتة تحذير فقام بمحاولة تفاديها منعطفاً بكل ما أوتى من قوة لتحتضن العربة أحد أعمدة (الإعلانات) الكتيره ومسيخة وتتهشم تماماً ! حزن صديقى (س) على عربتة حزناً شديداً لكنه حمدالله على أنه قد قام بعملية تأمينها فإتصل بشركة التأمين التي حضر مندوبها والذى بعد أن قام بمعاينة (الحادث) وقام بفحص (كل شئ) قام بسؤال صديقى (س) قائلاً :

 – والحادث ده حصل ليك كيف؟

 – والله كلو من الحفره الفى نص الشارع الشايفا ديك !!

– (مندهشاً) : الحفرة؟ يعنى ما تصادم مع عربية؟

 – لا .. السبب كلو هى الحفرة دى – معليش كان كده ما ح نقدر نصرف ليك قروش تعويض عشان شروط البوليصة بتاعتك معانا بتقول إنو التعويض ده بيكون لما إنت تعمل حادث مع عربية مش مع (عمود) إعلانات !!

 – هسه أعمل شنو يعنى؟

 – تمشى لى ناس (الموية) العملو الحفرة دى وما ردموها وما ختو فيها أى علامة تحذير عشان يعوضوك ! 

 ذهب صديقى (س) إلى مقر (شركة الموية) وقام بشرح الأمر لأحد الموظفين الذي قال له متسائلاً :

 – المطلوب مننا شنو هسه يعنى؟

– أنكم تصلحو ليا عربيتى مش إنتو السبب؟

ما أن قالها صديقى (س) حتى أنخرط الموظف فى نوبة ضحك قام بعدها بمخاطبة صديقى (س) قائلاً :

 – أنت بتبالغ؟ عربيت شنو البنصلحا ليك ؟ الشوارع دى ما مسئوليتنا دى مسئولية (الشئون الهندسية) !! مفروض هم اليراجعو الحفر الفى الشوارع دى ! ذهب صديقى (س) إلى مبانى (الشئون الهندسية) بالمحلية وقام بمقابلة الشخص المسئول :

 – عندك تقرير من ناس (المرور) !

– أيواا أهو ده

-(ينظر المسئول إلى التقرير برهة ثم يخاطب (س) : – التقرير ده بيقول إنك صدمت (عمود أعلانات) يعنى ما (وقعت) فى الحفرة !

– أنا ما وقعت فى الحفرة بس هى (لاوزت ليا) !

 – التقرير كمان بقول أنو (عمود الإعلانات) إتكسر ووقع من الصدمة

 – وكمان عربيتى  ما  ذاااتا إتكسرت

– شوف يا أستاذ إتكسرت ما إتكسرت ده شئ ما بخصنا إنت لازم تدفع 500 ألف تمن العمود الكسرتو ده !!

 – وإنتو مالكم ومال العمود !

 – كيفن مالنا ومال العمود إنتا ما عارف إنو شركة (تعلنون) الكسرتا عمودا دى حقت (المحلية) !!

 كسرة : صديقى (س) يناشد ذوى القلوب الرحيمة التبرع له بقيمة واحد عمود (إعلانات) بعد أن نسى تماماً موضوع (الحفرة) وعربيتو اللحقت الصح !!

Advertisements
تعليقات
  1. ابكرون كتب:

    جبرا : مش العامود لازم يرجع باعلاناته انا متبرع ليه بعدد 3 اعلانات بلصقهم ليه فور تركيبه العامود الجديد…تخفيفا للاعباء يعني…

  2. البشاوى كتب:

    البروف
    الله يخليك
    هو ذاتو (س) دة البيوديهو يسأل شنو ياخى يخلى العربية مرمية بدون تصليح
    ويمشى يشترى واحدة كرت بالاقساط عشان يجرب يقع بيها فى حفرة ناس المحلية والشئون الهندسية ويشوف التعويض كيف
    أكيد حيدفعوهو غرامة لانو بوٌظ الحفرة

  3. د.ياسين شمباتى كتب:

    البروف..مساك سعيد..والله تأخيرك دا قرب يخلينا نعمل نداء لذوى القلوب الرحيمة عشان تلحقنا بالبرشام بتاع الاربعاء!!!

    ياهو دا السودان..و صديقك المسكين كان مشى المحكمة الدستورية ذاتها ما فى زول بهببو ليهو,,دا كان ما لبسوهو جناية التعدى على الممتلكات العامة وتخريب المظهر الحضارى للدولة…

    ابكرون..الليلة جاى البرنجى وسابق ود الفتيحاب..عفيت منك..

  4. طارق أب أحمد كتب:

    البروف و الأحباب مساء الخير
    صديقى ص وقع فى حفره عمقها سته أمتار وبها صبه خرسانيه تخرج منها أسياخ 8 لينيا فى طريق القضارف القلابات الحفره عباره عن قطع الشارع بالعرض لتشيييد كوبرى لمرور المياه فى منطقة بير على
    معظم مستعملى الطريق من سائقى التناكر الأثيوبيين لايهتمون بمراعاة الذوق و إستعمال الأنوار القصيره
    صديقى ص نجا بأعجوبه وكتبت له السلامه لأن العربه لم تسفط على السيخ
    بعد أسبوع من الحادث نشرت الصحف خبر وفاة مهندس الطرق فى الولايه عندما سقطت سيارته فى كوبرى تحت التشييد بمنطقة بير على على شارع القلابات
    عليه الرحمه

  5. بشار أحمد بشار (إبن برد) كتب:

    البروف والحبايب سلامات :
    غايتو يا بروف صديقك (س) ده لو دخلوهو (التشرز) بلغة الراندوك والكلمة يقصد بها ال charge وتعني الحراسة أو التمنة، أنا مني (عمود) الغدا لو ما سفسفوهو (الأصاكر) .

  6. طارق أب أحمد كتب:

    ثم ثانين العمدان الضخمه دى وزنها لا يقل عن عدة أطنان تقول مثبته بى حلاوه لكوم تلقاها موقعه مع أول كتاحه

    أول ما بدا الأعلان بى اليونبول ده كان بتلقى أسم الشركه المعلنه تحت الأعلان و بعد تكرار الحوادث الجماعه سحبوا الأسم

  7. طارق أب أحمد كتب:

    و صديقى نون دقش عمود الهاى تنشن ولحسن الحظ العمود لم يسقط ولكن حصل ليهو شق فقط
    لكى يخرج من التمنه كان لزاما ( علينا ) أن ندفع كفاله خمسه مليون و ستمائة الف جٌق (جنيه قديم) ستمايت ألف قيمة العامود و خمسه امليون قيمة فاقد الكهرباء على الأداره نتيجة قطع التيار عن غرب أمدرمان

  8. طارق أب أحمد كتب:

    حول نفس الموضوع تقريبا كتب أبو الجعافر مقالا حول غباء القضاء الأمريكى فى مسائل التعويض ومنها مثلا
    إلزام صاحب مطعم بدفع تعويض كم مليون لفتاه إتزلقت فى المطعم الطريف إنها أتزلقت نتيجه لمويه كشحتها فى وش البوى فرند
    ايضا الحرامى الذى سطا على منزل أصحابو مسافرين و لم يتمكن من الخروج لأن الأبواب مؤمنه شديد وعاش الحرامى على الزاد الموجود فى الثلاجه حتى حضور أصحاب الدار بعد أسبوع ومن ثم قاضاهم وكسب تعويض كمين مليون لأنو أصحاب المنزل ما عاملين مخرج طوارئ

    لو فى واحد يقدر ينزل اللينك الموضوع طريف

  9. الأخ الفاتح وكل الحبام الكرام .. مسّاكم الله بالخير..
    أول حاجة لمن جات الساعة خمسة وما شفنا بوست الأربعاء ولا حاجة قِنعنا وقفلنا الدكانة وسلمنا أمرنا لله..
    الحاجة التانية… سؤال سغيرووووونى كدة.. صديقك (س) دة هو نفسو صاحب الدينمو أفليقا ..ولاّ تشابه أسماء بس ؟..كويس الما بقى (ح ك)… عرفتوهو ؟؟؟
    وبعدين شقى الحال (س) دة الموديهو بالشوارع الرئيسة شنو المليانة حفر دى .. كان واجب عليهو يمشى بالشوارع الفرعية لأنها مافيها حفر ولا بتوصلها خدمات.. حسه دّخل نفسو فى مطب لا يعلم بيهو إلا الله..غايتو الحمد لله الجات فى عمود الإعلانات وما جات فى عمود النص..
    طبعن عشان تاخد حقك من ناس المحليات أو السلطات الرسمية دى مسالة من عاشر المستحيلات..لكن أخوكم الفقير إليه تعالى حصل وأخدت حقى من وزارة المالية (ممثلة فى مجمع المغتربين )بعد ما دفعونى مبلغ إضافى بالغلط خلال حضورى فى إحدى العطلات.. وبقدرة قادر رجعوا لى المبلغ واغرب حاجة بدون فيتامين واو ..حصلت كيف ؟ أنا زااااتى لحد حسه ما عارف..لكن أنا برجعها الى بركة دعاء الوالدين والله أعلم ..
    سؤال إضافى … الموقع الجديد أخباره شنو ؟
    والى لقاااااااااءءءءءءء. ( مع الإعتذار لبنتنا الغبشة ).

  10. محنك كتب:

    البروف جبرا
    متعك الله بالصحة والعافية

    هل تصدق انو قانون معمول به فى السودان يوقفوا زول بقرار شفهى

    حصلت مره مع ناس المغتربين برضو ولولا ان اجازتى وحجزى ضايقونى كنت اشتكيتوا ونزلت محامى وكسبت القضية فى التخشيبة ( التمنة سابقا )
    الموضوع انو نسيت حاجة اسمها بطاقة المغتربين ( عندو جواز من الدولة ولازموا بطاقى ) وهى ليست شخصية وايضا تجدد ومدتها سنتين
    قلت للموظوة بتاريخ كذا قبل ستة اشهر استخرجتها وجاى لظروف قاهرة ونسيتها قالت لى نعمل ليك بدل فاقد روح الاستاذ س
    الاستاذ س قال لى نعم فى قانون بدل فاقد لكن ( مولانا ع ) موقفه مشيت مكتب مولانا ( ع ) قالوا مشى عزاء … اثناء العمل .. مشيت مدير العمليات .. حولنى لمدير الشئون المالية ( ع ) قال للسكرتير دا يجينى ليه … توكلت على الحى ودفعت المعلوم بطاقة جديدة لكن الى الآن اذا تذكرت الواقعة ادعو عليه وعلى كل المدراء الذين لبدو فى المكيفات وضيعوا الحقوق .

    صاحبك س يبحث عن قانون وانا القانون معاى جاهز ما لقيت حق

  11. ألفاتح جبرا كتب:

    الأحباء الأعزاء
    التحايا والود

    معليش امس إتأخرت عليكم شوية عشان (النت) كان قاطع ليهو مسافة والحمدلله رجع امبارح العصر … الحاجات كووولها بقت تقطع ما عارف الحاصل شنو… الله يكون فى العون غايتو!

  12. مُخير كتب:

    البروف أبو ناجي سلام
    الحلوين صباح اللوز
    جات سليمة يا أستاذ الفاتح نحن مع الشفقة كابسناه وقتي من موقع “الرأي العام “، ((الحاجات كووولها بقت تقطع ما عارف الحاصل شنو…؟؟)) نحن كايسين جواب لسؤال ده في مقالاتك، تجي إنت ذاتك تسعل معانا كان كدي الشكية لي بإيد قوية،

  13. ابوالمنذر كتب:

    البروف… والاعزاء
    صباح الخيرات ويكفيكم الله شر المطبات الصناعيه والطبيعيه والدايمه والعرضيه
    انتو(س) ده ياهو سرحان وله انا غلطان يكون ياهو ذاتو لانو مشى يفتش الحقوق عند المسعولين قايل انو ياهم بتاعين زمان الذين تتدرجو فى الخدمه لامن بقو مدراء مو عارف انو المدير بقى يجى كيف لاعارف قانون ولا عارف حاجه ويطلع فى القرارات الشفويه والسكرتيره تطبع (رسوم هنايات)..!!!!!!
    فى هيئة الموانى اكبر موسسه فى السودان بعد اتفاق الشرق جابو كميه من المعارضين وعملوهم مدراء ادارات على طول ولانو طبيعة العمل نوعيه عايزه خبره عينو واحد من الاحسبون قديم مستشار لكل مدير عشان يوريهو يمرر المكاتبات…
    يحكى لى صديقى برضو(س) مشى عايز تصديق لى مدرسه خاصه وبعد عمل كميه من التصديقات والتوقيعات بقى على المحليه مشى لقى رئيس المحليه قاعد فى المكتب مدالو الطلب مسكو وطلع يفتش بره المكتب وينده ويرجع وصديقى جالس لايفهم شى اخيرا جا الزول البندهولو اللهو الساعى المجاهد والرئيس مدالو الطلب نظر وصمت ثم وضع نقطه بالقلم الاحمر الذى كان يحمله ضمن اقلام اخرى فى جيبه الامامى … ثم وضع الريس التوقيع حيث استقرت نقطة الساعى الحمراء..

  14. طارق أب أحمد كتب:

    على الخميس,19 فبراير, 2009 في 11:12 ص

    نيام
    البروف و الدانقوست صباحكم نور
    الشكية لاب ايدن قوية يابروف ..مرة جبت لي جهاز ديجتال اشتريتو ب 600 دورار و عاجبني عجبة ..بحضر فيهو اول حضرة الكهرباء طق قطعت و انا قايم عليهو طق جات وفجاتن ضلم اخر طقاق واسرع طق في التاريخ انا لا مشيت الكهرباء لا مشيت الموية احتسبتو .. وبس ومن اليوم داك هاك يا حسبنة..
    الناس ديل تمشي ليهم يورمو فشفاشك تلقا الواحد قاعد في كرسي دوار و مكتب و لا بان كي مون و يدور يمين يقول ليك قلت شنو و يدور شمال يمسك التلفون مع عواطفو وش وش وش .. تاني يقبل عليك يقول ليك قلت كيف ..يعني بدل ما يفشك يعمل ليك غبينة في البنكرياس..

    عمك من شدة مرارتو مفقوعه جلا الميس

  15. nono كتب:

    وفي الدوامة

    تتبدل سمانا سواد

    يموت معنى الوطن

    في زفة الأوغاد

    يضيع نبض الوطن

    في زحمة الأحقاد

    يئن شرف الوطن

    من الشنوا ماااابعرف دااااااك

  16. aflaiga كتب:

    البروف : ومش كده وبس ..كمان ممكن يقول ليك :
    انت الوداك تتجاوز الحفره شنو ؟؟ اقع لينا فى حفرتنا اسى لو كان وقعت لينا فى حفرتنا كان الموضوع انتهى لانو نحنا بالذات اجراءات حفرنا بسيطه وساهله ..
    وممكن بكره تلقى اعلان فى التلفزيون :
    عزيزى السائق لو لاقتك فى الشارع حفرة سوداتل وحفرة المويه لا تتردد كثيرا واقع فى حفرة سوداتل مندوبينا موجودون بجوار كل حفره ومستعدون لتوصيل الحفر للمنازل !!!!
    يحكى انه فى احدى القرى البعيده كان هناك مركبه واحده فقط فى القريه وهى موتر باجاج وكان بالقريه بوليس حركه لزوم المخالفات وكده مع انو مافى غير الموتر ده فى الحله كلها وكيتا فى بتاع الحركه اخونا بتاع الموتر راجل سوااق وما بيخالف كلو كلو رخصه ترخيص تامين التزام مرورى جد جد وفى يوم دار الحوار التالى :
    بتاع الحركه : ياخى انتا اصلا ما داير ترزقنا طوالى سايق بسلامه وبدون مخالفات السبب شنو ؟؟
    اخونا : والله انا زول ملتزم خاتى الله قدامى والرسول وراى وملتزم بي التحصين واللازى منو ..
    بتاع الحركه : الله قدامك والرسول وراك ؟؟ ايوااااا يعنى ( رادف ) .. وطلع الدفتر عمل ليهو مخالفه ….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s