الحنة..الحناء..الخضاب..كلو تمام….

Posted: الخميس,19 فبراير, 2009 by ياسين شمباتى in إجتماعية

الاحباب مرحباب بعد طول غياب..الليلة عايزين نتكلم باسهاب فى موضوع مهم الى حد ما للجنسين _يعنى الليلة مافى حد احسن من حد_ والاستفادة بتعم الطرفين..

الخضاب او الحناء او الصبغ عرفتهم العرب منذ قديم الزمان,,والخضاب يعنى الحناء,فان كان بغيرها فهو صبغ..وقد اختضبت المرأة العربية منذ القدم فى يديها ورجليها وخضبت شعرها وصبغته..و ما ادل على ذلك الا قول امرؤ القيس :-

كان دماء الهاديات بنحره          عصارة حناء بشيب مرجل

وقال (صلى الله عليه وسلم): (عليكم بالحناء فانها خضاب الاسلام)..وقالت العرب :خضاب النساء الحناء وخضاب الرجال الدماء..غايتو العرب ديل بتاعين مشاكل بشكل!! وقد عاتب المصطفى عليه السلام السيدة عائشة حيث قال لها :(مالى اراك سلتاء مرهاء؟؟),,والسلتاء هى التى لا تختضب _ يعنى بالدارجى كدة مفسخة وغبشا_ اما المرهاء فهى التى لا تكتحل_يعنى بالدارجى كدة مظلطة_,,ونحن الان نستخدم هذا المصطلح للمرأة غير المشلخة..والسلتاء والمرهاء عندنا غالبا ما تكون حزينة على قريب ميت او مجاملة لنسابتها,,وهو ما يعرف بالحد_بكسر الحاء_وهذا دليل على ان الحناء من اهم ما تتزين به المرأة,ومعها الكحل,وما ذلك الا لرخصهما وتوفرهما لكل الطبقات..

والحنة هى نبات اخضر قصير القامة,,تقطع اوراقها ثم تجفف وتسحن او تسحق وتنعم ثم يتم بلها بالماء وتعجن ثم تترك لتتخمر..وهى ما يعرف بحنة الصفق!!! ثم تبلل الاماكن المراد تخضيبها بالمحلبية او السرتية,,وبعد ذلك توضع الحناء وتترك حتى يتشرب الجسم عصارتها (وتشيل),,فاذا جفت فسخت او قلعت او يتم حتها بالملعقة,,ثم يمسح مكانها زيت او نشادر لتثبيتها وزيادة سوادها,, وربما استخدم البعض الصبغة والاوكسجين لتسويدها,,وفى هذا ضرر لو تعلمون عظيم ويورد المهالك,,وكم من عروس فارقت زفافها الى كفنها بسبب الصبغة..ولربما تم تطبيقها بغرض الشيلة الاحسن والسواد!!!

وقد تحنن المرأة كفيها وقدميها وهو الخضاب او الحنة السادة,,وقد تقمع اطراف الاصابع وهو التقميع او التطريف,,وقد تنقشها نقشا وهو الرسم او الوسم..ولا ننسى تغنى الكابلى :-

نالت على يدها مالم تنله يدى       نقشا بمعصمها اوهت به جلدى

خافت على يدها من نبل مقلتها      فالبست زندها درعا من الزرد

وفى زماننا هذا صار الرسم والوسم فى اماكن غريبة بحق!!! ولكن كلما كان الرسم بسيط او كانت الحنة سادة وزيقها واطى يكون اجمل,,خصوصا اذا صاحبها مناكير!!!

قال احد شعرائنا العرب متأثرا من الفراق : رفعت للوداع كفا خضيبا    فتقبلتها بدمع خضيب…اراد انه بكى دما_ سامحه الله على عذب كذبه_

جاء فى حديث البيعة الثانية انه صلى الله عليه وسلم لما اكمل خطبته فى القوم,مدت امرأة من وراء الستار يدها لتبايعه,,فقال لها_وهو يعلم انها امرأة_ :رجل ام امرأة؟فقالت: امرأة,,فقال لها : الا فاختضبى..وهنا لطيفة للصادق المصدوق,,حيث مازحها قاصدا الا يجرحها,,حيث انه اكمل : بايعن هند _وهو حديث يستدل به على انه لم يكن يصافح النساء_

وللحناء رائحة طيبة تعطى احساسا بالنشوة والعافية,,وعندنا فى السودان_وعلى ما اظن انه البلد الوحيد_ يختضب الرجال ولكن ليس كالنساء..وتكون فى العرس,,حيث يتحنن العريس ووزيره واقاربه واصدقائه بشكل لا يتفق وحنة النساء,,حيث(تجلط) الاكف وباطن الاقدام من غير ما رسم او نقش..وهى عادة قديمة جرت ولا نحسب ان فيها تشبها بالنساء_والله اعلم_ ويوم الحناء للعريس يوم مشهود,,يدعى له الخلق,,ويعتبره اهل العريس بمثابة مراسم زواج يتم فيها تقديم الهدايا للعريس من مال واهلة دهب_واحيانا نجوم يا نيام و زووووول ود.عزت_ وربما كان فيها جوال وو….ويلبس العريس حريرة حمراء و كأنه (مدستر) و توضع الضريرة فى رأسه_ان شاءالله الما ضاق السمح يضوقو يا سهيل ومشاكل_ والمراسيم يضيق المقام بتفصيلها ولربما عاودناها مرة اخرى.

ولا ننسى عماد ومن قبله والده احمد الطيب ومن قبله اّخرون وهم يتغنون ب : يا المخضوب بنانك..وللحنة موضع استخدام اّخر الا وهو الشعر,,فهى تغذى وتكثف الشعر وتستر بياضه,,ومحبذة للرجال_حيث يكره الصبغ بالاسود_والشيب مكروه عند الاغلبية,,قال عبد الملك ابن مروان يسال العريان بن هيثم : كيف تجدك؟ قال : اجدنى وقد ابيض منى ما كنت احب ان يسود,,واشتد منى ما كنت احب ان يلين,,ولان منى ما كنت احب ان يشتد..الشاهد هنا كراهية بعض الرجال للشيب,,مع انو ما عيب,,بل وقار وهيبة_كما عند الوالد السلاوى_

وكلنا يذكر دعاية حنة كرب من مصانع تاج السر لادوات التجميل..فلنحافظ على عاداتنا الطيبة ولتتزين المرأة لزوجها وليتزين هو لها ايضا..

*منقول بتصرف من مقال للدكتور ابراهيم القرشى..

                                                                                      ونلتقى……………………………..

Advertisements
تعليقات
  1. بشار أحمد بشار (إبن برد) كتب:

    د/شمباتي : صباحاتك زاكيات كشذي العبير .سوف أعود.
    ود الفتيحاب : أنا حاجز ليك .

  2. ابكرون كتب:

    سلام يا دكتور
    الليله الظاهر عليك اشتهيتو…..ضف لمقال ابراهيم القرشي :
    ان النساء في الدول الخليجية يحبون الحناء وهي باللون الاحمر ولا تاخذ اللون الاسود بس مع كمية من النقوش …ويقوم بعمل الحنة عدد مأهول من الحنانات السودانيات…وسوقهم رائج في الخليج…
    الرجل الباكستاني وكذلك قبائل البشتون وبعض القبائل القوقازية يخضبون الارجل كعلاج والراس بالحنة الحمراء وكذلك اللحى…كنوع من الوسامة الاسلامية……
    وماتنسي يا يسن…..الجرسة والبكي بتاعة شاعر في الليله ديك بابكر الطاهر (هذه الاغنيه التي ابكت معه في زمن من الازمان ناس عزت وجبرا وناس تانين) وهو يصف الحنه في يد (حبيبته سابقا) في ليلة الوداع الاخيرة…ويصفها وهي دامعه ورعشة كفها المخضوب بالحنا وروحه تغادر مع محبوبته الي رجل آخر _جابوا القدر في سكتها- (يا حليلنا فيها الدنيا)…..
    =============

    في الليله ديك لا هان علي ارضي واسامحك
    ولا هان علي اعتب عليك….(الي ان يقول) :


    في اليله ديك
    والناس تشارك فرحتك
    حسيت باني غريب هناك
    وغريبه انتي فى دنيتك
    حسيت معاني الفرقه
    حسيت
    بالوجود ماخد سواد من حنتك
    شفته الدموع خلف الرموش
    مكبوته بي حسره وضياع
    ورعشة الكف الخضيب
    مقرونه بي نظرة وداع
    جابوا القدر في سكتك

  3. ودالفتيحاب كتب:

    وطليت ياشمباتى
    والتحية ليك ابن برد
    ابكرون مبروك عليك
    صبحكم الله بالخير جميعا

    شمباتى ياخوى الحنه خشم بيوت .فى ايدينا شفناها اريته حنت السرور ,لكن يالحنه عند اليمنيات الله لايوريك جنس خربشه وبشتنه بس توووووووور فى طين.
    لكن نحن كمان بعدها عندنا طقوس كمان بدوها دخان علشان يظبتها لتظهر بلونها الاخاز .
    الرجال فى الخليج لهم فى الحنه بس الرجال الكبار (جليط ساكت ).
    ياهو ده السودان جميل بكل شى فيه ..

  4. ودالفتيحاب كتب:

    ابكرون
    رايعة الاستاذ هاشم ميرغنى دى ماجننتنا بيها عديل كده
    لينا فيها ذكريات جميله ..
    لك جزيل شكرى.

  5. مُخير كتب:

    دكتور حاج شيخ ياسين المشتهي سلام
    الحبان سلامات
    صباح الأنوار ،،،
    ورد أيضاً أن الحناء يستخدم كعلاج … ولقد جوجلنا وخرجنا لكم بما يلي:
    قال المناوي : ( ” كان إذا اشتكى أحد رأسه ” أي وجع رأسه قال له اذهب فاحتجم فإن للحجامة أثرا بينا في شفاء بعض أنواع الصداع فلا يجعل كلام النبوة الخاص الجزئي كليا عاما ولا الكلي العام جزئيا خاصا وقس على ذلك ” وإذا اشتكى رجله ” أي وجع رجله ” قال ” له ” اذهب فاخضبها بالحناء ” لأنه بارد يابس محلل نافع من حرق النار والورم الحار وللعصب إذا ضمد به ويفعل في الجراحات فعل دم الأخوين ، فلعل المراد هنا إذا اشتكى ألم رجله من إحدى هذه العلل ، ومن خواصه العجيبة المجربة أنه إذا بدأ بصبي جدري وخضب به أسافل رجليه أمن على عينيه ) ( فيض القدير – 5 / 103 ) 0

    * عن سلمة – رضي الله عنه – قال :
    [align=center]( كان رسول الله صلى الله عليه وسلم لا يصيبه قرحة ولا شوكة إلا وضع عليها الحناء )[/align]

    [align=center]( السلسلة الصحيحة 2059 )[/align]

    قال المباركفوري : ( ” كان رسول الله صلى الله عليه وسلم لا تصيبه قرحة ولا شوكة ” أي يوجد أو يقع ، والقرحة جراحة من سيف وسكين ونحوه ، ومنه قوله تعالى : ( أن يمسسكم قرح ) – وفي رواية الترمذي ” ولا نكبة ” جراحة من حجر أو شوك ولا زائدة للتأكيد ” أن اضع عليها الحناء ” لأنه ببرودته يخفف حرارة الجراحة وألم الدم ) ( تحفة الأحوذي – باختصار وتصرف – 6 / 178 ) 0

    قال البغوي : ( روي عن أبي بكر الصديق أنه صدع ، فغلف رأسه بالحناء ) ( شرح السنة – 12 / 149 ) 0

    قال ابن القيم ومن منافع الحناء : أنه محلل نافع من حرق النار ، وفيه قوة موافقة للعصب إذا ضمد به ، وينفع إذا مضغ من قروح الفم والسلاق ( السلاق : بثر تخرج على اللسان ، وتقشر في أول الأسنان ) العارض فيه ، ويبرئ القلاع ( القلاع : بثرات تكون في جلدة الفم أو اللسان ) الحادث في أفواه الصبيان ، والضماد به ينفع من الأورام الحارة الملهبة ) ( الطب النبوي – ص 89 ) 0

  6. طارق أب أحمد كتب:

    الشمباتى
    صباحاتك بيض رغما عن سواد حنتك

    قال ليها
    لما تلاقينا على سفح حته كده
    رأيت بنان العامرية يحمر
    فقلت لها خضبت الكف بعد فراقنا
    فقالت معاذ الله ذلك ما جرى
    و لكنى حين رأيتك راحلا
    بكيت دما
    بللت به الثرى
    و مسحت بأطراف البنان محاجرى
    فصارت خضابن للأكف كما ترى

  7. زووووووول كتب:

    العريس شمباتى سلااااااااااام
    الليله مالك اخوى اتذكرت حنة العريس
    ذكر ابن القيم في فوائد الحناء : ” ومن منافع الحناء أنه محلل نافع من حرق الناء(اوعا واحد ينط ليا يقول ليا فسر لينا دى لانو علمى علمكم ) وفيه قوة موافقة للعصب إذا ضمد به ، وينفع إذا مضغ من قروح الفم ” .
    شوفت كييف !
    بعدين يا شمباتى نرجع للنساوين فى واحدات تلقى الواحده قاعده فى بيتها زى الزفت بس من ما تجى مناسبه ولا مرقه تلقاها اخر يا زينه واخر يا حناء ودى تذكرنا قصة المغترب الذى عاد الى بلده فوجد البيت ما شاء الله وتبارك الله اخر نضافه لكن ستو يا عوذو بالله (ايوا مقصوده ) وبعدين قال ليك فتش لجهه يتف فيها سفتو (لمواخذه ) فما لقى جهه انسب من ست الدار .
    كسره : الله يعرس ليكم يا ناس شمباتى وسهيل ومشاكل .

  8. حاج أحمد السلاوى كتب:

    ولدنا الدكتور الحاج يس شمباتى..وكل الحبان المحننين والما محننين ..
    أذكر وبعد زواجى من عواطفنا حضرت الى المملكة بعد الزواج وبعد شهر العسل والذى منو ورآنى أحد إخواننا السعوديين مخضوضب اليدين ( إيه رايكم فى مخضوضب دى ؟) واستنكر علىّ تلك الحنة التى كانت على يدى ..وقال لى إن الرجال لا يجب أن يتخضبوا بالحنة..طبعن ما اشتغلت بيهو أى شغلة لأنو ما ناقش حاجة ..وما عارف عاداتنا وطقوس الزواج الجميلة العندنا ..ونتمنى لكل الما ضاقوهو يضوقوه ..
    المهم والشاهد فى الأمر أن الشيب قد غطى جميع الرأس وما فى طريقة إلا تغطيته إلا بالحنة ..لكين بينى وبينك الحنة عاوزة وقت طويل وشغلته طويلة ونحنا ما عندنا ليها روح ..عشان كدة عملنا طناش يا زناتى ..وبعض الناس المتشددين يقولوا إنها حرام لصبغ الشعر مع إنو الرسول صلى الله عليه وسلم عندما رأى شعر رأس والد سيدنا أبى بكر ( ابو قحافة ) وكان شديد بياض الشعر .. فقال لهم ( فيما معنى الحديث )” غيروا هذا وجنبوه السواد.. “عشان كدة يا ابكرون تلاقى الجماعة الهنود والباكستانيين عاملين الحنة لونها احمر ( زى الزيلقون .. الحقوا سهيل .. يا شباب ).
    يعنى حسه يا ولدنا يا شمباتى لمن ألاقى عواطفنا ما خاته حنة ولا شوية كحل أقوم اقول ليها إنت الليلة مالك سلتاء ومرهاء كدة ؟.. غايتو طواااالى تقول ( سعيد ) ابو وضاح دة ما براهو .. الراجل دة جنّا ولا شنو ؟ وبقى يقول كلاماً كُتر ..
    ودالفتيحاب .. أنت أتاريك برضو مكسر فى حاجات قديييييمة ونحنا مانا عارفين .. طلع طلع المستخبى وعليك أمان الله ما حنصرح ولا بنبوح ..

  9. نيام كتب:

    البروف و الدانقوست صباحكم نور
    الشكية لاب ايدن قوية يابروف ..مرة جبت لي جهاز ديجتال اشتريتو ب 600 دورار و عاجبني عجبة ..بحضر فيهو اول حضرة الكهرباء طق قطعت و انا قايم عليهو طق جات وفجاتن ضلم اخر طقاق واسرع طق في التاريخ انا لا مشيت الكهرباء لا مشيت الموية احتسبتو .. وبس ومن اليوم داك هاك يا حسبنة..
    الناس ديل تمشي ليهم يورمو فشفاشك تلقا الواحد قاعد في كرسي دوار و مكتب و لا بان كي مون و يدور يمين يقول ليك قلت شنو و يدور شمال يمسك التلفون مع عواطفو وش وش وش .. تاني يقبل عليك يقول ليك قلت كيف ..يعني بدل ما يفشك يعمل ليك غبينة في البنكرياس..

  10. ابكرون كتب:

    نيام : يا حليلك انته (الزهايمر) برضو حصلته الاخ داااك الفي ابوظبي ..؟البوست ده بتااااع الحنه وكده……
    البوست بتاع لذوي القلوب الرحيمة في البيت الملاصقه ……..لف بي هناااك وتأكد ما بكلم زول……

  11. عباس ركس كتب:

    سلام
    نيام , بعد التحية والاحترام , دا منك ولا من قساوة الايام ؟؟؟؟؟؟؟

  12. د.ياسين شمباتى كتب:

    بشار بن برد..والله الليلة سبقت الكبار والقدرك,,لكن ابكرون لحق السوق..

    ابكرون..اضافتك مهمة لفوائد الحنة وهى تستخدم لعلاج سخانة الرجلين,,وعندنا فى السودان للجنسين على حد سواء,,وفى ناس كان اشتهوا الحنة يعملوا فيها عندهم حمى وسخانة فى الكرعين ويتحكروا فى نص السرير و(يلطخها) ويطبقها كمان..والمرأة اذا كانت (حادة) يعنى حزنانة على ميت ومجبورة عليهو تتعلل ايضا بالسخانة وتفسخ القدم او تشققها,,وتطلب من صاحبة العزاء العفو والسماح لها ب(جرة) حنة تزيل بيها مسغبتها !!

    والله الشهية للطيبات فى,,بس القدم ليهو رافع!!! واغنية بابكر الطاهر لى يوم الليلة تبكى فينا..خلينا ساكتين وما تفضحونا..

  13. د.ياسين شمباتى كتب:

    ود الفتيحاب..اليوم ما ادوك فرقة واخدوا منك البرنجية..انتظرنا اليوم مساءا..

    مخير..بارك الله فيك على الاضافة الضافية من الطب النووى..لكن فى رايك الحنة دى بتعالجنى من شجونى!!!!!!!!!!!؟؟؟؟؟؟؟؟؟؟؟؟؟؟؟ راجع الفيسبوك..

  14. د.ياسين شمباتى كتب:

    العزيز طارق اب احمد..نهارك سعيد..لكن العامرية حنكها سنين,,شبكتو ليك دموع الدم وهى حنتها سوادها يقول وا غربتى,,مكر النساء كدة ولا بلاش!!!

    صديقى زووووول..مرحبتين حبابك,,و تأكيدا لكلامك فى حب النساء للزينة عند الخروج وتركها بالمنزل_الذى هو اوجب واصلح للزينة_ فقد قال الفاروق عمر رضى الله عنه 😦 اذا كثرت زينة المرأة اشتهت الخروج)..

    بعدين مافى داعى للحندكة وكدة,,وسهيل دا ما تختنى معاهو فى كاتوقرى واحد!!! انا والسعيد وبروسيسور_ربنا يجمعنا بيهو_ قروب واحد,,اما مشاكل فخليهو مع ساتنتنود..

    بالمناسبة دى يا مشاكل,,ايه اّخر اخبار الشواكيش؟؟؟؟؟؟

  15. د.ياسين شمباتى كتب:

    الوالد السلاوى يا مخضوضب انت..الف لا بأس عليك..ربنا يعيد عليك خنة الحنة,,ولا ماك مشتهيها؟؟ ما تقول ليها سلتاء مرهاء,,قول ليها مالك مظلطة ومغبشة كدى!!!؟؟ و ودالفتيحاب دا خليهو لحدى ما نلم فيهو و نختو فى ركن ونستجوبو..

    العم نيام..والله شكلو غبينتك الفى البنكرياس دى انفجرت سريع قبل تلحق بيت البكا !!! ما فى عوجة تب,,بس البسترك شنو مع ابكرون؟؟؟؟

  16. حنين كتب:

    دز الشمباتى وباقى الجماعة الفى الخطو البرة الخط ناس نيام .
    كيف أخباركم وعساكم طيبين .
    والله ياشمباتى موضوعك زو شجون وزى ما قال الراجل لعبد الملك بن مروان أنة إبيض منا ماكنا نحب أن يسود وأن يظل اللين لينا واليابس يابسا الى أن نفارق هذة الفانية زى ما بتقول حبوبتنا الله يرحمها (إنشاء الله من القوة للهوة )).
    ذكر أحد الصحابة الى رسول الله صلى الله علية وسلم أنة يتزين لأمرأتة كما تتزين لة فأقرة رسول الله على ذلك دون زكر كيفية ذلك فعليكم الله ورونا الكلام دة كيف عشان ما نظلم عواطفنا معانا دون أن ندرى بالزينة والتطيب للرجال .
    عمنا السلاوى شايف صاحبك سهيل ما خاشى فى الخط دة لأنو ليس لة فية ناقة ولا جمل …

  17. د.ياسين شمباتى كتب:

    حنين الحنين..تسلم يا ابو الشجون,,انحنا بنطالب عواطف واخواتها بالزينة والتبسم فو الوجه عند دخولنا المنزل,,ولكنا حينها ننسى اننا ندخل ملووى البوز وعبوسى الوجه,,وما اصدق على ذلك الا الطرفة التى تحكى ان : فى راجل زهجى وعصبى دخل بيتو من الشغل وقال لى مرتو : فى حكاية حصلت لى الليلة لو قلتها ليك حتقول لى انت كضاب,,وانا ما كضاب,,كضابة انتى واهلك,,انعل ابوك يا بت الكلب!! امشى يلا…اها دا يقولوا عليهو شنو؟؟؟

    صاحبك سهيل دا خلاص لحق امات طه ولحق العريان بن هيثم!!!

  18. نيام كتب:

    شوف يادوك الليلة متحنن متحنن عندي سخانة في اللساتك و لو لاقيتني ماتقول عمنا عرس ايثاري اعرف انو سخانة في لساتك اللواري..لكن يا شمباتي بكرة لحدي صلا ة الجمعة السخانة دي لو ما راحت حاجيك هناك.. ومن حسي الشرابات عليك..

  19. د.ياسين شمباتى كتب:

    الاخ ود الخلا..منور والله,,رجعت ولا لسه فى بلد الجبنة والفسيخ؟؟والله اعمامك ديل خليهم ساى..قبل شوية كنت مع الوالد السلاوى,,وتراجعنا فى شئون (حنية) يصعب ذكرها هنا..كمان ود الفتيحاب بكرة ح يكون على الهواء مباشرة!! بث حى وكدة..

    اما الافراد الخاص دا حقو ترمى بياضو..انت تأمر يا باشمهندس..تحياتى للاسرة..

  20. د.ياسين شمباتى كتب:

    العم نيام..يا ريت السخانة ما تروح عشان تلحقنا وتفزعنا..يا فزع يا البتزيل الهم والوجع_الخرافى منه والعادى_وكان بقت على الشرابات هينة..بس ما اعمل فيك عملية الزول بتاع ابوظبى والجلابية!!!

    سمعت بى حنة البكا والعرس والسماية والجيران!!!؟؟؟وانواع اخرى شتى..

    تحياتى واشواقى وقبلاتى لى مدنى ارض الخير والجمال..

  21. الغبشة كتب:

    د.يايسن ياحنين رنا يزيدك من حنو وتضوق الحنه قريييييييييييييييييييييب انت وسهيل ومشاكل والزيكم.
    كسره:سلام لمدنى الجزيرة دى طوالى معلقه معاك كده ماله؟مجرد سؤال
    والى لقاااااااااااااءءءءء

  22. الغبشة كتب:

    معزره ربنا يزيدك من حنو

  23. د.ياسين شمباتى كتب:

    الغبشة..سلام اكتر..ربنا يضوق الحنة للجميع,,حتى العايزين يدبلوا..

    مدنى دا اسكتى خليها ساكت,,دى امى,,روحى و دمى..عشقى الخاص و ذكريات بنكهة الرمان..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s