شينه وعاجبانى

Posted: الجمعة,20 فبراير, 2009 by aflaiga in اخرى

وانا ماشى فى الشارع فى امان الله وقفت فى الاستوب لمحت ولد شايل ليهو باكته بتاعة ورق بيوزع فيها للناس استغربت قلت البلد دى بقت ديمقراطية للدرجه دى ؟؟!! المنشورات تتوزع فى الاستوبات ولكنى اكتشفت بعدها اننى احسنت الظن فى النظام واكتشفت بعدها ان ما يوزعه الشاب اخطر من المنشورات لن اطيل عليكم واليكم ما قراته بالورقه :

مركز …. للاعشاب والتجميل بالاعشاب . مفاجاة العام

2009 م عروض رائعه لكل من تبحث عن الجمال :

اولا الوجه :

نفخ وتكبير الوجه – تفتيح الرقبه – تفتيح ومعالجة الشفاه – شد الوجه – شد العينين – ازالة الجروح والقروح – ازالة المسامات المفتوحه – ازالة التجاعيد .

ثانيا الجسم :

تنعيم الايادى – تنعيم الارجل – تكبير ونفخ الايادى – تنشيط

 

وتكبير المؤخره – زيادة الارادف – ازالة حب الشباب –

 

تعريض الساقين – تخسيس الايادى – تخسيس الساقين –

 

زيادة الوزن – تخصيص الارداف – تصغير وتكبير الثدى

 

– شد الثدى – ازالة الكرش – ازالة السودا من المناطق

 

الحساسه – تنعيم الارجل – تنعيم وتطرية الجسم .

ثالثا الشعر :

القشره الموسميه – تسقط الشعر – تكسر وتقصف الشعر –

 

تغزير الشعر – تسويد الشعر – تنعيم وفرد الشعر ..

كسره : لم يتبق الا ان يكتب المركز فى نهاية الاعلان :

وهو على كل شيئ قدير …!!!!!!!

طيب يا جماعة لو الاعشاب بتسوى ده كلو مش ربنا كان

 

خلق اى زول واداهو اسبيراتو العشبيه معاهو ؟؟؟

 سبحان الله الذى لعن النامشة المستنمشه النامصة المتنمصه

 

الواصلة المستوصلة المغيرة لخلق الله .. وشينه

 

وعاجبانى …

 

 

 

About these ads
تعليقات
  1. ابكرون قال:

    افليقا :
    الشي البحير يا (فرود) ان عشبته دي هي (ظااااااااته) تكبر الارداف وبرضو تصغرهم وتنفخ الصدر وبرضو تنفسو ….وتفتح المسامات وبرضو تسدهم (وتضيق) المجاري وبرضو توسعهم …و بتزيل حب الشباب ولو عايز حب شباب برضو بتقومو ليك…..وبتروق نفسك وبرضو تتورو……
    شي عجيب حكمتو باااالغه خلاص العيادات دي كلها يقفلوها وما في داعي لكلياااات الطب والمستشفيات ….وفي احتمال يقنعك انه مافي موووووت لانها حتعيشك تحضر قيام الساعة…..

  2. aflaiga قال:

    تعرف يا ابكرون يا ( مرعب ) : العشبه دى زى المفك الاسود السغير البيشتغل بى جنبه بلدى وبى جنبه نجمه !! ولو قلبتو على ضهرو بيشتغل مفك بيان !!!
    ود الخلا : غير المكتوب ده كمان خليهو ساى ماهى بتبدا اصلا بى كده وانت استاندر !! بعدين يبدو التفريز وكبس القمصان .. صديقى س يدعو دوما بان يهبه الله زوجه ( بس تكون ما ولدت قبل كده ) الباقى هين !!!!

  3. aflaiga قال:

    ود الخلا : بالنسبه للجمعون البى اعظم قوه واوطى قيام !! ده مفروض يكون فى جمعون يوم السبت فى بيت عزت لتدشين تسليم الادمنستريتر المنتجه وسائل الانتاج من ديوان الادمنستريتر التقنى بتاع الادمن الكبير امين ديوان الادمنه !! بعدين بعد ده فعلو ثلاحياتكم الود عبدوش ده سكرتير تنفيذى فوق شنو ؟؟ ترفع السماعه طوالى تضرب ليهو :
    ود الخلا : استاذ عبدوش تعالا شويه عاوزك فى المكتب .
    عبدوش : حاضر يا فندم .
    ود الخلا : كنت بتكلم مع الريس عزت قبل شويه وقال لى بصفتى رئيس تنفيذى الجمعيه ان ادعو الاعضاء لاجتماع هام بالله شوف مواعيدنا الكويسه متين واحرى اللازم .
    عبدوش : حاضر سعادتك .
    يعنى يا جماعه صلاحياتكم دى عاوزين تفعلوها متين انا والبشاوى الكاشف اخوى ده ناس عنقاله فاعلين خير ساى بعد ده شيلو شيلتكم ..

  4. د.ياسين شمباتى قال:

    سلامات افليقا..يا ريت كل زول يقتنع بى خلقة ربنا ويقرض على كدة..بس الناس بقت تسعى ورا الجمال المصطنع زى جريها لى لقمة العيش,,وللاسف المراكز العشبية الطفيلية الضارة بالمجتمع دى بقت اكتر من الهم على القلب..
    لو بتتابع قناة هارمونى بتلقى اعلان بقول :الخبر الذى تناقلته وكالات الانباء العالمية,,الدكتور كابو ولا كابور ما عارف خبير العلاج بالاعشاب الذى وجد علاجا لشنو وشنو ما بعرف ويرص ليك القائمة اياها…ديل حقو يدوهم جلدة كااااربة فى ميدان عام..

    بس البحث المعقول عن الجمال مطلوب للطرفين وكدة..

  5. البشاوى قال:

    افليقا الشقى
    انا ماكلمتك قلت ليك اوعك تستلم اى حاجة من اى زول فى الشارع ساكت
    الا يكون معاك رفقة مأمونة لانك بصراحة زول مستهدف وممكن التصرفات الزى دى توقعك فى مشاكل ومانلقى زول ساكن فى دائرة الاختصاص يضمنك
    بعدين دة شنو دة البيكبر ويسغر ويزيد الطول وينقص العرض دة مصـــــــــوراتى
    ولا ترزى ولا بناى
    بس البيحيرك بعد زمن تلاقى واحدة كانت فيستو من غير ضهرية فجأتن تبقى
    مرسيدس بنز او تمها ياأبكرون ؟
    الدعاية كلها لى عواطف مافى قسم لى ابو السعود

  6. طارق أب أحمد قال:

    أفليقا

    لو الناس ديل بيبيعوا الأعشاب البتكبر المسائل تحت نظر القانون إذن ليه القانون عندو مشاكل مع الناس البتبيع العشبه البتكبر الدماغ ؟؟؟؟

    هل لأنهم عايزين المسائل تكبر ولا عايزين الدماغ يصغر

  7. نيام قال:

    افليقا:
    انت مشيت تبحّت في الاعلانات لمان جبت خبر الكيني ؟
    البشاوي قال في اللحظة ديك شداك الاعلان عن بخور التيمان لكف العين و الهذيان..فكفيت عينك في الحال فصدمت الريّال..

  8. حاج أحمد السلاوى قال:

    الدينمو أفليقا .. حفظه الله .. سلام
    إنت لو ملاحظ إنو الوعى الصحى قد إزداد فى الآونة الأخيرة وبالتالى ارتفعت وتيرة العناية بالمظهر والشكل العام .. مش بقينا دولة تصدر البترول وبتجينا عملة صعبة ( جداً ) ودى ذكرتنى طرفة حقيقية حصلت مع واحد من إخواننا الخليجين الذين لا يعرفون هذا المصطلح المالى الذى يسمى عملة صعبة ( وهو النقد الأجنبى ) بحكم أن بلادهم ذات إنفتاح تجارى ولا داعى للقيود المالية كما عندنا سابقا ( والحمد لله ).. المهم الراجل وصل مطار الخرطوم الدولى ومعه عملات أجنبية ..ريال ..دولار .. إسترلينى ..فسأله ضابط الجمارك عما إذا معه عملة صعبى فأجاب بالنفى..وفى أثناء التفتيش الروتينى للحقائب ( فبل النظام الحالى المتقدم ) لاحظ الضابط وجود عملات أجنبية داخل الحقيبة فقال للرجل ..أنا مش سالتك عن العملة الصعبة وقلت ما عندك عملة صعبة …أمال إيه دى ؟ فرد عليه الرجل بكل براءة وحسن نية : نعم هذه عملة اجنبية .. إيه الصعب فيها ؟؟
    نرجع بيك تانى للأعشاب وما أدراك ما الأعشاب ..وأقول إنو مادام العلاج دة غير كيمائى فلا يوجد منه ضرر كبير ..وخلى الناس تتصلح شوية ..

  9. مُخير قال:

    الحلوين صباح الخير
    برجعكم لسيناريو جبرا بتاع الجرجير الذي يلمس جوهر الإشكالية وحيث نقول عن الشخص الذي أمورو جاطت إنو فلان أكل نيم وكما لدى أخوانا الخلايجة مثل شبيه بيقولوا إذا واحد إتغاظ من شخص ” إن شاء الله يآكل تبن ” فالملاحظ إنو القصة كلها محورها الأعشاب ويعني الأمور لمن تجوط الخلاص يكون في الأعشاب من هذا المنطلق السايكولوجي البحت وبالنظر لإحتياجات الريش ذو الرغبة العارمة في إكمال نصف الدين وتلافي زواج الإيثار /المسيار أو لحاجة عواطف للحفاظ على سعيد التعيس تنشأ الحاجة الماسة لتحسين المظهر وبالتالي أبدع علماء الدجل في إختراع هذه الأعشاب السارة لترويجها لدى الشعب الفضل الأمورو جايطة والله يجازي اللي كان السبب.

  10. مُخير قال:

    سيناريو من وحي جبرا وبلاوي أفيلقا لتمويل الجمعية وما سنغتوتي:
    أفليقا: بعرف واحد جايب أعشاب من فصيلة نادرة لا توجد إلا في جزر ترنداد وتباغو في أمريكا اللاتينية، وللعشبة العجيبة خاصية معالجة الصلع بشكل نهائي وتسويد الشعر وتبييض الوجه وحل كل المشاكل البتعرفها والما بتعرفها.
    (س) صديق أفلايقا: كل المشاكل إنت متأكد ؟؟؟
    أفلايقا: آييي ياخي متأكد تماماً وآآآآآيييييييي المشاكل مش الأمراض وبس ؟؟
    (س) صديق أفلايقا: ومفعولها مضمون ؟؟؟
    أفلايقا: مية المية، كمال ود عمك عثمان كان عندو مشكلة مع مرتو سمية وأمها حاجة التومة وطلقها ليهم، مشت حاجة التومة إشترت ليها نتفة منها بلعتها لمن مشت البيت لقته رجع بجعر وبعتذر !!!
    (س) صديق أفلايقا: والله الكلام ده كان جد نشتري من الراجل ده كل الكمية العندو وشكلنا يا فردة حنغنى ونتنغنغ.
    أفليقا: ياخي إنت ما عندك وطنية ولا شنو، أنا عندي تصور تاني.
    يقوم أفليقا يشد سلك مستعجل لجبرا ويبلغو الحاصل ويشيل عينة لدكتور عزت لفحصها والوقوف على مدة مفعولها. وعندما يتأكد الموضوع يتم إبلاغ ود الخلا وود الزبير وأب أحمد وخالد مدني وسهيل وينتشر الخبر عبر الأثير إلى نيام في مدني وبقية الأقطاب في أركان المعمورة ويدعا للحضور فوراً حاج السلاوي من المملكة وأبكرون وبشار وسنكلون من الخليج للإجتماع الطارئ للجمعية لتسجيل المنتج باسم الجمعية والتكتم على مفعوله الحقيقي.
    بعدها يصدر القرار بنشر إعلان في كافة الصحف اليومية ” عشبة الحل الما حصل” لمعالجة مشكلة دارفور وأبيي وخلافات الشريكين وبلاغ أوكامبو وجميع مشكلات أمازونيا ومآسي الشعب الفضل، الكمية محدودة والعنوان السوق العربي وبالتالي يتم تشكيل لجنة للتسويق تضم استرايكر والزووول وعبدوش وسهيل…..وبعدها تهبط الجنيهات والدورارات بالمليارات… وتتحل مشكلة التمويل وقومي يا المرا ما تموتي (عشان الغبشة ما تزعل).

  11. ودالفتيحاب قال:

    الساده سلام
    افليقا سلام
    الجماعه ديل ماعندهم شقله ,قالبهم البسو .والنسوان بقن فارقات يصدقن أى شى الا الراجل الما بصدقوه ..
    حتى اننا سمعنا انهم استعملوا الهورمونات لزيادة الوزن ..
    مخّير ..
    والله عندك مواهب جيده لاتحرمنا بالله من الكتابه خليك قريب..

  12. حنين قال:

    أخوى أفليقا وباقى السمار .
    سلامات .
    إكتشف العلماء فى العلم الحديث خلايا فى الجسم تعمل على تحديث باقى الخلايا بمعنى آخر أن هنالك خلايا فى الحسم مهمتها إلتهام الخلايا القديمة وإنبات خلايا جديدة فى جسم الانسان. هذة الخلايا لها عمر محدد بعدها تبداء فى الضمور والهلاك ممايترتب علية ظهور التجاعيد والزهايمر .
    عمل العلماء على تنشيط تلك الخلايا فوجدوا أن الانسان زو الخلايا المنشطة يظهر علية مظهر الشباب والحيوية وقدرو أنة قابل للعيش لمدة خمسون عام آخر (بعد العشرة الاواخر ) وبنفس مظهر الشباب .ولكن درسو عواقب ذلك الاكتشاف فوجدوا أنة سيؤدى الى زيادة سكانية عالية فى الكرة الارضية تؤدى الى حدوث كوارث بيئية .وهنا تحضرنى نكتة الشايقى شاف ليهو واحد بيغرق فى النيل فأستنجد بالشايقى أن ينقزة فأجابة الشايقى (يازول قول إستغفر الله .دة ما ياهو يومك .).
    ياأفليقا ياأخوى فى مظاهر كتيرة فى مجتمعنا بتاعة نقص إيمان بتوحى بعدم الرضاء بخلقة ربنا أو بالرغبة فى معرفة الغيب أو بالاحتجاج فى وجة المشيئة بعدم الرضاء بالمقسوم والمكتوب والعياز بالله .جعلنا الله وأياكم من الراضيين بالقدر خيرة وشرة وأن يوفقنا الى ما يحب ويرضى .

  13. سهيل قال:

    كبير ود لو صغر *** صغير ود لو كبر

    وذو مال به ضجر*** و في ضجر من إفتقر

    الرضى بالمقسوم عباده.. الواحده لمن تفسخ وشها .. هي متخيله إنها بقت شديده و ممكن تأسر قلوب الشباب؟ و الله شكلها بيكون مقرف و ما بتقدر تعاين ليها مرتين.. و برضو تمشي ليك مناسبه تلقي البت ضاربه و شها بدره (بيز) والفرق بين لونها الأصلي و لون البدره يخليها زي بتاعين أفلام الكرتون.. و هي الهبلا توزع البسمات البلاستيكيه بكل غباء.. ألا رحم الله الفقيد

  14. زووووووول قال:

    افليقا سلاااام
    والله يا افليقا زى ما بقولوا شلتها من خشمى .
    بالامس كنت اعد موضوعا عن الحكايه دى ذاتها حيث اننى تعرضت لنفس الموقف .
    موضوعى يتحدث عن صراع (توم ) الطب الحديث & (جيرى) طب الاعشاب وصراع الجبيرة والجبص وعن اعلانات تكبير حجم العضو ………. وللرجال فقط واجهزة الساموراى . وعن عقدة الرجال ونقطة ضعف ادائهم ……… وكذلك عقدة العين والسحر والايمان بالعروق والدجل والشعوذه . بالمناسبه يا افليقا واحد بلدياتنا اتقفلت عليهو من القبل الاربعه ففكر (مليا طبعن ) وذهب الى احدى الاشجار الغنيه بالجذور وعمل كميه محطرمه (؟) وجاء يبيعها للناس كعروق محبه وعروق رزق وعمل ليهو منها قرشين حلوين .
    ويا مخير والله فكرتك رائعه بس دايرا ليها بوكس دبل كابينه اخر موديل تكتبوا عليهو عياده متحركه وتعملوا ميكرفون لعبدوش يكورك بيهو علاج الرطوبه علاج الحساسيه علاج السرطان علاج الصلع علاج الايدذ علاج الضعف ال….. تكبير تصغير ودبلجة الـ……….. .
    بالله اعمل تمارين كويسه يا عبدووش

  15. سهيل قال:

    البرينسه جاهزه.. بس أجهز إنت

  16. زوله قال:

    الواشمه والمشتوشمه ^_^

  17. heba قال:

    بدي رقم الدكتور كابور

  18. التركى قال:

    رقمه مافيش بس عنوانه : 60 نون جيم على 26 مشترك

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s