فوله و انقسمت

Posted: الثلاثاء,24 فبراير, 2009 by عزت in اخرى

قيل لكل إبداع صوتٌ وصدى؛ اي أن أي مبدع يكون له متلقي يبدع الأول فيذوب المتلقي في دباديب المبدع و يكون مرآته التي يقيس بها وقع فنه أو ابداعه مشكلا ثيرمومترا، يقيس العلاقة بين المبدعُ الخلاّق والمتلقّي الثقيف معطيا إبداعاً أكثر نبضاً وإشراقاً… عادي جدا و لكن تخيل عندما يكون للابداع صوتان معاً؟ و كيف ان كان شرطه اللازم أن يكون الاثنان في السياق الإبداعي الخلاّق؟

 

 

فتاريخ الأدب والفنون والعلوم، قديمُه والحديث، حافل بـ”ثُنائيي الإبداع” الذين عملوا معاً أو كانت حياتُهم معاً حافزاً على العمل، زوجَين كانا أو عاشقَين، صديقَين كانا أو زميلين، حتى ليُمكن القول إن حياة الثنائي قد تكون أحياناً عنصراً رئيساً من عناصر ذاك الإبداع. فمن بين أشهر الثنائيين: في العلوم بيار وماري كوري، في الفكر جان بول سارتر وسيمونّ دوبوفوار، و غيرهم من الثنائيات في كل محفل .

 

 

هذا عدا الثنائيين في الكتب والأساطير: آدم وحواء، روميو وجولييت، و غيرهم، ويَحفل التاريخ العربي بالكثير من الثنائيين: عنترة وعبلة، جميل وبثينة، المتنبي وخولة، وتطول اللائحة ولا تنتهي. فالشهرة أحياناً تحمل الى الأضواء ثنائياً، أو قد تنكسر تلك الثنائية عند خلاف أو طلاق أو انفصال، لكنها تبقى في الذاكرة الجماعية صورة لـ”ثنائي جميل” أو “ثنائي مبدع” أو “ثنائي نَموذجي”. ولعلّ الناس يرتاحون الى الثنائي، خصوصاً حينما ينجح وتتألَّق صورته في الصحافة والإعلام والتداول، فيروحون يتابعون أخباره ويرتاحون الى إنجازاته ويَحزنون لانكسار الثنائية.

 

 

غير أن المهم، هو ماذا يعطي الثنائيان من ابداع؟ وهنا تأتي أهمية الثنائي الذي “يعيش” العمل الإبداعي معاً. و في بالنا الكثير من الثنائيات التي عطرت و أشبعت وجدان الشعب السوداني فمن الضروري أن يكون أحدهم مرآة أخيه، فكم من مبدع أشرق إنتاجه أكثر لأن “الآخر” مرآته الحقيقية التي تعيد الى نبضه الألق وتُحَفِّزُهُ فيكتب لَها، منها، إليها، ويتألّق.

 

 

من أوائل الثنائيات في السودان في مجال الشعر و الغناء الشاعر العبادي والفنان سرور منذ عام 1919 وبظهورهما انتقلت الاغنية السودانية من أغنية (طنباره) الى أغنية حديثة ومن أشهر أغنيات الثنائي “ببكي وبنوح وبصيح للشوفتن بتريح وأول ثنائي غنائي كان سرور والأمين برهان و الثنائي عمر البنا ومحمد الامين بادي و كانوا يغنون شعر ابوصلاح وبعدهم الثنائي كرومة والياس حيث كانوا يغنوا شعر سيد عبدالعزيز و توالت الثنائيات بظهور أولاد شمبات حيث غنوا “اذكر بقعة الآمال” و “قلبي المن زمان بهواك” ثم غنوا شعر الأمي “يا رشا يا كحيل غيثني هواك سباني” ، و “يا ليل ابقالي شاهد علي نار شوقي وجنوني” و “يا من فاح طيب رياه على ميت الهوى أحياه” و “فلق الصباح قول لي اهو نورك لاح” , “لحظك الجراح ازاي فيه وفيه الطرب والراح منايا زهرة الافراح” و “ياجوهر صدر المحافل روحي معاك اتطلفيلا” ، “قضينا ليلة ساهرة تضمنت محاسن من كل روضة عينة ومن كل عينه زهرة” و لكنهم لم يستمروا لوفاة أحدهم لكنهم خلفوا حوالي مخزونا ضخما من الأغاني المسجلة.

 

 

كما ظهر الثنائي الأشهر ميرغني المأمون واحمد حسن جمعة و كانا الاوفر حظاً اذ لديهم تسجيلات كثيرة في الاذاعة تربوا على الثلاثمائة أغنية مثل “اقيس محاسنك بمن يا الدر الماليك ثمن” ، “من حور الجنان ام انت انسان الكمال ام انت الملاك جيت توري الناس الجمال”، “خلي العيش حرام ما دام ارى الموت يحل ما بين الرميش والطريف الكحيل”، “الشادن الكاتلني ريدو هلك النفوس والناس تريدو ما لو يرحم مريدو” ، “يا نجوم الليل اشهدي علي لوعتي وتسهدي علي بكاي وتنهدي” ، “من قليبو الجافي لي قلبي الحان النسيم يتردد عامل استمحان”، “ضامر قوامك لان قلبك قسي وجافيت ليه يا جدي الغزلان” ، “صفوه جمالك صافي الماء علي البلور يسعد صباحك خير” و “انا صادق في حبك لوقلبي يتصل الي قلبك هذا مقصودي”.

 

 

فظهر بعد ذلك أولاد الموردة و أولاد العيلفون و لهم “اذكري ايام صفانا والليالي الفيها متبادلين وفانا”، “هواك وهواي بي جاروا وسين افكاري نظراتك احب تعطف تزيد وجدي واحب كل البحب ذاتك” ، “غني القمري علي الغصون ذكرني الدر المصون فريد عصرو المامتلو شئ” ، “ياسمير بي نظرتك اوفي الميعاد العيون الشافتك ما اسعدا”، “ارجوك يا نسيم روح ليه بي اشواقي صرح واذكر صبوتي وسهادي” ، “من اول نظرة رشقتني عيونو وجذبتني فنونو وبقيت مجنونو” فكانت الثنائيات من التجارب الناجحة جدا و أرخت لاعظم فترة في زمن الحقيبة لانهم حفظوا الغنا من الضياع وقدموه بنفس الروايات القديمة خاصة اولاد شمبات والمأمون والموردة لانهم حفظوا القرآن في الخلاوي وتأثروا بالمداح لذا جاءت كلماتهم واضحة وصحيحة واداءهم قوى حافظين الرواية (اللحن) ونجحت الثنائيات لان الأغاني سجلت بالرق ما بالموسيقي فوصلت للمستمع واضحة الكلمات وكانوا يغنوها في الحفلات بالطبلة وغيرها من الآلات.

 

 

كانت اخطر الثنائيات بين الشاعر عمر البنا والملحن والفنان كرومه اذ لديهم اغاني جميلة جداً مثل “نعيم الدنيا” “في الطيف وفي الصحيان زورني يا حبيبي انا عيان” “آه الاهيف أبي ما يليم من بعده صار قلبي ضريم” و “هجد الانام وانا وحدي مساهر والنحول على جسمي يا حبايب ظاهر هوي اسبابي الحب الطاهر).

 

 

و حفلت ساحتنا الغنائية بالكثير من الثنائيات بعد ذلك شعراء و مغنين يكاد شعر كل منهم أن يكون مفصلا لأحد بعينه و ما وردي و اسماعين حسن، عثمان حسين و بازرعة و سيد خليفة و ادريس جماع و غيرهم ببعيدين من أمثلتنا.

 

 

لم تقتصر الثنائيات على المغنين و الشعراء فقط فشملت لعيبة الكرة مثل (حمد) و (الديبه) حاجةعجيبة و شملت اصدقاء الدراسة و زملاء المهن الواحدة و الندائد و الجيران فدائما ما تجمع الثنائيات التوافق و الهارموني و قد يكملوا بعضهم البعض أو ينافسوا بعضهم البعض مشكلين قمة الابداع و التفاهم فقلما ترى احدى الثنائيين دون (فردته) و لم تقتصر على الأفراد و الجماعات فقط فهناك في البال الكثير من الثنائيات و التي تعدت لتوصف المواقف و الأيام فالأبردان هما الظل والفيء و الطريدان.. الجديدان .. الأصرمان كلها تطلق على الليل والنهارالأبيضان الماء واللبن، و قيل الشباب والشحم بالنسبة للمرأة و الأحمران اللحم والخمر و الأخبثان السهر و الضجر أما الأعجمان فهما الطير والوتر و الوحيان هما القرآن والسنة و القريتان مكة والمدينة في الإسلام؛ ومكة والطائف في الجاهلية أما الأطيبان فهما لذة المطعم والمنكح أو الطعام والشراب و الأسمران الماء والقمح، أو الماء والرمح و الأسودان التمر والماء، و غيرهما من الثنائيات التي تضيق بها المقالة………

 

 

فهل في جعبتك أمثلة للثنائيات و مواقفهم البديعة و الطريفة …. فلا تبخل علينا…….

Advertisements
تعليقات
  1. aflaiga كتب:

    عزت : يعنى الواحد يادوب فاق من حلاوة البسكويت والكيك والشاى يجى الصباح يلقى بوست سمح كده ( البسكويت والشاى ) ثنائيات برضو مش ؟؟!! ده شنو الزول السمح شديد صباحا سمح خالص مساء ده ؟؟؟
    الثنائيات كثيره ومنها :
    ( الثقافة والمسدس ) فكلما سمعنا باسم احدهما تحسسنا الاخر !!! كلما سمعت عن الثقافه تحسست مسدسى وكلما سمعت عن المسدس تحسست ثقافتى …
    وبرضو من الثنائيات فى مدونتنا ( زوول ود الخلا ) ( افليقا ستريكر ) ( مهدى كنانى ) ( سنكل بشار ابكرون !!! ) السلاوى شمباتى ) مخير محنك ) فنجان معجبه ) جبرا لطفى ) نيام نيام !! ) وانت ماشى وربما ارتبطت الثنائيات هنا عندنا بتشابه اللون فى بعض اوجهه سياسيا كان او ثقافيا او اعتدادا بالنفس او الفكر او صحبه ساى كده فى الله !!
    الثنائية حالة خاصه تتطلب الون تو فى الكوره !! والدفن سوا فى السياسه !! واللوبى فى المؤامره !! وشبهينا واتلاقينا وعلى اشكالها تقع ووووووو .
    ولا يقتصر على ما اعتقد الوصف على الثنائية بمعناها الزوجى اذ يمكن ان يشكل اكثر من اثنين لوحه منسجمه كالبلابل مثلا والصحوه مؤخرا قبل الفرتيق !! ومجلس قياة الثوره مثلا قبل النيو لوك !! وتنبع الثنائية دوما من الارتباط القوى فمثلا عندما نقول الوالى طوالى تمسك جيبك لارتباط الولايه بالجباية !! ده طبعا اسى فى زمننا ده لكن زمان زمن الولايه ولاية وامانه وتكليف حين يذكر الوالى طوالى تحس بالعدل !! انتو النسالكم العدل ده بيحسو بيهو كيف ؟؟ يعنى لمن تجيك حالة عدلية بتكون عامل كيف لانو الحاله دى لينا زمن ما حسينا بيها !!!
    وجاييك تانى يا عزت

  2. محنك كتب:

    يا سلام
    اهو كدا الابداع الا نقول البروف والدكتور

    زى حسن وحسين ……….. وحمزة وعباس خاصة المعلومات عن ثنائية الالوان
    ومن الثنائيات ( السيدين ) ( بيت المراغنة وبيت المهدى ) هل من كاتب ومؤرخ سياسى يدينا حبه عن المصطلح

  3. bakriMusa كتب:

    من اجمل الثنائيات (عواطف) و ( سعيد )

    وراجعين

  4. ابكرون كتب:

    عزت….صباحات
    الثنائيات كتيره…(ناس بحري ) بزعلوا منك وين ثنائي النغم….وثنائي الدبيبه
    وناس زمان( سهيل… اقصد كثير /عزه)…..(ولادة بنت المستكفي وبن زيدون)…وتاجوج …والمحلق……خولة وطرفة بن العبد الخ……وفي السودان تاجوج والمحلق……والهادي الضلالي وعم بين
    وفعلا يا افليقا ..بشار وابكرون ثنائي منذ السبعينات….
    محنك : السيدان ترجع لان الناس والمريدين والاتباع كان تسمي زعيم ومرشد الختمية بالسيد علي الميرغني وكذلك طائفة الانصار تنادي زعيمها بالسيد عبد الرحمن المهدي …ومن هنا برز اسم (السيدان)…والسيادة لله

  5. حاج أحمد السلاوى كتب:

    ابو عصمت ..
    خلينا ناخد نفسنا شوية من الصفيح والقطر ..
    وراجعين للثنائيات .. ريا وسكينة ..مين ما بعرف دااااك وبكيزة …

  6. نيام كتب:

    الدانقوست صباح النور…
    الابداع في بلادي رحب و اسع و الثنائيات في كل مجال في السياسة (حرب الامة ، حزب الاتحادي) و الشعر و الغناء (اسماعيل حسن ،محمد وردي) ، (الدوش ، وردي) ،(عثمان حسين ، دوليب) (الشفيع ، ودالقرشي ) ..
    في الكورة (هلال ، مريخ) و الطب(عبدالسلام مغربي(جراح) ، عبدالوهاب (محضر عملية)) في كل هذه المجالات شهد وطننا الحبيب ثنائيات قمم..
    وحتي في دانقتنا الحبيبة كانت الدانقا الكبيرة ثم تلتها الدانقا الصغيرة و صارتا ثنائي(جبرا ، استرابكر)

  7. ابكرون كتب:

    عزت معليش : موضوع بره الشبكة
    ادخلوا الموقع ده وصوتوا لمواقع السودان : جبل مره والنيل الابيض والازرق
    لتضاف لعجائب الدنيا السبع….
    http://www.new7wonders.com/nature/en/vote_on_nominees/
    تخيلوا حتي النيل الابيض كاتبنه باسم مصر والسودان وكذلك الازرق اثيوبيا والسودان وما عارف وين حدائق الدندر ووين اصلا حكومتنا من الموضوع ده..ولا نحن غير اوكامبو بقت ما عندنا شغلة……….
    تصوروا مرشحين شُعب البحر الحمر المرجانية ومنزلنها باسم جيبوتي واريتريا ومصر واسرائيل ولا ذكر للسودان ونحن عندنا اطول خط شعب مرجانيه في البحر الاحمر بل فنار (سنجنيب) يعد من عجائب هذه الشعب …..ادخلوا وشوفوا براكم

  8. سلام يا أحباء

    من ألطف الثنائيات في مجال الكوميديا ود أب دليبة و التاني المعاه داك …لا أذكر اسمه و لكن كان يجسده اسماعيل خورشيد حيث كان الاثنان قمة في الابداع واحد يقنطر النكتة و التاني يشوتها

    كما برع ثنائي عطبرة في الشقاوة اذ حكى أحدهم انه و بعد أن خرج من معاودة (مريض) في المستشفى هاله أن يلومو (فردته) فما كان منه الا و أن فك العمة و وضعها على كتفه و رجع للمريض تاني و الذي بادره… يا سلام أخوك هسة كان هنا

    و لكن الزووول (بواوين بس) اللاطي و هو ببشر في ثنائي العاصمة في اغنية (ناس ناسيانا…) قاليهم
    – هيك بالله دي اغنية يغنوها اثنين

    و راجعين

  9. طبعا أظرط ثنائي لمن اتفقوا علينا الانجليز و المصريين في العام 1899م و وقعوا تفاقية بموجبها رفعوا العلمين المصري و الانجليزي في السودان

    بالرغم من أن الاتفاقية كانت مجحفة شوية بالنسبة للمصريين لكن أولاد بمبا قدروا يستفيدوا من اتفاقية مياه النيل و خمو الجمل بما حمل فوفقا لمعاهدة عام 1929 بين بريطانيا ومصر، لا يجوز لأي دولة أن تقيم أي مشروع مياه من شأنه تقليص حجم مياه نهر النيل التي تتدفق على مصر. ووفقا لتلك الاتفاقية يحصل السودان على 4 بليون متر مكعب وتحصل مصر في المقابل على 48 بليون متر مكعب!!

    اتخيل

  10. حسون كتب:

    ابكرون وحفصة ورية وسكينة

  11. نيام كتب:

    عزت المرطب:
    معقولة ياعزو تنسي قبربر .. اهي دي اظرط بحق و حقيق..

  12. nono كتب:

    التحية اصحاب المدونة / الثنائية الغناء
    كتب الأستاذ محمد عثمان الطاهر (الهارت) مقالاً تحت عنوان (عوض وإبراهيم شمبات ثنائي لن يتكرر) ما يلي: “عوض وإبراهيم شمبات من جيل عمالقة الغناء أمثال كرومة وسرور وغيرهم حيث لا مجال لأي مطرب إلا بموهبة عالية ليقف على تلك الأرض
    عوض مع كرومة كثنائي
    قائلاً: كان الثنائي يؤدي رائعة البنا في هدأة ليل أم درمان (يا ليل أبقالي شاهد… على نار شوقي وجنوني).

  13. سهيل كتب:

    سلامات .. والله يا مرطب حيرت السلاوي في حنانو .. لسه هو بيقرا في عقاب الصفايح تقوم تدقشو بالفوله..

    أفليقا : إحساس العدل يأتي لمن تكون في مساواه..

    و ما تنسوا إنو في ناس جواكر بتخاوي الدو ذاتو ..

  14. الغبشة كتب:

    سلام ومرحب دى اول ثنائية……………للكل
    الصفا والمروه
    النيلين(الازرق والابيض)
    فى الدراما الكومديه السودانيه حاج متذكر ومنوفلى,والغربيةهاردى ولورى المصرية بكيزة وزغلول
    الخطوط الجوية الامزونية والتاخير
    الملاحه الشطه والملح
    وثنائيه خاصه ليكم((الى,لقااااااااااااااااءءءءءءء))
    والى لقاااااااااااءءءءءءءء

  15. مُخير كتب:

    المتألق دوماً أبو عصمت
    الحلوين سلامين
    من الثنائيات السودانية التاريخية في القديم بعانخي وترهاقا، وفي القديم المتوسط دولتي علوة والمقرة، وكذلك مملكتي الفونج والمُسبعات، وفي المهدية يُذكر كثنائي القائد عبد الرحمن النجومي والفارس حمدان أبو عنجة، وإن ضمت الثورة أبطال أفذاذ كالخليفة عبد الله التعايشي والأمير عثمان دقنة، وعلي ود حلو ومحمود ودأحمد والأمير يعقوب وغيرهم وفي تاريخنا القريب يذكر دوماً عن ثورة اللواء الأبيض “علي عبد اللطيف وعبد الفضيل الماظ ” وإن كان هناك عبيد حاج أمين وآخرين، وفي مؤتمر الخريجين من الرواد يُذكر أحمد الفيل وشوقي وهناك رواد كأحمد خير وإبراهيم أحمد ومصطفى يوسف التني ومحمد صالح الشنقيطي وغيرهم، وبعد الإستقلال يُذكر الأزهري والمحجوب، وعبد الله خليل وإبراهيم عبود، وهناك ثنائيات وندية في قبائل الشمال زي جعليين وشوايقة، أو دناقلة وحلفاويين مع وجود قبائل أخرى رائدة كالمحس والرباطاب وغيرهم، وفي الشرق هدندوة وبجة مع وجود البني عامر وغيرهم، وفي الجنوب دينكا وشلك مع عظمة النوير والأنواك واللاتوكا والزاندي والميرو وغيرهم، وفي الغرب أيضاً ثنائيات فور وزغاوة، قرعان ومساليت، برتي وزيادية، ومسيرية ورزيقات،تعايشة وهبانية…الخ … وفي الكورة قديم جيل صديق منزول وماجد، أو جيل علي قاقرين والدحيش، وعشان ما يزعلوا المريخاب ناس د.عزت جيل الفاضل سانتو وحموري الكبير، وجيل عبد الله موسى وحافظ عبيد، أو جيل سليمان أبو داود وسامي عزالدين، ومصطفى النقر وسيماوي، أو فوزي المرشي والفاتح الريشة وهلمجرا….، وثنائية من دنيا الشعر والأدب الغابة والصحراء، وفي المُدن كوستي وربك، والدمازين والروصيرص، وعوووووك نفسنا قام نترك المايك للأخوان

  16. الزهراء كتب:

    خالص التحايا لكم يا من تدخلون القلوب فتعبقونها طيبا بكتاباتكم الرائعه
    نهارك سعيد د/عزت صاحب الاطلالات التعبيريه الجميله
    اول ثنائي استدركته ذاكرتي هو (توم وجيري)
    ولكن بعد ذلك خرجت من ذكريات ثنائيات الطفوله الي محيط الواقع الملموس
    ومن ضمن هذه الثنائيات (المحليه والضرائب),(الكشه والباعه المتجولين),(الخريف ومشاكل التصريف) ووووووو الى اخره دا لو بقى في اخر
    واذا رجعنا للقران الكريم نجد (الشمس والقمر),(والنجم والشجر)
    وايضا (وموسى وفرعون)و(ياجوج وماجوج)ووو الخ
    اما اعظم ثنائيه فهي في رأيي هي ما اهل الدانقا التي تقترن بالابداع والتميز
    لكم التجله والاحترام اينما كنتم

  17. الزهراء كتب:

    ناسف للخطأ
    اعظم ثنائيه هي ما بين اهل الدانقا ومدونتهم فهي تقترن بالابداع والتميز

  18. يا سلام يا نيام كيف فات علي أبو قبوره (محجوب سراج) و أبو دليبة… هسة العازة مرتو تكون زعلت…

    لا يضاهيهم في زمننا هذا كما قالت الزهراء سوى (توم) أند (جيرى) و الذي أتفرج عليهم مع ياسر… منتهى الهارموني مع انو مجنين بعض لكنهم لا يطيقون بعادا فابداع هذا من ذاك..

    شكرا الزهراء لكلماتك الطيبات…فعلا الطيبون للطيبات…

    الايام دي في ثنائي قاجي ما ذكر أحدهم الا و جات سيرة التاني… واحد أول حرف من اسمو أوكامبو

  19. bakriMusa كتب:

    (الصادق المهدي ) و ( هلمجرا )

    مع تقديري لسيادته

  20. nono كتب:

    الخير _الشر
    الحق_الباطل
    العنف_ الارهاب
    البداية _النهاية
    الامر بالمعروف ____النهي عن المنكر
    الحياة _والموت
    القلب _الخفقان
    ____________
    عندما يأتي الغروب
    أدرك معنى الغياب
    ومعنى الشوق لصبح جديد
    وعند المساء
    أتأمل بوجه القمر
    وأشكو لليل ذاك الإنتظار لصبح جديد

  21. حنين كتب:

    المرطب وباقى المدوناتية.
    سلامات وعاملين كيف.
    والله موضوع الثنائيات دة عاوز ليهو تحضير من بدرى ونحن فى الضواحى عندنا السعن والقربة ,الطورية والفرار,،الطورية والقدوم .الخمارة والتيبار.الملودةو المنجل .الطوبةوالمعطوبة الريكةوالطبق .المفراكةوالكنش الكانون واللدايات وهكذا …

  22. حكاية (الحق و الباطل) يا نو نو الأديبة (فدوى طوقان) عندها فيهو كلام….يوم قاعد بسمع في البي بي سي و طبعا (الرادي و العجايز) دي ثنائية لا يحلو للعجايز الا و النوم و الرادي فاتح …. تلحق تقفلو …. (فترب) يقوم يصحى…

    فسماع الرادي و العجايز ثنائيان و العجب كان بقى الرادي و العشاء بالرغيف باللبن…دي طبعا قمة الثنائية

    المهم اليوم داك أنا صاحي و بسمع….

    قال الباطل للحق “اذهب إلى المدينة و آت لنا بشيء نأكله”
    فذهب الحق و رجع خالي الوفاض
    فقال له الباطل “لم عدت بغير زاد ”
    فقال الحق “لم أجد شئ حلال آت به”
    فقال له الباطل اجلس سوف أذهب أنا، فعاد و معه زاد وفير فقال للحق تعال و كل معي .
    فرفض الحق
    قال الباطل “ما بالك تذهب إلى المدينة و لا تأتي بشيء و عندما أحضر الطعام لا تأكل معي”
    فتجادلا و قتل الباطل الحق و حرقه
    فجاء أهل الحق يسألون عنه
    فقال لهم الباطل ” لقد قتلته و ذلك رماده”
    فصنع أهل الحق من رماده حبرا … فصار الحق حبرا على ورق….

  23. ودالفتيحاب كتب:

    مساكم الله بالخير جميييييييييع
    عزت المبدع
    متعك الله بالذاكره الطيبه
    عندنا ثنائية ثنائى الفتيحاب, وثنائى أبوكدوك , اللبن والشاى ناسنّو مالكم .
    وابوالقاسم محمد ابراهيم والراحل زين العابدين محمد احمد عبدالقادر يرحمة الله..

  24. طارق أب أحمد كتب:

    قيس وليلى
    عنتر و عبله
    روميو و جوليت

    عسل و طحينه
    فول و جبنه
    شطه و ليمون

    يمين و يسار
    نقد و الترابى
    وعود و نكوص
    ديمقراطيه و شموليه

    زوج و زوجه
    نقه و نقار
    ويقولوا بهار

    رئيس ومرؤس
    كوسه و بتنجان
    والشطاره بالمجان

    وأولا وأخيرا

    كلام أهلنا الزمان

    الستره و الفضيحه متباريات

  25. البشاوى كتب:

    لمرطب المبدع
    الباسم والكوارع ديل ماثنائى عجيب لما الشمس بتغيب
    افليقا
    عاوز تعرف الاحساس بالعدل فى هذا الزمان ؟ بسيطة يابيه تقعد فى بيتك
    وتقفل عليك الباب وماتقول اى حاجة لاى زول حتى لو بالتلفون وماتسوق عربية لافى شارع اسفلت لاردمية وتبعد عن الفول والطعمية كدة تكون حسيت
    بالعدل 100%

  26. محنك كتب:

    السيد ابوحمودى افليقتنا

    شوف انا سمعت انو فى ناس تبع خليل الملفوف الملفلف بفتشوا للعدل والمساواه . ومافى زول بفتش شى الا ويكون عارفه مظبوت . يعنى ما ممكن تسال عن زول طويل او مربوع ولونه ( اخدر ) ولابس جلابية وعمة
    لازم يكون معروف معرفة تنفى جهالته عند المتلقى ويكون عرفوا العدل والمساواه فى دستورهم
    اها كان داير العدل وناقصك شوية والظلم مغبنك اسالهم … وكان كنت متخيل نفسك نص وعايز مساواه برضو بحدثوك

    اما نحنا فربونا على انو حقك تجيبو بضراعك وما يقولوا ليك قانون القانون مرات اعمى جت
    رايك شنو فى التوام الجديد العدل والمساواه … الحركة وحق … شاف وطلح … سمعنا وشفنا … الكابتن والمضيفة … الطير والباقير … طينة وعجينة

  27. زووووووول كتب:

    د/ عزت بقا ريتشوف سلاااام
    اولا اشكرك على تنبيهك بان الزوول الملطط ويبشر على ثنائى العاصمه بتاع هيك اسى دى غنيه يغنوها راجلين بواوين وليس سبعه واوات
    من اروع الثنائيات والفولات المنقسمه فى الادب العربى ثنائية ولاده بنت المستكفى والشاعر ابن زيدون فقد كانت ولاده ابنة الخليفه الضعيف المستكفى بالله وكانت تهتم بالادب والشعر ولها مجلس يقصده الادباء وقد قيل انها كتبت على ثوبها :
    انا والله اصلح للمعالى وامشى مشيتى واتيه تيها
    وامكن عاشقى من صحن خدى واعطى قبلتى من يشتهيها
    لم تستمر هذه الثنائيه طويلا فقد هجرت ولاده عشيقها وهذا ما دعاه لنعى تلك الثنائيه بنونيته الشهير وليسمح لى الدكتور بعمل كوبى & بيست لجزء من النونيه البكائيه لانو دى مناسبه كويسه لكبكبتها وبستتها :
    أَضْحَى التَّنَائِي بَدِيْلاً مِنْ تَدانِيْنا
    وَنَابَ عَنْ طِيْبِ لُقْيَانَا تَجَافِيْنَا

    ألا وقد حانَ صُبح البَيْنِ صَبَّحنا
    حِينٌ فقام بنا للحِين ناعِينا

    مَن مُبلغ المُبْلِسينا بانتزاحِهم
    حُزنًا مع الدهر لا يَبلى ويُبلينا

    أن الزمان الذي ما زال يُضحكنا
    أنسًا بقربهم قد عاد يُبكينا

    غِيظَ العِدى من تساقينا الهوى فدعوا
    بأن نَغُصَّ فقال الدهر آمينا

    فانحلَّ ما كان معقودًا بأنفسنا
    وانبتَّ ما كان موصولاً بأيدينا

    لم نعتقد بعدكم إلا الوفاءَ لكم
    رأيًا ولم نتقلد غيرَه دينا
    كسره :
    شوفتو البكا كيييف

  28. زووووووول كتب:

    الى ود الزبير والنونو سلااام
    من الثنائيات الجميله ايضا
    ثنائية الدورى الممتاز 2008& كاس السودان 2008
    وثنائية كاس الكؤس 89 وبطولة سيكافا 86 وسيكافا 92 (شوفتو الثناية دى )
    ومن الثنائيات ثنائية السبتين الاخدرين
    وثنائية الصفر والدولى !!
    وثانئية اذاعة الهلال واستاد صالحه
    وثنائية المقبره ووفاق سطيف
    وثنائية المجد السورى
    وثنائية البرنس والقاروره
    وثنائية الانسحاب والتجنيس
    كفاكم على كدا

  29. زووووووول كتب:

    ابكرون سلاااام
    نسينا ثنائية صديقنا ابكرون وموضوع جلسن شوف وا حلاتن

  30. محنك كتب:

    قلت لى يا زوووول لما مشيتو الاردن مشيتو تتعالجوا بس ………. ياخى الدكتور اكتر شى بكتب تلاته مرات فى اليوم

    انت فى تسعين دقيقة اختو كم لمان وقفنا من العد … اختوها مربوطه

  31. زووووووول كتب:

    محنك سلااام
    ماشاء الله لياقتك فل اليومين ديل .
    تعليقك عن مباراة الوحدات يصلح لموضوع السباعيات الذى نطلب من الدكتور انو يديهو وجهة نزر .
    كسره : المحصله النهائيه 7/8 فى مباراتين بينما محصلتكم 1/2 وكب زوغه فى المباراتين احسب كويس

  32. nono كتب:

    ماتنسي ثنائية زووووووول وزووووووولة

  33. زووووووول كتب:

    زوووووووله دى وين يا نونو

  34. ابكرون كتب:

    وثنائبة الهلال في المريخ يوم الجمعة بعد بكره ناسنها ليه؟؟؟؟؟؟؟؟

  35. nono كتب:

    ابكرون ________هفصة

  36. ابكرون كتب:

    بحبهاااااا شديد هفستي

  37. و طبعن يا نونو
    نحن البنطلون و القميص
    و التي شيرت و البنطلون للشباب و في رواية أخري البرمودا
    و انتو الجيبه و البلوزة …. لكن يا نونو مالو لبس البنات بقي بتشابه شديد كدا

  38. ودالزبير كتب:

    زووووول

    برضو نسيت أهم ثنائيه في التاريخ الحديث

    المريخ والمؤتمر الوطني

    علاء الدين بابكر والكوتشينه

    أكرم الهادي سليم وعزالدين الدحيش

    المريخ والحكم البتسواني

    صديق على صالح ومصطفى توفيق

    البصمه وعلاء الدين يوسف

    كفايه ولا أزيدك

  39. nono كتب:

    أبكرون: بالله يا هفسة ماداير اى تاخير, اول ماتسمعى بيب بيب اتلعى توالى
    هفسة: ماشاءالله ماشاء الله يا ابكرون اشتريتو أربية ؟
    ابكرون: ابداً اشتريتا صفارة!!!!!!!!!!

  40. حاج أحمد السلاوى كتب:

    أبكرون ..
    يا خ هفسة دى أرحمها شوية .. اشترى ليك عجلة وأردفها معاك الكدارى الكل يوم دة …
    وكمان شايل ليك صفارة .. إنت اصلك أحمد قنديل ؟؟ ( أحمد قنديل .. الشباب ديل ما بيعرفوه طبعن …. قلت شنو يا سهيل ؟ )
    غايتو الحق رقبتك .. يا ابكرون .
    ودالفتيحاب … وينك .. يا مان ؟ ..لا حاسدين .. لا بغرانين… الكنكشة دى لمتين ؟
    الثنائيات برضها موجودة فى جدة :
    دز يسن شمباتى ..ود. محمد عبدالله
    ودالفتيحاب ..وحمد عبدالله
    السلاوى .. وعتبانى… ( ودى حصلت فيها طرفة سغيروووونة لأنو الجماعة أصحابنا بيشوفونا دااااائما مع بعض ..يوم من الأيام مساءأ منتصف الأسبوع أدركتنى صلاة العشاء قرب أحد المساجد.. وبعد الصلاة قابلنى أحد اصدقاء المجموعة بتاعتنا كلها …فبادرنى طوالى بالسؤال .. وووين عتبانى فردتك ؟ )

  41. ابكرون كتب:

    عزت : لبس بنوتنا و(مرتاتنا)..مش بتشابه وبس وزيد عليه (شين)
    يا حليل :
    * وخطاكي وفتنة التوب الأنيق…..
    * شوف عينى الحبيب بى حشمة لابسه التوب والتوب زاد جمالو وزينه يامحبوب
    * ولبسة الطرحة وغيرت بالتوب

  42. aflaiga كتب:

    ابكرون : والله اسى ما تفرز الولد من البت الا بعلامات التنوين الظاهره على اخره كان ضمه كان غيرو ..
    تمرحلت الازياء فى بلادى كالاتى :
    البره بره والجوه جوه
    البره بى جوه والجوه بى بره
    الجوه بى بره ومافى بره
    الجوه بى جوه خالس ومافى جوه
    طيب فضل شنوووووووو؟؟

  43. د.ياسين شمباتى كتب:

    ابونا السلاوى..والله كلامك دا كلام حسادة عديييل كدة..خلى الزول فى حالو..

  44. زووووووول كتب:

    ود الزبير سلااام
    بس قصة اكرم وعزالدين دى زودتا المحلبيه فيها شويتين
    برضو نسيت ثنائية المؤتمر الوطنى ومعسكر الهلال فى دارفور جاييك بعد شويه جهز المندى وسلطة الفواكه

  45. د.ياسين شمباتى كتب:

    زوووووول الصديق..انت ود الزبير دا دايرين ترجعوهوا بورتسودان ولا شنو؟؟اكل لى معاك عليك الله,,واطلب واحد كسرة بى مفروك اخضر..

    افليقا..راجيك للبوست بتاع الشايقية!!!

  46. aflaiga كتب:

    شمباتى : بركة الخشيت الشبكه . ما قلنا خلو الشفقه اللتكم ..
    دق على صالح ضرورى …
    زووول : بالله طلعو الاتنين هناى هلال مريخ ؟؟ من اسى انا موردابى ..

  47. زووووووول كتب:

    شمباتى سلااام يا دكتور
    نحن ما بننساك راح نطلب المفروك بس انت ما تنسانا من صالح دعواتك وخليك معانا بالنيه فى سيدى بيه
    افليقا سلاام
    اول عازمنك معانا مندى فى سيدى بيه وتانى المورده ما جايبا حقها خليك نيل حصاحيصا .

  48. الزهراء كتب:

    يابلدي يا حبوب
    ابو (جلابيه)و (توب)
    سروال ومركوب
    جبه وصديري
    سيف وسكين
    يا سمح يازين
    روعه في تنسيق الثنائيات
    نهاركم سعيد اخواني الاعزاء

  49. nono كتب:

    ثنائى النغم بتكون من زينب خليفة وخديجة

    يااول حبيب__من دون الاحبة_ اظهر لية غراموا_ بادلني المحبة
    ______________________________________________

    وانا ما اتغيرت ومااتنكرت ليك

    مانسيت الريدة ماااااااااا شنوا مابعرف دااااااااااااااك

  50. الزهراء كتب:

    د/شمباتي لك التحيه والتجله

  51. د.ياسين شمباتى كتب:

    الزهراء !!!!!! السلام عليكم ورحمة الله..حمدالله على السلامة وبركة بالطلة..ارجو التأكيد..

    افليقا..علم و سينفذ..

    زووووول..نسأل لك الله الذى لا ينسانا ولا ينساك..انت طوالى فى الخاطر..لكن حلوة نيل الحصاحيصا دى!!

  52. طارق أب أحمد كتب:

    بس معقوله تنسوا الكسره و الملاح

    ود الزبير
    بالغت قنبلتك دى صعبه شديد
    هسى لو واحد قال ليك وضح و أفصح
    نبقى زى عادل إمام ((و دى بيكتبوها إزاى يا حسين))

    آخر ثنائيات أفليقا و نونو

  53. د.ياسين شمباتى كتب:

    اب احمد..كلامك دا بيجيب ليك الهوا,,اخير تسحبو!!

  54. ودالفتيحاب كتب:

    دياسين والاخوة السمار
    مساكم الكريم
    كتر خيركم على الزكرى الطيبه

  55. ابكرون كتب:

    ود الفتيحاااب :يا حليلك بقيت تظهر في الفسحة وبس …ما اجمل الزوغه منه …!
    شمباتي : ياخ ما تحتااار كده بسيطه قارن البروفايل الحالي مع القديم تلقاااهم سيم سيم ..
    طااارق : نو———-نو في حد ذاتها ثنائي..
    افليقا قلته لي : ( الجوه بى جوه خالس ومافى جوه ) يعني بر/جو….يا شفيف نحن بكل اسف حاليا واكرر حاليا شعب ما بعرف يلبس وكان لنا من قبل هوية ملبس هبشو التاصيل ولبسنا بقي لحم (نيفة)…يعني برضو هؤلاء دخلوا في اللبس وبوظوه لبس المرأة كان حشمه وجميل وبقي صحن فته اما لبس الذكور فكان :جلابية بيضاء (لاحظ بيضاء) وعمة ومركوب وشال في المناسبات …اما الشباب والموظفين فزيهم افرنجي منتظم (يعني بنطلون وقميص _مشنط _)…ومشنط دي يا شباب يعني ….(محشي) وفي رواية اخري (مشكوك) القميص جوه البنطلون ..وبينهما حزام جلد جميل ….) ….خد عينه الآن وانظر حولك احد المواقف وشاهد :
    * جلابيه وسخانه وما معروف لونها بدون طاقية وسفنجة…
    * طاقية ….وعمه في الكتف
    * عراقي ولباس طويل لونهم زي ارضية الموقف العام
    * بنطلون قصير وقميص ببره وسفنجه
    * بدله وكرفته في عز الصيف (يمكن محامي)
    * لباس وفنله لون ( التملة) شماسه فما دون
    * اثمال لا توصف (شحادين وهم الاغلبية في المواقف)
    * جلابية جيب بورا وقدام وجيوب انفية اخري….(الود خلاااص الخليفة عبد الله التعايشي)
    لحم راس ….شاهدت معظم شعوب العالم لم اري مثل تناقضاتنا حتي في الملبس……اما (بنوتاتنا )…ونسواناتنا )…دي عايزه ليها بوست براهااااااا

  56. البشاوى كتب:

    ابكرون
    مالك شاديها مع ود الفتيحاب؟ لو مشكلتو الزوغان ماعارفو كيف اديهو إيميل
    أخونا العارف بالزوغان أفليقا وحيظبط ليهو امورو تمام بس ماتنسو تدفعو البياض

  57. د.ياسين شمباتى كتب:

    ود الفتيحاب..صباح الخير..دا شنو الوقت الداخل فيهو دا !!!؟؟ الله!!! الحاصل شنو؟؟؟

    ابكرون..زولك طلع معلم وتفتيحة فى الزوغان!!! لكن ملاحظة البروفايل دى قوية..تسلم..

  58. طارق أب أحمد كتب:

    خبر هام

    نشرت الصحف السودانانونيه خبرا هاما صباح اليوم مفاده بأن هناك جهة ما ((لم يسمها المصدر )) تنظم و تخطيطط لعمل مسابقه لأختيار أجمل الثنائيات بالترشيح ثم الأقتراع
    نطلب من صاحب البوست أفاده عاجله

  59. nono كتب:

    د/عزت ارجع بيك للزمن مرة بخصوص

    نحن البنطلون و القميص

    و التي شيرت و البنطلون للشباب و في رواية أخري البرمودا

    و انتو الجيبه و البلوزة …. لكن يا نونو مالو لبس البنات بقي بتشابه شديد كدا

    برضوا…..
    ابكرون : والله اسى ما تفرز الولد من البت الا بعلامات التنوين الظاهره على اخره كان ضمه كان غيرو ..

    كلكم راع وكلكم مسئول عن رعيته

    من حديث عمر قال: قال رسول الله صلى الله عليه وسلم: {كلكم راع وكلكم مسئول عن رعيته، الرجل راع في أهل بيته ومسئول عن رعيته، والمرأة راعية في بيتها ومسئولة عن رعيتها، ثم ذكر الولاة، ثم قال: ألا كلكم راع وكلكم مسئول عن رعيته }.

    يا أيها الأب في البيت أنت راع كلكم راعٍ وكلكم مسئول عن

    رعيته، البيت مسئولية: يَا أَيُّهَا الَّذِينَ آمَنُوا وقُوا أَنْفُسَكُمْ وَأَهْلِيكُمْ نَاراً وَقُودُهَا النَّاسُ

    وَالْحِجَارَةُ عَلَيْهَا مَلائِكَةٌ غِلاظٌ شِدَادٌ لا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ

    [التحريم:6].

    كسرة/ شمااااعة الشاااااااااااارع اتغير الحاصل شنوا ماتعلقوها في الشارع ارجعوا البيوت شوفوا الاولاد البنات بيطلوا من البيت كيف………….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s