20 دقيقة بس ؟

Posted: الأربعاء,25 فبراير, 2009 by الفاتح جبرا in اخرى

الكثير يبحث عن سبب هذه (المشكلة) والبعض يبحث عن حل لها والقلة خاضت تجارب في محاولات للتخلص منها ولكن دون جدوى ! إنها عزيزى القارئ مشكلة (الصلع) أو تساقط الشعر ، شخصياً فقد عانى (العبدلله) من مشكلة الصلع فى عمر مبكر جدأ وتحديداً فى نهاية المرحلة الثانوية حيث بدأ الأمر فى شكل (جلحات) سرعان ما تم (إلتئامها) لتصير (صلعة) كاملة الدسم ! ومع أننى أصنف نفسى من ضمن أصحاب (الصلع) المزمنة التى طال عهدها إلا أننى يوماً واحداً لم أفكر فى إستخدام أى مستحضر طبى أو (شعبى) لأقناع (شعر رأسى المختفى) للخروج للحياة الدنيا ، وذلك لأننى من اشد الموقنين بأن ما أفسده الدهر لا يمكن لأحذق (عطار) أن يصلحة . هذه الرمية كما يقول (دكتور البونى) سببها إعلان فى (صفحة كاملة) طالعته بالأمس فى إحدى الصحف عن عقار (وطنى) – يعنى سودانى- لمعالجة (الصلع) ، إلى هنا والأمر عادى (شركة بتعلن عن منتجاتها) ولكن الأمر غير العادى أن هذه الشركة قد قامت بتحديد المدة الزمنية التى يبدأ فيها (شعر رأسك) بالنمو إذ تقول وبالبنط العريض والحرف الواحد (يبدأ النمو بعد 20 دقيقة من إستخدام المستحضر) ! أى والله twenty minutes !! ولم تنس الشركة من أجل تعضيد هذه (الفرية) من إيراد أرقام شهادات التحليل من وزارة الصحة (السويسرية) و (السودانية) و(هيئة المواصفات) ورقم براءة الإختراع العلمية وأرقام التراخيص (الصيدلانية) !! يا بختكم يا اصحاب (الصلع) المستديرة والمربعة ومتوازية الإضلاع !! فقد جاءكم (الفرج من الداخل) وها هم علماؤكم الأفاضل الذين يعيشون (المعاناة) جنباً إلى جنب مع أفراد (الشعب الفضل) قد أخرجو لكم منتجاً سحرياً من أن تمسح به على أماكن (الجفاف والتصحر) ثم تعد (لحدت مية) حتى تجد أن شعر رأسك قد (نما) ووصل إلأى عنان (السماء) !! بعد قراءتى للإعلان هتفت قائلاً : – (عشرين دقيقة يا مفترين؟) طيب ليه ما (خمسة) ! ده (الأكل علشان يتهضم) عاوز ليهو (تلات ساعات) !! أنا لست صيدلياً ولا أفهم فى (الأدوية) إلا مقدار فهمى للغة (الأوزبكستانية) ولكن على الأقل أفهم فى (الصلع) ! وأعتقد أن هذه (العشرين دقيقة) التى ذكرها الإعلان غير كافية لأن تتسائل فيها (بصيلات الشعر) عن (المويه الكبت فيها دى شنو؟) ! تدعيماً منى لهذا المنتج الوطنى السحرى (فخر الصناعة السودانية) كما يقول الإعلان فأنا اتبرع لهذه الشركة المنتجه بهذه السيناريوالإعلانى : – يجلس (كمال) بجانب عروسته فى (الكوشة) وعلامات الحزن بادية عليه يأتيه صديقه (صلاح) الذى يفاجأ : – مالك يا (كمال) الليلة يوم فرحك حزين ومكتئب كده؟ العروس طلعت (ماسورة) ! – يشير بيده علامة (لا) – شنو؟ طيب الفنان طلع (ماسورة) ؟ – يشير بيده علامة (لا) – طيب مالك ؟ حاصل شنو؟ – يشير بيده نحو (صلعته) التى تلمع مع أضواء الحفل ! – معقول يا كمال الحزن والإكتئاب ده كلو من (الصلعة) دى؟ – يهز رأسه فى حزن بالإيجاب ! – طيييييب أنا عندى ليك مستحضر سحرى بس 20 دقيقة وشعرك ده يقوم ! تعال معاى ينزل (كمال) من (الكوشة) ويتجه مع (صلاح) إلى خلف الصيوان بينما تظل العروس فى الكوشة تتلقى التهانى ، بعد قليل يأتى (صلاح) ومعه (كمال) مبتسماً وقد إختفت (صلعته) ليجلس فى كرسى العريس وما أن تراه العروس حتى تقف مفزوعة : – سجم أمى الراجل ده الجابو قعدو جمبى شنو؟ صوت جهورى : لو عندك صلعة ما تخليك (تعيس) عشرين دقيقة وإنت تقعد فى كرسى اتخن عريس !! فقط إستخدم مستحضر (خدعوك السحرى) لإنبات الشعر (الفورى) !!

كسرة : لو وزارة (الصحة) ، وهيئة (المواصفات) وإدارة (الصيدلة) ، والشنو ما بعرف داك كووولهم بيأكدوا (كما جاء فى الإعلان) بإن هذا المستحضر يجعل الشعر يبدأ فى النمو بعد (20دقيقة) من إستخدامة هذا يؤكد فعلاً أننا نعيش فى عهد (البكور) !!

 

Advertisements
تعليقات
  1. ود المهدى كتب:

    والله يا دفعه احسن حاجة كان تجرب وتشرط عليهم اذا الشعر ما طلع في 20 دقيقة فلوسك مرجوعة في مسماها ولا شنو؟
    طيي ما يشوفو مستحضر لمشاريع التنمية الواقفة من ما هلو علينا؟ عش رجبا تري عجبا ولسة اخرها ماشفناهو زي ما بيقول حاج السلاوي

  2. Stricker كتب:

    ود المهدى – انا بتبرع ليك بالتجربة
    لكن – يكون فى زوووول محامى قاعد – عشان القضية والتعويض – اصلن ولدكم الايام دى – اباطو والنجم !!!! ( وش ضاحك – لما ببكى )

  3. ألفاتح جبرا كتب:

    ود المهدى

    شفتا المبالغات دى يا دفعة !!

  4. ألفاتح جبرا كتب:

    Stricker

    ( وش ضاحك – لما ببكى )

    دى حلوووة !!

  5. زووووووول كتب:

    استاذ جبرا سلااااام
    ماشاء الله والله بدعتوا عديل كدا (واو الجماعه للسودانيين كووولهم ) قلتا ليا عشرين دقيقه بس والحكايه تختفى .
    والله يا جبرا لو الصلعه بقت محلوقه بالموس عشرين دقيقه ما تعمل ليها حاجه خليك من (الزحف الصحراوى ) .
    بالمناسبه يا جبرا طبعن دى نقاط ضعف لكثير من الناس وممكن تخم بيها اى زووول
    معالجة الصلع
    الضعف الايه كدا
    ازالة التجاعيد
    كسره :
    انتا يا زول ما سمعتا بانو السودانيين انتجوا علاج للسرطان والايدز(زيت الحبه الشنو ما بعرف دااك ) صلعة شنو ال بتغلبهم اتوكل وجرب كدى تلت ساعه ما كتير بعدين السعر بكون مناسب وكدا .

  6. bakriMusa كتب:

    الاستاذ جبرا .. وكل (المصلعين ) ومن في الطريق سائرون .. الفين سلام
    انقل لكم مايلي وكل واحد (يصنف ) نفسوا :ـ

    دشن أستاذ مصري في علم الاجتماع جمعية جديدة للصلع تسمى “جمعية الرأس الأملس” لتصبح بمثابة أول تجمع للصلع في مصر يهدف لإبراز مزايا الصلع وتبديد مخاوف المقبلين عليه، مع تحديد أسباب الصلع وأنواعه وكيفية مواجهته.
    والجمعية تضم في عضويتها حاليا “عددا كبيرا من أصحاب الرءوس الملساء”، وهدفها هو “تدعيم الرضا عن النفس والدعوة لتغيير نظرة المجتمع إليهم، وتأكيد أن أصحاب الرءوس الملساء أبرز علما وأطيب قلبا، ومنهم معظم الشخصيات البارزة”، بحسب بيان نشرته على الإنترنت.

    وسبق أن دشن مؤخرا عدد من شباب الخليج الصلع جمعية شبيهة للصلع ومنتدى على الإنترنت باسم (صلعيات) على منتديات (الرس إكس بي)، حصروا الاشتراك فيه على الصلع فقط، وخصصوا فيها صفحات باسم (صلعة الواحة) و (صلعة الأدب) و (صلعة القشرة) و (صلعة الفكر)، على أن يلقب أعضاء الجمعية بألقاب قريبة من الصلع.

    وبحسب قواعد الاشتراك بالمنتدى فإن العضو المبتدئ يسمى (عضو قشرة)، وإذا كتب في المنتدي أكثر من 30 موضوعا يسمى (بداية صلعة) ومع قدم عضويته يسمى (عضو أصلع)، أما إذا تعدت مواضيعه 100 مقال فيطلق عليه “أصلع جدير بالاحترام”.

    وقال أعضاء الجمعية في التعريف بهم: “إخواني الصلع فلنتحد معا ضد الحملات البربرية ضد الصلع والمصلعين ونحارب الباروكات وزراعة الشعر، فنحن خُُلقنا بهذا الشكل وسنظل كما خلقنا الله متفاخرين مجاهرين بصلعاتنا حتى إن لم تعجب البعض.. ابقوا على صلعاتكم ولا تفرطوا بشبر منها، فهي تبقى عزيزة وإن جارت عليها المحشات!”.

    وبدأت تنتشر مؤخرا ظاهرة الحلاقة بين الشباب العربي بالموس وإزالة شعر رءوسهم تماما وتحويلها للصلع، وبشكل خاص بين لاعبي الكرة أو المطربين الشباب الجدد، لكن الإحصاءات تؤكد أنه مقابل كل ثلاثة رجال في مصر هناك رجل أصلع، أي أن ثلث الرجال فقدوا شعر رءوسهم، الأمر الذي يسبب لبعضهم حرجا شديدا ويصيبهم ببعض الأمراض النفسية.

    وتتلخص أهداف “جمعية الرأس الأملس” المصرية في الوصول بطريقة غير مباشرة إلى عدم وقوع أصحاب الرءوس الملساء في مشاكل نفسية بحيث يتقبلون أنفسهم كأشخاص طبيعيين، وكذلك عمل أبحاث ودراسات لتحسين الصور الذهنية للجماهير تجاه الرءوس الملساء والقضاء على التلوث القيمي، والاهتمام بالمضمون دون الشكل.

    الصلع أنواع!

    وقامت الجمعية بتقسيم الصلع إلى خمسة أنواع هي (الموبر) وهو خيط رفيع من الشعر يلف باقي الرأس، و(المجلح) وهو عالي الشعر من الجانبين وفي الوسط فارغ، و(الأصلع العادي)، وهو صاحب الشعر الخفيف على الجانبين وباقي الرأس فارغ.

    والنوع الرابع (الصلع)، وهو الذي يطول فيه جانب من الشعر لتغطية باقي الرأس، أما الخامس فهو نوع من الصلع يطلق على من شعر رأسه منسحب إلى الخلف تدريجيا وسوف ينضم بعد مدة بسيطة لعضوية الجمعية

  7. ود المهدى كتب:

    الاعلان ده في التلفزيون شكلة ح يكون واحد مصلع علي الزيرو ويدخل علية صاحبة ويقول لية جبت ليك مفاجاءه الموسم ويقول ليه غمض عيونك ويطلع العلبة بتاعة المنتج ويمسح ليه مسحة خفيفة كدة – تظهر في الشاشة بالخط العريض (وبعد 20 دقيقة) ويدخل صاحبة تاني وهو يحمل مراية ويقول لية شوف ده منو – يقوم الراجل بعد ما يشوف الشعر يغمي عليه – و………
    صوت جهوري يقول – مافيش صلع مع منتج زيت القرع ……………
    زي الجماعة الاكلو الفراخ في التلفزيون زمن انفلونزا الطيور
    والسلام

  8. ابكرون كتب:

    هوووووي يا جبرا اعمل حسابك
    قالو المستحضر ده فعلا بقوم الشعر خلال 20 دقيقه لكن النمو ما بتوقف يستمر الشعر في النمو ليصل الي امتار خلال اسبوع ويستمر ويبتدي يتغذي بخلايا الزول وياكل فروة الراس وبعدها_شيل باقي عمري_ (ياكل الراس)….ويجو يلقوك كومة شعر في سريرك وما تنفع لاي شي الا لتنجيد مرتبة…..
    غااااايتووووو مخير…..لا عذر لمن انذر

  9. نيام كتب:

    البروف الممتع الدانقوست الحفارين…
    “وأعتقد أن هذه (العشرين دقيقة) التى ذكرها الإعلان غير كافية لأن تتسائل فيها (بصيلات الشعر) عن (المويه الكبت فيها دى شنو؟)”
    ياربي مطرة ؟لا لا دي تكون فكرة جديدة ؟ لا لا دي خلي بالكم جبرا دا بسخن في حبل افكارو؟وبعدين تنط شعرة منسية في الكورنة الجنوبية من الصلعة تقول ليهم تعالو نعمل اجتماع قمة ولازم القمة تكون عندنا بحكم انو احنا من الشعب القديم الاصلي من الزمن الجميل لمان كان سيد الصلعة بسبسب!
    تقوم بصيلة من (الوافدات الجدد) تقول ليهم بما اننا جيل المستقبل فالقمة تكون بربعنا؟وتقرر البصيلات الجديدة المتجددة ان تعمل لجان شعبية و اجتماع في كل كورنر من الصلعة فتنمو الصلعة في شكل قيتوهات شعرية او مستعمرات مثل مستعمرة كفار شاعرين و مستعمرة كفار جبرا و التي كانت تسمي قبل استعمال الزيت كفار سعسع ..ونسبة لعدم توافق البصيلات الوافدة مع الشعيرات التليدة تظهر علي ارض الواقع كيانات شعرية لانقاذ الصلعة و التي لو لا عناية الله بها لانقسمت الي عشرين صلعة في كل دقيقة صلعة و لاصبح البروف برؤوس نووية متعددة..
    استرايكر:
    ياولدنا احمد الله اداك وش ضاحك لما يبكي مش احسن من وش يبكي لما يضحك..

  10. ود المهدى كتب:

    عندما كنا في بورتسودان نزل علينا ضيوف بعض افراد من احد الفرق المسرحية وكان باقي الفرقة ينزل في حي المطار – ومن ضمن ناس حي المطار استاذ عندما تراه تظنة هاني شاكر من كثرة شعرة والتسريحة المنسقة. وفي يوم بعد نهاية العرض طلبت منه ان يقضي الليلة معانا فاعتذر بحجة انه لم يحضر البخاخ معاه- وعلي الفور تبادر الي ذهني ان الاستاذ ممن يعانون من مرض الازمة . وعندما اجتمعنا الي العشاء سألت احد افراد الفرقة سؤال بري – هو استاذ فلان ده عنده ازمة – فاستغرب الحضور وقالو لي كلهم بصوت واحد – لا – ليه- قلت ليهم والله طلبت منه ان يقضي الليلة معانا فاعتذر بحجة انه لم يحضر البخاخ معاه. فانقجر الجميع بالضحك وقالو لي البخاخ بتاع الاستاذ – ده هو مثبت الشعر – اذا ان الاستاذ من اصحاب الروؤس ذات الانتاج الغزير وسوء في التوزيع- فهو يقوم بتغطية الاماكن المصلعة بالشعر الموجود وبعد ذلك يدية بخة لزوم التثبيت وكدة لحدي تاني يوم.
    كسرة: محتاجين موضوع عن اسباب الصلع وما يترتب علي المصلعيين من اثار اجتماعية. ولا شنو؟

  11. نيام كتب:

    ودالخلا:
    “ويا دووووبك عرفت السبب!!!!!!!!)” و عرفت يا ودالخلا؟؟؟؟اها سمح العزّاب ديل صلعوا لي شنوووووووو؟

  12. مُخير كتب:

    الأستاذ أبو ناجي
    الحبان في كل مكان
    دهن دهن كركار الصلعة تولع نار … تبش تبش عجور الصلعة تولع نور….
    شايف منطق جبرا في موضوع الصلع وقع لناس كدة في جرح، التصالح مع الذات والتعايش مع الأمر الواقع يكسب صاحبه راحة بال، لكن الناس الما مقتنعة ومتضايقة منها دي العايشة مشكلة، كان صديقي عبد الحميد الذي بدأت صلعته في الإندياح من مدرسة الأميرية المتوسطة مُعجب بوالده وصلعة والده أشد الإعجاب لدرجة إنو ما إنتظرها تكبر براحتها وساعدها بالموس، وكان يردد دائماً الصلعة للرجال، والراجل الشعر يسوي بيهو شنو يعني الرجال حيدوا شبال زي البنوت ؟؟ لدرجة إنو الفكرة عجبتنا وقامت الشُلة كلها حكت معاه صلعة نمرة واحد الأمر الذي أغضب إدارة المدرسة وعوقبنا جرائه بالجلد في طابور الصباح… الأولاد عاملين شفوت وطالعين بموضة ما ليها معنى.
    هناك مشاهير في الرياضة والفن في ريعان الشباب ورموز للوجاهة والموضة بصلعهم أمثال زين الدين زيدان أسطورة الكرة الفرنسية، وأندرية إغاسي في عالم التنس، والنجم اليافع الصاعد بسرعة الصاروخ في عالم الفورميولا ون لويس هاملتون، وفي عالم السينما بول براينر وتيلي سافلاس بطل مسلسل كوجاك الشهير ، غير أن هناك مشاهير من عالمنا الثالث وتحديداً من الجارة العزيزة مصر معقدين من صلعهم من سنة قطم أمثال سمير غانم وعزت أبو عوف وأشرف عبدالغفور وغيرهم ممن يرتدون شعر مستعار بالسنين.

  13. nono كتب:

    التحية جبرا/ الخوة اصحاب المدونة
    ليه
    ************
    ضيعوك
    ***********
    ودروك
    *******************
    انت مابتعرف صليحك من عدوك
    *******************************
    استغلو الطيبة في قلبك
    *********************************
    وبي اسم الصلعععععععععععععع خدعوك
    ************************************
    حتى من كلمة حنانم وودادم حرموك
    ******************************
    الله ياخد ليك حقوقك ويجازي الظلموك

  14. nono كتب:

    و حول إذا ما كانت المرأة تتجنب الارتباط بالرجل الأصلع أم لا ، قام مركز هلفانتينا بأمستردام بعمل استطلاع ، تبين من خلاله أن أكثر من 75 % من النساء اللاتي شملتهن الاستبيان يجدن الرجل الأصلع أكثر جاذبية من غيره وأكثر تميزا وعاطفة من الآخرين .

    وكشفت دراسة إحصائيّة أمريكيّة أنّ النساء ما بين 23 و 66 سنة يجدن الرجل الأصلع أكثر ذكاء ونضجًا من سواه ، وأكثر استعدادًا للنجاح في الحياة لأنّ اهتماماته تتركّز على رجولته بأبعادها الإنسانيّة ومعانيها العميقة.

    وبالرغم من ذلك نجد بنات وسيدات يرفضن الرجل الأصلع بالرغم من أنه يتمتع بقدر كبير من الرجولة وجاذبية المظهر

  15. nono كتب:

    لو دااااااايرين نعمل استبيان في السودان مااااافي مشكلة؟؟؟؟؟؟؟؟؟؟؟؟

  16. aflaiga كتب:

    البروف : اوع تصدق الكلام ده لانو اى شيئ بيقوم سريع بيموت سريع !! ولو مات هو بيكون عندو اثار جانبيه ..
    ود الخلا : دى البت قالت كده طيب الاولاد الطلبه قالو شنو ؟؟
    نيام : اسباب صلع العزابه معروفه انو التجارب بتتم خارج المعمل …

  17. aflaiga كتب:

    نونو : الكلام الاخير ده تبع الدراسه ولا راى ساكت ؟؟

  18. زووووووول كتب:

    نونو سلااام
    و حول إذا ما كانت المرأة تتجنب الارتباط بالرجل الأصلع أم لا ، قام مركز هلفانتينا بأمستردام بعمل استطلاع ، تبين من خلاله أن أكثر من 75 % من النساء اللاتي شملتهن الاستبيان يجدن الرجل الأصلع أكثر جاذبية من غيره وأكثر تميزا وعاطفة من الآخرين .
    كسره : والله يا نونو بتبالغى اديييل كدا بعدين ذكرتينى نكته
    واحد اصلع اصابته حاله نفسيه (جراء) صلعته اللامعه
    ذهبوا به الى الطبيب النفسى فاراد الطبيب ان يخفف عليهو
    ــ يا اخونا الصلعه دى بتعنى انو الزوول المصلع دا مخو (كتير ) وزول ابو الافكار وكدا
    ــ خرج المصلع (فطفق) يسأل المصلعين فى الشارع
    * انت يا اخينا شغال شنو
    دكتور
    * وانت؟
    استاذ جامعى
    *وانت؟
    والى ولايه
    *وانت ؟
    وزير
    *وانت؟
    عتالى فى سوق البصل
    *بالله ما تختشى دى شغله دايرا ليها صلعه
    كسرة الكسره :
    بالله يا نونو الجاذبيه والتميز العاطفى والذكاء والنضج دى دايرا ليها صلعه ؟

  19. nono كتب:

    الشاعر الكبير المصلع قال

    عيرتني بالصلع وهو وقار
    ____________________
    ليتها عيبتني بما هو عار

  20. حاج أحمد السلاوى كتب:

    السُمّار الكرام كووووولهم أبان صِلع والماعندهم شعر !!!!!!!! ( مقصودة )
    زمان كان البنات لا يرغبن فى الرجل الأصلع لحد ما المسألة بقت فى زمننا الحاضر موضة لكل من هب ودب واليسوى والما يسواش.. وكانن البنات بيغنو اغنية فيها أريتو أب صلعة طاير ( واحد من الكواش فديل يتم الباقى الما بعرفوا شنو دااااااك) ..
    غايتو لما بدأ التصحر والجدب يشقان طريقهما فى الرأس بدانا نشعر بأن المسألة أصبحت فى طريقها فى العد التنازلى..وقلنا نسأل أهل الذكر قبل أن يسفحل الأمر فذهبت إلى إستشارى فى الأمراض الجلدية والمتعلقة بفروة الراس علنا نجد عنده الترياق المضاد للتصحر .. ولكن لحسن الحظ أفادنى النطاسى البارع بأن الصلع مفيد جداً للرجل من عدة نواحى أنا متأكد إنو اغلبية المتأهلين يعرفونها… وما كلمات أختنا نونو منكم ببعيد …( اقروها صاح بفهم عميق ).. ولقيت إنو الشغلة مكلفة جداً وحتقعد باقى عمرك كووووولو تدهن فى شعرك بالأدوية والكريمات ومسالة ما ليها أول ولا آخر ..وتوكلنا على الحى الدايم..ما أصلو الباقى باقى..تعددت الأسباب والصلعة واااااحدة … أما اصحاب التجارب الفاشلة والغير معترف بيها …خارج المعمل فعليهم أن يراجعوا أقرب مأذون…
    طبعن يا اخوانا جيلنا أنا واخوانى الكواشف ويمكن شوية كمان الناس البعدنا حضرنا زمن موضة الآفرو لوك ( بالله كان شكلك كيف .. يا أبو عصمت ؟) ودلوقت لما أشوف بعض الصور القديمة أضحك على نفسى وعلى الهبل الكنا فيهو.. لكن تقول شنو … زملاءنا كانو كلهم على نفس الهيئة ..وأكثر شىء غايظنى لحد حسة صورة الزفاف ( مع عواطف طبعن ) أم تِفة ..غايتو جنس غايتو ..خلوها سااااكت بس .

    أخونا الكاشف نيام .. صلع العزاب دى موضة سااااااكت ..إنت ما حدسوك .. ما قالوا ليك ؟؟؟ ( الله يرحمك يا سيد خليفة ).
    ودالخلا .. الطالبة النجيبة دى العرفتها وهى طايرة .. اكيد بقت عميد كلية البيطرة لا حقاً … موش ؟…ولكل أصحاب الصلع قديما .. ومستقبلاً ..العِمم والطواقى راقدة بالكوم .. وعلى قفا من يشيل ..حد شاف وحيد سيف أو سمير غانم..ومن لف لفهم… من غير باروكة ؟

  21. nono كتب:

    لا تدمن على ارتداء الذي القومي لإخفاء الصلع، فهذا يؤكد أنك تعاني من عقدة «الشعر». لا بأس أن تلجأ له في بعض المناسبات، لكن لا بأس أيضا أن تلبس «صلعتك»بثقة لأن الآخر حتما سيراها في يوم من الأيام، وتأكد أنك ستشعر بحرج أكبر كلما أجلت الموضوع. إذا لم تتقبل مظهرك كيف تتوقع أن يتقبله الآخرون، تذكر دائما أن رائحة عدم الثقة لدى الرجل تنفر المرأة وتبعدها.

  22. مهيرة كتب:

    سلاااااااام بهنا تاني
    اب صلعة لدينا مميز ان فلابد ان يكون سيد راي
    واكان سيد راي عندنا برضو معروف لمان تقول اب صلعة
    يعني الدولار وبرضو مقيم يعني في الحالتين قيمتو كبيرة اكان
    قرش ولا فهم ومرات الصلعة كناية عن العبقرية كما طفولتنا
    عبقرينو ابصلعة في ميكي جيب هو المخترع والذي يجد حلولاً
    لكثير من المشاكل المعقدة والبسيطة وخادمة لمبة الذي يحوي
    له بالافكار والاختراعات!!!!!!!!
    عشان كدا الصلعة عندنا مقيمة$$$$

  23. مهيرة كتب:

    وانتشار الصلع لدرجة ان كثير من الشباب اليومين ديل يعدوا مشاريع صلع
    من الجلحات الواصلة لنص الراس من كترت الهموم والتفكير لكن في الثقافة السودانية الممتدة عبر الاجيال بنشكّر سيد الراي والفهموالفارس الهمام والاسد النتر واسد الكدادة الدام حقيت البلد من اليمن لي الشام سيفك اللي الفقر قلام ودا كلو بشكرنو الحريم الشاكر اخوها فارس الدواس وغيرو
    وما بنشكّر الراجل اب تفة ولا عامل تايتنك دا كلو لو ماعندو فهم وما عندنا ليهو تقييم عشان كدا ثقافتنا السودانية ملانة بي قيم جميلة ومتوارثة قليل ما نجد
    من يجهل هذه السخافة
    اذكر ان احداهن رفضت في هذه الايام شاب لاينقص شئ اي يعد عريس لقطة لكنها بررت سبب رفضها له شافتو يتراقص في حفلة وزي ما قالت رقيص الحريم عندي فوقوا راي لما الرجال دا بيدل علي قلة فهموا ……. دا نموذج من احدى فتياتنا اليوم واعتبره نموذج مشرف طبعاً ،،،،،،،
    طبعاً كفتي ميزان الحياة الرجل والمرأة فالمرأة تتجمل وتتزين لتعجب القطب الاخر الرجل والرجل كذلك ولي النسوان مزاجات غريبة يعني الواحد تلقاهو صلعتو لي قفاهو وشناتو تقطع الخميرة من البيت وتلقى المرة تشير وتشكّر فيهو السواي ما حداث وووو

  24. مهيرة كتب:

    عفواً الثقافة بلاً السخافة ،،،،،،،،، ولكم العتبى

  25. ابكرون كتب:

    سلام للحلوين وابان صلع :
    انت يا سلولو وبقية المصلعين نسيتوا اغنية زمان :
    حبيت اب قجيجه ابقجيجة
    أريت ابصلعه طاير………
    تعليل بت البيطرة ونونو سيان (كل الطرق تؤدي الي رومة الصلعة)
    —————————
    صديقي في رأسه صحراء *** جفّت فلا عشب بها ولا ماء
    فكأنها البيداء من بعد الوغى*** فني الجميع فما بها أحياء
    تزداد مع مرَّ الزمان مساحة *** و صديقنا من كبرها يستاء
    و لقد سمعناه يقول ودمعه *** يجري فيعمي مقلتيه بكاء
    كم من دواء للشَعر قد جربته *** ضاع سداً و ضل الداء
    أما الحسان الفاتنات فليس لي *** مع صلعتي من وصلهن رجاء
    قلنا له اسمع (….) *** ففي هذا الكلام عزاء
    أوَ ليس للإنسان في إحرازها *** شرف ويملك مثلها العلماء
    قال لا شرف إريد ولا علاً *** أوَ ما عندكم غير هذا عزاء

  26. بشار أحمد بشار (إبن برد) كتب:

    البروف والمدونون الأعزاء سلام سلام
    المرة الفاتت أفتكر قالوا لينا القمل بطول الشعر أو بزيل الصلع ما عارف لاكين نسوا يقولوا لينا القمل ده بيمسك في شنو لامن الراس يكون دلجة . عشان كده طلعوا لينا بتقليعة “(يبدأ النمو بعد 20 دقيقة من إستخدام المستحضر)” يعني معناتا الصيدلانيين بتاعين الشركة دي الشدة كاتلاهم كتلة إكونوا الشواطين شالوا المادة الكيماوية بتاعت الفياجرا وأضافوها للمستحضر بتاع الصلع وبالطريقة دي الجماعة اللي في بالي وبالكم لا يعرفوا يبلعوا ولا يعرفوا يمسحوا كابيتو يا سنكل؟؟؟.

  27. حاج أحمد السلاوى كتب:

    الأخت مهيرة ..
    لولا إختلاف الأذواق والأمزجة لبارت السلع وكل البنات …رغم إنو الجمال مطلوب فى المرأة ( ما تفهمونا غلط .. الجمال ما كل شىء ) والوسامة ( الما زى حقت راغب علامة أو جواد العلى .. أشباه الرجال ..ولا رجال ) مطلوبة فى الرجل ..والجمال والوسامة دول مسالة نسبية فما يعجب شخص ليس بالضرورة أن يعجب شخص آخر ..فى ناس بيعاينو للون وناس للشعر .. و….. و….. وحاجات كتييييرة حاميانى …. غايتو أنا ما عارف عواطفنا دى العجبه فينى شنو وقبلت بى .. نقول شنو .. يس قسمة ونصيب .
    ودى ذكرتنى طرفة يمكن تكون قديمة وسمعتوها ..وهى فى شاب شين شنة شديدة ( ش أُس 4 ) كل ما يتقدم يخطب ..البنيات يرفضنه عشان شناتو دى.. فى بنت جارتهم قابله يوم وحكى ليها مشكلتو :
    هى : الكلام دة ما صاح الراجل ما بيرفضوه عشان شكله ..الناس لا زميشوفو اخلاقه وطباعه .
    هو : حتى لو كان شين زيى كدة .
    هى : ياخ إنت كمان ما تبالغ !!
    وكل صلعة والجميع آخر زحلقة ..

  28. محنك كتب:

    طبعا دى صلعتا ما عندنا ليها جبهة

    على وزا شعرا ورقبة

    لكن يا حاج السلاوى كان جدودنا واعمامنا المزارعين والرعاة واصحاب المهن 60% منهم اميين و10 % خلوة و10% تانية اولية كانوا يكرهوا الشعر ويحلقوا طوالى بالموس تلقاهم كان فى الزراعة او وكت الراحة من الرعى يتحالقون . فصارت الصلعة علامة للفقر ولعدم العلم الذى ينغص معيشة المراة

    ثم جاء الافندية بشعورهم المطلوقة والمسدلة وملابسهم الانيقة وقروشهم الكتيرة .. فغنت البنات
    حبيت ابقجيجة واريت ابصلعة طاير

    لكن لا عيب فى خلق الله وهناك من صحابة الرسول الكريم من كان ذا صلعة وهذا رايته لماما فى بعض القراءات فى السيرة وشروح لبعض الاحاديث ولكن دوما نتعب الكتور صالح ليفيدنا ويطل علنا لو جامع شئ من هذا القبيل

    والصلعة ما بتقوم

  29. ماجد كتب:

    الدور الرقابي معدوم لدينا .. و من أمن العقاب اساء الأدب و أستخف بعقول الناس ..
    بالتوفيق ..

    ماجد ..
    مدونة لعيون لين..
    http://www.majedlife.com

  30. ود المهدى كتب:

    مرحبا بالاخ ماجد. وكما قلت الرقابة غير موجودة والا لما وجدنا من يبيع الادوية والاعشاب علي قارعة الطريق وكمان ينادي علي عينك يا تاجر بمكبرات الصوت في نص السوق العربي ويعدد الامراض التي تعالجها الحبة السوداء (زي 200 مرض) منها المستعصي والموروث. والناس الغلابة من العليها بقت تصدق اي كلام وتجرب اي حاجة في اي حتة.
    ولسه يا ما نشوف
    والسلام

  31. ودالزبير كتب:

    مرحب بماجد وإنشاء الله نزورك في بيتك

    سترايكر

    الحمد لله ولي العهد غير لينا صوره البوفايل

    السمايه متين عشان نطرق سنونا

    وش ريالته سايله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s