البلد رايقه ولا فيها شوايقه ؟؟

Posted: الجمعة,27 فبراير, 2009 by aflaiga in اخرى

قبل الدخول فى الموضع الذى سبقته الدعايه قبل الكتابه يجب ان نوضح ان كاتب المقال لا يملك اى نعرات عنصرية تجاه اى مكون من المكونات السودانيه سواء الدين او الجنس او القبيله .. لكن الحراك المجتمعى الذى اثارته قبيلة الشوايقه سواء سلبا او ايجابا يجعلنا وفى اطار تناولنا لكل الظواهر التى تشكل وجداننا السودانى ان نتناول موضوع هذ القبيله الهامه فى تاريخ السودان القديم والحديث لن اقود الحديث الى اتجاه معين بقدر ما ساشرك القارئ فى النقاش حول الموضوع من خلال المعلومات المستقاه من الوسائط المفتوحه ومن خلال النقاش القادم :

قمت بالبحث عن القبيله فى محرك البحث قوقل واستخرجت اهم النتائج من موقع ويكيبيديا المتفق على معلوماته عالميا واليكم النتائج :

الشايقية هي واحدة من أهم القبائل في السودان ، و تعتبر القبيلة واحد من ثلاثة قبائل مسيطرة في شمال السودان بالاضافة إلى الجعليون و النوبيون

و ترتكز مفاتيح السلطة و الحكم في ايدي زعمائها.

ينتشر أبناء هذه القبيلة في الولاية الشمالية بشكل خاص ومن أهم مدنهم:

يرجع نسب شايق إلى حميدان بن صبح الشهير بأبي مرخة بن مسمار بن سرار بن حسن كردم بن أبو الديس بن قضاعة بن عبدالله حرقان بن مسروق بن احمد بن إبراهيم جعل وهو الجد الجامع للجعليين . ومنه إلى إبراهيم جعل بن إدريس بن قيس بن يمن بن عدي بن قصاص بن كرب بن أحمد ياطل بن محمد هاطل بن محمد ذي الكلاع بن سعد بن الفضل بن العباس بن محمد بن علي بن حبر الأمة عبد الله بن العباس بن عبدالمطلب ، و قد رزق سرار بأربعة اولاد أسماهم : سمرة وسمير ورباط ومسمار . أما سمرة فقد انجب ( بدير ) وهو جد البديرية ، وأما سمير فإنه لم يعقب ، وأصبح رباط جد الرباطاب وهم القبيلة التي تسكن منطقة ( أبو حمد ) وربما كان موقعها هو الموضع الذي أحضر وراد المياه للعمري الماء منه في يوم واحد . وأما مسمار فقد ولد له حميدان الذي أنجب أبنه ( غانم ) الذي كانت من ذريته قبيلة الجعليين ، و(شايق) الذي هو جد الشايقية ، والتي تمتد حدودها لحوالي مائتي كيلو متر على ضفتي النيل من الشلال الرابع إلى وادي الملك .

وهكذا تظهر القرابة الأسرية بين هذه القبائل المتفرعة من اصل واحد ، والتي قامت بينها المنازعات فيما بعد خاصة بين الشايقية والجعليين.

وكان بين الذين تحدثوا عن أصل الشايقية وأدلوا بما توصلوا اليه من أستنتاجات الرحالة الألماني فيرن الذي قام برحلة إلى السودان خلال السنوات 1840-1841 وقد ذكر فيرن بأنه يعتقد بأن الشايقية هم من نسل محاربي قدماء المصريين أو ربما كانوا أبناء ثوار المصريين القدماء الذين اورد هيرودتس سيرتهم . وكان أولئك المحاربون القدماء قد ارسلوا من مصر لحراسة الحدود الجنوبية ضد الأمم السودانية التي كانت تهاجم مصر من الجنوب . واستوطن هؤلاء الجند او الثوار المنطقة التي يسكنها الشايقية الآن وهي المنطقة الزراعية الخصبة الواقعة على النيل بين جبل داكا جنوبي دنقلة العجوز الشلال الرابع . ويضيف هيرودتس بأن عدد هؤلاء المستوطنين الثائرين أو المحاربين كان نحو مائتين واربعين آلف مقاتل . وكانت هجرتهم إلى الأراضي السودانية في عهد أبسميتك أحد فراعنة مصر . وتحدث عن هؤلاء الثوار المؤرخ بلينيوش سنة 70م ، قال بأنهم هربوا من أبسماتيك وأستقروا في منطقة مروي الحالية . وحاول فيرن تأييد نظريته هذه بأن أوضح قرب موقع بلاد الشايقية الحالية من موقع نبتة عاصمة مملكة مروي القديمة ، كما تحدث عن النزعة العسكرية التي مازال الشايقية يحتفظون بها . إضافة إلى نزعتهم لعدم الخضوع إلى زعيم واحد أوملك واحد وإذ كانوا دائماً تحت حكم عدد من صغار الملوك ( مكوك ). ويرى فيرن أن الأسر الشايقية الحاكمة يشبهون طبقة السادة لدى قدماء المصريين . ومما لاشك فيه أن المنطقة يسكنها الشايقية الآن ، كما حددناها كانت آهلة بالسكان طوال القرون الماضية ، وأنها كانت مسرحاً لمدينة مروي وحضارة ملوكها البارزين . ولما كانت المنطقة تمتاز بخصوبتها فإنها أحتفظت بساكنيها على مر الأيام . ثم جاءت هجرة القبائل العربية إلى السودان عبر طرق مختلفة ، فراى بعضهم الأستقرار مع اولئك السكان الأصليين وأختلط بهم ، وأدخل اللغة العربية وبعض خصائص العرب عليهم ، ونتج عن ذلك شعب خليط هو الشايقية .

تواجد في بلاد النوبة بالسودان قبيلتين عربيتين هما قضاعة وهي قحطانية ،و فزارة وهي عدنانية ، فتوجه إليها إدريس بن قيس ، فجعلوه إماما لهم.

أما تلك القبيلة العربية التي نزحت إلى تلك المنطقة فإننا نرى أنها في أغلب الظن هي قبيلة سعد العشيرة وبعض قبائل الشامية اليمنية الأخرى التي كانت معها في أرض المعدن . ولا نستبعد أن يكون بين أولئك المهاجرين بعض من جهينة ، كما أننا نكاد موقنين من أنه لم تكن معهم جماعة من قيس عيلان العدنانية التي دخلوا معها في منافسات أيام العمري . وهكذا وجدت سعد العشيرة لنفسها وطنا في الأراضي السودانية بعد عدة قرون من العمل الجاد في أرض المعدن البجاوية بحثاً عن التبر بين رمال وادي العلاقي .

أستقر الشايقية في ضفاف النيل بين جبل ديقا جنوب دنقلة وبين الشلال الرابع وظهروا في الوجود بمكانة عظيمة في القرن السابع عشر . وكانوا في أول أمرهم عند ضعفهم قد دخلوا في الحلف السناري لسلطنة الفونج . ولكن في حوالي سنة 1600م ثار زعيمهم الشيخ عثمان ود حمد على الفونج وهزمهم وأستقل بزعامته ، وأخذ عهداً من الفونج بأن يحترموا سيادته على إقليمه ، ووافق الفونج على ذلك لبعد الشقة بينهم وبين الشايقية ، وعدم قدرتهم على إخماد ثورتهم وبسط نفوذ السلطنة عليهم . ووفد عليهم في أوائل القرن التاسع عشر جماعات من المماليك الذين هربوا من وجه محمد علي باشا في مصور وأوقعوا في أول الامر بالشايقية وذلك بقتل زعيمهم المضياف غدراً وخيانة . ولكن الشايقية وقفوا وقفة صامدة ضدهم وضد سلاحهم الناري . ولما جاء جيش إسماعيل باشا إلى السودان لإحتلاله في عام 1820م وقف الشايقية ضد جيشه الغازي وقاوموه ولكن مالبثت البنادق والمدافع والكثرة العددية المدربة أن اوقعت بهم هزيمة لم يتوقعوها بعد كفاح مرير. والشايقية يتحدثون بلهجة عربية لها نغمتها العربية الأصيلة ، ولبعض اواخر كلماتها ومقاطعها إمالة .

Advertisements
تعليقات
  1. يا مساء الأنوار

    البلد رايقة مع انو فيها شوايقة… فالشوايقة ما بتاعين مشاكل و عندهم حنية عجيبة ربما اكتسبوها من بيئتهم و ارتابطاتهم الأسرية الشديدة و تواصلهم بالرغم من هجراتهم التاريخية عبر السودان فارتبطوا بمعظم مدن السودان و (طبعن) أول ما يصلوا حتة يشترون الواطة و يعمروها و يندمجوا في المجتمع الجديد…

    أصلو الواطة و الطين دا بيحبوهو بلحيل…

    و بعد ما يستقروا يعاودهم الحنين لبلدهم و يقوموا يغنوا بالطمبور

    “يا يمه رسلي عفوك … ينجيني من جور الزمان”

    فمن أميز مغني الشايقية النعام آدم، ود اليمني، صديق…و السقيد … و نواصل

  2. مشاكل كتب:

    سلامز

    شايقست و الأجر على الله
    و من نوري كمان

    يا سلاااام

  3. بشار أحمد بشار (إبن برد) كتب:

    الإبن أفليقا : موضوع شيق وكامل الدسم وبعد:
    على (الرغمن) بأنني نصف شايقي، فأنا أميل كثيرا لرأي الرحالة الألماني فيرن بأن أصول الشايقية تعود الى قدماء المصريين لأن الفترة الزمنية بين سيدنا العباس بن عبد المطلب الى يومنا هذا تقدر بأربعة عشر قرناً ونيف وقبيلة الشايقية إحدى أكبر قبائل السودان من ناحية التعداد كما تفضلت وليس من المعقول أن يصل تناسل أحفاد سيدنا العباس الى عدد قبيلة الشايقية الذي بين يدينا الآن، حيث أنه لا توجد نسبة بين الجد الأول وتعداد القبيلة الحالي وإذا نظرتم الى قمة الهرم (سيدنا العباس) وقاعدته التي تمثل قبيلة الشايقية الآن مع الأخذ في الإعتبار التزاوج والتداخل والإختلاط بالقبائل الأخرى ، فسوف نجد شكل الهرم مسخاً غير منتظم والله أعلم.

  4. ابكرون كتب:

    سلامات الشايقيست
    ممكن شايقست يفسر لينا ويشرح التالي :
    * ليه الشايقيه بكايين شدييييدوما بحبوا السفر والفراق وكده…
    بلالي متين يجي يا يمه …..
    سيد بيتي متين يجي ….
    الرسول يا ود عمتي …..
    انت ياك راحتي وجمتي …..
    رسل التسريح اجي…..
    قطر التلاتا بجي……
    الي ان تقول لود عمتها :
    جاب لي حق جابلي نقار …
    جابلي توب اسمه الحمام طار….
    الخ…….
    * ليه الشوايقة بحبوا العسكرية…والكاكي…
    * ليه شلوخ الشوايقة كانت 3 خطوط متوازية أفقيه
    * هل صحيح ان لا علاقة للشوايقة بحضارة جبل البركل وهم سكنوا هذا الجزء من الارض بعد اندثار هذه الحضارة والتي هي نوبية اصلا

  5. البشاوى كتب:

    الموثق البارع افليقا
    جزيت خيرا على هذا السرد الرائع مع ايمانى الراسخ ان الشايقية واحدة من
    القبائل الكثيرة فى السودان ولاتعلو عليها ولكنى ارى (ليس تحــــــــــيزا رغم شايقيتى المقننة) ان لهذه القبيلة نكهة خاصة جــــــــــدا بداية من الجـــانب
    الاجتماعى المترابط والالتزام الاسرى الصارم والحنين المتدفق دوما نحو الارض
    وهذه المعانى تنعكس بصورة واضحة فى اشعارهم واغنياتهم وحتى فى
    احاجيهم وأظن ان حالهم هذا قد انساب لعذوبته ولجماله على بعض او كل
    من جاورهم او من عايشهم حتى فى غير بلادهم فتجد ان كثير من الناس
    فى بلادنا لايتكلمون العربية ولكنهم يحبون ويعشقون اغانى الشايقية رغم
    بعض كلماتها الممعنة فى المحلية او كما ذكرت ان فى اخرها إمالة فتسمع
    اغانيهم فى المواصلات العامة وفى محلات المرطبات والمطاعم فى اغلب
    نواحى السودان وفوق هذا وذاك انها القبيلة صاحبة الروح الرياضية الاولى
    فى السودان رغم مايروى عن الشايقى من قصص وروايات من بينها الحرص
    او البخل او الانانية فلا تجد ان احدهم قد تفاعل مع الموقف بعنف بل بكل
    برود يرد او لايرد (نظام العارف عزو مستريح) ذات مرة سألت جدى عم والدتى
    الذى يقيم فى مدينة سنار (وكان شيخا لاحدى ضواحيها)سألته لماذا يهاجمنا
    كل من ليس شايقيا وينعتنا بصفات ليست جميلة فرد على وهو يتوضأ ولم يرفع
    رأسه نحوى (حسادة ياولدى مالاقين يبقو متلنا) ومرة استضاف الاستاذ\ حسين خوجلى الاستاذ\ على عثمان فى برنامجه أيام لها ايقاع وسأله عن
    مغزى إنتشار فن وثقافة القبيلة حتى فى مناطق بعيدة عنها جغرافيا مثل
    الجنوب والغرب فجاءت اجابة الضيف بعد ان عدل جلسته كمن يريد ان يبين
    غامضا :(شوف ياحسين الشايقية دى ماقبيلة وبس لكنها حالة ممكن تجى لاى زول فما تستغرب لو عرفت انو فى الخليج بعض من يستمع لى غناء
    الشايقية )
    ولحدى هنا اقيف عشان ماتقولو على شايقى خالص

  6. د.ياسين شمباتى كتب:

    افليقا الصديق..حمدالله على السلامة..بركة النزلت الموضوع دا لانى كنت راجيهو بفارغ الصبر!!! بس يا خسارة,,نزل وانا مغادر البلد بكرة..

    سردك للوقائع ممتاز ولخصت الموضوع بايجاز طيب,,بس ما خلصت للموضوع مباشرة!! ولا تركتو لى فطنة القارئ؟؟

    اول شئ يخيل انو قضية الانساب دى صعب انو الانسان يجزم فيها بى شئ اكيد نسبة لتقادم العهد وانقطاع الكتابة والتدوين فى فترة ما,,كما ان الحروب قد اتلفت الكثير من المخطوطات فى عهود متواترة..لكن اصح الصحيح انهم والجعليين بيرجعوا لى اب واحد,,والبديرية هم اولاد عمهم,,ويعضد ذلك انو فى بديرية فى غرب السودان بكثافة سكانية عالية_وربما كان اصل البديرية نوبى اكثر منه عربى_
    هناك بعض المخطوطات فى مكتبة الملك فهد بالرياض تشير الى ان قبيلة الشايقية وقبيلة (غامد) السعودية ترجع الى اب واحد..
    نخرم لى حتة الشوايقة وحبهم للسلطة وتعاونهم مع اسماعيل باشا ومع الاتراك والانجليز,,زى ما اسلفت انهم بادئ الامر قاوموا,لكن بعد ما شافوا قوة العدة والعتاد للغازى عملوا خط رجعة وهادنوا على ان تكون لهم وصاية وكلمة على الاقليم,,وابان الحكم التركى انعموا عليهم بلقب او صفة عسكرية وهى كلمة(سلجق او سلجوق) التى حرفت فيما بعد الى سلجك واصبحت (سنجك)..وبعد ذلك صارت هذه المهنة متوارثة ومحبوبة لدى الاجيال اللاحقة_وفى هذا اجابة لى ابكرون على تساؤله_كما كانت المهنة الاولى هى الزراعة والاهتمام بالارض,,فصارت هى البديل لمن لم تواته الفرصة للانخراط فى العسكرية..والارض تعطى زارعها احساسا بالانتماء مهما بعد عنها,,لذا تجدهم يحنون دوما ويتبادلون الشجن والالتياع والشوق,,ولا يهم الى اى ارض يحنون,لكنهم يفرغون حنينهم فى الارض التى يستقرون بها ويعمرونها..

  7. ودالفتيحاب كتب:

    سسسسلام

  8. ودالفتيحاب كتب:

    الاخ افليقا
    صباح الخير
    نجرب فى النت مش قادر يرسل لسه مش عارف

  9. ودالفتيحاب كتب:

    الحمد لله
    لكن سلى روحى دى المره العاشره وانا اعلق على موضوعك مش راضى يرسل.
    اعتزر لك كثيرا

  10. د.ياسين شمباتى كتب:

    ابكرون..الشلوخ كانت فى ذاك العهد_كما تعلم_تميز كل قبيلة عن الاخرى,,فالدناقلة لهم الشلوخ العريضة العميقة الطولية(دموع الحمار),,والشايقية لهم الشلوخ العميقة العريضة العرضية(المطارق),,والجعليين لهم حرف اتش الانجليزى الخفيف,,وقبائل الشرق لها الثنائى الرأسى متوسط العمق,,وبعض قبائل البطانة اتخذت (النظارات) او الشلوخ الخفيفة بجانبى العين كمميز لها..ولقد زامن الشلوخ دق الشلوفة,,وكان من مميزات الجمال الصارخ فى ذاك العهد!!!

    كما عرف عن المرأة الشايقية حسن تبعلها وتدبيرها لامور منزلها,,والامساك بزمام الامور وادارة دفة سفيتة الحياة الزوجية اذا كان الزوج(خرع وما مالى مركزو),,وعرف عنها عشقها لبيتها وحياتها الضغيرة_وما قصيدة ابكرون الغنائية التى ذكرها : بلالى متين يجى يا يمة,,الا خير شاهد على ذلك,,ومثلها كثير ليس هذا مقام ذكره_كما نسب اليها الكثير من الكذب والبهتان!!!

  11. د.ياسين شمباتى كتب:

    ود الفتيحاب,,تانى تخش فى اوقات غريبة!! بركة انقطاع الارسال بقى على النت بس!!! لكن دى مشكلة عامة فى البلد اليوم..

    البشاوى يا شايقى يا انت..للشايقية خاصية الاندماج والتغلغل فى الاعراق والاثنيات الاخرى,,مع احتفاظهم بنظرتهم العنصرية المتعجرفة فى دواخلهم_النصيحة دى نمرقها بس_لذا تجدهم منتشرين فى كل انحائ السودان,,وفى معظم المدن تجد احياء تسمى(فريق او حلة الشوايقة),وقد شاهدت هذا بنفسى فى العديد من المدن..
    كما ساعدتهم لهجتهم الدارجة المنتمية للعربية فى التواصل مع كل القبائل الاخرى,,فليس لهم لهجات نوبية او لهجة خاصة ك معظم القبائل السودانية..

  12. حاج أحمد السلاوى كتب:

    الدينمو أفليقا ..
    بعد كدة كمان حنضيف ليك لقب المؤرخ وتعملوا ثنائى ممتاز مع دوك عزت ..
    وزى ما قال ولدنا الدكتور الحاج يسن شمباتى إنو توجد بعض الصعوبات فى عملية إثبات الأنساب لكن طبعن عندنا كان المرحوم الدكتور عو الشريف الذى قام بالعون الذاتى فى اتلقصى والبحث فى أنساب القبائل السودانية الأصبية منها والمهاجرة إلى السودان أبان الفتوحات العسكرية التركية ..إذ أن كثيرا من السودانيين وخصوصا الجزء الشمالى منه هم نازحين من الدول الأسلامية المجاورة شرقا وغربا وجنوبا وشمالاً ..يعنى لو رجعت شوية للوراء تلاقى دأبو عصمت دة اصلو تركى ولاّ إيرانى ..
    السؤال السغيروووونى العندى .الخلاك تكتب عن الشايقية شنو وانت دنقلاوى ؟
    د. شمباتى ..غايتو شلوخ الإسمها “دموع الحمار” يطرشنى ما سمعت بيها .دى من راسك ولاّ من كراسك ؟ وما دام عرفت كمان دق الشلوفة حننقلك طوااااالى إلى قروب ( أ ) .
    ودالفتيحاب ..مشكور على الوليمة الفاخرة التى أتحفتنا بها ظهر الجمعة .. أكل طعامكم الأبرار وصلت عليكم الملائكة وذكركم الله فيمن عنده ..تشكراتنا للسيدة عواطفكم المصون … فاتك الغداء يا شمباتى ..لكين الجايات أكتر من الرايحات ..

  13. بشار أحمد بشار (إبن برد) كتب:

    السلاوي : ورينا ال menu بتاع ود فتيح كان شنو وماذا أولم لكم عشان نحدد ليهو قبيلتو؟؟؟

  14. ابكرون كتب:

    بدون زعل :
    —————

    شايقي لقو بدق في اولاده الاتنين – سالو مااالك – قال لقيتهم فاتحين المروحة في تلاتة وهم كلهم اتنين

    ****************

    شايقي دخل مع ابليس في جمعية . . . شال الصرفة الاولى وقال بسم الله

    *******************************
    شايقية عجوز في محو الأمية…. سألتها المدرسة: قولي لي جملة فيها إدغام بغنة ؟
    قالت ليها : عمن يعميك

    **************************************
    شايقي قال لابوه : ابوي عايز اكمل دراستي بره . . ابوه قال ليهو مافي مشكلة خلي امك تفرش ليك السرير في الحوش بس اوعى البرد ما يطقك

    *******************************

    واحد شايقي جاتو ليلة القدر قالو ليه اي حاجة دايرة بتتحقق ليك بشرط انه الجعلي جارك تتحقق ليه نفس الحاجة مرتين
    قال ليهم قدو لي عيني

    *********************************

    قالو ليكم شايقي قاعد قدام قبر ويبكي بكاء شديد
    الجماعة شافو ليك وقالو الشايقي ده مجنون ، ما عارف القبر ده حق الجعلي .. قامو قالو ليهو هاااااااااااا زول نعل ما في عوجة انت ما عارف القبر ده قبر الجعلي
    قال ليهم :آي بالحيل عارفوا قبر الجعلي … لكن أنتوا ما سمعتوا البكاء بعذب الميت …
    ************************
    السلاوي : صاحبك مبسوط بقي يسوي في الغديات….
    شمباتي :الشلوخ الطوليه هي كانت خاصة بمعظم القبايل وتجدها ايضا عند الجعليين والمناصير والدناقلة والمحس بس تقل سماكتها وعددها الخ….اما الشلوخ السلم (اتش بعتبه او عتبتين) منتشرة وسط الجعليين (ما كلهم) وفي منطقة رفاعه ….
    الشلوخ المطارق نسائية بحته وهي شلختين طوليات في نهايتهم التحت شلخه واحدة عرضية وتكثر عند نساء الجعليين

  15. مُخير كتب:

    الأخ أفليقا
    الحبان في كل مكان
    سلام
    نُشكر لك مجهودك وأنا شخصياً أكن مودة للشوايقة لا أعرف لها سبباً غير أن عدد كبير من أصدقائي إما شوايقة أو متزوجين من شايقيات، ولا علاقة رحم لنا معهم، وبالرغم من أن جدتي الجعلية يرحمها الله كانت تُردد بأن الشوايقة شقاوة، لكنني لا أرى سبباً وجيها للتحامل عليهم وهم من أرق السودانيين وجداناً وأصدقهم عاطفة، ومن المؤكد أن هناك نماذج سلبية لكن هذا ينطبق على كافة القبائل السودانية وغير السودانية.

  16. سهيل كتب:

    سلام شديد… و الله يا أفليقا أبدعت و ليس بالغريب عليك الإبداع…

    بس لاحظ معاي : ورد أثناء السرد أن العباس هو جد الشايقيه و إليه يرجع نسبهم… تجد في نفس النص أن فيرن المؤرخ الألماني يرجح كون أصل الشيقيه من الفراعنه .. كيف هذا و العباس ليس فرعونيآ أو أن الفراعنه ليسوا بعربآ.. و الله أعلم..

    ولدنا الدكتور يس شمباتي كل ما ازح منك ألقاك عاصر علي و علي أهلي..
    البلد رايقه و فيها شوايقه و هي بلانا ما بتروق.. و ما شفتو عوض يا…
    و جاييييييييييييييييييييييييييييييييييييييييييييييييييييييكم

  17. ابوالمنذر كتب:

    افليقا ………..
    الاخوه الكرام………
    المقدمه جميله يا افليقا ولا اعتقد ان الشوايقه ممكن ياخدو الموضوع بعنصريه وليس لديهم الاحساس بالدونيه فهم كما تفضلت بالتوضيح يحبون الحريه والاستقلاليه ويتمردون على التبعيه…
    الشايقيه يتعايشون ويختلطون ويذوبون بسرعه مع المجتمعات الاخرى وطموحهم الدائم والامحدود ونزعة القياده والسياده هى سبب جعلهم مكان جدل وحسد وبطر ونقد او اضعف الايمان المابتلحقو فلعو….
    اهم سبب لنجاحهم الثقه بالنفس والسعى الدؤوب ولابد من صنعاء وان طال السفر …..
    الشايقيه سبقو غيرهم فى اعطاء المراه دورها فى المجتمع حتى اصبحت تشكل محور اساسى والنواه الاولى لتكوين القيم الشايقيه هى الام ومنه اسنمد الشايقى الحنيه والشعر الحنين فهى مربيه ذات شخصيه قويه لاتتهاون فى تربية ابناءها وتحرص على التعليم وان يبقى كما تدعو دائما تتعلى ماتندلى …تودع ابنها بالدموع عندسفره للدراسه او العمل بكلمات (ودعتك امين الوداعه لا يبضعك ولا يفرط فيك)..
    وقد اصل الاديب العالمى ابن البيئة الراحل الطيب صالح لهذا المجتمع بكل عبقريه فى رواياته وخاصة موسم الهجره الى الشمال…
    واخيرا كل الادباء والفنانين والشعراء والساسه الشوايقه السابقين والاحقين لم يوظفوا ادبهم وفنهم للفخر بالقبيله وعندما افتخروا قالو نحن …..
    عرب ممزوجه بدم الزنوج الحار ديل اهلى
    ديل قبيلتى لمن ادور افصل للبدور فصلى
    ………….
    تصور كيف يكون الحال لوما كنت سودانى
    واهل الحاره ما اهلى
    ولو ما جيت من ناس ديل كان اسفاى واماساتى وا ذلى
    واهو ده السودان…………………………………….
    كسره اخيره…….
    حاج الماحى مدرسة ممتده الى ماشاء الله فى مدح الرسول(ص) وتجد القوميه فى مدحه من ذكر الاماكن والقبائل السودانيه بل والافريقيه وخلاوى القران والشيوخ المشهورين بمنطقة الشايقيه… ولناعوده

  18. بشار أحمد بشار (إبن برد) كتب:

    لا تنسوا روح الدعابة والطرفة والملحة والحضور الذي يتمتع به أهلنا الشايقية.

  19. نيام كتب:

    111/111=1
    1=100%

  20. سهيل كتب:

    جنني شوايقه .. شوايقه جنني شوايقه… شوايقه في شمبات ……شوايقه …. …….. ……… ….. دي جلاله يا حاج السلاوي أسأل منها ناس بشار و أبكرون الخطرين..

    بالله عليك في أحن من : عافي منك و راضي عنك سو رضايا.. وما بيخيب الرضى والدتو يا جنايا…

    ولا البكاء : أنا المأساتي ما بتتقال
    : حبك كان زادي …

    آآآآآآآآآخ جاييييييييييكم

  21. بشار أحمد بشار (إبن برد) كتب:

    “111/111=1
    1=100%”
    نيام : الفوق ده شنو؟؟ رياضيات؟ ولا شلوخ عامودية؟ ولا بزنس؟ ولا ثناء “ع” المقال؟؟ وأنا عارفك ما بدور “عصبيت” القبيلة. في زول عارف لينا الشلوخ مطارق يعني شنو؟؟ وبادي أبوشلوخ كان مشلخ؟؟ وبادي أبو دقن كان من الأحسبون؟؟

  22. ابكرون كتب:

    بشار يا (مفص) معرفه فوق في ابكرون/بدون زعل….. بس في خطأ المطارق طولية وبتاعة نساء الجعليين المذكورة اعلاه اسمها (عوارض)

  23. نيام كتب:

    بشار:
    كلما كتب صحيح ايها الحاضر الحذق ..
    افليقا:
    رائع ..غايتو يوم بجيك طوبة خدرا من الفضاء الشاقسيري..

  24. بشار أحمد بشار (إبن برد) كتب:

    أبكرون : هل كان للحبوبات والأمهات في أمدرمان شلوخ خاصة بهم؟؟ بعدين في ظني أن الشلوخ المطارق هي ثلاثة خطوط رأسية تقع على خط أسفل أفقي مشكلةً عليه زوايا قائمة.

  25. حاج أحمد السلاوى كتب:

    أخونا بشار ..
    حسه عليك الله إنت أكان ما عرفت الشلوخ المطارق يعنى شنو .. منو تانى الماشى يعرفن ليك ؟..
    الحاجة التانية .. أكيد بادى ابو شلوخ دة كان مشلولخ وشلولخ ..أما ابو دقن دة إلا نمشى نسعل ( نسأل ) الأحسبون زااااتهم .. عشان نعرف لو مسجل فى كشوفاتهم ولاّ ..لا ( يمكن يكون مسجل فى برشلونة أو ريال مدريد ونحنا مانا عارفين )..
    نيام .. المعادلة إياها قلبت فيها الهوبة عدييييييل كدة..وشلوخ الشايقية دى ذكرتنى طرفة سغيروووونة كدة … قالوا واحد شايقى ذا شلوخ ثلاث متعارضة ( شايقوبينق ) مشى يدرس فى بريطانيا … فساله احد الخواجات البريطانين عن معنى هذه الشلوخ المتعارضة المستقيمة فى وجهه…الشايقى ( حبّّ يفشخر شوية على الخواجة ) قال ليهو : انا كنت ماشى فى الغابة وقابلنى نمر ودخلت معاهو فى معركة شرسة .. وصارعت النمر لحد ما قتلته.. النمر قام شخبطنى باضافرو فى وشى .. الخواجة عاين ليهو كدة وقال ليهو : اصلو النمر دة كان دارس هندسة !!
    وفى إصطلاحات خاصة بالشايقية .. وما أظن يعرفها زول من غير الكواشف ..وخلونا نشوف الشباب ديل حيعرفوها ..ولاّ حيعملو رايحين ( ويبتسم ولدنا سهيل إبتسامة مااااااكرة…!!!! ).. الشايقى راح للدكتور ( أكيد مش د. شمباتى أو فقيهنا النطاسى د. صالح )وشكا له : قاع أجى قو أقع ….. قع أورد…

  26. سهيل كتب:

    يا حاج سلاوي.. “الوردي” التمسك أوكامبو..هسي” البطان” ديل “دحين” خبروا نضمك دا .. “نان” ما ياها الخربت

  27. ودالفتيحاب كتب:

    الحبان الحلوين
    أفليقا
    سلام بالكوم
    إبن برد
    على مااعتقد كلمة مطارق اخذت من الاسم مطرق وهى عصا رقيقه وخفيفه يحملها الشيوخ والناس الكبار عموما,لأن فى الغالب الشلوخ عريضه إلا هذه المطارق فهى خفيفه جدا ورقيقه,
    اما عمنا السلاوى المهم الشايقى ده بشتكى من حمى ,الثانيه ما عرفتها.
    أماعن اهلنا الشايقيه انا اقول الناس ديل مفترى عليهم كثير ,سنحت لى فرصه فى السبعينات بزيارة منطقة كريمه وتحديدا البخيت منطقه صغيرة واهلها قمة فى الكرم والبشاشة والترحاب.
    عجوز احضرت خروف الى مضيفنا لأكرام الاولاد الجو من الخرطوم ديل وهى تعتزر لان بيتها لايوجد به احد ليقوم بضيافتنا ,ياهو ده السودان بأهله الحلوين والسمحين .

  28. ودالفتيحاب كتب:

    ابكرون
    حاولت أمس عدة مرات لكن النت خذلنى ,لكن والله دخلت ثالث واحد ,البروف نحن وراه وراه,
    أها ورينا ( الفصده)؟ العوارض عرفناهن .اهلنا الجموعيه عندهم بعض الشلوخ قاطعنهم من راسهم…

  29. نيام كتب:

    بشار ثرو ابكرونا:
    كانت ام درمان حديقة لكل الورود من الحبوبات اللاتي ينحدرن من قبائل شتي شايقست جعلست محسيست دنقلاوست نوبست او ربيطيات ..وكن يزدهين بهذه الشلوخ وهي جميلة و مميزة علي تلك الوجوه الصبوحة الشفافة الندية الضاحكة وكل حبوبة تفخر بقبيلتها دونما تحقير لغيرها..ولذلك كن يجُدن علي غيرهن من الاجناس الاخري التي لا تنتمي لقبائلهن بالشلوخ فتجد كثير من الريفيات قد تمطرقن او تسلمن او تاتشن ولسن من محس او جعل او شائق في شئ ..
    حاج احمد السلاوي:
    “صاحبنا for ever and ever,you have fever ”
    مدرس خرطومي نقل الي قرية شايقية ولما دخل الفصل لقا واحد في فصل اولي يبكي بحرقة..
    المدرس:
    دا ببكي مالو
    -الفتولي قمدو!!
    -نعم؟
    -الفتولي قمدووووو!!
    ماذا قال التلاميذ؟

  30. حاج أحمد السلاوى كتب:

    المدونون الرائعون دوماً ..
    عرفتو واحدة من شكية الشايقى للدكتور ..وطلعت صاح وهى إنو الراجل قاعدة تجيهو وردة ( بكسر الواو والدال ) لكين الشكية التانية لسه مافى زول قال عليها .. غايتو بديكم فرصة لحد الساعة خمسة ( بتوقيت جدة ) ..أكان ما فى زول عرفها بنقوله ليكم .. مع إنى مانى شايقى ..لكين أصحابنا وأصدقاءنا كتُاااااااار من الشايقوبينق .
    نيام .. ياخ ما ممكن تجاوب على السؤال بسؤال مضاد ..أنا فى إنتظار إجابتك ..والناس كووووولها عينها عليك .. شِد حيلك ..
    ولنا سهيل … ما شاء الله عليك .. لكين باقى ليك كل الجِنيان والبطان ديل بيخبروا النضم دة ..ماااااا ظنيتهم .

  31. محنك كتب:

    يا حاج السلاوى
    بكح وبورد ( كحة وحمى )

    وقع دى قاعد

    بس اجى دى الا تعجب عند النسوان من عندك ساكت … ودا على لسان صديقى الشايقى ابن ارقى شرق الدبة بلد صاحب قصيدة الجلا التى رد عليه قيها الشاعر حسن الدابى

    صحيح يا عبدو اخوى قولك حقيقة
    كتير الطّفشا الجلا من فريقا
    بتمنالا فى دالة غريقة
    تحتل فيها ما تفضل سبيقة
    وتعشش فى قميراتها ام دريقة

    منقول من اخونا الشاى وشرح لى الكلمات 0 الغلوتيات ) واشرح لهم يا كبير الشايقست بالمدونة

  32. نيام كتب:

    حاج احمد السلاوي:
    اما ان تكون قد اخطأت الحروف الصحيحة الدالة علي النطق الصحيح للكلمة او ان تكون حديث عهد باللغة الشايقوستية وهذه ارجح..فقد اصاب محنك اذ ليس هنالك كلمة قاع أجى قو أقع ..اما اذا لم تخطئ ف قاع تعني قاعد اما اجي هي معروفة وقد ادغمت الدال في الالف حسب قانون شائق فاصبحت قاع اجي(اني احضر دائما) اما قو اقع فهي اما ان تكون قاع أقع بمعني احاول ان احضر الا انني اسقط او ان كانت غير ذلك فهي بالتاكيد ليست شايقوستية ربما شايقي من فرعنا في اليابان .
    ولكنك لم تجب علي سؤالي؟؟؟

  33. حاج أحمد السلاوى كتب:

    يا سادة يا كرام .. إنتو قربتو بنسبة كبيرة إلى الإجابة الصحيحة ..
    الشايقى بيقصد إنو ” قاعد يجى يقوم يوقع” من التعب والوردى( الحمى ).وطبعن كتبتها بهذه الطريقة تسهيلاً للنطق ..وما أعتقد إنها حتكون أسهل من كدة كُتبت بأى طريقة أخرى ..ولاّ انا غلطان… وفى الكلام العادى برضو بنقول كدة ..
    أما بخسوس سؤالك التعسفى دة ” الفتولى قمدو ” يطرشنى طرش الياباك ما سمعتو ( مش الهاف باك .. يا سهيل )…عشان كدة حقو تدينا معناها طوالى وتريحنا وتريح روحك ..وما شايف فى زول هبب ناحية سؤالك دة خالص ودة دليل مادى إنو ما واحد شايقى أصيل معانا ..
    بس عندى سؤال سغيرووووونى كدة .. الفتولى قمدو ..دة بالعربى .. يا مرسى ؟

  34. أي بلحيل يا حاج السلاوي

    الفتولي … هو (ألفة أولى) أي المونيتر بتاع أولى لكن قمدو دي ما أدونا ليها عل بيكون سجلوا مهرج و الا قدم فيهو عرض…

    أعرف لي دي
    واحدة سألت غفير الداخلية عن سريرها أين ذهب؟
    فأجابها: (مرقنبو قرنبو)

  35. ابكرون كتب:

    عزت : معناها مرقن به عشان يقرن فيه
    دي زي (إمْبقى دُورْمُو)…حد يفسر

  36. محنك كتب:

    يكون الالفة بتاع اولى غمتو ( خنقوا )

  37. حاج أحمد السلاوى كتب:

    المدونون العزاء كووووولهم ..
    نحنا كنا قايلين الشايقية ما قاعدين يرطنو .. لكين نيام وابكرونا جابو لينا كلاماً كُتر ..زى الرطانة … غايتو يا ابكرون .. إمبقى دى أنا بقول معناها إن بقى ..يعنى( إن كان )فى رواية أخرى.. الشايقية زى الكانو دارسين تجويد لأنهم طبقوا حكم الإقلاب بين النون الساكنة والباء فقُلبت النون فى إن إلى ميم .. الناس غايتو ما ساهلين ..تب .. لكين الكلمة التانية دى غلبتنى وطرش أضانى ما سمعت بيها..قول لينا معناها .. يا مرسى الزناتى .. إنت بتذاكر من ورانا .. يا ابكرون ؟
    ابو عصمت إنتو شايقية بالتجنّس ولا ّ شنو ؟ وهم معروفين فى العسكرية بسؤال تقليدى : أدنى اسمك ولاّ قولّى رافد ( يعنى رافض )..
    الدينمو .. صاحب البوست … نحنا مش قلنا كل واحد يحافظ على لغاليغه .. أقصد يحرس البوست بتاعه ؟ أنا خايف بعد شوية ندخل فى لهجات الدينكا والنوير والزاندى ..
    ولدنا مشاكل … سلامز .. سلامز … سلامز

  38. ابكرون كتب:

    سلو : ديل شوايقة بلعبوا كوتشينة
    قالو : ان بقي دو ارمو اي ارميه (فك الدو)

  39. aflaiga كتب:

    شباب : عشان ما تقولو انا قاصد حاجه خليتكم تدلو برايكم انتو اول بعدين انا اقول العندى عشان ما يجى شايقى ناطى يقول لى انت قاصدنا !! وانا اقدر اقصد الشوايقه وهم معى فى المنزل ؟؟؟؟
    طيب نمسكا من الكوبرى !! مش كوبرى السد ؟؟
    شعبنا السودانى مشهور بميزات معينه فى كل قبيله :
    * يعنى مثلا نوبا الشمال ناس طيبين وما مصادمين وما بيختو للقرش اهميه كبيره وما بيطالبو بحقوقم كتير وسايبينها لى الله حتى انه يطلق عليهم لقب دراويش بيد انهم فالحين فى كيفية جلب القرش وشطار جدا فى ملئ الخزن بالقروش وحمايتها من الاعتداء وحماية البلد عامة وعندهم نظرية القوميه كبيره لدرجة مرضيه …
    * اها بعد نوبة الشمال يجيبو القرش بشطارتم ما بيقدرو يلموهو عليهم ويدهم فاكه عشان كده دايما النوبى الداير يوفر ويلم قريشاتو عليهو بيعرس شايقيه !!! وهو يجتهد وهى تلم !! وهو يجتهد وهى تلم !!!
    * الشايقيه ناس واضحين وناس حسابات وفصيحين وما عندهم اعتبار كبير للفلسفه بتاعة باقى القبائل وناس عمليين جدا جدا عشان كده بتلقاهم مفضلين فى استلام المال ( ما المسروق !! ) وتوفيره بالرغم من انهم بيبحبحوها على نفسهم شوية اثناء عملية الاستلام !!!
    * يلا الميزات المتوفره فى الشوايقه دى ميزات لانها بتخالف ميزات باقى القبائل عشان كده بمرور الزمن نمت روح عدائية معنويه تجاههم وصرا هناك تفلت احيانا فى اطلاق التسميات عليهم فبدلا من حرص بنلقى لفظ ( مادى ) وبدلا من واضح وصريح بنلقى لفظ ( وقح وقح وما مستور !! ) وقس على ذلك ..
    اها نجى للحته بتاعة الحنيه بعض القبائل ترى ان الشايقيه لانهم عاشو فى ظروف صعبه لفترات طويله تجدهم دوما متماسكين وحنينين على بعض .. اها قوم يا النوبى او الجعلى عرس ليك شايقيه عشان تستفيد من الحنيه دى وتكرسا لى مصلحتك حبا وكرامه .. قوم اتفاجا بى انو الحنيه دى بين بعضهم بس !!!
    وجاييكم تانى …

  40. نيام كتب:

    يا اهل الروعة و الابداع .. يا من فاح طيب رياهو بكم تبدأ الصباحات الندية وعلي قفشاتكم فنجان قهوة بشمالو يسوا الدنيا بهالو ..بهالو ..
    امدرمانية صاحبو ليهم شايقي و امهم جنها جن الشايقي ما بتطيقوا وهم معجبين بيهو بس عشان يعملوا بيهو مرقنبو قرنبو ..
    مرة قرروا يبيت معاهم لكن يقوم بدري يتخارج قبل امهم ما تجيب الشاي ..ولزوم كده قرروا ما يفتحوا ليهو الباب عشان الباب ما يسيك ..سييييك سيييك ..فقالوا ليهو تنط بالحيطة ..فطلع في راس الحيطة و هو علي ذلك الحال اخذ يساوم :
    – ماعندي فرشة
    – هاك حق الفرشة
    – ما عندي مواصلات
    – هاك حق المواصلات
    – نان الشاي؟؟
    في هذه الاثناء حضرت الام وهي تحمل الشاي
    – سجمي دا منو؟
    بصوت واحد قالوا ليها:
    ” دا الحرامي”
    ابكرون:
    بت با ل غغغغغغغغ!!!
    محنك:
    يافيك عرق شوا اي قا يا اصحابك شناقلة..
    هو فعلا الفة سنة اولي لكن ما خنقو (قمدووو) يعني اداهو ام دل دوم..

  41. aflaiga كتب:

    اها جيناكم تانى وشكرا على المرور الراقى للكل :
    اول غرام :
    صديقى س من النوبيين الشطار كان ايام الشباب يدر ابناء الحى الممتحنين شهاده اساس ( المتوسطه زمان ) وكانت من بين الطالبات بت جيراننا الشايقيه العسوله ( ن ) كان دوما يحدثنى عندما نختلى خلوة شباب فى الونسه الدقاقه :
    س : تعرف با افليقا مش انا بدرس فى خمسه بنات وسته اولاد ومن بينم بنات خالاتنا وبنات عماتنا ؟؟ تعرف انا بحس بى انجذاب عجيب لى ( ن ) دى ما عارف ليه ؟؟ فيها حاجه كده ما عاديه ؟؟
    افليقا : ( ن ) شنو كمان يا س اسى ( ن ) دى احلى من بت خالتك صفيه ؟؟
    س : القصه ما قصة حلا يا افليقا !! القصه حاجه تانيه يعنى ( ن ) دى تحس بانها انسانه رقيقه وسموووووز كده يعنى بت خالتو صفيه دى مثلا بتحس انها صفيه صغيره جاده جاده كده !!!
    ومن يومها وصديقى س مفتون برقة ( النونات ) ..
    الدرس الاول : القصه ما قصة حلا ……………………………….. 1
    وجاييكم …

  42. aflaiga كتب:

    جيتكم تانى :
    صديقى ك بدا حياته العمليه تاجرا وتعثر كثيرا فى الوصول لوضع مادى جيد مستقر حتى جاء ذلك اليوم الذى شاركه فيه صديقى و الشايقى ومن يومها استقرت منصرفات ك ونمت تجارته واذدهرت فكنت دوما اناقشهما ف الامر :
    افليقا : انت يا ك مش قارى اقتصاد ومفتح وزول سوق ؟؟ ليه يعنى امورك ما زبطت الا بعد شاركت و مع انو و ده لا زول تجاره لا قارىها لازول سوق ؟؟؟
    ك : شوف يا افليقا انا كانت مشكلتى مع التجاره بتبدا بعد دخول القروش الدرج !! شئ صرف وشئ فنجره وشئ اخوان وشئ ديون وشئ ما بعرفو شنو داك !! المهم مما و صاحبى ده لمى فينى والله مصروفاتى انضبطت وبقيت زول واضح وصريح عندى عندى ما عندى ما عندى !! زمان كنت بجامل على حساب الدرج اسى الحمد لله بقيت اجال قدر العندى …
    الدرس التانى : القصه ما قصة تخصص ………………….. 2
    وجاييكم ولا كفايه كده ؟؟؟

  43. الغبشة كتب:

    سلام يا دنقوست بطعم الشايقية(اجمل طعم))
    السعاده بدايتها رنين الضحكة
    وآخيرها فى لقا الاحباب
    والافراح بتدور يمشولا
    والاحزان تجيك للباب
    كلامهم وشعرهم ونستهم وحياتهم حكم,وياحلاتهم,وحنيتهم مدفقه لبهناك وصدق القال العرس شايقيه عرس ما ناسب,والعرس جعليه ناسب ما عرس والدنقلاويه لا عرس لا ناسب.
    اها يا دانقوست رايكم شنو فى الكلام ده؟
    قالوا كمان كان لقيت جنى شايقى وجنى دبيب اقتل جنى الشايقى وخلى جنى الدبيب,برضو رايكم شنو؟
    والى لقاااااااااءءءءءء

  44. ابوالمنذر كتب:

    قالتلو :
    هيه يابا تحرالى الدكتوربداايبارشى
    قاليها:
    ماكبتو نعل عافى
    قالتلو:
    الوليد كعورد ومدمدم
    ………..
    فهمتو شى ؟؟؟؟؟؟؟؟؟

  45. ابوالمنذر كتب:

    جرجاوفى الكيم انتقو ارمو
    ده كلام من كمبكة العين عارفنو شايل وين ؟؟؟؟؟؟؟

  46. الغبشة كتب:

    ابو المنزر سلام من راسك ولا كراسك؟
    البت سالت ابوها يتحري ليها يعرف ليها اذا كان الدكتور بدا الابر شى اى بدا يطعم ويدى الابر الحقن ((وحسب علمى كانت تريد تطعيم ابنها))
    الابو رد: ماك بدو نعل عافى,لسه مابدا عسى مافى عوجه
    البت قالت: محموم ومغتغت

    والتانيه:جر((جره)) جاو نوع من البلح,فى الكيم اعتقد وكما سمعت فى الركين اى الركن,انتقوا اى شدو او اجذبوا,ارمو ارميه.

    طيب دى شنو:
    الام:اكلت الرز
    الولد:اى
    الام:معالقنضاف:او مع القنضاف؟؟؟؟؟؟؟؟؟؟؟؟؟؟؟

  47. aflaiga كتب:

    شباب : يلا عشان البوست ده ما يكون بوست مدح او ذم للشايقيه ونطلع منو بى حاجه مفيدى !! دعونا نطرح تساؤلاتنا المشروعه وعلى الاخوه الشايقية ان يجيبو عليها بطيب خاطر لانو نحنا لى اسى بنهاظر ساى وما جينا للكلام السخن .. ولا رايكم شنو ؟؟

  48. bakriMusa كتب:

    زحو كده (الشوايقه وصلوووووا )

    قالو ليك فى شايقى
    مشى دار الايتام
    شغل ليهم اغنية
    بابا فين

    شايقيه قالت لي امها : راجلي اتاخر خايفه يكون عرس علي
    قال ليها يابت اتفائلي خير يمكن طقشتو عربيه

    شايقى أبوه مات أصحابوا أكلوا الكشف
    لمن ماتت أموا جاب ناس الهدف

    شايقية بتحب البوبار والفشخرة
    سألوها جزمتك دي منو وين؟؟؟
    قالت ليهم من ماكدونالدز

    تمساح خاتي ليهو كوم ليمون جنبه يقشر ويأكل . . . جاء تمساح سأله مالك يا تماسيحو ان شاء الله خير . . قال ليهو والله اتغديت لي بي شايقي عامل لي طُمام . . . قال ليهو اجيب ليك دواء استفراغ . . قال ليهو المشكلة لا معدتي دايرة تهضمه لا الدنيا راضية ارجعه ليها تاني

    شايقي داير ينزل نعي في الجريدة .. كتب :
    الشايقي ينعي ابوه … ويوجد تمر للبيع

    شايقي كتب في وصيتو ادفنوني جنب الجعلي . لمن سالوه ليه قلت كدا ؟ قال عشان يوم القيامة الجعلي بيقول حرَم الحساب علي

    شايقي قالو ليهو ناس البلد رسل لينا التبرع بتاعك عاوزين نعمل حوش للمقابر قال ليهم تبرع شنو عمركم شوفتو ليكم ميت شرد ؟

  49. aflaiga كتب:

    يكرى موسى : تحياتى – ات دحين ماك شايقى ؟؟ ولا دا نقد ذاتى ؟؟
    ملخص النكات يدور حول :
    الحرص – الماديه – الانانيه – الحقد – الفهم المجرد للدنيا ..
    يلا ورونا يا شوايقه ردكم شنو على الجزء الاول ده !!!

  50. الغبشة كتب:

    لقبيلة الشايقية خصوصية مع الاسماء بشكل رهيب حتى البعض يعرف من الاسم انهم ينتمون الشايقست مثل محمداحمد وسيداحمد والعطا وعطاالمنان وتاج السر وسرالختم وحاج التوم,ومن الاسماء النسائية اشهرها مهيره,((ورونا تانى شنو؟))

    سيداحمد جاى من تحت وحاشيلو شوية تمر شايلها فى كيس وتعباااااااااااان
    قابله جارن ليه غياااااااااااز وهو زهجان مع تعبو
    الجار:ازيك يا سيد احمد
    سيداحمد:اهلن
    الجار:اظنك جاى من تحت
    سيد احمد:اى
    الجار:اظنك راجع البيت
    سيد احمد: اى((اختصار شديد وما داير يزيد فى الكلام))
    الجار:اظنك حشيت من تمرك
    سيد احمد:اى
    الجار: اظنك بتضوقنى ليه؟
    سيد احمد:ظناً متل ها الظن لا تظنو

    والى لقااااااااءءءءءءءءء

  51. aflaiga كتب:

    الغبشه : والغبشه كمان !!
    وتانى ما نظن شنو ؟؟
    الحياه فى ديار الشايقية تحتاج لبوستات وبوستات فهلا حدثتمونا عن تفاصيلها ولا دى شفرة دافنشى ؟؟

  52. aflaiga كتب:

    تهت نجى للكلام السخن :
    الاتهامات :
    اولا اهل الشمال الاقصى يتهمون الشايقيه بانهم قد ساهمو فى تحويل عجلة التنمية لقراهم وبلدانهم بدءا من شارع الشريان وحتى الخدمات الصغيره وليس انتهاء برغبتهم تحويل رئاسة الولاية لديار الشايقيه ..
    اهل الغرب يتهمون الشايقيه بانهم اول من بدا فى تزكية العنصريات وان السبب الرئيسى وراء الكتاب الاسود كان تكتلات الاشيقية فى السلطه والثروه …
    اهل الوسط يتهمون الشايقيه بانهم صعبين بالحيل فى المعيشه والتعايش وتكونت لديهم مقاومه وممانعه معنويه من التعايش معهم ..
    اهل الجنوب يعتبرون الشايقيه من افهم قبائل السودان ( ربما بسبب نيفاشا ) ويعتبرون ان الكاريزما الخاصه بنائب الرئيس ساهمت فى وضوح الرؤى تجاه الاتفاق ومجيئه بشكل لا يرفضه الا الرومانسيون النرجسيون !!
    اهل الشرق يحبون الشايقيه ولهم معهم ود طويل منذ جناين الميرغنيه ولم يشهد التاريخ الحديث نزاعا بينهم ..
    يلا يا شباب الشايقسيت ردو على الاتهامات دى اول …

  53. نيام كتب:

    الغبشة:
    تاني الغبشة و الغبيشة و غُباشة
    افليقا:
    بِس خربتو ضمه ..قلبتو في اللوبي
    ابوالمنذر:
    نان القنديلي ماهالتك ادا؟

  54. aflaiga كتب:

    نيام : مانى خاربو علا الخوف هو ما لا نستطيع نقاشه – دعونا نناقشه لنفض السيره ونقلب الصفحى على صفحتا . عشان ما نبقى بكره فى ما خلولنا صفحتا ننقلب عليهى ويجينا زولا متل قطعة الشيطان يقوللنا باقى نضما ما بحتتو اخرو .. ووشينا ييبس من كتره النضمى ..

  55. ابكرون كتب:

    …..في زول قاااال : ( والدنقلاويه لا عرس لا ناسب )
    (نهنو الدناقلتو يا رسول الله !!!)…._دي زيادة عفاره مني _
    اظن قالو ا :(والشايقية لا عرس الخ….)

    والله يالغبشه …بولغتي الحمد لله ما بقت محسيه……
    الكلام ده بجيب الهوا ….هوايا ابنيلك أصر عالي….
    وكيف مر الكلام ده من تحت نخرة افليقا
    يا عالم المديدة الحاره…حرقتني

  56. ابكرون كتب:

    نيام انت (ضمه) مش ياها( مره )بتاعة السعوديين

  57. نيام كتب:

    ابكرون:
    ضمه ≠( مره )بتاعة السعوديين
    ضمة=(بتاعة اولاد مدن) بالمرة=(بالبقارة)دُتْ=(خرتوم)كلو كلو=(بالجعلي)تب=(بالليبي) بِكل=(جزائري)قع=(بالتونسي)برشة=بالقطري(وايد)
    افليقا:
    يصرفني لحقتو افي

  58. ابوالمنذر كتب:

    الغبشة………
    نيام ……….
    نان دحين الولد افليقا ده ما دخل(بكسرالخاء)……..!!!!!!!!!
    الشوايقه لو يردو كان ردوا زمان زمن الناس هداوة بال .. ماهو الروعة والفهم فى عدم الدفاع وقالو فى اول البوست (العارف عزو مستريح) وما دايرين نقول ان اتتنا مزمة من ………
    بس حتة الفهم المجرد للدنيا دى شويه مامدروسه لانو بالرجوع لتاريخ المنطقه القرانى والمديحى تلقى العجب …….. ولو رجعت للشعر كل البلاغه والوصف مستوحى من القران رغم امية الشعراء ….
    وصفك للسمع ماشافو فى الواقعه والرحمن

  59. aflaiga كتب:

    نيام : يبقالى بى طقشت طيارى تفرتق عضيماتى ما قاصد الحقو .. انتو اتحسستو ؟؟ الله لا جاب زعل !! مش قلنا فى الاول الكاتب لا يحمل !! ولا ده حالتو لا يحمل ؟؟!!

  60. aflaiga كتب:

    المنذر : الفهم المجرد للدنيا يعنى الفهم الخالى من الرومانسيات والنرجسيه وهو ما يدخلكم فى خانة الصعوبيي الشديدى وحجه حريصى ..

  61. الغبشة كتب:

    معالقنضاف شفرتها صعبه ولا شنو يا قوم؟

    شوف يا افليقيو والاخرين:الشايقية حرصين صعبين وبخيلين وانانيين,كل الكلمات السابقة باختصار ملتزميييييييييييييييييين واعيييييين ما اكتر,يقولوا ليك الولد كان نجح للعسكرية وكان ما نجح للطوريةوجه الشبه بين العسكرية والزراعه كلاهما يحتاج الانضباط والالتزاتم وعدم التهاون مع الاختلاف فى الدرجة ما بحبوا الغموض والتلاعب ((يتلاعبوا براهم بطريقتهم لكن ما تتلاعب معاهم))يعنى على قول السوريين يا نيام:الفزلكه ما بتنفع معاهم .
    عشان كده يا افليقيا بتلقى بناتهم بفهم فى ادارة بيوتهم قبل ما تتكون البيوت لانهم بتشربوا بالانضباط والالتزام والتقديس للحياة الزوجيه ,عشان كده الولد بقى عسكرى يديى العسكريه حقها البت يعرسوها تدى البيت حقو.((هذا الامر ليس مطلق على كل حال ففيهم العكس))

    افليقيا:احضر اربعه اشخاص من الاتجاهات الاربعه فى السودان بدون تحديد القبيله وجهم ليهم كلمه واحده وتكون حاره ان شاء الله((كلمة غبى)) حتكون الردود كده((يا جماعه ماتزعلوا لكن بالجد راجعوا كم مشهد مره عليكم وقارنوه بكلامى))الردكالآتى:

    الشمالى:انت قايل نفسك شنو((بكل برود وعدم هيجان))
    الجنوبى:انت حقار((مع تحفز للضرب))
    الغربى:ما تهين((وبتجيك البونيه طوالى))
    الشرقى:يمكن مايرد خالص
    من العوارض والاثار الجانبيه ومن مخلفات الاستعماااااااااار

    كسره:معليش للبرى
    والى لقاااااااااااااءءءءءءءء

  62. نيام كتب:

    افليقا:
    الله ما جاب يوم حسسنا..عِلي الفيك اتخبرت..
    الغبشة:
    افليقي دا عقبيلو .. عقبيلو انكان يقعلو..

  63. ابوالمنذر كتب:

    الغبشه…
    المعالق النضاف دحين ماياهو صاح كدى
    الشايقيى العرسوها وجابوها الخرتوم جنها جاراته يزورنها قدمت لهن تلج من الفريزر …. الرسول تقرقشن ميهيتن يابسى…
    افليقا ……..
    ياعسل ماقلنا مافى ذعل اخد راحتك .. الرسول ان اتحسست واستمتعنا غاية الاستمتاع وقالو :
    قاعدين شايقى ودنقلاوى وجعلى وادروب دار الحوار التالى :
    الدنقلاوى: نحن حكمنا البلد دى 16 سنه بالنميرى
    الجعلى : حرم نحن ناوين نوصلها 61
    الشايقى : نحن ما نمسك الراس لكن بندورو محل دايرين
    ادروب : (اتغاظ ما لقى شى) قال : نهن والله رئيس ما عملنا لكن اوكير عندنا واونور عندنا اوفاش عندنا اوشيك عندنا وهسع كمان اوكامبو عملنا….

  64. الغبشة كتب:

    جعلى عمل فرن الشايقى مشى يشترى عيش منه والفرن فضااااااى وقف فى الشباك
    الشايقى:سلام ادنى عيش بالفين
    الجعلى رفع راسه :اقيف فى الصف
    الشايقى ما ناقشه وقف وبينو وبين الشباك متر وكل شويه يزح شويه على الشباك لما وصل قال:ادنى عيش بالفين
    الجعلى دنقر يشيل العيش الشايقى اده امدلدوم فى قفه اول مارفع راسه قال:الضرنى منو؟
    الشايقى:يعرفو ليك وسط الزحمه دى كيفين

    نيام:تظن اكا عقبتلو بيقعلو؟

  65. سهيل كتب:

    سلام تاني..

    والله يا أفليقا كلامك نصفه معقول و النصف الآخر ليس له مكان على أرض الواقع… فأهلنا الشايقيه لا يحقدون على أحدو الدليل على ذلك نجاحهم و كما تعلم فإن الحاقد لا يتقدم لأنه يعيش بعقلية الضحيه… فالعصاميه هي صفتهم الأولى و الإنضباط…

    ولنا عوده

  66. محنك كتب:

    المهم يا جماعة اذا تكلمنا عن القبائل العربية فممكن يتواصل الناس ولكن لو تحدثنا عن قبائل السودان الاخرى وهى عريقة وذات تاريخ ضارب فنحتاج الى مترجم لكل بوست . عشان كده نفتح باب التعيين لمترجمين من كل قبيلة لحكم وتراث ونكات القبيله ….
    افليقا … طبعا ممكن يكون مرجع للغة النوبة وعلى الاقل الدناقلة لكن عايزين غيرو من القبائل الاخرى

    طبعا سمعتو قصة الشايقى الاتزوج روسية وجابو ولد مرتو قالت نسميه خرتشوف والشايقى قال سيداحمد اتفقوا اخيرا سموه ( ابنعوف ) وهو من اسماء الشايقية المميزة … وعائلة المرحوم ابنعوف سليمان وعلى راسها دكتور جعفر لها اسهامها الواضح على مستوى السودان . ( عنبر الاطفال ) بمستشفى الخرطوم .

    فى واحد تكهن بانه عندى عرق شايقى فهو احتمال لكن ليس العرق الاصلى عندنا … ونحن منفتحين على كل قبائل السودان على الاقل كمنطقة وعائلة .

    اما كجيران فقط جاورنا كل اهل السودان …. وهم بشوشون وكرماء ومعتزون باصولهم .
    على الرغم من ان الامر فقط امر تعارف وكل الصفات من خير او شر موجودة فى معظم القبائل بلا فرز لانها طبيعة النفس الانسانية .

    لكن معظم اهل الشمال كانوا يعانون لكى يصلوا الى الخرطوم فاذا وصلوا تعبوا ليبنوا انفسهم اما القراب فكانوا يقولوا نحن بيوتنا يا ها دى نتغدى فيها ما بنسوى بيوت فى دارا مى دار ابونا

    يحكى لى ظريف من اهل قرية التكينة ان جدودهم كانوا يقولوا ( الجنة لو فى الواطه ( الارض ) يا ها التكينة دى … ولو فى السماء قصاد التكينة ) وكانوا لا يبيتون فى الخرطوم من حبهم لها.

  67. سهيل كتب:

    يا شباب … عاوزين لينا رحله في الأيام الجايه لجمع الشمل و لتقويه الترابط و برضو عشان ناس حاج السلاوي و كده…

  68. د.ياسين شمباتى كتب:

    احيييييييييييييي انا من مغستى,,واااااا ضيقى ونشاف ريقى…..

  69. Nourlight كتب:

    مرة من ذات المرات..قابلت بنت سودانية بدت لي ذكية و حية النفسية..وبداخلها الكثير من الكلام..الذي في جوهرة كله احتجاجات…
    ولما جلست معي “نتجاذب اطراف الحديث” دهمتني رغبة غريبة وهي فضول غريب يدفعني الي سؤالها سؤال شخصي جداً…ولم استطع “منعي”من سؤالها .. تشجعني نظرة متحدية في عينيها..فسألتها مباشرة …”انتي من اي مكان في السودان؟” ونظرت لي كأنها تلعنني علي هذا السؤال …وقالت لي بوضوح وشكل مباشر وكافي شافي..كأنها تدافع عن نفسها..
    “انا شايقية لكن عندي جواز انكليزي”

    quoting Aflaiga

    “الشايقيه ناس واضحين وناس حسابات وفصيحين وناس عمليين جدا جدا عشان كده بتلقاهم مفضلين فى استلام المال ( ما المسروق !! ) ….و الحنيه دى بينهم وبين بعضهم بس ”

    اتفق معك..ومع من قال انهم صادقين في مشاعرهم وواضحين في التعبير عنها حتي ان لم تكن ايجابية…ولا يجدوا حرجاً في الصراحة المفرطة…”انتهازيين” للفرص بشكل شرعي واخلاقي وهذا سر نجاحهم لانه اعتقد ان الشايقي يملك عقلية نافذة تؤهله لدرس الفرصة ومدي نجاحها في لمحة بصر…حبهم للمال ليس حباً للمادة بحد ذاتها و انما لصون عزة انفسهم وسعياً لامتلاك الاحساس بالقوة ..

    انا اجدهم عاليين باحساسهم لدرجة تجعلهم اخلاقيين كثيراً ولا يعتدوا علي احد او يسلبوه حقه..ويكره الواحد منهم ان يكون حقيراً ولو بنظر نفسه…قال عنهم قائل مرة ان اخلاقهم وقوانينهم الاخلاقية تشبه اخلاق الملوك القدماء..

    انا اختلف معك بس في قصة الحنية دي…ما عندي فكرة عنها…
    بس يمكن هم يتكتلوا علي بعضهم لانهم لا يقدروا علي اخلاق الآخرين التي ليست بمستوي رفعة اخلاقهم…

  70. الخيل تجقلب والشكر للشايقية

    المناصير قادوا أهم المعارك مع الشايقية

    الغناء حق البديرية والركابية والشايقية والمناصير وتقولوا عليهو فن شايقى أو الأغنية الشايقية

    الخلاوى والمسايد حقت الركابية والبديرية , نشروا الدين فى أغلب أرجاء السودان

    نحن دايرين ناس يكتبوا بتخصص عن الشخصية السودانية مش القبيلة الفلانية والقبيلة الفرتكانية

    وعشان كدة حتى اليوم مافى تأسيس لهوية السخصية السودانية

    مقولة نقاء جنس بشرى ما مقولة ماعاد لها وجود فى أرض الواقع فى الشمال كل اقبائل العربية الوافدة على

    على النوبيين إمتزجت معهم وبتفاوت وهكذا فى بعض أرجاء السودان .

    من الإستقلال ولى تاريخ اليوم ماقادرين تكتبوا تاريخ صحيح معافى من أمراض الإنحياز للجهة أو القبيلة

  71. تعال لغابتك بخيـــرها وتعالها يا اسد الهــــــمام
    بدل دوشــــــكا يغني طير وبدل قنبلة عش نعام
    تعالوا بدل نبني ساتر نخيب ظن الصــــــــــــدام
    نطيب لســودانا خاطر وطن وافي علي الـــدوام

    كل دمعة شوق بتنزل من عيونك يا سودانا
    فيها اٍحساس اٍنى منك وأنت من حُزن الغلابة
    وكل غنوة ريد حزينة طالعة من جوف الربابة
    فيها نيلنا ولون نخيلنا وعز بلدنا وطين ترابــا

  72. احمد كتب:

    سلام شباب فيرن ظن هذا الظن والاستنتاج لسبب واحد لان الشايقية يحلقون شعورهم كما يفعل محاربي وامراء الفراعنة وكذلك شراستهم في القتال وهذان السببان ليسا كافيان لتاتي نتيجة كهذة اذ ان الاسلام امر بحلق الشعور عند التحلل من الحج والعمرة حلق كامل وليس تقصير فقط كما يفعل الشايقية وما حديث الرسول (ص) الذي قال فيه غفر الله للمحلقين وقيل ليه والمقصرين فالتفت للناحية الاخري ثم كررت له فالتفت للاخري وكرتت له ثالثة حي قال والمقصرين اي ان الحلق للشعر اصبح عادة اسلامية علي عكس ما يحب العرب من اطالة شعورهم ومعروف ان ال البيت هم اكثر الناس طاعة للحبيب ( ص ) فاطاعوه في تقصير شعوره الي ان اصبحت لهم عادة وهم ( الشايقية من ال البيت ) اما الشراسة في القتال فهي عادة العرب عندما يهددهم احد او يتعرض لعرضهم وبهذا ينتفي افتراض فيرن ارجوان اكون قد اوفيت بعض الجوانب باضاءتها

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s