يا عين يا عنية

Posted: الإثنين,2 مارس, 2009 by عزت in اخرى

عادة ما أنتبه في الندوات و ورش العمل في موضوعها الذي دائما ما يكدره و يشوش عليه رنات الهاتف المحمول عند البعض أو الدخول و الخروج من القاعة لتلقي مكالمة أو تلبية نداء فتركز على المتحدث و مداخلات الناس و لكنهم لا يتركونك لحالك فهناك دائما السكرتيرات أو المنظمات اللاتي يطفن بين الناس بورق الحضور أو لاعطائك ملفا أو تنبيهك بأنك مطلوب في المنصة أو في الخارج للادلاء بتصريح للاذاعة و الا التلفزيون.

 

لم يختلف ذلك اليوم من تلك الحركة المعتادة بتاعت البنات المنظمات و لكن زادت حدتها قليلا بكعب عالي (كج كج) ما يلبث أن يقترب و يبتعد يبدوا عندما ينادي عليها المجتمعين و لما كثرت حركتها … تبينت الأمر و أدركت على الفور لم تزيد حركتها كل مرة فكلما لبت مناديا قبل أن تقدم له ما يريد يشير اليها آخر… فما الذي ميزها عن الأخريات… فقررت أن أتثبت من ذلك و صدقوني كانت النظرة الأولى و التي لا نؤثم باذن الله عليها رغم أن بعض المستهبلين يبررون بانهم لم يذكروا مدة النظرة فهم يطيلونها للتحقق الكامل… تحققت وقتها و لتعذرني (أم عصمت) يومها فقد طالت قليلا “فالبت” كانت في منتهى الجمال، تلبث توبا أبيض تحته فستانا (ميدي) بلون متناسق مع الكعب العالي و الذي ظهرت من فوقه الساقان الممتلئتان و التي قال فيها أحد صعاليك العرب…

 

و ساقا تملأ الخلخال +++ تراها فيه مختنقة

 

و ( كج كج) تمشي بها أمام عواجيز الندوة الذين كثروا المحلبية شوية و الظاهر ضربوها ليك عين…. فهذا ما علمته من مدير الندوة بعد يومين و الذي أسر الي أن البنية و في حادث حركة… كسرت ساقها و هي طريحة بالمستشفى فايقنت أن لا بد للعين دخل هنا…

 

و يحضرني هنا حديث أبي أمامة بن سهل بن حنيف – رضي الله عنه – الذي قال : (مر عامر بن ربيعة بسهل بن حنيف وهو يغتسل ، فقال : لم أر كاليوم  ولا جلد مخبأة) يبدو أنه كان يعني جمال جلده  و الله أعلم فأدركه صريعا …. فاتي  به النبي صلى الله عليه وسلم فقيل له : أدرك سهلا صريعا قال : (من تتهمون به؟ ) قالوا قال عامر بن ربيعة؛  علام يقتل أحدكم أخاه ؟ فإذا رأى أحدكم من أخيه ما يعجبه ، فليدع له بالبركة) ثم دعا بماء .  فأمر عامرا أن يتوضأ . فغسل وجهه ويديه إلى المرفقين.  وركبتيه وداخله إزاره. وأمره أن يصب عليه.  قال سفيان : قال معمر عن الزهري : وأمره أن يكفأ الإناء من خلفه)


وقال الإمام مسلم ( قال القاضي عياض بعد ذكر حديث حسد عامر بن ربيعه لسهل بن حنيف: في هذا الحديث من الفقه ما قاله بعض العلماء أنه ينبغي إذا عرف أحد بالإصابة بالعين أن يجتنب ويتحرز منه، وينبغي للإمام منعه من مداخلة الناس.  ويأمره بلزوم بيته فإن كان فقيرا رزقه ما يكفيه ، ويكف أذاه عن الناس)

 
يقيني أن هناك بعض التعاويذ التي من شأنها أن تقي و تزيل العين قبل وبعد وقوعها بإذنه  تعالى، و هناك بعض الآيات أو السور التي ثبت نفعها بشكل عام، وكذلك ثبت وقعها وتأثيرها في علاج العين بإذن الله تعالى.

 

فما الذي يحدث عندما تقع العين على شئ، أعتقد و الله أعلم أن هناك بعض الناس “عينم حارة” ما تقع على شئ الا و لحقته أمات طه فهؤلاء ينبغي أن نطبق فيهم ما قالته السيدة عائشةرضي الله عنها – (كان يؤمر العائن ، فيتوضأ ، ثم يغتسل منه المعين) عليه يسن إذا رأى أحد من أخيه ما يعجبه أن يدع له بالبركة، و يستحب كذلك لمن رأى شيئا من نفسه أو ماله أو ولده أو أي شيء فأعجبه أن يقول: ما شاء الله لا قوة إلا بالله، ومن أنجع الوسائل للوقاية من العين قبل وقوعها وبعده التحصن بالأذكار والأدعية.

 

يقولون أحيانا تصيب العين شيئا اذا تصادف أن يطلق أحدهم تشبيها لهذا الشئ فيطابقه بالحتة كمن قال في آبنتيه أنهما يشبها (بت الكتشينة) ام راسين فقد كانتا ترقدان مخلوفتان و هما مغطيات بالفركة بتاعت القرمصيص بعد “الطهور” فصرعهما و حكى لي خالي بأن في زمنهم كان العرسان يلبسون البدلة الزرقاء و القميص الأبيض فتصادف أن كانوا عرسان ثلاثة بنفس الهيئة فقال لهم أحدهم “السمبر دا ماشي وين” فقال لم نشعر و الا و تتطاير النار من سجارتي لتقد الثلاث قمصان و تخرب منظر السمبر الجميل…

 

فالعين موجودة موجودة في كل مكان و لكن ينبغي للإنسان المسلم أن لا يتعلق فؤاده بالعين حتى يوسوس بها في كل شيء بل يتوكل على الله ويقرأ أذكار الصباح والمساء كقول النبي صلى الله عليه وسلم من قال إذا أصبح وإذا أمسى بسم الله الذي لايضر مع اسمه شيء في الأرض ولاالسماء وهو السميع العليم ثلاثا لايضره شيء.

 

 ولكن إذا قام الداعي للخوف من العين كجمال فائق في الصورة وجاذبية بسبب نونة في الذقن أو مجموعة أولاد إخوة يدخلوا من باب واحد وخشي عليهم العين لوجود من لايبرك فلا بأس والخوف من العين إذا حصل مقتضاها كما تقدم ليس شركا كما قال سيدنا “يعقوب” يابني لاتدخلوا من باب واحد وادخلوا من أبواب متعددة. فقيل خشي عليهم العين لو دخلوا من باب واحد.


اللهم لك الحمد لانحصي ثناء عليك انت كما اثنيت على نفسك.

Advertisements
تعليقات
  1. ودالفتيحاب كتب:

    أبوعصمت
    مساك الله بالخير
    كافاك الله شر العين
    دحين النظره دى مايكتبوا عليك أى حاجه؟
    الثوب والفستان وتناسق الالوان حتى الكعب العالى والله نظرتك بريئه ياخى..
    لا اها والفيها الحساب ياتا,,,
    لكن مادام ذكرت الاوراد فى الصباح فانت بعيد من العين.
    بس انا فى رأى أم عصمت تبخرك انت البنيه ماعلينا منها وتركتك بالف خير.

  2. سهيل كتب:

    سلامات…

    يا أبو عصمت .. قلت لي البنيه الحلوه مرقدنها وين؟ طيب ما نوديها الجمعيه الخيريه و أهو كلو ثواب .. مش يمكن يشوفها عبدوش و يبقى زيتنا في بيتنا..

  3. nono كتب:

    د/عزت والاخوة اصحاب الدونة لكم التحية

    لقيتو واقف منتظر تشتاق عيوني لطلعتو

    نفس الملامح والشبة .. والمشية زاتا ووقفتو

    اللهفة والتوب والقوام واوصاف حبيبي وروعتو

    تاريهو يا قلبي الحنين

    راجيك بي شوق السنين

    ياربي واقف من متين ؟

    لكن اه يخلق من الشبه اربعين

    كسرة/يمررررررررق

  4. سهيل كتب:

    لكن يا أبو عصمت جنس البنات ديل ما ياهن فاكهة ورش العمل و الندوات.. ولا إنتا عايزنا نناقش ثقب الأوزون بدون منظمات (بكسر الظاء) …

    يا عمك في قهوه بتتشرب بدون سكر ( بضم السين) …

  5. حاج أحمد السلاوى كتب:

    الأخ أبو عصمت .. لكن ما باااالغت عديييييل كدة فى معاينتك للبنية السمحة .. غايتو إنتو يا الرجال .. عينكم فارغة بشكل !!!! أنا فى رأيى.. حقو عواطفكم تخضعك لتحقيق شامل ودقيق .. فى الموضوع دة .. ولاّ شنو رايكم يا جماعة ؟

  6. ودالفتيحاب كتب:

    بس يااخوانا أبو عصمت ماقاصد حاجه بس داير يشوف صوت الكعب العالى ده جاى من وين….والنظاره مافى يعنى عندو عزر ولاشنو ياابوعصمت

  7. مش كدا بالله يا ود الفتيحاب من دوب ما الواحد طلع النضارة و عاين بس…

    لكن في واحدين بودوا الآخرة في لحظتها … أنا و العواجيز الباقين الظاهر تأثيرنا (رتارد) ظهر بعد يومين…

    صاحبي عندو زجاجة كبيرة من النوع بتاع الزينة و قام خت داخلها موية ملونة بالأحمر و خت ليك في عنقها ساق (السيقان دي طوالي) و زهرة اصطناعية و ختاها ليك في ركن يشع من وراها نور…آخر حلاوة بس جا داخل واحد…

    قال ليهو الكركدي مودينو وين…
    كج…. اتشقت و اندلق الكركدي و الزهرة و الصالون بقى عليهو حكاية

  8. ابوالمنذر كتب:

    ابوعصمت……..
    الاخوان ست والاخوات…….
    ياعينى ياعينيه ياكافره يانصرانيه……..
    عين الحسودفيها عود
    عين الفتاه فيها واطه
    عين الراجل فيها مناجل
    ………
    ده تحصين الحبوبات مع بخور التيمان والحبه الحمراء تقول طق تمرق العين

  9. ابكرون كتب:

    عزت : انت حقوا تجهز ليك مرتبة في دار الجمعية تبيت فيها الليلة ….جننته السيقان…قلته لي شنو فستان ميدي…وكج كج ده كلوووو في كحله واحده…..؟
    قالوا في واحد شاااف ليه (عتوت)صغير لونه اسود طالع في تربيزه ومدنقر بيكل في شئ في التربيزه ورافع ضنبو الصغير….صاحبنا ده جا داخل شاف العتوت بالوضع ده ….قال الشي راس مكنة سنجر ….!
    وطبعا الحصل شنو للعتوت معرووووف …لكن كدي قولوا لينا العين هي شنو …؟
    هل هي اشعة تصدر من الساحر ؟
    هل هي من العيون ولا الدماغ …؟
    وليه ناس بتسحر وتصيب وناس ما كده ….؟

  10. nono كتب:

    من غير ميعاد
    واللقيا أجمل في الحقيقة بلا اتظار
    صحّيتي في نفسي الوجود
    ورجّعتي لعيوني النهار
    كل الطيوب الحلوة يا مولاتي والجيد الرقيق
    واللفتة والخصل اللي نامت فوق تسابيح الغريق
    وخطاك والهدب المكحل وفتنة التوب الأنيق
    في لحظة مرت كالظلال تعبر رؤاي إحساس عميق
    فتحتي جرح الليل عسى من صمتي ما قادر أطيق
    صحّيتي في نفسي الوجود
    ورجّعتي لعيوني النهار

  11. محنك كتب:

    يا دك
    سلام
    اوع يكون عينك ارة وما سميت ولا اتشهدت

    يعنى لما نجى الاجازة الواحد يشخبط وشه ويركب ليه مشبك فى اضانوا … ام عينك باردة

    العين حق

    العين تدخل الرجل القبر وتدخل الجمل القدر

    عليكم بالمعوذتين

    تقرا الاخلاص والمعوذتين ثلاث مرات فى الفجر والمغرب بمشيئة الله يحففظ الرحمن
    ومرات الزول بسحر اولادوا

    وهى تنتج من الاعجاب او الحسد فى اى شى ذا لم يذكر الله العائن

    وانا ما معيون

  12. ودالفتيحاب كتب:

    اها رايكم شنو فى السحر نفسه, ده لاعب حارس مرمى جاته شوته مع الزاويه زولك طار ليها وهو طاير قال لى نفسه الشى صقر ,الراجل وقع على يده انكسرت رفعناه وهو يقول براى سويتها فى نفسى ,نحن عارفين الراجل عينه ماشاالله ,حكى لنا الحكايه.
    فى حديث عن الرسول صلى الله عليه وسلم (كلكم معيونون إلا من بورك ).
    أذا لم يذكر الله فان العين وارده .

  13. زووووووول كتب:

    د/ عزت سلاااام
    اولا فى قصة يعقوب قال تعالى ((… وادخلوا من ابواب متفرقه وما اغنى عنكم من الله شيئا )).
    ثانيا لم اتمكن من قراءة موضوعك الراقى بالامس وتوقفت عند صوت الكعب العالى كج كج وعشان كدا قلت اجى من الصباح اشوف بكا الريس دا كيف فوجدت الموضوع فى غاية الروعه .
    من اروع ما قرأت فى قصة السحارين كما يسميهم اهلنا . قصة الرجل الاعمى الذى كانت عينو حاره .
    يحكى انه كان يجلس بالقرب من احدى المزارع فسمع رجلا يحلب بقرته شييييب شيييب شيييب شوووو شوووو ولما انتهى من حلبها مر امام الرجل الاعمى فسأله الاعمى
    ــ دى بقرة منو يا زووول
    ــ دى بقرة فلان وكان تبعد عنهم بعدا شديدا
    ـ يبدو ان الرجل الاعمى وعينو حاره ردد فى سره الكترااااااااااااااابه
    قال الراوى :
    فماتت هذه وماتت تلك
    كسره : دى قنبله عنقوديه عدييل كدا

  14. aflaiga كتب:

    عزت : يا عبدوش استوضح لى افليقا ده من امبارح ما خش البوست حقى ليه ؟؟
    افليقا : والله يا سعادتك كنت مشغول شديد !!
    عزت : انت عدم الضبط والربط ليك شنو ؟؟ شوف عبدوش وين رد ليهو كتابة كمان بتتخطى ؟؟
    افليقا : خلاص يا سعادتك عاقبنى بى 10 تعليقات كل ساعه ..
    عزت : لالا اوعك ترجع لى زمان خلاس عفيناك …
    عبدوش : يا سعادتك نكتب شنو فى الاستيضاح ؟؟
    عزت : اكتب سكوت افليقا خير من انفتاحه …
    اها جينا ليك والشوق دفرنا :
    والله انت اقعد وصف لى كده لمن قريبتى النوبيه دى توريك ( منظر ) نوبى من الكنا بندفنم مع الدكاى زماااان .. يخليك تانى ما تشوف اى شيئ !! لكن عزاؤنا ان الذى نفسه بغير جمال لا يرى فى الوجود شيئا جميلا … وانت جمالك بنفس عديل كده مش العكس ..
    شفت يا ابكرون كسير التلج بتاع الغايبين ده من الصباح كيف ؟؟؟
    جاببكم دى تسخينه ساى …

  15. سهيل كتب:

    إنت يا ابوعصمت ما سمعت اغنية الحقيبه البتقول ” يا عيني تعاينن جننتو قلبي”.. و لا الكاشف ” عيوني و عيونك اسباب لوعتي”..

    تعرف يا ابكرون صاحبك ابو عصمت دا ذكرني المرحوم الفاضل سعيد في مسرحية ( اكل عيش) لمن قال للمدير إنت قلت لي محاسن في التلفون انا بحبك و ما بعرف شنو داك – حكى ليهو موضوع طويل جدآ حصل بالتلفون بين المدير و محاسن (نظام كاسر عينو و كده).. قام المدير هرشو و قال ليهو إنت جبت الكلام دا من وين؟ قام صاحبك (العجب) رد قال للمدير و الله انا كنت ماري جنب شباك مكتب سعادتك و سمعت الكلام دا… لاحظ لكلمة ماااااري

    يعني يا ابو عصمت الكج كرج و السيقان و التوب و ما تحت و فوق التوب و الشعر و ما تنوء به مابعرفو شنو داك بس من اول نظره ..رشقتني عيونو..
    و خليك مع الزمن يا ابكرون .. باين عليهو مكتب الجمعيه سيستضيف عمنا عزت كام يوم كده لغاية ما أوكامبو يشوف ليهو حل مع الريس بتاعنا .. ولا إنت ما ريس؟

  16. أبكرون و سهيل و باقي الحبان سلام

    طبعا عرف عن أخوات نسيبة بأنهم مفتحات خالص و تستطيع الواحدة منهم بكحلة واحدة يعني نظام سكاننق لمجموعة من الناس أن تعطيك تقريرا اذا وددت كتابته قد تحتاج لصفحتين…

    فبسهولة جدا تستطيع تمييز و تقويم و اعطاء فيدباك (هسة الراجل أب تفه دا مالو لابس قميص مشجر مع بنطلون كاروهات، و داك المشنق الطاقية مالو كان لبس ليهو عمة و يستطيعون تمييز توب بثينة اللسة ما اتطق و شعرا المعمول و حنتا المنقوشة و هناك بيوت خبرة تستطيع أن تميز الحنانة منو كمان…)

    بقت علينا نحن المساكين اليادوب نقشنا الساقين و قفلنا الكاميرا ما خليناها تسترسل لفوق… و ما خليناها تمشي لعلايل أب روف و الا لي سال من شعرها الذهب و كدا…

    طبعا كان البوست بقى طويل خالس…

  17. سهيل كتب:

    يعني يا أبوعصمت قصدك تقول برضو إنو أم عصمت عملت ليك إسكاننق و قرت عيونك و عملت بروسسنق للكلام ده و إنت طلعت براءه ؟…خلي بالك (عواطفكم) دي يا إما إنت مشفره أو ضاربها فايرس..

  18. نيام كتب:

    شوف يا مرطب انت راجل واضح و ال confession يؤشر الي ادانتكم بالتلبس الواضح لانك شفت الفسطان و حتات كده ما مفروض تشوفها (و ساقا تملأ الخلخال تراها فيه مختنقة) و بعضهم يزعم ان النضارة كانت مكبرة ..يلا عشان تمرق من حق البنية تقوم يا صاحبي تقول لام عصمت تعمل ليك برود كده بموية حارة تغلي (عشان ام عصمت كمان تكون خلصت حقها ) و تشيل موية البرود مع عمود مدنكل و تمشي تزور البنية.. وبعد البنية تتغدي اكشحها بموية البرود و اعمل فيها بتلم في عمودك .. عسي ان يغفر لكم الله..

  19. سهيل كتب:

    يا عم نيام .. ادوني موية البرود أنا بوديها .. ابو عصمت دا لو شاف البنيه دي تاني مامعروف حيعمل ايه.. يمكن يكشح المويه في رقبتو و نبقى في جلاليب بيضاء و مكويه و عقد في مسجد الشهيد و بعد شويه عزت ذاتو يبقى شهيد

  20. سهيل كتب:

    يا شباب … عاوزين لينا رحله في الأيام الجايه لجمع الشمل و لتقويه الترابط و برضو عشان ناس حاج السلاوي و كده…

  21. ابكرون كتب:

    سهيل : انت يا بتاع الرحلات (رحله فوق السحاب )
    ودع هريرة أن الركب مرتحل ……وهل تطيق وداعا ايها الرجل….
    إنت مالك الحاصل عليك شنو من ما هنااااي …(بقيت تحب الحياة)

  22. سهيل كتب:

    يا حاج السلاوي.. فهمت هناااااي دي و لا نترجم ؟

    يا ابكرون طيات السحاب دي طولنا ما شفناها.. و الأيام دي الجو جميل و بتاع هناياااااات و كده .. أنت بس باركها عشان نتلما و احكي ليك عن هنااااايه

  23. حاج أحمد السلاوى كتب:

    حسه يا سهيل ..الرحلة دى أكان عملتوها حاج السلاوى دة حيحضرها ككيف ؟؟( مقصودة ) ..والله إلا بالإنتركوم والفيديو الما بعرفو داااااك …اسال منو خبير المؤتمرات والمناظرات ابو عصمت .
    أو يكون عندى بساط الريح ..(يا ريت .. عشان نجى ونشوفكم كووووولكم .. بس ) .

    الدينمو أفليقا .. هو لكين جِنس كسير تلج !!!

    ودالفتيحااااااااب .. لا أسكت الله لك حساً .. عندك ملاحق فى الإمتحانات ..ولاّ شنو ؟

  24. سهيل كتب:

    يا جدو … ما مشكله .. نحن نرحل و إنتوا تتطوفوا.. و رسل الشيرنق عشان ما ندخلك في ديون و نحميك الفيزا زي جهاز المغتربين.. و بالمناسبه نحن عندنا هنا برضو جهاز شؤون المدونين المغتربين بالخارج .. ما تكتل ملف وتعمل قام عشان ما نقوم نخنقها و نقفل البلوفه

  25. مُخير كتب:

    العزيز أبوعصمت
    السمار الأحرار
    ألفين سلام والله العين حق، وقصص كثيرة تحكي عن حرارة العين البترمي الحدية من السماء، واحد ظريف لفت نظره أن الغراب يأتي كل يوم في موعد مُحدد ويرك في شباك صالونهم، مرة قاعد مع أصحابو جاء الغراب رك، إتلفت وقال ليهو جيت يا المحامي، تُرب وقع الغراب ناشف، (طبعاً سبب التشبيه الروب الأسود والقميص الأبيض) أبو عيونو الليزر.

    سهيل يا قلب المحب في الخفقان أنا حأخلي أبو الحجاج يلعبك لأنك قائد حركة التمرد، ما قلتوا نوبة ؟؟ والشدة بس عند ناس برة،،، وطيب ؟؟
    ده كلام شنو (ديل ما ياهن فاكهة ورش العمل و الندوات)
    ولا قصدك ورش العمل والندوات الخارجية !! لا تآخد في خاطرك عم بمزح.

    الزوووووول السلس: شايف اليومين دي الموج الأزرق طالع وناس ود الزبير طالعين في الكفر الحاصل شنو للصفوة ؟؟؟

  26. زووووووول كتب:

    مخير سلاااام يا صديقى
    واحد زميلنا حكى لى عن بلدياتو وكان لا يفقه فى الكرة شيئا ويوم ان عاد الهلال من الدوحه سأل انتو ناس البيبسى ديل الليله عندهم شنو .ومن دييك و ابو الهل لا لون له ولا طعم ولا رائحه ((مويه زرقا ساكت )) .

  27. سهيل كتب:

    والله يالزووووووول قدر ما إتحاشيتك ألقاك جاي علي… اليسمعك يقول المريخ عمرو ما مشى الأردن

  28. زووووووول كتب:

    سهيل سلااام
    نحن مشينا الاردن صاح لكن انت انكر انك مشيت مروى .
    بعدين كلاتشى دا حكايتو معاكم شنو كل مره يكسر الجره ؟
    كسره : مالى اراكم مطأطئ الرؤوس يا املاب ام درمان

  29. ودالفتيحاب كتب:

    عمنا السلاوى
    كيفك والربع
    بعد كل هذه الدعوات نجيب ملحق ؟ تبقى دى عين السواد ,أخير بنية ابوعصمت رقدت المستشفى أها نحن نمش وين وعمنا أبكرون ماسك السبحه..
    لكن اطمئن ومدعووون كلكم يوم التخريج ,,,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s