ابكرون – تعال خش وورينا رايك فى الكلام ده – ممنوع دخول اى عواطف

Posted: الجمعة,6 مارس, 2009 by استرايكر in إجتماعية

كثيرون وصفوا المعلومات التالية بالصادمة: واحد من بين كل خمسة رجال في بريطانيا يعاني من العنف الأسري. نتيجة مفاجئة أصدرتها منظمة mankind البريطانية التي تتعامل مع ضحايا العنف.

وتقول الأرقام إن حوالي ثلاثة ملايين ونصف المليون رجل، بين سني السادسة عشر والتاسعة والخمسين، عانوا مما يعتبر بموجب التعريف القانوني عنفاً منزلياً.

يعنى ياابكرون رجال بشوارب ومل ملابسهم!!!

 ويبدو أن النساء المعنفات يشكلن ثلاثة من بين كل عشر نساء في بريطانيا. لاحول ولا قوة الا بالله !!!

أرقام عالية لا شك، لكن مستوى الوعي بهذه المشكلة أكبر في المجتمع من الوعي بمعاناة الرجال من العنف الأسري. فهل لأن الرجال يعانون بصمت.

http://www.bbc.co.uk/mediaselector/check/media/avdb/world_service/arabic/audio/254000/254005?size=au&news=1&nbram=1&nbwm=1&bbram=1&bbwm=1&lang=ar&bgc=6699CC

 

دحين اسا ياابكرون – الرجال ديل يتقال عليهم شنو بالحيل ؟؟؟

daf

Advertisements
تعليقات
  1. aflaiga كتب:

    ستريكر : والله لو العواطفات زى الفى الصوره دى ( دق العواطف احلى من العنب القطايف ولحاظو كالقذايف وانا من كفوفو ما خايف ) !!!
    هوى يا ستريكر انت قلت اى عاوطف ما تخش ولا عملت ليهم حظر عشان ما نقعد بعدين فى ده ما خطة وده زول خاشى بباس ويردى !!!
    شوف يا ستريكر العنف النسوى مصنف عموما بانه عنف لفظى ومادى فى شكله المخفف يعنى عواطفك ممكن تكون عنيفه معاك كالاتى :
    * تهبشك بى كلمه او تعبير يقلب كيانك …
    * تعمل معاك اتفاقية النفط مقابل الغذاء …
    * تلوى يدك بى شفعك …
    * تخفف جودة الخدمات البتقدما ليك ( غشيل مكوه اكل شراب نظافه وووو ) .
    * تتعمد تنشط فيما يفور دمك من اقوال وافعال ..
    * تجعل خيار الوحده !! خيارا جاذبا بكثرة البحث عما يفرق اكثر مما يجمع ..
    وقد تقوم العواطف بعامال مادية ملموسه تفسر على انها عنف لكنها فى الاساس جزء من مقدمات التعايش المجتمعى كمثال :
    * تديك لكزه خفيفه بيدها يعنى دفره فى شكل جره وتقول ليك كدى امشى كده ده شنو الراجل ده ؟؟!!!
    * تتعمد الاحتكاك بك بخشونه ناعمه !!
    وفى الفتره الاخيره مع اذدياد معدل الهموم التى تنتاب الفرد المتمسك بعواطفو من معايش وجرى وطيران يكون ممارسة عواطف لحقوقها بجوده وفعاليه نوعا من العنف الموجه ضدنا ..
    واختم ليك بدعاء اخونا الجا لقى عواطف فى كامل كفاءتها القتاليه !! وجودة خدماتها فلم يسعه الا ان يدعو :
    اللهم لا نسالك رد القضاء ولكن نسالك اللطف فيه …
    وجاييك الصباح كان طلع علينا صباح …. !!

  2. Stricker كتب:

    يا ولدنا ديل بكسرو كسر جد – لااحتكاك ناعم ولا يحزنون !!!

    دى وحسب تقارير ناس المستشفيات – قربت تجيهم عاهات – تقول لى تهبشك بكلمة ناعمة .

    انحنا فوق قلنا مادايرين اى عواطف تخش !!! لحد مانعرف نحل الموضوع ده كيف !!!

    غايتو – الله فى بس !!!

    لو اصبحت بينا سالمين – بنجيكم عشان نسمع نصائح القائد ابكرون !!!

  3. ابكرون كتب:

    استرايكر :
    ده كلام شنو يا حسين…! يطرشنا جنس ده ما شفناه…ده يا اخوي نتيجة جرعات الدلع الاكتر من اللزوم ….تعال ساعدني وغسل لي العده دي….وتعال نفض لي العفش ده ….(حااااضر …حااااضر )….وبعد شويه حمي لي الشفع ديل ….وأحكي لي قصة روميو وجوليت لحدي ما انوم ……ويتطور الموضوع لي لابس قيافه كده والقميص ده بالذات ليه …؟ وماشي وين….؟ وساهرته لحدي 4 العصر ليه ؟
    فالاخ ده لو ما برم شنبو …وزأر يا استرايكر…بعد شويتين بسمع (عنف) كلامي يتطور الي مد اليد…..وكان ما قص اليد دي من الاول….تبقي هي راجل البيت وسعيد يبقي سعيده….والدين الاسلامي اداك في حالة النشوز حق التأديب من ضرب الي هجر في المضاجع……والاخيره دي حاااااره (بتروض)..اي مهرة جامحة..

  4. ودالزبير كتب:

    أبكرون

    ((هجر في المضاجع……والاخيره دي حاااااره (بتروض)..اي مهرة جامحة..))

    المشكله البيصبر الزول شنو ؟؟؟؟

  5. aflaiga كتب:

    ود الزبير ثرو ابكرون ثرو ستريكر :
    اهجروهن او اضربوهن ان خفتم منهن نشوذا ده معنى الايه القرانيه ..
    لكن اسى عليك الله مش انطبق علينا معنى الحديث :
    علموهم الانحناء بعد العرس واضربوهم بعد الشافع الاول وفرقو بينهم فى المضاجع بعد الشافع التانى !!!!! ؟؟؟؟
    ود الزبير : ربما كانت الحكمه الالهيه فى الهجر مدعاة لدعوة الطرفين للعوده جراء عدم الاحتمال ولله شئون ..
    صديقى س ( اها قمنا ) !!! جرب كل الحلول مع عواطفو وكان اخرهاالهجر فى المضاجع فصار كل يومين تلاته يتصل بها ليسال :
    س : اها عامله كيف مع الهجر اسى لو الله هداكى مش كنا نكون سوا مع بعض فى اليوم السمح ده ؟؟؟
    عواطف س : تقول شنو بس ما براك الاخترت كده !!
    س : لكن انا اختيارى ده ما سببو عمايلك !! انتى قايلانى عاجبنى كده ؟؟
    عواطف س : ولا انا عاجبنى عليك الله الله يهديك تعال راجع !!
    س : بجى راجع لكن بشرط انو ده ما يتكرر تانى !!
    عواطف س : لو انت بطلت انا ببطل اتفقنا ؟؟
    س : اتفقنا ..
    كسره : وقومى يا الزعله فوتى …
    رجال البلد دى كلمه توديهم السما واخرى تنزل بيهم الارض وولوفين خلااااس وما بتحملو ( الزعل الطويل !!! ) …
    وجاييكم سجن سجن غرامه غرامه …

  6. طارق أب أحمد كتب:

    C D الحسن وادينى وين

    شباب وشياب ما كان أخير أوكامبو … أقلو حوالينا ما علينا

    بعدين التكتيكات دى ما بتتناقش على الهوا زى دا

    لما أذيع البرنامج دا فى ال بى بى سى قبل أيام كنت سايق و أم أحمد بجوارى و أذكر أن الحكايه الأخيره كانت أنو بعد ما (( أواتيف )) دقت ((سائيد )) قامت فلقتو بفنجان الشاى و فتحت راسو ف الراجل أغمن عليهو ولما صحى لقى عواطفو مجهزه السكاكين وبتقول ليهو (( كده يا وسخان وسخت لى السجاده و الفرش بدمك الأفن دا ))

    أكيد أم أحمد ما قالت لى (( تانى حتورق الخدره وأنت ساكت ولا عندك كلام ))

  7. طارق أب أحمد كتب:

    عواطف لى سعيد : اطرد السواق دا, كان حيعمل بى حادث مرتين
    سعيد : خلاس خلينا نديهو فرصة تالته

    اتصل واحد على زوجته وقال ليها “انا ربحت مليون دولار جهزي شنطتك بسرعة” فقالت الزوجة” طيب أشيل معاى تياب و لا فساتين ؟” فرد عليها”أى شى المهم ما تكوني في البيت لما أرجع

    الزوجة : بكرة عيد جوازنا حنعمل ايه ؟
    – الزوج : أول مانصحى الصبح نقف دققتين حداد

    مرة واحد نزل على شارع بطنو طامه سألوا مالك قال : زوجتي ما حتتكلم معاى أربعين يوم ..
    : وتيب المشكله شنو
    : الليله آخر يوم

    واحد سال ابوه أيه الفرق بين القضاء والقدر – والمصيبة
    أجابه – القضاء والقدر يعني مثلا لما حماتك تكون ماشيه على الكوبري النيل وفجأة تقع في النيل – ده اسمه قضاء وقدر .
    بس المصيبة إنها تطلع تاني .

    واحدة بتقول لصديقتها تصدقي قبل فترة كنت عايزه أطبخ باميه وزوجي مشى السوق على شان يجيب البامية و اهو فى السكه عمل حادث ومات .
    قالت ليها يا مسكينه و عملتى شنو
    : أبدا و لا حاجه سويتا لحمه محمره ساى

  8. حاج أحمد السلاوى كتب:

    السادة المدونون الأكارم ( ناس سعيد .. طبعن .. حسب طلب الكاتب … ولدنا سترايكر )
    موضوع العنف الأسرى دة أو العنف النسائى دة كنا قايلنو موجود فى الشقيقة مصر فقط .. لكين وكتين عواطف الخواجات بقن برضهن عنيفات يبقى الموضوع طلع إلى آفاق أرحب وأوسع … طبعن أخواتنا المصريات من شدة عنفهن طوالى يشيلو سعيد ويختوه فى أكياس … ما فيش لعب ولا هزار ..ودة أقسى انواع العنف والجريمة كمان..
    نرجع للعنف القاصدوا أخونا سترايكر .. أعتقد إنو عواطف اللى تمد إيدها على ( أبو الوليدات ) سعيد وتضربه …دة يدل على ضعف أخونا سعيد زاااااته..وإنه راجل خِرع ويستاهل ينضرب ويبدو إنو ما قايم بواجباته ( كوووولها ) خير قيام ..( وما تمشوا بعيد )وسعيد عندما يفقد إحترام عواطف ليهو يبقى باطن الأرض افضل ليهو من ظهرها ( اقصد ظهر الأرض طبعن ) …
    وعشان الحكاية ما تبقى عنتريات ساااااكت …نقوم نحنا ونرد المسالة لعقيدتنا الإسلامية ونلاقى فيها كل ماهو مفيد فيما يختص بهذه العلاقة الأسرية بين عواطف وسعيد..
    وأحد الخبثاء قال فيما مضى مقولة ( الراجل اللى ما يخاف من مرته .. هو زااااته ما راجل ) …

  9. د.ياسين شمباتى كتب:

    ابوى السلاوى..صباح الخير..انت ود الفتيحاب ممسكك وردية ولا شنو!!؟؟؟

  10. سهيل كتب:

    كسره : عواطف بتاع مين اللي يكسر سعيد .. ماسمعت المصريين في ليلة الدخله بيغنوا للعريس يقولوا ليهو ( إدبح لها الأوطه (الكديسه) في ليلة دوخلتها)…

    و مع ذلك هاكم الخطبه دي منقوله :

    قام في إحدى المساجد في خطبة الجمعة حدث غير طبيعي حيث شكي احد الرجال زوجته للخطيب أمام الملأ ، فرد عليه الشيخ بأن المرأة تتحمل وتصبر أكثر من الرجل مئات المرات فحتى وان كان للرجل الكثير من المصائب فأن صبر الزوجة أعظم واكبر .

    قائلا اعمل بالآتي ولا تستخف به ولا تقل بأني فعلت هذا سابقا لأنك لو فعلت ما سأقول فأنك لن تشتكي من زوجتك : فصمت الرجل في المسجد فهب فيه الشيخ انتبهوا لما سأقول لأن هذا ما تعلمته من زوجتي ولم يكلفني الكثير .

    هذه طرق الرجل التي يجب أن يعامل بها المرأة كي يبقى الحب موجود لآخر العمر

    عندما تمشى مبتعدة عنك (الحق بها)

    عندما تنظر إلى شفاهك ( قبلها )

    عندما تدفعك أو تضربك ( امسك بها ولا تتركها )

    عندما تطيل لسانها عليك ( قبلها وقل لها انك تحبها )

    عندما تكون صامته ( اسألها ما المشكلة )

    عندما تتجاهلك ( أعطها اهتمامك الكامل )

    عندما تريد الابتعاد عنك قليلاً ( لا توافقها الرأي )

    عندما تراها في أسوأ حالاتها ( قل لها أنها جميلة )

    عندما تراها تبكي ( أحضنها ولا تقل شيئاً )

    عندما تراها تمشي ( تربص لها قليلا ثم أحضنها فجأة من الخلف )

    عندما تكون خائفة ( أحميها )

    عندما تضع رأسها على كتفك ( أمل رأسها قليلا وقبلها )

    عندما تأخذ منك شيئاً عزيزا ( دعها تأخذه فلن يكون أعز منها )

    عندما تمازحك ( مازحها وأضحكها )

    عندما لا تجيب الهاتف لفترات طويلة ( أكد لها أن كل شي على ما يرام )

    عندما تشك بك ( انسحب قليلا لتعطيها وقتا للتفكير )

    عندما تقول أنك تعجبها ( فهي حقا تكن لك مشاعر اكبر مما قالت )

    عندما تمسك يديك ( أمسك يديها وداعب أصابعها )

    عندما تقول لك سرا ( أحتفظ به ولا تخبر به أحداً )

    عندما تنظر إلى عينيك ( لا تلتفت حتى تلتفت هي )

    عندما تفتقدك ( فهي تتألم من الداخل )

    عندما تحطم قلبها ( الألم لن يزول بل سيستمر )

    عندما تقول أن العلاقة انتهت ( فهي لازالت تريدك )

    عندما ترسل لك هذه الرسالة ( فهي تريدك أن تقرأها )

    أبق على خط التليفون معها ( حتى لو لم تقل شيئا )

    عندما تغضب ( احضنها بقوة ولا تتركها )

    عندما تقول أن كل شي على ما يرام ( لا تصدقها بل تحدث معها عن المشكلة )

    لأنها بعد عشر سنوات ستظل تتذكرك

    أتصل بها في أول ساعة من يوم ميلادها وقل لها أنك تحبها

    عاملها كأنها كل شي مهم لك في الحياة

    مازحها ودعها تمازحك

    ابق معها طوال الليل عندما تكون مريضة

    شاهد معها فيلمها المفضل أو برنامجها المفضل حتى لو كنت تعتقد انه غبي

    أعطها العالم

    عندما تحس بالملل أو متضايقة اخرج معها واجعلها تتسلى

    دعها تحس أنها مهمة لديك

    عندما تجري لك باكية ، أول سؤال تقوله لها ، مين اللي زعلك حبيبتي

    كل هذا لن يكلفكم شيئاً يا شباب

    هذا هو الحب الحقيقي ، ولا تنسون يا شباب أن أغلاط النساء اقل من أغلاطنا فنحن دوما نحتاج السماح منهن والتعقل والله يهدي الجميع .

    أبكرون يا ممكون ..

    ود الزبير .. دا أنت طلعت كهربجي يا جدع

  11. aflaiga كتب:

    سهيل : يا ود يا بتاع التسويق والدعايه انتا برضو لن ترضى عنك العواطفات .. القصه قربت ولا ده اعلان حسن نوايا بتاع الدوحه !!!؟؟؟
    الكلام ده الامام قالو فى الجامع ؟؟ احضنا وقبل يديها !!! ده مسجد منتزه المقرن ولا زاوية حدائق السلام ؟؟؟ كدى راجع الكلام ده تانى وده خلوهو كيف ناس النظام العام ؟؟
    تعرف يا سهيل الناس الزى ديل هم العلماء المحتاج ليهم الوطن ..
    والله قبل ايام كنت فى الخرد السوق الشعبى وصليت الضهر فى الجامع بتاعم عندهم امام معلم ميكانيكى وبيبيع خرد تجى تسالو عن اى شيئ بيوريك ..

  12. ودالزبير كتب:

    سهيل

    كلمتين بس

    عن أذنك يا شمباتي

    اليدو في المويه مش زي اليدو في النار

    أقول ليك حاجه

    قوم لف كده ولا كده

  13. طارق أب أحمد كتب:

    شير شير يا سهيل

  14. سهيل كتب:

    شنو يا أب أحمد .. كفايه كده ما توديناش في داهيه .. خشمك ما بتتبله فيهو فوله..

    ‘ليك الله يا أغليقا لو ماشي الخرد تاني ما تفوتني و ياريت نسوق معانا سيدي بيه..

    ود الزبير .. ممكن تاكل شندوتش طعميه و تغمض عيونك و تتخيلو شيش كباب و عااااااااااااااادي ..

  15. ابكرون كتب:

    سهيل : دي خطبة جمعه ولا برنامج البيت السعيد…ده امام مسجد ولا مهند..؟
    ثم ثانيا : انت يا اعزب (شن نفرك)مالك مال كلام الناس الهنايين ….ومنو القال ليك اساسا في حاجه اسمها حضنه وقبله وشنو ما عارف ….اولاد آخر زمن…..ما عندهم …ضبط وربط…..

  16. سهيل كتب:

    لكن يا ود الخلا يا أخوي لقيتك حريف سواقه.. يازول اخير ليك امشي في الزلط مالك و مال الدقداق

  17. سهيل كتب:

    يا عمك ( أبكرون) .. كتلت حيلي عديييييييييييييل .. يا أخوي ما يغرك المنظر الخارجي.. علي ( بالطلاق) دا انا (غلبان)و…. و….. و……و…… لمن بهناك و خليها مستوره .. (بتعرف مستوره) …

  18. سهيل كتب:

    يا حبيبي ودالخلا …
    سريه ييييييييه ” البص السريع جاري في الردميه…ميه… جنوب دارفور تابعه للغربيه ..ميه ………و لا

    جرجر التوب و فارق الزمن يلا يا أخوننا نادو لي هنان.. قف قف قف

    فاصل كامل على اليمين حزيه

  19. ابكرون كتب:

    سهيل : مالي ما بعرف مستوره ست (خل الموز) وبت خالتها خديجه (ليستون)..تعال النسالك انت جدك ده اصولي…؟

  20. سهيل كتب:

    ابكرون جدو دا باين عليهو كان معلب و ما بعرف المرقو من علبتو دا منو .. ..

    غايتو عمل فيهو خير و خلانا نحن نتلفت

  21. مُخير كتب:

    الحلوين وارقيين والناس نجضانة

    السلام عليكم

    إسترايكر: ده شنو يا باشمهندس، حسيت الناس كهربتها طالعة قلت توزن المُنظم، عموماً إنت مخلص وعند الله جزاك، بس كان تضيف على منع العواطفات، العزابة، لأنو شايف الشفوت طلعوا في الكفر وإستلموا المايك وبكل سهولة وسلاسة باعوا لينا التُرماي، وصدق ود الزبير الإيدو في الموية ما زي الإيدو في الزيت الحار.

    أبكرون: هيع …أسد الخلا الورور … أسد علينا وفي البيت نعامة … ربداء تجفل من صفير الصافر….هلا برزت إلى عواطف في الزغى … بل كان قلبك في جناحي طائر…

    أب أحمد: النكات دي كافية لإدانتك، وإستدعائك للمثول أما نسابتك … أوع تدردق وتتجرجر لمواقف هزيلة، وتضحك الدنيا وترجع بالليل تبكي وحدك.

    أبو الأفلاق: كان الوحدة جاذبة أم غير جاذبة سيك سيك معلق فيك وإذا حصلت القسمة فمن تكون سوى سعيد وللغاية وتآخذ نصيبك كاملاً من السلطة والثروة و الضرب والجمع والطرح…

    حاج السلاوي وود الخلا: العيال ديل كانو قايلنكم “من الأمس” طلعتوا ” أسماء في حياتنا” وكان ما وقفتوا رجع الذركى المنسية حتمشوا “متحف التاريخ الطبيعي”.
    ،

  22. حاج أحمد السلاوى كتب:

    ود الخلا .. يا راجل يا عجوز .. مادام إنت عرفتها وسمعتها .. كيفن ما بنعرفه وما بنتذكرها .زمالك علينا داير تقلب علينا المواجع بعد ما نسيناها … ما تخليها مستورة ..
    د. شمباتى .. إنت المصحيك لحد الساعة سته صباحا شنو ..؟ نحنا نمنا وصحينا لصلاة الصبح …

  23. Stricker كتب:

    والله لكن طلعتو حكاية – ممكونين شديد وماجايبين ليكم خبر

    مخير – الشفوت العزابة – انحنا بشكلنا ده والله احسن منهم .

    شمباتى – مكرر تانى – انتا المصحيك شنو لحد اسا ؟؟؟

    ابكرون – يا زعيم – قلت لى تربية اولاد اخر زمن ؟؟؟ – والله ضحكتنى لما وقعت من الكرسى !!

    سهيل يا بتاع الشيرى انتا يا – وده ياتو موديل – اوع يكون الصينى ؟؟؟؟

    طارق اب احمد جاب خبرك لكن !!!! طلعت ماساهل ياعمك .

    ود الخلا ده صلاه شنو الفى المواعيد دى ؟؟؟؟؟

    افلايقا – بركة الصحيت طيب !!!

    كسرة اخيرة

    انتو وين سنكل وبشار والبشاوى فى الموضوع ده ؟؟؟؟

  24. سهيل كتب:

    إسترايكر .. شنو عامل رايح ..إنت ما ياكا الحنين.. باين عليهو أب احمد هد فيك..
    آآآآآآآآآآآآآي ياباني أصلي و خليك تفتيحه .. قال صيني قال

  25. ودالفتيحاب كتب:

    الشيب والشباب
    دوبنا جينا وكيه للمابينا,
    العواطفات ان مسكتو دربن طويل والدين المعامله وكما تدين تدان..
    على قدر أهل العزم تؤتى العزايم….

  26. طارق أب أحمد كتب:

    سهيل

    رجعت متأخر

    ((آآآآآآآآآآآآآي ياباني أصلي و خليك تفتيحه .. قال صيني))
    أييًه يابانى متل اليلتنا علا تركيب شايقشنقهاى
    و تانى
    ((‘ليك الله يا أغليقا ))
    هسى دى – عليك الله يا أفليقا – غايتو جنس كبكابيه
    و تالت
    ثم ثانيا لو أمامك دا بسوى الحاجات دى كولها زى ما قال متين و كيف بصلى خلى يصلى إمام

  27. نيام كتب:

    عملتها واضحة ياولدنا يا هندسة عايز تقزقز لحدي ما طيارتك تجي من الباركنج للرن واي ..موضوع عواطف دا رغمن اننو عملت بلوكنق علي دخول العواطفات علا خطورتو اخير منها موضوع اوهاج اوشيك او كيف تمام..مساء الخير كووووولكم..
    طبعا السلاح القوي للعواطف هو “النقنقون” فهي تعرف متي تبدأ النق نق نقون و متي تنتهي ليبدأ نقنقون جديد..عندما تريد فستان مثل فستان ناس سعاد او حذاء ماتشينق مع شنطة اليد فهي تبدأ ب :
    نق=البت الشغالة وقفت ليها اسبوع ..
    لو كانت قاعدة كانت صرفت مرتبها يوم الخميس ..كده انا وفرت مرتب اسبوع ..يعني لو الاسبوع دا كمان ماجات مبالغغغغغة..والله تعبانة تعب..
    في الاسبوع الثاني نق = اسبوعين ماجات الشغالة..
    اذن نق +نق=نقون..
    شفت لي شنطة يد عن ناس سعاد لونها زي توبي التركوازي لكن فيها نقشة بيجية الله..الحالة كمان سعاد دي عندها شغالة اصلها ما بتغيب ..غايتو في ناس محظوظين حظحظة..
    فيقوم سعيد في سبيل درء النقنقون يتنحنح نحنحتا فتلد النحنحت شنطة تركوازية بنقشة..ويرتاح ذلك المساء حتي ظهورملايات ناس عفاف..

  28. بشار أحمد بشار (إبن برد) كتب:

    هسع يا جماعة إنتو عارفين؟؟؟ إمكن الراجل يطلع عود دوم ويرد ليها (الكف) ده بعلقة (فلاتة) لامن هي ذااااااتا تآمن بأن الله واحد……بعدين مافي زول يسألني عن علقة الفلاتة دي كيف؟؟؟

  29. خالد مدني كتب:

    دي باصات عمك بشار البتكسر الكرعين ظاااااااتا
    واحد بريء جدا : يا عمنا علقة الفلاتة دي كيف ؟؟؟

  30. بشار أحمد بشار (إبن برد) كتب:

    Striker : إنت عمك أبكرون ما خبرك قال ليك عمك سنكل مكبر مخو أوي؟؟؟ وبمناسة تكبير الأمخاخ دي وين ولدنا طارق بن مدني وسائلين عليه الحضري والمدني.

  31. بشار أحمد بشار (إبن برد) كتب:

    إنت يا خالد مدني دحين طارق مدني ده مش أخوك؟؟؟؟ وإنت ماك عارف الفلاتة بتعاملو مع نشوز زوجاتهم كيف؟؟؟

  32. البشاوى كتب:

    استرايكر
    ياولد دة كلام دة تنشرو ونحنا عاملين عليهو تعتيم اعلامى حتى لاتقوم عواطف
    بتقليد الخواجية واخوك طبعن ليست لديه اى دفاعات لاجوية لاارضية
    افليقا
    ياخى خليها تشيل اى حاجة من اى حتة بس ماتلاوى وتضارب
    ابكرون
    فى ناس تمارس الهجر فى المضاجع ليس لتمسكهم بالدين 00 بل لتمسكهم
    بالمروة التى تعينهم على اكل العيش ومدافرة المواصلات
    الابن سهيل
    ياكافى البلا ويازايل المحن من هسة بتكسر تلج ؟ يعنى بعد العقد تخلى الكولا
    فى جيبك براها بتبرد وتوزع للمعازيم من الجيب للفم — انت محتاج لدورة تدريبية
    من السلاوى \ابكرون\ بشار \ ود الزبير\ ويصحح الورق افليقا

  33. البشاوى كتب:

    سنكل
    والله موضوع استرايكر دة كان ماظهرك تبقى دى عوجة كبيرة تب الموضوع دة
    بالتحديد يحتاج اليك لتوضح للكواشف وللجدد البكاسى كيفية تفادى العنف
    المنزلى ومعروف عنكم حكمتكم فى هذه الامور

  34. خالد مدني كتب:

    عمنا بشار …
    مالو اعياهو النضال بدني
    وروحي ليه مشتهيه ود مدني
    امشي ازورو ابويا ود مدني
    واشكي ليهو الحضري والمدني
    طولنا والله منكم ومن باصاتكم البتكسر ديك … قلت لي الفلاتة بعملو شنو … غايتو انا عارفهم بجهجهو المطره كيف لكن ورينا النسوان ديل بجهجهوهم كيف … ولا تضرب المرأة ولو بزهرة … المره بدقوها بي اختها .

  35. سهيل كتب:

    يا خالد مدني .. تاني كان سألت بشار عن (دق الفلاته) أنا بكلم إسترايكر يحجبك من الدخول.. عشان تسمع الكلام .. مش يا ولد عمك بشار قال ما تسألوا .. إتصرف ياخي مع عواطفك حسب الموقف و ما في داعي لنقل الخبرات الأجنبيه إلي داخل بيتك الصغير .. خليك تفتيحه .. بعد شويه حتسأل بشار و سنكل عن ………… دي زاتا بيعملوها كيف .. و كفايه كده بلاش فضايح

  36. طارق أب أحمد كتب:

    الأحباب السمار

    صباح الخير

    شوية كلام خفيف عشان الدنيا صباح و كدا

    يبلغ الحب القمة: متى تنازلت المرأة عن عنادها .. والرجل عن كبريائه.
    – عندما تكره المرأة رجلا الى درجة الموت,, فاعلموا انها كانت تحبه الى درجة الموت..
    – ما دمت ايها الرجل , لا تستطيع ان تخفي عنها شيئا فانت تحبها,,
    – وراء كل امرأة ناجحة حب فاشل..
    – الحب الذي هو فصل واحد وحسب في حياة الرجل,, هو تاريخ المرأة بكامله..
    – عندما يتهم الرجل المرأة بانها بلا قلب , فمن المؤكد انها خطفت قلبه..
    – حب الرجال كالكتابة على الماء , واخلاصهم كالكتابة على الرمال..
    – قلب المرأة العاشقة محراب من ذهب غالبا ما يحتضن تمثالا من طين.
    – اعطاء المرأة صورتها لمن تحب , وعد بانها ستعطي الاصل..
    – للمرأة ثلاث مراحل مع الحب . في الاولى تحب ,, وفي الثانية تعانيه , وفي الثالثة تأسف عليه..
    – من الرجال كثيرون يقتلون انفسهم لاجل الحب , ومن النساء اكثر من يمتن من الحب..
    – الحب عند المرأة قصة عاطفية هي بطلتها , وعند الرجل قصة هو مؤلفها..
    – هناك لحظات في حياة كل امرأة تحس فيها بالحاجة الى رجل كي تحبه بكل جوارحها..
    – الحب: امرأة ورجل , وحرمان..
    -مهما تكن المرأة ثرثارة فان الحب يعلمها السكوت..
    – الرجل في حبه يحب دائما ان يعرف كل ما تفعله المرأة..
    – اذا احبت المرأة الرجل , لم تذل رجولته ابدا ..
    – في الحب: الرجل مهاجم , والمرأة مدافعة..
    – عندما يحب الرجل امرأة فانه يفعل اي شيء من اجلها , الا شيئا واحدا هو ان يستمر في حبها ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s