د. يس شمباتي …. سلام

Posted: السبت,7 مارس, 2009 by ودالزبير in اخرى

يقول الحبيب المصطفى عليه أفضل السلام ( لا يحل لمسلم أن يهجر أخاه فوق ثلاث ليال يلتقيان فيعرض هذا ويعرض ذاك وخيرهما الذي يبدأ بالسلام )

السلام عليك ورحمه الله وبركاته

أخي الكريم ربما أصابك رشاش حديث غاضب صدر مني في لحظات أنفعال ماكان لهذا الحديث أن يوجه لك لكنه القدر والكلمه كالرصاصه عندما تخرج لا يمكن إيقافها.
من هنا من الموقع الذي أجتمعنا حوله أتقدم لك بأعتذار على رؤؤس الأشهاد عن أي ألفاظ رأيت أنت أنها قد قللت من أحترامك .

آملاً أن تكون هذه سحابه صيف ستمر بإذن الله بسلام ..

يأخي الكريم الذي جعلنا نتعامل ونصادق زوووووول رغم مافيه من عيب مريخي ظاهر لن يمنعنا من التعامل معك رغم موقفك المعلن الذي في كل الأحوال يجب أحترامه لأنه على الأقل كان موقف وأضح عكس الكثيرين الذين آثروا مسك العصايا من النص .

مره أخرى لك العتبى حتى ترضى .

Advertisements
تعليقات
  1. aflaiga كتب:

    ود الزبير : شمباتى شنو البتعمل ليهو بوست كامل للتصافى ؟؟!!! الود شمباتى ده ما حصل يوم نام وفى زول زعلان منو ولا هو زعلان من زول .. اطالب بسحب البوست فورا والبينكم اكبر من بوست .. وكده الما سمع بى المشكله من بوست الشكل حيسمع بيها من بوست التصافى !!!
    ود يا شمباتى صافيه لبن
    ود يا ود الزبير حليب يا قشطه ..
    تمام ابونا جبرا عمنا سنكل القوه مكتمله مبسوطه متصافيه …
    شيلو البوست ده ..

  2. ودالزبير كتب:

    أفليقا

    مادايرين نرجع خطوتين لورا لكن آخر ماكتب شمباتي كان وأضح إن في نفسه شئ من حتى وأوضح صريح رغبته بعدم التداخل في بوست ثم ماذا بتاع عزت أها عشان كمان مايقوم يخلي لينا البيت كله كله ويطفش قلنا نجي نصافيه بعدين يأ أفليقا زي مابيقول أخوانا المصريين ( هي مصاريين البطن بتتعارك )

    آخر حاجه نحن مختلفين في رأي يعني لا في مزه ولا شيكات .

  3. سهيل كتب:

    ياسلام يا اولاد.. عفارم عليكم ..

    يا أفليقا البوست دا لازم يفضل موجود عشان كل الناس تعرف حلاوة أولادنا و أعمامنا و حرائرنا و بياض نيتنا و عشان اولادنا الجايين يعرفوا إنو ديل نحن…

    و بقترح الرحله تكون بمناسبه لم الشمل و إتفاقيه سوداننا لحن النوايا بين يس و مصطفى

  4. سهيل كتب:

    تصحيح (لحسن النوايا)

  5. ودالزبير كتب:

    سهيل ما تصلح

    هي فعلاً إتفاقيه لحس النوايا من قبل مايسمى بحركه العدل والمساواه

  6. سهيل كتب:

    أها إنت العدل و لا المساواااااااااااه

  7. ابوالمنذر كتب:

    حبيبنا دكتور شمباتى……….
    ياود يا اشطه انت بالله انت تعرف تزعل والله الواد ودالزبير ده عليهو جنس حساسيه ورقه ياخى افليقا ابان وانصف … عشان كده ماحا نعتزر ليك وليس بين الخيرين حساب…….
    كسيره :
    برضو نرفض ادعاءات اوكامبو

  8. سهيل كتب:

    السلاوي – بكري موسى – وكل الإخوه في فرعنا بالسعوديه

    الرجاء تنفيذ مذكرة توقيف و ضبط و إحضار للمدعو د.يس شمباتي لصفحات المدونه عشان نفض المولد دا.. .. وسوف تسقط العضويه عنكم في حال فشلكم في إحضاره في خلال ساعه من الآن..
    وشكرآ لتعاونكم المطلق

  9. حاج أحمد السلاوى كتب:

    سهيل .. إنت اصلك أوكامبو .. ؟؟ أوكامبو زاااااتو ما عمل كدة ..

  10. مُخير كتب:

    الأستاذ الرمز جبرا
    الألفة ود الزبير
    الرائع دوماً أفليقا
    سهيل قلب المحب وأبو المنذر
    كل الطيبات والطيبين عيال الدانقا
    السلام عليكم
    سواء سحب البوست أم لم يسحب أثمن عالياً هذا السلوك الحضاري الشجاع، وصدق القائل
    لا يحمل الحقد من تعلو به الرتب ولا ينال العُلا من طبعه الغضب
    لقد تحدثت إلى ياسين بالأمس، وهو هو بل أضفى عليه القرب من الحرم المزيد من الورع والروحانيات وهو مشغول وربما يدخل ويرد قبل أن تنشر مداخلتي، يستحيل أن نتفق في كل شيء كبُر أم صغُر، لكن ما يجب أن لا نختلف حوله الحرص على إبقاء هذه الروابط الوثيقة، وكاتب البوست ودالزبير رجل إنفعالي والفي قلبو على لسانو لكن أبيض عرافينو قلبو كلو حسن نية، وعشان نطبظها زي الرئيس المطلوب القبض عليه، والفارق أنه يفكر في الآخرين، ولا يتورع أن يعتذر إن ظن أنه أخطأ في حق عزيز، فلك مني يا أزرق الوجدان وأبيض النية كل الوح والإحترام والتقدير.

  11. زووووووول كتب:

    د الزبير شمباتى وكل اخوتى اعضاء سوداننا :
    اولا اثمن مبادرة الاخ ود الزبير لكتابة مسودة اتفاقية (الدوحه) وهكذا يجب ان نكون .
    ثانيا دعونى اهمس فى اذن شمباتى وود الزبير:
    بان اختلاف الراى لا يفسد للود قضيه والبيناتكم اكبر من كدا .نتمنى ان نراكم فى الصفوف الاماميه للمجاهدين ان حدث مكروها لهذا البلد واهله نسأل الله تعالى ان يحفظنا وبلادنا
    وبان:
    لا يحمل الحقد من تعلو به الرتب كما تفضل صديقنا مخير
    وبان :
    ولا احمل الحقد القديم عليهم وليس كبير القوم من يحمل الحقدا
    كسره : لا بد من التأكيد على ان اعضاء مدونتنا طبقه مستنيره لا فاقدا تربويا . ولكن (اخ من لكن ) تلاحظ اننا نضيق ذرعا بالراى الاخر (واسألوا الراى الاخر شخصيا ) . ثم ارجعوا الى الارشيف .
    نرجو من الجميع التحلى بالروح الرياضيه و لنرجع الى مناكفاتنا الرياضيه لتكون لنا نبراسا يضئ لنا دروب الخلاف السياسى والاجتماعى وغيره .
    كسره :
    يأخي الكريم الذي جعلنا نتعامل ونصادق زوووووول رغم مافيه من عيب مريخي ظاهر .
    اريتو عيبك يا ود الزبير وبالمناسبه كيف مع دهب السد .
    كسره تانيه : دا كلو من لاسانا وكلتشى يا شمباتى وود الزبير .
    كسره اخيره : صافيه لبن وعلى الطلاق ما تقولوا حاجه غير كدا

  12. مشاكل كتب:

    سلامز

    غايتو يا ود الزبير بتعمل في جنس عمايل

    ياخ شمباتي دا و الله ما عايز بوست ولا حاجة

    كان ترسل ليه تورتة و انتهى الموضوع

    و من هنا اعلن دعمي الكامل للمناضل شمباتي

    عسى و لعل ان يصلنا سوط التورتة

    مااااااااااااشة معاك يا شمباتي

  13. ياسين شمباتى كتب:

    السلاااااااااااااااااااااااااام عليكم..جاكم الما بيختاكم..وهبشكم الما ضراكم..

    دا شنو دا يا جماعة الخير!!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟؟؟؟؟
    اولا شكرى الجزيل لكل من وجه لى الدعم المعنوى _وحتى المادى_ ابان تلك الحقبة من التأريخ,,ثم عميق شكرى واحترامى للاخ ود الزبير على هذه الكليمات التى حتما غسلت بعض مما علق بالنفس من درن الغضب..
    بعدين انا ما عارف الخلاكم تفتكروا انو ممكن اسيب ليكم الدار دى تبرطعوا فيها كدة!!؟؟ اما امركم عجيب والله!!! الدار دى هولى انا_يعنى بتاعتى_ويستحيل عن حبها اميل..
    يا ود الزبير,,انحنا ما نقلنا ميدان المعركة كالمتعارف عليه,,واشهد الله انى ما قصدت الخصام او القطيعة بذلك الايميل الجانبى,,بل قصدت به الا يتحول الموضوع الى معركة شخصية ويصيب الاّخرين الاذى مما قد يذكر او يشار اليه بصفة شخصية..وما انسحابى من البوست الا دحرا للشيطان والنفس الامارة بالسوء_وعشان ما نبقى فى جنس زى دا_
    بعدين انتو عارفين انو انا ما بخش الشبكة الا اّخر الاسبوع,,لزومو شنو الهيلمانة دى؟؟وفى اليومين تبع (المعركة) كنت على اتصال بالعديد منكم,,هل نقل لكم احد رغبتى فى الانسحاب من المدونة؟؟

    يبقى الاختلاف فى الرأى والتوجهات ولكن نفس المؤمن اعز من ذاك..

    شكرا لكل من تداخل فى هذا البوست مسامحا ومصالحا_ولو بالقوة وحليفة الطلاق_
    وياها المحرية فيكم………………

  14. ياسين شمباتى كتب:

    نسيت اقول ليكم : سوف نبقى مثل نجم السعد نحيا بالدواخل ريثما تصفو السماء..

  15. ودالزبير كتب:

    شمباتي

    ده شنو

    مثل نجم السعد نحيا

    كرهتك زاتو إنت بقيت مريخابي ولا شنو

    ماكنت زمان زووووول كويس

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s