هيلا هيلا هيلا 4 ..

Posted: الأحد,15 مارس, 2009 by aflaiga in اخرى

فكرة  هذا البوست هو دعوه صادقه  لكل سودانى اصيل داخل وخارج السودان للمساهمه فى دعم دار المايقوما والنزلاء به من الاطفالt1379351269_66441 مجهولى الابوين .. ملخص المبادره هى قيامنا بتجميع مساهمات عينيه ( ملابس – العاب – حلويات – ادويه اطفال ) وزيارة الدار فى شكل وفد من القمردينه وسوداننا باسم الجمعيه الخيريه ( سوداننا ) والوقوف الى جانب هؤلاء الاطفال الذين هم فى امس الحوجه الى اى دعم منا .. اقترح ان يقوم الاخ البشاوى او من ترونه مناسبا بتجميع المساهمات والدعم خلال الاسبوع الحالى مما يجود به الاعضاء فى الداخل او مساهمات الاعضاء فى الخارج وان نقوم بتكليف الدكتور عزت الريس بتحديد موعد مع ادارة الدار لقيام الزياره ..

كت قدتقدمت بقترح مشروع لتقسيبم العمل الخيرى بالمنظمه يحتوى على ثلاث محاور :

محور العمل الطبى – وجار العمل فيه الان .

محور دعم الشائح الخاصه ( طلاب – ايتام – اسر فقيره ) .

محور التوعيه الاجتماعيه ( ندوات محاضرات – سمنارات – ورش عمل – كورسات ) .

اتمنى ان تسير جميع المحاور جنبا الى جنب ولنبدا بهذا المحور كمقدمه للعمل على امل ان يليه زيارات اخرى الى دور العجزه والمسنين وعنابر الاطفال بالمستشفيات وعناير مرضى الامراض المزمنه ..

وتانى نقول هيلا هيلا يلا …

Advertisements
تعليقات
  1. salih كتب:

    الاكارم
    سلام

    الله يتقبل منك يا افليقا ومن الاخرين(الريس عزت, ود المدني, البيشاوي, ود الزبير, ود الخلا, استرايكر, سهيل ,طارق اب احمد, عبدوش ومن الجنود الاخرين المعاونين في عمل الخير..)

    وان شاء الله يتسع مجال عمل سوداننا الخيرية ونسأل المعين الجواد الكريم ان ييسر امر الخير لسوداننا …
    ويا جماعة الخير.. أححممممم (بس عندي شوية برد!).

  2. aflaiga كتب:

    الاكرم صالح : سلامتك من البرد … ويبدو ان الجو عام ما كويس …
    كنت قد فكرت مليا قبل طرح المبادره الاخيره وملخص فكرتى هى :
    تكوين مدلس ادارة برئاسة جبرا الفخريه ورئاسة عزت التنفيذيه لادارة المنظمه ككل ومن ثم يتم تقسيم العمل فيها فى كل محور على حدا على النحو التالى :
    ود الخلا / مديرا للجمعية الطبيه الخيريه .
    البشاوى / مديرا لجمعية دعم الشرائح الخاصه .
    ود الزبير / رئيسا لجمعية التنوير والتوعيه .
    على ان يباشر كل رئيس مهامه مباشرة بالتخطيط للاهداف والبحث عن الوسائل المعينه على التنفيذ .
    وكل رئيس ان يختار عضوية مجموعته ويمكن ان يكون العضو عضوا فى عدة مجموعات فى ان واحد .
    على الا يخرج العمل من شكله الخيرى البحت .
    ولان مبادرة الدعم الاجتماعى للشرائح الخاصه من الاعمال السهله التى لا تحتاج لرهق كبير سوى فى التنسيق رايت ان نبدا بها العمل والتوفيق من الله باذنه تعالى .
    وكمثال المبادره الاخيره لا تحتاج سوى التنسيق بالاتصال على العضوية وفتح باب التطوع للدعم واستغلال مقر الجمعيه المؤقت الحالى للتجميع وحال جاهزية الدعم بشكل وحجم مقدرين نقوم بالزياره الاولى التى ستفتح باب الخير باذن الله .
    وتانى سلامتك يا دكتور …

  3. aflaiga كتب:

    اما الاستعجال فنحنا والله مانا مستعجلين مادام فى النهاية القصد خير وهو شعبنا المقصود بالخير ذاتو استنى سنين عددا يعنى ما بيصبر لينا لمن نندم ونشيل نفسنا ونجيهو بالخير الكبير ..
    اضافه بسيطه :
    * مجلس الاداره هو المعنى بمتابعه ورقابة الانشطه فى الجمعيات وهو المعنى بالتخطيط العام لسياسة المجموعه ..
    * اقترح ان تكون اللجنه الاولى بتاعة دعم الشرائح الخاصه برئاسة البشاوى وعضوية كل من :
    * نونو – سماسم – سمسمه – الغبشه – عبدوش – خالد مدنى – سهيل ..
    وان يقومو بمباشرة جمع الدعم الذى هو :
    العاب اطفال – ملابس – مستلزمات اطفال لبن – سيريلاك – حفاضات – بطاطبن – وخلافه .
    وان يقوم مدونى الخارج بارسال مساهمتهم العينيه من الخارج او الداخل يعنى ابو وضاح مثلا يشد سلك لى وضاح يشيل المؤونه ويسلما لعبدوش فى المقر وهكذا ….
    الخير يا جماعه اسهل شيئ فى الدنيا لانو يد الله فى يد البيسكو وهو برضو اصعب شيئ لو انقطع او تعثر …
    واهلنا زمان قالو :
    البيعمل ازيار سبيل ارجل زول لكن البيملاها ارجل منو واسوا شيئ تجى السبيل تلقاهو فاضى او تلقى الكوز !! مافى !!!
    وجاييكم تانى ……….

  4. حاج أحمد السلاوى كتب:

    الدينمو أفليقا … رجل الخير دائماً وابداً ..
    أنا ما أظن كنت خاطىء لما أطلقت عليك لقب الدينمو .زأسأل الله العلى القدير أن يجعل هذه الأعمال الخيّرة فى ميزان حسناتك و جميع الإخوة الأعضاء الذين فكروا واسسوا ومازالوا يعملون ودعمو وايدوا وما زالوا يدعمون ..ربنا يوفق الجميع لما فيه خير هذا البلد ..
    ولكن … وآه من لكن هذه ..كان قدرنا أن نظل بعيدين عنكم ونحس ونشعر بالتقصير من جانبنا دوماً عندما نرى ونسمع بأن القوم يتحركون ويعملون من أجل الآخرين ..ولكن صدقونا أننا معكم قلباً وقلباً فى كل ما تقومون به ..
    وعليه فإنى أضع إبنى المهنديس وضاح ليكون معكم نيابة عنى ويقوم بجهد ولوقليل فى أعمال الخير رغماً عن الأعباء الملقاة على عاتقه.. وبصراحة هو شايل البيت فى غيابى ..فادعوا له بالتوفيق ..وسيكون معكم بإذن الله .
    سدد الله خطاكم جميعا وايدكم بنصر من عنده وإلى الأمام يا شباب .

  5. حاج أحمد السلاوى كتب:

    الدينمو أفليقا … شوف بالله توارد الخواطر دة كيف .. بعد ما انا عملت إرسال لقيتك كاتب نفس الشىء اللى انا بفكر فيهو وممكن تقراه فىالمداخلة التى تلت تعليقك … يا سبحان الله..”وعليه فإنى أضع إبنى المهنديس وضاح ليكون معكم نيابة عنى ويقوم بجهد ولوقليل فى أعمال الخير رغماً عن الأعباء الملقاة على عاتقه.. وبصراحة هو شايل البيت فى غيابى ..فادعوا له بالتوفيق ..وسيكون معكم بإذن الله .”
    إنت قاعد تقرا افكارى أو أنا قاعد اقرا افكارك أو قاعدين الإتنين نقرا أفكار بعض .. إختار واحدة من ديل ..

  6. ودالزبير كتب:

    يد ليد تجدع بعيد

    يالله يا جماعه خلونا نعمل حاجه فيها فايده

  7. الغبشة كتب:

    سلام اهلى الغبش

    ابصم بالعشرة واوافق على ما اقترحته يا افليقيا
    واقترح ضم دار المسنين للشرائح الخاصه

    ربنا يوفقكم ويوفقنا جميعاً لعمل الخير

    والى لقااااااااءءءءءءء

  8. ابوالمنذر كتب:

    الخيرين ……..
    الرايعين بروعة بلدنا وسماح خصالها..
    ليكم تحيه من الفؤاد
    وربنا يتقبل ويوفق
    بس ورونا رقم حساب لمدونى الخارج السودانى لنال من هذا الاجر العظيم

  9. بشار أحمد بشار (إبن برد) كتب:

    موافقون بالإجماع السكوتي على قول أبو علي وتم التنسيق مع د/سنكلوني ليقوم بإجراء اللازم أصالة عن نفسة ونيابة عن العبد الفقير لله وربنا يتقبل من الجميع .

  10. نيام كتب:

    افليقا:
    والله فيك الخير .. غايتو في عمل الخير نشهد ليك ما بتتلعثم قيد انملة..
    بشار:
    انت ابوعلي دا مو زول عنترة العلمو الرماية فلما اشتد ساعدهـو رماهوـ..

  11. بشار أحمد بشار (إبن برد) كتب:

    نيام : ياهو ظاااااتو بي صفاتو يعني حيكون حسن عطية البغني الحجل بالرجل يالأفندي سوقني معاك والمرارة في الشباك؟؟؟؟

  12. مُخير كتب:

    الخيرّ إبن الأخيار أفليقا
    الخيرين الأخيار
    السلام عليكم
    نُثمن ونُثني الاقتراح ونؤكد على أهمية تأمين الدعم المادي والعيني، فالنوايا الحسنة والحماس وحدهما غير كافيين، وخير العمل أدومه وإن قلَّ.
    فتح أبواب الخير مهم وعز الطلب، لكن الأهم تأمين تدفق الخير فلابد من التركيز على تعزيز قنوات الاتصال وتأمين وصول المشاركات على الصعيدين الداخلي والخارجي لضمان إستمرارية نمو هذه المشاريع الخيّرة.
    ونضرع إلى المولى جل ةعلا أن يعيننا أجمعين على فعل الخير بتحقيق كافة الأهداف النبيلة والغايات السامية المرجوة من هذه المشاريع.

  13. aflaiga كتب:

    شوفو يا جماعة الخير : الخير ده اسهل شيئ فى الدنيا دى للزول الكايسو .
    يعنى اتخيلو قمنا كده لمينا الهديمات وناس بره رسلو اللبن ال اس 26 والسيريلاك والبمبرس وناس جوه قامو لمو الالعاب بتاعة ناس سرويات وحموديين والملابس شبه الجديده وقمنا كده وديناها الدراى كلين وبقت جديده يعنى حاجه كده كده زى السبيبه فى العجينه !!
    تعرفو انا متعود من زمان اى شيئ امرقو لى الله قبل ما اصل البيت بلقى بديلو قاعد وكذلك من هديمات سرويه وحمودى ولا من هديماتى انا ذاتى والله قبل ما تكتشف انو فى شيئ نقص تلقاهو تم وذاد بى غادى ذاتو .. مش قالو ما نقص مال من صدقه …
    والشيئ التانى الشفع الفى المايقوما ديل مش اولادنا ؟؟!!! اوريكم اولادنا كيف :
    اولادنا نتاج غياب وعينا عن التبصير بعدم جلبم للدنيا بلا رعايه واولادنا نتاج سكوتنا عن حالهم صحيح امرهم معلق فى رقبة الوالى امير المؤمنين لكن برضو امير المؤمنين حيسوى ايه ويخلى ايه ؟؟!!! ربنا يقدرو على اولاد الحلال الساكنين الحاج يوسف المايقوما بعد داك الساكنين دار المايقوما ديل براهم ربنا بيشيل ليهم حقهم من الكان السبب ….
    المحور المهم فى المقترح على ما اظن هو محور التنوير يعنى بعد اى زياره لاى شريحه خاصه ود الزبير مطالب بعقد سمنار او ورشة او ندوه عن هذه الشريحه وعزت مطالب بعرض الاشكالات بالبروجكتور والمتحدثين راقديييييييييييييييييييييييييييييييين وفاهمييييييييييييييييييين وجازيييييييييييييييييييين ..
    وجاييكم ..
    البشاوى : اقعد اتجرجر لمن شفع المايقوما يحتاجو لكتب المدرسه بدل اللبن … وين النشاط ؟؟ ده حالتك الحنييييييييييييييييييييييييييين ؟؟!!

  14. البشاوى كتب:

    المدونون الكرام
    وصلت اولى بشائر الخير دعما لابناءنا المضيًعون بفعل فاعل من الاكارم بشار
    وسنكل
    وهيلا هيلا

  15. الغبشة كتب:

    صباحاتكم خير
    عمى البشاوى انا بديت اشوف الناس الحولى وبديت اشرح الفكره واذا ربنا اراد اجمع ما يصلنا واتصل عليكم واشوف اوصل ليكم كيف ممكن؟

  16. مُخير كتب:

    يسلموا الخيرين
    والله الفكرة بتاعت الملابس واللُعب دي شغالة بنفس، يعني ناس برة كل زول يقوم يلملم كمية ويا حبذا لو عمم الفكرة على الجيران والمعارف والحبان ويقوم يجهز طرد محترم يمُكن إرساله بالبريد العادي على العنوان البريدي للأخ البشاوي ؟؟،
    طبعاً ما فرقت ملابس صيف أو شتاء، لُعب وبطاطين في النهاية أية حاجة حتسد فرقة وتفرح طفل محروم والأهم تنزل في عداد الحسنات وتنفع يوم لا ينفع مال ولا بنون …. وهيلا هيلا هيلا

  17. حاج أحمد السلاوى كتب:

    الدينمو افليقا ..وكل فاعلى الخير..سلاما جاكم
    هاتفنى امنس الأول الأخ الدكتور ياسر طه ( أتذكرونه ..؟) ويريد ان يعرف أرقام حسابات الجمعية الخيرية حتى يتسنى له المساهمة فى هذه الأعمال الخيرية بحكم وجوده خارج دولة أمازونيا العظمى ..
    يرجى توضيح الحسابات لأن جميع السادة المُهجّرون والمهاجرين ثم المغتربين لديهم الرغبة الأكيدة فى مد يد العون والمساهمة بقدر المستطاع فى عمل الخير ..نسأل الله أن يجعل ذلك فى ميزان حسنات الجميع ..ومن يفعل الخير لا يعدم جوازيه .ولا يذهب العرف بين الله والناس .
    ودمتم يا أهل الخير ..وبالتوفيق إن شاء الله… ووضاح جاييكم بالباب .

  18. سهيل كتب:

    بالتوفيق

  19. الأحباء سلام
    لصعوبة فتح الحساب حاليا ارتضينا أن تكون التحويلات باسم مدير المال
    خالد سليمان مدني
    و للاستفسار الهاتف
    00249919991880
    عبر
    uaexchange
    و الا أي نافذة تأتي للسودان… أو تكليف واحد من الحبان ليدفع المعلوم خصما من قروش ناس “عواطف” على أن يعوضها لهم بغويشه و الا خاتم
    و دمتم

  20. حاج أحمد السلاوى كتب:

    أبو عصمت … يعجبنى فيك إنك دائماً تفكر فى أمور عواطف وما يسر بالها ويبهجها ..ياخ بطل كسير التلج الكتيييييير دة ..بعد شوية حتلاقى عندك رطوبة من برودة التلج ..غايتو جنس غايتو ..وكلامى دة كتبتو … سجن سجن غرامة غرامة …

  21. البشاوى كتب:

    بت اخوى الغبشة
    حبابك وحباب خيرك وناسو
    الان نحن بدأنا فى تلمس الاحتياجات الضرورية لهؤلاء الاطفال ووجدنا منافذ
    طيبة ستقودنا انشاء الله لعمل فاعل وطيب ولن يستغرق الامر وقتا طويلا

  22. الغبشة كتب:

    سلامات يا اهل الخير…………….
    لقد علمت من احدى العاملات بدار المايقوما ان اكثر ما يحتاج له صابون البدرة والديتول وصابون الفنيك لوازم عمليات تنضيف العنابر ومستلزمات الاطفال اما عن اللبن فهم يستخدمون للاعمار الصغيرة((أبتاميل1 Aptamil2 , AptamiL )وللاطفال الاكبر سناً نيدو فرموست وما شابه,علماً بان دار المايقوما بها من عمر يوم وحتى خمس سنوات,ولكم ان تتخيلوا ما يمكن ان يحتاجوه ايضاً من مستلزمات,
    كسره:اول جمعه من ابريل تصادف الاحتفال بيوم اليتم فهل فى رايكم هو اليوم المناسب لتقديم العون اما ماذا ترون؟
    ربنا يساعدكم على عمل الخير

  23. طارق أب أحمد كتب:

    ((حاج أحمد السلاوى

    الدينمو افليقا ..وكل فاعلى الخير..سلاما جاكم
    هاتفنى امنس الأول الأخ الدكتور ياسر طه ( أتذكرونه ..؟) ويريد ان يعرف أرقام حسابات الجمعية الخيرية حتى يتسنى له المساهمة فى هذه الأعمال الخيرية ))

    حاج السلاوى جسر للتواصل عبر قارات الدنيا الكبيره
    شفتوا الحكمه من السؤال بتاع حدد موقعك الجغرافى
    بارك الله فيك

  24. طارق أب أحمد كتب:

    هيلا هيلا

    شدوا الهمه الهمه قويه

    مارسيل خليفه

  25. مُخير كتب:

    ذكر السيد رئيس الجمعية د. عزت ما نصه ((: الأحباء سلام
    لصعوبة فتح الحساب حاليا ارتضينا أن تكون التحويلات باسم مدير المال
    خالد سليمان مدني
    و للاستفسار الهاتف: 00249919991880
    عبر – uaexchange و الا أي نافذة تأتي للسودان… أو تكليف واحد من الحبان ليدفع المعلوم خصما من قروش ناس “عواطف” على أن يعوضها لهم بغويشه و الا خاتم و دمتم (إنتهى النص)

    وبالتالي: الرؤية واضحة وعلى جميع من بالخارج التعجيل بالتحويل والله لا يضيع أجر من أحس عملا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s