ناس (سوداننا) ماديراين معانا ولا شنو ؟

Posted: الخميس,19 مارس, 2009 by ودالزبير in اخرى

بعد ماتم فتح منتدى أستاذ الفاتح جبرا إتوقعت أن أرى نشاط لتعمير ذلك المنتدى خصوصاً إن معظم السودانيين لهم باع وخبره في ثقافه المنتديات ويفضلون التعامل عبرها عوضاً عن المدونات لكن يبد أن أدروب ولوف فمعظم عضويتنا هنا لا تزال تحجم وتضن بالمشاركه هناك وكل الشكوى إن الجميع يحاول المشاركه في موقع الأستاذ لا المنتدى .. راجعت المشاركات للعضويه البالغه 48 عضو حتى اليوم فكانت مشاركات البعض هزيله جداً بواقع مشاركه أو إتنين فقط بل أن البعض سجل ولم يشارك ..

طبعاً من المفهوم لي إنه من الصعوبه أن تحدد لشخص أين يكتب أو عن ماذا يكتب لكن يا شباب لو دي طريقتكم المنتدى راح يموت لنه حالياً في الصفحه بتلقى كل الردود والمشاركات لودالزبير هو ده منتدى الفاتح جبرا ولا منتدى ودالزبير

مثلاً هسه عزت بقاريتش ده لو نشر موضوع نونو في المنتدى بدل عن سوداننا مش كان أحسن ويكون إتجنب التكرار لنفس الموضوع النشرته الغبشه وقس على ذلك يعني نقسم الجهد على الموقعين وكده ..
ياكمان خلونا نجيب عضويه مستجلبه من الخارج وعينكم بعد داك ماتشوف إلا النور
d8b3d8aa-d8a7d984d8add8a8d8a7d98ad8a81

Advertisements
تعليقات
  1. الصبر يا ود الزبير – يعنى وزى ما قلتا – ح ياخد الموضوع زمن – بعدين وصراحة شايف انو الناس بتكتب ومامقصرة – احتمال للانشغال او لخلافه فما توفقو فى الكتابة.

    شيل الصبر شوية يا حبيب.

    بالمناسبة – الزوول داك قالو شاتوهو من تدريب الهلال !!!

  2. يا ود الزبير – انته الاعلانات دى اخدتا ليها تصريح من وين ؟؟؟

  3. ودالزبير كتب:

    قال ليك

    واحد قبطي أبوه مات أصحابه قالوا ليهو لازم تعمل إعلان في الجريده بالوفاه دي صاحبنا شاف قروش الإعلان كتيره قام كتب في الإعلان :
    مرقص ينعى وألده ويصلح الساعات

  4. ودالزبير كتب:

    ياولدنا

    قروش الإعلان دفعناها مقدم وكده

  5. انتا اولاد بمبه العندك ديل اطبعتا بيهم ولا شنو ؟؟؟

  6. ابوالمنذر كتب:

    ودالزبير….
    وين يا اخونا..
    معليش الولف كتال

  7. ودالزبير كتب:

    أبو المنزر

    وين يارجل والبورت على حسك

    الليله هلالك بيستر مع ناس بورسودان ديل

  8. ماتنسى حبايبنا ناس الزووول الليلة مع النيل . وماادراك ما النيل

  9. aflaiga كتب:

    ود الزبير : ثرو كل المدونين :
    لدى اقتراح قد لا يعجب الكثيرين ولكن سجن سجن غرامه :
    لما استحال دمج الموقعين فى موقع واحد وانهاء المساسقه والاذدواجيه بعد عودة موقع البروف اقترح ان يتم الغاء منتدى الفاتح جبرا ويتم استبداله بسوداننا كمنتدى ويكون الموقع بتاع الفاتح كما هو يعنى من داخل موقع جبرا تدق على لينك المنتدى تخش سوداننا وممكن تخش سوداننا من العنوان بتاعا القديم برضو ولا رايكم شنو ؟؟؟

  10. طارق أب أحمد كتب:

    يا أفليقا و سترايكر
    القصه ما قصة رغيف القصه أنو ود الزبير داير يملح الأعلان

    نعمل ليهو غرامه عدد جغميه تورتات فى الرحله
    و لا يعمل عرض خاص أيو واحد بجى سيدى بيك شايل لاب توب و فاتح الصوره فى الموقع ياخد تورته تانيه بروموشن

  11. Nourlight كتب:

    رغم اني ما فاهمة بالضبط …
    لكن رأي افلايقا معتدل وقريب من الصواب..لذلك اثني 🙂

  12. سمراء كتب:

    ود الزبير بصراحه موقع الفاتح جبرا ده قدر مالكلكته فيهو ابو يسجلونى ….ياربى يكون من شنو ؟
    بالجد ماعرفته اسجل !!!!

    بمناسبة عيد الام ….زاها قلت لىالطلبات كلها مجانا بمافيها التورتات !!

  13. ودالزبير كتب:

    إستقاله

    هسه الزول لو داير يكتب إستقاله من هنا يعنونها لمنو ؟؟

    خلاص يا شباب لقد حزمت أمري ولا يسعني إلا أن أودعكم منتقلاً لمنتدى أستاذ الفاتح جبرا كاتباً ومشاركاً بهناك شاكراً لكم تلك الفتره الذهبيه التي قضيناها معاً طالباً العفو والعافيه من كل شخص وصله منا رزاز كلام متمنياً أن نلتقى في رحاب هذا السايبر الرحيب مع وأفر الشكر والتقدير.
    وإنا لله وإنا إليه راجعون ….

  14. يا ود الزبير سلام

    مالك داير تبقى لينا زي الأحسبون يا معانا يا بلاش…

    (أحسب) ان ما جذبنا لمجلة سوداننا الالكترونية شكلها القريب من الدانقا الزمان تكون المواضيع معروضة حسب تسلسلها و تكون التعليقات كذلك كما أتاحوا لكل من يرقب في باس وورد أن يناله و يدخل صورته الرمزية و يدفع بموضوعاته و يتلقى عليها التعليقات…

    أما شكل منتدى ساخر سبيل يشبة المنتديات التي لا تعرف من كتب و أين علق و متى علق و نحن كبرنا علي التعلم في ارتيادها كما أن طبيعة المنتدى و المحل البكتبوا فيهو و الصور ذاتا لا تظهر كما تظهر هنا و لا تستطيع ترتيبها و لا وضعها في موضوع واحد …

    فمن هنا اثنى على كلام أفليقا و ارى أن لا ضرورة لمنتدى ساخر سبيل و تظل شعلة سوداننا متقدة … كما قالت سمراء الله يكفينا شر اللكلكة…

  15. ودالزبير كتب:

    كده نسحب الإستقاله بعدين نجيكم راجعين مادام جيتو قعدوا في طاوله الحوار

  16. البشاوى كتب:

    ود الزبير
    ياأخوى تستقيل مجان كدة ؟ فى شروط جزائية وكدة ماتخلينا ننكت ليك حق
    الاعلانات السابقة والحسة دة
    اثنى وبشدة اقتراح الدينمو افليقا

  17. aflaiga كتب:

    شباب : بحكمى من العالمين بتاريخ سوداننا وتاريخ موقع الفاتح جبرا وشهدت تاسيس الاول ونهضة الثانى اقول لكم بصراحه شديده :
    * موقع الفاتح جبرا هو العمل الناس الكتابه الحره واخرج اقلام كانت حبيسة التنفيس الذاتى .
    * موقع الفاتح جبرا هو الذى جمع كل هؤلاء الناس ووثق لما بينهم .
    * موقع الفاتح جبرا ظل وسيظل منارة للحريه والراى السديد مهما تناوشته رياح الاغراض هنا وهناك .
    * موقع سوداننا حين فكرنا انا وصديقى ستريكر فى انشائه كانت الفكره الا ينقطع تواصل الناس اذا حدث اى مكروه لموثع الفاتح هذا اولا .
    * موقع سوداننا كان السبب الثانى من انشائه ظهور ملكات كتابيه لعدد من الاعضاء فى قضايا لا يتسع المجال لنقاشها فى موقع الفاتح جبرا بشكله السابق .
    * موقع سوداننا قام بالدور المطلوب منه وذياده واسهم فى لم الشمل ولولاه لتفرق الناس ونسو اى علاقات بينهم .
    * وملا عاد موقع الاستاذ الفاتح من جديد كان الاجدى مباشرة ان يتم نقل المداخلات والتعليقات الى منتدى الموقع ليس كبديل لسوداننا بل كامتداد طبيعى للدور الذى من اجله قام الموقع .
    * والان وقد اصبح لسوداننا اسم واعتباريه لا يستطيع اى شخص ايا كان النيل منها وعاد موقع الاستاذ بكل هيبته ورونقه المعنوى لحين اكتمال التعديلات والتحديثات التى تتوافق مع الاعضاء .
    ارى ان الاصول اصول ولا يصح الا الصحيح وهو الاتى :
    * الاتجاه بالكامل لموقع الفاتح جبرا لاثراء الموقع من جديد عبر التداخل فى المواضيع التى يكتبها الاستاذ .
    * تحويل لنك المنتدى مباشرة لسوداننا ليكون سوداننا هو منتدى الاعضاء كما انشى لاجله اساسا .
    * من اراد الدخول الى سوداننا من داخل المنتدى فهو حر .
    * ومن اراد الدخول لسوداننا مباشرة بالنيم الحالى هو حر .
    * ان تعذر ذلك فانا اول من سيقوم بنقل جميع المواضيع التى كتبها فى سوداننا الى المنتدى لاننا نكتب فى مدونة سوداننا التى هى لكل المدونين بموقع الفاتح جبرا وهى واحتهم التى يستظلون بها حين توقف الاستاذ عن الكتابه لاى زروف او لمناقشة ما لا يمكن نقاشه فى موضوعات الاستاذ .
    دعونا نكون صريحين وواضحين ولو لمره :
    سوداننا ابن شرعى لموقع الفاتح جبرا ولا نريد ان نقصم ظهر الرجل بالكتابه عنه هنا ولا نريد انتقاص حق ولدنا ستريكر عمود الموقعين وركازتهما .
    والله من وارء القصد وهو يهدى لسواء السبيل …
    واقترح ان تكون رحلة الجمعه لنقاش كل الموضوعا تالعالقه وازالة اى سوء فهم بين الناس لانو لو ملاحظين انو لينا فتره معينه بدت تدخل بيننا حاجات لا تشبهنا ولا تشبه ما تواثقنا عليه من دستور شفهى معنوى غير مكتوب …
    ابنكم افليقا ..

  18. ودالزبير كتب:

    بسم الله والصلاه والسلام على رسول الله : وبعد

    حرصاً على لم الشمل كتبت البوست أعلاه من باب الإشفاق على المدونيون الذين وضح إن جهودهم قد تتفرق أيدي سبأ .

    لم يدر بخلدي أبداً التقليل من مجهودات إسترايكر ولا زلت أحتفظ بذكريات تكوين هذه المدونه وسوء الفهم من بعض الكبار هنا والكلمه الأفتتاحيه لسودننا التي خلفت الكثير من المرارات لدى البعض والتي إحتجنا لمجهود ضخم حتى تجاوزنا آثارها ..

    كما ذكر أفليقا فوق لابد من الحديث الشفيف والصريح حتى لا تتراكم الأشياء ويصعب بعد ذلك علاجها ..
    لمن يقول إن ليست هناك مشكله دعوني أقول لا بل توجد مشكله وهي تتعلق بمكان تواجدنا ..
    شخصياً أبحث عن مكان يضم أغلب الأعضاء في وقت واحد سواء سوداننا أو موقع أستاذ الفاتح أو المنتدى المهم أن نتفق على مكان لقاء .
    إنشاء الله شارع عبيد ختم جنب مطعم سيدي بيه.

    أها وأصلوا معانا الحوار عشان نتفق قبل القمه العربيه

  19. الغبشة كتب:

    سلمات للكل…………
    نحن زى مابقولوا اصلنا من القمردينية لكن لاسباب خلت اهلنا الكبار يرحلو على سوداننا اها قمنا اتعودنا على هنا لكن برضو اولاً وأخيراً اصلنا وساسنا هناك وما بنغيرو,وحنظل فى سوداننا الإلكترونى والجغرافى,
    يمكن ياودالزبير لسه ما إتعودنا على الطلة الجديدة,وحكاية التسجيل وصعوبة الدخول بهناك شوية أخرت تواجدنا
    وزى ماقال ابكرون نطالب هناك باللون القمردينى وبتبسيط الدخول
    كسرة :هو على كيفك تقدم إستقالتك هسى بتقدر تقول لناس بيتكم داير أستقيل منكم؟هسى الكلام ده بجى؟
    والى لقاااااءءءءءءء

  20. د.ياسين شمباتى كتب:

    افليقا…اثنى وبشدة..بالمناسبة انا كنت مجهز بوست عن سوداننا واستمرارنا فيها الى جنب موقع البروف,,بس ايامها كانت(المعركة)فى قمة اوارها ومافى طريقة لزيادة النار..
    علشان كدة حقو نكون موضوعيين وصريحين زى ما ذكرت عشان ننضف العوالق ونزيل الرواسب..

    ود الزبير..شايفك مصر على الاعلانات غير مدفوعة القيمة..

  21. Nourlight كتب:

    المهم انتو اتذكروا انه فيه ناس مثلاً ما ليهم علاقة بموقع الاستاذ الفاتح جبرا
    ولما تعرفوا علي المجموعة كان من خلال سوداننا…
    ولو انتقلتوا ..احتمال كبير ما ينتقلوا معاكم…انا اعرف قراء كثر يقرأوا لسوداننا بانتظام لكنهم لا يعرفوا الكثير عن موقع الاستاذ…
    ……………….

  22. البشاوى كتب:

    افليقا
    الصحيح صحيح الناس تتلم وترتب امورا بس الرحلة تبقى مؤتمر ولا رحلة؟
    نور لايت
    لاتحزنى كونى مكانك واكتبى وستجديننا معك
    ومتأكد أنك ستكونين أكثر سعادة عندما تجدين نور لايت ساكنة البيتين
    موقع البروف وسوداننا

  23. aflaiga كتب:

    البشاوى : سعيدين ايما سعاده باصطباحاتك النديه .. قدر دا ؟؟؟
    الصحيح صحيح ميه ميه والرحله الما حلت مشكله اريتا ما تقوم غايتو يوم الجمعه سنقوم باختيار مكان للرحله ارضيتو سيراميك لا فيهو حجر لا فيهو عكاز ولتكن الرحله مؤتمرنا الاول الذى فيه نتواثق على ما ينفع ونبعد الما ( نافع ) ..

  24. سهيل كتب:

    “المهم انتو اتذكروا انه فيه ناس مثلاً ما ليهم علاقة بموقع الاستاذ الفاتح جبرا
    ولما تعرفوا علي المجموعة كان من خلال سوداننا…
    ولو انتقلتوا ..احتمال كبير ما ينتقلوا معاكم…انا اعرف قراء كثر يقرأوا لسوداننا بانتظام لكنهم لا يعرفوا الكثير عن موقع الاستاذ…”

    والله يا اخت نور لايت .. كلامك الكتبتيهو دا عين العقل و نظره ثاقبه لعواقب لا يمكن التنبؤ بها..

  25. سمراء كتب:

    البياخه واللتاخه ليكم شنو انتو هوى ها !!!!!

    ودالزبير ومن لف لفهو وووو ..زماقلن ليكم ورونا الدرب ندخل كيف؟
    ولا سجلو لينا وادونا الباسورد ياجمااااااااعه ..ز.راجياكم وكدا

    اعتبرو التسجيل فتح خشم الباسورد مهر عديل كده ……اصلو الا نقول كده

  26. ودالزبير كتب:

    سمراء من بلادي

    داير تدخلي وين بالضبط ما ياكي جو الجك دخول أكتر من كده كيف يعني ؟؟

    بهناك ماعرفتي الدرب بتاع منتدى أستاذ الفاتح ولا السؤال شنو يعني ؟؟

    وضحي طلبك وبعدين بنحولك للجنه شئون العضويه وبالمره جهزي ليك صورتين بوستال وشهاده خلو طرف من الضرائب وإبراء زمه من لزكاه وخلو طرف من الإلزاميه وشهاده من اللجنه لشعبيه وفيش وتشبيه وشهاده حسن سيره وسلوك من مواقع إسفيريه معترفه بها وإتنين ضامن وجيبي معاك رسوم التسجيل البالغ قدرها 100000000 جنيه .
    بس وطوالي بتتسجلي

  27. سمراء كتب:

    ود الزبير انا قلت ليك دايرة لى لوترى ، يلولو كرعينك

    ياخ اصحى معانا شويه ده شنو ياخ (وش زهجان ) دايرة ادخل لى بيت الفاتح
    وماقادره اسجل بتجينى عباطات كتيرة كده ماعندى اخلاق ليها بس …اها
    تساعدنى ولا اشكيك لى الله ؟؟؟؟

  28. سمراء – انتى فعلا جديدة بجاى شكلك كده

    ياود الزبير قول لجماعة الهوم ديل اتصلحو معانا – والا بحصلو ناس سوسن ديلك .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s