خندقاوى حبيسا – خندقاوى عريسا ..

Posted: الجمعة,20 مارس, 2009 by aflaiga in اخرى

طبعا يا جماعة الخير لحدى امبارح القريبه دى انا شخصيا كنت قايل خندقاوى اسى فى السعوديه وانو الشغلو مننا هو محاولات اعادة الحسابات المختلفه التى تعرضت للاستهداف فى رحلته الاخيره للسودان !!! ولكن اتصالا رائعا منه بالامس من العاصمه قد نبهنى خلاله الى انه لم يغادر السودان مما جا !! اى واله مما جا !! وكان حبيسا لمرافقة احدى قريباته المريضه شفاها الله وعافاها .. واها لمن الود خندقاوى قام كدى قال يرجع السعوديه لمت فيه مره ادتو شنكل كعبلتو وراح واقع على وشو معرسا ومن ديك وعييييك .. المهم يا جماعة الخير اخونا خندقاوى الان عريس والان فى الخرطوم وسوف تكون الرحله بتاعة الجمعه كان الله هون على شرفه  وشرف البت الشاطره الربطتو لينا بدل قاعد ينطط لينا بين السعوديه والخرتوم  ويضحك فى ناس عم السلاوى !! اها يا حاج السلاوى وود الفتيحاب بعد ده غير شمباتى زول عندو كلام مع خندقاوى مافى مع انو شمباتى ذاتو الايامات دى واقع لينا فى بوستات الحنه والخضاب الله يجيب العواقب سليمه !!! ختاما انابة عن اسرة تحرير سوداننا واسرة تحرير موقع الفاتح جبرا نتقدم باحر التهانى ونسال الله ان يجمع بينهما بالرفاء والبنين … وموعدنا الجمعه كان الله هون .. ونسمع احلى سلام تعليقات من المدونين ونسمع احلى ذغروده من المدونات وعقبال العزابه يا المطير عينيك والمطيره عينيكى !!!!.

 

Advertisements
تعليقات
  1. مُخير كتب:

    ألف مبروك للأخ خندقاوي بالرفاء البنين وبيت مال وعيال

  2. د.ياسين شمباتى كتب:

    افليقا..سلامات..

    حقيقة خندقاوى كان معصور زى ما ذكرت وكانت عمتو طريحة الفراش_والى الاّن_ربنا يواليها بالعافية والشفا,,وعقدو جا على حين غرة وهو كان محرج بشدة منكم,,بس انتو دايما فيكم الخير..

    وبمناسبة العرس دى ,,يا اخوى امس حاج السلاوى و ودالفتيحاب قرروا انى ما ارجع من اجازتى الا وانا امورى واضحة!!! بعد دا قبل على سهيل و السعيد ومشاكل..

    خندقاوى..تانى مبارك وربنا يجمع بينكم على خير..

  3. د.ياسين شمباتى كتب:

    ابكرون..جايييييييييييييييييييييييييييييييييك

  4. الغبشة كتب:

    سلامات وتبريكات كتيييييرة لخندقاوى بالرفاء والبنين

  5. ابكرون كتب:

    مبروك لخندقاوي ومدام خندقاوي وبالرفاه والبنين ….وعقبالنا يا رب…
    يسن لا بالله عليك الله ما تجيني الرووووووووب…..

  6. د.ياسين شمباتى كتب:

    والله يا ابكرون بعد قلت حقى برقبتى ممكن نخليك,,لكن شنو التهديدات البهناك دى؟؟؟ الراجل يقول بغم!! اها بغم…..

  7. مبروك للعزيز خندقاوى والف مبروك للمدام وبيت مال وعيال انشاء الله.

    يس

    سهيل

    السعيد

    مشاكل

  8. د.ياسين شمباتى كتب:

    استرايكر..انت يا اخوى ما ادوك الترتيب التصاعدى والتنازلى فى المدرسة ولا شنو!!؟؟ فى اتنييين قدامى,,جيبنى جنب مشاكل,,السعيد طبعا عاملها ماستر وداير يقرأ,,قديمة والله..

    لكن ما دام قلت كدة,,بجى كاسح ليك فيهم..

  9. aflaiga كتب:

    سيادتو ابكرون : والله يا سعادتك الايامات دى ملاحظين انو ( كفاءتك القتاليه فى الكتابه قلت ) نتمنى ان تعود كما كنت وان تتجفف كل مصادر التهديد التى قد تذهب بالكفاءه القتاليه الى معارك فى غير معترك وطلقات فشنك – اعادك الله مصحّح التنشين واضح الرؤى لانو الاهداف غير الحقيقية دى سمعت انو بتاثر فى الرامى وبتستهلك ذخيره كان الاجدر بها ان تخصص للاهداف الفعاله المؤثره وفق خطط التاثير الفعال باقل خسائر يعنى ممكن تخت العتله فى المنفرد وطلقه طلقه وبى رزانه لانو زى ما انت عارف من اهم شروط الكفاءه القتاليه الخزن الاحتياطية وتعبئة الخزن بالطريقه السليمه ولا شنو يا سعادتو بشار ؟؟ ما شايفك بتصحح تنشين الناس دى ولا الناس محتاجه لطابور دروه ؟؟ لاختبار المساند ؟؟
    شمباتى : لقيتنى كيف باللهى ؟؟ مش خطير ؟؟
    ستريكر : اعيد الترتيب ده تانى متضمنا جميع الحالات الخاصه :
    افليقا
    افليقا تالت
    البشاوى
    البشاوى تالت
    السعيد
    مشاكل
    سهيل
    شمباتى

  10. بشار أحمد بشار (إبن برد) كتب:

    ألف مبروك يا خندقاوي إن شاء تغلبها بالمال وتغلبك بالعيال وخليك متخندق مع العروس وما تطلع إلا البيت إتملي بالأطفال و “المودام” تقول ليك قولتهم المشهورة : إنت يا راجل المقعدك في البيت ليل على نهار شنو ما تمشي تشوف ليك شغلة تشتغلها؟؟
    أن شاء الله كل الما ضاقوا يضوقو؛ أعزب ، عزباء، بكر، ثيب، واحد داير يتني أو يربع زينا كدة، أرملة كايسة الإستخلاف بعد وفاة زوجها ومازالت صبية و(يجي منها) وهلم جرا .

  11. ودالزبير كتب:

    العزيز خندقاوي

    ألف ألف مبروك وبيت مال وعيال

  12. د.ياسين شمباتى كتب:

    افليقا..انها قسمة ضيزى وما ابنت بها الحق..اسه عليك الله انت ما داير ليك اعادة تأهيل ودورة ضرب نار جديدة؟؟الا قاتل الله……الما بجيب اسمو..

    بعدين انت بديت كويس,,بس خربتها على فى النهاية,,الحقونى يا ابوى السلاوى و ودالفتيحاب..

  13. عمنا بشار

    ماخليتنا حتة نقبل عليها – والله لما وقعت من الكرسى من الضحك
    المشكلة جات عواطف وشايلا الوليد – بتضحك مالك – سكتا وما رديت – شالت اللابتوب وقرت تعليقك – ناولتنى الولد – قوم امشى غير ليهو – وامشى بحرى جيب الحجة الفلانية – وانتى راجع امشى ناس خالتى فى الكلاكلة شيل منهم الحاجة ديك – وقبل ما ترجع ناول الحاجة دى لناس عمتى فى ام درمان الحارة 99 . وارجع سريع .

  14. ابكرون كتب:

    استرايكر : يا حليلك ده طابور زياده بقوقو وزمزميتين(اسعل منو سعادتو افليقا) لكن لقيتك هرشه وجبل الرجاف يا خوي بعد الوليد الاسود زئرها بعلي شويه …..تتذكر الايميل بتاع الاسود الرسلتو ليكم ….؟يااااااحليلك

  15. ودالزبير كتب:

    بشار

    (( أرملة كايسة الإستخلاف بعد وفاة زوجها ومازالت صبية و(يجي منها) وهلم جرا .

    كيف يعني يجي منها

    أوع يكون بتلمح لموضوع السيده التانيه ولا كلمهم بقوا السيده الأولى

  16. ابكرون كتب:

    عارف يا افليقا متحسساتك وقراءاتك في محلها ….الكتابة دي ما (خدرا) قطرها اقصد ورقها لمن (يصفر) ما خلاص….الجو العام في( مجرتا) ما زي اول… لعهد قريب كنا بنستحمل بعض لكن ابو القدح لمن ينقلب صعب يستعدل تاني …….بعدين بقينا زي قهوة النشاط …تعددت المنابر …ويا السراي يا القراي واحدين شايلين السيخ وواحدين عاقدين الراي…..وشايف ناس (ناسا) رسلو ا مسبار يشوفوا في (مدونات ) وكواكب اخري جوها زي مجرتنا….عسي ولعل وفي البال شئ من حتي…….!

  17. د.ياسين شمباتى كتب:

    ابكرون..سوف نبقى مثل نجم السعد نحيا بالدواخل ريثما تصفو السماء..وخليك دايما قريب..

  18. بشار أحمد بشار (إبن برد) كتب:

    أخي أبكرون: علام القنوط علام؟؟ فوكها يا صديقي.
    الإبن استرايكر: مثني وثلاث ورباع لا يطيقه إلا أولو العزم من أشجار الدوم
    ود الزبير : سماسرة العربات بفتشو المكنة هل استاندرد ولا مخروطة؟؟ ومخروطة على كم؟؟ وفيها (دخنة) ولا مافيها والجيربوكس والدفرنشيال والطبلون ولمن إكون كلو تمام بيقولوا ليك العربية دي يجي منها وما تودناش في الكازوزة . معايير المقارنة مأخوذة من النظرية التطبيقية في الموسوعة الأفليقية.

  19. salih كتب:

    سلام يا اكارم

    مبارك يا خندقاوي.. بارك الله لك وبارك فيكما وجمع بينكما في خير ورزقكما الصالحين والصالحات..

  20. ساتينتود كتب:

    العريس خندقاوي

    بارك الله لكما وبارك فيكما وجمع بينكما في خير
    ورزقكم الذرية الصالحة

    وعقبال للحاج د. شمباتي

  21. حاج أحمد السلاوى كتب:

    ولدنا عمر الخندقاوى ( طبعن إسم عمر دة مافى زول عارفو ) ..
    إيه المفاجآت السارة دى.. ؟ ويبدو إنو السنّارة شبكت سريع ..
    ومن البعد نرسل ليك تهانينا الحارة بالقِران الميمون بإذن الله وإن شاء الله بيت مال وعيال..
    مهاتفتك لنا أمس أزالت العديد من التساؤلات وأبانت موقعك الجغرافى الحالى ( غاطس فى برميل العسل…نصيحة ابوية …شوية شوية..العسل مش حيخلص بسرعة ) وكنا على وشك إبلاغ الإنتربول للبحث عنك.. بس جات سليمة ..
    مرة أخرى نسال الله العلى القدير أن يديم عليك نعمة الصحة والعافية..مبارك … مبارك ..مبارك..
    سؤال سغيروووووونى ..متى يبدأ موسم الهجرة إلى الشرق ؟
    وزى ما قال عمك بشار ..إن شاء الله الما ضاقو يضوقو ..دة طبعن للعزاب من الشباب بس .. الكواشف يمتنعون حتى إشعار آخر..وحكاية الإستخلاف دى أظنها كلام جرايد .

  22. د.ياسين شمباتى كتب:

    ساتينتود..انت اسمك ما جابوهو فى القائمة عشان قروبك براهو!! انت غاطس وين يا ولدنا؟؟ارجو الابانة والافصاح..

    ابوى السلاوى..(زولك)حزم شنطتو ولا لسه؟؟والله بختو..

  23. سهيل كتب:

    الف مبروك يا عريس المدونه ..بيت مال و عيال إنشاءالله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s